| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༡༠. དསམསིཀྑཱཔདཾ
10. Dasamasikkhāpadaṃ
༡༠༦༢. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཉྙཏརཱ བྷིཀྑུནཱི པསཱཁེ ཛཱཏཾ གཎྜཾ པུརིསེན སདྡྷིཾ ཨེཀེནེཀཱ བྷེདཱཔེསི། ཨཐ ཁོ སོ པུརིསོ ཏཾ བྷིཀྑུནིཾ དཱུསེཏུཾ ཨུཔཀྐམི། སཱ ཝིསྶརམཀཱསི། བྷིཀྑུནིཡོ ཨུཔདྷཱཝིཏྭཱ ཏཾ བྷིཀྑུནིཾ ཨེཏདཝོཙུཾ – ‘‘ཀིསྶ ཏྭཾ, ཨཡྻེ, ཝིསྶརམཀཱསཱི’’ཏི? ཨཐ ཁོ སཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནཱི པསཱཁེ ཛཱཏཾ གཎྜཾ པུརིསེན སདྡྷིཾ ཨེཀེནེཀཱ བྷེདཱཔེསྶཏཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནཱི པསཱཁེ ཛཱཏཾ གཎྜཾ པུརིསེན སདྡྷིཾ ཨེཀེནེཀཱ བྷེདཱཔེཏཱིཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནཱི པསཱཁེ ཛཱཏཾ གཎྜཾ པུརིསེན སདྡྷིཾ ཨེཀེནེཀཱ བྷེདཱཔེསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
1062. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā bhikkhunī pasākhe jātaṃ gaṇḍaṃ purisena saddhiṃ ekenekā bhedāpesi. Atha kho so puriso taṃ bhikkhuniṃ dūsetuṃ upakkami. Sā vissaramakāsi. Bhikkhuniyo upadhāvitvā taṃ bhikkhuniṃ etadavocuṃ – ‘‘kissa tvaṃ, ayye, vissaramakāsī’’ti? Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī pasākhe jātaṃ gaṇḍaṃ purisena saddhiṃ ekenekā bhedāpessatī’’ti…pe… saccaṃ kira, bhikkhave, bhikkhunī pasākhe jātaṃ gaṇḍaṃ purisena saddhiṃ ekenekā bhedāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī pasākhe jātaṃ gaṇḍaṃ purisena saddhiṃ ekenekā bhedāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༡༠༦༣. ‘‘ཡཱ པན བྷིཀྑུནཱི པསཱཁེ ཛཱཏཾ གཎྜཾ ཝཱ རུདྷིཏཾ ཝཱ ཨནཔལོཀེཏྭཱ སངྒྷཾ ཝཱ གཎཾ ཝཱ པུརིསེན སདྡྷིཾ ཨེཀེནེཀཱ བྷེདཱཔེཡྻ ཝཱ ཕཱལཱཔེཡྻ ཝཱ དྷོཝཱཔེཡྻ ཝཱ ཨཱལིམྤཱཔེཡྻ ཝཱ བནྡྷཱཔེཡྻ ཝཱ མོཙཱཔེཡྻ ཝཱ, པཱཙིཏྟིཡ’’ནྟི།
1063.‘‘Yā pana bhikkhunī pasākhe jātaṃ gaṇḍaṃ vā rudhitaṃ vā anapaloketvā saṅghaṃ vā gaṇaṃ vā purisena saddhiṃ ekenekā bhedāpeyya vā phālāpeyya vā dhovāpeyya vā ālimpāpeyya vā bandhāpeyya vā mocāpeyya vā, pācittiya’’nti.
༡༠༦༤. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
1064.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
པསཱཁཾ ནཱམ ཨདྷོནཱབྷི ཨུབྦྷཛཱཎུམཎྜལཾ། ཛཱཏནྟི ཏཏྠ ཛཱཏཾ། གཎྜོ ནཱམ ཡོ ཀོཙི གཎྜོ། རུདྷིཏཾ ནཱམ ཡཾ ཀིཉྩི ཝཎཾ། ཨནཔལོཀེཏྭཱཏི ཨནཱཔུཙྪཱ། སངྒྷོ ནཱམ བྷིཀྑུནིསངྒྷོ ཝུཙྩཏི། གཎོ ནཱམ སམྦཧུལཱ བྷིཀྑུནིཡོ ཝུཙྩནྟི། པུརིསོ ནཱམ མནུསྶཔུརིསོ, ན ཡཀྑོ, ན པེཏོ, ན ཏིརཙྪཱནགཏོ, ཝིཉྙཱུ པཊིབལོ དཱུསེཏུཾ། སདྡྷིནྟི ཨེཀཏོ། ཨེཀེནེཀཱཏི པུརིསོ ཙེཝ ཧོཏི བྷིཀྑུནཱི ཙ།
Pasākhaṃ nāma adhonābhi ubbhajāṇumaṇḍalaṃ. Jātanti tattha jātaṃ. Gaṇḍo nāma yo koci gaṇḍo. Rudhitaṃ nāma yaṃ kiñci vaṇaṃ. Anapaloketvāti anāpucchā. Saṅgho nāma bhikkhunisaṅgho vuccati. Gaṇo nāma sambahulā bhikkhuniyo vuccanti. Puriso nāma manussapuriso, na yakkho, na peto, na tiracchānagato, viññū paṭibalo dūsetuṃ. Saddhinti ekato. Ekenekāti puriso ceva hoti bhikkhunī ca.
༡༠༦༥. ‘‘བྷིནྡཱ’’ཏི ཨཱཎཱཔེཏི, ཨཱཔཏྟི དུཀྐཊསྶ། བྷིནྣེ ཨཱཔཏྟི པཱཙིཏྟིཡསྶ། ‘‘ཕཱལེཧཱི’’ཏི ཨཱཎཱཔེཏི, ཨཱཔཏྟི དུཀྐཊསྶ། ཕཱལིཏེ ཨཱཔཏྟི པཱཙིཏྟིཡསྶ། ‘‘དྷོཝཱ’’ཏི ཨཱཎཱཔེཏི , ཨཱཔཏྟི དུཀྐཊསྶ། དྷོཝིཏེ 3 ཨཱཔཏྟི པཱཙིཏྟིཡསྶ། ‘‘ཨཱལིམྤཱ’’ཏི ཨཱཎཱཔེཏི, ཨཱཔཏྟི དུཀྐཊསྶ། ལིཏྟེ 4 ཨཱཔཏྟི པཱཙིཏྟིཡསྶ། ‘‘བནྡྷཱཧཱི’’ཏི ཨཱཎཱཔེཏི, ཨཱཔཏྟི དུཀྐཊསྶ། བདྡྷེ ཨཱཔཏྟི པཱཙིཏྟིཡསྶ། ‘‘མོཙེཧཱི’’ཏི ཨཱཎཱཔེཏི, ཨཱཔཏྟི དུཀྐཊསྶ། མུཏྟེ ཨཱཔཏྟི པཱཙིཏྟིཡསྶ།
1065. ‘‘Bhindā’’ti āṇāpeti, āpatti dukkaṭassa. Bhinne āpatti pācittiyassa. ‘‘Phālehī’’ti āṇāpeti, āpatti dukkaṭassa. Phālite āpatti pācittiyassa. ‘‘Dhovā’’ti āṇāpeti , āpatti dukkaṭassa. Dhovite 5 āpatti pācittiyassa. ‘‘Ālimpā’’ti āṇāpeti, āpatti dukkaṭassa. Litte 6 āpatti pācittiyassa. ‘‘Bandhāhī’’ti āṇāpeti, āpatti dukkaṭassa. Baddhe āpatti pācittiyassa. ‘‘Mocehī’’ti āṇāpeti, āpatti dukkaṭassa. Mutte āpatti pācittiyassa.
༡༠༦༦. ཨནཱཔཏྟི ཨཔལོཀེཏྭཱ བྷེདཱཔེཏི ཝཱ ཕཱལཱཔེཏི ཝཱ དྷོཝཱཔེཏི ཝཱ ཨཱལིམྤཱཔེཏི ཝཱ བནྡྷཱཔེཏི ཝཱ མོཙཱཔེཏི ཝཱ, ཡཱ ཀཱཙི ཝིཉྙཱུ དུཏིཡིཀཱ 7 ཧོཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
1066. Anāpatti apaloketvā bhedāpeti vā phālāpeti vā dhovāpeti vā ālimpāpeti vā bandhāpeti vā mocāpeti vā, yā kāci viññū dutiyikā 8 hoti, ummattikāya, ādikammikāyāti.
དསམསིཀྑཱཔདཾ ནིཊྛིཏཾ།
Dasamasikkhāpadaṃ niṭṭhitaṃ.
ཨཱརཱམཝགྒོ ཚཊྛོ།
Ārāmavaggo chaṭṭho.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༡༠. དསམསིཀྑཱཔདཝཎྞནཱ • 10. Dasamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༠. དསམསིཀྑཱཔདཾ • 10. Dasamasikkhāpadaṃ
