| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೩. ದುಬ್ಬಣ್ಣಿಯಸುತ್ತವಣ್ಣನಾ
3. Dubbaṇṇiyasuttavaṇṇanā
೨೬೮. ದುಬ್ಬಣ್ಣೋ ದುದ್ದಸಿಕೋ ವಿರೂಪವಣ್ಣೋ। ಓಕೋಟಿಮಕೋತಿ ರಸ್ಸಭಾವೇನ ಅವರಕೋಟಿಮಕೋ। ಸಕ್ಕೇನ ಗಹಿತನಾಮಮೇವೇತಂ, ನ ಪನ ಸೋ ತಥಾರೂಪೋ ಕೋಚಿ ಯಕ್ಖೋ। ತೇನಾಹ ‘‘ಏಕೋ ರೂಪಾವಚರಬ್ರಹ್ಮಾ’’ತಿ। ಯದಿ ಏವಂ ಕಸ್ಮಾ ಸೋ ತಥಾರೂಪೋ ಹುತ್ವಾ ಆಗತೋತಿ ಆಹ ‘‘ಸಕ್ಕೋ ಕಿರಾ’’ತಿ। ಕಥಂ ಪನೇತ್ಥ ಞಾಯತಿ ‘‘ಸೋ ಏಕೋ ರೂಪಾವಚರಬ್ರಹ್ಮಾ, ನ ಪನೇಸೋ ಅವರುದ್ಧಕಯಕ್ಖೋ’’ತಿ ಯುತ್ತಿಂ ದಸ್ಸೇನ್ತೋ ‘‘ಅವರುದ್ಧಕಯಕ್ಖಾ ಪನಾ’’ತಿಆದಿಮಾಹ। ದೇವಾನಂ ವಚನಂ ಸುತ್ವಾ। ಫರುಸೇನಾತಿ ಫರುಸಸಮಾಚಾರೇನ। ‘‘ಕೋ ನಾಮ ಮಯ್ಹಂ ಆಸನೇ ಸನ್ನಿಸಿನ್ನೋ’’ತಿ ಅಕ್ಖನ್ತಿಂ ಅನುಪ್ಪಾದೇನ್ತೋ ಖನ್ತಿಯಂ ಠತ್ವಾ। ಬಲವಚಿತ್ತೀಕಾರನ್ತಿ ಗರುತರಂ ಸಕ್ಕಾರಬಹುಮಾನಂ। ನೀಚವುತ್ತಿಯಾತಿ ಪರಮನಿಪಚ್ಚಕಾರೇ ಸುವೂಪಸಮನೇ ಚ ದಸ್ಸಿಯಮಾನೇ। ಸಕ್ಕಸ್ಸ ತಾಯ ಏವ ಆಚಾರಸಮ್ಪತ್ತಿಯಾ ಸಕ್ಕಾಸನೇ ಠಾತುಂ, ಅತ್ತನೋ ಚ ಆವಿಕಾತುಂ ಅಸಕ್ಕೋನ್ತೋ ಅನ್ತರಧಾಯಿ। ಉಪಹತಚಿತ್ತೋಮ್ಹೀತಿ ಖನ್ತಿಮೇತ್ತಾನುದ್ದಯಾಸಬ್ಭಾವತೋ ಪರಸ್ಮಿಂ ಉಪಹತಚಿತ್ತೋಮ್ಹೀತಿ ಸಕ್ಕೋ ಅತ್ತನೋ ಸಭಾವಂ ವದತಿ। ಕೋಧವಸೇ ವತ್ತೇತುನ್ತಿ ಕೋಧೇನ ಅತ್ತನೋ ವಸೇ ನಿಬ್ಬತ್ತೇತುಂ ನ ಸುಕರೋಮ್ಹಿ, ಅಥ ಖೋ ಕೋಧಂ ಮಯ್ಹಂ ವಸೇ ನ ವತ್ತೇಮೀತಿ ಅಧಿಪ್ಪಾಯೋ। ಚಿರಂ ನ ಕುಜ್ಝಾಮೀತಿ ಯದಿ ಮೇ ಕದಾಚಿ ಕೋಧೋ ಉಪ್ಪಜ್ಜೇಯ್ಯ, ತಂ ಕೋಧಂ ಅನುವತ್ತೇನ್ತೋ ಚಿರಕಾಲಂ ನ ಕುಜ್ಝಾಮಿ । ನ ಉಪನಯ್ಹಾಮೀತಿ ಅನ್ತೋ ಸಚೇ ಮೇ ಕೋಧೋ ಉಪ್ಪಜ್ಜೇಯ್ಯ, ಖಿಪ್ಪಮೇವ ಚ ನಂ ಪಟಿವಿನೇಯ್ಯನ್ತಿ ತಂ ಮೇ ಪುಬ್ಬೇವ ವತಂ ಪರಿಪೂರಿತಂ।
268.Dubbaṇṇo duddasiko virūpavaṇṇo. Okoṭimakoti rassabhāvena avarakoṭimako. Sakkena gahitanāmamevetaṃ, na pana so tathārūpo koci yakkho. Tenāha ‘‘eko rūpāvacarabrahmā’’ti. Yadi evaṃ kasmā so tathārūpo hutvā āgatoti āha ‘‘sakko kirā’’ti. Kathaṃ panettha ñāyati ‘‘so eko rūpāvacarabrahmā, na paneso avaruddhakayakkho’’ti yuttiṃ dassento ‘‘avaruddhakayakkhā panā’’tiādimāha. Devānaṃ vacanaṃ sutvā. Pharusenāti pharusasamācārena. ‘‘Ko nāma mayhaṃ āsane sannisinno’’ti akkhantiṃ anuppādento khantiyaṃ ṭhatvā. Balavacittīkāranti garutaraṃ sakkārabahumānaṃ. Nīcavuttiyāti paramanipaccakāre suvūpasamane ca dassiyamāne. Sakkassa tāya eva ācārasampattiyā sakkāsane ṭhātuṃ, attano ca āvikātuṃ asakkonto antaradhāyi. Upahatacittomhīti khantimettānuddayāsabbhāvato parasmiṃ upahatacittomhīti sakko attano sabhāvaṃ vadati. Kodhavase vattetunti kodhena attano vase nibbattetuṃ na sukaromhi, atha kho kodhaṃ mayhaṃ vase na vattemīti adhippāyo. Ciraṃ na kujjhāmīti yadi me kadāci kodho uppajjeyya, taṃ kodhaṃ anuvattento cirakālaṃ na kujjhāmi . Na upanayhāmīti anto sace me kodho uppajjeyya, khippameva ca naṃ paṭivineyyanti taṃ me pubbeva vataṃ paripūritaṃ.
ದುಬ್ಬಣ್ಣಿಯಸುತ್ತವಣ್ಣನಾ ನಿಟ್ಠಿತಾ।
Dubbaṇṇiyasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ದುಬ್ಬಣ್ಣಿಯಸುತ್ತಂ • 2. Dubbaṇṇiyasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨. ದುಬ್ಬಣ್ಣಿಯಸುತ್ತವಣ್ಣನಾ • 2. Dubbaṇṇiyasuttavaṇṇanā
