| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༤. ཙཱུལ༹དུཀྑཀྑནྡྷསུཏྟཝཎྞནཱ
4. Cūḷadukkhakkhandhasuttavaṇṇanā
༡༧༥. སཀྐེསཱུཏི ཨེཏྠ ཡཾ ཝཏྟབྦཾ, ཏཾ སཏིཔཊྛཱནསུཏྟཝཎྞནཱཡཾ ཝུཏྟནཡེནེཝ ཝེདིཏབྦནྟི ཏཾ ཨེཀདེསེན དསྶེནྟོ ‘‘སོ ཧཱི’’ཏི ཨཱཧ། ཏཏྠ ཡེན རཱཛཀུམཱརཱ སཀྱཱ ནཱམ ཛཱཏཱ, ཡཏོ ཏེསཾ ནིཝཱསཊྛཱནཏཱཡ ཛནཔདོ ཏཐཱ ཝུཙྩཏི, ཏཾ ཝཏྟབྦནྟི ཨཱཧ ‘‘སཀྱཱནཾ པན ཨུཔྤཏྟི ཨམྦཊྛསུཏྟེ ཨཱགཏཱཝཱ’’ཏི། ཀཔིལཝཏྠཱུཏི ཝུཏྟཾ པུརིམསཉྙཱཝསེན།
175.Sakkesūti ettha yaṃ vattabbaṃ, taṃ satipaṭṭhānasuttavaṇṇanāyaṃ vuttanayeneva veditabbanti taṃ ekadesena dassento ‘‘so hī’’ti āha. Tattha yena rājakumārā sakyā nāma jātā, yato tesaṃ nivāsaṭṭhānatāya janapado tathā vuccati, taṃ vattabbanti āha ‘‘sakyānaṃ pana uppatti ambaṭṭhasutte āgatāvā’’ti. Kapilavatthūti vuttaṃ purimasaññāvasena.
ནཱནཔྤཀཱརཀནྟི ‘‘ལོབྷདྷམྨཱ’’ཏི བཧུཝཙནསྶ ནིམིཏྟཾ ཝདཏི། ལོབྷོ ཧི ཏེན ཏེན ཨཝཏྠཱཝིསེསེན པཝཏྟིཨཱཀཱརབྷེདེན ‘‘ཚནྡོ རཱགོཏཎྷཱ ཨཱསཏྟི ཨཔེཀྑཱ’’ཏིཨཱདིནཱ ཨནེཀཔྤབྷེདོ, ལུབྦྷནལཀྑཎེན པན ‘‘ལོབྷོ’’ཏྭེཝ ཝུཙྩཏི། ཏེནཱཧ ‘‘ནཱནཔྤཀཱརཀཾ ལོབྷཾཡེཝཱ’’ཏི། ཏཐཱ ‘‘དོསོ པཊིགྷོ ཀོདྷོ ཨུཔནཱཧོ ཝིརོདྷོ’’ཏིཨཱདིནཱ, ‘‘མུཡ྄ཧནཾ ཨསམཔེཀྑནཾ ཨཔཙྩཝེཀྑཎཱ དུམྨེཛ྄ཛྷཾ བཱལྱ’’ནྟིཨཱདིནཱ (དྷ॰ ས॰ ༣༩༠) ཙ དོསམོཧཱནཾ ནཱནཔྤཀཱརཏཾ སནྡྷཱཡཱཧ ‘‘ཨིཏརེསུཔི དྭཱིསུ ཨེསེཝ ནཡོ’’ཏི། པརིཡཱདིཡིཏྭཱཏི པརིཏོ སབྦསོ ཨཱདཱཡ། གཧེཏྭཱཏི ཨཡམེཏྠ ཨཏྠོཏི ཨཱཧ ‘‘གཧཎེ ཨཱགཏ’’ནྟི། པརིཡཱདིཡཏཱིཏི པརིཀྑཱིཎོཏི། དཱི-སདྡཉྷི སདྡཝིདཱུ ཁཡཏྠཾ ཝདནྟི།
Nānappakārakanti ‘‘lobhadhammā’’ti bahuvacanassa nimittaṃ vadati. Lobho hi tena tena avatthāvisesena pavattiākārabhedena ‘‘chando rāgotaṇhā āsatti apekkhā’’tiādinā anekappabhedo, lubbhanalakkhaṇena pana ‘‘lobho’’tveva vuccati. Tenāha ‘‘nānappakārakaṃ lobhaṃyevā’’ti. Tathā ‘‘doso paṭigho kodho upanāho virodho’’tiādinā, ‘‘muyhanaṃ asamapekkhanaṃ apaccavekkhaṇā dummejjhaṃ bālya’’ntiādinā (dha. sa. 390) ca dosamohānaṃ nānappakārataṃ sandhāyāha ‘‘itaresupi dvīsu eseva nayo’’ti. Pariyādiyitvāti parito sabbaso ādāya. Gahetvāti ayamettha atthoti āha ‘‘gahaṇe āgata’’nti. Pariyādiyatīti parikkhīṇoti. Dī-saddañhi saddavidū khayatthaṃ vadanti.
ཨེཀདཱཏི ཨཱམེཌིཏལོཔེན ནིདྡེསོཏི ཨཱཧ ‘‘ཨེཀེཀསྨིཾ ཀཱལེ’’ཏི། ལོབྷདོསམོཧཱཏི པཋམམགྒེན པཧཱིནཱཝསེསཱ ལོབྷདོསམོཧཱ། ནིརཝསེསཱ པཧཱིཡནྟི, ཨཉྙཐཱ དུཏིཡམགྒེན ཀིཾ ཀཏཾ སིཡཱཏི ཨདྷིཔྤཱཡོ། སམུདཱཙཱརཔྤཏྟཾ པན དིསྭཱ ‘‘ཨཔྤཧཱིནཾ མེ ཨཏྠཱི’’ཏིཔི ཛཱནཱཏི། ཨེཝཾ ཀཐཾ ནིརཝསེསཔྤཧཱནསཉྙཱཏི ཨཱཧ ‘‘ཨཔྤཧཱིནཀཾ…པེ॰… སཉྙཱི ཧོཏཱི’’ཏི། ཨེཝཾ པཋམམགྒེནེཝ སམུཙྪིནྣསཾསཡསྶ ‘‘ཀོ སུ ནཱམ མེ དྷམྨོ ཨཛ྄ཛྷཏྟཾ ཨཔྤཧཱིནོཏི ཨེཝཾ སནྡྷེཧོ ཀཐཾ ཨུཔྤཛྫཏཱི’’ཏི ཝཏྭཱ ‘‘པཎྞཏྟིཡཱ ཨཀོཝིདཏྟཱ’’ཏི ཀཱརཎམཱཧ། ཝིནཡཀུཀྐུཙྩཾ ཝིཡ ཧི པཎྞཏྟིཡཾ ཨཀུསལཏཱཡ ཨརིཡཱནམྤི ཀཏྠཙི ཝིམཏིམཏྟཾ ཨུཔྤཛྫཏི ཡཐཱ ཏཾ སབྦསོ ཨཔྤཧཱིནསམྨོཧཱནནྟི། ཨཏྟནོ ཨཝིསཡེ ཨནབྷིཛཱནནཾ པཎྞཏྟིཀོསལླེན ཀིམེཏྠ པཡོཛནཾ, པཙྩཝེཀྑཎཱམཏྟེན ཨཡམཏྠོ སིཛ྄ཛྷཏཱིཏི དསྶེནྟོ ‘‘ཀིཾ ཏསྶ པཙྩཝེཀྑཎཱ ནཏྠཱི’’ཏི ཨཱཧ། ཨིཏརོ ‘‘ནཏྠཱི’’ཏི ན སཀྐཱ ཝཏྟུནྟི ཀཏྭཱ ‘‘ཨཏྠཱི’’ཏི ཝཏྭཱ ཏཏྠ ལབྦྷམཱནཝིབྷཱགཾ དསྶེནྟོ ‘‘སཱ པནཱ’’ཏིཨཱདིམཱཧ། ཏཏྠ སཱཏི པཙྩཝེཀྑཎཱ། སབྦེསནྟི སབྦེསཾ ཨརིཡཱནཾ། ཡཐཱ པརིཔུཎྞཱ ན ཧོཏི, ན ཨེཝཾ སབྦསོ ན ཧོཏཱིཏི ཨཱཧ ‘‘ཨིམཱསུ པནཱ’’ཏིཨཱདི།
Ekadāti āmeḍitalopena niddesoti āha ‘‘ekekasmiṃ kāle’’ti. Lobhadosamohāti paṭhamamaggena pahīnāvasesā lobhadosamohā. Niravasesā pahīyanti, aññathā dutiyamaggena kiṃ kataṃ siyāti adhippāyo. Samudācārappattaṃ pana disvā ‘‘appahīnaṃ me atthī’’tipi jānāti. Evaṃ kathaṃ niravasesappahānasaññāti āha ‘‘appahīnakaṃ…pe… saññī hotī’’ti. Evaṃ paṭhamamaggeneva samucchinnasaṃsayassa ‘‘ko su nāma me dhammo ajjhattaṃ appahīnoti evaṃ sandheho kathaṃ uppajjatī’’ti vatvā ‘‘paṇṇattiyā akovidattā’’ti kāraṇamāha. Vinayakukkuccaṃ viya hi paṇṇattiyaṃ akusalatāya ariyānampi katthaci vimatimattaṃ uppajjati yathā taṃ sabbaso appahīnasammohānanti. Attano avisaye anabhijānanaṃ paṇṇattikosallena kimettha payojanaṃ, paccavekkhaṇāmattena ayamattho sijjhatīti dassento ‘‘kiṃ tassa paccavekkhaṇā natthī’’ti āha. Itaro ‘‘natthī’’ti na sakkā vattunti katvā ‘‘atthī’’ti vatvā tattha labbhamānavibhāgaṃ dassento ‘‘sā panā’’tiādimāha. Tattha sāti paccavekkhaṇā. Sabbesanti sabbesaṃ ariyānaṃ. Yathā paripuṇṇā na hoti, na evaṃ sabbaso na hotīti āha ‘‘imāsu panā’’tiādi.
༡༧༦. ཨཛ྄ཛྷཏྟནྟི ནིཡཀཛ྄ཛྷཏྟཾ ཨདྷིཔྤེཏནྟི ཨཱཧ ‘‘ཏཝ སནྟཱནེ’’ཏི། ཨཔྤཧཱིནོཏི ཨནཝསེསཏོ ཨཔྤཧཱིནོ། དུཝིདྷེཏི ཝཏྠུཀཱམཀིལེསཀཱམེ། ཀིལེསཀཱམོཔི ཧི ཡདགྒེན ཨསྶཱདཱིཡཏི, ཏདགྒེན པརིབྷུཉྫཱིཡཏི།
176.Ajjhattanti niyakajjhattaṃ adhippetanti āha ‘‘tava santāne’’ti. Appahīnoti anavasesato appahīno. Duvidheti vatthukāmakilesakāme. Kilesakāmopi hi yadaggena assādīyati, tadaggena paribhuñjīyati.
༡༧༧. ཨསྶཱདཱིཡཏཱིཏི ཨསྶཱདོ, སུཁཾ། ཨཔྤོ ཨཔྤམཏྟཀོ ཨསྶཱདོ ཨེཏེསཱུཏི ཨཔྤསྶཱདཱ། ཏེནཱཧ ‘‘པརིཏྟསུཁཱ’’ཏི། པརིཡེསནདུཀྑཱདིཧེཏུཀཾ དིཊྛདྷམྨིཀཾ ཏཏྠ དུཙྩརིཏཙརཎེན སམྤརཱཡིཀཉྩ དུཀྑམེཏྠ ཀཱམེསུ བཧུཀནྟི བཧུདུཀྑཱ། བཧུཔཱཡཱསཱཏི བཧུཔརིཀྐིལེསཱ། ཏེ པན པརིཀྐིལེསཱ ཝཀྑམཱནནཡེན བཧཱུཡེཝེཏྠ དིཊྛདྷམྨིཀཱཔཱིཏི ཨཱཧ ‘‘དིཊྛདྷམྨིཀ…པེ॰… བཧཱུ’’ཏི། ཏེ ཙ པརིཀྐིལེསཱ ཡསྨཱ ཏཾསམངྒིནོ ཧིཏཔཊིཔཏྟིཡཱ ཨནྟརཱཡཀརཱ ཨིདྷ ཙེཝ པརལོཀེ ཙ ཨཱདཱིནཝཀཱརཎཉྩ པཝཏྟནྟི, ཏསྨཱ ཝུཏྟཾ ‘‘དིཊྛདྷམྨིཀ…པེ॰… བཧཱུ’’ཏི། ཨེཝཾ ཙེཔཱིཏི ཨེཝཾ ‘‘ཨཔྤསྶཱདཱ ཀཱམཱ’’ཏིཨཱདིནཱ ཨཱཀཱརེན། ནཡེནཱཏི དྷམྨེན། ཀཱརཎེནཱཏི ཡུཏྟིཡཱ། སུཊྛུ དིཊྛཾ ཧོཏཱིཏི སམྦནྡྷོ། ཝིཔསྶནཱཔཉྙཱཡཱཏི ཨརིཡམགྒཔཉྙཱཡ། སཱ ཙཏྟཱརིཔི སཙྩཱནི ཝིསེསཏོ པསྶཏཱིཏི ཝིཔསྶནཱཏི ཨདྷིཔྤེཏཱ། ཏེནཱཧ ‘‘ཧེཊྛཱམགྒདྭཡཉཱཎེནཱཏི ཨཏྠོ’’ཏི། པཱིཏིསུཁནྟི པཱིཏིསུཁཝནྟཾ ཛྷཱནདྭཡཾ། དྭེ མགྒེཏི ཧེཊྛཱམགྒེ། ཨཱཝཊྚནསཱིལོ ཨཱབྷུཛནསཱིལོ ན ཧོཏཱིཏི ཨནཱཝཊྚཱི ནེཝ ཧོཏི སབྦསོ ཨཔྤཧཱིནཀཱམརཱགཚནྡོ། ཏེནཱཧ ‘‘ཀསྨཱ’’ཏིཨཱདི། ཨོརོདྷནཱཊཀཱ པཛཧནཔཉྙཱཏི ཨཱདཱིནཝཱནུཔསྶནཱཉཱཎམཱཧ།
177. Assādīyatīti assādo, sukhaṃ. Appo appamattako assādo etesūti appassādā. Tenāha ‘‘parittasukhā’’ti. Pariyesanadukkhādihetukaṃ diṭṭhadhammikaṃ tattha duccaritacaraṇena samparāyikañca dukkhamettha kāmesu bahukanti bahudukkhā. Bahupāyāsāti bahuparikkilesā. Te pana parikkilesā vakkhamānanayena bahūyevettha diṭṭhadhammikāpīti āha ‘‘diṭṭhadhammika…pe… bahū’’ti. Te ca parikkilesā yasmā taṃsamaṅgino hitapaṭipattiyā antarāyakarā idha ceva paraloke ca ādīnavakāraṇañca pavattanti, tasmā vuttaṃ ‘‘diṭṭhadhammika…pe… bahū’’ti. Evaṃ cepīti evaṃ ‘‘appassādā kāmā’’tiādinā ākārena. Nayenāti dhammena. Kāraṇenāti yuttiyā. Suṭṭhu diṭṭhaṃ hotīti sambandho. Vipassanāpaññāyāti ariyamaggapaññāya. Sā cattāripi saccāni visesato passatīti vipassanāti adhippetā. Tenāha ‘‘heṭṭhāmaggadvayañāṇenāti attho’’ti. Pītisukhanti pītisukhavantaṃ jhānadvayaṃ. Dve maggeti heṭṭhāmagge. Āvaṭṭanasīlo ābhujanasīlo na hotīti anāvaṭṭī neva hoti sabbaso appahīnakāmarāgachando. Tenāha ‘‘kasmā’’tiādi. Orodhanāṭakā pajahanapaññāti ādīnavānupassanāñāṇamāha.
༡༧༩. ཨསྶཱདོཔི ཀཐིཏོ, ‘‘ཨཔྤསྶཱདཱ’’ཏི ཧི ཨིམིནཱ ཡཱཝཏཀོ ཀཱམེསུ ཨསྶཱདོ, ཏཾ སབྦཾ ཨནཝསེསཏོ པརིགྒཧེཏྭཱ ཙསྶ པརིཏྟབྷཱཝོ དསྶིཏོཏི ཨཱདཱིནཝོཔི ཀཐིཏོ སངྑེཔེནེཝ སེསསྶཨཱདཱིནཝསྶ དསྶིཏཏྟཱ། ཏཾ ཀཐེཏུནྟི ཏཾ ནིསྶརཎཾ ‘‘ཨེཀནྟསུཁཔཊིསཾཝེདཱི’’ཏི ཨིམིནཱ ཀཐེཏུཾ། ཨིམེཧི ཨནྟེཧཱིཏི ‘‘པཉྩིམེ, མཧཱནཱམ, ཀཱམགུཎཱ’’ཏིཨཱདིནཱ ཀཱམགུཎདསྶནམུཁེན ཀཱམསུཁལླིཀཱནུཡོགཾ ‘‘ཨུབྦྷཊྛཀཱ ཧོནྟི ཨཱསནཔཊིཀྑིཏྟཱ’’ཏིཨཱདིནཱ ཨཏྟཀིལམཐཱནུཡོགཉྩ དསྶེཏྭཱ ཨིམེཧི དྭཱིཧི ཨནྟེཧི མུཏྟཾ མམ སཱསནནྟི, ཕལསམཱཔཏྟིཔརིཡོསཱནཏྟཱ སཱསནསམྤཏྟིཡཱ ‘‘ཨུཔརིཕལསམཱཔཏྟིསཱིསེན སཀལསཱསནཾ དསྶེཏུ’’ནྟི ཨཱཧ། གིཛ྄ཛྷསདིསོ ཀཱུཊོཏི མཛ྄ཛྷེཔདལོཔཱིསམཱསོ ཡཐཱ ‘‘སཱཀཔཏྠིཝོ’’ཏི (པཱཎིནི॰ ༢.༡.༦༠)། དུཏིཡེ པནེཏྠ གིཛ྄ཛྷཝནྟཏཱཡ གིཛ྄ཛྷཱ ཀཱུཊེ ཨེཏསྶཱཏི གིཛ྄ཛྷཀཱུཊོ། ཨུདྡྷཾཡེཝ ཏིཊྛནཀཱ ནིསཛྫཱཡ ཝུཊྛིཏཀཱལཏོ པཊྛཱཡ ཨེཀཊྛཱནེནེཝ ཏིཊྛནཀཱ། ཏེནཱཧ ‘‘ཨནིསིནྣཱ’’ཏི། ནིགཎྛསྶཱཏི ནཱཊཔུཏྟསྶ། ནཏྠི ཨེཏསྶ པརིསེསནྟི ཨཔརིསེསཾ། ཨེཝཾ སངྑཱབྷཝཙནམཏྟམསྶཱཏི ཨཱཧ ‘‘ཨཔརིསེསསངྑཱཏ’’ནྟི། ནིཙྩཊྛེན སཏཏ-སདྡེན ཨབྷིཎྷཔྤཝཏྟི ཛོཏིཏཱ སིཡཱཏི ‘‘སམིཏ’’ནྟི ཝུཏྟཾ། ཏེན ནིརནྟརཔྤཝཏྟིཾ དསྶེཏཱིཏི ཨེཝཾ ཝཱ ཨེཏྠ ཨཏྠོ དཊྛབྦོ།
179.Assādopi kathito, ‘‘appassādā’’ti hi iminā yāvatako kāmesu assādo, taṃ sabbaṃ anavasesato pariggahetvā cassa parittabhāvo dassitoti ādīnavopi kathito saṅkhepeneva sesassaādīnavassa dassitattā. Taṃ kathetunti taṃ nissaraṇaṃ ‘‘ekantasukhapaṭisaṃvedī’’ti iminā kathetuṃ. Imehi antehīti ‘‘pañcime, mahānāma, kāmaguṇā’’tiādinā kāmaguṇadassanamukhena kāmasukhallikānuyogaṃ ‘‘ubbhaṭṭhakā honti āsanapaṭikkhittā’’tiādinā attakilamathānuyogañca dassetvā imehi dvīhi antehi muttaṃ mama sāsananti, phalasamāpattipariyosānattā sāsanasampattiyā ‘‘upariphalasamāpattisīsena sakalasāsanaṃ dassetu’’nti āha. Gijjhasadiso kūṭoti majjhepadalopīsamāso yathā ‘‘sākapatthivo’’ti (pāṇini. 2.1.60). Dutiye panettha gijjhavantatāya gijjhā kūṭe etassāti gijjhakūṭo. Uddhaṃyeva tiṭṭhanakā nisajjāya vuṭṭhitakālato paṭṭhāya ekaṭṭhāneneva tiṭṭhanakā. Tenāha ‘‘anisinnā’’ti. Nigaṇṭhassāti nāṭaputtassa. Natthi etassa parisesanti aparisesaṃ. Evaṃ saṅkhābhavacanamattamassāti āha ‘‘aparisesasaṅkhāta’’nti. Niccaṭṭhena satata-saddena abhiṇhappavatti jotitā siyāti ‘‘samita’’nti vuttaṃ. Tena nirantarappavattiṃ dassetīti evaṃ vā ettha attho daṭṭhabbo.
༡༨༠. ཡཾ ཀརོཏི, ཏཾ ཛཱནཱཏཱིཏི དུཀྑསྶ ནིཛྫརཎཁེཔནཾ ནཱམ ཝིཉྙཱུནཾ ཀིཙྩཾ, ཝིཉྙུནཱ ཙ པུརིསེན ཀཏཱཀཏཾ ཛཱནིཏབྦཾ, ཏསྨཱ ཏུམྷེཧི པུརཱཎཱནཾ ཀམྨཱནཾ བྱནྟིབྷཱཝཾ ཀརོནྟེཧི པཋམཾ ཏཱཝ ཨེཏྟཀཱནི པུརཱཎཱནི ཀམྨཱནཱིཏི ཛཱནིཏབྦཱནི, ཏཏོ ‘‘ཨེཏྟཀཾ ཀཱལཾ ཀཏེན ཏཔསཱ ཨེཏྟཀཱནི ཏཱནི བྱནྟིཀཏཱནི, ཨིདཱནི ཨེཏྟཀཱནི ཀཱཏབྦཱནཱི’’ཏིཨཱདིནཱ ཨཡཾ ཝིདྷི པུརིསེན ཝིཡ ཨཏྟནཱ ཀཱཏབྦཀིཙྩཾ པརིཙྪིནྡིཏབྦནྟི དསྶེཏི། ཏེནཱཧ ‘‘ཏུམྷེཧིཔི ཏཐཱ ཉཱཏབྦཾ སིཡཱ’’ཏི། སུདྡྷནྟནྟི སུདྡྷཀོཊྛཱསཾ, ཨཱཡཏིཾ ཨནཝསྶཝསིདྡྷཾ ཀམྨཀྑཡཾ, ཏཏོ ཝཱ དུཀྑཀྑཡནྟི ཨཏྠོ། སུདྡྷནྟཾ པཏྟོ ཨཏྠཱིཏི པུཙྪཏཱིཏི ཨིམིནཱ ཨཀུསལཱནཾ པཧཱནཾ, ཀུསལཱནཾ བྷཱཝནཱ ཙ སབྦེན སབྦཾ ནིགཎྛསམཡེ ནཏྠི སབྦསོ ཝིསུདྡྷིབྷཱཝནཱཡ ཨབྷཱཝཏོ, ཏསྨཱ ཀུཏོ དུཀྑཀྑཡསྶ སམྦྷཝོཏི དསྶེཏི།
180.Yaṃ karoti, taṃ jānātīti dukkhassa nijjaraṇakhepanaṃ nāma viññūnaṃ kiccaṃ, viññunā ca purisena katākataṃ jānitabbaṃ, tasmā tumhehi purāṇānaṃ kammānaṃ byantibhāvaṃ karontehi paṭhamaṃ tāva ettakāni purāṇāni kammānīti jānitabbāni, tato ‘‘ettakaṃ kālaṃ katena tapasā ettakāni tāni byantikatāni, idāni ettakāni kātabbānī’’tiādinā ayaṃ vidhi purisena viya attanā kātabbakiccaṃ paricchinditabbanti dasseti. Tenāha ‘‘tumhehipi tathā ñātabbaṃ siyā’’ti. Suddhantanti suddhakoṭṭhāsaṃ, āyatiṃ anavassavasiddhaṃ kammakkhayaṃ, tato vā dukkhakkhayanti attho. Suddhantaṃ patto atthīti pucchatīti iminā akusalānaṃ pahānaṃ, kusalānaṃ bhāvanā ca sabbena sabbaṃ nigaṇṭhasamaye natthi sabbaso visuddhibhāvanāya abhāvato, tasmā kuto dukkhakkhayassa sambhavoti dasseti.
ཨེཝཾ ཨཛཱནནབྷཱཝེ སཏཱིཏི ‘‘ཨཧུཝམྷེཝ མཡ’’ནྟིཨཱདིནཱ ཝུཏྟཔྤཀཱརསྶ ཨཛཱནནེ སཏི, ཏསྨིཾ ཏུམྷེཧི ཨཉྙཱཡམཱནེཏི ཨཏྠོ། ལུདྡཱཏི གྷོརཱ། ཏེ པན ཡསྨཱ ཀཱཡཝཱཙཱཧི ནིཧཱིནམེཝ ཀརོནྟི, ཏསྨཱ ཝུཏྟཾ ‘‘ལུདྡཱཙཱརཱ’’ཏི། ལོཧིཏཔཱཎིཏྭེཝ ཝུཙྩཏི ཏཛྫཱཀིརིཡཱཙརཎཏོ། མཱགཝིཀཀེཝཊྚཙོརགྷཱཏཀཱདཡོ མཱགཝིཀཱདཡོ། ཀཀྑལ༹ཀམྨཱཏི ཕརུསཀམྨཱ། ཏེ ནིགཎྛེསུ པབྦཛནྟཱིཏི པུབྦེ མཧཱདུཀྑསཾཝཏྟནིཡཀམྨསྶ ཀཏཏྟཱ ཧི ཏུམྷེ ཨེཏརཧི ཨཱིདིསཾ མཧཱདུཀྑཾ པཙྩནུབྷཝཐཱཏི དསྶེཏི།
Evaṃ ajānanabhāve satīti ‘‘ahuvamheva maya’’ntiādinā vuttappakārassa ajānane sati, tasmiṃ tumhehi aññāyamāneti attho. Luddāti ghorā. Te pana yasmā kāyavācāhi nihīnameva karonti, tasmā vuttaṃ ‘‘luddācārā’’ti. Lohitapāṇitveva vuccati tajjākiriyācaraṇato. Māgavikakevaṭṭacoraghātakādayo māgavikādayo. Kakkhaḷakammāti pharusakammā. Te nigaṇṭhesu pabbajantīti pubbe mahādukkhasaṃvattaniyakammassa katattā hi tumhe etarahi īdisaṃ mahādukkhaṃ paccanubhavathāti dasseti.
ཝཱདེཏི དིཊྛིཡཾ, སམཡེཏི ཨཏྠོ། སུཁེན སུཁནྟི ཨེཏྠ སུཁེནཱཏི པཊིཔཏྟིསུཁེན, སུཁཱཡ པཊིཔཏྟིཡཱཏི ཨཏྠོ། སུཁནྟི ཝིམོཀྑསུཁཾ, ཨིདྷ ལོཀེ སུཁཾ ཨདྷིགཙྪནྟཱ ཀསིཝཎིཛྫཱདིདུཀྑཔཊིཔཏྟིཡཱཝ ཨདྷིགཙྪནྟི, ཨེཝཾ མོཀྑསུཁམྤཱིཏི ཨདྷིཔྤཱཡོ། སརཱིརཱཝཡཝསམྤཏྟིཡཱཔི བིམྦིནོ སཱརོཏི བིམྦིསཱརོ། ཏེ ནིགཎྛཱ…པེ॰… སནྡྷཱཡ ཝདནྟི, ན པན བྷགཝཏོ ཨཙྩནྟསནྟཔཎཱིཏཾ ནིབྦཱནསུཁཔཊིཝེདནཾ ཛཱནནྟི། སཧསཱཏི རཝཱ། ཨཔྤཊིསངྑཱཏི ན པཊིསངྑཱཡ ཨཝིཙཱརེཏྭཱ། ཏེནཱཧ ‘‘སཱཧསཾ ཀཏྭཱ’’ཏིཨཱདི།
Vādeti diṭṭhiyaṃ, samayeti attho. Sukhena sukhanti ettha sukhenāti paṭipattisukhena, sukhāya paṭipattiyāti attho. Sukhanti vimokkhasukhaṃ, idha loke sukhaṃ adhigacchantā kasivaṇijjādidukkhapaṭipattiyāva adhigacchanti, evaṃ mokkhasukhampīti adhippāyo. Sarīrāvayavasampattiyāpi bimbino sāroti bimbisāro. Te nigaṇṭhā…pe… sandhāya vadanti, na pana bhagavato accantasantapaṇītaṃ nibbānasukhapaṭivedanaṃ jānanti. Sahasāti ravā. Appaṭisaṅkhāti na paṭisaṅkhāya avicāretvā. Tenāha ‘‘sāhasaṃ katvā’’tiādi.
ཨཉྙཱཧི ཝེདནཱཧི ཨཝོམིསྶཾ ཨེཀནྟཾ སུཁཾ ཨེཀནྟསུཁཾ, ཏསྶ པཊིསཾཝེདཱི། ཏེནཱཧ ‘‘ནིརནྟརསུཁཔཊིསཾཝེདཱི’’ཏི། ཀཐཱཔཏིཊྛཱཔནཏྠནྟི ‘‘ཨེཀནྟསུཁཔཊིསཾཝེདཱི’’ཏི ཨེཝཾ ཨཱརདྡྷཀཐཱཡ པཏིཊྛཱཔནཏྠཾ། རཱཛཝཱརེཏི རཱཛཱནཾ ཨུདྡིསྶ ཨཱགཏདེསནཱཝཱརེ། སུཁཾ པུཙྪིཏུཾ ཧོཏཱིཏི ‘‘ཡདི སཏྟ རཏྟིནྡིཝཱནི ནཔྤཧོཏི, ཀིཾ ཚ རཏྟིནྡིཝཱནི པཧོཏཱི’’ཏིཨཱདིནཱ པུཙྪནསུཁཾ ཧོཏི། ‘‘ཨཧཾ ཁོ’’ཏིཨཱདིནཱ པཝཏྟོ སུདྡྷཝཱརོ སུདྡྷནིསྶནྡསྶ ཕལསམཱཔཏྟིསུཁསྶ ཝསེན ཨཱགཏཏྟཱ། ཨནཙྪརིཡཾ ཧོཏི, སཏྟ རཏྟིནྡིཝཱནི པཧོནྟསྶ ཨེཀསྨིཾ རཏྟིནྡིཝེ ཀིཾ ཝཏྟབྦནྟི། ཨུཏྟཱནཏྠམེཝ ཝུཏྟནཡཏྟཱ སུཝིཉྙེཡྻཏྟཱ།
Aññāhi vedanāhi avomissaṃ ekantaṃ sukhaṃ ekantasukhaṃ, tassa paṭisaṃvedī. Tenāha ‘‘nirantarasukhapaṭisaṃvedī’’ti. Kathāpatiṭṭhāpanatthanti ‘‘ekantasukhapaṭisaṃvedī’’ti evaṃ āraddhakathāya patiṭṭhāpanatthaṃ. Rājavāreti rājānaṃ uddissa āgatadesanāvāre. Sukhaṃ pucchituṃ hotīti ‘‘yadi satta rattindivāni nappahoti, kiṃ cha rattindivāni pahotī’’tiādinā pucchanasukhaṃ hoti. ‘‘Ahaṃ kho’’tiādinā pavatto suddhavāro suddhanissandassa phalasamāpattisukhassa vasena āgatattā. Anacchariyaṃ hoti, satta rattindivāni pahontassa ekasmiṃ rattindive kiṃ vattabbanti. Uttānatthameva vuttanayattā suviññeyyattā.
ཙཱུལ༹དུཀྑཀྑནྡྷསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Cūḷadukkhakkhandhasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༤. ཙཱུལ༹དུཀྑཀྑནྡྷསུཏྟཾ • 4. Cūḷadukkhakkhandhasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༤. ཙཱུལ༹དུཀྑཀྑནྡྷསུཏྟཝཎྞནཱ • 4. Cūḷadukkhakkhandhasuttavaṇṇanā
