| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā |
10. த³ஸமஸங்கா⁴தி³ஸேஸஸிக்கா²பத³வண்ணனா
10. Dasamasaṅghādisesasikkhāpadavaṇṇanā
727. த³ஸமே – ஏவாசாராதி ஏவங்ஆசாரா. யாதி³ஸோ தும்ஹாகங் ஆசாரோ, தாதி³ஸா ஆசாராதி அத்தோ². ஏஸ நயோ ஸப்³ப³த்த². உஞ்ஞாயாதி அவஞ்ஞாய நீசங் கத்வா ஜானநாய. பரிப⁴வேனாதி கிங் இமா கரிஸ்ஸந்தீதி ஏவங் பரிப⁴வித்வா ஜானநேன. அக்க²ந்தியாதி அஸஹனதாய; கோதே⁴னாதி அத்தோ². வேப⁴ஸ்ஸியாதி ப³லவப⁴ஸ்ஸபா⁴வேன; அத்தனோ ப³லப்பகாஸனேன ஸமுத்ராஸனேனாதி அத்தோ². து³ப்³ப³ல்யாதி தும்ஹாகங் து³ப்³ப³லபா⁴வேன. ஸப்³ப³த்த² உஞ்ஞாய ச பரிப⁴வேன சாதி ஏவங் ஸமுச்சயத்தோ² த³ட்ட²ப்³போ³. விவிச்சதா²தி வினா ஹோத². ஸேஸங் உத்தானமேவ ஸத்³தி⁴ங் ஸமுட்டா²னாதீ³ஹீதி.
727. Dasame – evācārāti evaṃācārā. Yādiso tumhākaṃ ācāro, tādisā ācārāti attho. Esa nayo sabbattha. Uññāyāti avaññāya nīcaṃ katvā jānanāya. Paribhavenāti kiṃ imā karissantīti evaṃ paribhavitvā jānanena. Akkhantiyāti asahanatāya; kodhenāti attho. Vebhassiyāti balavabhassabhāvena; attano balappakāsanena samutrāsanenāti attho. Dubbalyāti tumhākaṃ dubbalabhāvena. Sabbattha uññāya ca paribhavena cāti evaṃ samuccayattho daṭṭhabbo. Viviccathāti vinā hotha. Sesaṃ uttānameva saddhiṃ samuṭṭhānādīhīti.
த³ஸமஸிக்கா²பத³ங்.
Dasamasikkhāpadaṃ.
உத்³தி³ட்டா² கோ² அய்யாயோ ஸத்தரஸ ஸங்கா⁴தி³ஸேஸாதி எத்த² ச²ன்னங் பட²மாபத்திகானங் அனந்தரா ஸஞ்சரித்தங், த்³வே து³ட்ட²தோ³ஸாதி இமானி தீணி ஸிக்கா²பதா³னி மஹாவிப⁴ங்க³தோ பக்கி²பித்வா நவ பட²மாபத்திகா, சதுன்னங் யாவததியகானங் அனந்தரா மஹாவிப⁴ங்க³தோபி சத்தாரோ யாவததியகே பக்கி²பித்வா அட்ட² யாவததியகா வேதி³தப்³பா³. ஏவங் ஸப்³பே³பி பாதிமொக்கு²த்³தே³ஸமக்³கே³ன உத்³தி³ட்டா² கோ² அய்யாயோ ஸத்தரஸ ஸங்கா⁴தி³ஸேஸா த⁴ம்மாதி ஏவமெத்த² அத்தோ² த³ட்ட²ப்³போ³. ஸேஸங் உத்தானமேவ அஞ்ஞத்ர பக்க²மானத்தா. தங் பன க²ந்த⁴கே வித்தா²ரேன வண்ணயிஸ்ஸாமாதி.
Uddiṭṭhā kho ayyāyo sattarasa saṅghādisesāti ettha channaṃ paṭhamāpattikānaṃ anantarā sañcarittaṃ, dve duṭṭhadosāti imāni tīṇi sikkhāpadāni mahāvibhaṅgato pakkhipitvā nava paṭhamāpattikā, catunnaṃ yāvatatiyakānaṃ anantarā mahāvibhaṅgatopi cattāro yāvatatiyake pakkhipitvā aṭṭha yāvatatiyakā veditabbā. Evaṃ sabbepi pātimokkhuddesamaggena uddiṭṭhā kho ayyāyo sattarasa saṅghādisesā dhammāti evamettha attho daṭṭhabbo. Sesaṃ uttānameva aññatra pakkhamānattā. Taṃ pana khandhake vitthārena vaṇṇayissāmāti.
ஸமந்தபாஸாதி³காய வினயஸங்வண்ணனாய பி⁴க்கு²னீவிப⁴ங்கே³
Samantapāsādikāya vinayasaṃvaṇṇanāya bhikkhunīvibhaṅge
ஸத்தரஸகவண்ணனா நிட்டி²தா.
Sattarasakavaṇṇanā niṭṭhitā.
ஸங்கா⁴தி³ஸேஸகண்ட³ங் நிட்டி²தங்.
Saṅghādisesakaṇḍaṃ niṭṭhitaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 10. த³ஸமஸங்கா⁴தி³ஸேஸஸிக்கா²பத³ங் • 10. Dasamasaṅghādisesasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 9. நவமஸங்கா⁴தி³ஸேஸஸிக்கா²பத³வண்ணனா • 9. Navamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. ச²ட்ட²ஸங்கா⁴தி³ஸேஸஸிக்கா²பத³வண்ணனா • 6. Chaṭṭhasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 10. த³ஸமஸங்கா⁴தி³ஸேஸஸிக்கா²பத³ங் • 10. Dasamasaṅghādisesasikkhāpadaṃ
