| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༡༠. དསམསངྒྷཱདིསེསསིཀྑཱཔདཾ
10. Dasamasaṅghādisesasikkhāpadaṃ
༧༢༧. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཐུལླནནྡཱ བྷིཀྑུནཱིསངྒྷེན སམནུབྷཊྛཱ བྷིཀྑུནིཡོ ཨེཝཾ ཝདེཏི – ‘‘སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ ཨེཝཱཙཱརཱ ཨེཝཾསདྡཱ ཨེཝཾསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཏཱ སངྒྷོ ན ཀིཉྩི ཨཱཧ། ཏུམྷཉྙེཝ 1 སངྒྷོ ཨུཉྙཱཡ པརིབྷཝེན ཨཀྑནྟིཡཱ ཝེབྷསྶིཡཱ 2 དུབྦལྱཱ ཨེཝམཱཧ – ‘བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’’’ཏི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ཀཐཉྷི ནཱམ ཨཡྻཱ ཐུལླནནྡཱ བྷིཀྑུནཱི སངྒྷེན སམནུབྷཊྛཱ བྷིཀྑུནིཡོ ཨེཝཾ ཝཀྑཏི – སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ…པེ॰… ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱིཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི སངྒྷེན སམནུབྷཊྛཱ བྷིཀྑུནིཡོ ཨེཝཾ ཝདེཏི – སཾསཊྛཱཝ ཨཡྻེ ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ ཨེཝཱཙཱརཱ ཨེཝཾསདྡཱ ཨེཝཾསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཏཱ སངྒྷོ ན ཀིཉྩི ཨཱཧ། ཏུམྷཉྙེཝ སངྒྷོ ཨུཉྙཱཡ པརིབྷཝེན ཨཀྑནྟིཡཱ ཝེབྷསྶིཡཱ དུབྦལྱཱ ཨེཝམཱཧ – བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱིཏི? ‘‘སཙྩཾ བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི སངྒྷེན སམནུབྷཊྛཱ བྷིཀྑུནིཡོ ཨེཝཾ ཝཀྑཏི – སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ…པེ॰… ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱིཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
727. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunīsaṅghena samanubhaṭṭhā bhikkhuniyo evaṃ vadeti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva 3 saṅgho uññāya paribhavena akkhantiyā vebhassiyā 4 dubbalyā evamāha – ‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’’’ti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma ayyā thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti…pe… saccaṃ kira, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vadeti – saṃsaṭṭhāva ayye tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetīti? ‘‘Saccaṃ bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī saṅghena samanubhaṭṭhā bhikkhuniyo evaṃ vakkhati – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetīti! Netaṃ, bhikkhave, appasannānaṃ vā pasādāya…pe… evañca pana bhikkhave, bhikkhuniyo imaṃ sikkhāpadaṃ uddisantu –
༧༢༨. ‘‘ཡཱ པན བྷིཀྑུནཱི ཨེཝཾ ཝདེཡྻ – ‘སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ ཨེཝཱཙཱརཱ ཨེཝཾསདྡཱ ཨེཝཾསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཏཱ སངྒྷོ ན ཀིཉྩི ཨཱཧ། ཏུམྷཉྙེཝ སངྒྷོ ཨུཉྙཱཡ པརིབྷཝེན ཨཀྑནྟིཡཱ ཝེབྷསྶིཡཱ དུབྦལྱཱ ཨེཝམཱཧ – བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’ཏི། སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ – ‘མཱ, ཨཡྻེ, ཨེཝཾ ཨཝཙ – སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ ཨེཝཱཙཱརཱ ཨེཝཾསདྡཱ ཨེཝཾསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཏཱ སངྒྷོ ན ཀིཉྩི ཨཱཧ། ཏུམྷཉྙེཝ སངྒྷོ ཨུཉྙཱཡ པརིབྷཝེན ཨཀྑནྟིཡཱ ཝེབྷསྶིཡཱ དུབྦལྱཱ ཨེཝམཱཧ – བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’ཏི། ཨེཝཉྩ སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ། ཡཱཝཏཏིཡཉྩེ སམནུབྷཱསཱིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ; ནོ ཙེ པཊིནིསྶཛྫེཡྻ, ཨཡམྤི བྷིཀྑུནཱི ཡཱཝཏཏིཡཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེས’’ནྟི།
728.‘‘Yāpana bhikkhunī evaṃ vadeyya – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā bhikkhunī bhikkhunīhi evamassa vacanīyā – ‘mā, ayye, evaṃ avaca – saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsīyamānā taṃ paṭinissajjeyya, iccetaṃ kusalaṃ; no ce paṭinissajjeyya, ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesa’’nti.
༧༢༩. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
729.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཨེཝཾ ཝདེཡྻཱཏི – ‘‘སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ ཨེཝཱཙཱརཱ ཨེཝཾསདྡཱ ཨེཝཾསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཏཱ སངྒྷོ ན ཀིཉྩི ཨཱཧ’’།
Evaṃ vadeyyāti – ‘‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha’’.
ཏུམྷཉྙེཝ སངྒྷོ ཨུཉྙཱཡཱཏི ཨཝཉྙཱཡ།
Tumhaññeva saṅgho uññāyāti avaññāya.
པརིབྷཝེནཱཏི པཱརིབྷབྱཏཱ།
Paribhavenāti pāribhabyatā.
ཨཀྑནྟིཡཱཏི ཀོཔེན།
Akkhantiyāti kopena.
དུབྦལྱཱཏི ཨཔཀྑཏཱ།
Dubbalyāti apakkhatā.
ཨེཝམཱཧ – ‘‘བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཝིཙིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’’ཏི།
Evamāha – ‘‘bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viciccathāyye. Vivekaññeva bhaginīnaṃ saṅgho vaṇṇetī’’ti.
སཱ བྷིཀྑུནཱིཏི ཡཱ སཱ ཨེཝཾཝཱདིནཱི བྷིཀྑུནཱི།
Sā bhikkhunīti yā sā evaṃvādinī bhikkhunī.
བྷིཀྑུནཱིཧཱིཏི ཨཉྙཱཧི བྷིཀྑུནཱིཧི།
Bhikkhunīhīti aññāhi bhikkhunīhi.
ཡཱ པསྶནྟི ཡཱ སུཎནྟི ཏཱཧི ཝཏྟབྦཱ – ‘‘མཱཡྻེ, ཨེཝཾ ཨཝཙ – ‘སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ…པེ॰… ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’’ཏི། དུཏིཡམྤི ཝཏྟབྦཱ། ཏཏིཡམྤི ཝཏྟབྦཱ། སཙེ པཊིནིསྶཛྫཏི, ཨིཙྩེཏཾ ཀུསལཾ; ནོ ཙེ པཊིནིསྶཛྫཏི, ཨཱཔཏྟི དུཀྐཊསྶ། སུཏྭཱ ན ཝདནྟི, ཨཱཔཏྟི དུཀྐཊསྶ། སཱ བྷིཀྑུནཱི སངྒྷམཛ྄ཛྷམྤི ཨཱཀཌྜྷིཏྭཱ ཝཏྟབྦཱ – ‘‘མཱཡྻེ, ཨེཝཾ ཨཝཙ – ‘སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ…པེ॰… ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’’’ཏི། དུཏིཡམྤི ཝཏྟབྦཱ། ཏཏིཡམྤི ཝཏྟབྦཱ། སཙེ པཊིནིསྶཛྫཏི, ཨིཙྩེཏཾ ཀུསལཾ; ནོ ཙེ པཊིནིསྶཛྫཏི, ཨཱཔཏྟི དུཀྐཊསྶ། སཱ བྷིཀྑུནཱི སམནུབྷཱསིཏབྦཱ། ཨེཝཉྩ པན, བྷིཀྑཝེ, སམནུབྷཱསིཏབྦཱ། བྱཏྟཱཡ བྷིཀྑུནིཡཱ པཊིབལཱཡ སངྒྷོ ཉཱཔེཏབྦོ –
Yā passanti yā suṇanti tāhi vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘māyye, evaṃ avaca – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo…pe… viviccathāyye. Vivekaññeva bhaginīnaṃ saṅgho vaṇṇetī’’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
༧༣༠. ‘‘སུཎཱཏུ མེ, ཨཡྻེ, སངྒྷོ། ཨཡཾ ཨིཏྠནྣཱམཱ བྷིཀྑུནཱི སངྒྷེན སམནུབྷཊྛཱ བྷིཀྑུནིཡོ ཨེཝཾ ཝདེཏི – ‘སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ ཨེཝཱཙཱརཱ ཨེཝཾསདྡཱ ཨེཝཾསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཏཱ སངྒྷོ ན ཀིཉྩི ཨཱཧ། ཏུམྷཉྙེཝ སངྒྷོ ཨུཉྙཱཡ པརིབྷཝེན ཨཀྑནྟིཡཱ ཝེབྷསྶིཡཱ དུབྦལྱཱ ཨེཝམཱཧ – བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ, བྷིཀྑུནིསངྒྷསྶ ཝིཧེསིཀཱ ཨཉྙམཉྙིསྶཱ ཝཛྫཔྤཊིཙྪཱདིཀཱ ། ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’ཏི། སཱ ཏཾ ཝཏྠུཾ ན པཊིནིསྶཛྫཏི། ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུནིཾ སམནུབྷཱསེཡྻ ཏསྶ ཝཏྠུསྶ པཊིནིསྶགྒཱཡ། ཨེསཱ ཉཏྟི།
730. ‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā aññamaññissā vajjappaṭicchādikā . Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘སུཎཱཏུ མེ, ཨཡྻེ, སངྒྷོ། ཨཡཾ ཨིཏྠནྣཱམཱ བྷིཀྑུནཱི སངྒྷེན སམནུབྷཊྛཱ བྷིཀྑུནིཡོ ཨེཝཾ ཝདེཏི – ‘སཾསཊྛཱཝ ཨཡྻེ, ཏུམྷེ ཝིཧརཐ། མཱ ཏུམྷེ ནཱནཱ ཝིཧརིཏྠ། སནྟི སངྒྷེ ཨཉྙཱཔི བྷིཀྑུནིཡོ ཨེཝཱཙཱརཱ ཨེཝཾསདྡཱ ཨེཝཾསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཏཱ སངྒྷོ ན ཀིཉྩི ཨཱཧ། ཏུམྷཉྙེཝ སངྒྷོ ཨུཉྙཱཡ པརིབྷཝེན ཨཀྑནྟིཡཱ ཝེབྷསྶིཡཱ དུབྦལྱཱ ཨེཝམཱཧ – བྷགིནིཡོ ཁོ སཾསཊྛཱ ཝིཧརནྟི པཱཔཱཙཱརཱ པཱཔསདྡཱ པཱཔསིལོཀཱ, བྷིཀྑུནིསངྒྷསྶ ཝིཧེསིཀཱ, ཨཉྙམཉྙིསྶཱ ཝཛྫཔྤཊིཙྪཱདིཀཱ། ཝིཝིཙྩཐཱཡྻེ། ཝིཝེཀཉྙེཝ བྷགིནཱིནཾ སངྒྷོ ཝཎྞེཏཱི’ཏི། སཱ ཏཾ ཝཏྠུཾ ན པཊིནིསྶཛྫཏི། སངྒྷོ ཨིཏྠནྣཱམཾ བྷིཀྑུནིཾ སམནུབྷཱསཏི ཏསྶ ཝཏྠུསྶ པཊིནིསྶགྒཱཡ། ཡསྶཱ ཨཡྻཱཡ ཁམཏི ཨིཏྠནྣཱམཱཡ བྷིཀྑུནིཡཱ སམནུབྷཱསནཱ ཏསྶ ཝཏྠུསྶ པཊིནིསྶགྒཱཡ, སཱ ཏུཎྷསྶ; ཡསྶཱ ནཀྑམཏི, སཱ བྷཱསེཡྻ།
‘‘Suṇātu me, ayye, saṅgho. Ayaṃ itthannāmā bhikkhunī saṅghena samanubhaṭṭhā bhikkhuniyo evaṃ vadeti – ‘saṃsaṭṭhāva ayye, tumhe viharatha. Mā tumhe nānā viharittha. Santi saṅghe aññāpi bhikkhuniyo evācārā evaṃsaddā evaṃsilokā, bhikkhunisaṅghassa vihesikā, aññamaññissā vajjappaṭicchādikā. Tā saṅgho na kiñci āha. Tumhaññeva saṅgho uññāya paribhavena akkhantiyā vebhassiyā dubbalyā evamāha – bhaginiyo kho saṃsaṭṭhā viharanti pāpācārā pāpasaddā pāpasilokā, bhikkhunisaṅghassa vihesikā, aññamaññissā vajjappaṭicchādikā. Viviccathāyye. Vivekaññeva bhaginīnaṃ saṅgho vaṇṇetī’ti. Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘དུཏིཡམྤི ཨེཏམཏྠཾ ཝདཱམི…པེ॰… ཏཏིཡམྤི ཨེཏམཏྠཾ ཝདཱམི…པེ॰…།
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘སམནུབྷཊྛཱ སངྒྷེན ཨིཏྠནྣཱམཱ བྷིཀྑུནཱི ཏསྶ ཝཏྠུསྶ པཊིནིསྶགྒཱཡ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡཱ, ཀམྨཝཱཙཱཔརིཡོསཱནེ ཨཱཔཏྟི སངྒྷཱདིསེསསྶ། སངྒྷཱདིསེསཾ ཨཛ྄ཛྷཱཔཛྫནྟིཡཱ ཉཏྟིཡཱ དུཀྐཊཾ, དྭཱིཧི ཀམྨཝཱཙཱཧི ཐུལླཙྩཡཱ པཊིཔྤསྶམྦྷནྟི།
Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantiyā ñattiyā dukkaṭaṃ, dvīhi kammavācāhi thullaccayā paṭippassambhanti.
ཨཡམྤཱིཏི པུརིམཱཡོ ཨུཔཱདཱཡ ཝུཙྩཏི།
Ayampīti purimāyo upādāya vuccati.
ཡཱཝཏཏིཡཀནྟི ཡཱཝཏཏིཡཾ སམནུབྷཱསནཱཡ ཨཱཔཛྫཏི, ན སཧཝཏྠུཛ྄ཛྷཱཙཱརཱ།
Yāvatatiyakanti yāvatatiyaṃ samanubhāsanāya āpajjati, na sahavatthujjhācārā.
ནིསྶཱརཎཱིཡནྟི སངྒྷམྷཱ ནིསྶཱརཱིཡཏི།
Nissāraṇīyanti saṅghamhā nissārīyati.
སངྒྷཱདིསེསོཏི སངྒྷོཝ ཏསྶཱ ཨཱཔཏྟིཡཱ མཱནཏྟཾ དེཏི, མཱུལཱཡ པཊིཀསྶཏི, ཨབྦྷེཏི, ན སམྦཧུལཱ ན ཨེཀཱ བྷིཀྑུནཱི། ཏེན ཝུཙྩཏི ‘‘སངྒྷཱདིསེསོ’’ཏི། ཏསྶེཝ ཨཱཔཏྟིནིཀཱཡསྶ ནཱམཀམྨཾ ཨདྷིཝཙནཾ, ཏེནཔི ཝུཙྩཏི ‘‘སངྒྷཱདིསེསོ’’ཏི།
Saṅghādisesoti saṅghova tassā āpattiyā mānattaṃ deti, mūlāya paṭikassati, abbheti, na sambahulā na ekā bhikkhunī. Tena vuccati ‘‘saṅghādiseso’’ti. Tasseva āpattinikāyassa nāmakammaṃ adhivacanaṃ, tenapi vuccati ‘‘saṅghādiseso’’ti.
༧༣༡. དྷམྨཀམྨེ དྷམྨཀམྨསཉྙཱ ན པཊིནིསྶཛྫཏི, ཨཱཔཏྟི སངྒྷཱདིསེསསྶ ། དྷམྨཀམྨེ ཝེམཏིཀཱ ན པཊིནིསྶཛྫཏི, ཨཱཔཏྟི སངྒྷཱདིསེསསྶ། དྷམྨཀམྨེ ཨདྷམྨཀམྨསཉྙཱ ན པཊིནིསྶཛྫཏི, ཨཱཔཏྟི སངྒྷཱདིསེསསྶ།
731. Dhammakamme dhammakammasaññā na paṭinissajjati, āpatti saṅghādisesassa . Dhammakamme vematikā na paṭinissajjati, āpatti saṅghādisesassa. Dhammakamme adhammakammasaññā na paṭinissajjati, āpatti saṅghādisesassa.
ཨདྷམྨཀམྨེ དྷམྨཀམྨསཉྙཱ, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀཱ, ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱ, ཨཱཔཏྟི དུཀྐཊསྶ།
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
༧༣༢. ཨནཱཔཏྟི ཨསམནུབྷཱསནྟིཡཱ, པཊིནིསྶཛྫནྟིཡཱ, ཨུམྨཏྟིཀཱཡ, ཨཱདིཀམྨིཀཱཡཱཏི།
732. Anāpatti asamanubhāsantiyā, paṭinissajjantiyā, ummattikāya, ādikammikāyāti.
དསམསངྒྷཱདིསེསསིཀྑཱཔདཾ ནིཊྛིཏཾ།
Dasamasaṅghādisesasikkhāpadaṃ niṭṭhitaṃ.
ཨུདྡིཊྛཱ ཁོ, ཨཡྻཱཡོ, སཏྟརས སངྒྷཱདིསེསཱ དྷམྨཱ – ནཝ པཋམཱཔཏྟིཀཱ, ཨཊྛ ཡཱཝཏཏིཡཀཱ། ཡེསཾ བྷིཀྑུནཱི ཨཉྙཏརཾ ཝཱ ཨཉྙཏརཾ ཝཱ ཨཱཔཛྫཏི, ཏཱཡ བྷིཀྑུནིཡཱ ཨུབྷཏོསངྒྷེ པཀྑམཱནཏྟཾ ཙརིཏབྦཾ། ཙིཎྞམཱནཏྟཱ བྷིཀྑུནཱི ཡཏྠ སིཡཱ ཝཱིསཏིགཎོ བྷིཀྑུནིསངྒྷོ ཏཏྠ (སཱ བྷིཀྑུནཱི) 7 ཨབྦྷེཏབྦཱ། ཨེཀཱཡཔི ཙེ ཨཱུནོ ཝཱིསཏིགཎོ བྷིཀྑུནིསངྒྷོ ཏཾ བྷིཀྑུནིཾ ཨབྦྷེཡྻ། སཱ ཙ བྷིཀྑུནཱི ཨནབྦྷིཏཱ, ཏཱ ཙ བྷིཀྑུནིཡོ གཱརཡ྄ཧཱ, ཨཡཾ ཏཏྠ སཱམཱིཙི།
Uddiṭṭhā kho, ayyāyo, sattarasa saṅghādisesā dhammā – nava paṭhamāpattikā, aṭṭha yāvatatiyakā. Yesaṃ bhikkhunī aññataraṃ vā aññataraṃ vā āpajjati, tāya bhikkhuniyā ubhatosaṅghe pakkhamānattaṃ caritabbaṃ. Ciṇṇamānattā bhikkhunī yattha siyā vīsatigaṇo bhikkhunisaṅgho tattha (sā bhikkhunī) 8 abbhetabbā. Ekāyapi ce ūno vīsatigaṇo bhikkhunisaṅgho taṃ bhikkhuniṃ abbheyya. Sā ca bhikkhunī anabbhitā, tā ca bhikkhuniyo gārayhā, ayaṃ tattha sāmīci.
ཏཏྠཱཡྻཱཡོ པུཙྪཱམི – ‘‘ཀཙྩིཏྠ པརིསུདྡྷཱ’’? དུཏིཡམྤི པུཙྪཱམི – ‘‘ཀཙྩིཏྠ པརིསུདྡྷཱ’’? ཏཏིཡམྤི པུཙྪཱམི – ‘‘ཀཙྩིཏྠ པརིསུདྡྷཱ’’? པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི།
Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
སཏྟརསཀཾ ནིཊྛིཏཾ།
Sattarasakaṃ niṭṭhitaṃ.
བྷིཀྑུནིཝིབྷངྒེ སངྒྷཱདིསེསཀཎྜཾ ནིཊྛིཏཾ།
Bhikkhunivibhaṅge saṅghādisesakaṇḍaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༡༠. དསམསངྒྷཱདིསེསསིཀྑཱཔདཝཎྞནཱ • 10. Dasamasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༩. ནཝམསངྒྷཱདིསེསསིཀྑཱཔདཝཎྞནཱ • 9. Navamasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༦. ཚཊྛསངྒྷཱདིསེསསིཀྑཱཔདཝཎྞནཱ • 6. Chaṭṭhasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༠. དསམསངྒྷཱདིསེསསིཀྑཱཔདཾ • 10. Dasamasaṅghādisesasikkhāpadaṃ
