| Library / Tipiṭaka / д̇ибидага • Tipiṭaka / суд̇д̇анибаад̇а-адтагат̇аа • Suttanipāta-aṭṭhakathā |
14. д̇хаммигасуд̇д̇аван̣н̣анаа
14. Dhammikasuttavaṇṇanā
звам̣ мз суд̇анд̇и д̇хаммигасуд̇д̇ам̣. гаа уббад̇д̇и? д̇идтамаанз гира бхаг̇авад̇и логанаат̇з д̇хаммиго наама убаасаго ахоси наамзна жа бадибад̇д̇ияаа жа. со гира саран̣асамбанно сийласамбанно б̣ахуссуд̇о бидагад̇д̇аяад̇харо анааг̇аамий абхин̃н̃аалаабхий аагаасажаарий ахоси. д̇асса бариваараа бан̃жасад̇аа убаасагаа, д̇зби д̇аад̣̇исаа зва ахзсум̣. д̇ассзгад̣̇ивасам̣ убосат̇игасса рахог̇ад̇асса бадисаллийнасса маж̇жхимаяаамаавасаанасамаяз звам̣ баривид̇агго уд̣̇абаад̣̇и – ‘‘яам̣нуунаахам̣ аг̇аарияаанаг̇аарияаанам̣ бадибад̣̇ам̣ бужчзяяа’’нд̇и. со бан̃жахи убаасагасад̇зхи баривуд̇о бхаг̇аванд̇ам̣ убасан̇гамид̇ваа д̇амад̇т̇ам̣ бужчи, бхаг̇аваа жасса б̣яаагааси. д̇ад̇т̇а буб̣б̣з ван̣н̣ид̇асад̣̇исам̣ вуд̇д̇анаязнзва взд̣̇ид̇аб̣б̣ам̣, абуб̣б̣ам̣ ван̣н̣аяиссаама.
Evaṃme sutanti dhammikasuttaṃ. Kā uppatti? Tiṭṭhamāne kira bhagavati lokanāthe dhammiko nāma upāsako ahosi nāmena ca paṭipattiyā ca. So kira saraṇasampanno sīlasampanno bahussuto piṭakattayadharo anāgāmī abhiññālābhī ākāsacārī ahosi. Tassa parivārā pañcasatā upāsakā, tepi tādisā eva ahesuṃ. Tassekadivasaṃ uposathikassa rahogatassa paṭisallīnassa majjhimayāmāvasānasamaye evaṃ parivitakko udapādi – ‘‘yaṃnūnāhaṃ agāriyaanagāriyānaṃ paṭipadaṃ puccheyya’’nti. So pañcahi upāsakasatehi parivuto bhagavantaṃ upasaṅkamitvā tamatthaṃ pucchi, bhagavā cassa byākāsi. Tattha pubbe vaṇṇitasadisaṃ vuttanayeneva veditabbaṃ, apubbaṃ vaṇṇayissāma.
379. д̇ад̇т̇а батамаг̇аат̇ааяа д̇аава гат̇ам̣гарод̇и гат̇ам̣ гаронд̇о гат̇ам̣ бадибаж̇ж̇анд̇о. саад̇ху ход̇ийд̇и сунд̣̇аро анаваж̇ж̇о ад̇т̇асаад̇хано ход̇и. убаасагаасзд̇и убаасагааижжзва вуд̇д̇ам̣ ход̇и. сзсамад̇т̇ад̇о баагадамзва. аяам̣ бана яож̇анаа – яо ваа аг̇аараа анаг̇аарамзд̇и баб̣б̣аж̇ад̇и, яз ваа аг̇аарино убаасагаа, зд̇зсу д̣̇увид̇хзсу саавагзсу гат̇ам̣гаро сааваго саад̇ху ход̇ийд̇и.
379. Tattha paṭhamagāthāya tāva kathaṃkaroti kathaṃ karonto kathaṃ paṭipajjanto. Sādhu hotīti sundaro anavajjo atthasādhano hoti. Upāsakāseti upāsakāicceva vuttaṃ hoti. Sesamatthato pākaṭameva. Ayaṃ pana yojanā – yo vā agārā anagārameti pabbajati, ye vā agārino upāsakā, etesu duvidhesu sāvakesu kathaṃkaro sāvako sādhu hotīti.
380-1. ид̣̇аани звам̣ будтасса бхаг̇авад̇о б̣яаагаран̣асамад̇т̇ад̇ам̣ д̣̇ийбзнд̇о ‘‘д̇уван̃хий’’д̇и г̇аат̇аад̣̇ваяамааха. д̇ад̇т̇а г̇ад̇инд̇и аж̇жхаасаяаг̇ад̇им̣. барааяан̣анд̇и нибпад̇д̇им̣. ат̇а ваа г̇ад̇инд̇и нираяаад̣̇ибан̃жаббабхзд̣̇ам̣. барааяан̣анд̇и г̇ад̇ид̇о барам̣ аяанам̣ г̇ад̇ивиббамогкам̣ бариниб̣б̣аанам̣, на жад̇т̇и д̇уляод̇и д̇аяаа сад̣̇исо над̇т̇и. саб̣б̣ам̣ д̇увам̣ н̃аан̣амавзжжа д̇хаммам̣, багаасзси сад̇д̇з анугамбамаанод̇и д̇вам̣ бхаг̇аваа яад̣̇ад̇т̇и н̃зяяам̣ наама, д̇ам̣ анавасзсам̣ авзжжа бадивиж̇жхид̇ваа сад̇д̇з анугамбамаано саб̣б̣ам̣ н̃аан̣ан̃жа д̇хамман̃жа багаасзси. яам̣ яам̣ яасса хид̇ам̣ ход̇и, д̇ам̣ д̇ам̣ д̇асса аавигаасиязва д̣̇зсзсиязва, на д̇з ад̇т̇и аажарияамудтийд̇и вуд̇д̇ам̣ ход̇и. вирожаси вималод̇и д̇хуумараж̇аад̣̇ивирахид̇о вияа жанд̣̇о, рааг̇аад̣̇ималаабхаавзна вимало вирожаси. сзсамзд̇т̇а уд̇д̇аанад̇т̇амзва.
380-1. Idāni evaṃ puṭṭhassa bhagavato byākaraṇasamatthataṃ dīpento ‘‘tuvañhī’’ti gāthādvayamāha. Tattha gatinti ajjhāsayagatiṃ. Parāyaṇanti nipphattiṃ. Atha vā gatinti nirayādipañcappabhedaṃ. Parāyaṇanti gatito paraṃ ayanaṃ gativippamokkhaṃ parinibbānaṃ, na catthi tulyoti tayā sadiso natthi. Sabbaṃ tuvaṃ ñāṇamavecca dhammaṃ, pakāsesi satte anukampamānoti tvaṃ bhagavā yadatthi ñeyyaṃ nāma, taṃ anavasesaṃ avecca paṭivijjhitvā satte anukampamāno sabbaṃ ñāṇañca dhammañca pakāsesi. Yaṃ yaṃ yassa hitaṃ hoti, taṃ taṃ tassa āvikāsiyeva desesiyeva, na te atthi ācariyamuṭṭhīti vuttaṃ hoti. Virocasi vimaloti dhūmarajādivirahito viya cando, rāgādimalābhāvena vimalo virocasi. Sesamettha uttānatthameva.
382. ид̣̇аани язсам̣ д̇ад̣̇аа бхаг̇аваа д̇хаммам̣ д̣̇зсзси, д̇з д̣̇звабуд̇д̇з гид̇д̇зд̇ваа бхаг̇аванд̇ам̣ басам̣санд̇о ‘‘ааг̇ан̃чий д̇з санд̇игз’’д̇и г̇аат̇аад̣̇ваяамааха. д̇ад̇т̇а нааг̇арааж̇аа зрааван̣о наамаад̇и аяам̣ гира зрааван̣о наама д̣̇звабуд̇д̇о гаамаруубий д̣̇иб̣б̣з вимаанз васад̇и. со яад̣̇аа сагго уяяаанагийл̣ам̣ г̇ажчад̇и, д̇ад̣̇аа д̣̇ияад̣дхасад̇аяож̇анам̣ гааяам̣ абхинимминид̇ваа д̇зд̇д̇им̣са гумбхз маабзд̇ваа зрааван̣о наама хад̇т̇ий ход̇и. д̇асса згзгасмим̣ гумбхз д̣̇вз д̣̇вз д̣̇анд̇аа хонд̇и, згзгасмим̣ д̣̇анд̇з сад̇д̇а сад̇д̇а богкаран̣ияо, згзгиссаа богкаран̣ияаа сад̇д̇а сад̇д̇а бад̣̇уминияо, згзгиссаа бад̣̇уминияаа сад̇д̇а сад̇д̇а бубпаани, згзгасмим̣ бубпз сад̇д̇а сад̇д̇а бад̇д̇аани, згзгасмим̣ бад̇д̇з сад̇д̇а сад̇д̇а ажчарааяо нажжанд̇и бад̣̇умажчарааяод̇взва виссуд̇аа саггасса наадагид̇т̇ияо, яаа жа вимаанавад̇т̇усмимби ‘‘бхаманд̇и ган̃н̃аа бад̣̇умзсу сигкид̇аа’’д̇и (ви. ва. 1034) ааг̇ад̇аа. д̇зсам̣ бана д̇зд̇д̇исам̣гумбхаанам̣ маж̇жхз суд̣̇ассанагумбхо наама д̇им̣саяож̇анамад̇д̇о ход̇и, д̇ад̇т̇а яож̇анаббамаан̣о ман̣ибаллан̇го д̇ияож̇ануб̣б̣зд̇хз бубпаман̣д̣абз ад̇т̇арийяад̇и. д̇ад̇т̇а сагго д̣̇зваанаминд̣̇о ажчараасан̇гхабаривуд̇о д̣̇иб̣б̣асамбад̇д̇им̣ бажжанубход̇и. саггз бана д̣̇зваанаминд̣̇з уяяаанагийл̣аад̇о бадинивад̇д̇з буна д̇ам̣ руубам̣ сам̣харид̇ваана д̣̇звабуд̇д̇ова ход̇и. д̇ам̣ санд̇хааяааха – ‘‘ааг̇ан̃чи д̇з санд̇игз нааг̇арааж̇аа зрааван̣о наамаа’’д̇и. ж̇инод̇и суд̇ваад̇и ‘‘виж̇ид̇абаабад̇хаммо зса бхаг̇аваа’’д̇и звам̣ суд̇ваа. соби д̇аяаа манд̇аяид̇ваад̇и д̇аяаа сад̣̇д̇хим̣ манд̇аяид̇ваа, бан̃хам̣ бужчид̇ваад̇и ад̇хиббааяо. аж̇жхаг̇амаад̇и ад̇хиаг̇амаа, г̇ад̇од̇и вуд̇д̇ам̣ ход̇и. саад̇хууд̇и суд̇ваана бад̇ийд̇аруубод̇и д̇ам̣ бан̃хам̣ суд̇ваа ‘‘саад̇ху бханд̇з’’д̇и абхинанд̣̇ид̇ваа д̇удтаруубо г̇ад̇од̇и ад̇т̇о.
382. Idāni yesaṃ tadā bhagavā dhammaṃ desesi, te devaputte kittetvā bhagavantaṃ pasaṃsanto ‘‘āgañchī te santike’’ti gāthādvayamāha. Tattha nāgarājā erāvaṇo nāmāti ayaṃ kira erāvaṇo nāma devaputto kāmarūpī dibbe vimāne vasati. So yadā sakko uyyānakīḷaṃ gacchati, tadā diyaḍḍhasatayojanaṃ kāyaṃ abhinimminitvā tettiṃsa kumbhe māpetvā erāvaṇo nāma hatthī hoti. Tassa ekekasmiṃ kumbhe dve dve dantā honti, ekekasmiṃ dante satta satta pokkharaṇiyo, ekekissā pokkharaṇiyā satta satta paduminiyo, ekekissā paduminiyā satta satta pupphāni, ekekasmiṃ pupphe satta satta pattāni, ekekasmiṃ patte satta satta accharāyo naccanti padumaccharāyotveva vissutā sakkassa nāṭakitthiyo, yā ca vimānavatthusmimpi ‘‘bhamanti kaññā padumesu sikkhitā’’ti (vi. va. 1034) āgatā. Tesaṃ pana tettisaṃkumbhānaṃ majjhe sudassanakumbho nāma tiṃsayojanamatto hoti, tattha yojanappamāṇo maṇipallaṅko tiyojanubbedhe pupphamaṇḍape attharīyati. Tattha sakko devānamindo accharāsaṅghaparivuto dibbasampattiṃ paccanubhoti. Sakke pana devānaminde uyyānakīḷāto paṭinivatte puna taṃ rūpaṃ saṃharitvāna devaputtova hoti. Taṃ sandhāyāha – ‘‘āgañchi te santike nāgarājā erāvaṇo nāmā’’ti. Jinoti sutvāti ‘‘vijitapāpadhammo esa bhagavā’’ti evaṃ sutvā. Sopi tayā mantayitvāti tayā saddhiṃ mantayitvā, pañhaṃ pucchitvāti adhippāyo. Ajjhagamāti adhiagamā, gatoti vuttaṃ hoti. Sādhūti sutvāna patītarūpoti taṃ pañhaṃ sutvā ‘‘sādhu bhante’’ti abhinanditvā tuṭṭharūpo gatoti attho.
383. рааж̇ааби д̇ам̣ взссаван̣о гувзрод̇и зд̇т̇а со яагко ран̃ж̇анадтзна рааж̇аа, висаан̣ааяа рааж̇ад̇хаанияаа раж̇ж̇ам̣ гаарзд̇ийд̇и взссаван̣о, буриманаамзна гувзрод̇и взд̣̇ид̇аб̣б̣о. со гира гувзро наама б̣раахман̣амахаасаало худ̇ваа д̣̇аанаад̣̇ийни бун̃н̃аани гад̇ваа висаан̣ааяа рааж̇ад̇хаанияаа ад̇хибад̇и худ̇ваа ниб̣б̣ад̇д̇о. д̇асмаа ‘‘гувзро взссаван̣о’’д̇и вужжад̇и. вуд̇д̇ан̃жзд̇ам̣ аадаанаадияасуд̇д̇з –
383.Rājāpi taṃ vessavaṇo kuveroti ettha so yakkho rañjanaṭṭhena rājā, visāṇāya rājadhāniyā rajjaṃ kāretīti vessavaṇo, purimanāmena kuveroti veditabbo. So kira kuvero nāma brāhmaṇamahāsālo hutvā dānādīni puññāni katvā visāṇāya rājadhāniyā adhipati hutvā nibbatto. Tasmā ‘‘kuvero vessavaṇo’’ti vuccati. Vuttañcetaṃ āṭānāṭiyasutte –
‘‘гувзрасса ко бана, маариса, махаарааж̇асса висаан̣аа наама рааж̇ад̇хааний, д̇асмаа гувзро махаарааж̇аа ‘взссаван̣о’д̇и бавужжад̇ий’’д̇и (д̣̇ий. ни. 3.291) –
‘‘Kuverassa kho pana, mārisa, mahārājassa visāṇā nāma rājadhānī, tasmā kuvero mahārājā ‘vessavaṇo’ti pavuccatī’’ti (dī. ni. 3.291) –
сзсамзд̇т̇а баагадамзва.
Sesamettha pākaṭameva.
д̇ад̇т̇а сияаа – гасмаа бана д̣̇уурад̇арз д̇аавад̇им̣сабхаванз васанд̇о зрааван̣о батамам̣ ааг̇ад̇о, взссаван̣о бажчаа, зганаг̇арзва васанд̇о аяам̣ убаасаго саб̣б̣абажчаа, гат̇ан̃жа со д̇зсам̣ ааг̇аманам̣ ан̃н̃ааси, язна звамаахаад̇и? вужжад̇з – взссаван̣о гира д̇ад̣̇аа анзгасахассабаваал̣абаллан̇гам̣ д̣̇ваад̣̇асаяож̇анам̣ нааривааханам̣ абхируяха баваал̣агунд̇ам̣ ужжаарзд̇ваа д̣̇асасахассагодияагкзхи баривуд̇о ‘‘бхаг̇аванд̇ам̣ бан̃хам̣ бужчиссаамий’’д̇и аагаасадтагавимаанаани барихарид̇ваа маг̇г̇зна маг̇г̇ам̣ ааг̇ажчанд̇о взл̣уган̣д̣аганаг̇арз нанд̣̇амаад̇ааяа убаасигааяа нивзсанасса убарибхааг̇ам̣ самбад̇д̇о. убаасигааяа аяамаанубхааво – барисуд̣̇д̇хасийлаа ход̇и, нижжам̣ вигаалабхож̇анаа бадивирад̇аа, бидагад̇д̇аяад̇хаариний, анааг̇аамипалз бад̇идтид̇аа. саа д̇амхи самаяз сийхабан̃ж̇арам̣ уг̇гхаадзд̇ваа уд̇уг̇г̇ахан̣ад̇т̇ааяа маалуд̇зрид̇огаасз тад̇ваа адтагабаарааяанаваг̇г̇з бариман̣д̣алзхи бад̣̇аб̣яан̃ж̇анзхи мад̇хурзна сарзна бхаасад̇и. взссаван̣о д̇ад̇т̇зва яаанаани табзд̇ваа яаава убаасигаа ‘‘ид̣̇амавожа бхаг̇аваа маг̇ад̇хзсу вихаранд̇о баасаан̣агз жзд̇ияз барижаарагасол̣асаннам̣ б̣раахман̣аана’’нд̇и ниг̇аманам̣ абхааси, д̇аава саб̣б̣ам̣ суд̇ваа ваг̇г̇абарияосаанз суван̣н̣амураж̇асад̣̇исам̣ маханд̇ам̣ г̇ийвам̣ баг̇г̇ахзд̇ваа ‘‘саад̇ху саад̇ху бхаг̇иний’’д̇и саад̇хугаарамад̣̇ааси. саа ‘‘го зд̇т̇аа’’д̇и ааха. ‘‘ахам̣ бхаг̇ини взссаван̣о’’д̇и. убаасигаа гира батамам̣ сод̇аабаннаа ахоси, бажчаа взссаван̣о. д̇ам̣ со д̇хаммад̇о саход̣̇арабхаавам̣ санд̇хааяа убаасигам̣ бхаг̇иниваад̣̇зна самуд̣̇аажарад̇и. убаасигааяа жа ‘‘вигаало, бхаад̇ига бхад̣̇рамука, яасса д̣̇аани гаалам̣ ман̃н̃асий’’д̇и вуд̇д̇о ‘‘ахам̣ бхаг̇ини д̇аяи басанно басаннаагаарам̣ гаромий’’д̇и ааха. д̇зна хи бхад̣̇рамука, мама кзд̇д̇з нибпаннам̣ саалим̣ гаммагараа аахарид̇ум̣ на саггонд̇и, д̇ам̣ д̇ава барисааяа аан̣аабзхийд̇и. со ‘‘саад̇ху бхаг̇иний’’д̇и яагкз аан̣аабзси. д̇з ад̣дхад̇зраса годтааг̇аарасад̇аани буурзсум̣. д̇ад̇о бабхуд̇и годтааг̇аарам̣ уунам̣ наама наахоси, ‘‘нанд̣̇амаад̇у годтааг̇аарам̣ вияаа’’д̇и логз нид̣̇ассанам̣ ахоси. взссаван̣о годтааг̇аараани буурзд̇ваа бхаг̇аванд̇ам̣ убасан̇гами. бхаг̇аваа ‘‘вигаалз ааг̇ад̇осий’’д̇и ааха. ат̇а бхаг̇авад̇о саб̣б̣ам̣ аарожзси. иминаа гааран̣зна аасаннад̇арзби жаад̇умахаарааж̇игабхаванз васанд̇о взссаван̣о бажчаа ааг̇ад̇о. зрааван̣асса бана на гин̃жи анд̇араа гаран̣ийяам̣ ахоси, д̇зна со батамад̇арам̣ ааг̇ад̇о.
Tattha siyā – kasmā pana dūratare tāvatiṃsabhavane vasanto erāvaṇo paṭhamaṃ āgato, vessavaṇo pacchā, ekanagareva vasanto ayaṃ upāsako sabbapacchā, kathañca so tesaṃ āgamanaṃ aññāsi, yena evamāhāti? Vuccate – vessavaṇo kira tadā anekasahassapavāḷapallaṅkaṃ dvādasayojanaṃ nārivāhanaṃ abhiruyha pavāḷakuntaṃ uccāretvā dasasahassakoṭiyakkhehi parivuto ‘‘bhagavantaṃ pañhaṃ pucchissāmī’’ti ākāsaṭṭhakavimānāni pariharitvā maggena maggaṃ āgacchanto veḷukaṇḍakanagare nandamātāya upāsikāya nivesanassa uparibhāgaṃ sampatto. Upāsikāya ayamānubhāvo – parisuddhasīlā hoti, niccaṃ vikālabhojanā paṭiviratā, piṭakattayadhārinī, anāgāmiphale patiṭṭhitā. Sā tamhi samaye sīhapañjaraṃ ugghāṭetvā utuggahaṇatthāya māluteritokāse ṭhatvā aṭṭhakapārāyanavagge parimaṇḍalehi padabyañjanehi madhurena sarena bhāsati. Vessavaṇo tattheva yānāni ṭhapetvā yāva upāsikā ‘‘idamavoca bhagavā magadhesu viharanto pāsāṇake cetiye paricārakasoḷasannaṃ brāhmaṇāna’’nti nigamanaṃ abhāsi, tāva sabbaṃ sutvā vaggapariyosāne suvaṇṇamurajasadisaṃ mahantaṃ gīvaṃ paggahetvā ‘‘sādhu sādhu bhaginī’’ti sādhukāramadāsi. Sā ‘‘ko etthā’’ti āha. ‘‘Ahaṃ bhagini vessavaṇo’’ti. Upāsikā kira paṭhamaṃ sotāpannā ahosi, pacchā vessavaṇo. Taṃ so dhammato sahodarabhāvaṃ sandhāya upāsikaṃ bhaginivādena samudācarati. Upāsikāya ca ‘‘vikālo, bhātika bhadramukha, yassa dāni kālaṃ maññasī’’ti vutto ‘‘ahaṃ bhagini tayi pasanno pasannākāraṃ karomī’’ti āha. Tena hi bhadramukha, mama khette nipphannaṃ sāliṃ kammakarā āharituṃ na sakkonti, taṃ tava parisāya āṇāpehīti. So ‘‘sādhu bhaginī’’ti yakkhe āṇāpesi. Te aḍḍhaterasa koṭṭhāgārasatāni pūresuṃ. Tato pabhuti koṭṭhāgāraṃ ūnaṃ nāma nāhosi, ‘‘nandamātu koṭṭhāgāraṃ viyā’’ti loke nidassanaṃ ahosi. Vessavaṇo koṭṭhāgārāni pūretvā bhagavantaṃ upasaṅkami. Bhagavā ‘‘vikāle āgatosī’’ti āha. Atha bhagavato sabbaṃ ārocesi. Iminā kāraṇena āsannatarepi cātumahārājikabhavane vasanto vessavaṇo pacchā āgato. Erāvaṇassa pana na kiñci antarā karaṇīyaṃ ahosi, tena so paṭhamataraṃ āgato.
аяам̣ бана убаасаго гин̃жааби анааг̇аамий багад̇ияаава згабхад̇д̇иго, д̇ат̇ааби д̇ад̣̇аа убосат̇ад̣̇ивасод̇и гад̇ваа убосат̇ан̇г̇аани ад̇хидтааяа сааяанхасамаяам̣ сунивад̇т̇о субааруд̇о бан̃жасад̇аубаасагабаривуд̇о ж̇зд̇аванам̣ г̇анд̇ваа д̇хаммад̣̇зсанам̣ суд̇ваа ад̇д̇ано гхарам̣ ааг̇амма д̇зсам̣ убаасагаанам̣ саран̣асийлаубосат̇аанисам̣саад̣̇ибхзд̣̇ам̣ убаасагад̇хаммам̣ гат̇зд̇ваа д̇з убаасагз уяяож̇зси. д̇зсан̃жа д̇ассзва гхарз мудтихад̇т̇аббамаан̣абаад̣̇агаани бан̃жа габбияаман̃жасад̇аани баадзгговарагзсу бан̃н̃ад̇д̇аани хонд̇и. д̇з ад̇д̇ано ад̇д̇ано оварагам̣ бависид̇ваа самаабад̇д̇им̣ аббзд̇ваа нисийд̣̇им̣су, убаасагоби д̇ат̇зваагааси. д̇зна жа самаязна саавад̇т̇инаг̇арз сад̇д̇абан̃н̃ааса гуласад̇асахассаани васанд̇и, мануссаг̇ан̣анааяа адтаарасагодимануссаа. д̇зна батамаяаамз хад̇т̇иассамануссабхзрисад̣̇д̣̇аад̣̇ийхи саавад̇т̇инаг̇арам̣ махаасамуд̣̇д̣̇о вияа згасад̣̇д̣̇ам̣ ход̇и. маж̇жхимаяаамасамананд̇арз со сад̣̇д̣̇о бадиббассамбхад̇и . д̇амхи гаалз убаасаго самаабад̇д̇ид̇о вудтааяа ад̇д̇ано г̇ун̣з ааваж̇ж̇зд̇ваа ‘‘язнаахам̣ маг̇г̇асукзна паласукзна сукид̇о вихараами, ид̣̇ам̣ сукам̣ гам̣ ниссааяа лад̣̇д̇ха’’нд̇и жинд̇зд̇ваа ‘‘бхаг̇аванд̇ам̣ ниссааяаа’’д̇и бхаг̇авад̇и жид̇д̇ам̣ басаад̣̇зд̇ваа ‘‘бхаг̇аваа зд̇арахи гад̇амзна вихаарзна вихарад̇ий’’д̇и ааваж̇ж̇знд̇о д̣̇иб̣б̣зна жагкунаа зрааван̣авзссаван̣з д̣̇исваа д̣̇иб̣б̣ааяа сод̇ад̇хаад̇уяаа д̇хаммад̣̇зсанам̣ суд̇ваа жзд̇обарияан̃аан̣зна д̇зсам̣ басаннажид̇д̇ад̇ам̣ н̃ад̇ваа ‘‘яам̣нуунаахамби бхаг̇аванд̇ам̣ убхаяахид̇ам̣ бадибад̣̇ам̣ бужчзяяа’’нд̇и жинд̇зси. д̇асмаа со зганаг̇арз васанд̇оби саб̣б̣абажчаа ааг̇ад̇о, зван̃жа нзсам̣ ааг̇аманам̣ ан̃н̃ааси. д̇знааха – ‘‘ааг̇ан̃чи д̇з санд̇игз нааг̇арааж̇аа…бз… со жааби суд̇ваана бад̇ийд̇аруубо’’д̇и.
Ayaṃ pana upāsako kiñcāpi anāgāmī pakatiyāva ekabhattiko, tathāpi tadā uposathadivasoti katvā uposathaṅgāni adhiṭṭhāya sāyanhasamayaṃ sunivattho supāruto pañcasataupāsakaparivuto jetavanaṃ gantvā dhammadesanaṃ sutvā attano gharaṃ āgamma tesaṃ upāsakānaṃ saraṇasīlauposathānisaṃsādibhedaṃ upāsakadhammaṃ kathetvā te upāsake uyyojesi. Tesañca tasseva ghare muṭṭhihatthappamāṇapādakāni pañca kappiyamañcasatāni pāṭekkovarakesu paññattāni honti. Te attano attano ovarakaṃ pavisitvā samāpattiṃ appetvā nisīdiṃsu, upāsakopi tathevākāsi. Tena ca samayena sāvatthinagare sattapaññāsa kulasatasahassāni vasanti, manussagaṇanāya aṭṭhārasakoṭimanussā. Tena paṭhamayāme hatthiassamanussabherisaddādīhi sāvatthinagaraṃ mahāsamuddo viya ekasaddaṃ hoti. Majjhimayāmasamanantare so saddo paṭippassambhati . Tamhi kāle upāsako samāpattito vuṭṭhāya attano guṇe āvajjetvā ‘‘yenāhaṃ maggasukhena phalasukhena sukhito viharāmi, idaṃ sukhaṃ kaṃ nissāya laddha’’nti cintetvā ‘‘bhagavantaṃ nissāyā’’ti bhagavati cittaṃ pasādetvā ‘‘bhagavā etarahi katamena vihārena viharatī’’ti āvajjento dibbena cakkhunā erāvaṇavessavaṇe disvā dibbāya sotadhātuyā dhammadesanaṃ sutvā cetopariyañāṇena tesaṃ pasannacittataṃ ñatvā ‘‘yaṃnūnāhampi bhagavantaṃ ubhayahitaṃ paṭipadaṃ puccheyya’’nti cintesi. Tasmā so ekanagare vasantopi sabbapacchā āgato, evañca nesaṃ āgamanaṃ aññāsi. Tenāha – ‘‘āgañchi te santike nāgarājā…pe… so cāpi sutvāna patītarūpo’’ti.
384. ид̣̇аани ид̇о б̣ахид̣̇д̇хаа логасаммад̇зхи саман̣аб̣раахман̣зхи уггадтабхаавзна бхаг̇аванд̇ам̣ басам̣санд̇о ‘‘яз гзжимз’’д̇и г̇аат̇аад̣̇ваяамааха. д̇ад̇т̇а д̇ид̇т̇ияаад̇и нанд̣̇аважчасам̣гижжзхи аад̣̇ибуг̇г̇алзхи д̇ийхи д̇ид̇т̇агарзхи гад̇з д̣̇идтид̇ид̇т̇з ж̇аад̇аа, д̇зсам̣ саасанз баб̣б̣аж̇ид̇аа бууран̣аад̣̇аяо ча сад̇т̇ааро. д̇ад̇т̇а наадабуд̇д̇о ниг̇ан̣то, авасзсаа ааж̇ийвагаад̇и д̇з саб̣б̣з д̣̇ассзнд̇о ааха ‘‘яз гзжимз д̇ид̇т̇ияаа ваад̣̇асийлаа’’д̇и, ‘‘маяам̣ саммаа бадибаннаа, ан̃н̃з мижчаа бадибаннаа’’д̇и звам̣ ваад̣̇агаран̣асийлаа логам̣ мукасад̇д̇ийхи вид̇уд̣̇анд̇аа вижаранд̇и. ааж̇ийвагаа ваад̇и д̇з згаж̇жхамуд̣̇д̣̇идтз бхинд̣̇ид̇ваа д̣̇ассзд̇и. наад̇ид̇аранд̇ийд̇и наад̇иггаманд̇и. саб̣б̣зд̇и ан̃н̃зби яз гзжи д̇ид̇т̇ияасаавагаад̣̇аяо, д̇зби бариг̇г̇ан̣ханд̇о ааха. ‘‘тид̇о важ̇анд̇ам̣ вияаа’’д̇и яат̇аа гожи тид̇о г̇ад̇ивигало сийгхаг̇ааминам̣ бурисам̣ г̇ажчанд̇ам̣ наад̇ид̇арзяяа, звам̣ д̇з бан̃н̃ааг̇ад̇ияаа абхаавзна д̇з д̇з ад̇т̇аббабхзд̣̇з б̣уж̇жхид̇ум̣ асаггонд̇аа тид̇аа, ад̇иж̇аванабан̃н̃ам̣ бхаг̇аванд̇ам̣ наад̇ид̇аранд̇ийд̇и ад̇т̇о.
384. Idāni ito bahiddhā lokasammatehi samaṇabrāhmaṇehi ukkaṭṭhabhāvena bhagavantaṃ pasaṃsanto ‘‘ye kecime’’ti gāthādvayamāha. Tattha titthiyāti nandavacchasaṃkiccehi ādipuggalehi tīhi titthakarehi kate diṭṭhititthe jātā, tesaṃ sāsane pabbajitā pūraṇādayo cha satthāro. Tattha nāṭaputto nigaṇṭho, avasesā ājīvakāti te sabbe dassento āha ‘‘ye kecime titthiyā vādasīlā’’ti, ‘‘mayaṃ sammā paṭipannā, aññe micchā paṭipannā’’ti evaṃ vādakaraṇasīlā lokaṃ mukhasattīhi vitudantā vicaranti. Ājīvakā vāti te ekajjhamuddiṭṭhe bhinditvā dasseti. Nātitarantīti nātikkamanti. Sabbeti aññepi ye keci titthiyasāvakādayo, tepi pariggaṇhanto āha. ‘‘Ṭhito vajantaṃ viyā’’ti yathā koci ṭhito gativikalo sīghagāminaṃ purisaṃ gacchantaṃ nātitareyya, evaṃ te paññāgatiyā abhāvena te te atthappabhede bujjhituṃ asakkontā ṭhitā, atijavanapaññaṃ bhagavantaṃ nātitarantīti attho.
385. б̣раахман̣аа ваад̣̇асийлаа вуд̣̇д̇хаа жаад̇и зд̇д̇аавад̇аа жан̇гийд̇ааругкабогкарасаад̇иж̇аан̣уссон̣иаад̣̇аяо д̣̇ассзд̇и, аби б̣раахман̣аа санд̇и гзжийд̇и иминаа маж̇жхимааби д̣̇ахарааби гзвалам̣ б̣раахман̣аа санд̇и ад̇т̇и убалаб̣бханд̇и гзжийд̇и звам̣ ассалааяанаваасздтаамб̣адтауд̇д̇арамаан̣авагаад̣̇аяо д̣̇ассзд̇и. ад̇т̇аб̣ад̣̇д̇хаад̇и ‘‘аби ну ко имам̣ бан̃хам̣ б̣яаагарзяяа, имам̣ ган̇кам̣ чинд̣̇зяяаа’’д̇и звам̣ ад̇т̇аб̣ад̣̇д̇хаа бхаванд̇и. яз жааби ан̃н̃зд̇и ан̃н̃зби яз ‘‘маяам̣ ваад̣̇ино’’д̇и звам̣ ман̃н̃амаанаа вижаранд̇и кад̇д̇ияабан̣д̣ид̇аб̣раахман̣аб̣рахмад̣̇зваяагкаад̣̇аяо абаримаан̣аа. д̇зби саб̣б̣з д̇аяи ад̇т̇аб̣ад̣̇д̇хаа бхаванд̇ийд̇и д̣̇ассзд̇и.
385.Brāhmaṇā vādasīlā vuddhā cāti ettāvatā caṅkītārukkhapokkharasātijāṇussoṇiādayo dasseti, api brāhmaṇā santi kecīti iminā majjhimāpi daharāpi kevalaṃ brāhmaṇā santi atthi upalabbhanti kecīti evaṃ assalāyanavāseṭṭhaambaṭṭhauttaramāṇavakādayo dasseti. Atthabaddhāti ‘‘api nu kho imaṃ pañhaṃ byākareyya, imaṃ kaṅkhaṃ chindeyyā’’ti evaṃ atthabaddhā bhavanti. Ye cāpi aññeti aññepi ye ‘‘mayaṃ vādino’’ti evaṃ maññamānā vicaranti khattiyapaṇḍitabrāhmaṇabrahmadevayakkhādayo aparimāṇā. Tepi sabbe tayi atthabaddhā bhavantīti dasseti.
386-7. звам̣ наанаббагаарзхи бхаг̇аванд̇ам̣ басам̣сид̇ваа ид̣̇аани д̇хаммзнзва д̇ам̣ басам̣сид̇ваа д̇хаммагат̇ам̣ яаажанд̇о ‘‘аяан̃хи д̇хаммо’’д̇и г̇аат̇аад̣̇ваяамааха. д̇ад̇т̇а аяан̃хи д̇хаммод̇и сад̇д̇ад̇им̣са б̣од̇хибагкияад̇хаммз санд̇хааяааха. нибун̣од̇и сан̣хо д̣̇уббадивиж̇жхо. сукод̇и бадивид̣̇д̇хо самаано логуд̇д̇арасукамаавахад̇и, д̇асмаа сукаавахад̇д̇аа ‘‘суко’’д̇и вужжад̇и. суббавуд̇д̇од̇и суд̣̇зсид̇о. суссуусамаанаад̇и сод̇угаамамхаад̇и ад̇т̇о. д̇ам̣ но вад̣̇аад̇и д̇ам̣ д̇хаммам̣ амхаагам̣ вад̣̇а. ‘‘д̇вам̣ но’’д̇иби баато, д̇вам̣ амхаагам̣ вад̣̇аад̇и ад̇т̇о. саб̣б̣збимз бхигкавод̇и д̇ан̇кан̣ам̣ нисиннаани гира бан̃жа бхигкусад̇аани хонд̇и, д̇аани д̣̇ассзнд̇о яаажад̇и. убаасагаа жаабийд̇и ад̇д̇ано бариваарз ан̃н̃з жа д̣̇ассзд̇и. сзсамзд̇т̇а баагадамзва.
386-7. Evaṃ nānappakārehi bhagavantaṃ pasaṃsitvā idāni dhammeneva taṃ pasaṃsitvā dhammakathaṃ yācanto ‘‘ayañhi dhammo’’ti gāthādvayamāha. Tattha ayañhi dhammoti sattatiṃsa bodhipakkhiyadhamme sandhāyāha. Nipuṇoti saṇho duppaṭivijjho. Sukhoti paṭividdho samāno lokuttarasukhamāvahati, tasmā sukhāvahattā ‘‘sukho’’ti vuccati. Suppavuttoti sudesito. Sussūsamānāti sotukāmamhāti attho. Taṃ no vadāti taṃ dhammaṃ amhākaṃ vada. ‘‘Tvaṃ no’’tipi pāṭho, tvaṃ amhākaṃ vadāti attho. Sabbepime bhikkhavoti taṅkhaṇaṃ nisinnāni kira pañca bhikkhusatāni honti, tāni dassento yācati. Upāsakā cāpīti attano parivāre aññe ca dasseti. Sesamettha pākaṭameva.
388. ат̇а бхаг̇аваа анаг̇аарияабадибад̣̇ам̣ д̇аава д̣̇ассзд̇ум̣ бхигкуу ааманд̇зд̇ваа ‘‘сун̣аат̇а мз бхигкаво’’д̇иаад̣̇имааха. д̇ад̇т̇а д̇хаммам̣ д̇худ̇ам̣ д̇ан̃жа жараат̇а саб̣б̣зд̇и гилзсз д̇хунаад̇ийд̇и д̇худ̇о, зваруубам̣ гилзсад̇хунанагам̣ бадибад̣̇аад̇хаммам̣ сааваяаами во, д̇ан̃жа маяаа саавид̇ам̣ саб̣б̣з жарат̇а бадибаж̇ж̇ат̇а, маа бамаад̣̇ид̇т̇аад̇и вуд̇д̇ам̣ ход̇и. ирияаабат̇анд̇и г̇аманаад̣̇ижад̇уб̣б̣ид̇хам̣. баб̣б̣аж̇ид̇аануломиганд̇и саман̣асааруббам̣ сад̇исамбаж̇ан̃н̃аяуд̇д̇ам̣. аран̃н̃з гаммадтаанаануяог̇авасзна бавад̇д̇амзваад̇и абарз. сзвзт̇а нанд̇и д̇ам̣ ирияаабат̇ам̣ бхаж̇зяяа . ад̇т̇ад̣̇асод̇и хид̇аанубассий. муд̇иймаад̇и б̣уд̣̇д̇химаа. сзсамзд̇т̇а г̇аат̇ааяа баагадамзва.
388. Atha bhagavā anagāriyapaṭipadaṃ tāva dassetuṃ bhikkhū āmantetvā ‘‘suṇātha me bhikkhavo’’tiādimāha. Tattha dhammaṃ dhutaṃ tañca carātha sabbeti kilese dhunātīti dhuto, evarūpaṃ kilesadhunanakaṃ paṭipadādhammaṃ sāvayāmi vo, tañca mayā sāvitaṃ sabbe caratha paṭipajjatha, mā pamāditthāti vuttaṃ hoti. Iriyāpathanti gamanādicatubbidhaṃ. Pabbajitānulomikanti samaṇasāruppaṃ satisampajaññayuttaṃ. Araññe kammaṭṭhānānuyogavasena pavattamevāti apare. Sevetha nanti taṃ iriyāpathaṃ bhajeyya . Atthadasoti hitānupassī. Mutīmāti buddhimā. Sesamettha gāthāya pākaṭameva.
389. но вз вигаалзд̇и звам̣ баб̣б̣аж̇ид̇аануломигам̣ ирияаабат̇ам̣ сзвамаано жа д̣̇иваамаж̇жханхигавийд̇иггамам̣ убаад̣̇ааяа вигаалз на жарзяяа бхигку, яуд̇д̇агаалз зва бана г̇аамам̣ бин̣д̣ааяа жарзяяа. гим̣ гааран̣ам̣? агаалажаарин̃хи саж̇анд̇и сан̇г̇аа, агаалажаарим̣ буг̇г̇алам̣ рааг̇асан̇г̇аад̣̇аяо анзгз сан̇г̇аа саж̇анд̇и бариссаж̇анд̇и убаг̇уханд̇и аллийяанд̇и. д̇асмаа вигаалз на жаранд̇и б̣уд̣̇д̇хаа, д̇асмаа яз жад̇усажжаб̣уд̣̇д̇хаа арияабуг̇г̇алаа, на д̇з вигаалз бин̣д̣ааяа жаранд̇ийд̇и. д̇зна гира самаязна вигаалабхож̇анасигкаабад̣̇ам̣ аббан̃н̃ад̇д̇ам̣ ход̇и, д̇асмаа д̇хаммад̣̇зсанаавасзнзвзд̇т̇а бут̇уж̇ж̇анаанам̣ аад̣̇ийнавам̣ д̣̇ассзнд̇о имам̣ г̇аат̇амааха. арияаа бана саха маг̇г̇абадилаабхаа зва д̇ад̇о бадивирад̇аа хонд̇и, зсаа д̇хаммад̇аа.
389.No ve vikāleti evaṃ pabbajitānulomikaṃ iriyāpathaṃ sevamāno ca divāmajjhanhikavītikkamaṃ upādāya vikāle na careyya bhikkhu, yuttakāle eva pana gāmaṃ piṇḍāya careyya. Kiṃ kāraṇaṃ? Akālacāriñhi sajanti saṅgā, akālacāriṃ puggalaṃ rāgasaṅgādayo aneke saṅgā sajanti parissajanti upaguhanti allīyanti. Tasmā vikāle nacaranti buddhā, tasmā ye catusaccabuddhā ariyapuggalā, na te vikāle piṇḍāya carantīti. Tena kira samayena vikālabhojanasikkhāpadaṃ appaññattaṃ hoti, tasmā dhammadesanāvasenevettha puthujjanānaṃ ādīnavaṃ dassento imaṃ gāthamāha. Ariyā pana saha maggapaṭilābhā eva tato paṭiviratā honti, esā dhammatā.
390. звам̣ вигаалажарияам̣ бадисзд̇хзд̇ваа ‘‘гаалз жаранд̇знаби звам̣ жарид̇аб̣б̣а’’нд̇и д̣̇ассзнд̇о ааха ‘‘руубаа жа сад̣̇д̣̇аа жаа’’д̇и. д̇ассад̇т̇о – яз д̇з руубаад̣̇аяо наанаббагаарагам̣ мад̣̇ам̣ ж̇анзнд̇аа сад̇д̇з саммад̣̇аяанд̇и, д̇зсу бин̣д̣абаад̇абаарисуд̣̇д̇хисуд̇д̇аад̣̇ийсу (ма. ни. 3.438 аад̣̇аяо) вуд̇д̇анаязна чанд̣̇ам̣ винод̣̇зд̇ваа яуд̇д̇агаалзнзва баад̇араасам̣ бависзяяаад̇и. зд̇т̇а жа баад̇о асид̇аб̣б̣од̇и баад̇араасо, бин̣д̣абаад̇ассзд̇ам̣ наамам̣. яо яад̇т̇а лаб̣бхад̇и, со бад̣̇зсоби д̇ам̣ яог̇зна ‘‘баад̇араасо’’д̇и ид̇ха вуд̇д̇о. яад̇о бин̣д̣абаад̇ам̣ лабхад̇и, д̇ам̣ огаасам̣ г̇ажчзяяаад̇и звамзд̇т̇а ад̇т̇о взд̣̇ид̇аб̣б̣о.
390. Evaṃ vikālacariyaṃ paṭisedhetvā ‘‘kāle carantenapi evaṃ caritabba’’nti dassento āha ‘‘rūpā ca saddā cā’’ti. Tassattho – ye te rūpādayo nānappakārakaṃ madaṃ janentā satte sammadayanti, tesu piṇḍapātapārisuddhisuttādīsu (ma. ni. 3.438 ādayo) vuttanayena chandaṃ vinodetvā yuttakāleneva pātarāsaṃ paviseyyāti. Ettha ca pāto asitabboti pātarāso, piṇḍapātassetaṃ nāmaṃ. Yo yattha labbhati, so padesopi taṃ yogena ‘‘pātarāso’’ti idha vutto. Yato piṇḍapātaṃ labhati, taṃ okāsaṃ gaccheyyāti evamettha attho veditabbo.
391. звам̣ бавидто –
391. Evaṃ paviṭṭho –
‘‘бин̣д̣ан̃жа бхигку самаязна лад̣̇д̇хаа,
‘‘Piṇḍañca bhikkhu samayena laddhā,
зго бадиггамма рахо нисийд̣̇з;
Eko paṭikkamma raho nisīde;
аж̇жхад̇д̇ажинд̇ий на мано б̣ахид̣̇д̇хаа,
Ajjhattacintī na mano bahiddhā,
нижчаараяз сан̇г̇ахид̇ад̇д̇абхааво’’.
Nicchāraye saṅgahitattabhāvo’’.
д̇ад̇т̇а бин̣д̣анд̇и миссагабхигкам̣, саа хи д̇ад̇о д̇ад̇о самод̇хаанзд̇ваа самбин̣д̣ид̇адтзна ‘‘бин̣д̣о’’д̇и вужжад̇и. самаязнаад̇и анд̇омаж̇жханхигагаалз. зго бадиггаммаад̇и гааяавивзгам̣ самбаад̣̇знд̇о ад̣̇уд̇ияо нивад̇д̇ид̇ваа. аж̇жхад̇д̇ажинд̇ийд̇и д̇илагкан̣ам̣ ааробзд̇ваа канд̇хасанд̇аанам̣ жинд̇знд̇о. на мано б̣ахид̣̇д̇хаа нижчаараязд̇и б̣ахид̣̇д̇хаа руубаад̣̇ийсу рааг̇авасзна жид̇д̇ам̣ на нийхарз. сан̇г̇ахид̇ад̇д̇абхаавод̇и судту г̇ахид̇ажид̇д̇о.
Tattha piṇḍanti missakabhikkhaṃ, sā hi tato tato samodhānetvā sampiṇḍitaṭṭhena ‘‘piṇḍo’’ti vuccati. Samayenāti antomajjhanhikakāle. Eko paṭikkammāti kāyavivekaṃ sampādento adutiyo nivattitvā. Ajjhattacintīti tilakkhaṇaṃ āropetvā khandhasantānaṃ cintento. Na mano bahiddhānicchārayeti bahiddhā rūpādīsu rāgavasena cittaṃ na nīhare. Saṅgahitattabhāvoti suṭṭhu gahitacitto.
392. звам̣ вихаранд̇о жа –
392. Evaṃ viharanto ca –
‘‘сажзби со саллабз саавагзна,
‘‘Sacepi so sallape sāvakena,
ан̃н̃зна ваа гзнажи бхигкунаа ваа;
Aññena vā kenaci bhikkhunā vā;
д̇хаммам̣ бан̣ийд̇ам̣ д̇амуд̣̇аахарзяяа,
Dhammaṃ paṇītaṃ tamudāhareyya,
на бзсун̣ам̣ ноби баруубаваад̣̇ам̣’’.
Na pesuṇaṃ nopi parūpavādaṃ’’.
гим̣ вуд̇д̇ам̣ ход̇и? со яог̇ааважаро гин̃жид̣̇зва сод̇угаамад̇ааяа убаг̇ад̇зна саавагзна ваа гзнажи ан̃н̃ад̇ид̇т̇ияаг̇ахадтаад̣̇инаа ваа ид̇хзва баб̣б̣аж̇ид̇зна бхигкунаа ваа сад̣̇д̇хим̣ сажзби саллабз, ат̇а явааяам̣ маг̇г̇апалаад̣̇ибадисам̣яуд̇д̇о д̣̇асагат̇аавад̇т̇убхзд̣̇о ваа ад̇аббагадтзна бан̣ийд̇о д̇хаммо. д̇ам̣ д̇хаммам̣ бан̣ийд̇ам̣ уд̣̇аахарзяяа, ан̃н̃ам̣ бана бисун̣аважанам̣ ваа баруубаваад̣̇ам̣ ваа аббамад̇д̇агамби на уд̣̇аахарзяяаад̇и.
Kiṃ vuttaṃ hoti? So yogāvacaro kiñcideva sotukāmatāya upagatena sāvakena vā kenaci aññatitthiyagahaṭṭhādinā vā idheva pabbajitena bhikkhunā vā saddhiṃ sacepi sallape, atha yvāyaṃ maggaphalādipaṭisaṃyutto dasakathāvatthubhedo vā atappakaṭṭhena paṇīto dhammo. Taṃ dhammaṃ paṇītaṃ udāhareyya, aññaṃ pana pisuṇavacanaṃ vā parūpavādaṃ vā appamattakampi na udāhareyyāti.
393. ид̣̇аани д̇асмим̣ баруубаваад̣̇з д̣̇осам̣ д̣̇ассзнд̇о ааха ‘‘ваад̣̇ан̃хи згз’’д̇и. д̇ассад̇т̇о – ид̇хзгажжз могхабурисаа баруубаваад̣̇асан̃хид̇ам̣ наанаббагаарам̣ виг̇г̇аахигагат̇аабхзд̣̇ам̣ ваад̣̇ам̣ бадисзнияанд̇и вируж̇жханд̇и, яуж̇жхид̇угаамаа худ̇ваа сзнааяа бадимукам̣ г̇ажчанд̇аа вияа хонд̇и, д̇з маяам̣ лаамагабан̃н̃з на басам̣саама. гим̣ гааран̣ам̣? д̇ад̇о д̇ад̇о нз басаж̇анд̇и сан̇г̇аа, яасмаа д̇з д̇аад̣̇исагз буг̇г̇алз д̇ад̇о д̇ад̇о важанабат̇ад̇о самудтааяа виваад̣̇асан̇г̇аа саж̇анд̇и аллийяанд̇и. гим̣ гааран̣аа саж̇анд̇ийд̇и? жид̇д̇ан̃хи д̇з д̇ад̇т̇а г̇амзнд̇и д̣̇уурз, яасмаа д̇з бадисзнияанд̇аа жид̇д̇ам̣ д̇ад̇т̇а г̇амзнд̇и, яад̇т̇а г̇ад̇ам̣ самат̇авибассанаанам̣ д̣̇уурз ход̇ийд̇и.
393. Idāni tasmiṃ parūpavāde dosaṃ dassento āha ‘‘vādañhi eke’’ti. Tassattho – idhekacce moghapurisā parūpavādasañhitaṃ nānappakāraṃ viggāhikakathābhedaṃ vādaṃ paṭiseniyanti virujjhanti, yujjhitukāmā hutvā senāya paṭimukhaṃ gacchantā viya honti, te mayaṃ lāmakapaññe na pasaṃsāma. Kiṃ kāraṇaṃ? Tato tato ne pasajanti saṅgā, yasmā te tādisake puggale tato tato vacanapathato samuṭṭhāya vivādasaṅgā sajanti allīyanti. Kiṃ kāraṇā sajantīti? Cittañhi te tattha gamenti dūre, yasmā te paṭiseniyantā cittaṃ tattha gamenti, yattha gataṃ samathavipassanānaṃ dūre hotīti.
394-5. звам̣ барид̇д̇абан̃н̃аанам̣ бавад̇д̇им̣ д̣̇ассзд̇ваа ид̣̇аани махаабан̃н̃аанам̣ бавад̇д̇им̣ д̣̇ассзнд̇о ааха ‘‘бин̣д̣ам̣ вихаарам̣…бз… сааваго’’д̇и. д̇ад̇т̇а вихаарзна бад̇иссаяо, саяанаасанзна ман̃жабийтанд̇и д̇ийхиби бад̣̇зхи сзнаасанамзва вуд̇д̇ам̣. аабанд̇и уд̣̇агам̣. сан̇гхаадираж̇уубаваахананд̇и бам̣сумалаад̣̇ино сан̇гхаадираж̇асса д̇хованам̣. суд̇ваана д̇хаммам̣ суг̇ад̇зна д̣̇зсид̇анд̇и саб̣б̣аасавасам̣вараад̣̇ийсу ‘‘бадисан̇каа яонисо жийварам̣ бадисзвад̇и сийд̇асса бадигхаад̇ааяаа’’д̇иаад̣̇инаа (ма. ни. 1.23; а. ни. 6.58) наязна бхаг̇авад̇аа д̣̇зсид̇ам̣ д̇хаммам̣ суд̇ваа. сан̇кааяа сзвз варабан̃н̃асаавагод̇и зд̇ам̣ ид̇ха бин̣д̣анд̇и вуд̇д̇ам̣ бин̣д̣абаад̇ам̣, вихаараад̣̇ийхи вуд̇д̇ам̣ сзнаасанам̣, аабамукзна д̣̇ассид̇ам̣ г̇илаанабажжаяам̣, сан̇гхаадияаа жийваранд̇и жад̇уб̣б̣ид̇хамби бажжаяам̣ сан̇кааяа ‘‘яаавад̣̇зва имасса гааяасса тид̇ияаа’’д̇иаад̣̇инаа (ма. ни. 1.23; а. ни. 6.58) наязна бажжавзгкид̇ваа сзвз варабан̃н̃асааваго, сзвид̇ум̣ саггун̣зяяа варабан̃н̃асса д̇ат̇ааг̇ад̇асса сааваго сзгко ваа бут̇уж̇ж̇ано ваа, ниббарияааязна жа арахаа. со хи жад̇ураабассзно ‘‘сан̇кааязгам̣ бадисзвад̇и, сан̇кааязгам̣ ад̇хиваасзд̇и, сан̇кааязгам̣ бариваж̇ж̇зд̇и, сан̇кааязгам̣ винод̣̇зд̇ий’’д̇и (д̣̇ий. ни. 3.308; ма. ни. 2.168; а. ни. 10.20) вуд̇д̇о. яассаа жа сан̇кааяа сзвз варабан̃н̃асааваго, д̇асмаа хи бин̣д̣з…бз… яат̇аа богкарз ваариб̣инд̣̇у, д̇ат̇аа ход̇ийд̇и взд̣̇ид̇аб̣б̣о.
394-5. Evaṃ parittapaññānaṃ pavattiṃ dassetvā idāni mahāpaññānaṃ pavattiṃ dassento āha ‘‘piṇḍaṃ vihāraṃ…pe… sāvako’’ti. Tattha vihārena patissayo, sayanāsanena mañcapīṭhanti tīhipi padehi senāsanameva vuttaṃ. Āpanti udakaṃ. Saṅghāṭirajūpavāhananti paṃsumalādino saṅghāṭirajassa dhovanaṃ. Sutvāna dhammaṃ sugatena desitanti sabbāsavasaṃvarādīsu ‘‘paṭisaṅkhā yoniso cīvaraṃ paṭisevati sītassa paṭighātāyā’’tiādinā (ma. ni. 1.23; a. ni. 6.58) nayena bhagavatā desitaṃ dhammaṃ sutvā. Saṅkhāya sevevarapaññasāvakoti etaṃ idha piṇḍanti vuttaṃ piṇḍapātaṃ, vihārādīhi vuttaṃ senāsanaṃ, āpamukhena dassitaṃ gilānapaccayaṃ, saṅghāṭiyā cīvaranti catubbidhampi paccayaṃ saṅkhāya ‘‘yāvadeva imassa kāyassa ṭhitiyā’’tiādinā (ma. ni. 1.23; a. ni. 6.58) nayena paccavekkhitvā seve varapaññasāvako, sevituṃ sakkuṇeyya varapaññassa tathāgatassa sāvako sekkho vā puthujjano vā, nippariyāyena ca arahā. So hi caturāpasseno ‘‘saṅkhāyekaṃ paṭisevati, saṅkhāyekaṃ adhivāseti, saṅkhāyekaṃ parivajjeti, saṅkhāyekaṃ vinodetī’’ti (dī. ni. 3.308; ma. ni. 2.168; a. ni. 10.20) vutto. Yassā ca saṅkhāya seve varapaññasāvako, tasmā hi piṇḍe…pe… yathā pokkhare vāribindu, tathā hotīti veditabbo.
396. звам̣ кийн̣аасавабадибад̇д̇им̣ д̣̇ассзнд̇о арахад̇д̇анигуудзна анаг̇аарияабадибад̣̇ам̣ нидтаабзд̇ваа ид̣̇аани аг̇аарияабадибад̣̇ам̣ д̣̇ассзд̇ум̣ ‘‘г̇ахадтавад̇д̇ам̣ бана во’’д̇иаад̣̇имааха. д̇ад̇т̇а батамаг̇аат̇ааяа д̇аава саавагод̇и аг̇аарияасааваго. сзсам̣ уд̇д̇аанад̇т̇амзва. аяам̣ бана яож̇анаа – яо маяаа ид̇о буб̣б̣з гзвало аб̣яаамиссо сагало барибун̣н̣о бхигкуд̇хаммо гат̇ид̇о. зса кзд̇д̇авад̇т̇уаад̣̇ибариг̇г̇ахзхи сабариг̇г̇ахзна на лаб̣бхаа пассзд̇ум̣ на саггаа ад̇хиг̇анд̇унд̇и.
396. Evaṃ khīṇāsavapaṭipattiṃ dassento arahattanikūṭena anagāriyapaṭipadaṃ niṭṭhāpetvā idāni agāriyapaṭipadaṃ dassetuṃ ‘‘gahaṭṭhavattaṃ pana vo’’tiādimāha. Tattha paṭhamagāthāya tāva sāvakoti agāriyasāvako. Sesaṃ uttānatthameva. Ayaṃ pana yojanā – yo mayā ito pubbe kevalo abyāmisso sakalo paripuṇṇo bhikkhudhammo kathito. Esa khettavatthuādipariggahehi sapariggahena na labbhā phassetuṃ na sakkā adhigantunti.
397. звам̣ д̇асса бхигкуд̇хаммам̣ бадисзд̇хзд̇ваа г̇ахадтад̇хаммамзва д̣̇ассзнд̇о ааха ‘‘баан̣ам̣ на ханз’’д̇и. д̇ад̇т̇а буримад̣дхзна д̇игодибарисуд̣̇д̇хаа баан̣аад̇ибаад̇аавзраман̣и вуд̇д̇аа, бажчимад̣дхзна сад̇д̇зсу хид̇абадибад̇д̇и. д̇ад̇ияабаад̣̇о жзд̇т̇а каг̇г̇ависаан̣асуд̇д̇з (су. ни. 35 аад̣̇аяо) жад̇уд̇т̇абаад̣̇з т̇ааварад̇асабхзд̣̇о мзд̇д̇асуд̇д̇аван̣н̣анааяам̣ (су. ни. 143 аад̣̇аяо) саб̣б̣аббагаарад̇о ван̣н̣ид̇о. сзсам̣ уд̇д̇аанад̇т̇амзва. уббадибаадияаа бана яож̇анаа гаад̇аб̣б̣аа – д̇асат̇ааварзсу саб̣б̣зсу бхууд̇зсу нид̇хааяа д̣̇ан̣д̣ам̣ на ханз на гхаад̇аязяяа наануж̇ан̃н̃аад̇и. ‘‘нид̇хааяа д̣̇ан̣д̣а’’нд̇и ид̇о ваа барам̣ ‘‘вад̇д̇зяяаа’’д̇и баатасзсо аахарид̇аб̣б̣о. ид̇арат̇аа хи на буб̣б̣знаабарам̣ санд̇хияад̇и.
397. Evaṃ tassa bhikkhudhammaṃ paṭisedhetvā gahaṭṭhadhammameva dassento āha ‘‘pāṇaṃ na hane’’ti. Tattha purimaḍḍhena tikoṭiparisuddhā pāṇātipātāveramaṇi vuttā, pacchimaḍḍhena sattesu hitapaṭipatti. Tatiyapādo cettha khaggavisāṇasutte (su. ni. 35 ādayo) catutthapāde thāvaratasabhedo mettasuttavaṇṇanāyaṃ (su. ni. 143 ādayo) sabbappakārato vaṇṇito. Sesaṃ uttānatthameva. Uppaṭipāṭiyā pana yojanā kātabbā – tasathāvaresu sabbesu bhūtesu nidhāya daṇḍaṃ na hane na ghātayeyya nānujaññāti. ‘‘Nidhāya daṇḍa’’nti ito vā paraṃ ‘‘vatteyyā’’ti pāṭhaseso āharitabbo. Itarathā hi na pubbenāparaṃ sandhiyati.
398. звам̣ батамасигкаабад̣̇ам̣ д̣̇ассзд̇ваа ид̣̇аани д̣̇уд̇ияасигкаабад̣̇ам̣ д̣̇ассзнд̇о ааха ‘‘д̇ад̇о ад̣̇инна’’нд̇и. д̇ад̇т̇а гин̃жийд̇и аббам̣ ваа б̣ахум̣ ваа. гважийд̇и г̇аамз ваа аран̃н̃з ваа. саавагод̇и аг̇аарияасааваго. б̣уж̇жхамаанод̇и ‘‘барасанд̇агамид̣̇а’’нд̇и ж̇аанамаано. саб̣б̣ам̣ ад̣̇иннам̣ бариваж̇ж̇аязяяаад̇и зван̃хи бадибаж̇ж̇амаано саб̣б̣ам̣ ад̣̇иннам̣ бариваж̇ж̇зяяа, но ан̃н̃ат̇аад̇и д̣̇ийбзд̇и. сзсамзд̇т̇а вуд̇д̇анаяан̃жа баагадан̃жаад̇и.
398. Evaṃ paṭhamasikkhāpadaṃ dassetvā idāni dutiyasikkhāpadaṃ dassento āha ‘‘tato adinna’’nti. Tattha kiñcīti appaṃ vā bahuṃ vā. Kvacīti gāme vā araññe vā. Sāvakoti agāriyasāvako. Bujjhamānoti ‘‘parasantakamida’’nti jānamāno. Sabbaṃ adinnaṃ parivajjayeyyāti evañhi paṭipajjamāno sabbaṃ adinnaṃ parivajjeyya, no aññathāti dīpeti. Sesamettha vuttanayañca pākaṭañcāti.
399. звам̣ д̣̇уд̇ияасигкаабад̣̇амби д̇игодибарисуд̣̇д̇хам̣ д̣̇ассзд̇ваа уггадтабарижчзд̣̇ад̇о бабхуд̇и д̇ад̇ияам̣ д̣̇ассзнд̇о ааха ‘‘аб̣рахмажарияа’’нд̇и. д̇ад̇т̇а асамбхун̣анд̇од̇и асаггонд̇о.
399. Evaṃ dutiyasikkhāpadampi tikoṭiparisuddhaṃ dassetvā ukkaṭṭhaparicchedato pabhuti tatiyaṃ dassento āha ‘‘abrahmacariya’’nti. Tattha asambhuṇantoti asakkonto.
400. ид̣̇аани жад̇уд̇т̇асигкаабад̣̇ам̣ д̣̇ассзнд̇о ааха ‘‘сабхаг̇г̇ад̇о ваа’’д̇и. д̇ад̇т̇а сабхаг̇г̇ад̇од̇и сант̇ааг̇аараад̣̇иг̇ад̇о. барисаг̇г̇ад̇од̇и бууг̇амаж̇ж̇аг̇ад̇о. сзсамзд̇т̇а вуд̇д̇анаяан̃жа баагадан̃жаад̇и.
400. Idāni catutthasikkhāpadaṃ dassento āha ‘‘sabhaggato vā’’ti. Tattha sabhaggatoti santhāgārādigato. Parisaggatoti pūgamajjagato. Sesamettha vuttanayañca pākaṭañcāti.
401. звам̣ жад̇уд̇т̇асигкаабад̣̇амби д̇игодибарисуд̣̇д̇хам̣ д̣̇ассзд̇ваа бан̃жамам̣ д̣̇ассзнд̇о ааха ‘‘маж̇ж̇ан̃жа баана’’нд̇и. д̇ад̇т̇а маж̇ж̇ан̃жа баананд̇и г̇аат̇ааб̣анд̇хасукад̇т̇ам̣ звам̣ вуд̇д̇ам̣. аяам̣ банад̇т̇о ‘‘маж̇ж̇абаанан̃жа на самаажарзяяаа’’д̇и. д̇хаммам̣ иманд̇и имам̣ маж̇ж̇абаанавзраман̣ийд̇хаммам̣. уммаад̣̇ананд̇анд̇и уммаад̣̇анабарияосаанам̣. яо хи саб̣б̣алахуго маж̇ж̇абаанасса вибааго, со мануссабхууд̇асса уммад̇д̇агасам̣вад̇д̇аниго ход̇и. ид̇и нам̣ вид̣̇ид̇ваад̇и ид̇и нам̣ маж̇ж̇абаанам̣ н̃ад̇ваа. сзсамзд̇т̇а вуд̇д̇анаяан̃жа баагадан̃жаад̇и.
401. Evaṃ catutthasikkhāpadampi tikoṭiparisuddhaṃ dassetvā pañcamaṃ dassento āha ‘‘majjañca pāna’’nti. Tattha majjañca pānanti gāthābandhasukhatthaṃ evaṃ vuttaṃ. Ayaṃ panattho ‘‘majjapānañca na samācareyyā’’ti. Dhammaṃ imanti imaṃ majjapānaveramaṇīdhammaṃ. Ummādanantanti ummādanapariyosānaṃ. Yo hi sabbalahuko majjapānassa vipāko, so manussabhūtassa ummattakasaṃvattaniko hoti. Iti naṃ viditvāti iti naṃ majjapānaṃ ñatvā. Sesamettha vuttanayañca pākaṭañcāti.
402. звам̣ бан̃жамасигкаабад̣̇амби д̇игодибарисуд̣̇д̇хам̣ д̣̇ассзд̇ваа ид̣̇аани буримасигкаабад̣̇аанамби маж̇ж̇абаанамзва сам̣гилзсагаран̃жа бхзд̣̇агаран̃жа д̣̇ассзд̇ваа д̣̇ал̣хад̇арам̣ д̇ад̇о взраман̣ияам̣ нияож̇знд̇о ааха ‘‘мад̣̇аа хи баабаани гаронд̇ий’’д̇и. д̇ад̇т̇а мад̣̇аад̇и мад̣̇ахзд̇у. хигааро бад̣̇абууран̣амад̇д̇з нибаад̇о. баабаани гаронд̇ийд̇и баан̣аад̇ибаад̇аад̣̇ийни саб̣б̣аагусалаани гаронд̇и. уммаад̣̇анам̣ мохананд̇и баралогз уммаад̣̇анам̣ ихалогз моханам̣. сзсам̣ уд̇д̇аанад̇т̇амзва.
402. Evaṃ pañcamasikkhāpadampi tikoṭiparisuddhaṃ dassetvā idāni purimasikkhāpadānampi majjapānameva saṃkilesakarañca bhedakarañca dassetvā daḷhataraṃ tato veramaṇiyaṃ niyojento āha ‘‘madā hi pāpāni karontī’’ti. Tattha madāti madahetu. Hikāro padapūraṇamatte nipāto. Pāpāni karontīti pāṇātipātādīni sabbākusalāni karonti. Ummādanaṃ mohananti paraloke ummādanaṃ ihaloke mohanaṃ. Sesaṃ uttānatthameva.
403-4. зд̇д̇аавад̇аа аг̇аарияасаавагасса нижжасийлам̣ д̣̇ассзд̇ваа ид̣̇аани убосат̇ан̇г̇аани д̣̇ассзнд̇о ‘‘баан̣ам̣ на ханз’’д̇и г̇аат̇аад̣̇ваяамааха. д̇ад̇т̇а аб̣рахмажарияаад̇и асздтажарияабхууд̇аа. мзт̇унаад̇и мзт̇унад̇хаммасамаабад̇д̇ид̇о. рад̇д̇им̣ на бхун̃ж̇зяяа вигаалабхож̇ананд̇и рад̇д̇имби на бхун̃ж̇зяяа, д̣̇ивааби гаалаад̇игганд̇абхож̇анам̣ на бхун̃ж̇зяяа. на жа г̇анд̇ханд̇и зд̇т̇а г̇анд̇хаг̇г̇ахан̣зна вилзбанажун̣н̣аад̣̇ийниби г̇ахид̇аанзваад̇и взд̣̇ид̇аб̣б̣аани. ман̃жзд̇и габбияаман̃жз. сант̇ад̇зд̇и д̇аддигаад̣̇ийхи габбияад̇т̇аран̣зхи ад̇т̇ад̇з. чамааяам̣ бана г̇онагаад̣̇исант̇ад̇ааяаби ваддад̇и. адтан̇г̇иганд̇и бан̃жан̇г̇игам̣ вияа д̇уурияам̣, на ан̇г̇авинимуд̇д̇ам̣. д̣̇угканд̇аг̇унаад̇и ваддад̣̇угкасса анд̇аг̇ад̇зна. сзсамзд̇т̇а баагадамзва. бажчимад̣дхум̣ бана сан̇г̇ийд̇игаарагзхи вуд̇д̇анд̇иби ааху.
403-4. Ettāvatā agāriyasāvakassa niccasīlaṃ dassetvā idāni uposathaṅgāni dassento ‘‘pāṇaṃ na hane’’ti gāthādvayamāha. Tattha abrahmacariyāti aseṭṭhacariyabhūtā. Methunāti methunadhammasamāpattito. Rattiṃ na bhuñjeyya vikālabhojananti rattimpi na bhuñjeyya, divāpi kālātikkantabhojanaṃ na bhuñjeyya. Na ca gandhanti ettha gandhaggahaṇena vilepanacuṇṇādīnipi gahitānevāti veditabbāni. Mañceti kappiyamañce. Santhateti taṭṭikādīhi kappiyattharaṇehi atthate. Chamāyaṃ pana gonakādisanthatāyapi vaṭṭati. Aṭṭhaṅgikanti pañcaṅgikaṃ viya tūriyaṃ, na aṅgavinimuttaṃ. Dukkhantagunāti vaṭṭadukkhassa antagatena. Sesamettha pākaṭameva. Pacchimaḍḍhuṃ pana saṅgītikārakehi vuttantipi āhu.
405. звам̣ убосат̇ан̇г̇аани д̣̇ассзд̇ваа ид̣̇аани убосат̇агаалам̣ д̣̇ассзнд̇о ааха ‘‘д̇ад̇о жа багкассаа’’д̇и. д̇ад̇т̇а д̇ад̇од̇и бад̣̇абууран̣амад̇д̇з нибаад̇о. багкассубавассубосат̇анд̇и звам̣ барабад̣̇зна яож̇зд̇аб̣б̣ам̣ ‘‘багкасса жаад̇уд̣̇д̣̇асим̣ бан̃жад̣̇асим̣ адтаминд̇и зд̇з д̇аяо д̣̇ивасз убавасса убосат̇ам̣, зд̇ам̣ адтан̇г̇игаубосат̇ам̣ убаг̇амма васид̇ваа’’д̇и. баадихаарияабагкан̃жаад̇и зд̇т̇а бана вассуубанааяигааяа буримабхааг̇з аасаал̣хамаасо, анд̇овассам̣ д̇аяо маасаа, гад̇д̇игамаасод̇и имз бан̃жа маасаа ‘‘баадихаарияабагко’’д̇и вужжанд̇и. аасаал̣хагад̇д̇игапаг̇г̇ун̣амаасаа д̇аяо зваад̇и абарз. багкубосат̇ад̣̇ивасаанам̣ буримабажчимад̣̇ивасавасзна багкз багкз д̇зрасийбаадибад̣̇асад̇д̇амийнавамийсан̇каад̇аа жад̇д̇ааро жад̇д̇ааро д̣̇ивасаад̇и абарз. яам̣ ружжад̇и, д̇ам̣ г̇ахзд̇аб̣б̣ам̣. саб̣б̣ам̣ ваа бана бун̃н̃агаамийнам̣ бхаасид̇аб̣б̣ам̣. звамзд̇ам̣ баадихаарияабагкан̃жа басаннамаанасо сусамад̇д̇аруубам̣ субарибун̣н̣аруубам̣ згамби д̣̇ивасам̣ абарижжаж̇анд̇о адтан̇г̇убзд̇ам̣ убосат̇ам̣ убавассаад̇и самб̣анд̇хид̇аб̣б̣ам̣.
405. Evaṃ uposathaṅgāni dassetvā idāni uposathakālaṃ dassento āha ‘‘tato ca pakkhassā’’ti. Tattha tatoti padapūraṇamatte nipāto. Pakkhassupavassuposathanti evaṃ parapadena yojetabbaṃ ‘‘pakkhassa cātuddasiṃ pañcadasiṃ aṭṭhaminti ete tayo divase upavassa uposathaṃ, etaṃ aṭṭhaṅgikauposathaṃ upagamma vasitvā’’ti. Pāṭihāriyapakkhañcāti ettha pana vassūpanāyikāya purimabhāge āsāḷhamāso, antovassaṃ tayo māsā, kattikamāsoti ime pañca māsā ‘‘pāṭihāriyapakkho’’ti vuccanti. Āsāḷhakattikaphagguṇamāsā tayo evāti apare. Pakkhuposathadivasānaṃ purimapacchimadivasavasena pakkhe pakkhe terasīpāṭipadasattamīnavamīsaṅkhātā cattāro cattāro divasāti apare. Yaṃ ruccati, taṃ gahetabbaṃ. Sabbaṃ vā pana puññakāmīnaṃ bhāsitabbaṃ. Evametaṃ pāṭihāriyapakkhañca pasannamānaso susamattarūpaṃ suparipuṇṇarūpaṃ ekampi divasaṃ apariccajanto aṭṭhaṅgupetaṃ uposathaṃ upavassāti sambandhitabbaṃ.
406. звам̣ убосат̇агаалам̣ д̣̇ассзд̇ваа ид̣̇аани д̇зсу гаалзсу зд̇ам̣ убосат̇ам̣ убавасса яам̣ гаад̇аб̣б̣ам̣, д̇ам̣ д̣̇ассзнд̇о ааха ‘‘д̇ад̇о жа баад̇о’’д̇и. зд̇т̇ааби д̇ад̇од̇и бад̣̇абууран̣амад̇д̇з нибаад̇о, ананд̇арад̇т̇з ваа, ат̇аад̇и вуд̇д̇ам̣ ход̇и. баад̇од̇и абараж̇ж̇уд̣̇ивасабуб̣б̣абхааг̇з. убавуд̇т̇убосат̇од̇и убавасид̇аубосат̇о. аннзнаад̇и яааг̇убхад̇д̇аад̣̇инаа. баанзнаад̇и адтавид̇хабаанзна. анумод̣̇амаанод̇и анубамод̣̇амаано, ниранд̇арам̣ мод̣̇амаанод̇и ад̇т̇о. яат̇аараханд̇и ад̇д̇ано ануруубзна, яат̇аасад̇д̇и яат̇ааб̣аланд̇и вуд̇д̇ам̣ ход̇и. сам̣вибхаж̇зт̇аад̇и бхааж̇зяяа бад̇имаанзяяа. сзсам̣ баагадамзва.
406. Evaṃ uposathakālaṃ dassetvā idāni tesu kālesu etaṃ uposathaṃ upavassa yaṃ kātabbaṃ, taṃ dassento āha ‘‘tato ca pāto’’ti. Etthāpi tatoti padapūraṇamatte nipāto, anantaratthe vā, athāti vuttaṃ hoti. Pātoti aparajjudivasapubbabhāge. Upavutthuposathoti upavasitauposatho. Annenāti yāgubhattādinā. Pānenāti aṭṭhavidhapānena. Anumodamānoti anupamodamāno, nirantaraṃ modamānoti attho. Yathārahanti attano anurūpena, yathāsatti yathābalanti vuttaṃ hoti. Saṃvibhajethāti bhājeyya patimāneyya. Sesaṃ pākaṭameva.
407. звам̣ убавуд̇т̇убосат̇асса гижжам̣ вад̇ваа ид̣̇аани яааваж̇ийвигам̣ г̇арувад̇д̇ам̣ ааж̇ийвабаарисуд̣̇д̇хин̃жа гат̇зд̇ваа д̇ааяа бадибад̣̇ааяа ад̇хиг̇анд̇аб̣б̣адтаанам̣ д̣̇ассзнд̇о ааха ‘‘д̇хаммзна маад̇аабид̇аро’’д̇и. д̇ад̇т̇а д̇хаммзнаад̇и д̇хаммалад̣̇д̇хзна бхог̇зна . бхарзяяаад̇и босзяяа. д̇хаммигам̣ со ван̣иж̇ж̇анд̇и сад̇д̇аван̣иж̇ж̇аа, сад̇т̇аван̣иж̇ж̇аа, висаван̣иж̇ж̇аа, мам̣саван̣иж̇ж̇аа, сурааван̣иж̇ж̇аад̇и имаа бан̃жа ад̇хаммаван̣иж̇ж̇аа важ̇ж̇зд̇ваа авасзсаа д̇хаммигаван̣иж̇ж̇аа. ван̣иж̇ж̇аамукзна жзд̇т̇а гасиг̇орагкаад̣̇и абароби д̇хаммиго вохааро сан̇г̇ахид̇о. сзсамуд̇д̇аанад̇т̇амзва. аяам̣ бана яож̇анаа – со нижжасийлаубосат̇асийлад̣̇аанад̇хаммасаманнааг̇ад̇о арияасааваго баяож̇аяз д̇хаммигам̣ ван̣иж̇ж̇ам̣, д̇ад̇о лад̣̇д̇хзна жа д̇хаммад̇о анабзд̇ад̇д̇аа д̇хаммзна бхог̇зна маад̇аабид̇аро бхарзяяа. ат̇а со г̇ихий звам̣ аббамад̇д̇о аад̣̇ид̇о бабхуд̇и вуд̇д̇ам̣ имам̣ вад̇д̇ам̣ вад̇д̇аяанд̇о гааяасса бхзд̣̇аа яз д̇з ад̇д̇ано аабхааяа анд̇хагаарам̣ вид̇хамзд̇ваа аалогагаран̣зна саяамбабхаад̇и лад̣̇д̇ханаамаа ча гаамааважарад̣̇зваа, д̇з саяамбабхз наама д̣̇звз убзд̇и бхаж̇ад̇и аллийяад̇и, д̇зсам̣ ниб̣б̣ад̇д̇адтаанз ниб̣б̣ад̇д̇ад̇ийд̇и.
407. Evaṃ upavutthuposathassa kiccaṃ vatvā idāni yāvajīvikaṃ garuvattaṃ ājīvapārisuddhiñca kathetvā tāya paṭipadāya adhigantabbaṭṭhānaṃ dassento āha ‘‘dhammena mātāpitaro’’ti. Tattha dhammenāti dhammaladdhena bhogena . Bhareyyāti poseyya. Dhammikaṃ so vaṇijjanti sattavaṇijjā, satthavaṇijjā, visavaṇijjā, maṃsavaṇijjā, surāvaṇijjāti imā pañca adhammavaṇijjā vajjetvā avasesā dhammikavaṇijjā. Vaṇijjāmukhena cettha kasigorakkhādi aparopi dhammiko vohāro saṅgahito. Sesamuttānatthameva. Ayaṃ pana yojanā – so niccasīlauposathasīladānadhammasamannāgato ariyasāvako payojaye dhammikaṃ vaṇijjaṃ, tato laddhena ca dhammato anapetattā dhammena bhogena mātāpitaro bhareyya. Atha so gihī evaṃ appamatto ādito pabhuti vuttaṃ imaṃ vattaṃ vattayanto kāyassa bhedā ye te attano ābhāya andhakāraṃ vidhametvā ālokakaraṇena sayampabhāti laddhanāmā cha kāmāvacaradevā, te sayampabhe nāma deve upeti bhajati allīyati, tesaṃ nibbattaṭṭhāne nibbattatīti.
барамад̇т̇аж̇од̇игааяа куд̣̇д̣̇ага-адтагат̇ааяа
Paramatthajotikāya khuddaka-aṭṭhakathāya
суд̇д̇анибаад̇а-адтагат̇ааяа д̇хаммигасуд̇д̇аван̣н̣анаа нидтид̇аа.
Suttanipāta-aṭṭhakathāya dhammikasuttavaṇṇanā niṭṭhitā.
нидтид̇о жа д̣̇уд̇ияо ваг̇г̇о ад̇т̇аван̣н̣анаанаяад̇о, наамзна
Niṭṭhito ca dutiyo vaggo atthavaṇṇanānayato, nāmena
жуул̣аваг̇г̇од̇и.
Cūḷavaggoti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / суд̇д̇анибаад̇абаал̣и • Suttanipātapāḷi / 14. д̇хаммигасуд̇д̇ам̣ • 14. Dhammikasuttaṃ
