| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
8. தே³வாஸுரஸங்கா³மஸுத்தவண்ணனா
8. Devāsurasaṅgāmasuttavaṇṇanā
39. அட்ட²மே ஸமுபப்³யூள்ஹோ அஹோஸீதி பச்சுபட்டி²தோ அஹோஸி. ஸங்கா³மெய்யாமாதி ஸங்கா³மங் கரெய்யாம யுஜ்ஜெ²ய்யாம. அபயிங்ஸுயேவாதி பலாயிங்ஸுயேவ. உத்தரேனாபி⁴முகா²தி உத்தராமுகா² ஹுத்வா. அபி⁴யந்தே வாதி அனுப³ந்த⁴ந்தியேவ. பீ⁴ருத்தானக³தேனாதி பீ⁴ருத்தானங் ப⁴யனிவாரணங் பதிட்டா²னங் க³தேன. அகரணீயாதி யுத்³தே⁴ன கிஞ்சி அகத்தப்³பா³. கஸ்மா பன நேஸங் ஸங்கா³மோ ஹோதீதி? அஸுரா ஹி புப்³பே³ தாவதிங்ஸவாஸினோ, தே சித்தபாடலியா புப்ப²னகாலே தி³ப்³ப³பாரிச்ச²த்தகபுப்ப²ங் அனுஸ்ஸரந்தி. ததோ உப்பன்னகோதா⁴ ‘‘க³ண்ஹத² தே³வே’’தி ஸம்முக²ஸம்முக²ட்டா²னேனேவ ஸினேருங் அபி⁴ருஹந்தி, தே³வாபி நிக்க²மந்தி. தேஸங் கோ³பாலகதா³ரகானங் அஞ்ஞமஞ்ஞங் த³ண்ட³கேஹி பஹரணஸதி³ஸங் யுத்³த⁴ங் ஹோதி. ஸக்கோ தே³வராஜா ஹெட்டா² பஞ்சஸு டா²னேஸு ஆரக்க²ங் ட²பெத்வா உபரி தே³வபுரங் பரிவாரெத்வா அத்தஸதி³ஸா வஜிரஹத்தா² படிமா ட²பாபேஸி. அஸுரா ஹெட்டா² பஞ்ச டா²னானி படிபா³ஹித்வா அபி⁴ருள்ஹா இந்த³படிமாயோ தி³ஸ்வா நிவத்தித்வா அஸுரபுரமேவ க³ச்ச²ந்தி.
39. Aṭṭhame samupabyūḷho ahosīti paccupaṭṭhito ahosi. Saṅgāmeyyāmāti saṅgāmaṃ kareyyāma yujjheyyāma. Apayiṃsuyevāti palāyiṃsuyeva. Uttarenābhimukhāti uttarāmukhā hutvā. Abhiyante vāti anubandhantiyeva. Bhīruttānagatenāti bhīruttānaṃ bhayanivāraṇaṃ patiṭṭhānaṃ gatena. Akaraṇīyāti yuddhena kiñci akattabbā. Kasmā pana nesaṃ saṅgāmo hotīti? Asurā hi pubbe tāvatiṃsavāsino, te cittapāṭaliyā pupphanakāle dibbapāricchattakapupphaṃ anussaranti. Tato uppannakodhā ‘‘gaṇhatha deve’’ti sammukhasammukhaṭṭhāneneva sineruṃ abhiruhanti, devāpi nikkhamanti. Tesaṃ gopālakadārakānaṃ aññamaññaṃ daṇḍakehi paharaṇasadisaṃ yuddhaṃ hoti. Sakko devarājā heṭṭhā pañcasu ṭhānesu ārakkhaṃ ṭhapetvā upari devapuraṃ parivāretvā attasadisā vajirahatthā paṭimā ṭhapāpesi. Asurā heṭṭhā pañca ṭhānāni paṭibāhitvā abhiruḷhā indapaṭimāyo disvā nivattitvā asurapurameva gacchanti.
த³க்கி²ணேனாபி⁴முகா²தி த³க்கி²ணாமுகா² ஹுத்வா. அபத³ங் வதி⁴த்வாதி நிப்பத³ங் நிரவஸேஸங் வதி⁴த்வா. அத³ஸ்ஸனங் க³தோதி மாரோபி வட்டபாத³கங் கத்வா ரூபாவசரசதுத்த²ஜ்ஜா²னங் ஸமாபன்னஸ்ஸ சித்தங் ஜானாதி, ததே³வ விபஸ்ஸனாபாத³கங் கத்வா ஸமாபன்னஸ்ஸ சித்தங் ஜானாதி. அரூபாவசரஸமாபத்தி பன வட்டபாதா³ வா ஹோது விபஸ்ஸனாபாதா³ வா, தங் ஸமாபன்னஸ்ஸ மாரோ சித்தங் ந ஜானாதி. தேன வுத்தங் – ‘‘அத³ஸ்ஸனங் க³தோ பாபிமதோ’’தி.
Dakkhiṇenābhimukhāti dakkhiṇāmukhā hutvā. Apadaṃ vadhitvāti nippadaṃ niravasesaṃ vadhitvā. Adassanaṃ gatoti māropi vaṭṭapādakaṃ katvā rūpāvacaracatutthajjhānaṃ samāpannassa cittaṃ jānāti, tadeva vipassanāpādakaṃ katvā samāpannassa cittaṃ jānāti. Arūpāvacarasamāpatti pana vaṭṭapādā vā hotu vipassanāpādā vā, taṃ samāpannassa māro cittaṃ na jānāti. Tena vuttaṃ – ‘‘adassanaṃ gato pāpimato’’ti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. தே³வாஸுரஸங்கா³மஸுத்தங் • 8. Devāsurasaṅgāmasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 8-9. தே³வாஸுரஸங்கா³மஸுத்தாதி³வண்ணனா • 8-9. Devāsurasaṅgāmasuttādivaṇṇanā
