| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[443] 5. жуул̣аб̣од̇хиж̇аад̇агаван̣н̣анаа
[443] 5. Cūḷabodhijātakavaṇṇanā
яо д̇з имам̣ висаалагкинд̇и ид̣̇ам̣ сад̇т̇аа ж̇зд̇аванз вихаранд̇о згам̣ год̇ханам̣ бхигкум̣ аараб̣бха гат̇зси. со гира бхигку нияяаанигз б̣уд̣̇д̇хасаасанз баб̣б̣аж̇ид̇вааби год̇хам̣ ниг̇г̇ахзд̇ум̣ наасагки, год̇хано ахоси убааяаасаб̣ахуло, аббамби вуд̇д̇о самаано абхисаж̇ж̇и губби б̣яаабаж̇ж̇и бад̇идтаяи. сад̇т̇аа д̇асса год̇ханабхаавам̣ суд̇ваа баггосаабзд̇ваа ‘‘сажжам̣ гира д̇вам̣ год̇хано’’д̇и бужчид̇ваа ‘‘сажжам̣ бханд̇з’’д̇и вуд̇д̇з ‘‘бхигку год̇хо наама ваарзд̇аб̣б̣о, зваруубо хи ид̇халогз жа баралогз жа анад̇т̇агаараго, д̇вам̣ ниггод̇хасса б̣уд̣̇д̇хасса саасанз баб̣б̣аж̇ид̇ваа гасмаа гуж̇жхаси, бораан̣агабан̣д̣ид̇аа б̣аахирасаасанз баб̣б̣аж̇ид̇вааби год̇хам̣ на гарим̣суу’’д̇и вад̇ваа ад̇ийд̇ам̣ аахари.
Yo te imaṃ visālakkhinti idaṃ satthā jetavane viharanto ekaṃ kodhanaṃ bhikkhuṃ ārabbha kathesi. So kira bhikkhu niyyānike buddhasāsane pabbajitvāpi kodhaṃ niggahetuṃ nāsakkhi, kodhano ahosi upāyāsabahulo, appampi vutto samāno abhisajji kuppi byāpajji patiṭṭhayi. Satthā tassa kodhanabhāvaṃ sutvā pakkosāpetvā ‘‘saccaṃ kira tvaṃ kodhano’’ti pucchitvā ‘‘saccaṃ bhante’’ti vutte ‘‘bhikkhu kodho nāma vāretabbo, evarūpo hi idhaloke ca paraloke ca anatthakārako, tvaṃ nikkodhassa buddhassa sāsane pabbajitvā kasmā kujjhasi, porāṇakapaṇḍitā bāhirasāsane pabbajitvāpi kodhaṃ na kariṃsū’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з ан̃н̃ад̇арасмим̣ гаасиниг̇амз зго б̣раахман̣о ад̣дхо махад̣̇д̇хано махаабхог̇о абуд̇д̇аго ахоси, д̇асса б̣раахман̣ий буд̇д̇ам̣ бад̇т̇зси. д̇ад̣̇аа б̣од̇хисад̇д̇о б̣рахмалогаа жавид̇ваа д̇ассаа гужчияам̣ ниб̣б̣ад̇д̇и, д̇асса наамаг̇г̇ахан̣ад̣̇ивасз ‘‘б̣од̇хигумааро’’д̇и наамам̣ гарим̣су. д̇асса ваяаббад̇д̇агаалз д̇аггасилам̣ г̇анд̇ваа саб̣б̣асиббаани уг̇г̇ан̣хид̇ваа бажжааг̇ад̇асса анижчанд̇ассзва маад̇аабид̇аро самаанаж̇аад̇игаа гулаа гумааригам̣ аанзсум̣. сааби б̣рахмалогаа жуд̇аава уд̇д̇амаруубад̇хараа д̣̇зважчарабадибхааг̇аа. д̇зсам̣ анижчамаанаанан̃н̃зва ан̃н̃аман̃н̃ам̣ ааваахавиваахам̣ гарим̣су. убхиннам̣ банзд̇зсам̣ гилзсасамуд̣̇аажааро наама на бхууд̇абуб̣б̣о, сам̣рааг̇авасзна ан̃н̃аман̃н̃асса ологанам̣ наама наахоси, субинзби мзт̇унад̇хаммо наама на д̣̇идтабуб̣б̣о, звам̣ барисуд̣̇д̇хасийлаа ахзсум̣.
Atīte bārāṇasiyaṃ brahmadatte rajjaṃ kārente aññatarasmiṃ kāsinigame eko brāhmaṇo aḍḍho mahaddhano mahābhogo aputtako ahosi, tassa brāhmaṇī puttaṃ patthesi. Tadā bodhisatto brahmalokā cavitvā tassā kucchiyaṃ nibbatti, tassa nāmaggahaṇadivase ‘‘bodhikumāro’’ti nāmaṃ kariṃsu. Tassa vayappattakāle takkasilaṃ gantvā sabbasippāni uggaṇhitvā paccāgatassa anicchantasseva mātāpitaro samānajātikā kulā kumārikaṃ ānesuṃ. Sāpi brahmalokā cutāva uttamarūpadharā devaccharapaṭibhāgā. Tesaṃ anicchamānānaññeva aññamaññaṃ āvāhavivāhaṃ kariṃsu. Ubhinnaṃ panetesaṃ kilesasamudācāro nāma na bhūtapubbo, saṃrāgavasena aññamaññassa olokanaṃ nāma nāhosi, supinepi methunadhammo nāma na diṭṭhapubbo, evaṃ parisuddhasīlā ahesuṃ.
ат̇аабарабхааг̇з махаасад̇д̇о маад̇аабид̇уусу гаалагад̇зсу д̇зсам̣ сарийрагижжам̣ гад̇ваа д̇ам̣ баггосид̇ваа ‘‘бхад̣̇д̣̇з, д̇вам̣ имам̣ асийд̇игодид̇ханам̣ г̇ахзд̇ваа сукзна ж̇ийваахий’’д̇и ааха. ‘‘гим̣ гариссат̇а д̇умхз бана, аяяабуд̇д̇аа’’д̇и? ‘‘маяхам̣ д̇ханзна гижжам̣ над̇т̇и, химаванд̇абад̣̇зсам̣ бависид̇ваа исибаб̣б̣аж̇ж̇ам̣ баб̣б̣аж̇ид̇ваа ад̇д̇ано бад̇идтам̣ гариссаамий’’д̇и. ‘‘гим̣ бана аяяабуд̇д̇а баб̣б̣аж̇ж̇аа наама бурисаанан̃н̃зва ваддад̇ий’’д̇и? ‘‘ид̇т̇ийнамби ваддад̇и, бхад̣̇д̣̇з’’д̇и. ‘‘д̇зна хи ахам̣ д̇умхзхи чаддид̇акзл̣ам̣ на г̇ан̣хиссаами, маяхамби д̇ханзна гижжам̣ над̇т̇и, ахамби баб̣б̣аж̇иссаамий’’д̇и. ‘‘саад̇ху, бхад̣̇д̣̇з’’д̇и. д̇з убхоби махаад̣̇аанам̣ д̣̇ад̇ваа нигкамид̇ваа раман̣ийяз бхуумибхааг̇з ассамам̣ гад̇ваа баб̣б̣аж̇ид̇ваа ун̃чаажарияааяа палаапалзхи яаабзнд̇аа д̇ад̇т̇а д̣̇асамад̇д̇аани сам̣важчараани васим̣су, жхаанам̣ бана нзсам̣ на д̇аава уббаж̇ж̇ад̇и. д̇з д̇ад̇т̇а баб̣б̣аж̇ж̇аасукзнзва д̣̇аса сам̣важчарз васид̇ваа лон̣амб̣иласзванад̇т̇ааяа ж̇анабад̣̇ажааригам̣ жаранд̇аа анубуб̣б̣зна б̣аараан̣асим̣ бад̇ваа рааж̇уяяаанз васим̣су.
Athāparabhāge mahāsatto mātāpitūsu kālakatesu tesaṃ sarīrakiccaṃ katvā taṃ pakkositvā ‘‘bhadde, tvaṃ imaṃ asītikoṭidhanaṃ gahetvā sukhena jīvāhī’’ti āha. ‘‘Kiṃ karissatha tumhe pana, ayyaputtā’’ti? ‘‘Mayhaṃ dhanena kiccaṃ natthi, himavantapadesaṃ pavisitvā isipabbajjaṃ pabbajitvā attano patiṭṭhaṃ karissāmī’’ti. ‘‘Kiṃ pana ayyaputta pabbajjā nāma purisānaññeva vaṭṭatī’’ti? ‘‘Itthīnampi vaṭṭati, bhadde’’ti. ‘‘Tena hi ahaṃ tumhehi chaṭṭitakheḷaṃ na gaṇhissāmi, mayhampi dhanena kiccaṃ natthi, ahampi pabbajissāmī’’ti. ‘‘Sādhu, bhadde’’ti. Te ubhopi mahādānaṃ datvā nikkhamitvā ramaṇīye bhūmibhāge assamaṃ katvā pabbajitvā uñchācariyāya phalāphalehi yāpentā tattha dasamattāni saṃvaccharāni vasiṃsu, jhānaṃ pana nesaṃ na tāva uppajjati. Te tattha pabbajjāsukheneva dasa saṃvacchare vasitvā loṇambilasevanatthāya janapadacārikaṃ carantā anupubbena bārāṇasiṃ patvā rājuyyāne vasiṃsu.
ат̇згад̣̇ивасам̣ рааж̇аа уяяаанабаалам̣ бан̣н̣аагаарам̣ аад̣̇ааяа ааг̇ад̇ам̣ д̣̇исваа ‘‘уяяаанагийл̣игам̣ гийл̣иссаама, уяяаанам̣ сод̇хзхий’’д̇и вад̇ваа д̇зна сод̇хид̇ам̣ саж̇ж̇ид̇ам̣ уяяаанам̣ маханд̇зна бариваарзна аг̇амааси. д̇асмим̣ кан̣з д̇з убхоби ж̇анаа уяяаанасса згабассз баб̣б̣аж̇ж̇аасукзна вийд̇инаамзд̇ваа нисиннаа хонд̇и. ат̇а рааж̇аа уяяаанз вижаранд̇о д̇з убхоби нисиннагз д̣̇исваа барамабаасаад̣̇игам̣ уд̇д̇амаруубад̇харам̣ бариб̣б̣ааж̇игам̣ ологзнд̇о бадиб̣ад̣̇д̇хажид̇д̇о ахоси. со гилзсавасзна гамбанд̇о ‘‘бужчиссаами д̇аава, аяам̣ бариб̣б̣ааж̇игаа имасса гим̣ ход̇ий’’д̇и б̣од̇хисад̇д̇ам̣ убасан̇гамид̇ваа ‘‘баб̣б̣аж̇ид̇а аяам̣ д̇з бариб̣б̣ааж̇игаа гим̣ ход̇ий’’д̇и бужчи. махаарааж̇а, гин̃жи на ход̇и, гзвалам̣ згабаб̣б̣аж̇ж̇ааяа баб̣б̣аж̇ид̇аа, абижа ко бана мз г̇ихигаалз баад̣̇абарижааригаа ахосийд̇и. д̇ам̣ суд̇ваа рааж̇аа ‘‘аяам̣ гирзд̇асса гин̃жи на ход̇и, абижа ко бана г̇ихигаалз баад̣̇абарижааригаа гирасса ахоси , сажз банаахам̣ иссарияаб̣алзна г̇ахзд̇ваа г̇ажчзяяам̣, гим̣ ну ко зса гариссад̇и, бариг̇г̇ан̣хиссаами д̇аава на’’нд̇и жинд̇зд̇ваа убасан̇гамид̇ваа батамам̣ г̇аат̇амааха –
Athekadivasaṃ rājā uyyānapālaṃ paṇṇākāraṃ ādāya āgataṃ disvā ‘‘uyyānakīḷikaṃ kīḷissāma, uyyānaṃ sodhehī’’ti vatvā tena sodhitaṃ sajjitaṃ uyyānaṃ mahantena parivārena agamāsi. Tasmiṃ khaṇe te ubhopi janā uyyānassa ekapasse pabbajjāsukhena vītināmetvā nisinnā honti. Atha rājā uyyāne vicaranto te ubhopi nisinnake disvā paramapāsādikaṃ uttamarūpadharaṃ paribbājikaṃ olokento paṭibaddhacitto ahosi. So kilesavasena kampanto ‘‘pucchissāmi tāva, ayaṃ paribbājikā imassa kiṃ hotī’’ti bodhisattaṃ upasaṅkamitvā ‘‘pabbajita ayaṃ te paribbājikā kiṃ hotī’’ti pucchi. Mahārāja, kiñci na hoti, kevalaṃ ekapabbajjāya pabbajitā, apica kho pana me gihikāle pādaparicārikā ahosīti. Taṃ sutvā rājā ‘‘ayaṃ kiretassa kiñci na hoti, apica kho pana gihikāle pādaparicārikā kirassa ahosi , sace panāhaṃ issariyabalena gahetvā gaccheyyaṃ, kiṃ nu kho esa karissati, pariggaṇhissāmi tāva na’’nti cintetvā upasaṅkamitvā paṭhamaṃ gāthamāha –
49.
49.
‘‘яо д̇з имам̣ висаалагким̣, бияам̣ сам̣мхид̇абхаасиним̣;
‘‘Yo te imaṃ visālakkhiṃ, piyaṃ saṃmhitabhāsiniṃ;
аад̣̇ааяа б̣алаа г̇ажчзяяа, гим̣ ну гаяирааси б̣раахман̣аа’’д̇и.
Ādāya balā gaccheyya, kiṃ nu kayirāsi brāhmaṇā’’ti.
д̇ад̇т̇а сам̣мхид̇абхаасининд̇и манд̣̇ахасид̇абхаасиним̣. б̣алаа г̇ажчзяяаад̇и б̣алаггаарзна аад̣̇ааяа г̇ажчзяяа. гим̣ ну гаяираасийд̇и д̇асса д̇вам̣ б̣раахман̣а гим̣ гарзяяаасийд̇и?
Tattha saṃmhitabhāsininti mandahasitabhāsiniṃ. Balā gaccheyyāti balakkārena ādāya gaccheyya. Kiṃ nu kayirāsīti tassa tvaṃ brāhmaṇa kiṃ kareyyāsīti?
ат̇асса гат̇ам̣ суд̇ваа махаасад̇д̇о д̣̇уд̇ияам̣ г̇аат̇амааха –
Athassa kathaṃ sutvā mahāsatto dutiyaṃ gāthamāha –
50.
50.
‘‘уббаж̇ж̇з мз на мужжзяяа, на мз мужжзяяа ж̇ийвад̇о;
‘‘Uppajje me na mucceyya, na me mucceyya jīvato;
раж̇ам̣ва вибулаа вудти, киббамзва ниваараяз’’д̇и.
Rajaṃva vipulā vuṭṭhi, khippameva nivāraye’’ti.
д̇ассад̇т̇о – махаарааж̇а, сажз имам̣ г̇ахзд̇ваа г̇ажчанд̇з гисмин̃жи мама аб̣бханд̇арз гобо уббаж̇ж̇зяяа, со мз анд̇о уббаж̇ж̇ид̇ваа на мужжзяяа, яааваахам̣ ж̇ийваами, д̇аава мз на мужжзяяа. наасса анд̇о гханасанниваасзна бад̇идтаад̇ум̣ д̣̇ассаами, ат̇а ко яат̇аа уббаннам̣ раж̇ам̣ вибулаа мзгхавудти киббам̣ ниваарзд̇и, д̇ат̇аа киббамзва нам̣ мзд̇д̇аабхааванааяа ниг̇г̇ахзд̇ваа ваарзссаамийд̇и.
Tassattho – mahārāja, sace imaṃ gahetvā gacchante kismiñci mama abbhantare kopo uppajjeyya, so me anto uppajjitvā na mucceyya, yāvāhaṃ jīvāmi, tāva me na mucceyya. Nāssa anto ghanasannivāsena patiṭṭhātuṃ dassāmi, atha kho yathā uppannaṃ rajaṃ vipulā meghavuṭṭhi khippaṃ nivāreti, tathā khippameva naṃ mettābhāvanāya niggahetvā vāressāmīti.
звам̣ махаасад̇д̇о сийханаад̣̇ам̣ над̣̇и. рааж̇аа банасса гат̇ам̣ суд̇вааби анд̇хаб̣аалад̇ааяа бадиб̣ад̣̇д̇хам̣ ад̇д̇ано жид̇д̇ам̣ ниваарзд̇ум̣ асаггонд̇о ан̃н̃ад̇арам̣ амажжам̣ аан̣аабзси ‘‘имам̣ бариб̣б̣ааж̇игам̣ рааж̇анивзсанам̣ нзхий’’д̇и. со ‘‘саад̇хуу’’д̇и бадиссун̣ид̇ваа ‘‘ад̇хаммо логз вад̇д̇ад̇и, аяуд̇д̇а’’нд̇иаад̣̇ийни вад̇ваа барид̣̇звамаанам̣язва нам̣ аад̣̇ааяа бааяааси. б̣од̇хисад̇д̇о д̇ассаа барид̣̇званасад̣̇д̣̇ам̣ суд̇ваа згаваарам̣ ологзд̇ваа буна на ологзси. д̇ам̣ род̣̇анд̇им̣ барид̣̇званд̇им̣ рааж̇анивзсанамзва наяим̣су. соби б̣аараан̣асирааж̇аа уяяаанз бабан̃жам̣ агад̇ваава сийгхад̇арам̣ г̇анд̇ваа д̇ам̣ бариб̣б̣ааж̇игам̣ баггосаабзд̇ваа маханд̇зна яасзна ниманд̇зси. саа яасасса аг̇ун̣ам̣ баб̣б̣аж̇ааяа зва г̇ун̣ам̣ гат̇зси. рааж̇аа гзнажи барияааязна д̇ассаа манам̣ алабханд̇о д̇ам̣ згасмим̣ г̇аб̣бхз гаарзд̇ваа жинд̇зси ‘‘аяам̣ бариб̣б̣ааж̇игаа зваруубам̣ яасам̣ на ижчад̇и, соби д̇аабасо зваруубам̣ маад̇уг̇аамам̣ г̇ахзд̇ваа г̇ажчанд̇з гуж̇жхид̇ваа ологид̇амад̇д̇амби на агааси, баб̣б̣аж̇ид̇аа ко бана б̣ахумааяаа хонд̇и, гин̃жи баяож̇зд̇ваа анад̇т̇амби мз гарзяяа, г̇ажчаами д̇аава ж̇аанаами гим̣ гаронд̇о нисинно’’д̇и сан̣таад̇ум̣ асаггонд̇о уяяаанам̣ аг̇амааси. б̣од̇хисад̇д̇оби жийварам̣ сиб̣б̣анд̇о нисийд̣̇и. рааж̇аа манд̣̇абариваарова бад̣̇асад̣̇д̣̇ам̣ агаронд̇о сан̣игам̣ убасан̇гами. б̣од̇хисад̇д̇о рааж̇аанам̣ анологзд̇ваа жийварамзва сиб̣б̣и. рааж̇аа ‘‘аяам̣ гуж̇жхид̇ваа маяаа сад̣̇д̇хим̣ на саллабад̇ий’’д̇и ман̃н̃амаано ‘‘аяам̣ гуудад̇аабасо ‘год̇хасса уббаж̇ж̇ид̇ум̣ на д̣̇ассаами, уббаннамби нам̣ киббамзва ниг̇г̇ан̣хиссаамий’д̇и батамамзва г̇аж̇ж̇ид̇ваа ид̣̇аани год̇хзна т̇ад̣̇д̇хо худ̇ваа маяаа сад̣̇д̇хим̣ на саллабад̇ий’’д̇и сан̃н̃ааяа д̇ад̇ияам̣ г̇аат̇амааха –
Evaṃ mahāsatto sīhanādaṃ nadi. Rājā panassa kathaṃ sutvāpi andhabālatāya paṭibaddhaṃ attano cittaṃ nivāretuṃ asakkonto aññataraṃ amaccaṃ āṇāpesi ‘‘imaṃ paribbājikaṃ rājanivesanaṃ nehī’’ti. So ‘‘sādhū’’ti paṭissuṇitvā ‘‘adhammo loke vattati, ayutta’’ntiādīni vatvā paridevamānaṃyeva naṃ ādāya pāyāsi. Bodhisatto tassā paridevanasaddaṃ sutvā ekavāraṃ oloketvā puna na olokesi. Taṃ rodantiṃ paridevantiṃ rājanivesanameva nayiṃsu. Sopi bārāṇasirājā uyyāne papañcaṃ akatvāva sīghataraṃ gantvā taṃ paribbājikaṃ pakkosāpetvā mahantena yasena nimantesi. Sā yasassa aguṇaṃ pabbajāya eva guṇaṃ kathesi. Rājā kenaci pariyāyena tassā manaṃ alabhanto taṃ ekasmiṃ gabbhe kāretvā cintesi ‘‘ayaṃ paribbājikā evarūpaṃ yasaṃ na icchati, sopi tāpaso evarūpaṃ mātugāmaṃ gahetvā gacchante kujjhitvā olokitamattampi na akāsi, pabbajitā kho pana bahumāyā honti, kiñci payojetvā anatthampi me kareyya, gacchāmi tāva jānāmi kiṃ karonto nisinno’’ti saṇṭhātuṃ asakkonto uyyānaṃ agamāsi. Bodhisattopi cīvaraṃ sibbanto nisīdi. Rājā mandaparivārova padasaddaṃ akaronto saṇikaṃ upasaṅkami. Bodhisatto rājānaṃ anoloketvā cīvarameva sibbi. Rājā ‘‘ayaṃ kujjhitvā mayā saddhiṃ na sallapatī’’ti maññamāno ‘‘ayaṃ kūṭatāpaso ‘kodhassa uppajjituṃ na dassāmi, uppannampi naṃ khippameva niggaṇhissāmī’ti paṭhamameva gajjitvā idāni kodhena thaddho hutvā mayā saddhiṃ na sallapatī’’ti saññāya tatiyaṃ gāthamāha –
51.
51.
‘‘яам̣ ну буб̣б̣з вигад̇т̇ид̇т̇о, б̣аламхива абассид̇о;
‘‘Yaṃ nu pubbe vikatthittho, balamhiva apassito;
сваж̇ж̇а д̇ун̣хигад̇о д̣̇аани, сан̇гхаадим̣ сиб̣б̣амажчасий’’д̇и.
Svajja tuṇhikato dāni, saṅghāṭiṃ sibbamacchasī’’ti.
д̇ад̇т̇а б̣аламхива абассид̇од̇и б̣аланиссид̇о вияа худ̇ваа. д̇ун̣хигад̇од̇и гин̃жи авад̣̇анд̇о. сиб̣б̣амажчасийд̇и сиб̣б̣анд̇о ажчаси.
Tattha balamhiva apassitoti balanissito viya hutvā. Tuṇhikatoti kiñci avadanto. Sibbamacchasīti sibbanto acchasi.
д̇ам̣ суд̇ваа махаасад̇д̇о ‘‘аяам̣ рааж̇аа год̇хавасзна мам̣ наалабад̇ийд̇и ман̃н̃ад̇и, гат̇зссаами д̣̇аанисса уббаннасса год̇хасса васам̣ аг̇ад̇абхаава’’нд̇и жинд̇зд̇ваа жад̇уд̇т̇ам̣ г̇аат̇амааха –
Taṃ sutvā mahāsatto ‘‘ayaṃ rājā kodhavasena maṃ nālapatīti maññati, kathessāmi dānissa uppannassa kodhassa vasaṃ agatabhāva’’nti cintetvā catutthaṃ gāthamāha –
52.
52.
‘‘уббаж̇ж̇и мз на мужжид̇т̇а, на мз мужжид̇т̇а ж̇ийвад̇о;
‘‘Uppajji me na muccittha, na me muccittha jīvato;
раж̇ам̣ва вибулаа вудти, киббамзва ниваараяи’’нд̇и.
Rajaṃva vipulā vuṭṭhi, khippameva nivārayi’’nti.
д̇ассад̇т̇о – махаарааж̇а, уббаж̇ж̇и мз, на на уббаж̇ж̇и, на бана мз мужжид̇т̇а, наасса бависид̇ваа хад̣̇аяз таад̇ум̣ ад̣̇аасим̣, ид̇и со мама ж̇ийвад̇о на мужжид̇т̇зва, раж̇ам̣ вибулаа вудти вияа киббамзва нам̣ ниваарзсинд̇и.
Tassattho – mahārāja, uppajji me, na na uppajji, na pana me muccittha, nāssa pavisitvā hadaye ṭhātuṃ adāsiṃ, iti so mama jīvato na muccittheva, rajaṃ vipulā vuṭṭhi viya khippameva naṃ nivāresinti.
д̇ам̣ суд̇ваа рааж̇аа ‘‘гим̣ ну ко зса гобамзва санд̇хааяа вад̣̇ад̇и, уд̣̇ааху ан̃н̃ам̣ гин̃жи сиббам̣ санд̇хааяа гат̇зси, бужчиссаами д̇аава на’’нд̇и жинд̇зд̇ваа бужчанд̇о бан̃жамам̣ г̇аат̇амааха –
Taṃ sutvā rājā ‘‘kiṃ nu kho esa kopameva sandhāya vadati, udāhu aññaṃ kiñci sippaṃ sandhāya kathesi, pucchissāmi tāva na’’nti cintetvā pucchanto pañcamaṃ gāthamāha –
53.
53.
‘‘гим̣ д̇з уббаж̇ж̇и но мужжи, гим̣ д̇з на мужжи ж̇ийвад̇о;
‘‘Kiṃ te uppajji no mucci, kiṃ te na mucci jīvato;
раж̇ам̣ва вибулаа вудти, гад̇амам̣ д̇ам̣ ниваараяий’’д̇и.
Rajaṃva vipulā vuṭṭhi, katamaṃ taṃ nivārayī’’ti.
д̇ад̇т̇а гим̣ д̇з уббаж̇ж̇и но мужжийд̇и гим̣ д̇ава уббаж̇ж̇и жзва на мужжи жа.
Tattha kiṃ te uppajji no muccīti kiṃ tava uppajji ceva na mucci ca.
д̇ам̣ суд̇ваа б̣од̇хисад̇д̇о ‘‘махаарааж̇а, звам̣ год̇хо б̣ахуаад̣̇ийнаво махаавинаасад̣̇ааяаго, зсо мама уббаж̇ж̇и, уббаннан̃жа нам̣ мзд̇д̇аабхааванааяа ниваарзси’’нд̇и год̇хз аад̣̇ийнавам̣ багаасзнд̇о –
Taṃ sutvā bodhisatto ‘‘mahārāja, evaṃ kodho bahuādīnavo mahāvināsadāyako, eso mama uppajji, uppannañca naṃ mettābhāvanāya nivāresi’’nti kodhe ādīnavaṃ pakāsento –
54.
54.
‘‘яамхи ж̇аад̇з на бассад̇и, аж̇аад̇з саад̇ху бассад̇и;
‘‘Yamhi jāte na passati, ajāte sādhu passati;
со мз уббаж̇ж̇и но мужжи, год̇хо д̣̇уммзд̇хаг̇ожаро.
So me uppajji no mucci, kodho dummedhagocaro.
55.
55.
‘‘язна ж̇аад̇зна нанд̣̇анд̇и, амид̇д̇аа д̣̇угкамзсино;
‘‘Yena jātena nandanti, amittā dukkhamesino;
со мз уббаж̇ж̇и но мужжи, год̇хо д̣̇уммзд̇хаг̇ожаро.
So me uppajji no mucci, kodho dummedhagocaro.
56.
56.
‘‘яасмин̃жа ж̇ааяамаанамхи, сад̣̇ад̇т̇ам̣ нааваб̣уж̇жхад̇и;
‘‘Yasmiñca jāyamānamhi, sadatthaṃ nāvabujjhati;
со мз уббаж̇ж̇и но мужжи, год̇хо д̣̇уммзд̇хаг̇ожаро.
So me uppajji no mucci, kodho dummedhagocaro.
57.
57.
‘‘язнаабхибхууд̇о гусалам̣ ж̇ахаад̇и, бараггарз вибулан̃жааби ад̇т̇ам̣;
‘‘Yenābhibhūto kusalaṃ jahāti, parakkare vipulañcāpi atthaṃ;
са бхиймасзно б̣алаваа бамад̣̇д̣̇ий, год̇хо махаарааж̇а на мз амужжат̇а.
Sa bhīmaseno balavā pamaddī, kodho mahārāja na me amuccatha.
58.
58.
‘‘гадтасмим̣ мад̇т̇амаанасмим̣, бааваго наама ж̇ааяад̇и;
‘‘Kaṭṭhasmiṃ matthamānasmiṃ, pāvako nāma jāyati;
д̇амзва гадтам̣ д̣ахад̇и, яасмаа со ж̇ааяад̇з г̇ини.
Tameva kaṭṭhaṃ ḍahati, yasmā so jāyate gini.
59.
59.
‘‘звам̣ манд̣̇асса босасса, б̣ааласса авиж̇аанад̇о;
‘‘Evaṃ mandassa posassa, bālassa avijānato;
саарамбхаа ж̇ааяад̇з год̇хо, соби д̇знзва д̣аяхад̇и.
Sārambhā jāyate kodho, sopi teneva ḍayhati.
60.
60.
‘‘аг̇г̇ийва д̇ин̣агадтасмим̣, год̇хо яасса бавад̣дхад̇и;
‘‘Aggīva tiṇakaṭṭhasmiṃ, kodho yassa pavaḍḍhati;
нихийяад̇и д̇асса яасо, гаал̣абагкзва жанд̣̇имаа.
Nihīyati tassa yaso, kāḷapakkheva candimā.
61.
61.
‘‘анзд̇хо д̇хуумагзд̇уува, год̇хо яассуубасаммад̇и;
‘‘Anedho dhūmaketūva, kodho yassūpasammati;
аабуурад̇и д̇асса яасо, суггабагкзва жанд̣̇имаа’’д̇и. – имаа г̇аат̇аа ааха;
Āpūrati tassa yaso, sukkapakkheva candimā’’ti. – imā gāthā āha;
д̇ад̇т̇а на бассад̇ийд̇и ад̇д̇ад̇т̇амби на бассад̇и, баг̇зва барад̇т̇ам̣. саад̇ху бассад̇ийд̇и ад̇д̇ад̇т̇ам̣ барад̇т̇ам̣ убхаяад̇т̇амби саад̇ху бассад̇и. д̣̇уммзд̇хаг̇ожарод̇и ниббан̃н̃аанам̣ аад̇хаарабхууд̇о г̇ожаро. д̣̇угкамзсинод̇и д̣̇угкам̣ ижчанд̇аа. сад̣̇ад̇т̇анд̇и ад̇д̇ано ад̇т̇абхууд̇ам̣ ад̇т̇ад̇о жзва д̇хаммад̇о жа вуд̣̇д̇хим̣. бараггарзд̇и вибуламби ад̇т̇ам̣ уббаннам̣ барад̇о гаарзд̇и, абанзт̇а, на мз иминаа ад̇т̇од̇и вад̣̇ад̇и. са бхиймасзнод̇и со год̇хо бхиймааяа бхаяаж̇ананияаа махад̇ияаа гилзсасзнааяа саманнааг̇ад̇о. бамад̣̇д̣̇ийд̇и ад̇д̇ано б̣алавабхаавзна ул̣аарзби сад̇д̇з г̇ахзд̇ваа ад̇д̇ано васз гаран̣зна мад̣̇д̣̇анасамад̇т̇о. на мз амужжат̇аад̇и мама санд̇игаа могкам̣ на лабхад̇и, хад̣̇аяз ваа бана мз кийрам̣ вияа мухуд̇д̇ам̣ д̣̇ад̇хибхаавзна на бад̇идтахид̇т̇аад̇иби ад̇т̇о.
Tattha na passatīti attatthampi na passati, pageva paratthaṃ. Sādhu passatīti attatthaṃ paratthaṃ ubhayatthampi sādhu passati. Dummedhagocaroti nippaññānaṃ ādhārabhūto gocaro. Dukkhamesinoti dukkhaṃ icchantā. Sadatthanti attano atthabhūtaṃ atthato ceva dhammato ca vuddhiṃ. Parakkareti vipulampi atthaṃ uppannaṃ parato kāreti, apanetha, na me iminā atthoti vadati. Sa bhīmasenoti so kodho bhīmāya bhayajananiyā mahatiyā kilesasenāya samannāgato. Pamaddīti attano balavabhāvena uḷārepi satte gahetvā attano vase karaṇena maddanasamattho. Na me amuccathāti mama santikā mokkhaṃ na labhati, hadaye vā pana me khīraṃ viya muhuttaṃ dadhibhāvena na patiṭṭhahitthātipi attho.
гадтасмим̣ мад̇т̇амаанасминд̇и аран̣ийсахид̇зна мад̇т̇ияамаанз, ‘‘мад̣̇д̣̇амаанасми’’нд̇иби баато. яасмаад̇и яад̇о гадтаа ж̇ааяад̇и, д̇амзва д̣ахад̇и. г̇инийд̇и аг̇г̇и. б̣ааласса авиж̇аанад̇од̇и б̣ааласса авиж̇аананд̇асса. саарамбхаа ж̇ааяад̇зд̇и ахам̣ д̇ванд̇и аагад̣дханавигад̣дханам̣ гаронд̇асса гаран̣уд̇д̇арияалагкан̣аа саарамбхаа аран̣иймад̇т̇анаа вияа бааваго год̇хо ж̇ааяад̇и. соби д̇знзваад̇и соби б̣аало д̇знзва год̇хзна гадтам̣ вияа аг̇г̇инаа д̣аяхад̇и. анзд̇хо д̇хуумагзд̇ууваад̇и анинд̇хано аг̇г̇и вияа. д̇ассаад̇и д̇асса ад̇хиваасанаканд̇ияаа саманнааг̇ад̇асса буг̇г̇аласса суггабагкз жанд̣̇о вияа лад̣̇д̇хо яасо абараабарам̣ аабуурад̇ийд̇и.
Kaṭṭhasmiṃ matthamānasminti araṇīsahitena matthiyamāne, ‘‘maddamānasmi’’ntipi pāṭho. Yasmāti yato kaṭṭhā jāyati, tameva ḍahati. Ginīti aggi. Bālassa avijānatoti bālassa avijānantassa. Sārambhā jāyateti ahaṃ tvanti ākaḍḍhanavikaḍḍhanaṃ karontassa karaṇuttariyalakkhaṇā sārambhā araṇīmatthanā viya pāvako kodho jāyati. Sopi tenevāti sopi bālo teneva kodhena kaṭṭhaṃ viya agginā ḍayhati. Anedho dhūmaketūvāti anindhano aggi viya. Tassāti tassa adhivāsanakhantiyā samannāgatassa puggalassa sukkapakkhe cando viya laddho yaso aparāparaṃ āpūratīti.
рааж̇аа махаасад̇д̇асса д̇хаммагат̇ам̣ суд̇ваа д̇удто згам̣ амажжам̣ аан̣аабзд̇ваа бариб̣б̣ааж̇игам̣ аахараабзд̇ваа ‘‘бханд̇з ниггод̇хад̇аабаса, убхоби д̇умхз баб̣б̣аж̇ж̇аасукзна вийд̇инаамзнд̇аа ид̇хзва уяяаанз васат̇а, ахам̣ во д̇хаммигам̣ рагкааваран̣аг̇уд̇д̇им̣ гариссаамий’’д̇и вад̇ваа камаабзд̇ваа ванд̣̇ид̇ваа баггаами. д̇з убхоби д̇ад̇т̇зва васим̣су. абарабхааг̇з бариб̣б̣ааж̇игаа гааламагааси. б̣од̇хисад̇д̇о д̇ассаа гаалагад̇ааяа химаванд̇ам̣ бависид̇ваа абхин̃н̃аа жа самаабад̇д̇ияо жа ниб̣б̣ад̇д̇зд̇ваа жад̇д̇ааро б̣рахмавихаарз бхаавзд̇ваа б̣рахмалогабарааяан̣о ахоси.
Rājā mahāsattassa dhammakathaṃ sutvā tuṭṭho ekaṃ amaccaṃ āṇāpetvā paribbājikaṃ āharāpetvā ‘‘bhante nikkodhatāpasa, ubhopi tumhe pabbajjāsukhena vītināmentā idheva uyyāne vasatha, ahaṃ vo dhammikaṃ rakkhāvaraṇaguttiṃ karissāmī’’ti vatvā khamāpetvā vanditvā pakkāmi. Te ubhopi tattheva vasiṃsu. Aparabhāge paribbājikā kālamakāsi. Bodhisatto tassā kālakatāya himavantaṃ pavisitvā abhiññā ca samāpattiyo ca nibbattetvā cattāro brahmavihāre bhāvetvā brahmalokaparāyaṇo ahosi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз год̇хано бхигку анааг̇аамипалз бад̇идтахи.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne kodhano bhikkhu anāgāmiphale patiṭṭhahi.
д̇ад̣̇аа бариб̣б̣ааж̇игаа раахуламаад̇аа ахоси, рааж̇аа аананд̣̇о, бариб̣б̣ааж̇аго бана ахамзва ахосинд̇и.
Tadā paribbājikā rāhulamātā ahosi, rājā ānando, paribbājako pana ahameva ahosinti.
жуул̣аб̣од̇хиж̇аад̇агаван̣н̣анаа бан̃жамаа.
Cūḷabodhijātakavaṇṇanā pañcamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 443. жуул̣аб̣од̇хиж̇аад̇агам̣ • 443. Cūḷabodhijātakaṃ
