| Library / Tipiṭaka / तिपिटक • Tipiṭaka / जातकपाळि • Jātakapāḷi |
३७८. दरीमुखजातकं (६-१-३)
378. Darīmukhajātakaṃ (6-1-3)
१४.
14.
पङ्को च कामा पलिपो च कामा, भयञ्च मेतं तिमूलं पवुत्तं।
Paṅko ca kāmā palipo ca kāmā, bhayañca metaṃ timūlaṃ pavuttaṃ;
रजो च धूमो च मया पकासिता, हित्वा तुवं पब्बज ब्रह्मदत्त॥
Rajo ca dhūmo ca mayā pakāsitā, hitvā tuvaṃ pabbaja brahmadatta.
१५.
15.
गधितो 1 च रत्तो च अधिमुच्छितो च, कामेस्वहं ब्राह्मण भिंसरूपं।
Gadhito 2 ca ratto ca adhimucchito ca, kāmesvahaṃ brāhmaṇa bhiṃsarūpaṃ;
तं नुस्सहे जीविकत्थो पहातुं, काहामि पुञ्ञानि अनप्पकानि॥
Taṃ nussahe jīvikattho pahātuṃ, kāhāmi puññāni anappakāni.
१६.
16.
यो अत्थकामस्स हितानुकम्पिनो, ओवज्जमानो न करोति सासनं।
Yo atthakāmassa hitānukampino, ovajjamāno na karoti sāsanaṃ;
इदमेव सेय्यो इति मञ्ञमानो, पुनप्पुनं गब्भमुपेति मन्दो॥
Idameva seyyo iti maññamāno, punappunaṃ gabbhamupeti mando.
१७.
17.
सो घोररूपं निरयं उपेति, सुभासुभं मुत्तकरीसपूरं।
So ghorarūpaṃ nirayaṃ upeti, subhāsubhaṃ muttakarīsapūraṃ;
सत्ता सकाये न जहन्ति गिद्धा, ये होन्ति कामेसु अवीतरागा॥
Sattā sakāye na jahanti giddhā, ye honti kāmesu avītarāgā.
१८.
18.
मीळ्हेन लित्ता रुहिरेन मक्खिता, सेम्हेन लित्ता उपनिक्खमन्ति।
Mīḷhena littā ruhirena makkhitā, semhena littā upanikkhamanti;
यं यञ्हि कायेन फुसन्ति तावदे, सब्बं असातं दुखमेव केवलं॥
Yaṃ yañhi kāyena phusanti tāvade, sabbaṃ asātaṃ dukhameva kevalaṃ.
१९.
19.
दिस्वा वदामि न हि अञ्ञतो सवं, पुब्बेनिवासं बहुकं सरामि।
Disvā vadāmi na hi aññato savaṃ, pubbenivāsaṃ bahukaṃ sarāmi;
चित्राहि गाथाहि सुभासिताहि, दरीमुखो निज्झापयि सुमेधन्ति॥
Citrāhi gāthāhi subhāsitāhi, darīmukho nijjhāpayi sumedhanti.
दरीमुखजातकं ततियं।
Darīmukhajātakaṃ tatiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [३७८] ३. दरीमुखजातकवण्णना • [378] 3. Darīmukhajātakavaṇṇanā
