| Library / Tipiṭaka / તિપિટક • Tipiṭaka / પાચિત્યાદિયોજનાપાળિ • Pācityādiyojanāpāḷi |
(૨) દેસનાગામિનિયાદિવણ્ણના
(2) Desanāgāminiyādivaṇṇanā
૪૭૫. એકેત્થાતિ એત્થસદ્દો સાસનવિસયો.
475.Eketthāti etthasaddo sāsanavisayo.
એકસિક્ખાપદમ્પિ નત્થીતિ પિસદ્દો બહુસિક્ખાપદાનિ પન પગેવાતિ ચ આપત્તિ પન પગેવાતિ ચ આપત્તીપિ નત્થીતિ ચ અત્થં દસ્સેતિ.
Ekasikkhāpadampi natthīti pisaddo bahusikkhāpadāni pana pagevāti ca āpatti pana pagevāti ca āpattīpi natthīti ca atthaṃ dasseti.
‘‘સકલેપિ વિનયે’’તિ ઇમિના દ્વેત્થાતિ પાઠે એત્થસદ્દસ્સ વિસયં દસ્સેતિ. ઉભિન્નન્તિ ભિક્ખુભિક્ખુનીનં. અઞ્ઞથા પન કિત્તકા પઠમાપત્તિકાતિ આહ ‘‘ઇતરથા પના’’તિઆદિ. તત્થ ઇતરથાતિ પઞ્ઞત્તિતો અઞ્ઞેન પકારેન. કમ્મઞ્ચાતિ કમ્મઞત્તિ ચ. કમ્મપાદિકા ચાતિ કમ્મપાદઞત્તિ ચ. નવસુ ઠાનેસૂતિ ઓસારણાદીસુ નવસુ ઠાનેસુ. દ્વીસૂતિ ઞત્તિદુતિય, ઞત્તિચતુત્થકમ્મેસુ.
‘‘Sakalepi vinaye’’ti iminā dvetthāti pāṭhe etthasaddassa visayaṃ dasseti. Ubhinnanti bhikkhubhikkhunīnaṃ. Aññathā pana kittakā paṭhamāpattikāti āha ‘‘itarathā panā’’tiādi. Tattha itarathāti paññattito aññena pakārena. Kammañcāti kammañatti ca. Kammapādikā cāti kammapādañatti ca. Navasu ṭhānesūti osāraṇādīsu navasu ṭhānesu. Dvīsūti ñattidutiya, ñatticatutthakammesu.
વજ્જપટિચ્છાદિકાય પારાજિકં, ઉક્ખિત્તાનુવત્તિકાય પારાજિકં, અટ્ઠવત્થુકાય પારાજિકન્તિ ઇતિ ઇમે તયોતિ યોજના. કારણભૂતેનાતિ હેતુભૂતેન, ‘‘કરણભૂતેના’’તિપિ પાઠો, સાધકતમસત્તિભૂતેનાતિ અત્થો.
Vajjapaṭicchādikāya pārājikaṃ, ukkhittānuvattikāya pārājikaṃ, aṭṭhavatthukāya pārājikanti iti ime tayoti yojanā. Kāraṇabhūtenāti hetubhūtena, ‘‘karaṇabhūtenā’’tipi pāṭho, sādhakatamasattibhūtenāti attho.
તેસન્તિ અદ્ધાનહીનાદીનં. એત્થાતિ ‘‘તયો પુગ્ગલા ન ઉપસમ્પાદેતબ્બા’’તિ પાઠે, એતેસુ અઙ્ગહીનાદીસુ વા. યોતિ પુગ્ગલો. અપરિપૂરો ન યાચતીતિ સમ્બન્ધો. માતુઘાતકાદયો કરણદુક્કટકા ચાતિ યોજના. તત્થાતિ તેસુ ઞત્તિકપ્પનાદીસુ. ઞત્તિકપ્પનાતિ ઞત્તિવિધિ. વિપ્પકતપચ્ચત્તન્તિ વિપ્પકતં પચ્ચત્તં. અતીતકરણન્તિ અતીતસ્સ કરણં. વિત્થારેન્તો આહ ‘‘વત્થુસમ્પન્નં હી’’તિઆદિ. તયો કમ્માન સઙ્ગહાતિ એત્થ છન્દભેદરક્ખનત્થાય નકારે નિગ્ગહિતલોપો. નાસિતકાતિ નાસેતબ્બા પુગ્ગલા, નાસિતબ્બાતિ નાસિતા, નાસિતા એવ નાસિતકા. તિણ્ણં જનાનન્તિ તિણ્ણં ઉપસમ્પદાપેક્ખજનાનં એકૂપજ્ઝાયેન નાનાચરિયેન હુત્વાતિ યોજના. એકાનુસ્સાવનાતિ એકતો અનુસ્સાવના.
Tesanti addhānahīnādīnaṃ. Etthāti ‘‘tayo puggalā na upasampādetabbā’’ti pāṭhe, etesu aṅgahīnādīsu vā. Yoti puggalo. Aparipūro na yācatīti sambandho. Mātughātakādayo karaṇadukkaṭakā cāti yojanā. Tatthāti tesu ñattikappanādīsu. Ñattikappanāti ñattividhi. Vippakatapaccattanti vippakataṃ paccattaṃ. Atītakaraṇanti atītassa karaṇaṃ. Vitthārento āha ‘‘vatthusampannaṃ hī’’tiādi. Tayo kammāna saṅgahāti ettha chandabhedarakkhanatthāya nakāre niggahitalopo. Nāsitakāti nāsetabbā puggalā, nāsitabbāti nāsitā, nāsitā eva nāsitakā. Tiṇṇaṃ janānanti tiṇṇaṃ upasampadāpekkhajanānaṃ ekūpajjhāyena nānācariyena hutvāti yojanā. Ekānussāvanāti ekato anussāvanā.
પાદો નામ કહાપણસ્સ ચતુત્થભાગો. માસકો નામ પાદસ્સ પઞ્ચમભાગો. પારાજિકન્તિ વનપ્પતિં છિન્દન્તસ્સ દુતિયપારાજિકં (પારા॰ ૧૧૦). અનોદિસ્સાતિ ‘‘મનુસ્સો મરતૂ’’તિઆદિના ન ઉદ્દિસિત્વા. તેનાતિ વિસેન.
Pādo nāma kahāpaṇassa catutthabhāgo. Māsako nāma pādassa pañcamabhāgo. Pārājikanti vanappatiṃ chindantassa dutiyapārājikaṃ (pārā. 110). Anodissāti ‘‘manusso maratū’’tiādinā na uddisitvā. Tenāti visena.
ભિક્ખુનોવાદકવગ્ગસ્મિન્તિ સામઞ્ઞાધારો. દસસુ સિક્ખાપદેસૂતિ વિસેસાધારો. પઠમસિક્ખાપદમ્હિયેવાતિ દસસુ સિક્ખાપદેસુ પઠમસિક્ખાપદમ્હિયેવ. ઉપસમ્પન્નાય ભિક્ખુનિયાતિ સમ્બન્ધો. ‘‘આપત્તિ હોતી’’તિ ઇમિના ‘‘ચીવરેના’’તિ પદસ્સ સમ્બન્ધટ્ઠાનં દસ્સેતિ.
Bhikkhunovādakavaggasminti sāmaññādhāro. Dasasu sikkhāpadesūti visesādhāro. Paṭhamasikkhāpadamhiyevāti dasasu sikkhāpadesu paṭhamasikkhāpadamhiyeva. Upasampannāya bhikkhuniyāti sambandho. ‘‘Āpatti hotī’’ti iminā ‘‘cīvarenā’’ti padassa sambandhaṭṭhānaṃ dasseti.
‘‘ચતસ્સો એવા’’તિ ઇમિના તત્તિકાતિ એત્થ તસદ્દસ્સ વિસયં દસ્સેતિ. તા ચતસ્સો પરિમાણા યાસં આપત્તીનન્તિ તત્તિકા. નિપન્નસ્સાપિ તત્તિકાતિ એત્થાપિ એસેવ નયો. સાતિ ભિક્ખુની.
‘‘Catasso evā’’ti iminā tattikāti ettha tasaddassa visayaṃ dasseti. Tā catasso parimāṇā yāsaṃ āpattīnanti tattikā. Nipannassāpi tattikāti etthāpi eseva nayo. Sāti bhikkhunī.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / પરિવારપાળિ • Parivārapāḷi / ૨. દેસનાગામિનિયાદિઆપત્તિ • 2. Desanāgāminiyādiāpatti
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / પરિવાર-અટ્ઠકથા • Parivāra-aṭṭhakathā / (૨) દેસનાગામિનિયાદિવણ્ણના • (2) Desanāgāminiyādivaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / દેસનાગામિનિયાદિવણ્ણના • Desanāgāminiyādivaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / કાયિકાદિઆપત્તિવણ્ણના • Kāyikādiāpattivaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / કાયિકાદિઆપત્તિવણ્ણના • Kāyikādiāpattivaṇṇanā
