| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೯. ದೇವತಾಸುತ್ತಂ
9. Devatāsuttaṃ
೧೯. ‘‘ಇಮಞ್ಚ, ಭಿಕ್ಖವೇ, ರತ್ತಿಂ ಸಮ್ಬಹುಲಾ ದೇವತಾ ಅಭಿಕ್ಕನ್ತಾಯ ರತ್ತಿಯಾ ಅಭಿಕ್ಕನ್ತವಣ್ಣಾ ಕೇವಲಕಪ್ಪಂ ಜೇತವನಂ ಓಭಾಸೇತ್ವಾ ಯೇನಾಹಂ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಮಂ ಅಭಿವಾದೇತ್ವಾ ಏಕಮನ್ತಂ ಅಟ್ಠಂಸು। ಏಕಮನ್ತಂ ಠಿತಾ ಖೋ, ಭಿಕ್ಖವೇ, ತಾ ದೇವತಾ ಮಂ ಏತದವೋಚುಂ – ‘ಉಪಸಙ್ಕಮಿಂಸು ನೋ, ಭನ್ತೇ, ಪುಬ್ಬೇ ಮನುಸ್ಸಭೂತಾನಂ ಪಬ್ಬಜಿತಾ ಅಗಾರಾನಿ। ತೇ ಮಯಂ, ಭನ್ತೇ, ಪಚ್ಚುಟ್ಠಿಮ್ಹ, ನೋ ಚ ಖೋ ಅಭಿವಾದಿಮ್ಹ। ತಾ ಮಯಂ, ಭನ್ತೇ, ಅಪರಿಪುಣ್ಣಕಮ್ಮನ್ತಾ ವಿಪ್ಪಟಿಸಾರಿನಿಯೋ ಪಚ್ಚಾನುತಾಪಿನಿಯೋ ಹೀನಂ ಕಾಯಂ ಉಪಪನ್ನಾ’’’ತಿ।
19. ‘‘Imañca, bhikkhave, rattiṃ sambahulā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yenāhaṃ tenupasaṅkamiṃsu; upasaṅkamitvā maṃ abhivādetvā ekamantaṃ aṭṭhaṃsu. Ekamantaṃ ṭhitā kho, bhikkhave, tā devatā maṃ etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha, no ca kho abhivādimha. Tā mayaṃ, bhante, aparipuṇṇakammantā vippaṭisāriniyo paccānutāpiniyo hīnaṃ kāyaṃ upapannā’’’ti.
‘‘ಅಪರಾಪಿ ಮಂ, ಭಿಕ್ಖವೇ, ಸಮ್ಬಹುಲಾ ದೇವತಾ ಉಪಸಙ್ಕಮಿತ್ವಾ ಏತದವೋಚುಂ – ‘ಉಪಸಙ್ಕಮಿಂಸು ನೋ, ಭನ್ತೇ, ಪುಬ್ಬೇ ಮನುಸ್ಸಭೂತಾನಂ ಪಬ್ಬಜಿತಾ ಅಗಾರಾನಿ। ತೇ ಮಯಂ, ಭನ್ತೇ, ಪಚ್ಚುಟ್ಠಿಮ್ಹ ಅಭಿವಾದಿಮ್ಹ 1, ನೋ ಚ ತೇಸಂ ಆಸನಂ ಅದಮ್ಹ। ತಾ ಮಯಂ, ಭನ್ತೇ, ಅಪರಿಪುಣ್ಣಕಮ್ಮನ್ತಾ ವಿಪ್ಪಟಿಸಾರಿನಿಯೋ ಪಚ್ಚಾನುತಾಪಿನಿಯೋ ಹೀನಂ ಕಾಯಂ ಉಪಪನ್ನಾ’’’ತಿ।
‘‘Aparāpi maṃ, bhikkhave, sambahulā devatā upasaṅkamitvā etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha abhivādimha 2, no ca tesaṃ āsanaṃ adamha. Tā mayaṃ, bhante, aparipuṇṇakammantā vippaṭisāriniyo paccānutāpiniyo hīnaṃ kāyaṃ upapannā’’’ti.
‘‘ಅಪರಾಪಿ ಮಂ, ಭಿಕ್ಖವೇ, ಸಮ್ಬಹುಲಾ ದೇವತಾ ಉಪಸಙ್ಕಮಿತ್ವಾ ಏತದವೋಚುಂ – ‘ಉಪಸಙ್ಕಮಿಂಸು ನೋ, ಭನ್ತೇ, ಪುಬ್ಬೇ ಮನುಸ್ಸಭೂತಾನಂ ಪಬ್ಬಜಿತಾ ಅಗಾರಾನಿ। ತೇ ಮಯಂ, ಭನ್ತೇ, ಪಚ್ಚುಟ್ಠಿಮ್ಹ ಅಭಿವಾದಿಮ್ಹ 3 ಆಸನಂ 4 ಅದಮ್ಹ, ನೋ ಚ ಖೋ ಯಥಾಸತ್ತಿ ಯಥಾಬಲಂ ಸಂವಿಭಜಿಮ್ಹ…ಪೇ॰… ಯಥಾಸತ್ತಿ ಯಥಾಬಲಂ 5 ಸಂವಿಭಜಿಮ್ಹ, ನೋ ಚ ಖೋ ಉಪನಿಸೀದಿಮ್ಹ ಧಮ್ಮಸ್ಸವನಾಯ…ಪೇ॰… ಉಪನಿಸೀದಿಮ್ಹ 6 ಧಮ್ಮಸ್ಸವನಾಯ, ನೋ ಚ ಖೋ ಓಹಿತಸೋತಾ ಧಮ್ಮಂ ಸುಣಿಮ್ಹ…ಪೇ॰… ಓಹಿತಸೋತಾ ಚ ಧಮ್ಮಂ ಸುಣಿಮ್ಹ, ನೋ ಚ ಖೋ ಸುತ್ವಾ ಧಮ್ಮಂ ಧಾರಯಿಮ್ಹ…ಪೇ॰… ಸುತ್ವಾ ಚ ಧಮ್ಮಂ ಧಾರಯಿಮ್ಹ, ನೋ ಚ ಖೋ ಧಾತಾನಂ ಧಮ್ಮಾನಂ ಅತ್ಥಂ ಉಪಪರಿಕ್ಖಿಮ್ಹ…ಪೇ॰… ಧಾತಾನಞ್ಚ ಧಮ್ಮಾನಂ ಅತ್ಥಂ ಉಪಪರಿಕ್ಖಿಮ್ಹ, ನೋ ಚ ಖೋ ಅತ್ಥಮಞ್ಞಾಯ ಧಮ್ಮಮಞ್ಞಾಯ ಧಮ್ಮಾನುಧಮ್ಮಂ ಪಟಿಪಜ್ಜಿಮ್ಹ। ತಾ ಮಯಂ, ಭನ್ತೇ, ಅಪರಿಪುಣ್ಣಕಮ್ಮನ್ತಾ ವಿಪ್ಪಟಿಸಾರಿನಿಯೋ ಪಚ್ಚಾನುತಾಪಿನಿಯೋ ಹೀನಂ ಕಾಯಂ ಉಪಪನ್ನಾ’’’ತಿ।
‘‘Aparāpi maṃ, bhikkhave, sambahulā devatā upasaṅkamitvā etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha abhivādimha 7 āsanaṃ 8 adamha, no ca kho yathāsatti yathābalaṃ saṃvibhajimha…pe… yathāsatti yathābalaṃ 9 saṃvibhajimha, no ca kho upanisīdimha dhammassavanāya…pe… upanisīdimha 10 dhammassavanāya, no ca kho ohitasotā dhammaṃ suṇimha…pe… ohitasotā ca dhammaṃ suṇimha, no ca kho sutvā dhammaṃ dhārayimha…pe… sutvā ca dhammaṃ dhārayimha, no ca kho dhātānaṃ dhammānaṃ atthaṃ upaparikkhimha…pe… dhātānañca dhammānaṃ atthaṃ upaparikkhimha, no ca kho atthamaññāya dhammamaññāya dhammānudhammaṃ paṭipajjimha. Tā mayaṃ, bhante, aparipuṇṇakammantā vippaṭisāriniyo paccānutāpiniyo hīnaṃ kāyaṃ upapannā’’’ti.
‘‘ಅಪರಾಪಿ ಮಂ, ಭಿಕ್ಖವೇ, ಸಮ್ಬಹುಲಾ ದೇವತಾ ಉಪಸಙ್ಕಮಿತ್ವಾ ಏತದವೋಚುಂ – ‘ಉಪಸಙ್ಕಮಿಂಸು ನೋ, ಭನ್ತೇ, ಪುಬ್ಬೇ ಮನುಸ್ಸಭೂತಾನಂ ಪಬ್ಬಜಿತಾ ಅಗಾರಾನಿ। ತೇ ಮಯಂ, ಭನ್ತೇ, ಪಚ್ಚುಟ್ಠಿಮ್ಹ ಅಭಿವಾದಿಮ್ಹ 11, ಆಸನಂ 12 ಅದಮ್ಹ, ಯಥಾಸತ್ತಿ ಯಥಾಬಲಂ 13 ಸಂವಿಭಜಿಮ್ಹ, ಉಪನಿಸೀದಿಮ್ಹ 14 ಧಮ್ಮಸ್ಸವನಾಯ, ಓಹಿತಸೋತಾ ಚ ಧಮ್ಮಂ ಸುಣಿಮ್ಹ, ಸುತ್ವಾ ಚ ಧಮ್ಮಂ ಧಾರಯಿಮ್ಹ, ಧಾತಾನಞ್ಚ ಧಮ್ಮಾನಂ ಅತ್ಥಂ ಉಪಪರಿಕ್ಖಿಮ್ಹ, ಅತ್ಥಮಞ್ಞಾಯ ಧಮ್ಮಮಞ್ಞಾಯ ಧಮ್ಮಾನುಧಮ್ಮಂ 15 ಪಟಿಪಜ್ಜಿಮ್ಹ। ತಾ ಮಯಂ, ಭನ್ತೇ, ಪರಿಪುಣ್ಣಕಮ್ಮನ್ತಾ ಅವಿಪ್ಪಟಿಸಾರಿನಿಯೋ ಅಪಚ್ಚಾನುತಾಪಿನಿಯೋ ಪಣೀತಂ ಕಾಯಂ ಉಪಪನ್ನಾ’ತಿ। ಏತಾನಿ, ಭಿಕ್ಖವೇ, ರುಕ್ಖಮೂಲಾನಿ ಏತಾನಿ ಸುಞ್ಞಾಗಾರಾನಿ। ಝಾಯಥ, ಭಿಕ್ಖವೇ, ಮಾ ಪಮಾದತ್ಥ, ಮಾ ಪಚ್ಛಾ ವಿಪ್ಪಟಿಸಾರಿನೋ ಅಹುವತ್ಥ ಸೇಯ್ಯಥಾಪಿ ತಾ ಪುರಿಮಿಕಾ ದೇವತಾ’’ತಿ। ನವಮಂ।
‘‘Aparāpi maṃ, bhikkhave, sambahulā devatā upasaṅkamitvā etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha abhivādimha 16, āsanaṃ 17 adamha, yathāsatti yathābalaṃ 18 saṃvibhajimha, upanisīdimha 19 dhammassavanāya, ohitasotā ca dhammaṃ suṇimha, sutvā ca dhammaṃ dhārayimha, dhātānañca dhammānaṃ atthaṃ upaparikkhimha, atthamaññāya dhammamaññāya dhammānudhammaṃ 20 paṭipajjimha. Tā mayaṃ, bhante, paripuṇṇakammantā avippaṭisāriniyo apaccānutāpiniyo paṇītaṃ kāyaṃ upapannā’ti. Etāni, bhikkhave, rukkhamūlāni etāni suññāgārāni. Jhāyatha, bhikkhave, mā pamādattha, mā pacchā vippaṭisārino ahuvattha seyyathāpi tā purimikā devatā’’ti. Navamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೯. ದೇವತಾಸುತ್ತವಣ್ಣನಾ • 9. Devatāsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೫-೯. ಗಣ್ಡಸುತ್ತಾದಿವಣ್ಣನಾ • 5-9. Gaṇḍasuttādivaṇṇanā
