| Library / Tipiṭaka / तिपिटक • Tipiṭaka / अपदानपाळि • Apadānapāḷi |
४. देसपूजकत्थेरअपदानं
4. Desapūjakattheraapadānaṃ
१८.
18.
‘‘अत्थदस्सी तु भगवा, लोकजेट्ठो नरासभो।
‘‘Atthadassī tu bhagavā, lokajeṭṭho narāsabho;
अब्भुग्गन्त्वान वेहासं, गच्छते अनिलञ्जसे॥
Abbhuggantvāna vehāsaṃ, gacchate anilañjase.
१९.
19.
‘‘यम्हि देसे ठितो सत्था, अब्भुग्गच्छि महामुनि।
‘‘Yamhi dese ṭhito satthā, abbhuggacchi mahāmuni;
ताहं देसं अपूजेसिं, पसन्नो सेहि पाणिभि॥
Tāhaṃ desaṃ apūjesiṃ, pasanno sehi pāṇibhi.
२०.
20.
‘‘अट्ठारसे कप्पसते, अद्दसं यं महामुनिं।
‘‘Aṭṭhārase kappasate, addasaṃ yaṃ mahāmuniṃ;
दुग्गतिं नाभिजानामि, देसपूजायिदं फलं॥
Duggatiṃ nābhijānāmi, desapūjāyidaṃ phalaṃ.
२१.
21.
‘‘एकादसे कप्पसते, गोसुजातसनामको।
‘‘Ekādase kappasate, gosujātasanāmako;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
२२.
22.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा देसपूजको थेरो इमा गाथायो अभासित्थाति।
Itthaṃ sudaṃ āyasmā desapūjako thero imā gāthāyo abhāsitthāti.
देसपूजकत्थेरस्सापदानं चतुत्थं।
Desapūjakattherassāpadānaṃ catutthaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ४. देसपूजकत्थेरअपदानवण्णना • 4. Desapūjakattheraapadānavaṇṇanā
