| Library / Tipiṭaka / д̇ибидага • Tipiṭaka / маж̇жхиманигааяа • Majjhimanikāya |
4. жуул̣ад̣̇угкагканд̇хасуд̇д̇ам̣
4. Cūḷadukkhakkhandhasuttaṃ
175. звам̣ мз суд̇ам̣ – згам̣ самаяам̣ бхаг̇аваа саггзсу вихарад̇и габилавад̇т̇усмим̣ ниг̇род̇хаараамз. ат̇а ко махаанаамо сагго язна бхаг̇аваа д̇знубасан̇гами; убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисинно ко махаанаамо сагго бхаг̇аванд̇ам̣ зд̇ад̣̇авожа – ‘‘д̣̇ийгхарад̇д̇аахам̣, бханд̇з, бхаг̇авад̇аа звам̣ д̇хаммам̣ д̣̇зсид̇ам̣ ааж̇аанаами – ‘лобхо жид̇д̇асса убаггилзсо, д̣̇осо жид̇д̇асса убаггилзсо, мохо жид̇д̇асса убаггилзсо’д̇и. зван̃жаахам̣ 1, бханд̇з, бхаг̇авад̇аа д̇хаммам̣ д̣̇зсид̇ам̣ ааж̇аанаами – ‘лобхо жид̇д̇асса убаггилзсо, д̣̇осо жид̇д̇асса убаггилзсо, мохо жид̇д̇асса убаггилзсо’д̇и. ат̇а жа бана мз згад̣̇аа лобхад̇хаммааби жид̇д̇ам̣ барияаад̣̇ааяа д̇идтанд̇и, д̣̇осад̇хаммааби жид̇д̇ам̣ барияаад̣̇ааяа д̇идтанд̇и, мохад̇хаммааби жид̇д̇ам̣ барияаад̣̇ааяа д̇идтанд̇и. д̇асса маяхам̣, бханд̇з, звам̣ ход̇и – ‘госу наама мз д̇хаммо аж̇жхад̇д̇ам̣ аббахийно язна мз згад̣̇аа лобхад̇хаммааби жид̇д̇ам̣ барияаад̣̇ааяа д̇идтанд̇и, д̣̇осад̇хаммааби жид̇д̇ам̣ барияаад̣̇ааяа д̇идтанд̇и, мохад̇хаммааби жид̇д̇ам̣ барияаад̣̇ааяа д̇идтанд̇ий’’’д̇и.
175. Evaṃ me sutaṃ – ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho mahānāmo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho mahānāmo sakko bhagavantaṃ etadavoca – ‘‘dīgharattāhaṃ, bhante, bhagavatā evaṃ dhammaṃ desitaṃ ājānāmi – ‘lobho cittassa upakkileso, doso cittassa upakkileso, moho cittassa upakkileso’ti. Evañcāhaṃ 2, bhante, bhagavatā dhammaṃ desitaṃ ājānāmi – ‘lobho cittassa upakkileso, doso cittassa upakkileso, moho cittassa upakkileso’ti. Atha ca pana me ekadā lobhadhammāpi cittaṃ pariyādāya tiṭṭhanti, dosadhammāpi cittaṃ pariyādāya tiṭṭhanti, mohadhammāpi cittaṃ pariyādāya tiṭṭhanti. Tassa mayhaṃ, bhante, evaṃ hoti – ‘kosu nāma me dhammo ajjhattaṃ appahīno yena me ekadā lobhadhammāpi cittaṃ pariyādāya tiṭṭhanti, dosadhammāpi cittaṃ pariyādāya tiṭṭhanti, mohadhammāpi cittaṃ pariyādāya tiṭṭhantī’’’ti.
176. ‘‘со зва ко д̇з, махаанаама, д̇хаммо аж̇жхад̇д̇ам̣ аббахийно язна д̇з згад̣̇аа лобхад̇хаммааби жид̇д̇ам̣ барияаад̣̇ааяа д̇идтанд̇и, д̣̇осад̇хаммааби жид̇д̇ам̣ барияаад̣̇ааяа д̇идтанд̇и, мохад̇хаммааби жид̇д̇ам̣ барияаад̣̇ааяа д̇идтанд̇и. со жа хи д̇з, махаанаама, д̇хаммо аж̇жхад̇д̇ам̣ бахийно абхависса, на д̇вам̣ аг̇аарам̣ аж̇жхаавасзяяааси, на гаамз барибхун̃ж̇зяяааси. яасмаа жа ко д̇з, махаанаама, со зва д̇хаммо аж̇жхад̇д̇ам̣ аббахийно д̇асмаа д̇вам̣ аг̇аарам̣ аж̇жхаавасаси, гаамз барибхун̃ж̇аси.
176. ‘‘So eva kho te, mahānāma, dhammo ajjhattaṃ appahīno yena te ekadā lobhadhammāpi cittaṃ pariyādāya tiṭṭhanti, dosadhammāpi cittaṃ pariyādāya tiṭṭhanti, mohadhammāpi cittaṃ pariyādāya tiṭṭhanti. So ca hi te, mahānāma, dhammo ajjhattaṃ pahīno abhavissa, na tvaṃ agāraṃ ajjhāvaseyyāsi, na kāme paribhuñjeyyāsi. Yasmā ca kho te, mahānāma, so eva dhammo ajjhattaṃ appahīno tasmā tvaṃ agāraṃ ajjhāvasasi, kāme paribhuñjasi.
177. ‘‘‘аббассаад̣̇аа гаамаа б̣ахуд̣̇угкаа б̣ахубааяаасаа, аад̣̇ийнаво 3 зд̇т̇а бхияяо’д̇и – ид̇и жзби, махаанаама, арияасаавагасса яат̇аабхууд̇ам̣ саммаббан̃н̃ааяа суд̣̇идтам̣ ход̇и, со жа 4 ан̃н̃ад̇рзва гаамзхи ан̃н̃ад̇ра агусалзхи д̇хаммзхи бийд̇исукам̣ наад̇хиг̇ажчад̇и, ан̃н̃ам̣ ваа д̇ад̇о санд̇ад̇арам̣; ат̇а ко со нзва д̇аава анааваддий гаамзсу ход̇и. яад̇о жа ко, махаанаама, арияасаавагасса ‘аббассаад̣̇аа гаамаа б̣ахуд̣̇угкаа б̣ахубааяаасаа, аад̣̇ийнаво зд̇т̇а бхияяо’д̇и – звамзд̇ам̣ яат̇аабхууд̇ам̣ саммаббан̃н̃ааяа суд̣̇идтам̣ ход̇и, со жа ан̃н̃ад̇рзва гаамзхи ан̃н̃ад̇ра агусалзхи д̇хаммзхи бийд̇исукам̣ ад̇хиг̇ажчад̇и ан̃н̃ам̣ ваа д̇ад̇о санд̇ад̇арам̣; ат̇а ко со анааваддий гаамзсу ход̇и.
177. ‘‘‘Appassādā kāmā bahudukkhā bahupāyāsā, ādīnavo 5 ettha bhiyyo’ti – iti cepi, mahānāma, ariyasāvakassa yathābhūtaṃ sammappaññāya sudiṭṭhaṃ hoti, so ca 6 aññatreva kāmehi aññatra akusalehi dhammehi pītisukhaṃ nādhigacchati, aññaṃ vā tato santataraṃ; atha kho so neva tāva anāvaṭṭī kāmesu hoti. Yato ca kho, mahānāma, ariyasāvakassa ‘appassādā kāmā bahudukkhā bahupāyāsā, ādīnavo ettha bhiyyo’ti – evametaṃ yathābhūtaṃ sammappaññāya sudiṭṭhaṃ hoti, so ca aññatreva kāmehi aññatra akusalehi dhammehi pītisukhaṃ adhigacchati aññaṃ vā tato santataraṃ; atha kho so anāvaṭṭī kāmesu hoti.
‘‘маяхамби ко, махаанаама , буб̣б̣зва самб̣од̇хаа, анабхисамб̣уд̣̇д̇хасса б̣од̇хисад̇д̇ассзва сад̇о, ‘аббассаад̣̇аа гаамаа б̣ахуд̣̇угкаа б̣ахубааяаасаа, аад̣̇ийнаво зд̇т̇а бхияяо’д̇и – звамзд̇ам̣ яат̇аабхууд̇ам̣ саммаббан̃н̃ааяа суд̣̇идтам̣ ход̇и, со жа ан̃н̃ад̇рзва гаамзхи ан̃н̃ад̇ра агусалзхи д̇хаммзхи бийд̇исукам̣ нааж̇жхаг̇амам̣, ан̃н̃ам̣ ваа д̇ад̇о санд̇ад̇арам̣; ат̇а кваахам̣ нзва д̇аава анааваддий гаамзсу бажжан̃н̃аасим̣. яад̇о жа ко мз, махаанаама, ‘аббассаад̣̇аа гаамаа б̣ахуд̣̇угкаа б̣ахубааяаасаа, аад̣̇ийнаво зд̇т̇а бхияяо’д̇и – звамзд̇ам̣ яат̇аабхууд̇ам̣ саммаббан̃н̃ааяа суд̣̇идтам̣ ахоси, со жа 7 ан̃н̃ад̇рзва гаамзхи ан̃н̃ад̇ра агусалзхи д̇хаммзхи бийд̇исукам̣ аж̇жхаг̇амам̣, ан̃н̃ам̣ ваа д̇ад̇о санд̇ад̇арам̣; ат̇аахам̣ анааваддий гаамзсу бажжан̃н̃аасим̣.
‘‘Mayhampi kho, mahānāma , pubbeva sambodhā, anabhisambuddhassa bodhisattasseva sato, ‘appassādā kāmā bahudukkhā bahupāyāsā, ādīnavo ettha bhiyyo’ti – evametaṃ yathābhūtaṃ sammappaññāya sudiṭṭhaṃ hoti, so ca aññatreva kāmehi aññatra akusalehi dhammehi pītisukhaṃ nājjhagamaṃ, aññaṃ vā tato santataraṃ; atha khvāhaṃ neva tāva anāvaṭṭī kāmesu paccaññāsiṃ. Yato ca kho me, mahānāma, ‘appassādā kāmā bahudukkhā bahupāyāsā, ādīnavo ettha bhiyyo’ti – evametaṃ yathābhūtaṃ sammappaññāya sudiṭṭhaṃ ahosi, so ca 8 aññatreva kāmehi aññatra akusalehi dhammehi pītisukhaṃ ajjhagamaṃ, aññaṃ vā tato santataraṃ; athāhaṃ anāvaṭṭī kāmesu paccaññāsiṃ.
178. ‘‘го жа, махаанаама, гаамаанам̣ ассаад̣̇о? бан̃жимз, махаанаама, гаамаг̇ун̣аа. гад̇амз бан̃жа? жагкувин̃н̃зяяаа руубаа идтаа ганд̇аа манаабаа бияаруубаа гаамуубасам̣хид̇аа раж̇анийяаа; сод̇авин̃н̃зяяаа сад̣̇д̣̇аа…бз… гхаанавин̃н̃зяяаа г̇анд̇хаа… ж̇ивхаавин̃н̃зяяаа расаа… гааяавин̃н̃зяяаа подтаб̣б̣аа идтаа ганд̇аа манаабаа бияаруубаа гаамуубасам̣хид̇аа раж̇анийяаа – имз ко, махаанаама, бан̃жа гаамаг̇ун̣аа. яам̣ ко, махаанаама, имз бан̃жа гаамаг̇ун̣з бадижжа уббаж̇ж̇ад̇и сукам̣ соманассам̣ – аяам̣ гаамаанам̣ ассаад̣̇о.
178. ‘‘Ko ca, mahānāma, kāmānaṃ assādo? Pañcime, mahānāma, kāmaguṇā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā; sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā – ime kho, mahānāma, pañca kāmaguṇā. Yaṃ kho, mahānāma, ime pañca kāmaguṇe paṭicca uppajjati sukhaṃ somanassaṃ – ayaṃ kāmānaṃ assādo.
‘‘го жа, махаанаама, гаамаанам̣ аад̣̇ийнаво? ид̇ха, махаанаама, гулабуд̇д̇о язна сиббадтаанзна ж̇ийвигам̣ габбзд̇и – яад̣̇и муд̣̇д̣̇ааяа яад̣̇и г̇ан̣анааяа яад̣̇и сан̇каанзна яад̣̇и гасияаа яад̣̇и ван̣иж̇ж̇ааяа яад̣̇и г̇орагкзна яад̣̇и иссад̇т̇зна яад̣̇и рааж̇аборисзна яад̣̇и сиббан̃н̃ад̇арзна, сийд̇асса бурагкад̇о ун̣хасса бурагкад̇о д̣ам̣самагасаваад̇аад̇абасарийм̣сабасампассзхи риссамаано куббибаасааяа мийяамаано; аяамби, махаанаама, гаамаанам̣ аад̣̇ийнаво санд̣̇идтиго д̣̇угкагканд̇хо гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у.
‘‘Ko ca, mahānāma, kāmānaṃ ādīnavo? Idha, mahānāma, kulaputto yena sippaṭṭhānena jīvikaṃ kappeti – yadi muddāya yadi gaṇanāya yadi saṅkhānena yadi kasiyā yadi vaṇijjāya yadi gorakkhena yadi issatthena yadi rājaporisena yadi sippaññatarena, sītassa purakkhato uṇhassa purakkhato ḍaṃsamakasavātātapasarīṃsapasamphassehi rissamāno khuppipāsāya mīyamāno; ayampi, mahānāma, kāmānaṃ ādīnavo sandiṭṭhiko dukkhakkhandho kāmahetu kāmanidānaṃ kāmādhikaraṇaṃ kāmānameva hetu.
‘‘д̇асса жз махаанаама гулабуд̇д̇асса звам̣ удтахад̇о гхадад̇о вааяамад̇о д̇з бхог̇аа наабхинибпаж̇ж̇анд̇и, со сожад̇и гиламад̇и барид̣̇звад̇и урад̇д̇аал̣им̣ ганд̣̇ад̇и саммохам̣ аабаж̇ж̇ад̇и ‘могхам̣ вад̇а мз удтаанам̣, апало вад̇а мз вааяаамо’д̇и. аяамби, махаанаама, гаамаанам̣ аад̣̇ийнаво санд̣̇идтиго д̣̇угкагканд̇хо гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у.
‘‘Tassa ce mahānāma kulaputtassa evaṃ uṭṭhahato ghaṭato vāyamato te bhogā nābhinipphajjanti, so socati kilamati paridevati urattāḷiṃ kandati sammohaṃ āpajjati ‘moghaṃ vata me uṭṭhānaṃ, aphalo vata me vāyāmo’ti. Ayampi, mahānāma, kāmānaṃ ādīnavo sandiṭṭhiko dukkhakkhandho kāmahetu kāmanidānaṃ kāmādhikaraṇaṃ kāmānameva hetu.
‘‘д̇асса жз, махаанаама, гулабуд̇д̇асса звам̣ удтахад̇о гхадад̇о вааяамад̇о д̇з бхог̇аа абхинибпаж̇ж̇анд̇и. со д̇зсам̣ бхог̇аанам̣ аарагкаад̇хигаран̣ам̣ д̣̇угкам̣ д̣̇оманассам̣ бадисам̣взд̣̇зд̇и – ‘гинд̇и мз бхог̇з нзва рааж̇аано харзяяум̣, на жораа харзяяум̣, на аг̇г̇и д̣̇ахзяяа, на уд̣̇агам̣ вахзяяа, на аббияаа ваа д̣̇ааяаад̣̇аа харзяяу’нд̇и. д̇асса звам̣ аарагкад̇о г̇обаяад̇о д̇з бхог̇з рааж̇аано ваа харанд̇и, жораа ваа харанд̇и, аг̇г̇и ваа д̣̇ахад̇и, уд̣̇агам̣ ваа вахад̇и, аббияаа ваа д̣̇ааяаад̣̇аа харанд̇и. со сожад̇и гиламад̇и барид̣̇звад̇и урад̇д̇аал̣им̣ ганд̣̇ад̇и саммохам̣ аабаж̇ж̇ад̇и – ‘яамби мз ахоси д̇амби но над̇т̇ий’д̇и. аяамби, махаанаама, гаамаанам̣ аад̣̇ийнаво санд̣̇идтиго д̣̇угкагканд̇хо гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у.
‘‘Tassa ce, mahānāma, kulaputtassa evaṃ uṭṭhahato ghaṭato vāyamato te bhogā abhinipphajjanti. So tesaṃ bhogānaṃ ārakkhādhikaraṇaṃ dukkhaṃ domanassaṃ paṭisaṃvedeti – ‘kinti me bhoge neva rājāno hareyyuṃ, na corā hareyyuṃ, na aggi daheyya, na udakaṃ vaheyya, na appiyā vā dāyādā hareyyu’nti. Tassa evaṃ ārakkhato gopayato te bhoge rājāno vā haranti, corā vā haranti, aggi vā dahati, udakaṃ vā vahati, appiyā vā dāyādā haranti. So socati kilamati paridevati urattāḷiṃ kandati sammohaṃ āpajjati – ‘yampi me ahosi tampi no natthī’ti. Ayampi, mahānāma, kāmānaṃ ādīnavo sandiṭṭhiko dukkhakkhandho kāmahetu kāmanidānaṃ kāmādhikaraṇaṃ kāmānameva hetu.
‘‘буна жабарам̣, махаанаама, гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у рааж̇ааноби рааж̇уухи вивад̣̇анд̇и, кад̇д̇ияааби кад̇д̇иязхи вивад̣̇анд̇и, б̣раахман̣ааби б̣раахман̣зхи вивад̣̇анд̇и, г̇ахабад̇ийби г̇ахабад̇ийхи вивад̣̇анд̇и, маад̇ааби буд̇д̇зна вивад̣̇ад̇и, буд̇д̇оби маад̇араа вивад̣̇ад̇и, бид̇ааби буд̇д̇зна вивад̣̇ад̇и, буд̇д̇оби бид̇араа вивад̣̇ад̇и, бхаад̇ааби бхаад̇араа вивад̣̇ад̇и, бхаад̇ааби бхаг̇инияаа вивад̣̇ад̇и, бхаг̇инийби бхаад̇араа вивад̣̇ад̇и, сахааяоби сахааязна вивад̣̇ад̇и. д̇з д̇ад̇т̇а галахавиг̇г̇ахавиваад̣̇аабаннаа ан̃н̃аман̃н̃ам̣ баан̣ийхиби убаггаманд̇и, лзд̣д̣уухиби убаггаманд̇и, д̣̇ан̣д̣зхиби убаггаманд̇и, сад̇т̇зхиби убаггаманд̇и. д̇з д̇ад̇т̇а маран̣амби ниг̇ажчанд̇и, маран̣амад̇д̇амби д̣̇угкам̣ . аяамби, махаанаама, гаамаанам̣ аад̣̇ийнаво санд̣̇идтиго д̣̇угкагканд̇хо гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у.
‘‘Puna caparaṃ, mahānāma, kāmahetu kāmanidānaṃ kāmādhikaraṇaṃ kāmānameva hetu rājānopi rājūhi vivadanti, khattiyāpi khattiyehi vivadanti, brāhmaṇāpi brāhmaṇehi vivadanti, gahapatīpi gahapatīhi vivadanti, mātāpi puttena vivadati, puttopi mātarā vivadati, pitāpi puttena vivadati, puttopi pitarā vivadati, bhātāpi bhātarā vivadati, bhātāpi bhaginiyā vivadati, bhaginīpi bhātarā vivadati, sahāyopi sahāyena vivadati. Te tattha kalahaviggahavivādāpannā aññamaññaṃ pāṇīhipi upakkamanti, leḍḍūhipi upakkamanti, daṇḍehipi upakkamanti, satthehipi upakkamanti. Te tattha maraṇampi nigacchanti, maraṇamattampi dukkhaṃ . Ayampi, mahānāma, kāmānaṃ ādīnavo sandiṭṭhiko dukkhakkhandho kāmahetu kāmanidānaṃ kāmādhikaraṇaṃ kāmānameva hetu.
‘‘буна жабарам̣, махаанаама, гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у асижаммам̣ г̇ахзд̇ваа, д̇ханугалаабам̣ саннаяхид̇ваа, убхад̇об̣яуул̣хам̣ сан̇г̇аамам̣ багканд̣̇анд̇и усуусуби киббамаанзсу, сад̇д̇ийсуби киббамаанаасу, асийсуби виж̇ж̇од̇аланд̇зсу. д̇з д̇ад̇т̇а усуухиби виж̇жханд̇и, сад̇д̇ияааби виж̇жханд̇и, асинааби сийсам̣ чинд̣̇анд̇и. д̇з д̇ад̇т̇а маран̣амби ниг̇ажчанд̇и, маран̣амад̇д̇амби д̣̇угкам̣. аяамби, махаанаама, гаамаанам̣ аад̣̇ийнаво санд̣̇идтиго д̣̇угкагканд̇хо гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у.
‘‘Puna caparaṃ, mahānāma, kāmahetu kāmanidānaṃ kāmādhikaraṇaṃ kāmānameva hetu asicammaṃ gahetvā, dhanukalāpaṃ sannayhitvā, ubhatobyūḷhaṃ saṅgāmaṃ pakkhandanti usūsupi khippamānesu, sattīsupi khippamānāsu, asīsupi vijjotalantesu. Te tattha usūhipi vijjhanti, sattiyāpi vijjhanti, asināpi sīsaṃ chindanti. Te tattha maraṇampi nigacchanti, maraṇamattampi dukkhaṃ. Ayampi, mahānāma, kāmānaṃ ādīnavo sandiṭṭhiko dukkhakkhandho kāmahetu kāmanidānaṃ kāmādhikaraṇaṃ kāmānameva hetu.
‘‘буна жабарам̣, махаанаама, гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у асижаммам̣ г̇ахзд̇ваа, д̇ханугалаабам̣ саннаяхид̇ваа, ад̣̇д̣̇аавалзбанаа убагаарияо багканд̣̇анд̇и усуусуби киббамаанзсу, сад̇д̇ийсуби киббамаанаасу, асийсуби виж̇ж̇од̇аланд̇зсу. д̇з д̇ад̇т̇а усуухиби виж̇жханд̇и, сад̇д̇ияааби виж̇жханд̇и, чаган̣агааяаби осин̃жанд̇и, абхиваг̇г̇знаби омад̣̇д̣̇анд̇и, асинааби сийсам̣ чинд̣̇анд̇и. д̇з д̇ад̇т̇а маран̣амби ниг̇ажчанд̇и, маран̣амад̇д̇амби д̣̇угкам̣. аяамби, махаанаама, гаамаанам̣ аад̣̇ийнаво санд̣̇идтиго д̣̇угкагканд̇хо гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у.
‘‘Puna caparaṃ, mahānāma, kāmahetu kāmanidānaṃ kāmādhikaraṇaṃ kāmānameva hetu asicammaṃ gahetvā, dhanukalāpaṃ sannayhitvā, addāvalepanā upakāriyo pakkhandanti usūsupi khippamānesu, sattīsupi khippamānāsu, asīsupi vijjotalantesu. Te tattha usūhipi vijjhanti, sattiyāpi vijjhanti, chakaṇakāyapi osiñcanti, abhivaggenapi omaddanti, asināpi sīsaṃ chindanti. Te tattha maraṇampi nigacchanti, maraṇamattampi dukkhaṃ. Ayampi, mahānāma, kāmānaṃ ādīnavo sandiṭṭhiko dukkhakkhandho kāmahetu kāmanidānaṃ kāmādhikaraṇaṃ kāmānameva hetu.
‘‘буна жабарам̣, махаанаама, гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у санд̇химби чинд̣̇анд̇и, ниллобамби харанд̇и, згааг̇ааригамби гаронд̇и, барибант̇зби д̇идтанд̇и, барад̣̇аарамби г̇ажчанд̇и. д̇амзнам̣ рааж̇аано г̇ахзд̇ваа вивид̇хаа гаммагааран̣аа гаарзнд̇и – гасаахиби д̇аал̣знд̇и, взд̇д̇зхиби д̇аал̣знд̇и, ад̣дхад̣̇ан̣д̣агзхиби д̇аал̣знд̇и; хад̇т̇амби чинд̣̇анд̇и, баад̣̇амби чинд̣̇анд̇и, хад̇т̇абаад̣̇амби чинд̣̇анд̇и, ган̣н̣амби чинд̣̇анд̇и, наасамби чинд̣̇анд̇и, ган̣н̣анаасамби чинд̣̇анд̇и; б̣илан̇г̇ат̇аалигамби гаронд̇и, сан̇камун̣д̣игамби гаронд̇и, раахумукамби гаронд̇и, ж̇од̇имаалигамби гаронд̇и, хад̇т̇абаж̇ж̇од̇игамби гаронд̇и, зрагавад̇д̇игамби гаронд̇и, жийрагаваасигамби гаронд̇и, зн̣зяяагамби гаронд̇и, б̣ал̣исамам̣сигамби гаронд̇и, гахаабан̣игамби гаронд̇и, каараабад̇ажчигамби гаронд̇и, балигхабаривад̇д̇игамби гаронд̇и, балаалабийтагамби гаронд̇и, д̇ад̇д̇знаби д̇злзна осин̃жанд̇и, сунакзхиби каад̣̇аабзнд̇и, ж̇ийванд̇амби суулз уд̇д̇аасзнд̇и, асинааби сийсам̣ чинд̣̇анд̇и. д̇з д̇ад̇т̇а маран̣амби ниг̇ажчанд̇и, маран̣амад̇д̇амби д̣̇угкам̣. аяамби, махаанаама, гаамаанам̣ аад̣̇ийнаво санд̣̇идтиго д̣̇угкагканд̇хо гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у.
‘‘Puna caparaṃ, mahānāma, kāmahetu kāmanidānaṃ kāmādhikaraṇaṃ kāmānameva hetu sandhimpi chindanti, nillopampi haranti, ekāgārikampi karonti, paripanthepi tiṭṭhanti, paradārampi gacchanti. Tamenaṃ rājāno gahetvā vividhā kammakāraṇā kārenti – kasāhipi tāḷenti, vettehipi tāḷenti, aḍḍhadaṇḍakehipi tāḷenti; hatthampi chindanti, pādampi chindanti, hatthapādampi chindanti, kaṇṇampi chindanti, nāsampi chindanti, kaṇṇanāsampi chindanti; bilaṅgathālikampi karonti, saṅkhamuṇḍikampi karonti, rāhumukhampi karonti, jotimālikampi karonti, hatthapajjotikampi karonti, erakavattikampi karonti, cīrakavāsikampi karonti, eṇeyyakampi karonti, baḷisamaṃsikampi karonti, kahāpaṇikampi karonti, khārāpatacchikampi karonti, palighaparivattikampi karonti, palālapīṭhakampi karonti, tattenapi telena osiñcanti, sunakhehipi khādāpenti, jīvantampi sūle uttāsenti, asināpi sīsaṃ chindanti. Te tattha maraṇampi nigacchanti, maraṇamattampi dukkhaṃ. Ayampi, mahānāma, kāmānaṃ ādīnavo sandiṭṭhiko dukkhakkhandho kāmahetu kāmanidānaṃ kāmādhikaraṇaṃ kāmānameva hetu.
‘‘буна жабарам̣, махаанаама, гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у гааязна д̣̇ужжарид̇ам̣ жаранд̇и, ваажааяа д̣̇ужжарид̇ам̣ жаранд̇и, манасаа д̣̇ужжарид̇ам̣ жаранд̇и. д̇з гааязна д̣̇ужжарид̇ам̣ жарид̇ваа, ваажааяа д̣̇ужжарид̇ам̣ жарид̇ваа, манасаа д̣̇ужжарид̇ам̣ жарид̇ваа, гааяасса бхзд̣̇аа барам̣ маран̣аа, абааяам̣ д̣̇уг̇г̇ад̇им̣ винибаад̇ам̣ нираяам̣ убабаж̇ж̇анд̇и. аяамби, махаанаама, гаамаанам̣ аад̣̇ийнаво самбарааяиго , д̣̇угкагканд̇хо гаамахзд̇у гааманид̣̇аанам̣ гаамаад̇хигаран̣ам̣ гаамаанамзва хзд̇у.
‘‘Puna caparaṃ, mahānāma, kāmahetu kāmanidānaṃ kāmādhikaraṇaṃ kāmānameva hetu kāyena duccaritaṃ caranti, vācāya duccaritaṃ caranti, manasā duccaritaṃ caranti. Te kāyena duccaritaṃ caritvā, vācāya duccaritaṃ caritvā, manasā duccaritaṃ caritvā, kāyassa bhedā paraṃ maraṇā, apāyaṃ duggatiṃ vinipātaṃ nirayaṃ upapajjanti. Ayampi, mahānāma, kāmānaṃ ādīnavo samparāyiko , dukkhakkhandho kāmahetu kāmanidānaṃ kāmādhikaraṇaṃ kāmānameva hetu.
179. ‘‘згамид̣̇аахам̣, махаанаама, самаяам̣ рааж̇аг̇ахз вихараами г̇иж̇жхагуудз баб̣б̣ад̇з. д̇зна ко бана самаязна самб̣ахулаа ниг̇ан̣таа 9 исиг̇илибассз гаал̣асилааяам̣ уб̣бхадтагаа хонд̇и аасанабадигкид̇д̇аа, обаггамигаа д̣̇угкаа д̇иб̣б̣аа караа гадугаа взд̣̇анаа взд̣̇аяанд̇и. ат̇а кваахам̣, махаанаама, сааяанхасамаяам̣ бадисаллаанаа вудтид̇о язна исиг̇илибассз гаал̣асилаа язна д̇з ниг̇ан̣таа д̇знубасан̇гамим̣; убасан̇гамид̇ваа д̇з ниг̇ан̣тз зд̇ад̣̇авожам̣ – ‘гинну д̇умхз, аавусо, ниг̇ан̣таа уб̣бхадтагаа аасанабадигкид̇д̇аа, обаггамигаа д̣̇угкаа д̇иб̣б̣аа караа гадугаа взд̣̇анаа взд̣̇аяат̇аа’д̇и? звам̣ вуд̇д̇з, махаанаама, д̇з ниг̇ан̣таа мам̣ зд̇ад̣̇авожум̣ – ‘ниг̇ан̣то, аавусо, наадабуд̇д̇о 10 саб̣б̣ан̃н̃уу саб̣б̣ад̣̇ассаавий абарисзсам̣ н̃аан̣ад̣̇ассанам̣ бадиж̇аанаад̇и – ‘‘жарад̇о жа мз д̇идтад̇о жа суд̇д̇асса жа ж̇ааг̇арасса жа сад̇ад̇ам̣ самид̇ам̣ н̃аан̣ад̣̇ассанам̣ бажжубадтид̇а’’нд̇и. со звамааха – ‘‘ад̇т̇и ко во 11, ниг̇ан̣таа, буб̣б̣з баабагаммам̣ гад̇ам̣, д̇ам̣ имааяа гадугааяа д̣̇уггарагааригааяа ниж̇ж̇ийрзт̇а 12; яам̣ банзд̇т̇а 13 зд̇арахи гааязна сам̣вуд̇аа ваажааяа сам̣вуд̇аа манасаа сам̣вуд̇аа д̇ам̣ ааяад̇им̣ баабасса гаммасса агаран̣ам̣; ид̇и бураан̣аанам̣ гаммаанам̣ д̇абасаа б̣яанд̇ибхааваа, наваанам̣ гаммаанам̣ агаран̣аа, ааяад̇им̣ анавассаво; ааяад̇им̣ анавассаваа гаммагкаяо, гаммагкаяаа д̣̇угкагкаяо, д̣̇угкагкаяаа взд̣̇анаагкаяо, взд̣̇анаагкаяаа саб̣б̣ам̣ д̣̇угкам̣ ниж̇ж̇ин̣н̣ам̣ бхависсад̇ий’’д̇и. д̇ан̃жа банамхаагам̣ ружжад̇и жзва камад̇и жа, д̇зна жамха ад̇д̇аманаа’д̇и.
179. ‘‘Ekamidāhaṃ, mahānāma, samayaṃ rājagahe viharāmi gijjhakūṭe pabbate. Tena kho pana samayena sambahulā nigaṇṭhā 14 isigilipasse kāḷasilāyaṃ ubbhaṭṭhakā honti āsanapaṭikkhittā, opakkamikā dukkhā tibbā kharā kaṭukā vedanā vedayanti. Atha khvāhaṃ, mahānāma, sāyanhasamayaṃ paṭisallānā vuṭṭhito yena isigilipasse kāḷasilā yena te nigaṇṭhā tenupasaṅkamiṃ; upasaṅkamitvā te nigaṇṭhe etadavocaṃ – ‘kinnu tumhe, āvuso, nigaṇṭhā ubbhaṭṭhakā āsanapaṭikkhittā, opakkamikā dukkhā tibbā kharā kaṭukā vedanā vedayathā’ti? Evaṃ vutte, mahānāma, te nigaṇṭhā maṃ etadavocuṃ – ‘nigaṇṭho, āvuso, nāṭaputto 15 sabbaññū sabbadassāvī aparisesaṃ ñāṇadassanaṃ paṭijānāti – ‘‘carato ca me tiṭṭhato ca suttassa ca jāgarassa ca satataṃ samitaṃ ñāṇadassanaṃ paccupaṭṭhita’’nti. So evamāha – ‘‘atthi kho vo 16, nigaṇṭhā, pubbe pāpakammaṃ kataṃ, taṃ imāya kaṭukāya dukkarakārikāya nijjīretha 17; yaṃ panettha 18 etarahi kāyena saṃvutā vācāya saṃvutā manasā saṃvutā taṃ āyatiṃ pāpassa kammassa akaraṇaṃ; iti purāṇānaṃ kammānaṃ tapasā byantibhāvā, navānaṃ kammānaṃ akaraṇā, āyatiṃ anavassavo; āyatiṃ anavassavā kammakkhayo, kammakkhayā dukkhakkhayo, dukkhakkhayā vedanākkhayo, vedanākkhayā sabbaṃ dukkhaṃ nijjiṇṇaṃ bhavissatī’’ti. Tañca panamhākaṃ ruccati ceva khamati ca, tena camha attamanā’ti.
180. ‘‘звам̣ вуд̇д̇з, ахам̣, махаанаама, д̇з ниг̇ан̣тз зд̇ад̣̇авожам̣ – ‘гим̣ бана д̇умхз, аавусо ниг̇ан̣таа, ж̇аанаат̇а – ахувамхзва маяам̣ буб̣б̣з на наахувамхаа’д̇и? ‘но хид̣̇ам̣, аавусо’. ‘гим̣ бана д̇умхз, аавусо ниг̇ан̣таа, ж̇аанаат̇а – агарамхзва маяам̣ буб̣б̣з баабагаммам̣ на наагарамхаа’д̇и? ‘но хид̣̇ам̣, аавусо’. ‘гим̣ бана д̇умхз, аавусо ниг̇ан̣таа, ж̇аанаат̇а – зваруубам̣ ваа зваруубам̣ ваа баабагаммам̣ агарамхаа’д̇и? ‘но хид̣̇ам̣, аавусо’. ‘гим̣ бана д̇умхз, аавусо ниг̇ан̣таа, ж̇аанаат̇а – зд̇д̇агам̣ ваа д̣̇угкам̣ ниж̇ж̇ин̣н̣ам̣, зд̇д̇агам̣ ваа д̣̇угкам̣ ниж̇ж̇ийрзд̇аб̣б̣ам̣ , зд̇д̇агамхи ваа д̣̇угкз ниж̇ж̇ин̣н̣з саб̣б̣ам̣ д̣̇угкам̣ ниж̇ж̇ин̣н̣ам̣ бхависсад̇ий’д̇и? ‘но хид̣̇ам̣, аавусо’. ‘гим̣ бана д̇умхз, аавусо ниг̇ан̣таа, ж̇аанаат̇а – д̣̇идтзва д̇хаммз агусалаанам̣ д̇хаммаанам̣ бахаанам̣, гусалаанам̣ д̇хаммаанам̣ убасамбад̣̇а’нд̇и? ‘но хид̣̇ам̣, аавусо’.
180. ‘‘Evaṃ vutte, ahaṃ, mahānāma, te nigaṇṭhe etadavocaṃ – ‘kiṃ pana tumhe, āvuso nigaṇṭhā, jānātha – ahuvamheva mayaṃ pubbe na nāhuvamhā’ti? ‘No hidaṃ, āvuso’. ‘Kiṃ pana tumhe, āvuso nigaṇṭhā, jānātha – akaramheva mayaṃ pubbe pāpakammaṃ na nākaramhā’ti? ‘No hidaṃ, āvuso’. ‘Kiṃ pana tumhe, āvuso nigaṇṭhā, jānātha – evarūpaṃ vā evarūpaṃ vā pāpakammaṃ akaramhā’ti? ‘No hidaṃ, āvuso’. ‘Kiṃ pana tumhe, āvuso nigaṇṭhā, jānātha – ettakaṃ vā dukkhaṃ nijjiṇṇaṃ, ettakaṃ vā dukkhaṃ nijjīretabbaṃ , ettakamhi vā dukkhe nijjiṇṇe sabbaṃ dukkhaṃ nijjiṇṇaṃ bhavissatī’ti? ‘No hidaṃ, āvuso’. ‘Kiṃ pana tumhe, āvuso nigaṇṭhā, jānātha – diṭṭheva dhamme akusalānaṃ dhammānaṃ pahānaṃ, kusalānaṃ dhammānaṃ upasampada’nti? ‘No hidaṃ, āvuso’.
‘‘‘ид̇и гира д̇умхз, аавусо ниг̇ан̣таа, на ж̇аанаат̇а – ахувамхзва маяам̣ буб̣б̣з на наахувамхаад̇и, на ж̇аанаат̇а – агарамхзва маяам̣ буб̣б̣з баабагаммам̣ на наагарамхаад̇и, на ж̇аанаат̇а – зваруубам̣ ваа зваруубам̣ ваа баабагаммам̣ агарамхаад̇и, на ж̇аанаат̇а – зд̇д̇агам̣ ваа д̣̇угкам̣ ниж̇ж̇ин̣н̣ам̣, зд̇д̇агам̣ ваа д̣̇угкам̣ ниж̇ж̇ийрзд̇аб̣б̣ам̣, зд̇д̇агамхи ваа д̣̇угкз ниж̇ж̇ин̣н̣з саб̣б̣ам̣ д̣̇угкам̣ ниж̇ж̇ин̣н̣ам̣ бхависсад̇ийд̇и. на ж̇аанаат̇а – д̣̇идтзва д̇хаммз агусалаанам̣ д̇хаммаанам̣ бахаанам̣, гусалаанам̣ д̇хаммаанам̣ убасамбад̣̇ам̣. звам̣ санд̇з, аавусо ниг̇ан̣таа, яз логз луд̣̇д̣̇аа лохид̇абаан̣ино гуруурагамманд̇аа мануссзсу бажжааж̇аад̇аа д̇з ниг̇ан̣тзсу баб̣б̣аж̇анд̇ий’д̇и? ‘на ко, аавусо г̇од̇ама, сукзна сукам̣ ад̇хиг̇анд̇аб̣б̣ам̣, д̣̇угкзна ко сукам̣ ад̇хиг̇анд̇аб̣б̣ам̣; сукзна жаавусо г̇од̇ама, сукам̣ ад̇хиг̇анд̇аб̣б̣ам̣ абхависса, рааж̇аа мааг̇ад̇хо сзнияо б̣имб̣исааро сукам̣ ад̇хиг̇ажчзяяа, рааж̇аа мааг̇ад̇хо сзнияо б̣имб̣исааро сукавихаарид̇аро ааяасмад̇аа г̇од̇амзнаа’д̇и.
‘‘‘Iti kira tumhe, āvuso nigaṇṭhā, na jānātha – ahuvamheva mayaṃ pubbe na nāhuvamhāti, na jānātha – akaramheva mayaṃ pubbe pāpakammaṃ na nākaramhāti, na jānātha – evarūpaṃ vā evarūpaṃ vā pāpakammaṃ akaramhāti, na jānātha – ettakaṃ vā dukkhaṃ nijjiṇṇaṃ, ettakaṃ vā dukkhaṃ nijjīretabbaṃ, ettakamhi vā dukkhe nijjiṇṇe sabbaṃ dukkhaṃ nijjiṇṇaṃ bhavissatīti. Na jānātha – diṭṭheva dhamme akusalānaṃ dhammānaṃ pahānaṃ, kusalānaṃ dhammānaṃ upasampadaṃ. Evaṃ sante, āvuso nigaṇṭhā, ye loke luddā lohitapāṇino kurūrakammantā manussesu paccājātā te nigaṇṭhesu pabbajantī’ti? ‘Na kho, āvuso gotama, sukhena sukhaṃ adhigantabbaṃ, dukkhena kho sukhaṃ adhigantabbaṃ; sukhena cāvuso gotama, sukhaṃ adhigantabbaṃ abhavissa, rājā māgadho seniyo bimbisāro sukhaṃ adhigaccheyya, rājā māgadho seniyo bimbisāro sukhavihāritaro āyasmatā gotamenā’ti.
‘‘‘ад̣̇д̇хааяасманд̇зхи ниг̇ан̣тзхи сахасаа аббадисан̇каа ваажаа бхаасид̇аа – на ко, аавусо г̇од̇ама, сукзна сукам̣ ад̇хиг̇анд̇аб̣б̣ам̣, д̣̇угкзна ко сукам̣ ад̇хиг̇анд̇аб̣б̣ам̣; сукзна жаавусо г̇од̇ама, сукам̣ ад̇хиг̇анд̇аб̣б̣ам̣ абхависса, рааж̇аа мааг̇ад̇хо сзнияо б̣имб̣исааро сукам̣ ад̇хиг̇ажчзяяа, рааж̇аа мааг̇ад̇хо сзнияо б̣имб̣исааро сукавихаарид̇аро ааяасмад̇аа г̇од̇амзнаа’’д̇и. аби жа ахамзва д̇ад̇т̇а бадибужчид̇аб̣б̣о – го ну ко ааяасманд̇аанам̣ сукавихаарид̇аро рааж̇аа ваа мааг̇ад̇хо сзнияо б̣имб̣исааро ааяасмаа ваа г̇од̇амо’д̇и? ад̣̇д̇хаавусо г̇од̇ама, амхзхи сахасаа аббадисан̇каа ваажаа бхаасид̇аа, на ко, аавусо г̇од̇ама, сукзна сукам̣ ад̇хиг̇анд̇аб̣б̣ам̣, д̣̇угкзна ко сукам̣ ад̇хиг̇анд̇аб̣б̣ам̣; сукзна жаавусо г̇од̇ама, сукам̣ ад̇хиг̇анд̇аб̣б̣ам̣ абхависса, рааж̇аа мааг̇ад̇хо сзнияо б̣имб̣исааро сукам̣ ад̇хиг̇ажчзяяа, рааж̇аа мааг̇ад̇хо сзнияо б̣имб̣исааро сукавихаарид̇аро ааяасмад̇аа г̇од̇амзнаад̇и. аби жа д̇идтад̇зд̇ам̣, ид̣̇ааниби маяам̣ ааяасманд̇ам̣ г̇од̇амам̣ бужчаама – го ну ко ааяасманд̇аанам̣ сукавихаарид̇аро рааж̇аа ваа мааг̇ад̇хо сзнияо б̣имб̣исааро ааяасмаа ваа г̇од̇амо’д̇и?
‘‘‘Addhāyasmantehi nigaṇṭhehi sahasā appaṭisaṅkhā vācā bhāsitā – na kho, āvuso gotama, sukhena sukhaṃ adhigantabbaṃ, dukkhena kho sukhaṃ adhigantabbaṃ; sukhena cāvuso gotama, sukhaṃ adhigantabbaṃ abhavissa, rājā māgadho seniyo bimbisāro sukhaṃ adhigaccheyya, rājā māgadho seniyo bimbisāro sukhavihāritaro āyasmatā gotamenā’’ti. Api ca ahameva tattha paṭipucchitabbo – ko nu kho āyasmantānaṃ sukhavihāritaro rājā vā māgadho seniyo bimbisāro āyasmā vā gotamo’ti? Addhāvuso gotama, amhehi sahasā appaṭisaṅkhā vācā bhāsitā, na kho, āvuso gotama, sukhena sukhaṃ adhigantabbaṃ, dukkhena kho sukhaṃ adhigantabbaṃ; sukhena cāvuso gotama, sukhaṃ adhigantabbaṃ abhavissa, rājā māgadho seniyo bimbisāro sukhaṃ adhigaccheyya, rājā māgadho seniyo bimbisāro sukhavihāritaro āyasmatā gotamenāti. Api ca tiṭṭhatetaṃ, idānipi mayaṃ āyasmantaṃ gotamaṃ pucchāma – ko nu kho āyasmantānaṃ sukhavihāritaro rājā vā māgadho seniyo bimbisāro āyasmā vā gotamo’ti?
‘‘‘д̇зна хаавусо ниг̇ан̣таа, д̇умхзва д̇ад̇т̇а бадибужчиссаами, яат̇аа во камзяяа д̇ат̇аа нам̣ б̣яаагарзяяаат̇а. д̇ам̣ гим̣ ман̃н̃ат̇аавусо ниг̇ан̣таа, баход̇и рааж̇аа мааг̇ад̇хо сзнияо б̣имб̣исааро, анин̃ж̇амаано гааязна, абхаасамаано ваажам̣, сад̇д̇а рад̇д̇инд̣̇иваани зганд̇асукам̣ бадисам̣взд̣̇ий вихарид̇у’нд̇и? ‘но хид̣̇ам̣, аавусо’.
‘‘‘Tena hāvuso nigaṇṭhā, tumheva tattha paṭipucchissāmi, yathā vo khameyya tathā naṃ byākareyyātha. Taṃ kiṃ maññathāvuso nigaṇṭhā, pahoti rājā māgadho seniyo bimbisāro, aniñjamāno kāyena, abhāsamāno vācaṃ, satta rattindivāni ekantasukhaṃ paṭisaṃvedī viharitu’nti? ‘No hidaṃ, āvuso’.
‘‘‘д̇ам̣ гим̣ ман̃н̃ат̇аавусо ниг̇ан̣таа, баход̇и рааж̇аа мааг̇ад̇хо сзнияо б̣имб̣исааро, анин̃ж̇амаано гааязна, абхаасамаано ваажам̣, ча рад̇д̇инд̣̇иваани…бз… бан̃жа рад̇д̇инд̣̇иваани… жад̇д̇аари рад̇д̇инд̣̇иваани… д̇ийн̣и рад̇д̇инд̣̇иваани… д̣̇вз рад̇д̇инд̣̇иваани… згам̣ рад̇д̇инд̣̇ивам̣ зганд̇асукам̣ бадисам̣взд̣̇ий вихарид̇у’нд̇и? ‘но хид̣̇ам̣, аавусо’.
‘‘‘Taṃ kiṃ maññathāvuso nigaṇṭhā, pahoti rājā māgadho seniyo bimbisāro, aniñjamāno kāyena, abhāsamāno vācaṃ, cha rattindivāni…pe… pañca rattindivāni… cattāri rattindivāni… tīṇi rattindivāni… dve rattindivāni… ekaṃ rattindivaṃ ekantasukhaṃ paṭisaṃvedī viharitu’nti? ‘No hidaṃ, āvuso’.
‘‘‘ахам̣ ко, аавусо ниг̇ан̣таа, бахоми анин̃ж̇амаано гааязна, абхаасамаано ваажам̣, згам̣ рад̇д̇инд̣̇ивам̣ зганд̇асукам̣ бадисам̣взд̣̇ий вихарид̇ум̣. ахам̣ ко, аавусо ниг̇ан̣таа, бахоми анин̃ж̇амаано гааязна, абхаасамаано ваажам̣, д̣̇вз рад̇д̇инд̣̇иваани… д̇ийн̣и рад̇д̇инд̣̇иваани… жад̇д̇аари рад̇д̇инд̣̇иваани… бан̃жа рад̇д̇инд̣̇иваани… ча рад̇д̇инд̣̇иваани… сад̇д̇а рад̇д̇инд̣̇иваани зганд̇асукам̣ бадисам̣взд̣̇ий вихарид̇ум̣. д̇ам̣ гим̣ ман̃н̃ат̇аавусо ниг̇ан̣таа, звам̣ санд̇з го сукавихаарид̇аро рааж̇аа ваа мааг̇ад̇хо сзнияо б̣имб̣исааро ахам̣ ваа’д̇и? ‘звам̣ санд̇з ааяасмаава г̇од̇амо сукавихаарид̇аро ран̃н̃аа мааг̇ад̇хзна сзниязна б̣имб̣исаарзнаа’’’д̇и.
‘‘‘Ahaṃ kho, āvuso nigaṇṭhā, pahomi aniñjamāno kāyena, abhāsamāno vācaṃ, ekaṃ rattindivaṃ ekantasukhaṃ paṭisaṃvedī viharituṃ. Ahaṃ kho, āvuso nigaṇṭhā, pahomi aniñjamāno kāyena, abhāsamāno vācaṃ, dve rattindivāni… tīṇi rattindivāni… cattāri rattindivāni… pañca rattindivāni… cha rattindivāni… satta rattindivāni ekantasukhaṃ paṭisaṃvedī viharituṃ. Taṃ kiṃ maññathāvuso nigaṇṭhā, evaṃ sante ko sukhavihāritaro rājā vā māgadho seniyo bimbisāro ahaṃ vā’ti? ‘Evaṃ sante āyasmāva gotamo sukhavihāritaro raññā māgadhena seniyena bimbisārenā’’’ti.
ид̣̇амавожа бхаг̇аваа. ад̇д̇амано махаанаамо сагго бхаг̇авад̇о бхаасид̇ам̣ абхинанд̣̇ийд̇и.
Idamavoca bhagavā. Attamano mahānāmo sakko bhagavato bhāsitaṃ abhinandīti.
жуул̣ад̣̇угкагканд̇хасуд̇д̇ам̣ нидтид̇ам̣ жад̇уд̇т̇ам̣.
Cūḷadukkhakkhandhasuttaṃ niṭṭhitaṃ catutthaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 4. жуул̣ад̣̇угкагканд̇хасуд̇д̇аван̣н̣анаа • 4. Cūḷadukkhakkhandhasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 4. жуул̣ад̣̇угкагканд̇хасуд̇д̇аван̣н̣анаа • 4. Cūḷadukkhakkhandhasuttavaṇṇanā
