| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ದೋಣಬ್ರಾಹ್ಮಣಸುತ್ತಂ
2. Doṇabrāhmaṇasuttaṃ
೧೯೨. ಅಥ ಖೋ ದೋಣೋ ಬ್ರಾಹ್ಮಣೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿ। ಸಮ್ಮೋದನೀಯಂ ಕಥಂ ಸಾರಣೀಯಂ ವೀತಿಸಾರೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ದೋಣೋ ಬ್ರಾಹ್ಮಣೋ ಭಗವನ್ತಂ ಏತದವೋಚ –
192. Atha kho doṇo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho doṇo brāhmaṇo bhagavantaṃ etadavoca –
‘‘ಸುತಂ ಮೇತಂ, ಭೋ ಗೋತಮ – ‘ನ ಸಮಣೋ ಗೋತಮೋ ಬ್ರಾಹ್ಮಣೇ ಜಿಣ್ಣೇ ವುಡ್ಢೇ ಮಹಲ್ಲಕೇ ಅದ್ಧಗತೇ ವಯೋಅನುಪ್ಪತ್ತೇ ಅಭಿವಾದೇತಿ ವಾ ಪಚ್ಚುಟ್ಠೇತಿ ವಾ ಆಸನೇನ ವಾ ನಿಮನ್ತೇತೀ’ತಿ। ತಯಿದಂ, ಭೋ ಗೋತಮ, ತಥೇವ। ನ ಹಿ ಭವಂ ಗೋತಮೋ ಬ್ರಾಹ್ಮಣೇ ಜಿಣ್ಣೇ ವುಡ್ಢೇ ಮಹಲ್ಲಕೇ ಅದ್ಧಗತೇ ವಯೋಅನುಪ್ಪತ್ತೇ ಅಭಿವಾದೇತಿ ವಾ ಪಚ್ಚುಟ್ಠೇತಿ ವಾ ಆಸನೇನ ವಾ ನಿಮನ್ತೇತಿ। ತಯಿದಂ, ಭೋ ಗೋತಮ, ನ ಸಮ್ಪನ್ನಮೇವಾ’’ತಿ। ‘‘ತ್ವಮ್ಪಿ ನೋ, ದೋಣ, ಬ್ರಾಹ್ಮಣೋ ಪಟಿಜಾನಾಸೀ’’ತಿ? ‘‘ಯಞ್ಹಿ ತಂ, ಭೋ ಗೋತಮ, ಸಮ್ಮಾ ವದಮಾನೋ ವದೇಯ್ಯ – ‘ಬ್ರಾಹ್ಮಣೋ ಉಭತೋ ಸುಜಾತೋ – ಮಾತಿತೋ ಚ ಪಿತಿತೋ ಚ, ಸಂಸುದ್ಧಗಹಣಿಕೋ, ಯಾವ ಸತ್ತಮಾ ಪಿತಾಮಹಯುಗಾ ಅಕ್ಖಿತೋ ಅನುಪಕ್ಕುಟ್ಠೋ ಜಾತಿವಾದೇನ, ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನಂ ಪಾರಗೂ ಸನಿಘಣ್ಡುಕೇಟುಭಾನಂ ಸಾಕ್ಖರಪ್ಪಭೇದಾನಂ ಇತಿಹಾಸಪಞ್ಚಮಾನಂ, ಪದಕೋ ವೇಯ್ಯಾಕರಣೋ ಲೋಕಾಯತಮಹಾಪುರಿಸಲಕ್ಖಣೇಸು ಅನವಯೋ’ತಿ, ಮಮೇವ ತಂ, ಭೋ ಗೋತಮ, ಸಮ್ಮಾ ವದಮಾನೋ ವದೇಯ್ಯ। ಅಹಞ್ಹಿ, ಭೋ ಗೋತಮ, ಬ್ರಾಹ್ಮಣೋ ಉಭತೋ ಸುಜಾತೋ – ಮಾತಿತೋ ಚ ಪಿತಿತೋ ಚ, ಸಂಸುದ್ಧಗಹಣಿಕೋ, ಯಾವ ಸತ್ತಮಾ ಪಿತಾಮಹಯುಗಾ ಅಕ್ಖಿತ್ತೋ ಅನುಪಕ್ಕುಟ್ಠೋ ಜಾತಿವಾದೇನ, ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನಂ ಪಾರಗೂ ಸನಿಘಣ್ಡುಕೇಟುಭಾನಂ ಸಾಕ್ಖರಪ್ಪಭೇದಾನಂ ಇತಿಹಾಸಪಞ್ಚಮಾನಂ, ಪದಕೋ ವೇಯ್ಯಾಕರಣೋ ಲೋಕಾಯತಮಹಾಪುರಿಸಲಕ್ಖಣೇಸು ಅನವಯೋ’’ತಿ।
‘‘Sutaṃ metaṃ, bho gotama – ‘na samaṇo gotamo brāhmaṇe jiṇṇe vuḍḍhe mahallake addhagate vayoanuppatte abhivādeti vā paccuṭṭheti vā āsanena vā nimantetī’ti. Tayidaṃ, bho gotama, tatheva. Na hi bhavaṃ gotamo brāhmaṇe jiṇṇe vuḍḍhe mahallake addhagate vayoanuppatte abhivādeti vā paccuṭṭheti vā āsanena vā nimanteti. Tayidaṃ, bho gotama, na sampannamevā’’ti. ‘‘Tvampi no, doṇa, brāhmaṇo paṭijānāsī’’ti? ‘‘Yañhi taṃ, bho gotama, sammā vadamāno vadeyya – ‘brāhmaṇo ubhato sujāto – mātito ca pitito ca, saṃsuddhagahaṇiko, yāva sattamā pitāmahayugā akkhito anupakkuṭṭho jātivādena, ajjhāyako mantadharo, tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ, padako veyyākaraṇo lokāyatamahāpurisalakkhaṇesu anavayo’ti, mameva taṃ, bho gotama, sammā vadamāno vadeyya. Ahañhi, bho gotama, brāhmaṇo ubhato sujāto – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena, ajjhāyako mantadharo, tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ, padako veyyākaraṇo lokāyatamahāpurisalakkhaṇesu anavayo’’ti.
‘‘ಯೇ ಖೋ, ತೇ ದೋಣ, ಬ್ರಾಹ್ಮಣಾನಂ ಪುಬ್ಬಕಾ ಇಸಯೋ ಮನ್ತಾನಂ ಕತ್ತಾರೋ ಮನ್ತಾನಂ ಪವತ್ತಾರೋ, ಯೇಸಮಿದಂ ಏತರಹಿ ಬ್ರಾಹ್ಮಣಾ ಪೋರಾಣಂ ಮನ್ತಪದಂ ಗೀತಂ ಪವುತ್ತಂ ಸಮಿಹಿತಂ ತದನುಗಾಯನ್ತಿ ತದನುಭಾಸನ್ತಿ ಭಾಸಿತಮನುಭಾಸನ್ತಿ ಸಜ್ಝಾಯಿತಮನುಸಜ್ಝಾಯನ್ತಿ ವಾಚಿತಮನುವಾಚೇನ್ತಿ, ಸೇಯ್ಯಥಿದಂ – ಅಟ್ಠಕೋ, ವಾಮಕೋ, ವಾಮದೇವೋ, ವೇಸ್ಸಾಮಿತ್ತೋ, ಯಮದಗ್ಗಿ 1, ಅಙ್ಗೀರಸೋ, ಭಾರದ್ವಾಜೋ, ವಾಸೇಟ್ಠೋ, ಕಸ್ಸಪೋ, ಭಗು; ತ್ಯಾಸ್ಸು’ಮೇ ಪಞ್ಚ ಬ್ರಾಹ್ಮಣೇ ಪಞ್ಞಾಪೇನ್ತಿ – ಬ್ರಹ್ಮಸಮಂ, ದೇವಸಮಂ, ಮರಿಯಾದಂ, ಸಮ್ಭಿನ್ನಮರಿಯಾದಂ, ಬ್ರಾಹ್ಮಣಚಣ್ಡಾಲಂಯೇವ ಪಞ್ಚಮಂ। ತೇಸಂ ತ್ವಂ ದೋಣ, ಕತಮೋ’’ತಿ?
‘‘Ye kho, te doṇa, brāhmaṇānaṃ pubbakā isayo mantānaṃ kattāro mantānaṃ pavattāro, yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samihitaṃ tadanugāyanti tadanubhāsanti bhāsitamanubhāsanti sajjhāyitamanusajjhāyanti vācitamanuvācenti, seyyathidaṃ – aṭṭhako, vāmako, vāmadevo, vessāmitto, yamadaggi 2, aṅgīraso, bhāradvājo, vāseṭṭho, kassapo, bhagu; tyāssu’me pañca brāhmaṇe paññāpenti – brahmasamaṃ, devasamaṃ, mariyādaṃ, sambhinnamariyādaṃ, brāhmaṇacaṇḍālaṃyeva pañcamaṃ. Tesaṃ tvaṃ doṇa, katamo’’ti?
‘‘ನ ಖೋ ಮಯಂ, ಭೋ ಗೋತಮ, ಪಞ್ಚ ಬ್ರಾಹ್ಮಣೇ ಜಾನಾಮ, ಅಥ ಖೋ ಮಯಂ ಬ್ರಾಹ್ಮಣಾತ್ವೇವ ಜಾನಾಮ। ಸಾಧು ಮೇ ಭವಂ ಗೋತಮೋ ತಥಾ ಧಮ್ಮಂ ದೇಸೇತು ಯಥಾ ಅಹಂ ಇಮೇ ಪಞ್ಚ ಬ್ರಾಹ್ಮಣೇ ಜಾನೇಯ್ಯ’’ನ್ತಿ। ‘‘ತೇನ ಹಿ, ಬ್ರಾಹ್ಮಣ, ಸುಣೋಹಿ, ಸಾಧುಕಂ ಮನಸಿ ಕರೋಹಿ; ಭಾಸಿಸ್ಸಾಮೀ’’ತಿ। ‘‘ಏವಂ ಭೋ’’ತಿ ಖೋ ದೋಣೋ ಬ್ರಾಹ್ಮಣೋ ಭಗವತೋ ಪಚ್ಚಸ್ಸೋಸಿ। ಭಗವಾ ಏತದವೋಚ –
‘‘Na kho mayaṃ, bho gotama, pañca brāhmaṇe jānāma, atha kho mayaṃ brāhmaṇātveva jānāma. Sādhu me bhavaṃ gotamo tathā dhammaṃ desetu yathā ahaṃ ime pañca brāhmaṇe jāneyya’’nti. ‘‘Tena hi, brāhmaṇa, suṇohi, sādhukaṃ manasi karohi; bhāsissāmī’’ti. ‘‘Evaṃ bho’’ti kho doṇo brāhmaṇo bhagavato paccassosi. Bhagavā etadavoca –
‘‘ಕಥಞ್ಚ, ದೋಣ, ಬ್ರಾಹ್ಮಣೋ ಬ್ರಹ್ಮಸಮೋ ಹೋತಿ? ಇಧ, ದೋಣ, ಬ್ರಾಹ್ಮಣೋ ಉಭತೋ ಸುಜಾತೋ ಹೋತಿ – ಮಾತಿತೋ ಚ ಪಿತಿತೋ ಚ, ಸಂಸುದ್ಧಗಹಣಿಕೋ, ಯಾವ ಸತ್ತಮಾ ಪಿತಾಮಹಯುಗಾ ಅಕ್ಖಿತ್ತೋ ಅನುಪಕ್ಕುಟ್ಠೋ ಜಾತಿವಾದೇನ। ಸೋ ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ 3 ಚರತಿ ಮನ್ತೇ ಅಧೀಯಮಾನೋ। ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ ಚರಿತ್ವಾ ಮನ್ತೇ ಅಧೀಯಿತ್ವಾ ಆಚರಿಯಸ್ಸ ಆಚರಿಯಧನಂ ಪರಿಯೇಸತಿ ಧಮ್ಮೇನೇವ, ನೋ ಅಧಮ್ಮೇನ।
‘‘Kathañca, doṇa, brāhmaṇo brahmasamo hoti? Idha, doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena. So aṭṭhacattālīsavassāni komārabrahmacariyaṃ 4 carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammeneva, no adhammena.
‘‘ತತ್ಥ ಚ, ದೋಣ, ಕೋ ಧಮ್ಮೋ? ನೇವ ಕಸಿಯಾ ನ ವಣಿಜ್ಜಾಯ ನ ಗೋರಕ್ಖೇನ ನ ಇಸ್ಸತ್ಥೇನ 5 ನ ರಾಜಪೋರಿಸೇನ ನ ಸಿಪ್ಪಞ್ಞತರೇನ, ಕೇವಲಂ ಭಿಕ್ಖಾಚರಿಯಾಯ ಕಪಾಲಂ ಅನತಿಮಞ್ಞಮಾನೋ। ಸೋ ಆಚರಿಯಸ್ಸ ಆಚರಿಯಧನಂ ನಿಯ್ಯಾದೇತ್ವಾ 6 ಕೇಸಮಸ್ಸುಂ ಓಹಾರೇತ್ವಾ ಕಾಸಾಯಾನಿ ವತ್ಥಾನಿ ಅಚ್ಛಾದೇತ್ವಾ ಅಗಾರಸ್ಮಾ ಅನಗಾರಿಯಂ ಪಬ್ಬಜತಿ। ಸೋ ಏವಂ ಪಬ್ಬಜಿತೋ ಸಮಾನೋ ಮೇತ್ತಾಸಹಗತೇನ ಚೇತಸಾ ಏಕಂ ದಿಸಂ ಫರಿತ್ವಾ ವಿಹರತಿ, ತಥಾ ದುತಿಯಂ ತಥಾ ತತಿಯಂ ತಥಾ ಚತುತ್ಥಂ 7, ಇತಿ ಉದ್ಧಮಧೋ ತಿರಿಯಂ ಸಬ್ಬಧಿ ಸಬ್ಬತ್ತತಾಯ ಸಬ್ಬಾವನ್ತಂ ಲೋಕಂ ಮೇತ್ತಾಸಹಗತೇನ ಚೇತಸಾ ವಿಪುಲೇನ ಮಹಗ್ಗತೇನ ಅಪ್ಪಮಾಣೇನ ಅವೇರೇನ ಅಬ್ಯಾಪಜ್ಜೇನ 8 ಫರಿತ್ವಾ ವಿಹರತಿ। ಕರುಣಾ…ಪೇ॰… ಮುದಿತಾ… ಉಪೇಕ್ಖಾಸಹಗತೇನ ಚೇತಸಾ ಏಕಂ ದಿಸಂ ಫರಿತ್ವಾ ವಿಹರತಿ, ತಥಾ ದುತಿಯಂ ತಥಾ ತತಿಯಂ ತಥಾ ಚತುತ್ಥಂ , ಇತಿ ಉದ್ಧಮಧೋ ತಿರಿಯಂ ಸಬ್ಬಧಿ ಸಬ್ಬತ್ತತಾಯ ಸಬ್ಬಾವನ್ತಂ ಲೋಕಂ ಉಪೇಕ್ಖಾಸಹಗತೇನ ಚೇತಸಾ ವಿಪುಲೇನ ಮಹಗ್ಗತೇನ ಅಪ್ಪಮಾಣೇನ ಅವೇರೇನ ಅಬ್ಯಾಪಜ್ಜೇನ ಫರಿತ್ವಾ ವಿಹರತಿ। ಸೋ ಇಮೇ ಚತ್ತಾರೋ ಬ್ರಹ್ಮವಿಹಾರೇ ಭಾವೇತ್ವಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಬ್ರಹ್ಮಲೋಕಂ ಉಪಪಜ್ಜತಿ। ಏವಂ ಖೋ, ದೋಣ, ಬ್ರಾಹ್ಮಣೋ ಬ್ರಹ್ಮಸಮೋ ಹೋತಿ।
‘‘Tattha ca, doṇa, ko dhammo? Neva kasiyā na vaṇijjāya na gorakkhena na issatthena 9 na rājaporisena na sippaññatarena, kevalaṃ bhikkhācariyāya kapālaṃ anatimaññamāno. So ācariyassa ācariyadhanaṃ niyyādetvā 10 kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajati. So evaṃ pabbajito samāno mettāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ 11, iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena 12 pharitvā viharati. Karuṇā…pe… muditā… upekkhāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ , iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati. So ime cattāro brahmavihāre bhāvetvā kāyassa bhedā paraṃ maraṇā sugatiṃ brahmalokaṃ upapajjati. Evaṃ kho, doṇa, brāhmaṇo brahmasamo hoti.
‘‘ಕಥಞ್ಚ, ದೋಣ, ಬ್ರಾಹ್ಮಣೋ ದೇವಸಮೋ ಹೋತಿ? ಇಧ, ದೋಣ, ಬ್ರಾಹ್ಮಣೋ ಉಭತೋ ಸುಜಾತೋ ಹೋತಿ – ಮಾತಿತೋ ಚ ಪಿತಿತೋ ಚ, ಸಂಸುದ್ಧಗಹಣಿಕೋ, ಯಾವ ಸತ್ತಮಾ ಪಿತಾಮಹಯುಗಾ ಅಕ್ಖಿತ್ತೋ ಅನುಪಕ್ಕುಟ್ಠೋ ಜಾತಿವಾದೇನ । ಸೋ ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ ಚರತಿ ಮನ್ತೇ ಅಧೀಯಮಾನೋ। ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ ಚರಿತ್ವಾ ಮನ್ತೇ ಅಧೀಯಿತ್ವಾ ಆಚರಿಯಸ್ಸ ಆಚರಿಯಧನಂ ಪರಿಯೇಸತಿ ಧಮ್ಮೇನೇವ, ನೋ ಅಧಮ್ಮೇನ। ತತ್ಥ ಚ, ದೋಣ, ಕೋ ಧಮ್ಮೋ? ನೇವ ಕಸಿಯಾ ನ ವಣಿಜ್ಜಾಯ ನ ಗೋರಕ್ಖೇನ ನ ಇಸ್ಸತ್ಥೇನ ನ ರಾಜಪೋರಿಸೇನ ನ ಸಿಪ್ಪಞ್ಞತರೇನ, ಕೇವಲಂ ಭಿಕ್ಖಾಚರಿಯಾಯ ಕಪಾಲಂ ಅನತಿಮಞ್ಞಮಾನೋ। ಸೋ ಆಚರಿಯಸ್ಸ ಆಚರಿಯಧನಂ ನಿಯ್ಯಾದೇತ್ವಾ ದಾರಂ ಪರಿಯೇಸತಿ ಧಮ್ಮೇನೇವ, ನೋ ಅಧಮ್ಮೇನ।
‘‘Kathañca, doṇa, brāhmaṇo devasamo hoti? Idha, doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena . So aṭṭhacattālīsavassāni komārabrahmacariyaṃ carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammeneva, no adhammena. Tattha ca, doṇa, ko dhammo? Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṃ bhikkhācariyāya kapālaṃ anatimaññamāno. So ācariyassa ācariyadhanaṃ niyyādetvā dāraṃ pariyesati dhammeneva, no adhammena.
‘‘ತತ್ಥ ಚ, ದೋಣ, ಕೋ ಧಮ್ಮೋ? ನೇವ ಕಯೇನ ನ ವಿಕ್ಕಯೇನ, ಬ್ರಾಹ್ಮಣಿಂಯೇವ ಉದಕೂಪಸ್ಸಟ್ಠಂ। ಸೋ ಬ್ರಾಹ್ಮಣಿಂಯೇವ ಗಚ್ಛತಿ, ನ ಖತ್ತಿಯಿಂ ನ ವೇಸ್ಸಿಂ ನ ಸುದ್ದಿಂ ನ ಚಣ್ಡಾಲಿಂ ನ ನೇಸಾದಿಂ ನ ವೇನಿಂ 13 ನ ರಥಕಾರಿಂ ನ ಪುಕ್ಕುಸಿಂ ಗಚ್ಛತಿ, ನ ಗಬ್ಭಿನಿಂ ಗಚ್ಛತಿ, ನ ಪಾಯಮಾನಂ ಗಚ್ಛತಿ, ನ ಅನುತುನಿಂ ಗಚ್ಛತಿ। ಕಸ್ಮಾ ಚ, ದೋಣ, ಬ್ರಾಹ್ಮಣೋ ನ ಗಬ್ಭಿನಿಂ ಗಚ್ಛತಿ? ಸಚೇ, ದೋಣ, ಬ್ರಾಹ್ಮಣೋ ಗಬ್ಭಿನಿಂ ಗಚ್ಛತಿ, ಅತಿಮೀಳ್ಹಜೋ ನಾಮ ಸೋ ಹೋತಿ ಮಾಣವಕೋ ವಾ ಮಾಣವಿಕಾ 14 ವಾ । ತಸ್ಮಾ, ದೋಣ, ಬ್ರಾಹ್ಮಣೋ ನ ಗಬ್ಭಿನಿಂ ಗಚ್ಛತಿ। ಕಸ್ಮಾ ಚ, ದೋಣ, ಬ್ರಾಹ್ಮಣೋ ನ ಪಾಯಮಾನಂ ಗಚ್ಛತಿ? ಸಚೇ, ದೋಣ, ಬ್ರಾಹ್ಮಣೋ ಪಾಯಮಾನಂ ಗಚ್ಛತಿ, ಅಸುಚಿಪಟಿಪೀಳಿತೋ ನಾಮ ಸೋ ಹೋತಿ ಮಾಣವಕೋ ವಾ ಮಾಣವಿಕಾ ವಾ। ತಸ್ಮಾ, ದೋಣ, ಬ್ರಾಹ್ಮಣೋ ನ ಪಾಯಮಾನಂ ಗಚ್ಛತಿ। ತಸ್ಸ ಸಾ ಹೋತಿ ಬ್ರಾಹ್ಮಣೀ ನೇವ ಕಾಮತ್ಥಾ ನ ದವತ್ಥಾ ನ ರತತ್ಥಾ, ಪಜತ್ಥಾವ ಬ್ರಾಹ್ಮಣಸ್ಸ ಬ್ರಾಹ್ಮಣೀ ಹೋತಿ। ಸೋ ಮೇಥುನಂ ಉಪ್ಪಾದೇತ್ವಾ ಕೇಸಮಸ್ಸುಂ ಓಹಾರೇತ್ವಾ ಕಾಸಾಯಾನಿ ವತ್ಥಾನಿ ಅಚ್ಛಾದೇತ್ವಾ ಅಗಾರಸ್ಮಾ ಅನಗಾರಿಯಂ ಪಬ್ಬಜತಿ। ಸೋ ಏವಂ ಪಬ್ಬಜಿತೋ ಸಮಾನೋ ವಿವಿಚ್ಚೇವ ಕಾಮೇಹಿ…ಪೇ॰… ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ। ಸೋ ಇಮೇ ಚತ್ತಾರೋ ಝಾನೇ ಭಾವೇತ್ವಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜತಿ। ಏವಂ ಖೋ, ದೋಣ, ಬ್ರಾಹ್ಮಣೋ ದೇವಸಮೋ ಹೋತಿ।
‘‘Tattha ca, doṇa, ko dhammo? Neva kayena na vikkayena, brāhmaṇiṃyeva udakūpassaṭṭhaṃ. So brāhmaṇiṃyeva gacchati, na khattiyiṃ na vessiṃ na suddiṃ na caṇḍāliṃ na nesādiṃ na veniṃ 15 na rathakāriṃ na pukkusiṃ gacchati, na gabbhiniṃ gacchati, na pāyamānaṃ gacchati, na anutuniṃ gacchati. Kasmā ca, doṇa, brāhmaṇo na gabbhiniṃ gacchati? Sace, doṇa, brāhmaṇo gabbhiniṃ gacchati, atimīḷhajo nāma so hoti māṇavako vā māṇavikā 16 vā . Tasmā, doṇa, brāhmaṇo na gabbhiniṃ gacchati. Kasmā ca, doṇa, brāhmaṇo na pāyamānaṃ gacchati? Sace, doṇa, brāhmaṇo pāyamānaṃ gacchati, asucipaṭipīḷito nāma so hoti māṇavako vā māṇavikā vā. Tasmā, doṇa, brāhmaṇo na pāyamānaṃ gacchati. Tassa sā hoti brāhmaṇī neva kāmatthā na davatthā na ratatthā, pajatthāva brāhmaṇassa brāhmaṇī hoti. So methunaṃ uppādetvā kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajati. So evaṃ pabbajito samāno vivicceva kāmehi…pe… catutthaṃ jhānaṃ upasampajja viharati. So ime cattāro jhāne bhāvetvā kāyassa bhedā paraṃ maraṇā sugatiṃ saggaṃ lokaṃ upapajjati. Evaṃ kho, doṇa, brāhmaṇo devasamo hoti.
‘‘ಕಥಞ್ಚ, ದೋಣ, ಬ್ರಾಹ್ಮಣೋ ಮರಿಯಾದೋ ಹೋತಿ? ಇಧ, ದೋಣ, ಬ್ರಾಹ್ಮಣೋ ಉಭತೋ ಸುಜಾತೋ ಹೋತಿ – ಮಾತಿತೋ ಚ ಪಿತಿತೋ ಚ, ಸಂಸುದ್ಧಗಹಣಿಕೋ, ಯಾವ ಸತ್ತಮಾ ಪಿತಾಮಹಯುಗಾ ಅಕ್ಖಿತ್ತೋ ಅನುಪಕ್ಕುಟ್ಠೋ ಜಾತಿವಾದೇನ। ಸೋ ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ ಚರತಿ ಮನ್ತೇ ಅಧೀಯಮಾನೋ। ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ ಚರಿತ್ವಾ ಮನ್ತೇ ಅಧೀಯಿತ್ವಾ ಆಚರಿಯಸ್ಸ ಆಚರಿಯಧನಂ ಪರಿಯೇಸತಿ ಧಮ್ಮೇನೇವ, ನೋ ಅಧಮ್ಮೇನ । ತತ್ಥ ಚ, ದೋಣ, ಕೋ ಧಮ್ಮೋ? ನೇವ ಕಸಿಯಾ ನ ವಣಿಜ್ಜಾಯ ನ ಗೋರಕ್ಖೇನ ನ ಇಸ್ಸತ್ಥೇನ ನ ರಾಜಪೋರಿಸೇನ ನ ಸಿಪ್ಪಞ್ಞತರೇನ, ಕೇವಲಂ ಭಿಕ್ಖಾಚರಿಯಾಯ ಕಪಾಲಂ ಅನತಿಮಞ್ಞಮಾನೋ। ಸೋ ಆಚರಿಯಸ್ಸ ಆಚರಿಯಧನಂ ನಿಯ್ಯಾದೇತ್ವಾ ದಾರಂ ಪರಿಯೇಸತಿ ಧಮ್ಮೇನೇವ, ನೋ ಅಧಮ್ಮೇನ।
‘‘Kathañca, doṇa, brāhmaṇo mariyādo hoti? Idha, doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena. So aṭṭhacattālīsavassāni komārabrahmacariyaṃ carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammeneva, no adhammena . Tattha ca, doṇa, ko dhammo? Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṃ bhikkhācariyāya kapālaṃ anatimaññamāno. So ācariyassa ācariyadhanaṃ niyyādetvā dāraṃ pariyesati dhammeneva, no adhammena.
‘‘ತತ್ಥ ಚ, ದೋಣ , ಕೋ ಧಮ್ಮೋ? ನೇವ ಕಯೇನ ನ ವಿಕ್ಕಯೇನ, ಬ್ರಾಹ್ಮಣಿಂಯೇವ ಉದಕೂಪಸ್ಸಟ್ಠಂ। ಸೋ ಬ್ರಾಹ್ಮಣಿಂಯೇವ ಗಚ್ಛತಿ, ನ ಖತ್ತಿಯಿಂ ನ ವೇಸ್ಸಿಂ ನ ಸುದ್ದಿಂ ನ ಚಣ್ಡಾಲಿಂ ನ ನೇಸಾದಿಂ ನ ವೇನಿಂ ನ ರಥಕಾರಿಂ ನ ಪುಕ್ಕುಸಿಂ ಗಚ್ಛತಿ, ನ ಗಬ್ಭಿನಿಂ ಗಚ್ಛತಿ, ನ ಪಾಯಮಾನಂ ಗಚ್ಛತಿ, ನ ಅನುತುನಿಂ ಗಚ್ಛತಿ। ಕಸ್ಮಾ ಚ, ದೋಣ, ಬ್ರಾಹ್ಮಣೋ ನ ಗಬ್ಭಿನಿಂ ಗಚ್ಛತಿ? ಸಚೇ, ದೋಣ, ಬ್ರಾಹ್ಮಣೋ ಗಬ್ಭಿನಿಂ ಗಚ್ಛತಿ, ಅತಿಮೀಳ್ಹಜೋ ನಾಮ ಸೋ ಹೋತಿ ಮಾಣವಕೋ ವಾ ಮಾಣವಿಕಾ ವಾ। ತಸ್ಮಾ, ದೋಣ, ಬ್ರಾಹ್ಮಣೋ ನ ಗಬ್ಭಿನಿಂ ಗಚ್ಛತಿ। ಕಸ್ಮಾ ಚ, ದೋಣ, ಬ್ರಾಹ್ಮಣೋ ನ ಪಾಯಮಾನಂ ಗಚ್ಛತಿ? ಸಚೇ, ದೋಣ, ಬ್ರಾಹ್ಮಣೋ ಪಾಯಮಾನಂ ಗಚ್ಛತಿ, ಅಸುಚಿಪಟಿಪೀಳಿತೋ ನಾಮ ಸೋ ಹೋತಿ ಮಾಣವಕೋ ವಾ ಮಾಣವಿಕಾ ವಾ। ತಸ್ಮಾ, ದೋಣ, ಬ್ರಾಹ್ಮಣೋ ನ ಪಾಯಮಾನಂ ಗಚ್ಛತಿ। ತಸ್ಸ ಸಾ ಹೋತಿ ಬ್ರಾಹ್ಮಣೀ ನೇವ ಕಾಮತ್ಥಾ ನ ದವತ್ಥಾ ನ ರತತ್ಥಾ, ಪಜತ್ಥಾವ ಬ್ರಾಹ್ಮಣಸ್ಸ ಬ್ರಾಹ್ಮಣೀ ಹೋತಿ। ಸೋ ಮೇಥುನಂ ಉಪ್ಪಾದೇತ್ವಾ ತಮೇವ ಪುತ್ತಸ್ಸಾದಂ ನಿಕಾಮಯಮಾನೋ ಕುಟುಮ್ಬಂ ಅಜ್ಝಾವಸತಿ, ನ ಅಗಾರಸ್ಮಾ ಅನಗಾರಿಯಂ ಪಬ್ಬಜತಿ। ಯಾವ ಪೋರಾಣಾನಂ ಬ್ರಾಹ್ಮಣಾನಂ ಮರಿಯಾದೋ ತತ್ಥ ತಿಟ್ಠತಿ, ತಂ ನ ವೀತಿಕ್ಕಮತಿ। ‘ಯಾವ ಪೋರಾಣಾನಂ ಬ್ರಾಹ್ಮಣಾನಂ ಮರಿಯಾದೋ ತತ್ಥ ಬ್ರಾಹ್ಮಣೋ ಠಿತೋ ತಂ ನ ವೀತಿಕ್ಕಮತೀ’ತಿ, ಖೋ, ದೋಣ, ತಸ್ಮಾ ಬ್ರಾಹ್ಮಣೋ ಮರಿಯಾದೋತಿ ವುಚ್ಚತಿ। ಏವಂ ಖೋ, ದೋಣ, ಬ್ರಾಹ್ಮಣೋ ಮರಿಯಾದೋ ಹೋತಿ।
‘‘Tattha ca, doṇa , ko dhammo? Neva kayena na vikkayena, brāhmaṇiṃyeva udakūpassaṭṭhaṃ. So brāhmaṇiṃyeva gacchati, na khattiyiṃ na vessiṃ na suddiṃ na caṇḍāliṃ na nesādiṃ na veniṃ na rathakāriṃ na pukkusiṃ gacchati, na gabbhiniṃ gacchati, na pāyamānaṃ gacchati, na anutuniṃ gacchati. Kasmā ca, doṇa, brāhmaṇo na gabbhiniṃ gacchati? Sace, doṇa, brāhmaṇo gabbhiniṃ gacchati, atimīḷhajo nāma so hoti māṇavako vā māṇavikā vā. Tasmā, doṇa, brāhmaṇo na gabbhiniṃ gacchati. Kasmā ca, doṇa, brāhmaṇo na pāyamānaṃ gacchati? Sace, doṇa, brāhmaṇo pāyamānaṃ gacchati, asucipaṭipīḷito nāma so hoti māṇavako vā māṇavikā vā. Tasmā, doṇa, brāhmaṇo na pāyamānaṃ gacchati. Tassa sā hoti brāhmaṇī neva kāmatthā na davatthā na ratatthā, pajatthāva brāhmaṇassa brāhmaṇī hoti. So methunaṃ uppādetvā tameva puttassādaṃ nikāmayamāno kuṭumbaṃ ajjhāvasati, na agārasmā anagāriyaṃ pabbajati. Yāva porāṇānaṃ brāhmaṇānaṃ mariyādo tattha tiṭṭhati, taṃ na vītikkamati. ‘Yāva porāṇānaṃ brāhmaṇānaṃ mariyādo tattha brāhmaṇo ṭhito taṃ na vītikkamatī’ti, kho, doṇa, tasmā brāhmaṇo mariyādoti vuccati. Evaṃ kho, doṇa, brāhmaṇo mariyādo hoti.
‘‘ಕಥಞ್ಚ, ದೋಣ, ಬ್ರಾಹ್ಮಣೋ ಸಮ್ಭಿನ್ನಮರಿಯಾದೋ ಹೋತಿ? ಇಧ , ದೋಣ, ಬ್ರಾಹ್ಮಣೋ ಉಭತೋ ಸುಜಾತೋ ಹೋತಿ – ಮಾತಿತೋ ಚ ಪಿತಿತೋ ಚ, ಸಂಸುದ್ಧಗಹಣಿಕೋ, ಯಾವ ಸತ್ತಮಾ ಪಿತಾಮಹಯುಗಾ ಅಕ್ಖಿತ್ತೋ ಅನುಪಕ್ಕುಟ್ಠೋ ಜಾತಿವಾದೇನ । ಸೋ ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ ಚರತಿ ಮನ್ತೇ ಅಧೀಯಮಾನೋ। ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ ಚರಿತ್ವಾ ಮನ್ತೇ ಅಧೀಯಿತ್ವಾ ಆಚರಿಯಸ್ಸ ಆಚರಿಯಧನಂ ಪರಿಯೇಸತಿ ಧಮ್ಮೇನೇವ, ನೋ ಅಧಮ್ಮೇನ।
‘‘Kathañca, doṇa, brāhmaṇo sambhinnamariyādo hoti? Idha , doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena . So aṭṭhacattālīsavassāni komārabrahmacariyaṃ carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammeneva, no adhammena.
‘‘ತತ್ಥ ಚ, ದೋಣ, ಕೋ ಧಮ್ಮೋ? ನೇವ ಕಸಿಯಾ ನ ವಣಿಜ್ಜಾಯ ನ ಗೋರಕ್ಖೇನ ನ ಇಸ್ಸತ್ಥೇನ ನ ರಾಜಪೋರಿಸೇನ ನ ಸಿಪ್ಪಞ್ಞತರೇನ, ಕೇವಲಂ ಭಿಕ್ಖಾಚರಿಯಾಯ ಕಪಾಲಂ ಅನತಿಮಞ್ಞಮಾನೋ। ಸೋ ಆಚರಿಯಸ್ಸ ಆಚರಿಯಧನಂ ನಿಯ್ಯಾದೇತ್ವಾ ದಾರಂ ಪರಿಯೇಸತಿ ಧಮ್ಮೇನಪಿ ಅಧಮ್ಮೇನಪಿ ಕಯೇನಪಿ ವಿಕ್ಕಯೇನಪಿ ಬ್ರಾಹ್ಮಣಿಮ್ಪಿ ಉದಕೂಪಸ್ಸಟ್ಠಂ। ಸೋ ಬ್ರಾಹ್ಮಣಿಮ್ಪಿ ಗಚ್ಛತಿ ಖತ್ತಿಯಿಮ್ಪಿ ಗಚ್ಛತಿ ವೇಸ್ಸಿಮ್ಪಿ ಗಚ್ಛತಿ ಸುದ್ದಿಮ್ಪಿ ಗಚ್ಛತಿ ಚಣ್ಡಾಲಿಮ್ಪಿ ಗಚ್ಛತಿ ನೇಸಾದಿಮ್ಪಿ ಗಚ್ಛತಿ ವೇನಿಮ್ಪಿ ಗಚ್ಛತಿ ರಥಕಾರಿಮ್ಪಿ ಗಚ್ಛತಿ ಪುಕ್ಕುಸಿಮ್ಪಿ ಗಚ್ಛತಿ ಗಬ್ಭಿನಿಮ್ಪಿ ಗಚ್ಛತಿ ಪಾಯಮಾನಮ್ಪಿ ಗಚ್ಛತಿ ಉತುನಿಮ್ಪಿ ಗಚ್ಛತಿ ಅನುತುನಿಮ್ಪಿ ಗಚ್ಛತಿ। ತಸ್ಸ ಸಾ ಹೋತಿ ಬ್ರಾಹ್ಮಣೀ ಕಾಮತ್ಥಾಪಿ ದವತ್ಥಾಪಿ ರತತ್ಥಾಪಿ ಪಜತ್ಥಾಪಿ ಬ್ರಾಹ್ಮಣಸ್ಸ ಬ್ರಾಹ್ಮಣೀ ಹೋತಿ। ಯಾವ ಪೋರಾಣಾನಂ ಬ್ರಾಹ್ಮಣಾನಂ ಮರಿಯಾದೋ ತತ್ಥ ನ ತಿಟ್ಠತಿ, ತಂ ವೀತಿಕ್ಕಮತಿ। ‘ಯಾವ ಪೋರಾಣಾನಂ ಬ್ರಾಹ್ಮಣಾನಂ ಮರಿಯಾದೋ ತತ್ಥ ಬ್ರಾಹ್ಮಣೋ ನ ಠಿತೋ ತಂ ವೀತಿಕ್ಕಮತೀ’ತಿ ಖೋ, ದೋಣ, ತಸ್ಮಾ ಬ್ರಾಹ್ಮಣೋ ಸಮ್ಭಿನ್ನಮರಿಯಾದೋತಿ ವುಚ್ಚತಿ। ಏವಂ ಖೋ, ದೋಣ, ಬ್ರಾಹ್ಮಣೋ ಸಮ್ಭಿನ್ನಮರಿಯಾದೋ ಹೋತಿ।
‘‘Tattha ca, doṇa, ko dhammo? Neva kasiyā na vaṇijjāya na gorakkhena na issatthena na rājaporisena na sippaññatarena, kevalaṃ bhikkhācariyāya kapālaṃ anatimaññamāno. So ācariyassa ācariyadhanaṃ niyyādetvā dāraṃ pariyesati dhammenapi adhammenapi kayenapi vikkayenapi brāhmaṇimpi udakūpassaṭṭhaṃ. So brāhmaṇimpi gacchati khattiyimpi gacchati vessimpi gacchati suddimpi gacchati caṇḍālimpi gacchati nesādimpi gacchati venimpi gacchati rathakārimpi gacchati pukkusimpi gacchati gabbhinimpi gacchati pāyamānampi gacchati utunimpi gacchati anutunimpi gacchati. Tassa sā hoti brāhmaṇī kāmatthāpi davatthāpi ratatthāpi pajatthāpi brāhmaṇassa brāhmaṇī hoti. Yāva porāṇānaṃ brāhmaṇānaṃ mariyādo tattha na tiṭṭhati, taṃ vītikkamati. ‘Yāva porāṇānaṃ brāhmaṇānaṃ mariyādo tattha brāhmaṇo na ṭhito taṃ vītikkamatī’ti kho, doṇa, tasmā brāhmaṇo sambhinnamariyādoti vuccati. Evaṃ kho, doṇa, brāhmaṇo sambhinnamariyādo hoti.
‘‘ಕಥಞ್ಚ, ದೋಣ, ಬ್ರಾಹ್ಮಣೋ ಬ್ರಾಹ್ಮಣಚಣ್ಡಾಲೋ ಹೋತಿ? ಇಧ, ದೋಣ, ಬ್ರಾಹ್ಮಣೋ ಉಭತೋ ಸುಜಾತೋ ಹೋತಿ – ಮಾತಿತೋ ಚ ಪಿತಿತೋ ಚ, ಸಂಸುದ್ಧಗಹಣಿಕೋ, ಯಾವ ಸತ್ತಮಾ ಪಿತಾಮಹಯುಗಾ ಅಕ್ಖಿತ್ತೋ ಅನುಪಕ್ಕುಟ್ಠೋ ಜಾತಿವಾದೇನ। ಸೋ ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ ಚರತಿ ಮನ್ತೇ ಅಧೀಯಮಾನೋ। ಅಟ್ಠಚತ್ತಾಲೀಸವಸ್ಸಾನಿ ಕೋಮಾರಬ್ರಹ್ಮಚರಿಯಂ ಚರಿತ್ವಾ ಮನ್ತೇ ಅಧೀಯಿತ್ವಾ ಆಚರಿಯಸ್ಸ ಆಚರಿಯಧನಂ ಪರಿಯೇಸತಿ ಧಮ್ಮೇನಪಿ ಅಧಮ್ಮೇನಪಿ ಕಸಿಯಾಪಿ ವಣಿಜ್ಜಾಯಪಿ ಗೋರಕ್ಖೇನಪಿ ಇಸ್ಸತ್ಥೇನಪಿ ರಾಜಪೋರಿಸೇನಪಿ ಸಿಪ್ಪಞ್ಞತರೇನಪಿ, ಕೇವಲಮ್ಪಿ ಭಿಕ್ಖಾಚರಿಯಾಯ, ಕಪಾಲಂ ಅನತಿಮಞ್ಞಮಾನೋ।
‘‘Kathañca, doṇa, brāhmaṇo brāhmaṇacaṇḍālo hoti? Idha, doṇa, brāhmaṇo ubhato sujāto hoti – mātito ca pitito ca, saṃsuddhagahaṇiko, yāva sattamā pitāmahayugā akkhitto anupakkuṭṭho jātivādena. So aṭṭhacattālīsavassāni komārabrahmacariyaṃ carati mante adhīyamāno. Aṭṭhacattālīsavassāni komārabrahmacariyaṃ caritvā mante adhīyitvā ācariyassa ācariyadhanaṃ pariyesati dhammenapi adhammenapi kasiyāpi vaṇijjāyapi gorakkhenapi issatthenapi rājaporisenapi sippaññatarenapi, kevalampi bhikkhācariyāya, kapālaṃ anatimaññamāno.
‘‘ಸೋ ಆಚರಿಯಸ್ಸ ಆಚರಿಯಧನಂ ನಿಯ್ಯಾದೇತ್ವಾ ದಾರಂ ಪರಿಯೇಸತಿ ಧಮ್ಮೇನಪಿ ಅಧಮ್ಮೇನಪಿ ಕಯೇನಪಿ ವಿಕ್ಕಯೇನಪಿ ಬ್ರಾಹ್ಮಣಿಮ್ಪಿ ಉದಕೂಪಸ್ಸಟ್ಠಂ। ಸೋ ಬ್ರಾಹ್ಮಣಿಮ್ಪಿ ಗಚ್ಛತಿ ಖತ್ತಿಯಿಮ್ಪಿ ಗಚ್ಛತಿ ವೇಸ್ಸಿಮ್ಪಿ ಗಚ್ಛತಿ ಸುದ್ದಿಮ್ಪಿ ಗಚ್ಛತಿ ಚಣ್ಡಾಲಿಮ್ಪಿ ಗಚ್ಛತಿ ನೇಸಾದಿಮ್ಪಿ ಗಚ್ಛತಿ ವೇನಿಮ್ಪಿ ಗಚ್ಛತಿ ರಥಕಾರಿಮ್ಪಿ ಗಚ್ಛತಿ ಪುಕ್ಕುಸಿಮ್ಪಿ ಗಚ್ಛತಿ ಗಬ್ಭಿನಿಮ್ಪಿ ಗಚ್ಛತಿ ಪಾಯಮಾನಮ್ಪಿ ಗಚ್ಛತಿ ಉತುನಿಮ್ಪಿ ಗಚ್ಛತಿ ಅನುತುನಿಮ್ಪಿ ಗಚ್ಛತಿ। ತಸ್ಸ ಸಾ ಹೋತಿ ಬ್ರಾಹ್ಮಣೀ ಕಾಮತ್ಥಾಪಿ ದವತ್ಥಾಪಿ ರತತ್ಥಾಪಿ ಪಜತ್ಥಾಪಿ ಬ್ರಾಹ್ಮಣಸ್ಸ ಬ್ರಾಹ್ಮಣೀ ಹೋತಿ। ಸೋ ಸಬ್ಬಕಮ್ಮೇಹಿ ಜೀವಿಕಂ 17 ಕಪ್ಪೇತಿ। ತಮೇನಂ ಬ್ರಾಹ್ಮಣಾ ಏವಮಾಹಂಸು – ‘ಕಸ್ಮಾ ಭವಂ ಬ್ರಾಹ್ಮಣೋ ಪಟಿಜಾನಮಾನೋ ಸಬ್ಬಕಮ್ಮೇಹಿ ಜೀವಿಕಂ ಕಪ್ಪೇತೀ’ತಿ? ಸೋ ಏವಮಾಹ – ‘ಸೇಯ್ಯಥಾಪಿ, ಭೋ, ಅಗ್ಗಿ ಸುಚಿಮ್ಪಿ ಡಹತಿ ಅಸುಚಿಮ್ಪಿ ಡಹತಿ, ನ ಚ ತೇನ ಅಗ್ಗಿ ಉಪಲಿಪ್ಪತಿ 18; ಏವಮೇವಂ ಖೋ, ಭೋ, ಸಬ್ಬಕಮ್ಮೇಹಿ ಚೇಪಿ ಬ್ರಾಹ್ಮಣೋ ಜೀವಿಕಂ ಕಪ್ಪೇತಿ, ನ ಚ ತೇನ ಬ್ರಾಹ್ಮಣೋ ಉಪಲಿಪ್ಪತಿ’। ‘ಸಬ್ಬಕಮ್ಮೇಹಿ ಜೀವಿಕಂ ಕಪ್ಪೇತೀ’ತಿ ಖೋ, ದೋಣ , ತಸ್ಮಾ ಬ್ರಾಹ್ಮಣೋ ಬ್ರಾಹ್ಮಣಚಣ್ಡಾಲೋತಿ ವುಚ್ಚತಿ। ಏವಂ ಖೋ, ದೋಣ, ಬ್ರಾಹ್ಮಣೋ ಬ್ರಾಹ್ಮಣಚಣ್ಡಾಲೋ ಹೋತಿ।
‘‘So ācariyassa ācariyadhanaṃ niyyādetvā dāraṃ pariyesati dhammenapi adhammenapi kayenapi vikkayenapi brāhmaṇimpi udakūpassaṭṭhaṃ. So brāhmaṇimpi gacchati khattiyimpi gacchati vessimpi gacchati suddimpi gacchati caṇḍālimpi gacchati nesādimpi gacchati venimpi gacchati rathakārimpi gacchati pukkusimpi gacchati gabbhinimpi gacchati pāyamānampi gacchati utunimpi gacchati anutunimpi gacchati. Tassa sā hoti brāhmaṇī kāmatthāpi davatthāpi ratatthāpi pajatthāpi brāhmaṇassa brāhmaṇī hoti. So sabbakammehi jīvikaṃ 19 kappeti. Tamenaṃ brāhmaṇā evamāhaṃsu – ‘kasmā bhavaṃ brāhmaṇo paṭijānamāno sabbakammehi jīvikaṃ kappetī’ti? So evamāha – ‘seyyathāpi, bho, aggi sucimpi ḍahati asucimpi ḍahati, na ca tena aggi upalippati 20; evamevaṃ kho, bho, sabbakammehi cepi brāhmaṇo jīvikaṃ kappeti, na ca tena brāhmaṇo upalippati’. ‘Sabbakammehi jīvikaṃ kappetī’ti kho, doṇa , tasmā brāhmaṇo brāhmaṇacaṇḍāloti vuccati. Evaṃ kho, doṇa, brāhmaṇo brāhmaṇacaṇḍālo hoti.
‘‘ಯೇ ಖೋ ತೇ, ದೋಣ, ಬ್ರಾಹ್ಮಣಾನಂ ಪುಬ್ಬಕಾ ಇಸಯೋ ಮನ್ತಾನಂ ಕತ್ತಾರೋ ಮನ್ತಾನಂ ಪವತ್ತಾರೋ ಯೇಸಮಿದಂ ಏತರಹಿ ಬ್ರಾಹ್ಮಣಾ ಪೋರಾಣಂ ಮನ್ತಪದಂ ಗೀತಂ ಪವುತ್ತಂ ಸಮೀಹಿತಂ ತದನುಗಾಯನ್ತಿ ತದನುಭಾಸನ್ತಿ ಭಾಸಿತಮನುಭಾಸನ್ತಿ ಸಜ್ಝಾಯಿತಮನುಸಜ್ಝಾಯನ್ತಿ ವಾಚಿಮನುವಾಚೇನ್ತಿ, ಸೇಯ್ಯಥಿದಂ – ಅಟ್ಠಕೋ, ವಾಮಕೋ, ವಾಮದೇವೋ, ವೇಸ್ಸಾಮಿತ್ತೋ, ಯಮದಗ್ಗಿ, ಅಙ್ಗೀರಸೋ, ಭಾರದ್ವಾಜೋ, ವಾಸೇಟ್ಠೋ , ಕಸ್ಸಪೋ, ಭಗು; ತ್ಯಾಸ್ಸುಮೇ ಪಞ್ಚ ಬ್ರಾಹ್ಮಣೇ ಪಞ್ಞಾಪೇನ್ತಿ – ಬ್ರಹ್ಮಸಮಂ, ದೇವಸಮಂ, ಮರಿಯಾದಂ, ಸಮ್ಭಿನ್ನಮರಿಯಾದಂ, ಬ್ರಾಹ್ಮಣಚಣ್ಡಾಲಂಯೇವ ಪಞ್ಚಮಂ। ತೇಸಂ ತ್ವಂ, ದೋಣ, ಕತಮೋ’’ತಿ?
‘‘Ye kho te, doṇa, brāhmaṇānaṃ pubbakā isayo mantānaṃ kattāro mantānaṃ pavattāro yesamidaṃ etarahi brāhmaṇā porāṇaṃ mantapadaṃ gītaṃ pavuttaṃ samīhitaṃ tadanugāyanti tadanubhāsanti bhāsitamanubhāsanti sajjhāyitamanusajjhāyanti vācimanuvācenti, seyyathidaṃ – aṭṭhako, vāmako, vāmadevo, vessāmitto, yamadaggi, aṅgīraso, bhāradvājo, vāseṭṭho , kassapo, bhagu; tyāssume pañca brāhmaṇe paññāpenti – brahmasamaṃ, devasamaṃ, mariyādaṃ, sambhinnamariyādaṃ, brāhmaṇacaṇḍālaṃyeva pañcamaṃ. Tesaṃ tvaṃ, doṇa, katamo’’ti?
‘‘ಏವಂ ಸನ್ತೇ ಮಯಂ, ಭೋ ಗೋತಮ, ಬ್ರಾಹ್ಮಣಚಣ್ಡಾಲಮ್ಪಿ ನ ಪೂರೇಮ। ಅಭಿಕ್ಕನ್ತಂ, ಭೋ ಗೋತಮ…ಪೇ॰… ಉಪಾಸಕಂ ಮಂ ಭವಂ ಗೋತಮೋ ಧಾರೇತು ಅಜ್ಜತಗ್ಗೇ ಪಾಣುಪೇತಂ ಸರಣಂ ಗತ’’ನ್ತಿ। ದುತಿಯಂ।
‘‘Evaṃ sante mayaṃ, bho gotama, brāhmaṇacaṇḍālampi na pūrema. Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Dutiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೨. ದೋಣಬ್ರಾಹ್ಮಣಸುತ್ತವಣ್ಣನಾ • 2. Doṇabrāhmaṇasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೨. ದೋಣಬ್ರಾಹ್ಮಣಸುತ್ತವಣ್ಣನಾ • 2. Doṇabrāhmaṇasuttavaṇṇanā
