| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൧൦. ചൂളസുഗന്ധത്ഥേരഅപദാനവണ്ണനാ
10. Cūḷasugandhattheraapadānavaṇṇanā
ദസമാപദാനേ ഇമമ്ഹി ഭദ്ദകേ കപ്പേതിആദികം ആയസ്മതോ സുഗന്ധത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ കസ്സപസമ്മാസമ്ബുദ്ധകാലേ ബാരാണസിയം വിഭവസമ്പന്നേ കുലേ നിബ്ബത്തോ വിഞ്ഞുതം പത്വാ സത്ഥു സന്തികേ ധമ്മം സുത്വാ സബ്ബദാ നമസ്സമാനോ മഹാദാനം ദദമാനോ മാസസ്സ സത്തക്ഖത്തും ഭഗവതോ ഗന്ധകുടിയാ ചതുജ്ജാതിഗന്ധേന വിലിമ്പേസി. ‘‘മമ നിബ്ബത്തനിബ്ബത്തട്ഠാനേ സരീരതോ സുഗന്ധഗന്ധോ നിബ്ബത്തതൂ’’തി പത്ഥനം അകാസി. ഭഗവാ തം ബ്യാകാസി. സോ യാവതായുകം ഠത്വാ പുഞ്ഞാനി കരോന്തോ തതോ ചുതോ ദേവലോകേ നിബ്ബത്തോ കാമാവചരലോകം സരീരഗന്ധേന സുഗന്ധം കുരുമാനോ സുഗന്ധദേവപുത്തോതി പാകടോ അഹോസി. സോ ദേവലോകസമ്പത്തിയോ അനുഭവിത്വാ തതോ ചുതോ ഇമസ്മിം ബുദ്ധുപ്പാദേ മഹാഭോഗകുലേ നിബ്ബത്തി, തസ്സ മാതുകുച്ഛിഗതസ്സേവ മാതുയാ സരീരഗന്ധേന സകലഗേഹം സകലനഗരഞ്ച സുഗന്ധേന ഏകഗന്ധം അഹോസി, ജാതക്ഖണേ സകലം സാവത്ഥിനഗരം സുഗന്ധകരണ്ഡകോ വിയ അഹോസി, തേനസ്സ സുഗന്ധോതി നാമം കരിംസു. സോ വുദ്ധിം അഗമാസി. തദാ സത്ഥാ സാവത്ഥിയം പത്വാ ജേതവനമഹാവിഹാരം പടിഗ്ഗഹേസി, തം ദിസ്വാ പസന്നമാനസോ ഭഗവതോ സന്തികേ പബ്ബജിത്വാ നചിരസ്സേവ സഹ പടിസമ്ഭിദാഹി അരഹത്തം പാപുണി. തസ്സ ഉപ്പന്നദിവസതോ പട്ഠായ യാവ പരിനിബ്ബാനാ ഏത്ഥന്തരേ നിപന്നട്ഠാനാദീസു സുഗന്ധമേവ വായി. ദേവാപി ദിബ്ബചുണ്ണദിബ്ബഗന്ധപുപ്ഫാനി ഓകിരന്തി.
Dasamāpadāne imamhi bhaddake kappetiādikaṃ āyasmato sugandhattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto kassapasammāsambuddhakāle bārāṇasiyaṃ vibhavasampanne kule nibbatto viññutaṃ patvā satthu santike dhammaṃ sutvā sabbadā namassamāno mahādānaṃ dadamāno māsassa sattakkhattuṃ bhagavato gandhakuṭiyā catujjātigandhena vilimpesi. ‘‘Mama nibbattanibbattaṭṭhāne sarīrato sugandhagandho nibbattatū’’ti patthanaṃ akāsi. Bhagavā taṃ byākāsi. So yāvatāyukaṃ ṭhatvā puññāni karonto tato cuto devaloke nibbatto kāmāvacaralokaṃ sarīragandhena sugandhaṃ kurumāno sugandhadevaputtoti pākaṭo ahosi. So devalokasampattiyo anubhavitvā tato cuto imasmiṃ buddhuppāde mahābhogakule nibbatti, tassa mātukucchigatasseva mātuyā sarīragandhena sakalagehaṃ sakalanagarañca sugandhena ekagandhaṃ ahosi, jātakkhaṇe sakalaṃ sāvatthinagaraṃ sugandhakaraṇḍako viya ahosi, tenassa sugandhoti nāmaṃ kariṃsu. So vuddhiṃ agamāsi. Tadā satthā sāvatthiyaṃ patvā jetavanamahāvihāraṃ paṭiggahesi, taṃ disvā pasannamānaso bhagavato santike pabbajitvā nacirasseva saha paṭisambhidāhi arahattaṃ pāpuṇi. Tassa uppannadivasato paṭṭhāya yāva parinibbānā etthantare nipannaṭṭhānādīsu sugandhameva vāyi. Devāpi dibbacuṇṇadibbagandhapupphāni okiranti.
൨൭൨. സോപി ഥേരോ അരഹത്തം പത്വാ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ ഇമമ്ഹി ഭദ്ദകേ കപ്പേതിആദിമാഹ. തം സബ്ബം ഹേട്ഠാ വുത്തനയത്താ ഉത്താനത്ഥത്താ ച സുവിഞ്ഞേയ്യമേവ, കേവലം പുഞ്ഞനാനത്തം നാമനാനത്തഞ്ച വിസേസോ.
272. Sopi thero arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento imamhi bhaddake kappetiādimāha. Taṃ sabbaṃ heṭṭhā vuttanayattā uttānatthattā ca suviññeyyameva, kevalaṃ puññanānattaṃ nāmanānattañca viseso.
ചൂളസുഗന്ധത്ഥേരഅപദാനവണ്ണനാ സമത്താ.
Cūḷasugandhattheraapadānavaṇṇanā samattā.
പഞ്ചപഞ്ഞാസമവഗ്ഗവണ്ണനാ സമത്താ.
Pañcapaññāsamavaggavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൧൦. ചൂളസുഗന്ധത്ഥേരഅപദാനം • 10. Cūḷasugandhattheraapadānaṃ
