| Library / Tipiṭaka / तिपिटक • Tipiṭaka / जातकपाळि • Jātakapāḷi |
४५७. धम्मदेवपुत्तजातकं (३)
457. Dhammadevaputtajātakaṃ (3)
२६.
26.
यसोकरो पुञ्ञकरोहमस्मि, सदात्थुतो समणब्राह्मणानं।
Yasokaro puññakarohamasmi, sadātthuto samaṇabrāhmaṇānaṃ;
मग्गारहो देवमनुस्सपूजितो, धम्मो अहं देहि अधम्म मग्गं॥
Maggāraho devamanussapūjito, dhammo ahaṃ dehi adhamma maggaṃ.
२७.
27.
अधम्मयानं दळ्हमारुहित्वा, असन्तसन्तो बलवाहमस्मि।
Adhammayānaṃ daḷhamāruhitvā, asantasanto balavāhamasmi;
स किस्स हेतुम्हि तवज्ज दज्जं, मग्गं अहं धम्म अदिन्नपुब्बं॥
Sa kissa hetumhi tavajja dajjaṃ, maggaṃ ahaṃ dhamma adinnapubbaṃ.
२८.
28.
धम्मो हवे पातुरहोसि पुब्बे, पच्छा अधम्मो उदपादि लोके।
Dhammo have pāturahosi pubbe, pacchā adhammo udapādi loke;
जेट्ठो च सेट्ठो च सनन्तनो च, उय्याहि जेट्ठस्स कनिट्ठ मग्गा॥
Jeṭṭho ca seṭṭho ca sanantano ca, uyyāhi jeṭṭhassa kaniṭṭha maggā.
२९.
29.
न याचनाय नपि पातिरूपा, न अरहता 1 तेहं ददेय्यं मग्गं।
Na yācanāya napi pātirūpā, na arahatā 2 tehaṃ dadeyyaṃ maggaṃ;
युद्धञ्च नो होतु उभिन्नमज्ज, युद्धम्हि यो जेस्सति तस्स मग्गो॥
Yuddhañca no hotu ubhinnamajja, yuddhamhi yo jessati tassa maggo.
३०.
30.
सब्बा दिसा अनुविसटोहमस्मि, महब्बलो अमितयसो अतुल्यो।
Sabbā disā anuvisaṭohamasmi, mahabbalo amitayaso atulyo;
गुणेहि सब्बेहि उपेतरूपो, धम्मो अधम्म त्वं कथं विजेस्ससि॥
Guṇehi sabbehi upetarūpo, dhammo adhamma tvaṃ kathaṃ vijessasi.
३१.
31.
लोहेन वे हञ्ञति जातरूपं, न जातरूपेन हनन्ति लोहं।
Lohena ve haññati jātarūpaṃ, na jātarūpena hananti lohaṃ;
सचे अधम्मो हञ्छति 3 धम्ममज्ज, अयो सुवण्णं विय दस्सनेय्यं॥
Sace adhammo hañchati 4 dhammamajja, ayo suvaṇṇaṃ viya dassaneyyaṃ.
३२.
32.
मग्गञ्च ते दम्मि पियाप्पियेन, वाचादुरुत्तानिपि ते खमामि॥
Maggañca te dammi piyāppiyena, vācāduruttānipi te khamāmi.
३३.
33.
इदञ्च सुत्वा वचनं अधम्मो, अवंसिरो पतितो उद्धपादो।
Idañca sutvā vacanaṃ adhammo, avaṃsiro patito uddhapādo;
‘‘युद्धत्थिको चे न लभामि युद्धं’’, एत्तावता होति हतो अधम्मो॥
‘‘Yuddhatthiko ce na labhāmi yuddhaṃ’’, ettāvatā hoti hato adhammo.
३४.
34.
खन्तीबलो युद्धबलं विजेत्वा, हन्त्वा अधम्मं निहनित्व 9 भूम्या।
Khantībalo yuddhabalaṃ vijetvā, hantvā adhammaṃ nihanitva 10 bhūmyā;
पायासि वित्तो 11 अभिरुय्ह सन्दनं, मग्गेनेव अतिबलो सच्चनिक्कमो॥
Pāyāsi vitto 12 abhiruyha sandanaṃ, maggeneva atibalo saccanikkamo.
३५.
35.
माता पिता समणब्राह्मणा च, असम्मानिता यस्स सके अगारे।
Mātā pitā samaṇabrāhmaṇā ca, asammānitā yassa sake agāre;
इधेव निक्खिप्प सरीरदेहं, कायस्स भेदा निरयं वजन्ति ते 13।
Idheva nikkhippa sarīradehaṃ, kāyassa bhedā nirayaṃ vajanti te 14;
यथा अधम्मो पतितो अवंसिरो॥
Yathā adhammo patito avaṃsiro.
३६.
36.
माता पिता समणब्राह्मणा च, सुसम्मानिता यस्स सके अगारे।
Mātā pitā samaṇabrāhmaṇā ca, susammānitā yassa sake agāre;
इधेव निक्खिप्प सरीरदेहं, कायस्स भेदा सुगतिं वजन्ति ते।
Idheva nikkhippa sarīradehaṃ, kāyassa bhedā sugatiṃ vajanti te;
यथापि धम्मो अभिरुय्ह सन्दनन्ति॥
Yathāpi dhammo abhiruyha sandananti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४५७] ३. धम्मदेवपुत्तजातकवण्णना • [457] 3. Dhammadevaputtajātakavaṇṇanā
