| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၁. ဒာရုက္ခန္ဓသုတ္တံ
11. Dārukkhandhasuttaṃ
၄၁. ဧဝံ မေ သုတံ – ဧကံ သမယံ အာယသ္မာ သာရိပုတ္တော ရာဇဂဟေ ဝိဟရတိ ဂိဇ္ဈကူဋေ ပဗ္ဗတေ။ အထ ခော အာယသ္မာ သာရိပုတ္တော ပုဗ္ဗဏ္ဟသမယံ နိဝာသေတ္ဝာ ပတ္တစီဝရမာဒာယ သမ္ဗဟုလေဟိ ဘိက္ခူဟိ သဒ္ဓိံ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသ အညတရသ္မိံ ပဒေသေ မဟန္တံ ဒာရုက္ခန္ဓံ။ ဒိသ္ဝာ ဘိက္ခူ အာမန္တေသိ – ‘‘ပသ္သထ နော, အာဝုသော, တုမ္ဟေ အမုံ မဟန္တံ ဒာရုက္ခန္ဓ’’န္တိ? ‘‘ဧဝမာဝုသော’’တိ။
41. Evaṃ me sutaṃ – ekaṃ samayaṃ āyasmā sāriputto rājagahe viharati gijjhakūṭe pabbate. Atha kho āyasmā sāriputto pubbaṇhasamayaṃ nivāsetvā pattacīvaramādāya sambahulehi bhikkhūhi saddhiṃ gijjhakūṭā pabbatā orohanto addasa aññatarasmiṃ padese mahantaṃ dārukkhandhaṃ. Disvā bhikkhū āmantesi – ‘‘passatha no, āvuso, tumhe amuṃ mahantaṃ dārukkhandha’’nti? ‘‘Evamāvuso’’ti.
‘‘အာကင္ခမာနော, အာဝုသော, ဘိက္ခု ဣဒ္ဓိမာ စေတောဝသိပ္ပတ္တော အမုံ ဒာရုက္ခန္ဓံ ပထဝီတ္ဝေဝ အဓိမုစ္စေယ္ယ။ တံ ကိသ္သ ဟေတု? အတ္ထိ, အာဝုသော , အမုမ္ဟိ ဒာရုက္ခန္ဓေ ပထဝီဓာတု, ယံ နိသ္သာယ ဘိက္ခု ဣဒ္ဓိမာ စေတောဝသိပ္ပတ္တော အမုံ ဒာရုက္ခန္ဓံ ပထဝီတ္ဝေဝ အဓိမုစ္စေယ္ယ။ အာကင္ခမာနော, အာဝုသော, ဘိက္ခု ဣဒ္ဓိမာ စေတောဝသိပ္ပတ္တော အမုံ ဒာရုက္ခန္ဓံ အာပောတ္ဝေဝ အဓိမုစ္စေယ္ယ ။ပေ.။ တေဇောတ္ဝေဝ အဓိမုစ္စေယ္ယ။ ဝာယောတ္ဝေဝ အဓိမုစ္စေယ္ယ။ သုဘန္တ္ဝေဝ အဓိမုစ္စေယ္ယ။ အသုဘန္တ္ဝေဝ အဓိမုစ္စေယ္ယ။ တံ ကိသ္သ ဟေတု? အတ္ထိ, အာဝုသော, အမုမ္ဟိ ဒာရုက္ခန္ဓေ အသုဘဓာတု, ယံ နိသ္သာယ ဘိက္ခု ဣဒ္ဓိမာ စေတောဝသိပ္ပတ္တော အမုံ ဒာရုက္ခန္ဓံ အသုဘန္တ္ဝေဝ အဓိမုစ္စေယ္ယာ’’တိ။ ဧကာဒသမံ။
‘‘Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ pathavītveva adhimucceyya. Taṃ kissa hetu? Atthi, āvuso , amumhi dārukkhandhe pathavīdhātu, yaṃ nissāya bhikkhu iddhimā cetovasippatto amuṃ dārukkhandhaṃ pathavītveva adhimucceyya. Ākaṅkhamāno, āvuso, bhikkhu iddhimā cetovasippatto amuṃ dārukkhandhaṃ āpotveva adhimucceyya …pe… tejotveva adhimucceyya… vāyotveva adhimucceyya… subhantveva adhimucceyya… asubhantveva adhimucceyya. Taṃ kissa hetu? Atthi, āvuso, amumhi dārukkhandhe asubhadhātu, yaṃ nissāya bhikkhu iddhimā cetovasippatto amuṃ dārukkhandhaṃ asubhantveva adhimucceyyā’’ti. Ekādasamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၁. ဒာရုက္ခန္ဓသုတ္တဝဏ္ဏနာ • 11. Dārukkhandhasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈-၁၁. အတ္တကာရီသုတ္တာဒိဝဏ္ဏနာ • 8-11. Attakārīsuttādivaṇṇanā
