| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[172] 2. д̣̇ад̣̇д̣̇араж̇аад̇агаван̣н̣анаа
[172] 2. Daddarajātakavaṇṇanā
го ну сад̣̇д̣̇зна махад̇аад̇и ид̣̇ам̣ сад̇т̇аа ж̇зд̇аванз вихаранд̇о гогаалигам̣ аараб̣бха гат̇зси. д̇асмин̃хи гаалз б̣ахуу б̣ахуссуд̇аа бхигкуу маносилаад̇алз над̣̇амаанаа д̇арун̣асийхаа вияа аагаасаг̇ан̇г̇ам̣ од̇аарзнд̇аа вияа сан̇гхамаж̇жхз сарабхаан̣ам̣ бхан̣анд̇и. гогаалиго д̇зсу сарабхаан̣ам̣ бхан̣анд̇зсу ад̇д̇ано д̇ужчабхаавам̣ аж̇аанид̇ваава ‘‘ахамби сарабхаан̣ам̣ бхан̣иссаамий’’д̇и бхигкуунам̣ анд̇арам̣ бависид̇ваа ‘‘амхаагам̣ сарабхаан̣ам̣ на баабзнд̇и. сажз амхаагамби баабзяяум̣, маяамби бхан̣зяяаамаа’’д̇и бхигкусан̇гхасса наамам̣ аг̇г̇ахзд̇ваава д̇ад̇т̇а д̇ад̇т̇а гат̇знд̇о аахин̣д̣ад̇и. д̇асса саа гат̇аа бхигкусан̇гхз баагадаа ж̇аад̇аа. бхигкуу ‘‘виймам̣сиссаама д̇аава на’’нд̇и сан̃н̃ааяа звамаахам̣су – ‘‘аавусо гогаалига, аж̇ж̇а сан̇гхасса сарабхаан̣ам̣ бхан̣аахий’’д̇и. со ад̇д̇ано б̣алам̣ аж̇аанид̇ваава ‘‘саад̇хуу’’д̇и самбадижчид̇ваа ‘‘аж̇ж̇а сарабхаан̣ам̣ бхан̣иссаамий’’д̇и ад̇д̇ано саббааяам̣ яааг̇ум̣ биви, каж̇ж̇агам̣ каад̣̇и, саббааязнзва суубзна бхун̃ж̇и.
Ko nu saddena mahatāti idaṃ satthā jetavane viharanto kokālikaṃ ārabbha kathesi. Tasmiñhi kāle bahū bahussutā bhikkhū manosilātale nadamānā taruṇasīhā viya ākāsagaṅgaṃ otārentā viya saṅghamajjhe sarabhāṇaṃ bhaṇanti. Kokāliko tesu sarabhāṇaṃ bhaṇantesu attano tucchabhāvaṃ ajānitvāva ‘‘ahampi sarabhāṇaṃ bhaṇissāmī’’ti bhikkhūnaṃ antaraṃ pavisitvā ‘‘amhākaṃ sarabhāṇaṃ na pāpenti. Sace amhākampi pāpeyyuṃ, mayampi bhaṇeyyāmā’’ti bhikkhusaṅghassa nāmaṃ aggahetvāva tattha tattha kathento āhiṇḍati. Tassa sā kathā bhikkhusaṅghe pākaṭā jātā. Bhikkhū ‘‘vīmaṃsissāma tāva na’’nti saññāya evamāhaṃsu – ‘‘āvuso kokālika, ajja saṅghassa sarabhāṇaṃ bhaṇāhī’’ti. So attano balaṃ ajānitvāva ‘‘sādhū’’ti sampaṭicchitvā ‘‘ajja sarabhāṇaṃ bhaṇissāmī’’ti attano sappāyaṃ yāguṃ pivi, khajjakaṃ khādi, sappāyeneva sūpena bhuñji.
суурияз ад̇т̇ан̇г̇ад̇з д̇хаммассаванагаалз гхосид̇з бхигкусан̇гхо саннибад̇и. со ган̣дагуран̣д̣агаван̣н̣ам̣ гаасаавам̣ ниваасзд̇ваа ган̣игаарабубпаван̣н̣ам̣ жийварам̣ баарубид̇ваа сан̇гхамаж̇жхам̣ бависид̇ваа т̇зрз ванд̣̇ид̇ваа алан̇гад̇арад̇анаман̣д̣абз бан̃н̃ад̇д̇аварад̇хаммаасанам̣ абхирухид̇ваа жид̇раб̣ийж̇аним̣ г̇ахзд̇ваа ‘‘сарабхаан̣ам̣ бхан̣иссаамий’’д̇и нисийд̣̇и, д̇аавад̣̇звасса сарийраа сзд̣̇аа мужжим̣су, саараж̇ж̇ам̣ оггами, буб̣б̣аг̇аат̇ааяа батамам̣ бад̣̇ам̣ уд̣̇аахарид̇ваа ананд̇арам̣ на басси. со гамбамаано аасанаа оруяха лаж̇ж̇ид̇о сан̇гхамаж̇жхад̇о абаггамма ад̇д̇ано баривзн̣ам̣ аг̇амааси. ан̃н̃о б̣ахуссуд̇о бхигку сарабхаан̣ам̣ бхан̣и. д̇ад̇о бадтааяа бхигкуу д̇асса д̇ужчабхаавам̣ ж̇ааним̣су. ат̇згад̣̇ивасам̣ д̇хаммасабхааяам̣ бхигкуу гат̇ам̣ самудтаабзсум̣ – ‘‘аавусо, батамам̣ гогаалигасса д̇ужчабхааво д̣̇уж̇ж̇аано, ид̣̇аани банзса саяам̣ над̣̇ид̇ваа баагадо ж̇аад̇о’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, гогаалиго ид̣̇аанзва над̣̇ид̇ваа баагадо ж̇аад̇о, буб̣б̣зби над̣̇ид̇ваа баагадо ахосий’’д̇и вад̇ваа ад̇ийд̇ам̣ аахари.
Sūriye atthaṅgate dhammassavanakāle ghosite bhikkhusaṅgho sannipati. So kaṇṭakuraṇḍakavaṇṇaṃ kāsāvaṃ nivāsetvā kaṇikārapupphavaṇṇaṃ cīvaraṃ pārupitvā saṅghamajjhaṃ pavisitvā there vanditvā alaṅkataratanamaṇḍape paññattavaradhammāsanaṃ abhiruhitvā citrabījaniṃ gahetvā ‘‘sarabhāṇaṃ bhaṇissāmī’’ti nisīdi, tāvadevassa sarīrā sedā mucciṃsu, sārajjaṃ okkami, pubbagāthāya paṭhamaṃ padaṃ udāharitvā anantaraṃ na passi. So kampamāno āsanā oruyha lajjito saṅghamajjhato apakkamma attano pariveṇaṃ agamāsi. Añño bahussuto bhikkhu sarabhāṇaṃ bhaṇi. Tato paṭṭhāya bhikkhū tassa tucchabhāvaṃ jāniṃsu. Athekadivasaṃ dhammasabhāyaṃ bhikkhū kathaṃ samuṭṭhāpesuṃ – ‘‘āvuso, paṭhamaṃ kokālikassa tucchabhāvo dujjāno, idāni panesa sayaṃ naditvā pākaṭo jāto’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, kokāliko idāneva naditvā pākaṭo jāto, pubbepi naditvā pākaṭo ahosī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о химаванд̇абад̣̇зсз сийхаяонияам̣ ниб̣б̣ад̇д̇ид̇ваа б̣ахуунам̣ сийхаанам̣ рааж̇аа ахоси. со анзгасийхабаривааро раж̇ад̇аг̇ухааяам̣ ваасам̣ габбзси. д̇асса авид̣̇уурз згиссааяа г̇ухааяа зго син̇г̇аалоби васад̇и. ат̇згад̣̇ивасам̣ д̣̇звз вассид̇ваа виг̇ад̇з саб̣б̣з сийхаа сийхарааж̇ассзва г̇ухад̣̇ваарз саннибад̇ид̇ваа сийханаад̣̇ам̣ над̣̇анд̇аа сийхагийл̣ам̣ гийл̣им̣су. д̇зсам̣ звам̣ над̣̇ид̇ваа гийл̣анагаалз соби син̇г̇аало над̣̇ад̇и. сийхаа д̇асса сад̣̇д̣̇ам̣ суд̇ваа ‘‘аяам̣ син̇г̇аало амхзхи сад̣̇д̇хим̣ над̣̇ад̇ий’’д̇и лаж̇ж̇ид̇аа д̇ун̣хий ахзсум̣. д̇зсам̣ д̇ун̣хийбхууд̇агаалз б̣од̇хисад̇д̇асса буд̇д̇о сийхабод̇аго ‘‘д̇аад̇а, имз сийхаа над̣̇ид̇ваа сийхагийл̣ам̣ гийл̣анд̇аа зд̇асса сад̣̇д̣̇ам̣ суд̇ваа лаж̇ж̇ааяа д̇ун̣хий ж̇аад̇аа, го наамзса ад̇д̇ано сад̣̇д̣̇зна ад̇д̇аанам̣ ж̇аанаабзд̇ий’’д̇и бид̇арам̣ бужчанд̇о батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente bodhisatto himavantapadese sīhayoniyaṃ nibbattitvā bahūnaṃ sīhānaṃ rājā ahosi. So anekasīhaparivāro rajataguhāyaṃ vāsaṃ kappesi. Tassa avidūre ekissāya guhāya eko siṅgālopi vasati. Athekadivasaṃ deve vassitvā vigate sabbe sīhā sīharājasseva guhadvāre sannipatitvā sīhanādaṃ nadantā sīhakīḷaṃ kīḷiṃsu. Tesaṃ evaṃ naditvā kīḷanakāle sopi siṅgālo nadati. Sīhā tassa saddaṃ sutvā ‘‘ayaṃ siṅgālo amhehi saddhiṃ nadatī’’ti lajjitā tuṇhī ahesuṃ. Tesaṃ tuṇhībhūtakāle bodhisattassa putto sīhapotako ‘‘tāta, ime sīhā naditvā sīhakīḷaṃ kīḷantā etassa saddaṃ sutvā lajjāya tuṇhī jātā, ko nāmesa attano saddena attānaṃ jānāpetī’’ti pitaraṃ pucchanto paṭhamaṃ gāthamāha –
43.
43.
‘‘го ну сад̣̇д̣̇зна махад̇аа, абхинаад̣̇зд̇и д̣̇ад̣̇д̣̇арам̣;
‘‘Ko nu saddena mahatā, abhinādeti daddaraṃ;
д̇ам̣ сийхаа наббадинад̣̇анд̇и, го наамзсо миг̇аад̇хибхуу’’д̇и.
Taṃ sīhā nappaṭinadanti, ko nāmeso migādhibhū’’ti.
д̇ад̇т̇а абхинаад̣̇зд̇и д̣̇ад̣̇д̣̇аранд̇и д̣̇ад̣̇д̣̇арам̣ раж̇ад̇абаб̣б̣ад̇ам̣ зганаад̣̇ам̣ гарод̇и. миг̇аад̇хибхууд̇и бид̇арам̣ аалабад̇и. аяан̃хзд̇т̇а ад̇т̇о – миг̇аад̇хибхуу миг̇аж̇здтага сийхарааж̇а бужчаами д̇ам̣ ‘‘го наамзсо’’д̇и.
Tattha abhinādeti daddaranti daddaraṃ rajatapabbataṃ ekanādaṃ karoti. Migādhibhūti pitaraṃ ālapati. Ayañhettha attho – migādhibhū migajeṭṭhaka sīharāja pucchāmi taṃ ‘‘ko nāmeso’’ti.
ат̇асса важанам̣ суд̇ваа бид̇аа д̣̇уд̇ияам̣ г̇аат̇амааха –
Athassa vacanaṃ sutvā pitā dutiyaṃ gāthamāha –
44.
44.
‘‘ад̇хамо миг̇аж̇аад̇аанам̣, син̇г̇аало д̇аад̇а вассад̇и;
‘‘Adhamo migajātānaṃ, siṅgālo tāta vassati;
ж̇аад̇имасса ж̇иг̇ужчанд̇аа, д̇ун̣хий сийхаа самажжарз’’д̇и.
Jātimassa jigucchantā, tuṇhī sīhā samaccare’’ti.
д̇ад̇т̇а самажжарзд̇и санд̇и убасаг̇г̇амад̇д̇ам̣, ажжанд̇ийд̇и ад̇т̇о, д̇ун̣хий худ̇ваа нисийд̣̇анд̇ийд̇и вуд̇д̇ам̣ ход̇и. бод̇т̇агзсу бана ‘‘самажчарз’’д̇и ликанд̇и.
Tattha samaccareti santi upasaggamattaṃ, accantīti attho, tuṇhī hutvā nisīdantīti vuttaṃ hoti. Potthakesu pana ‘‘samacchare’’ti likhanti.
сад̇т̇аа ‘‘на, бхигкавз, гогаалиго ид̣̇аанзва ад̇д̇ано наад̣̇зна ад̇д̇аанам̣ баагадам̣ гарод̇и, буб̣б̣зби агаасиязваа’’д̇и вад̇ваа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа син̇г̇аало гогаалиго ахоси, сийхабод̇аго раахуло, сийхарааж̇аа бана ахамзва ахоси’’нд̇и.
Satthā ‘‘na, bhikkhave, kokāliko idāneva attano nādena attānaṃ pākaṭaṃ karoti, pubbepi akāsiyevā’’ti vatvā imaṃ dhammadesanaṃ āharitvā jātakaṃ samodhānesi – ‘‘tadā siṅgālo kokāliko ahosi, sīhapotako rāhulo, sīharājā pana ahameva ahosi’’nti.
д̣̇ад̣̇д̣̇араж̇аад̇агаван̣н̣анаа д̣̇уд̇ияаа.
Daddarajātakavaṇṇanā dutiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 172. д̣̇ад̣̇д̣̇араж̇аад̇агам̣ • 172. Daddarajātakaṃ
