A World of Knowledge
    Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi

    19. த⁴ம்மனானத்தஞாணனித்³தே³ஸோ

    19. Dhammanānattañāṇaniddeso

    73. கத²ங் நவத⁴ம்மவவத்தா²னே பஞ்ஞா த⁴ம்மனானத்தே ஞாணங்? கத²ங் த⁴ம்மே வவத்தே²தி? காமாவசரே த⁴ம்மே குஸலதோ வவத்தே²தி, அகுஸலதோ வவத்தே²தி, அப்³யாகததோ வவத்தே²தி. ரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி. அரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி. அபரியாபன்னே த⁴ம்மே குஸலதோ வவத்தே²தி, அப்³யாகததோ வவத்தே²தி.

    73. Kathaṃ navadhammavavatthāne paññā dhammanānatte ñāṇaṃ? Kathaṃ dhamme vavattheti? Kāmāvacare dhamme kusalato vavattheti, akusalato vavattheti, abyākatato vavattheti. Rūpāvacare dhamme kusalato vavattheti, abyākatato vavattheti. Arūpāvacare dhamme kusalato vavattheti, abyākatato vavattheti. Apariyāpanne dhamme kusalato vavattheti, abyākatato vavattheti.

    கத²ங் காமாவசரே த⁴ம்மே குஸலதோ வவத்தே²தி, அகுஸலதோ வவத்தே²தி, அப்³யாகததோ வவத்தே²தி? த³ஸ குஸலகம்மபதே² குஸலதோ வவத்தே²தி, த³ஸ அகுஸலகம்மபதே² அகுஸலதோ வவத்தே²தி, ரூபஞ்ச விபாகஞ்ச கிரியஞ்ச அப்³யாகததோ வவத்தே²தி – ஏவங் காமாவசரே த⁴ம்மே குஸலதோ வவத்தே²தி, அகுஸலதோ வவத்தே²தி, அப்³யாகததோ வவத்தே²தி.

    Kathaṃ kāmāvacare dhamme kusalato vavattheti, akusalato vavattheti, abyākatato vavattheti? Dasa kusalakammapathe kusalato vavattheti, dasa akusalakammapathe akusalato vavattheti, rūpañca vipākañca kiriyañca abyākatato vavattheti – evaṃ kāmāvacare dhamme kusalato vavattheti, akusalato vavattheti, abyākatato vavattheti.

    கத²ங் ரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி? இத⁴ட்ட²ஸ்ஸ சத்தாரி ஜா²னானி குஸலதோ வவத்தே²தி, தத்ரூபபன்னஸ்ஸ சத்தாரி ஜா²னானி அப்³யாகததோ வவத்தே²தி – ஏவங் ரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி.

    Kathaṃ rūpāvacare dhamme kusalato vavattheti, abyākatato vavattheti? Idhaṭṭhassa cattāri jhānāni kusalato vavattheti, tatrūpapannassa cattāri jhānāni abyākatato vavattheti – evaṃ rūpāvacare dhamme kusalato vavattheti, abyākatato vavattheti.

    கத²ங் அரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி? இத⁴ட்ட²ஸ்ஸ சதஸ்ஸோ அரூபாவசரஸமாபத்தியோ குஸலதோ வவத்தே²தி, தத்ரூபபன்னஸ்ஸ சதஸ்ஸோ அரூபாவசரஸமாபத்தியோ அப்³யாகததோ வவத்தே²தி – ஏவங் அரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி.

    Kathaṃ arūpāvacare dhamme kusalato vavattheti, abyākatato vavattheti? Idhaṭṭhassa catasso arūpāvacarasamāpattiyo kusalato vavattheti, tatrūpapannassa catasso arūpāvacarasamāpattiyo abyākatato vavattheti – evaṃ arūpāvacare dhamme kusalato vavattheti, abyākatato vavattheti.

    கத²ங் அபரியாபன்னே த⁴ம்மே குஸலதோ வவத்தே²தி, அப்³யாகததோ வவத்தே²தி? சத்தாரோ அரியமக்³கே³ குஸலதோ வவத்தே²தி, சத்தாரி ச ஸாமஞ்ஞப²லானி நிப்³பா³னஞ்ச அப்³யாகததோ வவத்தே²தி – ஏவங் அபரியாபன்னே த⁴ம்மே குஸலதோ வவத்தே²தி, அப்³யாகததோ வவத்தே²தி. ஏவங் த⁴ம்மே வவத்தே²தி.

    Kathaṃ apariyāpanne dhamme kusalato vavattheti, abyākatato vavattheti? Cattāro ariyamagge kusalato vavattheti, cattāri ca sāmaññaphalāni nibbānañca abyākatato vavattheti – evaṃ apariyāpanne dhamme kusalato vavattheti, abyākatato vavattheti. Evaṃ dhamme vavattheti.

    நவ பாமோஜ்ஜமூலகா த⁴ம்மா. அனிச்சதோ மனஸிகரோதோ பாமோஜ்ஜங் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி. ஸமாஹிதே சித்தே யதா²பூ⁴தங் பஜானாதி பஸ்ஸதி. யதா²பூ⁴தங் ஜானங் பஸ்ஸங் நிப்³பி³ந்த³தி, நிப்³பி³ந்த³ங் விரஜ்ஜதி, விராகா³ விமுச்சதி. து³க்க²தோ மனஸிகரோதோ பாமோஜ்ஜங் ஜாயதி…பே॰… அனத்ததோ மனஸிகரோதோ பாமோஜ்ஜங் ஜாயதி…பே॰… விமுச்சதி.

    Nava pāmojjamūlakā dhammā. Aniccato manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhite citte yathābhūtaṃ pajānāti passati. Yathābhūtaṃ jānaṃ passaṃ nibbindati, nibbindaṃ virajjati, virāgā vimuccati. Dukkhato manasikaroto pāmojjaṃ jāyati…pe… anattato manasikaroto pāmojjaṃ jāyati…pe… vimuccati.

    ரூபங் அனிச்சதோ மனஸிகரோதோ பாமோஜ்ஜங் ஜாயதி…பே॰… ரூபங் து³க்க²தோ மனஸிகரோதோ…பே॰… வேத³னங்… ஸஞ்ஞங்… ஸங்கா²ரே… விஞ்ஞாணங்… சக்கு²ங்…பே॰… ஜராமரணங் அனிச்சதோ மனஸிகரோதோ பாமோஜ்ஜங் ஜாயதி…பே॰… ஜராமரணங் து³க்க²தோ மனஸிகரோதோ பாமோஜ்ஜங் ஜாயதி…பே॰… ஜராமரணங் அனத்ததோ மனஸிகரோதோ பாமோஜ்ஜங் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி. ஸமாஹிதே சித்தே யதா²பூ⁴தங் பஜானாதி பஸ்ஸதி. யதா²பூ⁴தங் ஜானங் பஸ்ஸங் நிப்³பி³ந்த³தி, நிப்³பி³ந்த³ங் விரஜ்ஜதி, விராகா³ விமுச்சதி. இமே நவ பாமோஜ்ஜமூலகா த⁴ம்மா .

    Rūpaṃ aniccato manasikaroto pāmojjaṃ jāyati…pe… rūpaṃ dukkhato manasikaroto…pe… vedanaṃ… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato manasikaroto pāmojjaṃ jāyati…pe… jarāmaraṇaṃ dukkhato manasikaroto pāmojjaṃ jāyati…pe… jarāmaraṇaṃ anattato manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhite citte yathābhūtaṃ pajānāti passati. Yathābhūtaṃ jānaṃ passaṃ nibbindati, nibbindaṃ virajjati, virāgā vimuccati. Ime nava pāmojjamūlakā dhammā .

    74. நவ யோனிஸோ மனஸிகாரமூலகா த⁴ம்மா. அனிச்சதோ யோனிஸோ மனஸிகரோதோ பாமோஜ்ஜங் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி. ஸமாஹிதேன சித்தேன ‘‘இத³ங் து³க்க²’’ந்தி யதா²பூ⁴தங் பஜானாதி, ‘‘அயங் து³க்க²ஸமுத³யோ’’தி யதா²பூ⁴தங் பஜானாதி, ‘‘அயங் து³க்க²னிரோதோ⁴’’தி யதா²பூ⁴தங் பஜானாதி, ‘‘அயங் து³க்க²னிரோத⁴கா³மினீ படிபதா³’’தி யதா²பூ⁴தங் பஜானாதி. து³க்க²தோ யோனிஸோ மனஸிகரோதோ பாமோஜ்ஜங் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி. ஸமாஹிதேன சித்தேன ‘‘இத³ங் து³க்க²’’ந்தி யதா²பூ⁴தங் பஜானாதி, ‘‘அயங் து³க்க²ஸமுத³யோ’’தி யதா²பூ⁴தங் பஜானாதி, ‘‘அயங் து³க்க²னிரோதோ⁴’’தி யதா²பூ⁴தங் பஜானாதி, ‘‘அயங் து³க்க²னிரோத⁴கா³மினீ படிபதா³’’தி யதா²பூ⁴தங் பஜானாதி. அனத்ததோ யோனிஸோ மனஸிகரோதோ பாமோஜ்ஜங் ஜாயதி…பே॰….

    74. Nava yoniso manasikāramūlakā dhammā. Aniccato yoniso manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhitena cittena ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Dukkhato yoniso manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhitena cittena ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Anattato yoniso manasikaroto pāmojjaṃ jāyati…pe….

    ரூபங் அனிச்சதோ யோனிஸோ மனஸிகரோதோ பாமோஜ்ஜங் ஜாயதி…பே॰… ரூபங் து³க்க²தோ யோனிஸோ மனஸிகரோதோ பாமோஜ்ஜங் ஜாயதி…பே॰… ரூபங் அனத்ததோ யோனிஸோ மனஸிகரோதோ பாமோஜ்ஜங் ஜாயதி…பே॰… வேத³னங்… ஸஞ்ஞங்… ஸங்கா²ரே… விஞ்ஞாணங்… சக்கு²ங்…பே॰… ஜராமரணங் அனிச்சதோ யோனிஸோ மனஸிகரோதோ பாமோஜ்ஜங் ஜாயதி…பே॰… ஜராமரணங் து³க்க²தோ யோனிஸோ மனஸிகரோதோ பாமோஜ்ஜங் ஜாயதி…பே॰… ஜராமரணங் அனத்ததோ யோனிஸோ மனஸிகரோதோ பாமோஜ்ஜங் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ங் வேதே³தி, ஸுகி²னோ சித்தங் ஸமாதி⁴யதி. ஸமாஹிதேன சித்தேன ‘‘இத³ங் து³க்க²’’ந்தி யதா²பூ⁴தங் பஜானாதி, ‘‘அயங் து³க்க²ஸமுத³யோ’’தி யதா²பூ⁴தங் பஜானாதி, ‘‘அயங் து³க்க²னிரோதோ⁴’’தி யதா²பூ⁴தங் பஜானாதி, ‘‘அயங் து³க்க²னிரோத⁴கா³மினீ படிபதா³’’தி யதா²பூ⁴தங் பஜானாதி. இமே நவ யோனிஸோ மனஸிகாரமூலகா த⁴ம்மா.

    Rūpaṃ aniccato yoniso manasikaroto pāmojjaṃ jāyati…pe… rūpaṃ dukkhato yoniso manasikaroto pāmojjaṃ jāyati…pe… rūpaṃ anattato yoniso manasikaroto pāmojjaṃ jāyati…pe… vedanaṃ… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato yoniso manasikaroto pāmojjaṃ jāyati…pe… jarāmaraṇaṃ dukkhato yoniso manasikaroto pāmojjaṃ jāyati…pe… jarāmaraṇaṃ anattato yoniso manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhitena cittena ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Ime nava yoniso manasikāramūlakā dhammā.

    நவ நானத்தா – தா⁴துனானத்தங் படிச்ச உப்பஜ்ஜதி ப²ஸ்ஸனானத்தங், ப²ஸ்ஸனானத்தங் படிச்ச உப்பஜ்ஜதி வேத³னானானத்தங், வேத³னானானத்தங் படிச்ச உப்பஜ்ஜதி ஸஞ்ஞானானத்தங், ஸஞ்ஞானானத்தங் படிச்ச உப்பஜ்ஜதி ஸங்கப்பனானத்தங், ஸங்கப்பனானத்தங் படிச்ச உப்பஜ்ஜதி ச²ந்த³னானத்தங், ச²ந்த³னானத்தங் படிச்ச உப்பஜ்ஜதி பரிளாஹனானத்தங், பரிளாஹனானத்தங் படிச்ச உப்பஜ்ஜதி பரியேஸனானானத்தங், பரியேஸனானானத்தங் படிச்ச உப்பஜ்ஜதி லாப⁴னானத்தங் – இமே நவ நானத்தா. தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘நவத⁴ம்மவவத்தா²னே பஞ்ஞா த⁴ம்மனானத்தே ஞாணங்’’.

    Nava nānattā – dhātunānattaṃ paṭicca uppajjati phassanānattaṃ, phassanānattaṃ paṭicca uppajjati vedanānānattaṃ, vedanānānattaṃ paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānattaṃ, pariyesanānānattaṃ paṭicca uppajjati lābhanānattaṃ – ime nava nānattā. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘navadhammavavatthāne paññā dhammanānatte ñāṇaṃ’’.

    த⁴ம்மனானத்தஞாணனித்³தே³ஸோ ஏகூனவீஸதிமோ.

    Dhammanānattañāṇaniddeso ekūnavīsatimo.







    Related texts:



    அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 19. த⁴ம்மனானத்தஞாணனித்³தே³ஸவண்ணனா • 19. Dhammanānattañāṇaniddesavaṇṇanā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact