| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. து³கனித்³தே³ஸவண்ணனா
2. Dukaniddesavaṇṇanā
45. து³கனித்³தே³ஸே கோத⁴னோதி குஜ்ஜ²னஸீலோ மஹாகோதோ⁴. ஏவங் புக்³க³லங் புச்சி²த்வாபி த⁴ம்மேன புக்³க³லங் த³ஸ்ஸேதுங் தத்த² கதமோ கோதோ⁴திஆதி³மாஹ. உபனாஹீநித்³தே³ஸாதீ³ஸுபி ஏஸேவ நயோ. கோதோ⁴ குஜ்ஜ²னாதிஆதீ³னி ஹெட்டா² வுத்தத்தா²னேவ. ததா² உபனாஹீனித்³தே³ஸாதீ³ஸு புப்³ப³காலங் கோதோ⁴திஆதீ³னி. அயங் கோதோ⁴ அப்பஹீனோதி அயங் எத்தகோ கோதோ⁴ விக்க²ம்ப⁴னப்பஹானேன வா தத³ங்க³ப்பஹானேன வா ஸமுச்சே²த³ப்பஹானேன வா அப்பஹீனோ. பரதோ உபனாஹாதீ³ஸுபி ஏஸேவ நயோ.
45. Dukaniddese kodhanoti kujjhanasīlo mahākodho. Evaṃ puggalaṃ pucchitvāpi dhammena puggalaṃ dassetuṃ tattha katamo kodhotiādimāha. Upanāhīniddesādīsupi eseva nayo. Kodho kujjhanātiādīni heṭṭhā vuttatthāneva. Tathā upanāhīniddesādīsu pubbakālaṃ kodhotiādīni. Ayaṃ kodho appahīnoti ayaṃ ettako kodho vikkhambhanappahānena vā tadaṅgappahānena vā samucchedappahānena vā appahīno. Parato upanāhādīsupi eseva nayo.
53. அஹிரிகனித்³தே³ஸாதீ³ஸு – இமினா அஹிரிகேனாதி இமினா ஏவங்பகாரேன அஹிரிகத⁴ம்மேன ஸமன்னாக³தோ. இமினா அனொத்தப்பேனாதிஆதீ³ஸுபி ஏஸேவ நயோ.
53. Ahirikaniddesādīsu – iminā ahirikenāti iminā evaṃpakārena ahirikadhammena samannāgato. Iminā anottappenātiādīsupi eseva nayo.
63. அஜ்ஜ²த்தஸங்யோஜனோதி அஜ்ஜ²த்தப³ந்த⁴னோ. ப³ஹித்³தா⁴ஸங்யோஜனோதி ப³ஹித்³தா⁴ப³ந்த⁴னோ. தே உபோ⁴பி வச்ச²கஸாலூபமாய தீ³பேதப்³பா³. வச்ச²கஸாலாய ஹி அந்தோ ப³த்³தோ⁴ அந்தோயேவ ஸயிதவச்ச²கோ விய இத⁴ட்ட²கஸோதாபன்னஸகதா³கா³மினோ. தேஸஞ்ஹி ப³ந்த⁴னம்பி இதே⁴வ, ஸயம்பி இதே⁴வ. அந்தோ ப³த்³தோ⁴ பன ப³ஹி ஸயிதவச்ச²கோ விய ரூபாரூபப⁴வே ஸோதாபன்னஸகதா³கா³மினோ. தேஸஞ்ஹி ப³ந்த⁴னமேவ இத⁴, ஸயங் பன ப்³ரஹ்மலோகே டி²தா. ப³ஹி ப³த்³தோ⁴ ப³ஹி ஸயிதவச்ச²கோ விய ரூபாரூபப⁴வே அனாகா³மீ. தஸ்ஸ ஹி ப³ந்த⁴னம்பி ப³ஹித்³தா⁴, ஸயம்பி ப³ஹித்³தா⁴வ. ப³ஹி ப³த்³தோ⁴ பன அந்தோஸயிதவச்ச²கோ விய இத⁴ட்ட²கஅனாகா³மீ. தஸ்ஸ ஹி ப³ந்த⁴னங் ரூபாரூபப⁴வேஸு, ஸயங் பன இத⁴ டி²தோ.
63. Ajjhattasaṃyojanoti ajjhattabandhano. Bahiddhāsaṃyojanoti bahiddhābandhano. Te ubhopi vacchakasālūpamāya dīpetabbā. Vacchakasālāya hi anto baddho antoyeva sayitavacchako viya idhaṭṭhakasotāpannasakadāgāmino. Tesañhi bandhanampi idheva, sayampi idheva. Anto baddho pana bahi sayitavacchako viya rūpārūpabhave sotāpannasakadāgāmino. Tesañhi bandhanameva idha, sayaṃ pana brahmaloke ṭhitā. Bahi baddho bahi sayitavacchako viya rūpārūpabhave anāgāmī. Tassa hi bandhanampi bahiddhā, sayampi bahiddhāva. Bahi baddho pana antosayitavacchako viya idhaṭṭhakaanāgāmī. Tassa hi bandhanaṃ rūpārūpabhavesu, sayaṃ pana idha ṭhito.
65. அக்கோத⁴னநித்³தே³ஸாதீ³ஸு – பஹீனோதி விக்க²ம்ப⁴னப்பஹானேன வா, தத³ங்க³ப்பஹானேன வா, ஸமுச்சே²த³ப்பஹானேன வா பஹீனோ.
65. Akkodhananiddesādīsu – pahīnoti vikkhambhanappahānena vā, tadaṅgappahānena vā, samucchedappahānena vā pahīno.
83. து³ல்லப⁴னித்³தே³ஸே – து³ல்லபா⁴தி ந ஸுலபா⁴. புப்³ப³காரீதி பட²மமேவ காரகோ. கதவேதீ³தி கதங் வேதே³தி, விதி³தங் பாகடங் கரோதி. தே அகா³ரியானகா³ரியேஹி தீ³பேதப்³பா³. அகா³ரியேஸு ஹி மாதாபிதரோ புப்³ப³காரினோ நாம. புத்ததீ⁴தரோ பன மாதாபிதரோ படிஜக்³க³ந்தா அபி⁴வாத³னாதீ³னி தேஸங் குருமானா கதவேதி³னோ நாம. அனகா³ரியேஸு ஆசரியுபஜ்ஜா²யா புப்³ப³காரினோ நாம. அந்தேவாஸிகஸத்³தி⁴விஹாரிகா ஆசரியுபஜ்ஜா²யே படிஜக்³க³ந்தா அபி⁴வாத³னாதீ³னி தேஸங் குருமானா கதவேதி³னோ நாம. தேஸங் ஆவிபா⁴வத்தா²ய உபஜ்ஜா²யபோஸகஸோணத்தே²ராதீ³னங் வத்தூ²னி கதே²தப்³பா³னி.
83. Dullabhaniddese – dullabhāti na sulabhā. Pubbakārīti paṭhamameva kārako. Katavedīti kataṃ vedeti, viditaṃ pākaṭaṃ karoti. Te agāriyānagāriyehi dīpetabbā. Agāriyesu hi mātāpitaro pubbakārino nāma. Puttadhītaro pana mātāpitaro paṭijaggantā abhivādanādīni tesaṃ kurumānā katavedino nāma. Anagāriyesu ācariyupajjhāyā pubbakārino nāma. Antevāsikasaddhivihārikā ācariyupajjhāye paṭijaggantā abhivādanādīni tesaṃ kurumānā katavedino nāma. Tesaṃ āvibhāvatthāya upajjhāyaposakasoṇattherādīnaṃ vatthūni kathetabbāni.
அபரோ நயோ – பரேன அகதேயேவ உபகாரே அத்தனி கதங் உபகாரங் அனபெக்கி²த்வா காரகோ புப்³ப³காரீ, ஸெய்யதா²பி மாதாபிதரோ சேவ ஆசரியுபஜ்ஜா²யா ச. ஸோ து³ல்லபோ⁴; ஸத்தானங் தண்ஹாபி⁴பூ⁴தத்தா. பரேன கதஸ்ஸ உபகாரஸ்ஸ அனுரூபப்பவத்திங் அத்தனி கதங் உபகாரங் உபகாரதோ ஜானந்தோ, வேதி³யந்தோ, கதஞ்ஞுகதவேதீ³. ஸெய்யதா²பி மாதாபிதுஆசரியுபஜ்ஜா²யேஸு ஸம்மா படிபன்னோ. ஸோபி து³ல்லபோ⁴; ஸத்தானங் அவிஜ்ஜாபி⁴பூ⁴தத்தா.
Aparo nayo – parena akateyeva upakāre attani kataṃ upakāraṃ anapekkhitvā kārako pubbakārī, seyyathāpi mātāpitaro ceva ācariyupajjhāyā ca. So dullabho; sattānaṃ taṇhābhibhūtattā. Parena katassa upakārassa anurūpappavattiṃ attani kataṃ upakāraṃ upakārato jānanto, vediyanto, kataññukatavedī. Seyyathāpi mātāpituācariyupajjhāyesu sammā paṭipanno. Sopi dullabho; sattānaṃ avijjābhibhūtattā.
அபிச – அகாரணவச்ச²லோ புப்³ப³காரீ, ஸகாரணவச்ச²லோ கதஞ்ஞுகதவேதீ³. ‘கரிஸ்ஸதி மே’தி ஏவமாதி³காரணனிரபெக்க²கிரியோ புப்³ப³காரீ. ‘கரிஸ்ஸதி மே’தி ஏவமாதி³காரணஸாபெக்க²கிரியோ கதஞ்ஞுகதவேதீ³. தமோஜோதிபராயணோ புப்³ப³காரீ, ஜோதிஜோதிபராயணோ கதஞ்ஞுகதவேதீ³. தே³ஸேதா புப்³ப³காரீ, படிபஜ்ஜிதா கதஞ்ஞுகதவேதீ³. ஸதே³வகே லோகே அரஹங் ஸம்மாஸம்பு³த்³தோ⁴ புப்³ப³காரீ, அரியஸாவகோ கதஞ்ஞுகதவேதீ³தி. து³கனிபாதட்ட²கதா²யங் (அ॰ நி॰ அட்ட²॰ 2.2.120) பன – ‘‘‘புப்³ப³காரீ’தி பட²மங் உபகாரஸ்ஸ காரகோ, ‘கதஞ்ஞுகதவேதீ³’தி தேன கதங் ஞத்வா பச்சா² காரகோ. தேஸு புப்³ப³காரீ இணங் தே³மீதி ஸஞ்ஞங் கரோதி, பச்சா²காரகோ ‘இணங் ஜீராபேமீ’தி ஸஞ்ஞங் கரோதீ’’தி எத்தகமேவ வுத்தங்.
Apica – akāraṇavacchalo pubbakārī, sakāraṇavacchalo kataññukatavedī. ‘Karissati me’ti evamādikāraṇanirapekkhakiriyo pubbakārī. ‘Karissati me’ti evamādikāraṇasāpekkhakiriyo kataññukatavedī. Tamojotiparāyaṇo pubbakārī, jotijotiparāyaṇo kataññukatavedī. Desetā pubbakārī, paṭipajjitā kataññukatavedī. Sadevake loke arahaṃ sammāsambuddho pubbakārī, ariyasāvako kataññukatavedīti. Dukanipātaṭṭhakathāyaṃ (a. ni. aṭṭha. 2.2.120) pana – ‘‘‘pubbakārī’ti paṭhamaṃ upakārassa kārako, ‘kataññukatavedī’ti tena kataṃ ñatvā pacchā kārako. Tesu pubbakārī iṇaṃ demīti saññaṃ karoti, pacchākārako ‘iṇaṃ jīrāpemī’ti saññaṃ karotī’’ti ettakameva vuttaṃ.
84. து³த்தப்பயனித்³தே³ஸே – து³த்தப்பயாதி அதப்பயா, ந ஸக்கா கேனசி தப்பேதுங். யோ ஹி உபட்டா²ககுலங் வா ஞாதிகுலங் வா நிஸ்ஸாய வஸமானோ சீவரே ஜிண்ணே தேஹி தி³ன்னங் சீவரங் நிக்கி²பதி, ந பரிபு⁴ஞ்ஜதி. புனப்புனங் தி³ன்னம்பி க³ஹெத்வா நிக்கி²பதேவ. யோ ச தேனேவ நயேன லத்³த⁴ங் லத்³த⁴ங் விஸ்ஸஜ்ஜேதி பரஸ்ஸ தே³தி. புனப்புனங் லத்³த⁴ம்பி ததே²வ கரோதி. இமே த்³வே புக்³க³லா ஸகடேஹிபி பச்சயே உபனெந்தேன தப்பேதுங் ந ஸக்காதி து³த்தப்பயா நாம.
84. Duttappayaniddese – duttappayāti atappayā, na sakkā kenaci tappetuṃ. Yo hi upaṭṭhākakulaṃ vā ñātikulaṃ vā nissāya vasamāno cīvare jiṇṇe tehi dinnaṃ cīvaraṃ nikkhipati, na paribhuñjati. Punappunaṃ dinnampi gahetvā nikkhipateva. Yo ca teneva nayena laddhaṃ laddhaṃ vissajjeti parassa deti. Punappunaṃ laddhampi tatheva karoti. Ime dve puggalā sakaṭehipi paccaye upanentena tappetuṃ na sakkāti duttappayā nāma.
85. ஸுதப்பயனித்³தே³ஸே – ந விஸ்ஸஜ்ஜேதீதி அத்தனோ அகத்வா பரஸ்ஸ ந தே³தி. அதிரேகே பன ஸதி ந நிக்கி²பதி பரஸ்ஸ தே³தி. இத³ங் வுத்தங் ஹோதி – யோ பன பி⁴க்கு² உபட்டா²ககுலா வா ஞாதிகுலா வா ஜிண்ணசீவரோ ஸாடகங் லபி⁴த்வா சீவரங் கத்வா பரிபு⁴ஞ்ஜதி, ந நிக்கி²பதி; அக்³க³ளங் த³த்வா பாருபந்தோபி புன தி³ய்யமானே ஸஹஸா ந படிக்³க³ண்ஹாதி. யோ ச லத்³த⁴ங் லத்³த⁴ங் அத்தனா பரிபு⁴ஞ்ஜதி, பரேஸங் ந தே³தி. இமே த்³வேபி ஸுகே²ன ஸக்கா தப்பேதுந்தி ஸுதப்பயா நாமாதி.
85. Sutappayaniddese – na vissajjetīti attano akatvā parassa na deti. Atireke pana sati na nikkhipati parassa deti. Idaṃ vuttaṃ hoti – yo pana bhikkhu upaṭṭhākakulā vā ñātikulā vā jiṇṇacīvaro sāṭakaṃ labhitvā cīvaraṃ katvā paribhuñjati, na nikkhipati; aggaḷaṃ datvā pārupantopi puna diyyamāne sahasā na paṭiggaṇhāti. Yo ca laddhaṃ laddhaṃ attanā paribhuñjati, paresaṃ na deti. Ime dvepi sukhena sakkā tappetunti sutappayā nāmāti.
86. ஆஸவாதி கிலேஸா. ந குக்குச்சாயிதப்³ப³ங் குக்குச்சாயதீதி ந குக்குச்சாயிதப்³ப³யுத்தகங் குக்குச்சாயதி. ஸூகரமங்ஸங் லபி⁴த்வா அச்ச²மங்ஸந்தி குக்குச்சாயதி, மிக³மங்ஸங், லபி⁴த்வா தீ³பிமங்ஸந்தி குக்குச்சாயதி. காலே ஸந்தேயேவ ‘காலோ நத்தீ²’தி, அப்பவாரெத்வாவ ‘பவாரிதொஸ்மீ’தி, பத்தே ரஜஸ்மிங் அபதிதேயேவ ‘பதித’ந்தி, அத்தானங் உத்³தி³ஸ்ஸ மச்ச²மங்ஸே அகதேயேவ ‘மங் உத்³தி³ஸ்ஸ கத’ந்தி குக்குச்சாயதி. குக்குச்சாயிதப்³ப³ங் ந குக்குச்சாயதீதி குக்குச்சாயிதப்³ப³யுத்தகங் ந குக்குச்சாயதி. அச்ச²மங்ஸங் லபி⁴த்வா ஸூகரமங்ஸந்தி ந குக்குச்சாயதி…பே॰… அத்தானங் உத்³தி³ஸ்ஸ மச்ச²மங்ஸே கதே ‘மங் உத்³தி³ஸ்ஸ கத’ந்தி ந குக்குச்சாயதி . அங்கு³த்தரட்ட²கதா²யங் பன – ‘‘‘ந குக்குச்சாயிதப்³ப³’ந்தி ஸங்க⁴போ⁴க³ஸ்ஸ அபட்ட²பனங் அவிசாரணங் ந குக்குச்சாயிதப்³ப³ங் நாம, தங் குக்குச்சாயதி. ‘குக்குச்சாயிதப்³ப³’ந்தி தஸ்ஸேவ பட்ட²பனங் விசாரணங், தங் ந குக்குச்சாயதீ’’தி எத்தகமேவ வுத்தங். இமேஸந்தி இமேஸங் த்³வின்னங் புக்³க³லானங் ஸுபூ⁴மியங் திணலதாதீ³னி விய ரத்திம்பி தி³வாபி ஆஸவா வட்³ட⁴ந்தியேவ. ஸுக்கபக்கே² கப்பியமங்ஸங் லபி⁴த்வா கப்பியமங்ஸந்த்வேவ க³ண்ஹந்தோ ந குக்குச்சாயிதப்³ப³ங் ந குக்குச்சாயதி நாமாதி இமினா நயேன அத்தோ² வேதி³தப்³போ³.
86. Āsavāti kilesā. Na kukkuccāyitabbaṃ kukkuccāyatīti na kukkuccāyitabbayuttakaṃ kukkuccāyati. Sūkaramaṃsaṃ labhitvā acchamaṃsanti kukkuccāyati, migamaṃsaṃ, labhitvā dīpimaṃsanti kukkuccāyati. Kāle santeyeva ‘kālo natthī’ti, appavāretvāva ‘pavāritosmī’ti, patte rajasmiṃ apatiteyeva ‘patita’nti, attānaṃ uddissa macchamaṃse akateyeva ‘maṃ uddissa kata’nti kukkuccāyati. Kukkuccāyitabbaṃ na kukkuccāyatīti kukkuccāyitabbayuttakaṃ na kukkuccāyati. Acchamaṃsaṃ labhitvā sūkaramaṃsanti na kukkuccāyati…pe… attānaṃ uddissa macchamaṃse kate ‘maṃ uddissa kata’nti na kukkuccāyati . Aṅguttaraṭṭhakathāyaṃ pana – ‘‘‘na kukkuccāyitabba’nti saṅghabhogassa apaṭṭhapanaṃ avicāraṇaṃ na kukkuccāyitabbaṃ nāma, taṃ kukkuccāyati. ‘Kukkuccāyitabba’nti tasseva paṭṭhapanaṃ vicāraṇaṃ, taṃ na kukkuccāyatī’’ti ettakameva vuttaṃ. Imesanti imesaṃ dvinnaṃ puggalānaṃ subhūmiyaṃ tiṇalatādīni viya rattimpi divāpi āsavā vaḍḍhantiyeva. Sukkapakkhe kappiyamaṃsaṃ labhitvā kappiyamaṃsantveva gaṇhanto na kukkuccāyitabbaṃ na kukkuccāyati nāmāti iminā nayena attho veditabbo.
88. ஹீனாதி⁴முத்தோதி ஹீனஜ்ஜா²ஸயோ. து³ஸ்ஸீலோதி நிஸ்ஸீலோ. பாபத⁴ம்மோதி லாமகத⁴ம்மோ.
88. Hīnādhimuttoti hīnajjhāsayo. Dussīloti nissīlo. Pāpadhammoti lāmakadhammo.
89. பணீதாதி⁴முத்தோதி பணீதஜ்ஜா²ஸயோ. கல்யாணத⁴ம்மோதி ப⁴த்³த³கத⁴ம்மோ, ஸுசித⁴ம்மோ, ஸுந்த³ரத⁴ம்மோ.
89. Paṇītādhimuttoti paṇītajjhāsayo. Kalyāṇadhammoti bhaddakadhammo, sucidhammo, sundaradhammo.
90. தித்தோதி ஸுஹிதோ பரியோஸிதோ. தப்பேதாதி அஞ்ஞேஸம்பி தித்திகரோ. பச்சேகஸம்பு³த்³தா⁴ யே ச ததா²க³தஸாவகாதி எத்த² பச்சேகபு³த்³தா⁴ நவஹி லோகுத்தரத⁴ம்மேஹி ஸயங் தித்தா பரிபுண்ணா. அஞ்ஞே பன தப்பேதுங் ந ஸக்கொந்தி. தேஸஞ்ஹி த⁴ம்மகதா²ய அபி⁴ஸமயோ ந ஹோதி. ஸாவகானங் பன த⁴ம்மகதா²ய அபரிமாணானம்பி தே³வமனுஸ்ஸானங் அபி⁴ஸமயோ ஹோதி. ஏவங் ஸந்தேபி யஸ்மா பன தே த⁴ம்மங் தே³ஸெந்தா ந அத்தனோ வசனங் கத்வா கதெ²ந்தி, பு³த்³தா⁴னங் வசனங் கத்வா கதெ²ந்தி. ஸோதுங் நிஸின்னபரிஸாபி ‘அயங் பி⁴க்கு² ந அத்தனா படிவித்³த⁴த⁴ம்மங் கதே²தி, பு³த்³தே⁴ஹி படிவித்³த⁴த⁴ம்மங் கதே²தீ’தி சித்தீகாரங் கரோதி. இதி ஸோ சித்தீகாரோ பு³த்³தா⁴னங்யேவ ஹோதி. ஏவங் தத்த² ஸம்மாஸம்பு³த்³தோ⁴வ தப்பேதா நாம. யதா² ஹி ‘அஸுகஸ்ஸ நாம இத³ஞ்சித³ஞ்ச தே³தா²’தி ரஞ்ஞா ஆணத்தா கிஞ்சாபி ஆனெத்வா தெ³ந்தி, அத² கோ² ராஜாவ தத்த² தா³யகோ. யேஹிபி லத்³த⁴ங் ஹோதி, தே ‘ரஞ்ஞா அம்ஹாகங் டா²னந்தரங் தி³ன்னங், இஸ்ஸரியவிப⁴வோ தி³ன்னோ’த்வேவ க³ண்ஹந்தி, ந ராஜபுரிஸேஹீதி. ஏவங்ஸம்பத³மித³ங் வேதி³தப்³ப³ங். ஸேஸங் ஸப்³ப³த்த² உத்தானத்த²மேவாதி.
90. Tittoti suhito pariyosito. Tappetāti aññesampi tittikaro. Paccekasambuddhā ye ca tathāgatasāvakāti ettha paccekabuddhā navahi lokuttaradhammehi sayaṃ tittā paripuṇṇā. Aññe pana tappetuṃ na sakkonti. Tesañhi dhammakathāya abhisamayo na hoti. Sāvakānaṃ pana dhammakathāya aparimāṇānampi devamanussānaṃ abhisamayo hoti. Evaṃ santepi yasmā pana te dhammaṃ desentā na attano vacanaṃ katvā kathenti, buddhānaṃ vacanaṃ katvā kathenti. Sotuṃ nisinnaparisāpi ‘ayaṃ bhikkhu na attanā paṭividdhadhammaṃ katheti, buddhehi paṭividdhadhammaṃ kathetī’ti cittīkāraṃ karoti. Iti so cittīkāro buddhānaṃyeva hoti. Evaṃ tattha sammāsambuddhova tappetā nāma. Yathā hi ‘asukassa nāma idañcidañca dethā’ti raññā āṇattā kiñcāpi ānetvā denti, atha kho rājāva tattha dāyako. Yehipi laddhaṃ hoti, te ‘raññā amhākaṃ ṭhānantaraṃ dinnaṃ, issariyavibhavo dinno’tveva gaṇhanti, na rājapurisehīti. Evaṃsampadamidaṃ veditabbaṃ. Sesaṃ sabbattha uttānatthamevāti.
து³கனித்³தே³ஸவண்ணனா.
Dukaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / புக்³க³லபஞ்ஞத்திபாளி • Puggalapaññattipāḷi / 2. து³கபுக்³க³லபஞ்ஞத்தி • 2. Dukapuggalapaññatti
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. து³கனித்³தே³ஸவண்ணனா • 2. Dukaniddesavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. து³கனித்³தே³ஸவண்ணனா • 2. Dukaniddesavaṇṇanā
