| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[105] 5. д̣̇уб̣б̣алагадтаж̇аад̇агаван̣н̣анаа
[105] 5. Dubbalakaṭṭhajātakavaṇṇanā
б̣ахумбзд̇ам̣ ванз гадтанд̇и ид̣̇ам̣ сад̇т̇аа ж̇зд̇аванз вихаранд̇о згам̣ уд̇д̇асид̇абхигкум̣ аараб̣бха гат̇зси. со гира саавад̇т̇иваасий зго гулабуд̇д̇о сад̇т̇у д̇хаммад̣̇зсанам̣ суд̇ваа баб̣б̣аж̇ид̇ваа маран̣абхийруго ахоси, рад̇д̇идтаанад̣̇иваадтаанзсу ваад̇асса ваа вийж̇анд̇асса сугкад̣̇ан̣д̣агасса ваа бад̇анд̇асса багкижад̇уббад̣̇аанам̣ ваа сад̣̇д̣̇ам̣ суд̇ваа маран̣абхаяад̇аж̇ж̇ид̇о махааравам̣ раванд̇о балааяад̇и. д̇асса хи ‘‘марид̇аб̣б̣ам̣ маяаа’’д̇и сад̇имад̇д̇амби над̇т̇и. сажз хи со ‘‘ахам̣ мариссаамий’’д̇и ж̇аанзяяа, на маран̣ам̣ бхааязяяа. маран̣ассад̇игаммадтаанасса бана д̇асса абхаавид̇ад̇д̇аава бхааяад̇и . д̇асса со маран̣абхийругабхааво бхигкусан̇гхз баагадо ж̇аад̇о.
Bahumpetaṃvane kaṭṭhanti idaṃ satthā jetavane viharanto ekaṃ uttasitabhikkhuṃ ārabbha kathesi. So kira sāvatthivāsī eko kulaputto satthu dhammadesanaṃ sutvā pabbajitvā maraṇabhīruko ahosi, rattiṭṭhānadivāṭṭhānesu vātassa vā vījantassa sukkhadaṇḍakassa vā patantassa pakkhicatuppadānaṃ vā saddaṃ sutvā maraṇabhayatajjito mahāravaṃ ravanto palāyati. Tassa hi ‘‘maritabbaṃ mayā’’ti satimattampi natthi. Sace hi so ‘‘ahaṃ marissāmī’’ti jāneyya, na maraṇaṃ bhāyeyya. Maraṇassatikammaṭṭhānassa pana tassa abhāvitattāva bhāyati . Tassa so maraṇabhīrukabhāvo bhikkhusaṅghe pākaṭo jāto.
ат̇згад̣̇ивасам̣ д̇хаммасабхааяам̣ бхигкуу гат̇ам̣ самудтаабзсум̣ ‘‘аавусо, асуго наама бхигку маран̣абхийруго маран̣ам̣ бхааяад̇и, бхигкунаа наама ‘авассам̣ маяаа марид̇аб̣б̣а’нд̇и маран̣ассад̇игаммадтаанам̣ бхаавзд̇ум̣ ваддад̇ий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з д̇ам̣ бхигкум̣ баггосаабзд̇ваа ‘‘сажжам̣ гира д̇вам̣ маран̣абхийруго’’д̇и бужчид̇ваа ‘‘сажжам̣, бханд̇з’’д̇и вуд̇д̇з ‘‘бхигкавз, маа зд̇асса бхигкуно анад̇д̇аманаа хот̇а, нааяам̣ ид̣̇аанзва маран̣абхийруго, буб̣б̣зби маран̣абхийругоязваа’’д̇и вад̇ваа ад̇ийд̇ам̣ аахари.
Athekadivasaṃ dhammasabhāyaṃ bhikkhū kathaṃ samuṭṭhāpesuṃ ‘‘āvuso, asuko nāma bhikkhu maraṇabhīruko maraṇaṃ bhāyati, bhikkhunā nāma ‘avassaṃ mayā maritabba’nti maraṇassatikammaṭṭhānaṃ bhāvetuṃ vaṭṭatī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte taṃ bhikkhuṃ pakkosāpetvā ‘‘saccaṃ kira tvaṃ maraṇabhīruko’’ti pucchitvā ‘‘saccaṃ, bhante’’ti vutte ‘‘bhikkhave, mā etassa bhikkhuno anattamanā hotha, nāyaṃ idāneva maraṇabhīruko, pubbepi maraṇabhīrukoyevā’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о химаванд̇з ругкад̣̇звад̇аа худ̇ваа ниб̣б̣ад̇д̇и. д̇асмим̣ гаалз б̣аараан̣асирааж̇аа ад̇д̇ано ман̇г̇алахад̇т̇им̣ аанзн̃ж̇агааран̣ам̣ сигкаабзд̇ум̣ хад̇т̇аажарияаанам̣ ад̣̇ааси. д̇ам̣ аал̣аанз нижжалам̣ б̣анд̇хид̇ваа д̇омарахад̇т̇аа мануссаа бариваарзд̇ваа аанзн̃ж̇агааран̣ам̣ гаарзнд̇и. со д̇ам̣ гааран̣ам̣ гаарияамаано взд̣̇анам̣ ад̇хиваасзд̇ум̣ асаггонд̇о аал̣аанам̣ бхинд̣̇ид̇ваа мануссз балаабзд̇ваа химаванд̇ам̣ баависи. мануссаа д̇ам̣ г̇ахзд̇ум̣ асаггонд̇аа нивад̇д̇им̣су. со д̇ад̇т̇а маран̣абхийруго ахоси, ваад̇асад̣̇д̣̇аани суд̇ваа гамбамаано маран̣абхаяад̇аж̇ж̇ид̇о сон̣д̣ам̣ вид̇хунид̇ваа взг̇зна балааяад̇и, аал̣аанз б̣анд̇хид̇ваа аанзн̃ж̇агааран̣ам̣ гаран̣агаало вияасса ход̇и, гааяассаад̣̇ам̣ ваа жид̇д̇ассаад̣̇ам̣ ваа алабханд̇о гамбамаано вижарад̇и.
Atīte bārāṇasiyaṃ brahmadatte rajjaṃ kārente bodhisatto himavante rukkhadevatā hutvā nibbatti. Tasmiṃ kāle bārāṇasirājā attano maṅgalahatthiṃ āneñjakāraṇaṃ sikkhāpetuṃ hatthācariyānaṃ adāsi. Taṃ āḷāne niccalaṃ bandhitvā tomarahatthā manussā parivāretvā āneñjakāraṇaṃ kārenti. So taṃ kāraṇaṃ kāriyamāno vedanaṃ adhivāsetuṃ asakkonto āḷānaṃ bhinditvā manusse palāpetvā himavantaṃ pāvisi. Manussā taṃ gahetuṃ asakkontā nivattiṃsu. So tattha maraṇabhīruko ahosi, vātasaddāni sutvā kampamāno maraṇabhayatajjito soṇḍaṃ vidhunitvā vegena palāyati, āḷāne bandhitvā āneñjakāraṇaṃ karaṇakālo viyassa hoti, kāyassādaṃ vā cittassādaṃ vā alabhanto kampamāno vicarati.
ругкад̣̇звад̇аа д̇ам̣ д̣̇исваа канд̇хавидабз тад̇ваа имам̣ г̇аат̇амааха –
Rukkhadevatā taṃ disvā khandhaviṭape ṭhatvā imaṃ gāthamāha –
105.
105.
‘‘б̣ахумбзд̇ам̣ ванз гадтам̣, ваад̇о бхан̃ж̇ад̇и д̣̇уб̣б̣алам̣;
‘‘Bahumpetaṃ vane kaṭṭhaṃ, vāto bhañjati dubbalaṃ;
д̇асса жз бхааяаси нааг̇а, гисо нууна бхависсасий’’д̇и.
Tassa ce bhāyasi nāga, kiso nūna bhavissasī’’ti.
д̇ад̇т̇ааяам̣ бин̣д̣ад̇т̇о – яам̣ зд̇ам̣ д̣̇уб̣б̣алам̣ гадтам̣ бурад̇т̇имаад̣̇ибхзд̣̇о ваад̇о бхан̃ж̇ад̇и, д̇ам̣ имасмим̣ ванз б̣ахум̣ сулабхам̣, д̇ад̇т̇а д̇ад̇т̇а сам̣виж̇ж̇ад̇и. сажз д̇вам̣ д̇асса бхааяаси, звам̣ санд̇з нижжам̣ бхийд̇о мам̣салохид̇агкаяам̣ бад̇ваа гисо нууна бхависсаси, имасмим̣ бана ванз д̇ава бхаяам̣ наама над̇т̇и, д̇асмаа ид̇о бадтааяа маа бхааяийд̇и.
Tatthāyaṃ piṇḍattho – yaṃ etaṃ dubbalaṃ kaṭṭhaṃ puratthimādibhedo vāto bhañjati, taṃ imasmiṃ vane bahuṃ sulabhaṃ, tattha tattha saṃvijjati. Sace tvaṃ tassa bhāyasi, evaṃ sante niccaṃ bhīto maṃsalohitakkhayaṃ patvā kiso nūna bhavissasi, imasmiṃ pana vane tava bhayaṃ nāma natthi, tasmā ito paṭṭhāya mā bhāyīti.
звам̣ д̣̇звад̇аа д̇асса оваад̣̇ам̣ ад̣̇ааси, соби д̇ад̇о бадтааяа ниб̣бхаяо ахоси.
Evaṃ devatā tassa ovādaṃ adāsi, sopi tato paṭṭhāya nibbhayo ahosi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз со бхигку сод̇аабад̇д̇ипалз бад̇идтахи. ‘‘д̇ад̣̇аа нааг̇о аяам̣ бхигку ахоси, ругкад̣̇звад̇аа бана ахамзва ахоси’’нд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne so bhikkhu sotāpattiphale patiṭṭhahi. ‘‘Tadā nāgo ayaṃ bhikkhu ahosi, rukkhadevatā pana ahameva ahosi’’nti.
д̣̇уб̣б̣алагадтаж̇аад̇агаван̣н̣анаа бан̃жамаа.
Dubbalakaṭṭhajātakavaṇṇanā pañcamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 105. д̣̇уб̣б̣алагадтаж̇аад̇агам̣ • 105. Dubbalakaṭṭhajātakaṃ
