| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
8. த⁴ம்மஸுத்த-(நாவாஸுத்த)-வண்ணனா
8. Dhammasutta-(nāvāsutta)-vaṇṇanā
319. யஸ்மா ஹி த⁴ம்மந்தி த⁴ம்மஸுத்தங், ‘‘நாவாஸுத்த’’ந்திபி வுச்சதி. கா உப்பத்தி? இத³ங் ஸுத்தங் ஆயஸ்மந்தங் ஸாரிபுத்தத்தே²ரங் ஆரப்³ப⁴ வுத்தங். அயமெத்த² ஸங்கே²போ, வித்தா²ரோ பன த்³வின்னங் அக்³க³ஸாவகானங் உப்பத்திதோ பபு⁴தி வேதி³தப்³போ³. ஸெய்யதி²த³ங் – அனுப்பன்னே கிர ப⁴க³வதி த்³வே அக்³க³ஸாவகா ஏகங் அஸங்க்²யெய்யங் கப்பஸதஸஹஸ்ஸஞ்ச பாரமியோ பூரெத்வா தே³வலோகே நிப்³ப³த்தா. தேஸங் பட²மோ சவித்வா ராஜக³ஹஸ்ஸ அவிதூ³ரே உபதிஸ்ஸகா³மோ நாம ப்³ராஹ்மணானங் போ⁴க³கா³மோ அத்தி², தத்த² ஸட்டி²அதி⁴கபஞ்சகோடிஸதத⁴னவிப⁴வஸ்ஸ கா³மஸாமினோ ப்³ராஹ்மணஸ்ஸ ரூபஸாரீ நாம ப்³ராஹ்மணீ, தஸ்ஸா குச்சி²யங் படிஸந்தி⁴ங் அக்³க³ஹேஸி. து³தியோ தஸ்ஸேவாவிதூ³ரே கோலிதகா³மோ நாம ப்³ராஹ்மணானங் போ⁴க³கா³மோ அத்தி². தத்த² ததா²ரூபவிப⁴வஸ்ஸேவ கா³மஸாமினோ ப்³ராஹ்மணஸ்ஸ மொக்³க³ல்லானீ நாம ப்³ராஹ்மணீ, தஸ்ஸா குச்சி²யங் தங் தி³வஸமேவ படிஸந்தி⁴ங் அக்³க³ஹேஸி. ஏவங் தேஸங் ஏகதி³வஸமேவ படிஸந்தி⁴க்³க³ஹணஞ்ச க³ப்³ப⁴வுட்டா²னஞ்ச அஹோஸி. ஏகதி³வஸேயேவ ச நேஸங் ஏகஸ்ஸ உபதிஸ்ஸகா³மே ஜாதத்தா உபதிஸ்ஸோ, ஏகஸ்ஸ கோலிதகா³மே ஜாதத்தா கோலிதோதி நாமமகங்ஸு.
319.Yasmāhi dhammanti dhammasuttaṃ, ‘‘nāvāsutta’’ntipi vuccati. Kā uppatti? Idaṃ suttaṃ āyasmantaṃ sāriputtattheraṃ ārabbha vuttaṃ. Ayamettha saṅkhepo, vitthāro pana dvinnaṃ aggasāvakānaṃ uppattito pabhuti veditabbo. Seyyathidaṃ – anuppanne kira bhagavati dve aggasāvakā ekaṃ asaṅkhyeyyaṃ kappasatasahassañca pāramiyo pūretvā devaloke nibbattā. Tesaṃ paṭhamo cavitvā rājagahassa avidūre upatissagāmo nāma brāhmaṇānaṃ bhogagāmo atthi, tattha saṭṭhiadhikapañcakoṭisatadhanavibhavassa gāmasāmino brāhmaṇassa rūpasārī nāma brāhmaṇī, tassā kucchiyaṃ paṭisandhiṃ aggahesi. Dutiyo tassevāvidūre kolitagāmo nāma brāhmaṇānaṃ bhogagāmo atthi. Tattha tathārūpavibhavasseva gāmasāmino brāhmaṇassa moggallānī nāma brāhmaṇī, tassā kucchiyaṃ taṃ divasameva paṭisandhiṃ aggahesi. Evaṃ tesaṃ ekadivasameva paṭisandhiggahaṇañca gabbhavuṭṭhānañca ahosi. Ekadivaseyeva ca nesaṃ ekassa upatissagāme jātattā upatisso, ekassa kolitagāme jātattā kolitoti nāmamakaṃsu.
தே ஸஹபங்ஸுங் கீளந்தா ஸஹாயகா அனுபுப்³பே³ன வுட்³டி⁴ங் பாபுணிங்ஸு, ஏகமேகஸ்ஸ ச பஞ்சபஞ்சமாணவகஸதானி பரிவாரா அஹேஸுங். தே உய்யானங் வா நதீ³தித்த²ங் வா க³ச்ச²ந்தா ஸபரிவாராயேவ க³ச்ச²ந்தி. ஏகோ பஞ்சஹி ஸுவண்ணஸிவிகாஸதேஹி, து³தியோ பஞ்சஹி ஆஜஞ்ஞரத²ஸதேஹி. ததா³ ச ராஜக³ஹே காலானுகாலங் கி³ரக்³க³ஸமஜ்ஜோ நாம ஹோதி. ஸாயன்ஹஸமயே நக³ரவேமஜ்ஜே² யத்த² ஸகலஅங்க³மக³த⁴வாஸினோ அபி⁴ஞ்ஞாதா க²த்தியகுமாராத³யோ ஸன்னிபதித்வா ஸுபஞ்ஞத்தேஸு மஞ்சபீடா²தீ³ஸு நிஸின்னா ஸமஜ்ஜவிபூ⁴திங் பஸ்ஸந்தி. அத² தே ஸஹாயகா தேன பரிவாரேன ஸத்³தி⁴ங் தத்த² க³ந்த்வா பஞ்ஞத்தாஸனேஸு நிஸீதி³ங்ஸு. ததோ உபதிஸ்ஸோ ஸமஜ்ஜவிபூ⁴திங் பஸ்ஸந்தோ மஹாஜனகாயங் ஸன்னிபதிதங் தி³ஸ்வா ‘‘எத்தகோ ஜனகாயோ வஸ்ஸஸதங் அப்பத்வாவ மரிஸ்ஸதீ’’தி சிந்தேஸி. தஸ்ஸ மரணங் ஆக³ந்த்வா நலாடந்தே பதிட்டி²தங் விய அஹோஸி, ததா² கோலிதஸ்ஸ. தேஸங் அனேகப்பகாரேஸு நடேஸு நச்சந்தேஸு த³ஸ்ஸனமத்தேபி சித்தங் ந நமி, அஞ்ஞத³த்து² ஸங்வேகோ³யேவ உத³பாதி³.
Te sahapaṃsuṃ kīḷantā sahāyakā anupubbena vuḍḍhiṃ pāpuṇiṃsu, ekamekassa ca pañcapañcamāṇavakasatāni parivārā ahesuṃ. Te uyyānaṃ vā nadītitthaṃ vā gacchantā saparivārāyeva gacchanti. Eko pañcahi suvaṇṇasivikāsatehi, dutiyo pañcahi ājaññarathasatehi. Tadā ca rājagahe kālānukālaṃ giraggasamajjo nāma hoti. Sāyanhasamaye nagaravemajjhe yattha sakalaaṅgamagadhavāsino abhiññātā khattiyakumārādayo sannipatitvā supaññattesu mañcapīṭhādīsu nisinnā samajjavibhūtiṃ passanti. Atha te sahāyakā tena parivārena saddhiṃ tattha gantvā paññattāsanesu nisīdiṃsu. Tato upatisso samajjavibhūtiṃ passanto mahājanakāyaṃ sannipatitaṃ disvā ‘‘ettako janakāyo vassasataṃ appatvāva marissatī’’ti cintesi. Tassa maraṇaṃ āgantvā nalāṭante patiṭṭhitaṃ viya ahosi, tathā kolitassa. Tesaṃ anekappakāresu naṭesu naccantesu dassanamattepi cittaṃ na nami, aññadatthu saṃvegoyeva udapādi.
அத² வுட்டி²தே ஸமஜ்ஜே பக்கந்தாய பரிஸாய ஸகபரிவாரேன பக்கந்தேஸு தேஸு ஸஹாயேஸு கோலிதோ உபதிஸ்ஸங் புச்சி² – ‘‘கிங், ஸம்ம, நாடகாதி³த³ஸ்ஸனேன தவ பமோத³னமத்தம்பி நாஹோஸீ’’தி? ஸோ தஸ்ஸ தங் பவத்திங் ஆரோசெத்வா தம்பி ததே²வ படிபுச்சி². ஸோபி தஸ்ஸ அத்தனோ பவத்திங் ஆரோசெத்வா ‘‘ஏஹி, ஸம்ம, பப்³ப³ஜித்வா அமதங் க³வேஸாமா’’தி ஆஹ. ‘‘ஸாது⁴ ஸம்மா’’தி உபதிஸ்ஸோ தங் ஸம்படிச்சி². ததோ த்³வேபி ஜனா தங் ஸம்பத்திங் ச²ட்³டெ³த்வா புனதே³வ ராஜக³ஹமனுப்பத்தா. தேன ச ஸமயேன ராஜக³ஹே ஸஞ்சயோ நாம பரிப்³பா³ஜகோ படிவஸதி. தே தஸ்ஸ ஸந்திகே பஞ்சஹி மாணவகஸதேஹி ஸத்³தி⁴ங் பப்³ப³ஜித்வா கதிபாஹேனேவ தயோ வேதே³ ஸப்³ப³ஞ்ச பரிப்³பா³ஜகஸமயங் உக்³க³ஹேஸுங். தே தேஸங் ஸத்தா²னங் ஆதி³மஜ்ஜ²பரியோஸானங் உபபரிக்க²ந்தா பரியோஸானங் அதி³ஸ்வா ஆசரியங் புச்சி²ங்ஸு – ‘‘இமேஸங் ஸத்தா²னங் ஆதி³மஜ்ஜ²ங் தி³ஸ்ஸதி, பரியோஸானங் பன ந தி³ஸ்ஸதி ‘இத³ங் நாம இமேஹி ஸத்தே²ஹி பாபுணெய்யாதி, யதோ உத்தரி பாபுணிதப்³ப³ங் நத்தீ²’’’தி. ஸோபி ஆஹ – ‘‘அஹம்பி தேஸங் ததா²வித⁴ங் பரியோஸானங் ந பஸ்ஸாமீ’’தி. தே ஆஹங்ஸு – ‘‘தேன ஹி மயங் இமேஸங் பரியோஸானங் க³வேஸாமா’’தி. தே ஆசரியோ ‘‘யதா²ஸுக²ங் க³வேஸதா²’’தி ஆஹ. ஏவங் தே தேன அனுஞ்ஞாதா அமதங் க³வேஸமானா ஆஹிண்ட³ந்தா ஜம்பு³தீ³பே பாகடா அஹேஸுங். தேஹி க²த்தியபண்டி³தாத³யோ பஞ்ஹங் புட்டா² உத்தருத்தரிங் ந ஸம்பாயந்தி. ‘‘உபதிஸ்ஸோ கோலிதோ’’தி வுத்தே பன ‘‘கே ஏதே, ந கோ² மயங் ஜானாமா’’தி ப⁴ணந்தா நத்தி², ஏவங் விஸ்ஸுதா அஹேஸுங்.
Atha vuṭṭhite samajje pakkantāya parisāya sakaparivārena pakkantesu tesu sahāyesu kolito upatissaṃ pucchi – ‘‘kiṃ, samma, nāṭakādidassanena tava pamodanamattampi nāhosī’’ti? So tassa taṃ pavattiṃ ārocetvā tampi tatheva paṭipucchi. Sopi tassa attano pavattiṃ ārocetvā ‘‘ehi, samma, pabbajitvā amataṃ gavesāmā’’ti āha. ‘‘Sādhu sammā’’ti upatisso taṃ sampaṭicchi. Tato dvepi janā taṃ sampattiṃ chaḍḍetvā punadeva rājagahamanuppattā. Tena ca samayena rājagahe sañcayo nāma paribbājako paṭivasati. Te tassa santike pañcahi māṇavakasatehi saddhiṃ pabbajitvā katipāheneva tayo vede sabbañca paribbājakasamayaṃ uggahesuṃ. Te tesaṃ satthānaṃ ādimajjhapariyosānaṃ upaparikkhantā pariyosānaṃ adisvā ācariyaṃ pucchiṃsu – ‘‘imesaṃ satthānaṃ ādimajjhaṃ dissati, pariyosānaṃ pana na dissati ‘idaṃ nāma imehi satthehi pāpuṇeyyāti, yato uttari pāpuṇitabbaṃ natthī’’’ti. Sopi āha – ‘‘ahampi tesaṃ tathāvidhaṃ pariyosānaṃ na passāmī’’ti. Te āhaṃsu – ‘‘tena hi mayaṃ imesaṃ pariyosānaṃ gavesāmā’’ti. Te ācariyo ‘‘yathāsukhaṃ gavesathā’’ti āha. Evaṃ te tena anuññātā amataṃ gavesamānā āhiṇḍantā jambudīpe pākaṭā ahesuṃ. Tehi khattiyapaṇḍitādayo pañhaṃ puṭṭhā uttaruttariṃ na sampāyanti. ‘‘Upatisso kolito’’ti vutte pana ‘‘ke ete, na kho mayaṃ jānāmā’’ti bhaṇantā natthi, evaṃ vissutā ahesuṃ.
ஏவங் தேஸு அமதபரியேஸனங் சரமானேஸு அம்ஹாகங் ப⁴க³வா லோகே உப்பஜ்ஜித்வா பவத்திதவரத⁴ம்மசக்கோ அனுபுப்³பே³ன ராஜக³ஹமனுப்பத்தோ. தே ச பரிப்³பா³ஜகா ஸகலஜம்பு³தீ³பங் சரித்வா திட்ட²து அமதங், அந்தமஸோ பரியோஸானபஞ்ஹவிஸ்ஸஜ்ஜனமத்தம்பி அலப⁴ந்தா புனதே³வ ராஜக³ஹங் அக³மங்ஸு. அத² கோ² ஆயஸ்மா அஸ்ஸஜி புப்³ப³ண்ஹஸமயங் நிவாஸெத்வாதி யாவ தேஸங் பப்³ப³ஜ்ஜா, தாவ ஸப்³ப³ங் பப்³ப³ஜ்ஜாக்க²ந்த⁴கே (மஹாவ॰ 60) ஆக³தனயேனேவ வித்தா²ரதோ த³ட்ட²ப்³ப³ங்.
Evaṃ tesu amatapariyesanaṃ caramānesu amhākaṃ bhagavā loke uppajjitvā pavattitavaradhammacakko anupubbena rājagahamanuppatto. Te ca paribbājakā sakalajambudīpaṃ caritvā tiṭṭhatu amataṃ, antamaso pariyosānapañhavissajjanamattampi alabhantā punadeva rājagahaṃ agamaṃsu. Atha kho āyasmā assaji pubbaṇhasamayaṃ nivāsetvāti yāva tesaṃ pabbajjā, tāva sabbaṃ pabbajjākkhandhake (mahāva. 60) āgatanayeneva vitthārato daṭṭhabbaṃ.
ஏவங் பப்³ப³ஜிதேஸு தேஸு த்³வீஸு ஸஹாயகேஸு ஆயஸ்மா ஸாரிபுத்தோ அட்³ட⁴மாஸேன ஸாவகபாரமீஞாணங் ஸச்சா²காஸி. ஸோ யதா³ அஸ்ஸஜித்தே²ரேன ஸத்³தி⁴ங் ஏகவிஹாரே வஸதி, ததா³ ப⁴க³வதோ உபட்டா²னங் க³ந்த்வா அனந்தரங் தே²ரஸ்ஸ உபட்டா²னங் க³ச்ச²தி ‘‘புப்³பா³சரியோ மே அயமாயஸ்மா, ஏதமஹங் நிஸ்ஸாய ப⁴க³வதோ ஸாஸனங் அஞ்ஞாஸி’’ந்தி கா³ரவேன. யதா³ பன அஸ்ஸஜித்தே²ரேன ஸத்³தி⁴ங் ஏகவிஹாரே ந வஸதி, ததா³ யஸ்ஸங் தி³ஸாயங் தே²ரோ வஸதி, தங் தி³ஸங் ஓலோகெத்வா பஞ்சபதிட்டி²தேன வந்தி³த்வா அஞ்ஜலிங் பக்³க³ய்ஹ நமஸ்ஸதி. தங் தி³ஸ்வா கேசி பி⁴க்கூ² கத²ங் ஸமுட்டா²பேஸுங் – ‘‘ஸாரிபுத்தோ அக்³க³ஸாவகோ ஹுத்வா தி³ஸங் நமஸ்ஸதி, அஜ்ஜாபி மஞ்ஞே ப்³ராஹ்மணதி³ட்டி² அப்பஹீனா’’தி. அத² ப⁴க³வா தி³ப்³பா³ய ஸோததா⁴துயா தங் கதா²ஸல்லாபங் ஸுத்வா பஞ்ஞத்தவரபு³த்³தா⁴ஸனே நிஸின்னங்யேவ அத்தானங் த³ஸ்ஸெந்தோ பி⁴க்கூ² ஆமந்தேஸி – ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி ? தே தங் பவத்திங் ஆசிக்கி²ங்ஸு. ததோ ப⁴க³வா ‘‘ந, பி⁴க்க²வே, ஸாரிபுத்தோ தி³ஸங் நமஸ்ஸதி, யங் நிஸ்ஸாய ஸாஸனங் அஞ்ஞாஸி, தங் அத்தனோ ஆசரியங் வந்த³தி நமஸ்ஸதி ஸம்மானேதி, ஆசரியபூஜகோ, பி⁴க்க²வே, ஸாரிபுத்தோ’’தி வத்வா தத்த² ஸன்னிபதிதானங் த⁴ம்மதே³ஸனத்த²ங் இமங் ஸுத்தமபா⁴ஸி.
Evaṃ pabbajitesu tesu dvīsu sahāyakesu āyasmā sāriputto aḍḍhamāsena sāvakapāramīñāṇaṃ sacchākāsi. So yadā assajittherena saddhiṃ ekavihāre vasati, tadā bhagavato upaṭṭhānaṃ gantvā anantaraṃ therassa upaṭṭhānaṃ gacchati ‘‘pubbācariyo me ayamāyasmā, etamahaṃ nissāya bhagavato sāsanaṃ aññāsi’’nti gāravena. Yadā pana assajittherena saddhiṃ ekavihāre na vasati, tadā yassaṃ disāyaṃ thero vasati, taṃ disaṃ oloketvā pañcapatiṭṭhitena vanditvā añjaliṃ paggayha namassati. Taṃ disvā keci bhikkhū kathaṃ samuṭṭhāpesuṃ – ‘‘sāriputto aggasāvako hutvā disaṃ namassati, ajjāpi maññe brāhmaṇadiṭṭhi appahīnā’’ti. Atha bhagavā dibbāya sotadhātuyā taṃ kathāsallāpaṃ sutvā paññattavarabuddhāsane nisinnaṃyeva attānaṃ dassento bhikkhū āmantesi – ‘‘kāya nuttha, bhikkhave, etarahi kathāya sannisinnā’’ti ? Te taṃ pavattiṃ ācikkhiṃsu. Tato bhagavā ‘‘na, bhikkhave, sāriputto disaṃ namassati, yaṃ nissāya sāsanaṃ aññāsi, taṃ attano ācariyaṃ vandati namassati sammāneti, ācariyapūjako, bhikkhave, sāriputto’’ti vatvā tattha sannipatitānaṃ dhammadesanatthaṃ imaṃ suttamabhāsi.
தத்த² யஸ்மா ஹி த⁴ம்மங் புரிஸோ விஜஞ்ஞாதி யதோ புக்³க³லா பிடகத்தயப்பபே⁴த³ங் பரியத்தித⁴ம்மங் வா, பரியத்திங் ஸுத்வா அதி⁴க³ந்தப்³ப³ங் நவலோகுத்தரப்பபே⁴த³ங் படிவேத⁴த⁴ம்மங் வா புரிஸோ விஜஞ்ஞா ஜானெய்ய வேதெ³ய்ய. ‘‘யஸ்ஸா’’திபி பாடோ², ஸோ ஏவத்தோ². இந்த³ங்வ நங் தே³வதா பூஜயெய்யாதி யதா² ஸக்கங் தே³வானமிந்த³ங் த்³வீஸு தே³வலோகேஸு தே³வதா பூஜெந்தி, ஏவங் ஸோ புக்³க³லோ தங் புக்³க³லங் காலஸ்ஸேவ வுட்டா²ய உபாஹனஓமுஞ்சனாதி³ங் ஸப்³ப³ங் வத்தபடிவத்தங் கரொந்தோ பூஜெய்ய ஸக்கரெய்ய க³ருகரெய்ய. கிங் காரணங்? ஸோ பூஜிதோ…பே॰… பாதுகரோதி த⁴ம்மங், ஸோ ஆசரியோ ஏவங் பூஜிதோ தஸ்மிங் அந்தேவாஸிம்ஹி பஸன்னசித்தோ பரியத்திபடிவேத⁴வஸேன ப³ஹுஸ்ஸுதோ தே³ஸனாவஸேனேவ பரியத்தித⁴ம்மஞ்ச, தே³ஸனங் ஸுத்வா யதா²னுஸிட்ட²ங் படிபத்தியா அதி⁴க³ந்தப்³ப³ங் படிவேத⁴த⁴ம்மஞ்ச பாதுகரோதி தே³ஸேதி, தே³ஸனாய வா பரியத்தித⁴ம்மங், உபமாவஸேன அத்தனா அதி⁴க³தபடிவேத⁴த⁴ம்மங் பாதுகரோதி.
Tattha yasmā hi dhammaṃ puriso vijaññāti yato puggalā piṭakattayappabhedaṃ pariyattidhammaṃ vā, pariyattiṃ sutvā adhigantabbaṃ navalokuttarappabhedaṃ paṭivedhadhammaṃ vā puriso vijaññā jāneyya vedeyya. ‘‘Yassā’’tipi pāṭho, so evattho. Indaṃva naṃ devatā pūjayeyyāti yathā sakkaṃ devānamindaṃ dvīsu devalokesu devatā pūjenti, evaṃ so puggalo taṃ puggalaṃ kālasseva vuṭṭhāya upāhanaomuñcanādiṃ sabbaṃ vattapaṭivattaṃ karonto pūjeyya sakkareyya garukareyya. Kiṃ kāraṇaṃ? So pūjito…pe… pātukaroti dhammaṃ, so ācariyo evaṃ pūjito tasmiṃ antevāsimhi pasannacitto pariyattipaṭivedhavasena bahussuto desanāvaseneva pariyattidhammañca, desanaṃ sutvā yathānusiṭṭhaṃ paṭipattiyā adhigantabbaṃ paṭivedhadhammañca pātukaroti deseti, desanāya vā pariyattidhammaṃ, upamāvasena attanā adhigatapaṭivedhadhammaṃ pātukaroti.
320. தத³ட்டி²கத்வான நிஸம்ம தீ⁴ரோதி ஏவங் பஸன்னேன ஆசரியேன பாதுகதங் த⁴ம்மங் அட்டி²கத்வான ஸுணித்வா உபதா⁴ரணஸமத்த²தாய தீ⁴ரோ புரிஸோ. த⁴ம்மானுத⁴ம்மங் படிபஜ்ஜமானோதி லோகுத்தரத⁴ம்மஸ்ஸ அனுலோமத்தா அனுத⁴ம்மபூ⁴தங் விபஸ்ஸனங் பா⁴வயமானோ. விஞ்ஞூ விபா⁴வீ நிபுணோ ச ஹோதீதி விஞ்ஞுதாஸங்கா²தாய பஞ்ஞாய அதி⁴க³மேன விஞ்ஞூ, விபா⁴வெத்வா பரேஸம்பி பாகடங் கத்வா ஞாபனஸமத்த²தாய விபா⁴வீ, பரமஸுகு²மத்த²படிவேத⁴தாய நிபுணோ ச ஹோதி. யோ தாதி³ஸங் ப⁴ஜதி அப்பமத்தோதி யோ தாதி³ஸங் புப்³பே³ வுத்தப்பகாரங் ப³ஹுஸ்ஸுதங் அப்பமத்தோ தப்பஸாத³னபரோ ஹுத்வா ப⁴ஜதி.
320.Tadaṭṭhikatvāna nisamma dhīroti evaṃ pasannena ācariyena pātukataṃ dhammaṃ aṭṭhikatvāna suṇitvā upadhāraṇasamatthatāya dhīro puriso. Dhammānudhammaṃ paṭipajjamānoti lokuttaradhammassa anulomattā anudhammabhūtaṃ vipassanaṃ bhāvayamāno. Viññū vibhāvī nipuṇo ca hotīti viññutāsaṅkhātāya paññāya adhigamena viññū, vibhāvetvā paresampi pākaṭaṃ katvā ñāpanasamatthatāya vibhāvī, paramasukhumatthapaṭivedhatāya nipuṇo ca hoti. Yo tādisaṃ bhajati appamattoti yo tādisaṃ pubbe vuttappakāraṃ bahussutaṃ appamatto tappasādanaparo hutvā bhajati.
321. ஏவங் பண்டி³தாசரியஸேவனங் பஸங்ஸித்வா இதா³னி பா³லாசரியஸேவனங் நிந்த³ந்தோ ‘‘கு²த்³த³ஞ்ச பா³ல’’ந்தி இமங் கா³த²மாஹ. தத்த² கு²த்³த³ந்தி கு²த்³தே³ன காயகம்மாதி³னா ஸமன்னாக³தங், பஞ்ஞாபா⁴வதோ பா³லங். அனாக³தத்த²ந்தி அனதி⁴க³தபரியத்திபடிவேத⁴த்த²ங். உஸூயகந்தி இஸ்ஸாமனகதாய அந்தேவாஸிகஸ்ஸ வுட்³டி⁴ங் அஸஹமானங். ஸேஸமெத்த² பாகடமேவ பத³தோ. அதி⁴ப்பாயதோ பன யோ ப³ஹுசீவராதி³லாபீ⁴ ஆசரியோ அந்தேவாஸிகானங் சீவராதீ³னி ந ஸக்கோதி தா³துங், த⁴ம்மதா³னே பன அனிச்சது³க்கா²னத்தவசனமத்தம்பி ந ஸக்கோதி. ஏதேஹி கு²த்³த³தாதி³த⁴ம்மேஹி ஸமன்னாக³தத்தா தங் கு²த்³த³ங் பா³லங் அனாக³தத்த²ங் உஸூயகங் ஆசரியங் உபஸேவமானோ ‘‘பூதிமச்ச²ங் குஸக்³கே³னா’’தி (இதிவு॰ 76; ஜா॰ 1.15.183) வுத்தனயேன ஸயம்பி பா³லோ ஹோதி. தஸ்மா இத⁴ ஸாஸனே கிஞ்சி அப்பமத்தகம்பி பரியத்தித⁴ம்மங் படிவேத⁴த⁴ம்மங் வா அவிபா⁴வயித்வா ச அவிஜானித்வா ச யஸ்ஸ த⁴ம்மேஸு கங்கா², தங் அதரித்வா மரணங் உபேதீதி ஏவமஸ்ஸ அத்தோ² வேதி³தப்³போ³.
321. Evaṃ paṇḍitācariyasevanaṃ pasaṃsitvā idāni bālācariyasevanaṃ nindanto ‘‘khuddañca bāla’’nti imaṃ gāthamāha. Tattha khuddanti khuddena kāyakammādinā samannāgataṃ, paññābhāvato bālaṃ. Anāgatatthanti anadhigatapariyattipaṭivedhatthaṃ. Usūyakanti issāmanakatāya antevāsikassa vuḍḍhiṃ asahamānaṃ. Sesamettha pākaṭameva padato. Adhippāyato pana yo bahucīvarādilābhī ācariyo antevāsikānaṃ cīvarādīni na sakkoti dātuṃ, dhammadāne pana aniccadukkhānattavacanamattampi na sakkoti. Etehi khuddatādidhammehi samannāgatattā taṃ khuddaṃ bālaṃ anāgatatthaṃ usūyakaṃ ācariyaṃ upasevamāno ‘‘pūtimacchaṃ kusaggenā’’ti (itivu. 76; jā. 1.15.183) vuttanayena sayampi bālo hoti. Tasmā idha sāsane kiñci appamattakampi pariyattidhammaṃ paṭivedhadhammaṃ vā avibhāvayitvā ca avijānitvā ca yassa dhammesu kaṅkhā, taṃ ataritvā maraṇaṃ upetīti evamassa attho veditabbo.
322-3. இதா³னி தஸ்ஸேவத்த²ஸ்ஸ பாகடகரணத்த²ங் ‘‘யதா² நரோ’’தி கா³தா²த்³வயமாஹ. தத்த² ஆபக³ந்தி நதி³ங். மஹோத³கந்தி ப³ஹுஉத³கங். ஸலிலந்தி இதோ சிதோ ச க³தங், வித்தி²ண்ணந்தி வுத்தங் ஹோதி. ‘‘ஸரித’’ந்திபி பாடோ², ஸோ ஏவத்தோ². ஸீக⁴ஸோதந்தி ஹாரஹாரிகங், வேக³வதிந்தி வுத்தங் ஹோதி. கிங் ஸோதி எத்த² ‘‘ஸோ வுய்ஹமானோ’’தி இமினா ச ஸோகாரேன தஸ்ஸ நரஸ்ஸ நித்³தி³ட்ட²த்தா நிபாதமத்தோ ஸோகாரோ. கிங் ஸூதி வுத்தங் ஹோதி யதா² ‘‘ந ப⁴விஸ்ஸாமி நாம ஸோ, வினஸ்ஸிஸ்ஸாமி நாம ஸோ’’தி. த⁴ம்மந்தி புப்³பே³ வுத்தங் து³வித⁴மேவ. அனிஸாமயத்த²ந்தி அனிஸாமெத்வா அத்த²ங். ஸேஸமெத்த² பாகடமேவ பத³தோ.
322-3. Idāni tassevatthassa pākaṭakaraṇatthaṃ ‘‘yathā naro’’ti gāthādvayamāha. Tattha āpaganti nadiṃ. Mahodakanti bahuudakaṃ. Salilanti ito cito ca gataṃ, vitthiṇṇanti vuttaṃ hoti. ‘‘Sarita’’ntipi pāṭho, so evattho. Sīghasotanti hārahārikaṃ, vegavatinti vuttaṃ hoti. Kiṃ soti ettha ‘‘so vuyhamāno’’ti iminā ca sokārena tassa narassa niddiṭṭhattā nipātamatto sokāro. Kiṃ sūti vuttaṃ hoti yathā ‘‘na bhavissāmi nāma so, vinassissāmi nāma so’’ti. Dhammanti pubbe vuttaṃ duvidhameva. Anisāmayatthanti anisāmetvā atthaṃ. Sesamettha pākaṭameva padato.
அதி⁴ப்பாயதோ பன யதா² யோ கோசிதே³வ நரோ வுத்தப்பகாரங் நதி³ங் ஓதரித்வா தாய நதி³யா வுய்ஹமானோ அனுஸோதகா³மீ ஸோதமேவ அனுக³ச்ச²ந்தோ பரே பாரத்தி²கே கிங் ஸக்க²தி பாரங் நேதுங். ‘‘ஸக்கதீ’’திபி பாடோ². ததே²வ து³வித⁴ம்பி த⁴ம்மங் அத்தனோ பஞ்ஞாய அவிபா⁴வயித்வா ப³ஹுஸ்ஸுதானஞ்ச ஸந்திகே அத்த²ங் அனிஸாமெத்வா ஸயங் அவிபா⁴விதத்தா அஜானந்தோ அனிஸாமிதத்தா ச அவிதிண்ணகங்கோ² பரே கிங் ஸக்க²தி நிஜ்ஜா²பேதுங் பெக்கா²பேதுந்தி ஏவமெத்த² அத்தோ² த³ட்ட²ப்³போ³. ‘‘ஸோ வத, சுந்த³, அத்தனா பலிபபலிபன்னோ’’திஆதி³கஞ்செத்த² (ம॰ நி॰ 1.87) ஸுத்தபத³ங் அனுஸ்ஸரிதப்³ப³ங்.
Adhippāyato pana yathā yo kocideva naro vuttappakāraṃ nadiṃ otaritvā tāya nadiyā vuyhamāno anusotagāmī sotameva anugacchanto pare pāratthike kiṃ sakkhati pāraṃ netuṃ. ‘‘Sakkatī’’tipi pāṭho. Tatheva duvidhampi dhammaṃ attano paññāya avibhāvayitvā bahussutānañca santike atthaṃ anisāmetvā sayaṃ avibhāvitattā ajānanto anisāmitattā ca avitiṇṇakaṅkho pare kiṃ sakkhati nijjhāpetuṃ pekkhāpetunti evamettha attho daṭṭhabbo. ‘‘So vata, cunda, attanā palipapalipanno’’tiādikañcettha (ma. ni. 1.87) suttapadaṃ anussaritabbaṃ.
324-5. ஏவங் பா³லஸேவனாய பா³லஸ்ஸ பரங் நிஜ்ஜா²பேதுங் அஸமத்த²தாய பாகடகரணத்த²ங் உபமங் வத்வா இதா³னி ‘‘யோ தாதி³ஸங் ப⁴ஜதி அப்பமத்தோ’’தி எத்த² வுத்தஸ்ஸ பண்டி³தஸ்ஸ பரே நிஜ்ஜா²பேதுங் ஸமத்த²தாய பாகடகரணத்த²ங் ‘‘யதா²பி நாவ’’ந்தி கா³தா²த்³வயமாஹ. தத்த² பி²யேனாதி த³ப்³பி³பத³ரேன. ரித்தேனாதி வேளுத³ண்டே³ன. தத்தா²தி தஸ்ஸங் நாவாயங். தத்ரூபயஞ்ஞூதி தஸ்ஸா நாவாய ஆஹரணபடிஹரணாதி³உபாயஜானநேன மக்³க³படிபாத³னேன உபாயஞ்ஞூ. ஸிக்கி²தஸிக்க²தாய ஸுகுஸலஹத்த²தாய ச குஸலோ. உப்பன்னுபத்³த³வபடிகாரஸமத்த²தாய முதீமா. வேத³கூ³தி வேத³ஸங்கா²தேஹி சதூஹி மக்³க³ஞாணேஹி க³தோ. பா⁴விதத்தோதி தாயேவ மக்³க³பா⁴வனாய பா⁴விதசித்தோ. ப³ஹுஸ்ஸுதோதி புப்³பே³ வுத்தனயேனேவ. அவேத⁴த⁴ம்மோதி அட்ட²ஹி லோகத⁴ம்மேஹி அகம்பனியஸபா⁴வோ. ஸோதாவதா⁴னூபனிஸூபபன்னேதி ஸோதஓத³ஹனேன ச மக்³க³ப²லானங் உபனிஸ்ஸயேன ச உபபன்னே. ஸேஸங் உத்தானபத³த்த²மேவ. அதி⁴ப்பாயயோஜனாபி ஸக்கா புரிமனயேனேவ ஜானிதுந்தி ந வித்தா²ரிதா.
324-5. Evaṃ bālasevanāya bālassa paraṃ nijjhāpetuṃ asamatthatāya pākaṭakaraṇatthaṃ upamaṃ vatvā idāni ‘‘yo tādisaṃ bhajati appamatto’’ti ettha vuttassa paṇḍitassa pare nijjhāpetuṃ samatthatāya pākaṭakaraṇatthaṃ ‘‘yathāpi nāva’’nti gāthādvayamāha. Tattha phiyenāti dabbipadarena. Rittenāti veḷudaṇḍena. Tatthāti tassaṃ nāvāyaṃ. Tatrūpayaññūti tassā nāvāya āharaṇapaṭiharaṇādiupāyajānanena maggapaṭipādanena upāyaññū. Sikkhitasikkhatāya sukusalahatthatāya ca kusalo. Uppannupaddavapaṭikārasamatthatāya mutīmā. Vedagūti vedasaṅkhātehi catūhi maggañāṇehi gato. Bhāvitattoti tāyeva maggabhāvanāya bhāvitacitto. Bahussutoti pubbe vuttanayeneva. Avedhadhammoti aṭṭhahi lokadhammehi akampaniyasabhāvo. Sotāvadhānūpanisūpapanneti sotaodahanena ca maggaphalānaṃ upanissayena ca upapanne. Sesaṃ uttānapadatthameva. Adhippāyayojanāpi sakkā purimanayeneva jānitunti na vitthāritā.
326. ஏவங் பண்டி³தஸ்ஸ பரே நிஜ்ஜா²பேதுங் ஸமத்த²பா⁴வபாகடகரணத்த²ங் உபமங் வத்வா தஸ்ஸா பண்டி³தஸேவனாய நியோஜெந்தோ ‘‘தஸ்மா ஹவே’’தி இமங் அவஸானகா³த²மாஹ. தத்ராயங் ஸங்கே²பத்தோ² – யஸ்மா உபனிஸ்ஸயஸம்பன்னா பண்டி³தஸேவனேன விஸேஸங் பாபுணந்தி, தஸ்மா ஹவே ஸப்புரிஸங் ப⁴ஜேத². கீதி³ஸங் ஸப்புரிஸங் ப⁴ஜேத²? மேதா⁴வினஞ்சேவ ப³ஹுஸ்ஸுதஞ்ச, பஞ்ஞாஸம்பத்தியா ச மேதா⁴வினங் வுத்தப்பகாரஸுதத்³வயேன ச ப³ஹுஸ்ஸுதங். தாதி³ஸஞ்ஹி ப⁴ஜமானோ தேன பா⁴ஸிதஸ்ஸ த⁴ம்மஸ்ஸ அஞ்ஞாய அத்த²ங் ஏவங் ஞத்வா ச யதா²னுஸிட்ட²ங் படிபஜ்ஜமானோ தாய படிபத்தியா படிவேத⁴வஸேன விஞ்ஞாதத⁴ம்மோ ஸோ மக்³க³ப²லனிப்³பா³னப்பபே⁴த³ங் லோகுத்தரஸுக²ங் லபே⁴த² அதி⁴க³ச்செ²ய்ய பாபுணெய்யாதி அரஹத்தனிகூடேன தே³ஸனங் ஸமாபேஸீதி.
326. Evaṃ paṇḍitassa pare nijjhāpetuṃ samatthabhāvapākaṭakaraṇatthaṃ upamaṃ vatvā tassā paṇḍitasevanāya niyojento ‘‘tasmā have’’ti imaṃ avasānagāthamāha. Tatrāyaṃ saṅkhepattho – yasmā upanissayasampannā paṇḍitasevanena visesaṃ pāpuṇanti, tasmā have sappurisaṃ bhajetha. Kīdisaṃ sappurisaṃ bhajetha? Medhāvinañceva bahussutañca, paññāsampattiyā ca medhāvinaṃ vuttappakārasutadvayena ca bahussutaṃ. Tādisañhi bhajamāno tena bhāsitassa dhammassa aññāya atthaṃ evaṃ ñatvā ca yathānusiṭṭhaṃ paṭipajjamāno tāya paṭipattiyā paṭivedhavasena viññātadhammo so maggaphalanibbānappabhedaṃ lokuttarasukhaṃ labhetha adhigaccheyya pāpuṇeyyāti arahattanikūṭena desanaṃ samāpesīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய த⁴ம்மஸுத்தவண்ணனா நிட்டி²தா.
Suttanipāta-aṭṭhakathāya dhammasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 8. நாவாஸுத்தங் • 8. Nāvāsuttaṃ
