| Library / Tipiṭaka / တိပိဋက • Tipiṭaka / ကင္ခာဝိတရဏီ-ပုရာဏ-ဋီကာ • Kaṅkhāvitaraṇī-purāṇa-ṭīkā |
၁၁. ဒုဗ္ဗလသိက္ခာပဒဝဏ္ဏနာ
11. Dubbalasikkhāpadavaṇṇanā
အကပ္ပိယေန ဝာတိ သုဝဏ္ဏရဇတမယမဉ္စာဒိနာ။ ကပ္ပိယမဉ္စော သမ္ပဋိစ္ဆိတဗ္ဗောတိ ‘‘သင္ဃသ္သ ဒေမာ’’တိ ဒိန္နံ သန္ဓာယ ဝုတ္တံ, တေဟိ ပန ‘‘ဝိဟာရသ္သ ဒေမာ’’တိ ဝုတ္တေ သုဝဏ္ဏရဇတမယာဒိအကပ္ပိယမဉ္စာပိ သမ္ပဋိစ္ဆိတဗ္ဗာတိ စ, ‘‘အရဉ္ဇရော ဗဟုဥဒကဂဏ္ဟနကော’’တိ စ, ‘‘သင္ဃိကပအဘောဂေန ဝာတိ သစေ အာရာမိကာဒယော ပဋိသာမေတ္ဝာ ပဋိဒေန္တိ, ပရိဘုဉ္ဇိတုံ ဝဋ္ဋတီ’’တိ စ, ‘‘ကံသလောဟာဒိဘာဇနံ သင္ဃသ္သ ဒိန္နမ္ပိ ပာရိဟာရိယံ န ဝဋ္ဋတီ’’တိ (စူဠဝ. အဋ္ဌ. ၃၂၁) သမန္တပာသာဒိကာယံ ဝုတ္တတ္တာ အတ္တနော ဟတ္ထေန ဂဟေတ္ဝာ ပဋိသာမိတုံ န လဘတီတိ စ, ‘‘ဝေဓကော ကာယဗန္ဓနသ္သာတိ ဝဒန္တီ’’တိ စ, ‘‘ဟိင္ဂု ဟိင္ဂုလိဟရိတာလမနောသိလာ အဉ္ဇနာနီ’’တိ ပာဌောတိ စ, ‘‘ဒာရုမယော ဝာ။ပေ.။ အပာဒကောပိ သမုဂ္ဂော’’တိ ပာဌောတိ စ, ‘‘ဒာရုမယော တုမ္ဗောတိ ဒာရုမယော ဥဒကတုမ္ဗော’’တိ စ, ‘‘ထမ္ဘတုလာသောပာနဖလကာဒီသူ’’တိ စ လိခိတံ။
Akappiyena vāti suvaṇṇarajatamayamañcādinā. Kappiyamañco sampaṭicchitabboti ‘‘saṅghassa demā’’ti dinnaṃ sandhāya vuttaṃ, tehi pana ‘‘vihārassa demā’’ti vutte suvaṇṇarajatamayādiakappiyamañcāpi sampaṭicchitabbāti ca, ‘‘arañjaro bahuudakagaṇhanako’’ti ca, ‘‘saṅghikapaabhogena vāti sace ārāmikādayo paṭisāmetvā paṭidenti, paribhuñjituṃ vaṭṭatī’’ti ca, ‘‘kaṃsalohādibhājanaṃ saṅghassa dinnampi pārihāriyaṃ na vaṭṭatī’’ti (cūḷava. aṭṭha. 321) samantapāsādikāyaṃ vuttattā attano hatthena gahetvā paṭisāmituṃ na labhatīti ca, ‘‘vedhako kāyabandhanassāti vadantī’’ti ca, ‘‘hiṅgu hiṅguliharitālamanosilā añjanānī’’ti pāṭhoti ca, ‘‘dārumayo vā…pe… apādakopi samuggo’’ti pāṭhoti ca, ‘‘dārumayo tumboti dārumayo udakatumbo’’ti ca, ‘‘thambhatulāsopānaphalakādīsū’’ti ca likhitaṃ.
ဒုဗ္ဗလသိက္ခာပဒဝဏ္ဏနာ နိဋ္ဌိတာ။
Dubbalasikkhāpadavaṇṇanā niṭṭhitā.
