| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ಧಮ್ಮಞ್ಞೂಸುತ್ತಂ
4. Dhammaññūsuttaṃ
೬೮. ‘‘ಸತ್ತಹಿ, ಭಿಕ್ಖವೇ, ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಆಹುನೇಯ್ಯೋ ಹೋತಿ …ಪೇ॰… ಅನುತ್ತರಂ ಪುಞ್ಞಕ್ಖೇತ್ತಂ ಲೋಕಸ್ಸ। ಕತಮೇಹಿ ಸತ್ತಹಿ? ಇಧ, ಭಿಕ್ಖವೇ, ಭಿಕ್ಖು ಧಮ್ಮಞ್ಞೂ ಚ ಹೋತಿ ಅತ್ಥಞ್ಞೂ ಚ ಅತ್ತಞ್ಞೂ ಚ ಮತ್ತಞ್ಞೂ ಚ ಕಾಲಞ್ಞೂ ಚ ಪರಿಸಞ್ಞೂ ಚ ಪುಗ್ಗಲಪರೋಪರಞ್ಞೂ ಚ।
68. ‘‘Sattahi, bhikkhave, dhammehi samannāgato bhikkhu āhuneyyo hoti …pe… anuttaraṃ puññakkhettaṃ lokassa. Katamehi sattahi? Idha, bhikkhave, bhikkhu dhammaññū ca hoti atthaññū ca attaññū ca mattaññū ca kālaññū ca parisaññū ca puggalaparoparaññū ca.
‘‘ಕಥಞ್ಚ, ಭಿಕ್ಖವೇ, ಭಿಕ್ಖು ಧಮ್ಮಞ್ಞೂ ಹೋತಿ? ಇಧ, ಭಿಕ್ಖವೇ, ಭಿಕ್ಖು ಧಮ್ಮಂ ಜಾನಾತಿ – ಸುತ್ತಂ ಗೇಯ್ಯಂ ವೇಯ್ಯಾಕರಣಂ ಗಾಥಂ ಉದಾನಂ ಇತಿವುತ್ತಕಂ ಜಾತಕಂ ಅಬ್ಭುತಧಮ್ಮಂ ವೇದಲ್ಲಂ। ನೋ ಚೇ, ಭಿಕ್ಖವೇ, ಭಿಕ್ಖು ಧಮ್ಮಂ ಜಾನೇಯ್ಯ – ಸುತ್ತಂ ಗೇಯ್ಯಂ…ಪೇ॰… ಅಬ್ಭುತಧಮ್ಮಂ ವೇದಲ್ಲಂ, ನಯಿಧ ‘ಧಮ್ಮಞ್ಞೂ’ತಿ ವುಚ್ಚೇಯ್ಯ। ಯಸ್ಮಾ ಚ ಖೋ, ಭಿಕ್ಖವೇ, ಭಿಕ್ಖು ಧಮ್ಮಂ ಜಾನಾತಿ – ಸುತ್ತಂ ಗೇಯ್ಯಂ…ಪೇ॰… ಅಬ್ಭುತಧಮ್ಮಂ ವೇದಲ್ಲಂ, ತಸ್ಮಾ ‘ಧಮ್ಮಞ್ಞೂ’ತಿ ವುಚ್ಚತಿ। ಇತಿ ಧಮ್ಮಞ್ಞೂ।
‘‘Kathañca, bhikkhave, bhikkhu dhammaññū hoti? Idha, bhikkhave, bhikkhu dhammaṃ jānāti – suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. No ce, bhikkhave, bhikkhu dhammaṃ jāneyya – suttaṃ geyyaṃ…pe… abbhutadhammaṃ vedallaṃ, nayidha ‘dhammaññū’ti vucceyya. Yasmā ca kho, bhikkhave, bhikkhu dhammaṃ jānāti – suttaṃ geyyaṃ…pe… abbhutadhammaṃ vedallaṃ, tasmā ‘dhammaññū’ti vuccati. Iti dhammaññū.
‘‘ಅತ್ಥಞ್ಞೂ ಚ ಕಥಂ ಹೋತಿ? ಇಧ, ಭಿಕ್ಖವೇ, ಭಿಕ್ಖು ತಸ್ಸ ತಸ್ಸೇವ ಭಾಸಿತಸ್ಸ ಅತ್ಥಂ ಜಾನಾತಿ – ‘ಅಯಂ ಇಮಸ್ಸ ಭಾಸಿತಸ್ಸ ಅತ್ಥೋ, ಅಯಂ ಇಮಸ್ಸ ಭಾಸಿತಸ್ಸ ಅತ್ಥೋ’ತಿ। ನೋ ಚೇ, ಭಿಕ್ಖವೇ, ಭಿಕ್ಖು ತಸ್ಸ ತಸ್ಸೇವ ಭಾಸಿತಸ್ಸ ಅತ್ಥಂ ಜಾನೇಯ್ಯ – ‘ಅಯಂ ಇಮಸ್ಸ ಭಾಸಿತಸ್ಸ ಅತ್ಥೋ, ಅಯಂ ಇಮಸ್ಸ ಭಾಸಿತಸ್ಸ ಅತ್ಥೋ’ತಿ, ನಯಿಧ ‘ಅತ್ಥಞ್ಞೂ’ತಿ ವುಚ್ಚೇಯ್ಯ। ಯಸ್ಮಾ ಚ ಖೋ, ಭಿಕ್ಖವೇ, ಭಿಕ್ಖು ತಸ್ಸ ತಸ್ಸೇವ ಭಾಸಿತಸ್ಸ ಅತ್ಥಂ ಜಾನಾತಿ – ‘ಅಯಂ ಇಮಸ್ಸ ಭಾಸಿತಸ್ಸ ಅತ್ಥೋ, ಅಯಂ ಇಮಸ್ಸ ಭಾಸಿತಸ್ಸ ಅತ್ಥೋ’ತಿ, ತಸ್ಮಾ ‘ಅತ್ಥಞ್ಞೂ’ತಿ ವುಚ್ಚತಿ। ಇತಿ ಧಮ್ಮಞ್ಞೂ, ಅತ್ಥಞ್ಞೂ।
‘‘Atthaññū ca kathaṃ hoti? Idha, bhikkhave, bhikkhu tassa tasseva bhāsitassa atthaṃ jānāti – ‘ayaṃ imassa bhāsitassa attho, ayaṃ imassa bhāsitassa attho’ti. No ce, bhikkhave, bhikkhu tassa tasseva bhāsitassa atthaṃ jāneyya – ‘ayaṃ imassa bhāsitassa attho, ayaṃ imassa bhāsitassa attho’ti, nayidha ‘atthaññū’ti vucceyya. Yasmā ca kho, bhikkhave, bhikkhu tassa tasseva bhāsitassa atthaṃ jānāti – ‘ayaṃ imassa bhāsitassa attho, ayaṃ imassa bhāsitassa attho’ti, tasmā ‘atthaññū’ti vuccati. Iti dhammaññū, atthaññū.
‘‘ಅತ್ತಞ್ಞೂ ಚ ಕಥಂ ಹೋತಿ? ಇಧ, ಭಿಕ್ಖವೇ, ಭಿಕ್ಖು ಅತ್ತಾನಂ ಜಾನಾತಿ – ‘ಏತ್ತಕೋಮ್ಹಿ ಸದ್ಧಾಯ ಸೀಲೇನ ಸುತೇನ ಚಾಗೇನ ಪಞ್ಞಾಯ ಪಟಿಭಾನೇನಾ’ತಿ। ನೋ ಚೇ, ಭಿಕ್ಖವೇ, ಭಿಕ್ಖು ಅತ್ತಾನಂ ಜಾನೇಯ್ಯ – ‘ಏತ್ತಕೋಮ್ಹಿ ಸದ್ಧಾಯ ಸೀಲೇನ ಸುತೇನ ಚಾಗೇನ ಪಞ್ಞಾಯ ಪಟಿಭಾನೇನಾ’ತಿ, ನಯಿಧ ‘ಅತ್ತಞ್ಞೂ’ತಿ ವುಚ್ಚೇಯ್ಯ। ಯಸ್ಮಾ ಚ, ಭಿಕ್ಖವೇ , ಭಿಕ್ಖು ಅತ್ತಾನಂ ಜಾನಾತಿ – ‘ಏತ್ತಕೋಮ್ಹಿ ಸದ್ಧಾಯ ಸೀಲೇನ ಸುತೇನ ಚಾಗೇನ ಪಞ್ಞಾಯ ಪಟಿಭಾನೇನಾ’ತಿ, ತಸ್ಮಾ ‘ಅತ್ತಞ್ಞೂ’ತಿ ವುಚ್ಚತಿ। ಇತಿ ಧಮ್ಮಞ್ಞೂ, ಅತ್ಥಞ್ಞೂ, ಅತ್ತಞ್ಞೂ।
‘‘Attaññū ca kathaṃ hoti? Idha, bhikkhave, bhikkhu attānaṃ jānāti – ‘ettakomhi saddhāya sīlena sutena cāgena paññāya paṭibhānenā’ti. No ce, bhikkhave, bhikkhu attānaṃ jāneyya – ‘ettakomhi saddhāya sīlena sutena cāgena paññāya paṭibhānenā’ti, nayidha ‘attaññū’ti vucceyya. Yasmā ca, bhikkhave , bhikkhu attānaṃ jānāti – ‘ettakomhi saddhāya sīlena sutena cāgena paññāya paṭibhānenā’ti, tasmā ‘attaññū’ti vuccati. Iti dhammaññū, atthaññū, attaññū.
‘‘ಮತ್ತಞ್ಞೂ ಚ ಕಥಂ ಹೋತಿ? ಇಧ, ಭಿಕ್ಖವೇ, ಭಿಕ್ಖು ಮತ್ತಂ ಜಾನಾತಿ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರಾನಂ ಪಟಿಗ್ಗಹಣಾಯ। ನೋ ಚೇ, ಭಿಕ್ಖವೇ, ಭಿಕ್ಖು ಮತ್ತಂ ಜಾನೇಯ್ಯ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರಾನಂ ಪಟಿಗ್ಗಹಣಾಯ, ನಯಿಧ ‘ಮತ್ತಞ್ಞೂ’ತಿ ವುಚ್ಚೇಯ್ಯ। ಯಸ್ಮಾ ಚ ಖೋ, ಭಿಕ್ಖವೇ, ಭಿಕ್ಖು ಮತ್ತಂ ಜಾನಾತಿ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರಾನಂ ಪಟಿಗ್ಗಹಣಾಯ, ತಸ್ಮಾ ‘ಮತ್ತಞ್ಞೂ’ತಿ ವುಚ್ಚತಿ। ಇತಿ ಧಮ್ಮಞ್ಞೂ, ಅತ್ಥಞ್ಞೂ, ಅತ್ತಞ್ಞೂ, ಮತ್ತಞ್ಞೂ।
‘‘Mattaññū ca kathaṃ hoti? Idha, bhikkhave, bhikkhu mattaṃ jānāti cīvarapiṇḍapātasenāsanagilānappaccayabhesajjaparikkhārānaṃ paṭiggahaṇāya. No ce, bhikkhave, bhikkhu mattaṃ jāneyya cīvarapiṇḍapātasenāsanagilānappaccayabhesajjaparikkhārānaṃ paṭiggahaṇāya, nayidha ‘mattaññū’ti vucceyya. Yasmā ca kho, bhikkhave, bhikkhu mattaṃ jānāti cīvarapiṇḍapātasenāsanagilānappaccayabhesajjaparikkhārānaṃ paṭiggahaṇāya, tasmā ‘mattaññū’ti vuccati. Iti dhammaññū, atthaññū, attaññū, mattaññū.
‘‘ಕಾಲಞ್ಞೂ ಚ ಕಥಂ ಹೋತಿ? ಇಧ, ಭಿಕ್ಖವೇ, ಭಿಕ್ಖು, ಕಾಲಂ ಜಾನಾತಿ – ‘ಅಯಂ ಕಾಲೋ ಉದ್ದೇಸಸ್ಸ, ಅಯಂ ಕಾಲೋ ಪರಿಪುಚ್ಛಾಯ, ಅಯಂ ಕಾಲೋ ಯೋಗಸ್ಸ, ಅಯಂ ಕಾಲೋ ಪಟಿಸಲ್ಲಾನಸ್ಸಾ’ತಿ। ನೋ ಚೇ, ಭಿಕ್ಖವೇ, ಭಿಕ್ಖು ಕಾಲಂ ಜಾನೇಯ್ಯ – ‘ಅಯಂ ಕಾಲೋ ಉದ್ದೇಸಸ್ಸ, ಅಯಂ ಕಾಲೋ ಪರಿಪುಚ್ಛಾಯ, ಅಯಂ ಕಾಲೋ ಯೋಗಸ್ಸ, ಅಯಂ ಕಾಲೋ ಪಟಿಸಲ್ಲಾನಸ್ಸಾ’ತಿ, ನಯಿಧ ‘ಕಾಲಞ್ಞೂ’ತಿ ವುಚ್ಚೇಯ್ಯ। ಯಸ್ಮಾ ಚ ಖೋ, ಭಿಕ್ಖವೇ, ಭಿಕ್ಖು ಕಾಲಂ ಜಾನಾತಿ – ‘ಅಯಂ ಕಾಲೋ ಉದ್ದೇಸಸ್ಸ, ಅಯಂ ಕಾಲೋ ಪರಿಪುಚ್ಛಾಯ, ಅಯಂ ಕಾಲೋ ಯೋಗಸ್ಸ, ಅಯಂ ಕಾಲೋ ಪಟಿಸಲ್ಲಾನಸ್ಸಾ’ತಿ, ತಸ್ಮಾ ‘ಕಾಲಞ್ಞೂ’ತಿ ವುಚ್ಚತಿ। ಇತಿ ಧಮ್ಮಞ್ಞೂ, ಅತ್ಥಞ್ಞೂ, ಅತ್ತಞ್ಞೂ, ಮತ್ತಞ್ಞೂ, ಕಾಲಞ್ಞೂ।
‘‘Kālaññū ca kathaṃ hoti? Idha, bhikkhave, bhikkhu, kālaṃ jānāti – ‘ayaṃ kālo uddesassa, ayaṃ kālo paripucchāya, ayaṃ kālo yogassa, ayaṃ kālo paṭisallānassā’ti. No ce, bhikkhave, bhikkhu kālaṃ jāneyya – ‘ayaṃ kālo uddesassa, ayaṃ kālo paripucchāya, ayaṃ kālo yogassa, ayaṃ kālo paṭisallānassā’ti, nayidha ‘kālaññū’ti vucceyya. Yasmā ca kho, bhikkhave, bhikkhu kālaṃ jānāti – ‘ayaṃ kālo uddesassa, ayaṃ kālo paripucchāya, ayaṃ kālo yogassa, ayaṃ kālo paṭisallānassā’ti, tasmā ‘kālaññū’ti vuccati. Iti dhammaññū, atthaññū, attaññū, mattaññū, kālaññū.
‘‘ಪರಿಸಞ್ಞೂ ಚ ಕಥಂ ಹೋತಿ? ಇಧ, ಭಿಕ್ಖವೇ, ಭಿಕ್ಖು ಪರಿಸಂ ಜಾನಾತಿ – ‘ಅಯಂ ಖತ್ತಿಯಪರಿಸಾ, ಅಯಂ ಬ್ರಾಹ್ಮಣಪರಿಸಾ, ಅಯಂ ಗಹಪತಿಪರಿಸಾ, ಅಯಂ ಸಮಣಪರಿಸಾ। ತತ್ಥ ಏವಂ ಉಪಸಙ್ಕಮಿತಬ್ಬಂ, ಏವಂ ಠಾತಬ್ಬಂ , ಏವಂ ಕತ್ತಬ್ಬಂ, ಏವಂ ನಿಸೀದಿತಬ್ಬಂ, ಏವಂ ಭಾಸಿತಬ್ಬಂ, ಏವಂ ತುಣ್ಹೀ ಭವಿತಬ್ಬ’ನ್ತಿ। ನೋ ಚೇ, ಭಿಕ್ಖವೇ, ಭಿಕ್ಖು ಪರಿಸಂ ಜಾನೇಯ್ಯ – ‘ಅಯಂ ಖತ್ತಿಯಪರಿಸಾ…ಪೇ॰… ಏವಂ ತುಣ್ಹೀ ಭವಿತಬ್ಬ’ನ್ತಿ, ನಯಿಧ ‘ಪರಿಸಞ್ಞೂ’ತಿ ವುಚ್ಚೇಯ್ಯ। ಯಸ್ಮಾ ಚ ಖೋ, ಭಿಕ್ಖವೇ, ಭಿಕ್ಖು ಪರಿಸಂ ಜಾನಾತಿ – ‘ಅಯಂ ಖತ್ತಿಯಪರಿಸಾ, ಅಯಂ ಬ್ರಾಹ್ಮಣಪರಿಸಾ, ಅಯಂ ಗಹಪತಿಪರಿಸಾ, ಅಯಂ ಸಮಣಪರಿಸಾ । ತತ್ಥ ಏವಂ ಉಪಸಙ್ಕಮಿತಬ್ಬಂ, ಏವಂ ಠಾತಬ್ಬಂ, ಏವಂ ಕತ್ತಬ್ಬಂ, ಏವಂ ನಿಸೀದಿತಬ್ಬಂ, ಏವಂ ಭಾಸಿತಬ್ಬಂ, ಏವಂ ತುಣ್ಹೀ ಭವಿತಬ್ಬ’ನ್ತಿ, ತಸ್ಮಾ ‘ಪರಿಸಞ್ಞೂ’ತಿ ವುಚ್ಚತಿ। ಇತಿ ಧಮ್ಮಞ್ಞೂ, ಅತ್ಥಞ್ಞೂ, ಅತ್ತಞ್ಞೂ, ಮತ್ತಞ್ಞೂ, ಕಾಲಞ್ಞೂ, ಪರಿಸಞ್ಞೂ।
‘‘Parisaññū ca kathaṃ hoti? Idha, bhikkhave, bhikkhu parisaṃ jānāti – ‘ayaṃ khattiyaparisā, ayaṃ brāhmaṇaparisā, ayaṃ gahapatiparisā, ayaṃ samaṇaparisā. Tattha evaṃ upasaṅkamitabbaṃ, evaṃ ṭhātabbaṃ , evaṃ kattabbaṃ, evaṃ nisīditabbaṃ, evaṃ bhāsitabbaṃ, evaṃ tuṇhī bhavitabba’nti. No ce, bhikkhave, bhikkhu parisaṃ jāneyya – ‘ayaṃ khattiyaparisā…pe… evaṃ tuṇhī bhavitabba’nti, nayidha ‘parisaññū’ti vucceyya. Yasmā ca kho, bhikkhave, bhikkhu parisaṃ jānāti – ‘ayaṃ khattiyaparisā, ayaṃ brāhmaṇaparisā, ayaṃ gahapatiparisā, ayaṃ samaṇaparisā . Tattha evaṃ upasaṅkamitabbaṃ, evaṃ ṭhātabbaṃ, evaṃ kattabbaṃ, evaṃ nisīditabbaṃ, evaṃ bhāsitabbaṃ, evaṃ tuṇhī bhavitabba’nti, tasmā ‘parisaññū’ti vuccati. Iti dhammaññū, atthaññū, attaññū, mattaññū, kālaññū, parisaññū.
‘‘ಪುಗ್ಗಲಪರೋಪರಞ್ಞೂ ಚ ಕಥಂ ಹೋತಿ? ಇಧ, ಭಿಕ್ಖವೇ, ಭಿಕ್ಖುನೋ 1 ದ್ವಯೇನ ಪುಗ್ಗಲಾ ವಿದಿತಾ ಹೋನ್ತಿ। ದ್ವೇ ಪುಗ್ಗಲಾ – ಏಕೋ ಅರಿಯಾನಂ ದಸ್ಸನಕಾಮೋ, ಏಕೋ ಅರಿಯಾನಂ ನ ದಸ್ಸನಕಾಮೋ। ಯ್ವಾಯಂ ಪುಗ್ಗಲೋ ಅರಿಯಾನಂ ನ ದಸ್ಸನಕಾಮೋ , ಏವಂ ಸೋ ತೇನಙ್ಗೇನ ಗಾರಯ್ಹೋ। ಯ್ವಾಯಂ ಪುಗ್ಗಲೋ ಅರಿಯಾನಂ ದಸ್ಸನಕಾಮೋ, ಏವಂ ಸೋ ತೇನಙ್ಗೇನ ಪಾಸಂಸೋ।
‘‘Puggalaparoparaññū ca kathaṃ hoti? Idha, bhikkhave, bhikkhuno 2 dvayena puggalā viditā honti. Dve puggalā – eko ariyānaṃ dassanakāmo, eko ariyānaṃ na dassanakāmo. Yvāyaṃ puggalo ariyānaṃ na dassanakāmo , evaṃ so tenaṅgena gārayho. Yvāyaṃ puggalo ariyānaṃ dassanakāmo, evaṃ so tenaṅgena pāsaṃso.
‘‘ದ್ವೇ ಪುಗ್ಗಲಾ ಅರಿಯಾನಂ ದಸ್ಸನಕಾಮಾ – ಏಕೋ ಸದ್ಧಮ್ಮಂ ಸೋತುಕಾಮೋ, ಏಕೋ ಸದ್ಧಮ್ಮಂ ನ ಸೋತುಕಾಮೋ। ಯ್ವಾಯಂ ಪುಗ್ಗಲೋ ಸದ್ಧಮ್ಮಂ ನ ಸೋತುಕಾಮೋ, ಏವಂ ಸೋ ತೇನಙ್ಗೇನ ಗಾರಯ್ಹೋ। ಯ್ವಾಯಂ ಪುಗ್ಗಲೋ ಸದ್ಧಮ್ಮಂ ಸೋತುಕಾಮೋ, ಏವಂ ಸೋ ತೇನಙ್ಗೇನ ಪಾಸಂಸೋ।
‘‘Dve puggalā ariyānaṃ dassanakāmā – eko saddhammaṃ sotukāmo, eko saddhammaṃ na sotukāmo. Yvāyaṃ puggalo saddhammaṃ na sotukāmo, evaṃ so tenaṅgena gārayho. Yvāyaṃ puggalo saddhammaṃ sotukāmo, evaṃ so tenaṅgena pāsaṃso.
‘‘ದ್ವೇ ಪುಗ್ಗಲಾ ಸದ್ಧಮ್ಮಂ ಸೋತುಕಾಮಾ – ಏಕೋ ಓಹಿತಸೋತೋ ಧಮ್ಮಂ ಸುಣಾತಿ, ಏಕೋ ಅನೋಹಿತಸೋತೋ ಧಮ್ಮಂ ಸುಣಾತಿ। ಯ್ವಾಯಂ ಪುಗ್ಗಲೋ ಅನೋಹಿತಸೋತೋ ಧಮ್ಮಂ ಸುಣಾತಿ, ಏವಂ ಸೋ ತೇನಙ್ಗೇನ ಗಾರಯ್ಹೋ। ಯ್ವಾಯಂ ಪುಗ್ಗಲೋ ಓಹಿತಸೋತೋ ಧಮ್ಮಂ ಸುಣಾತಿ, ಏವಂ ಸೋ ತೇನಙ್ಗೇನ ಪಾಸಂಸೋ।
‘‘Dve puggalā saddhammaṃ sotukāmā – eko ohitasoto dhammaṃ suṇāti, eko anohitasoto dhammaṃ suṇāti. Yvāyaṃ puggalo anohitasoto dhammaṃ suṇāti, evaṃ so tenaṅgena gārayho. Yvāyaṃ puggalo ohitasoto dhammaṃ suṇāti, evaṃ so tenaṅgena pāsaṃso.
‘‘ದ್ವೇ ಪುಗ್ಗಲಾ ಓಹಿತಸೋತಾ ಧಮ್ಮಂ ಸುಣನ್ತಿ 3 – ಏಕೋ ಸುತ್ವಾ ಧಮ್ಮಂ ಧಾರೇತಿ, ಏಕೋ ಸುತ್ವಾ ಧಮ್ಮಂ ನ ಧಾರೇತಿ। ಯ್ವಾಯಂ ಪುಗ್ಗಲೋ ಸುತ್ವಾ ನ ಧಮ್ಮಂ ಧಾರೇತಿ, ಏವಂ ಸೋ ತೇನಙ್ಗೇನ ಗಾರಯ್ಹೋ। ಯ್ವಾಯಂ ಪುಗ್ಗಲೋ ಸುತ್ವಾ ಧಮ್ಮಂ ಧಾರೇತಿ, ಏವಂ ಸೋ ತೇನಙ್ಗೇನ ಪಾಸಂಸೋ।
‘‘Dve puggalā ohitasotā dhammaṃ suṇanti 4 – eko sutvā dhammaṃ dhāreti, eko sutvā dhammaṃ na dhāreti. Yvāyaṃ puggalo sutvā na dhammaṃ dhāreti, evaṃ so tenaṅgena gārayho. Yvāyaṃ puggalo sutvā dhammaṃ dhāreti, evaṃ so tenaṅgena pāsaṃso.
‘‘ದ್ವೇ ಪುಗ್ಗಲಾ ಸುತ್ವಾ ಧಮ್ಮಂ ಧಾರೇನ್ತಿ 5 – ಏಕೋ ಧಾತಾನಂ 6 ಧಮ್ಮಾನಂ ಅತ್ಥಂ ಉಪಪರಿಕ್ಖತಿ, ಏಕೋ ಧಾತಾನಂ ಧಮ್ಮಾನಂ ಅತ್ಥಂ ನ ಉಪಪರಿಕ್ಖತಿ। ಯ್ವಾಯಂ ಪುಗ್ಗಲೋ ಧಾತಾನಂ ಧಮ್ಮಾನಂ ಅತ್ಥಂ ನ ಉಪಪರಿಕ್ಖತಿ, ಏವಂ ಸೋ ತೇನಙ್ಗೇನ ಗಾರಯ್ಹೋ। ಯ್ವಾಯಂ ಪುಗ್ಗಲೋ ಧಾತಾನಂ ಧಮ್ಮಾನಂ ಅತ್ಥಂ ಉಪಪರಿಕ್ಖತಿ, ಏವಂ ಸೋ ತೇನಙ್ಗೇನ ಪಾಸಂಸೋ।
‘‘Dve puggalā sutvā dhammaṃ dhārenti 7 – eko dhātānaṃ 8 dhammānaṃ atthaṃ upaparikkhati, eko dhātānaṃ dhammānaṃ atthaṃ na upaparikkhati. Yvāyaṃ puggalo dhātānaṃ dhammānaṃ atthaṃ na upaparikkhati, evaṃ so tenaṅgena gārayho. Yvāyaṃ puggalo dhātānaṃ dhammānaṃ atthaṃ upaparikkhati, evaṃ so tenaṅgena pāsaṃso.
‘‘ದ್ವೇ ಪುಗ್ಗಲಾ ಧಾತಾನಂ ಧಮ್ಮಾನಂ ಅತ್ಥಂ ಉಪಪರಿಕ್ಖನ್ತಿ 9 – ಏಕೋ ಅತ್ಥಮಞ್ಞಾಯ ಧಮ್ಮಮಞ್ಞಾಯ ಧಮ್ಮಾನುಧಮ್ಮಪ್ಪಟಿಪನ್ನೋ, ಏಕೋ ಅತ್ಥಮಞ್ಞಾಯ ಧಮ್ಮಮಞ್ಞಾಯ ನ ಧಮ್ಮಾನುಧಮ್ಮಪ್ಪಟಿಪನ್ನೋ। ಯ್ವಾಯಂ ಪುಗ್ಗಲೋ ಅತ್ಥಮಞ್ಞಾಯ ಧಮ್ಮಮಞ್ಞಾಯ ನ ಧಮ್ಮಾನುಧಮ್ಮಪ್ಪಟಿಪನ್ನೋ, ಏವಂ ಸೋ ತೇನಙ್ಗೇನ ಗಾರಯ್ಹೋ। ಯ್ವಾಯಂ ಪುಗ್ಗಲೋ ಅತ್ಥಮಞ್ಞಾಯ ಧಮ್ಮಮಞ್ಞಾಯ ಧಮ್ಮಾನುಧಮ್ಮಪ್ಪಟಿಪನ್ನೋ, ಏವಂ ಸೋ ತೇನಙ್ಗೇನ ಪಾಸಂಸೋ।
‘‘Dve puggalā dhātānaṃ dhammānaṃ atthaṃ upaparikkhanti 10 – eko atthamaññāya dhammamaññāya dhammānudhammappaṭipanno, eko atthamaññāya dhammamaññāya na dhammānudhammappaṭipanno. Yvāyaṃ puggalo atthamaññāya dhammamaññāya na dhammānudhammappaṭipanno, evaṃ so tenaṅgena gārayho. Yvāyaṃ puggalo atthamaññāya dhammamaññāya dhammānudhammappaṭipanno, evaṃ so tenaṅgena pāsaṃso.
‘‘ದ್ವೇ ಪುಗ್ಗಲಾ ಅತ್ಥಮಞ್ಞಾಯ ಧಮ್ಮಮಞ್ಞಾಯ ಧಮ್ಮಾನುಧಮ್ಮಪ್ಪಟಿಪನ್ನಾ – ಏಕೋ ಅತ್ತಹಿತಾಯ ಪಟಿಪನ್ನೋ ನೋ ಪರಹಿತಾಯ, ಏಕೋ ಅತ್ತಹಿತಾಯ ಚ ಪಟಿಪನ್ನೋ ಪರಹಿತಾಯ ಚ। ಯ್ವಾಯಂ ಪುಗ್ಗಲೋ ಅತ್ತಹಿತಾಯ ಪಟಿಪನ್ನೋ ನೋ ಪರಹಿತಾಯ, ಏವಂ ಸೋ ತೇನಙ್ಗೇನ ಗಾರಯ್ಹೋ। ಯ್ವಾಯಂ ಪುಗ್ಗಲೋ ಅತ್ಥಹಿತಾಯ ಚ ಪಟಿಪನ್ನೋ ಪರಹಿತಾಯ ಚ, ಏವಂ ಸೋ ತೇನಙ್ಗೇನ ಪಾಸಂಸೋ। ಏವಂ ಖೋ, ಭಿಕ್ಖವೇ, ಭಿಕ್ಖುನೋ 11 ದ್ವಯೇನ ಪುಗ್ಗಲಾ ವಿದಿತಾ ಹೋನ್ತಿ। ಏವಂ, ಭಿಕ್ಖವೇ, ಭಿಕ್ಖು ಪುಗ್ಗಲಪರೋಪರಞ್ಞೂ ಹೋತಿ। ‘‘ಇಮೇಹಿ ಖೋ, ಭಿಕ್ಖವೇ, ಸತ್ತಹಿ ಧಮ್ಮೇಹಿ ಸಮನ್ನಾಗತೋ ಭಿಕ್ಖು ಆಹುನೇಯ್ಯೋ ಹೋತಿ ಪಾಹುನೇಯ್ಯೋ…ಪೇ॰… ಅನುತ್ತರಂ ಪುಞ್ಞಕ್ಖೇತ್ತಂ ಲೋಕಸ್ಸಾ’’ತಿ। ಚತುತ್ಥಂ।
‘‘Dve puggalā atthamaññāya dhammamaññāya dhammānudhammappaṭipannā – eko attahitāya paṭipanno no parahitāya, eko attahitāya ca paṭipanno parahitāya ca. Yvāyaṃ puggalo attahitāya paṭipanno no parahitāya, evaṃ so tenaṅgena gārayho. Yvāyaṃ puggalo atthahitāya ca paṭipanno parahitāya ca, evaṃ so tenaṅgena pāsaṃso. Evaṃ kho, bhikkhave, bhikkhuno 12 dvayena puggalā viditā honti. Evaṃ, bhikkhave, bhikkhu puggalaparoparaññū hoti. ‘‘Imehi kho, bhikkhave, sattahi dhammehi samannāgato bhikkhu āhuneyyo hoti pāhuneyyo…pe… anuttaraṃ puññakkhettaṃ lokassā’’ti. Catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ಧಮ್ಮಞ್ಞೂಸುತ್ತವಣ್ಣನಾ • 4. Dhammaññūsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೪. ಧಮ್ಮಞ್ಞೂಸುತ್ತವಣ್ಣನಾ • 4. Dhammaññūsuttavaṇṇanā
