| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ಚೋರಸುತ್ತಂ
4. Corasuttaṃ
೮೪. ‘‘ಅಟ್ಠಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತೋ ಮಹಾಚೋರೋ ಖಿಪ್ಪಂ ಪರಿಯಾಪಜ್ಜತಿ, ನ ಚಿರಟ್ಠಿತಿಕೋ ಹೋತಿ। ಕತಮೇಹಿ ಅಟ್ಠಹಿ? ಅಪ್ಪಹರನ್ತಸ್ಸ ಪಹರತಿ, ಅನವಸೇಸಂ ಆದಿಯತಿ, ಇತ್ಥಿಂ ಹನತಿ, ಕುಮಾರಿಂ ದೂಸೇತಿ, ಪಬ್ಬಜಿತಂ ವಿಲುಮ್ಪತಿ, ರಾಜಕೋಸಂ ವಿಲುಮ್ಪತಿ, ಅಚ್ಚಾಸನ್ನೇ ಕಮ್ಮಂ ಕರೋತಿ, ನ ಚ ನಿಧಾನಕುಸಲೋ ಹೋತಿ। ಇಮೇಹಿ ಖೋ, ಭಿಕ್ಖವೇ, ಅಟ್ಠಹಙ್ಗೇಹಿ ಸಮನ್ನಾಗತೋ ಮಹಾಚೋರೋ ಖಿಪ್ಪಂ ಪರಿಯಾಪಜ್ಜತಿ, ನ ಚಿರಟ್ಠಿತಿಕೋ ಹೋತಿ।
84. ‘‘Aṭṭhahi, bhikkhave, aṅgehi samannāgato mahācoro khippaṃ pariyāpajjati, na ciraṭṭhitiko hoti. Katamehi aṭṭhahi? Appaharantassa paharati, anavasesaṃ ādiyati, itthiṃ hanati, kumāriṃ dūseti, pabbajitaṃ vilumpati, rājakosaṃ vilumpati, accāsanne kammaṃ karoti, na ca nidhānakusalo hoti. Imehi kho, bhikkhave, aṭṭhahaṅgehi samannāgato mahācoro khippaṃ pariyāpajjati, na ciraṭṭhitiko hoti.
‘‘ಅಟ್ಠಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತೋ ಮಹಾಚೋರೋ ನ ಖಿಪ್ಪಂ ಪರಿಯಾಪಜ್ಜತಿ, ಚಿರಟ್ಠಿತಿಕೋ ಹೋತಿ। ಕತಮೇಹಿ ಅಟ್ಠಹಿ? ನ ಅಪ್ಪಹರನ್ತಸ್ಸ ಪಹರತಿ , ನ ಅನವಸೇಸಂ ಆದಿಯತಿ, ನ ಇತ್ಥಿಂ ಹನತಿ, ನ ಕುಮಾರಿಂ ದೂಸೇತಿ, ನ ಪಬ್ಬಜಿತಂ ವಿಲುಮ್ಪತಿ, ನ ರಾಜಕೋಸಂ ವಿಲುಮ್ಪತಿ, ನ ಅಚ್ಚಾಸನ್ನೇ ಕಮ್ಮಂ ಕರೋತಿ, ನಿಧಾನಕುಸಲೋ ಚ ಹೋತಿ। ಇಮೇಹಿ ಖೋ, ಭಿಕ್ಖವೇ, ಅಟ್ಠಹಙ್ಗೇಹಿ ಸಮನ್ನಾಗತೋ ಮಹಾಚೋರೋ ನ ಖಿಪ್ಪಂ ಪರಿಯಾಪಜ್ಜತಿ, ಚಿರಟ್ಠಿತಿಕೋ ಹೋತೀ’’ತಿ। ಚತುತ್ಥಂ।
‘‘Aṭṭhahi, bhikkhave, aṅgehi samannāgato mahācoro na khippaṃ pariyāpajjati, ciraṭṭhitiko hoti. Katamehi aṭṭhahi? Na appaharantassa paharati , na anavasesaṃ ādiyati, na itthiṃ hanati, na kumāriṃ dūseti, na pabbajitaṃ vilumpati, na rājakosaṃ vilumpati, na accāsanne kammaṃ karoti, nidhānakusalo ca hoti. Imehi kho, bhikkhave, aṭṭhahaṅgehi samannāgato mahācoro na khippaṃ pariyāpajjati, ciraṭṭhitiko hotī’’ti. Catutthaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ಚೋರಸುತ್ತವಣ್ಣನಾ • 4. Corasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೧೦. ಸದ್ಧಾಸುತ್ತಾದಿವಣ್ಣನಾ • 1-10. Saddhāsuttādivaṇṇanā
