| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. දුච්‌චරිතසුත්‌තං
7. Duccaritasuttaṃ
413. අථ ඛො අඤ්‌ඤතරො භික්‌ඛු යෙන භගවා තෙනුපසඞ්‌කමි…පෙ.… ‘‘සාධු මෙ, භන්‌තෙ, භගවා සංඛිත්‌තෙන ධම්‌මං දෙසෙතු, යමහං භගවතො ධම්‌මං සුත්‌වා එකො වූපකට්‌ඨො අප්‌පමත්‌තො ආතාපී පහිතත්‌තො විහරෙය්‍ය’’න්‌ති. ‘‘තස්‌මාතිහ ත්‌වං, භික්‌ඛු, ආදිමෙව විසොධෙහි කුසලෙසු ධම්‌මෙසු. කො චාදි කුසලානං ධම්‌මානං? ඉධ ත්‌වං, භික්‌ඛු, කායදුච්‌චරිතං පහාය කායසුචරිතං භාවෙස්‌සසි. වචීදුච්‌චරිතං පහාය වචීසුචරිතං භාවෙස්‌සසි. මනොදුච්‌චරිතං පහාය මනොසුචරිතං භාවෙස්‌සසි. යතො ඛො ත්‌වං, භික්‌ඛු, කායදුච්‌චරිතං පහාය කායසුචරිතං භාවෙස්‌සසි, වචීදුච්‌චරිතං පහාය වචීසුචරිතං භාවෙස්‌සසි, මනොදුච්‌චරිතං පහාය මනොසුචරිතං භාවෙස්‌සසි, තතො ත්‌වං, භික්‌ඛු, සීලං නිස්‌සාය සීලෙ පතිට්‌ඨාය චත්‌තාරො සතිපට්‌ඨානෙ භාවෙය්‍යාසි’’.
413. Atha kho aññataro bhikkhu yena bhagavā tenupasaṅkami…pe… ‘‘sādhu me, bhante, bhagavā saṃkhittena dhammaṃ desetu, yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti. ‘‘Tasmātiha tvaṃ, bhikkhu, ādimeva visodhehi kusalesu dhammesu. Ko cādi kusalānaṃ dhammānaṃ? Idha tvaṃ, bhikkhu, kāyaduccaritaṃ pahāya kāyasucaritaṃ bhāvessasi. Vacīduccaritaṃ pahāya vacīsucaritaṃ bhāvessasi. Manoduccaritaṃ pahāya manosucaritaṃ bhāvessasi. Yato kho tvaṃ, bhikkhu, kāyaduccaritaṃ pahāya kāyasucaritaṃ bhāvessasi, vacīduccaritaṃ pahāya vacīsucaritaṃ bhāvessasi, manoduccaritaṃ pahāya manosucaritaṃ bhāvessasi, tato tvaṃ, bhikkhu, sīlaṃ nissāya sīle patiṭṭhāya cattāro satipaṭṭhāne bhāveyyāsi’’.
‘‘කතමෙ චත්‌තාරො? ඉධ ත්‌වං, භික්‌ඛු, කායෙ කායානුපස්‌සී විහරාහි ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං; වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරාහි ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. යතො ඛො ත්‌වං, භික්‌ඛු, සීලං නිස්‌සාය සීලෙ පතිට්‌ඨාය ඉමෙ චත්‌තාරො සතිපට්‌ඨානෙ එවං භාවෙස්‌සසි, තතො තුය්‌හං, භික්‌ඛු, යා රත්‌ති වා දිවසො වා ආගමිස්‌සති වුද්‌ධියෙව පාටිකඞ්‌ඛා කුසලෙසු ධම්‌මෙසු, නො පරිහානී’’ති…පෙ.… අඤ්‌ඤතරො ච පන සො භික්‌ඛු අරහතං අහොසීති. සත්‌තමං.
‘‘Katame cattāro? Idha tvaṃ, bhikkhu, kāye kāyānupassī viharāhi ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharāhi ātāpī sampajāno satimā, vineyya loke abhijjhādomanassaṃ. Yato kho tvaṃ, bhikkhu, sīlaṃ nissāya sīle patiṭṭhāya ime cattāro satipaṭṭhāne evaṃ bhāvessasi, tato tuyhaṃ, bhikkhu, yā ratti vā divaso vā āgamissati vuddhiyeva pāṭikaṅkhā kusalesu dhammesu, no parihānī’’ti…pe… aññataro ca pana so bhikkhu arahataṃ ahosīti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. දුච්‌චරිතසුත්‌තවණ්‌ණනා • 7. Duccaritasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. දුච්‌චරිතසුත්‌තවණ්‌ණනා • 7. Duccaritasuttavaṇṇanā
