| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
10. த³ஸமஸிக்கா²பத³வண்ணனா
10. Dasamasikkhāpadavaṇṇanā
833. ஸாது⁴கீளிதகீ³தங் வாதி எத்த² பாசிண்ணகீ³தம்பி ஸோதுங் ந வட்டதி. ‘‘கீ³துபஸஞ்ஹிதங் பன த⁴ம்மங் ஸோதுங் வட்டதீதி தீ³க⁴னிகாயட்ட²கதா²யங் வுத்த’’ந்தி வுத்தங். போராணக³ண்டி²பதே³ பன ‘‘த⁴ம்மகீ³தம்பி ந வட்டதீ’’தி வத்வா ‘‘பு³த்³த⁴ஸ்ஸ கா³யாம வாதே³மாதி வுத்தே ஸம்படிச்சி²துங் ந வட்டதி, து³க்கடங் ஹோதீ’’தி வுத்தங், ‘‘பூஜங் கரோம, ஜாதகங் வா வத்து²ங் வா தே³ஸேமாதி வுத்தே ‘ஸாதூ⁴’தி ஸம்படிச்சி²துங் வட்டதீ’’தி ச வுத்தங்.
833.Sādhukīḷitagītaṃ vāti ettha pāciṇṇagītampi sotuṃ na vaṭṭati. ‘‘Gītupasañhitaṃ pana dhammaṃ sotuṃ vaṭṭatīti dīghanikāyaṭṭhakathāyaṃ vutta’’nti vuttaṃ. Porāṇagaṇṭhipade pana ‘‘dhammagītampi na vaṭṭatī’’ti vatvā ‘‘buddhassa gāyāma vādemāti vutte sampaṭicchituṃ na vaṭṭati, dukkaṭaṃ hotī’’ti vuttaṃ, ‘‘pūjaṃ karoma, jātakaṃ vā vatthuṃ vā desemāti vutte ‘sādhū’ti sampaṭicchituṃ vaṭṭatī’’ti ca vuttaṃ.
836. ஏகபயோகோ³ நாம ஏகதி³வஸாவலோகனங். தேஸங்யேவாதி யேஸங் நச்சங் பஸ்ஸதி. ‘‘பி⁴க்கு²னீ ஸயம்பி நச்சிதுங் வா கா³யிதுங் வா வாதி³துங் வா ந லப⁴தீ’’திஆதி³ இத⁴ ஸிக்கா²பதே³ நத்தி². கஸ்மா? ஏளகலோமஸமுட்டா²னத்தா. யதி³ ஏவங் கஸ்மா வுத்தந்தி சே? ஸுத்தானுலோமமஹாபதே³ஸதோ. யதி³ நச்சாதீ³னி பஸ்ஸிதுங் வா ஸோதுங் வா ந லப⁴தி, பகே³வ அத்தனா காதுந்தி நயதோ லப்³ப⁴மானத்தா வுத்தங். இதரதா² மஹாபதே³ஸா நிரத்த²கா ஸியுங். ஏவமஞ்ஞத்தா²பி நயோ நேதப்³போ³. ‘‘ஸமுட்டா²னம்பி இத⁴ வுத்தமேவ அக்³க³ஹெத்வா ச²ஸமுட்டா²னவஸேன க³ஹேதப்³ப³’’ந்தி லிகி²தங். தங் ‘‘அஞ்ஞே நச்ச, கா³ய, வாதே³ஹீ’’தி வத்துங் ந லப்³ப⁴தீதிஆதி³வசீகம்மங் ஸந்தா⁴ய லிகி²தஞ்சே, தங் ஸுலிகி²தங் ஏளகலோமஸமுட்டா²னே வாசாய அபா⁴வதோ. ‘‘ஸயம்பி நச்சிது’’ந்திஆதி³காயகம்மஞ்சே ஸந்தா⁴ய லிகி²தங், து³ல்லிகி²தங். ஏளகலோமஸமுட்டா²னஞ்ஹி ஏகந்ததோ காயகம்மங் ஹோதி, தஸ்மா உத்³த⁴டங் அக்³க³ஹெத்வா ஆதி³ஸத்³தே³ன ஸங்க³ஹிதமேவ இத⁴ க³ஹேதப்³ப³ந்தி. ஏதங் ஏளகலோமஸமுட்டா²னத்தாதி எத்த² காரணவசனே ஸுத்தானுலோமமஹாபதே³ஸதோதி எத்த² பன உத்³த⁴டங் க³ஹேதப்³ப³ங், ஏவங் யதா²லாப⁴வஸேன தங் லிகி²தந்தி வேதி³தப்³ப³ங். ‘‘ஆஹச்சபா⁴ஸிதஸிக்கா²பத³வஸேன ஏளகலோமஸமுட்டா²ன’’ந்தி வுத்தந்தி உபதிஸ்ஸத்தே²ரோ . ‘‘ஏளகலோமஸமுட்டா²னஞ்சே இத³ங் ஸிக்கா²பத³ங், ஆணாபகோ முச்செய்ய, ந ச முச்சதீ’’தி வுத்தங். தங் ‘‘கஸ்மா’’தி வுத்தே ‘‘ஸப்³ப³அட்ட²கதா²ஸு வுத்த’’ந்தி அட்ட²கதா²சரியோ ஆஹாதி த⁴ம்மஸிரித்தே²ரோ.
836.Ekapayogo nāma ekadivasāvalokanaṃ. Tesaṃyevāti yesaṃ naccaṃ passati. ‘‘Bhikkhunī sayampi naccituṃ vā gāyituṃ vā vādituṃ vā na labhatī’’tiādi idha sikkhāpade natthi. Kasmā? Eḷakalomasamuṭṭhānattā. Yadi evaṃ kasmā vuttanti ce? Suttānulomamahāpadesato. Yadi naccādīni passituṃ vā sotuṃ vā na labhati, pageva attanā kātunti nayato labbhamānattā vuttaṃ. Itarathā mahāpadesā niratthakā siyuṃ. Evamaññatthāpi nayo netabbo. ‘‘Samuṭṭhānampi idha vuttameva aggahetvā chasamuṭṭhānavasena gahetabba’’nti likhitaṃ. Taṃ ‘‘aññe nacca, gāya, vādehī’’ti vattuṃ na labbhatītiādivacīkammaṃ sandhāya likhitañce, taṃ sulikhitaṃ eḷakalomasamuṭṭhāne vācāya abhāvato. ‘‘Sayampi naccitu’’ntiādikāyakammañce sandhāya likhitaṃ, dullikhitaṃ. Eḷakalomasamuṭṭhānañhi ekantato kāyakammaṃ hoti, tasmā uddhaṭaṃ aggahetvā ādisaddena saṅgahitameva idha gahetabbanti. Etaṃ eḷakalomasamuṭṭhānattāti ettha kāraṇavacane suttānulomamahāpadesatoti ettha pana uddhaṭaṃ gahetabbaṃ, evaṃ yathālābhavasena taṃ likhitanti veditabbaṃ. ‘‘Āhaccabhāsitasikkhāpadavasena eḷakalomasamuṭṭhāna’’nti vuttanti upatissatthero. ‘‘Eḷakalomasamuṭṭhānañce idaṃ sikkhāpadaṃ, āṇāpako mucceyya, na ca muccatī’’ti vuttaṃ. Taṃ ‘‘kasmā’’ti vutte ‘‘sabbaaṭṭhakathāsu vutta’’nti aṭṭhakathācariyo āhāti dhammasiritthero.
837. ஆராமே ட²த்வாதி ந கேவலங் ட²த்வா, ததோ க³ந்த்வா பன ஸப்³பி³ரியாபதே²ஹிபி லப⁴தி. ‘‘ஆராமே டி²தாதி பன ஆராமபரியாபன்னாதி அத்தோ², இதரதா² நிஸின்னாபி ந லபெ⁴ய்யா’’தி லிகி²தங், தங் ஸுலிகி²தமேவ.
837.Ārāme ṭhatvāti na kevalaṃ ṭhatvā, tato gantvā pana sabbiriyāpathehipi labhati. ‘‘Ārāme ṭhitāti pana ārāmapariyāpannāti attho, itarathā nisinnāpi na labheyyā’’ti likhitaṃ, taṃ sulikhitameva.
த³ஸமஸிக்கா²பத³வண்ணனா நிட்டி²தா.
Dasamasikkhāpadavaṇṇanā niṭṭhitā.
லஸுணவக்³க³வண்ணனா நிட்டி²தா.
Lasuṇavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 10. த³ஸமஸிக்கா²பத³ங் • 10. Dasamasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 10. த³ஸமஸிக்கா²பத³வண்ணனா • 10. Dasamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. லஸுணவக்³க³வண்ணனா • 1. Lasuṇavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மலஸுணாதி³ஸிக்கா²பத³வண்ணனா • 1. Paṭhamalasuṇādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 10. த³ஸமஸிக்கா²பத³ங் • 10. Dasamasikkhāpadaṃ
