| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૪. દીઘજાણુસુત્તવણ્ણના
4. Dīghajāṇusuttavaṇṇanā
૫૪. ચતુત્થે બ્યગ્ઘપજ્જાતિ ઇદમસ્સ પવેણિ નામ વસેન આલપનં. તસ્સ હિ પુબ્બપુરિસા બ્યગ્ઘપથે જાતાતિ તસ્મિં કુલે મનુસ્સા બ્યગ્ઘપજ્જાતિ વુચ્ચન્તિ. ઇસ્સત્થેનાતિ ઇસ્સાસકમ્મેન. તત્રુપાયાયાતિ ‘‘ઇમસ્મિં કાલે ઇદં નામ કાતું વટ્ટતી’’તિ જાનને ઉપાયભૂતાય. વુદ્ધસીલિનોતિ વડ્ઢિતસીલા વુદ્ધસમાચારા. આયન્તિ આગમનં. નાચ્ચોગાળ્હન્તિ નાતિમહન્તં. નાતિહીનન્તિ નાતિકસિરં. પરિયાદાયાતિ ગહેત્વા ખેપેત્વા. તત્થ યસ્સ વયતો દિગુણો આયો, તસ્સ વયો આયં પરિયાદાતું ન સક્કોતિ.
54. Catutthe byagghapajjāti idamassa paveṇi nāma vasena ālapanaṃ. Tassa hi pubbapurisā byagghapathe jātāti tasmiṃ kule manussā byagghapajjāti vuccanti. Issatthenāti issāsakammena. Tatrupāyāyāti ‘‘imasmiṃ kāle idaṃ nāma kātuṃ vaṭṭatī’’ti jānane upāyabhūtāya. Vuddhasīlinoti vaḍḍhitasīlā vuddhasamācārā. Āyanti āgamanaṃ. Nāccogāḷhanti nātimahantaṃ. Nātihīnanti nātikasiraṃ. Pariyādāyāti gahetvā khepetvā. Tattha yassa vayato diguṇo āyo, tassa vayo āyaṃ pariyādātuṃ na sakkoti.
‘‘ચતુધા વિભજે ભોગે, પણ્ડિતો ઘરમાવસં;
‘‘Catudhā vibhaje bhoge, paṇḍito gharamāvasaṃ;
એકેન ભોગે ભુઞ્જેય્ય, દ્વીહિ કમ્મં પયોજયે;
Ekena bhoge bhuñjeyya, dvīhi kammaṃ payojaye;
ચતુત્થઞ્ચ નિધાપેય્ય, આપદાસુ ભવિસ્સતી’’તિ. (દી॰ નિ॰ ૩.૨૬૫) –
Catutthañca nidhāpeyya, āpadāsu bhavissatī’’ti. (dī. ni. 3.265) –
એવં પટિપજ્જતો પન વયો આયં પરિયાદાતું ન સક્કોતિયેવ.
Evaṃ paṭipajjato pana vayo āyaṃ pariyādātuṃ na sakkotiyeva.
ઉદુમ્બરખાદીવાતિ યથા ઉદુમ્બરાનિ ખાદિતુકામેન પક્કે ઉદુમ્બરરુક્ખે ચાલિતે એકપ્પહારેનેવ બહૂનિ ફલાનિ પતન્તિ, સો ખાદિતબ્બયુત્તકાનિ ખાદિત્વા ઇતરાનિ બહુતરાનિ પહાય ગચ્છતિ, એવમેવં યો આયતો વયં બહુતરં કત્વા વિપ્પકિરન્તો ભોગે પરિભુઞ્જતિ, સો ‘‘ઉદુમ્બરખાદિકંવાયં કુલપુત્તો ભોગે ખાદતી’’તિ વુચ્ચતિ. અજેટ્ઠમરણન્તિ અનાયકમરણં . સમં જીવિકં કપ્પેતીતિ સમ્મા જીવિકં કપ્પેતિ. સમજીવિતાતિ સમજીવિતાય જીવિતા. અપાયમુખાનીતિ વિનાસસ્સ ઠાનાનિ.
Udumbarakhādīvāti yathā udumbarāni khāditukāmena pakke udumbararukkhe cālite ekappahāreneva bahūni phalāni patanti, so khāditabbayuttakāni khāditvā itarāni bahutarāni pahāya gacchati, evamevaṃ yo āyato vayaṃ bahutaraṃ katvā vippakiranto bhoge paribhuñjati, so ‘‘udumbarakhādikaṃvāyaṃ kulaputto bhoge khādatī’’ti vuccati. Ajeṭṭhamaraṇanti anāyakamaraṇaṃ . Samaṃ jīvikaṃ kappetīti sammā jīvikaṃ kappeti. Samajīvitāti samajīvitāya jīvitā. Apāyamukhānīti vināsassa ṭhānāni.
ઉટ્ઠાતા કમ્મધેય્યેસૂતિ કમ્મકરણટ્ઠાનેસુ ઉટ્ઠાનવીરિયસમ્પન્નો. વિધાનવાતિ વિદહનસમ્પન્નો. સોત્થાનં સમ્પરાયિકન્તિ સોત્થિભૂતં સમ્પરાયિકં. સચ્ચનામેનાતિ બુદ્ધત્તાયેવ બુદ્ધોતિ એવં અવિતથનામેન. ચાગો પુઞ્ઞં પવડ્ઢતીતિ ચાગો ચ સેસપુઞ્ઞઞ્ચ પવડ્ઢતિ. ઇમસ્મિં સુત્તે સદ્ધાદયો મિસ્સકા કથિતા. પઞ્ચમં ઉત્તાનમેવ.
Uṭṭhātā kammadheyyesūti kammakaraṇaṭṭhānesu uṭṭhānavīriyasampanno. Vidhānavāti vidahanasampanno. Sotthānaṃ samparāyikanti sotthibhūtaṃ samparāyikaṃ. Saccanāmenāti buddhattāyeva buddhoti evaṃ avitathanāmena. Cāgo puññaṃ pavaḍḍhatīti cāgo ca sesapuññañca pavaḍḍhati. Imasmiṃ sutte saddhādayo missakā kathitā. Pañcamaṃ uttānameva.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૪. દીઘજાણુસુત્તં • 4. Dīghajāṇusuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૪-૫. દીઘજાણુસુત્તાદિવણ્ણના • 4-5. Dīghajāṇusuttādivaṇṇanā
