| Library / Tipiṭaka / તિપિટક • Tipiṭaka / ઇતિવુત્તક-અટ્ઠકથા • Itivuttaka-aṭṭhakathā |
૫. દુચ્ચરિતસુત્તવણ્ણના
5. Duccaritasuttavaṇṇanā
૬૪. પઞ્ચમે દુટ્ઠુ ચરિતાનિ, દુટ્ઠાનિ વા ચરિતાનિ દુચ્ચરિતાનિ. કાયેન દુચ્ચરિતં, કાયતો વા પવત્તં દુચ્ચરિતં કાયદુચ્ચરિતં. સેસેસુપિ એસેવ નયો . ઇમાનિ ચ દુચ્ચરિતાનિ પઞ્ઞત્તિયા વા કથેતબ્બાનિ કમ્મપથેહિ વા. તત્થ પઞ્ઞત્તિયા તાવ કાયદ્વારે પઞ્ઞત્તસિક્ખાપદસ્સ વીતિક્કમો કાયદુચ્ચરિતં, વચીદ્વારે પઞ્ઞત્તસિક્ખાપદસ્સ વીતિક્કમો વચીદુચ્ચરિતં, ઉભયત્થ પઞ્ઞત્તસ્સ વીતિક્કમો મનોદુચ્ચરિતન્તિ અયં પઞ્ઞત્તિકથા. પાણાતિપાતાદયો પન તિસ્સો ચેતના કાયદ્વારેપિ, વચીદ્વારેપિ, ઉપ્પન્ના કાયદુચ્ચરિતં, તથા ચતસ્સો મુસાવાદાદિચેતના વચીદુચ્ચરિતં, અભિજ્ઝા, બ્યાપાદો, મિચ્છાદિટ્ઠીતિ તયો ચેતનાસમ્પયુત્તધમ્મા મનોદુચ્ચરિતન્તિ અયં કમ્મપથકથા.
64. Pañcame duṭṭhu caritāni, duṭṭhāni vā caritāni duccaritāni. Kāyena duccaritaṃ, kāyato vā pavattaṃ duccaritaṃ kāyaduccaritaṃ. Sesesupi eseva nayo . Imāni ca duccaritāni paññattiyā vā kathetabbāni kammapathehi vā. Tattha paññattiyā tāva kāyadvāre paññattasikkhāpadassa vītikkamo kāyaduccaritaṃ, vacīdvāre paññattasikkhāpadassa vītikkamo vacīduccaritaṃ, ubhayattha paññattassa vītikkamo manoduccaritanti ayaṃ paññattikathā. Pāṇātipātādayo pana tisso cetanā kāyadvārepi, vacīdvārepi, uppannā kāyaduccaritaṃ, tathā catasso musāvādādicetanā vacīduccaritaṃ, abhijjhā, byāpādo, micchādiṭṭhīti tayo cetanāsampayuttadhammā manoduccaritanti ayaṃ kammapathakathā.
ગાથાયં કમ્મપથપ્પત્તોયેવ પાપધમ્મો કાયદુચ્ચરિતાદિભાવેન વુત્તોતિ તદઞ્ઞં પાપધમ્મં સઙ્ગણ્હિતું ‘‘યઞ્ચઞ્ઞં દોસસઞ્હિત’’ન્તિ વુત્તં. તત્થ દોસસઞ્હિતન્તિ રાગાદિકિલેસસંહિતં. સેસં સુવિઞ્ઞેય્યમેવ.
Gāthāyaṃ kammapathappattoyeva pāpadhammo kāyaduccaritādibhāvena vuttoti tadaññaṃ pāpadhammaṃ saṅgaṇhituṃ ‘‘yañcaññaṃ dosasañhita’’nti vuttaṃ. Tattha dosasañhitanti rāgādikilesasaṃhitaṃ. Sesaṃ suviññeyyameva.
પઞ્ચમસુત્તવણ્ણના નિટ્ઠિતા.
Pañcamasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / ખુદ્દકનિકાય • Khuddakanikāya / ઇતિવુત્તકપાળિ • Itivuttakapāḷi / ૫. દુચ્ચરિતસુત્તં • 5. Duccaritasuttaṃ
