| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. தா³னகதா²வண்ணனா
4. Dānakathāvaṇṇanā
478. இதா³னி தா³னகதா² நாம ஹோதி. தத்த² தா³னங் நாம திவித⁴ங் – சாக³சேதனாபி, விரதிபி, தெ³ய்யத⁴ம்மோபி. ‘‘ஸத்³தா⁴ ஹிரியங் குஸலஞ்ச தா³ன’’ந்தி (அ॰ நி॰ 8.30) ஆக³தட்டா²னே சாக³சேதனா தா³னங். ‘‘அப⁴யங் தே³தீ’’தி (அ॰ நி॰ 8.39) ஆக³தட்டா²னே விரதி. ‘‘தா³னங் தே³தி அன்னங் பான’’ந்தி ஆக³தட்டா²னே தெ³ய்யத⁴ம்மோ. தத்த² சாக³சேதனா ‘‘தே³தி வா தெ³ய்யத⁴ம்மங், தெ³ந்தி வா ஏதாய தெ³ய்யத⁴ம்ம’’ந்தி தா³னங். விரதி அவக²ண்ட³னட்டே²ன லவனட்டே²ன வா தா³னங். ஸா ஹி உப்பஜ்ஜமானா ப⁴யபே⁴ரவாதி³ஸங்கா²தங் து³ஸ்ஸீல்யசேதனங் தா³தி க²ண்டே³தி லுனாதி வாதி தா³னங். தெ³ய்யத⁴ம்மோ தி³ய்யதீதி தா³னங். ஏவமேதங் திவித⁴ம்பி அத்த²தோ சேதஸிகோ சேவ த⁴ம்மோ தெ³ய்யத⁴ம்மோ சாதி து³வித⁴ங் ஹோதி. தத்த² யேஸங் ‘‘சேதஸிகோவ த⁴ம்மோ தா³னங், ந தெ³ய்யத⁴ம்மோ’’தி லத்³தி⁴, ஸெய்யதா²பி ராஜகி³ரிகஸித்³த⁴த்தி²கானங்; தே ஸந்தா⁴ய சேதஸிகோதி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் தெ³ய்யத⁴ம்மவஸேன சோதே³துங் லப்³பா⁴தி புச்சா² ஸகவாதி³ஸ்ஸ, அன்னாதீ³னி விய ஸோ ந ஸக்கா தா³துந்தி படிக்கே²போ இதரஸ்ஸ. புன த³ள்ஹங் கத்வா புட்டே² ‘‘அப⁴யங் தே³தீ’’தி ஸுத்தவஸேன படிஞ்ஞா தஸ்ஸேவ. ப²ஸ்ஸபஞ்ஹாதீ³ஸு பன ப²ஸ்ஸங் தே³தீதிஆதி³வோஹாரங் அபஸ்ஸந்தோ படிக்கி²பதேவ.
478. Idāni dānakathā nāma hoti. Tattha dānaṃ nāma tividhaṃ – cāgacetanāpi, viratipi, deyyadhammopi. ‘‘Saddhā hiriyaṃ kusalañca dāna’’nti (a. ni. 8.30) āgataṭṭhāne cāgacetanā dānaṃ. ‘‘Abhayaṃ detī’’ti (a. ni. 8.39) āgataṭṭhāne virati. ‘‘Dānaṃ deti annaṃ pāna’’nti āgataṭṭhāne deyyadhammo. Tattha cāgacetanā ‘‘deti vā deyyadhammaṃ, denti vā etāya deyyadhamma’’nti dānaṃ. Virati avakhaṇḍanaṭṭhena lavanaṭṭhena vā dānaṃ. Sā hi uppajjamānā bhayabheravādisaṅkhātaṃ dussīlyacetanaṃ dāti khaṇḍeti lunāti vāti dānaṃ. Deyyadhammo diyyatīti dānaṃ. Evametaṃ tividhampi atthato cetasiko ceva dhammo deyyadhammo cāti duvidhaṃ hoti. Tattha yesaṃ ‘‘cetasikova dhammo dānaṃ, na deyyadhammo’’ti laddhi, seyyathāpi rājagirikasiddhatthikānaṃ; te sandhāya cetasikoti pucchā sakavādissa, paṭiññā itarassa. Atha naṃ deyyadhammavasena codetuṃ labbhāti pucchā sakavādissa, annādīni viya so na sakkā dātunti paṭikkhepo itarassa. Puna daḷhaṃ katvā puṭṭhe ‘‘abhayaṃ detī’’ti suttavasena paṭiññā tasseva. Phassapañhādīsu pana phassaṃ detītiādivohāraṃ apassanto paṭikkhipateva.
479. அனிட்ட²ப²லந்திஆதி³ அசேதஸிகஸ்ஸ த⁴ம்மஸ்ஸ தா³னபா⁴வதீ³பனத்த²ங் வுத்தங். ந ஹி அசேதஸிகோ அன்னாதி³த⁴ம்மோ ஆயதிங் விபாகங் தே³தி, இட்ட²ப²லபா⁴வனியமனத்த²ங் பனேதங் வுத்தந்தி வேதி³தப்³ப³ங். அயம்பி ஹெத்த² அதி⁴ப்பாயோ – யதி³ அசேதஸிகோ அன்னாதி³த⁴ம்மோ தா³னங் ப⁴வெய்ய, ஹிதசித்தேன அனிட்ட²ங் அகந்தங் பே⁴ஸஜ்ஜங் தெ³ந்தஸ்ஸ நிம்ப³பீ³ஜாதீ³ஹி விய நிம்பா³த³யோ அனிட்ட²மேவ ப²லங் நிப்³ப³த்தெய்ய. யஸ்மா பனெத்த² ஹிதப²ரணசாக³சேதனா தா³னங், தஸ்மா அனிட்டே²பி தெ³ய்யத⁴ம்மே தா³னங் இட்ட²ப²லமேவ ஹோதீதி.
479. Aniṭṭhaphalantiādi acetasikassa dhammassa dānabhāvadīpanatthaṃ vuttaṃ. Na hi acetasiko annādidhammo āyatiṃ vipākaṃ deti, iṭṭhaphalabhāvaniyamanatthaṃ panetaṃ vuttanti veditabbaṃ. Ayampi hettha adhippāyo – yadi acetasiko annādidhammo dānaṃ bhaveyya, hitacittena aniṭṭhaṃ akantaṃ bhesajjaṃ dentassa nimbabījādīhi viya nimbādayo aniṭṭhameva phalaṃ nibbatteyya. Yasmā panettha hitapharaṇacāgacetanā dānaṃ, tasmā aniṭṭhepi deyyadhamme dānaṃ iṭṭhaphalameva hotīti.
ஏவங் பரவாதி³னா சேதஸிகத⁴ம்மஸ்ஸ தா³னபா⁴வே பதிட்டா²பிதே ஸகவாதீ³ இதரேன பரியாயேன தெ³ய்யத⁴ம்மஸ்ஸ தா³னபா⁴வங் ஸாதே⁴துங் தா³னங் இட்ட²ப²லங் வுத்தங் ப⁴க³வதாதிஆதி³மாஹ. பரவாதீ³ பன சீவராதீ³னங் இட்ட²விபாகதங் அபஸ்ஸந்தோ படிக்கி²பதி. ஸுத்தஸாத⁴னங் பரவாதீ³வாதே³பி யுஜ்ஜதி ஸகவாதீ³வாதே³பி, ந பன ஏகேனத்தே²ன. தெ³ய்யத⁴ம்மோ இட்ட²ப²லோதி இட்ட²ப²லபா⁴வமத்தமேவ படிக்கி²த்தங். தஸ்மா தேன ஹி ந வத்தப்³ப³ந்தி இட்ட²ப²லபா⁴வேனேவ ந வத்தப்³ப³தா யுஜ்ஜதி . தா³தப்³ப³ட்டே²ன பன தெ³ய்யத⁴ம்மோ தா³னமேவ. தி³ன்னஞ்ஹி தா³னானங் ஸங்கரபா⁴வமோசனத்த²மேவ அயங் கதா²தி.
Evaṃ paravādinā cetasikadhammassa dānabhāve patiṭṭhāpite sakavādī itarena pariyāyena deyyadhammassa dānabhāvaṃ sādhetuṃ dānaṃ iṭṭhaphalaṃ vuttaṃ bhagavatātiādimāha. Paravādī pana cīvarādīnaṃ iṭṭhavipākataṃ apassanto paṭikkhipati. Suttasādhanaṃ paravādīvādepi yujjati sakavādīvādepi, na pana ekenatthena. Deyyadhammo iṭṭhaphaloti iṭṭhaphalabhāvamattameva paṭikkhittaṃ. Tasmā tena hi na vattabbanti iṭṭhaphalabhāveneva na vattabbatā yujjati . Dātabbaṭṭhena pana deyyadhammo dānameva. Dinnañhi dānānaṃ saṅkarabhāvamocanatthameva ayaṃ kathāti.
தா³னகதா²வண்ணனா.
Dānakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (66) 4. தா³னகதா² • (66) 4. Dānakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. தா³னகதா²வண்ணனா • 4. Dānakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. தா³னகதா²வண்ணனா • 4. Dānakathāvaṇṇanā
