| Library / Tipiṭaka / તિપિટક • Tipiṭaka / પરિવારપાળિ • Parivārapāḷi |
૨. દુકવારો
2. Dukavāro
૩૨૨. અત્થાપત્તિ સઞ્ઞા વિમોક્ખા, અત્થાપત્તિ નો સઞ્ઞાવિમોક્ખા. અત્થાપત્તિ લદ્ધસમાપત્તિકસ્સ, અત્થાપત્તિ ન લદ્ધસમાપત્તિકસ્સ. અત્થાપત્તિ સદ્ધમ્મપટિસઞ્ઞુત્તા, અત્થાપત્તિ અસદ્ધમ્મપટિસઞ્ઞુત્તા. અત્થાપત્તિ સપરિક્ખારપટિસઞ્ઞુત્તા, અત્થાપત્તિ પરપરિક્ખારપટિસઞ્ઞુત્તા. અત્થાપત્તિ સપુગ્ગલપટિસઞ્ઞુત્તા, અત્થાપત્તિ પરપુગ્ગલપટિસઞ્ઞુત્તા. અત્થિ સચ્ચં ભણન્તો ગરુકં આપત્તિં આપજ્જતિ, મુસા ભણન્તો લહુકં. અત્થિ મુસા ભણન્તો ગરુકં આપત્તિં આપજ્જતિ, સચ્ચં ભણન્તો લહુકં. અત્થાપત્તિ ભૂમિગતો આપજ્જતિ, નો વેહાસગતો. અત્થાપત્તિ વેહાસગતો આપજ્જતિ, નો ભૂમિગતો. અત્થાપત્તિ નિક્ખમન્તો આપજ્જતિ, નો પવિસન્તો. અત્થાપત્તિ પવિસન્તો આપજ્જતિ, નો નિક્ખમન્તો. અત્થાપત્તિ આદિયન્તો આપજ્જતિ, અત્થાપત્તિ અનાદિયન્તો આપજ્જતિ. અત્થાપત્તિ સમાદિયન્તો આપજ્જતિ , અત્થાપત્તિ ન સમાદિયન્તો આપજ્જતિ. અત્થાપત્તિ કરોન્તો આપજ્જતિ, અત્થાપત્તિ ન કરોન્તો આપજ્જતિ. અત્થાપત્તિ દેન્તો આપજ્જતિ, અત્થાપત્તિ ન દેન્તો આપજ્જતિ. (અત્થાપત્તિ દેસેન્તો આપજ્જતિ, અત્થાપત્તિ ન દેસેન્તો આપજ્જતિ.) 1 અત્થાપત્તિ પટિગ્ગણ્હન્તો આપજ્જતિ, અત્થાપત્તિ ન પટિગ્ગણ્હન્તો આપજ્જતિ. અત્થાપત્તિ પરિભોગેન આપજ્જતિ, અત્થાપત્તિ ન પરિભોગેન આપજ્જતિ. અત્થાપત્તિ રત્તિં આપજ્જતિ, નો દિવા. અત્થાપત્તિ દિવા આપજ્જતિ, નો રત્તિં. અત્થાપત્તિ અરુણુગ્ગે આપજ્જતિ, અત્થાપત્તિ ન અરુણુગ્ગે આપજ્જતિ. અત્થાપત્તિ છિન્દન્તો આપજ્જતિ, અત્થાપત્તિ ન છિન્દન્તો આપજ્જતિ. અત્થાપત્તિ છાદેન્તો આપજ્જતિ, અત્થાપત્તિ ન છાદેન્તો આપજ્જતિ. અત્થાપત્તિ ધારેન્તો આપજ્જતિ, અત્થાપત્તિ ન ધારેન્તો આપજ્જતિ.
322. Atthāpatti saññā vimokkhā, atthāpatti no saññāvimokkhā. Atthāpatti laddhasamāpattikassa, atthāpatti na laddhasamāpattikassa. Atthāpatti saddhammapaṭisaññuttā, atthāpatti asaddhammapaṭisaññuttā. Atthāpatti saparikkhārapaṭisaññuttā, atthāpatti paraparikkhārapaṭisaññuttā. Atthāpatti sapuggalapaṭisaññuttā, atthāpatti parapuggalapaṭisaññuttā. Atthi saccaṃ bhaṇanto garukaṃ āpattiṃ āpajjati, musā bhaṇanto lahukaṃ. Atthi musā bhaṇanto garukaṃ āpattiṃ āpajjati, saccaṃ bhaṇanto lahukaṃ. Atthāpatti bhūmigato āpajjati, no vehāsagato. Atthāpatti vehāsagato āpajjati, no bhūmigato. Atthāpatti nikkhamanto āpajjati, no pavisanto. Atthāpatti pavisanto āpajjati, no nikkhamanto. Atthāpatti ādiyanto āpajjati, atthāpatti anādiyanto āpajjati. Atthāpatti samādiyanto āpajjati , atthāpatti na samādiyanto āpajjati. Atthāpatti karonto āpajjati, atthāpatti na karonto āpajjati. Atthāpatti dento āpajjati, atthāpatti na dento āpajjati. (Atthāpatti desento āpajjati, atthāpatti na desento āpajjati.) 2 Atthāpatti paṭiggaṇhanto āpajjati, atthāpatti na paṭiggaṇhanto āpajjati. Atthāpatti paribhogena āpajjati, atthāpatti na paribhogena āpajjati. Atthāpatti rattiṃ āpajjati, no divā. Atthāpatti divā āpajjati, no rattiṃ. Atthāpatti aruṇugge āpajjati, atthāpatti na aruṇugge āpajjati. Atthāpatti chindanto āpajjati, atthāpatti na chindanto āpajjati. Atthāpatti chādento āpajjati, atthāpatti na chādento āpajjati. Atthāpatti dhārento āpajjati, atthāpatti na dhārento āpajjati.
દ્વે ઉપોસથા – ચાતુદ્દસિકો ચ પન્નરસિકો ચ. દ્વે પવારણા – ચાતુદ્દસિકા ચ પન્નરસિકા ચ. દ્વે કમ્માનિ – અપલોકનકમ્મં, ઞત્તિકમ્મં. અપરાનિપિ દ્વે કમ્માનિ – ઞત્તિદુતિયકમ્મં, ઞત્તિચતુત્થકમ્મં. દ્વે કમ્મવત્થૂનિ – અપલોકનકમ્મસ્સ વત્થુ, ઞત્તિકમ્મસ્સ વત્થુ. અપરાનિપિ દ્વે કમ્મવત્થૂનિ – ઞત્તિદુતિયકમ્મસ્સ વત્થુ, ઞત્તિચતુત્થકમ્મસ્સ વત્થુ. દ્વે કમ્મદોસા – અપલોકનકમ્મસ્સ દોસો, ઞત્તિકમ્મસ્સ દોસો. અપરેપિ દ્વે કમ્મદોસા – ઞત્તિદુતિયકમ્મસ્સ દોસો, ઞત્તિચતુત્થકમ્મસ્સ દોસો. દ્વે કમ્મસમ્પત્તિયો – અપલોકનકમ્મસ્સ સમ્પત્તિ, ઞત્તિકમ્મસ્સ સમ્પત્તિ. અપરાપિ દ્વે કમ્મસમ્પત્તિયો – ઞત્તિદુતિયકમ્મસ્સ સમ્પત્તિ, ઞત્તિચતુત્થકમ્મસ્સ સમ્પત્તિ. દ્વે નાનાસંવાસકભૂમિયો – અત્તના વા અત્તાનં નાનાસંવાસકં કરોતિ, સમગ્ગો વા નં સઙ્ઘો ઉક્ખિપતિ અદસ્સને વા અપ્પટિકમ્મે વા અપ્પટિનિસ્સગ્ગે વા. દ્વે સમાનસંવાસકભૂમિયો – અત્તના વા અત્તાનં સમાનસંવાસકં કરોતિ, સમગ્ગો વા નં સઙ્ઘો ઉક્ખિત્તં ઓસારેતિ દસ્સને વા પટિકમ્મે વા પટિનિસ્સગ્ગે વા. દ્વે પારાજિકા – ભિક્ખૂનઞ્ચ ભિક્ખુનીનઞ્ચ. દ્વે સઙ્ઘાદિસેસા, દ્વે થુલ્લચ્ચયા, દ્વે પાચિત્તિયા, દ્વે પાટિદેસનીયા, દ્વે દુક્કટા, દ્વે દુબ્ભાસિતા – ભિક્ખૂનઞ્ચ ભિક્ખુનીનઞ્ચ. સત્ત આપત્તિયો, સત્ત આપત્તિક્ખન્ધા. દ્વીહાકારેહિ સઙ્ઘો ભિજ્જતિ – કમ્મેન વા સલાકગ્ગાહેન વા.
Dve uposathā – cātuddasiko ca pannarasiko ca. Dve pavāraṇā – cātuddasikā ca pannarasikā ca. Dve kammāni – apalokanakammaṃ, ñattikammaṃ. Aparānipi dve kammāni – ñattidutiyakammaṃ, ñatticatutthakammaṃ. Dve kammavatthūni – apalokanakammassa vatthu, ñattikammassa vatthu. Aparānipi dve kammavatthūni – ñattidutiyakammassa vatthu, ñatticatutthakammassa vatthu. Dve kammadosā – apalokanakammassa doso, ñattikammassa doso. Aparepi dve kammadosā – ñattidutiyakammassa doso, ñatticatutthakammassa doso. Dve kammasampattiyo – apalokanakammassa sampatti, ñattikammassa sampatti. Aparāpi dve kammasampattiyo – ñattidutiyakammassa sampatti, ñatticatutthakammassa sampatti. Dve nānāsaṃvāsakabhūmiyo – attanā vā attānaṃ nānāsaṃvāsakaṃ karoti, samaggo vā naṃ saṅgho ukkhipati adassane vā appaṭikamme vā appaṭinissagge vā. Dve samānasaṃvāsakabhūmiyo – attanā vā attānaṃ samānasaṃvāsakaṃ karoti, samaggo vā naṃ saṅgho ukkhittaṃ osāreti dassane vā paṭikamme vā paṭinissagge vā. Dve pārājikā – bhikkhūnañca bhikkhunīnañca. Dve saṅghādisesā, dve thullaccayā, dve pācittiyā, dve pāṭidesanīyā, dve dukkaṭā, dve dubbhāsitā – bhikkhūnañca bhikkhunīnañca. Satta āpattiyo, satta āpattikkhandhā. Dvīhākārehi saṅgho bhijjati – kammena vā salākaggāhena vā.
દ્વે પુગ્ગલા ન ઉપસમ્પાદેતબ્બા – અદ્ધાનહીનો, અઙ્ગહીનો. અપરેપિ દ્વે પુગ્ગલા ન ઉપસમ્પાદેતબ્બા – વત્થુવિપન્નો, કરણદુક્કટકો. અપરેપિ દ્વે પુગ્ગલા ન ઉપસમ્પાદેતબ્બા – અપરિપૂરો પરિપૂરો નો ચ યાચતિ. દ્વિન્નં પુગ્ગલાનં નિસ્સાય ન વત્થબ્બં – અલજ્જિસ્સ ચ બાલસ્સ ચ. દ્વિન્નં પુગ્ગલાનં નિસ્સયો ન દાતબ્બો – અલજ્જિસ્સ ચ લજ્જિનો ચ ન યાચતિ. દ્વિન્નં પુગ્ગલાનં નિસ્સયો દાતબ્બો – બાલસ્સ ચ લજ્જિસ્સ ચ યાચતિ. દ્વે પુગ્ગલા અભબ્બા આપત્તિં આપજ્જિતું – બુદ્ધા ચ પચ્ચેકબુદ્ધા ચ. દ્વે પુગ્ગલા ભબ્બા, આપત્તિં આપજ્જિતું – ભિક્ખૂ ચ ભિક્ખુનિયો ચ. દ્વે પુગ્ગલા અભબ્બા સઞ્ચિચ્ચ આપત્તિં આપજ્જિતું – ભિક્ખૂ ચ ભિક્ખુનિયો ચ અરિયપુગ્ગલા. દ્વે પુગ્ગલા ભબ્બા સઞ્ચિચ્ચ આપત્તિં આપજ્જિતું – ભિક્ખૂ ચ ભિક્ખુનિયો ચ પુથુજ્જના. દ્વે પુગ્ગલા અભબ્બા સઞ્ચિચ્ચ સાતિસારં વત્થું અજ્ઝાચરિતું – ભિક્ખૂ ચ ભિક્ખુનિયો ચ અરિયપુગ્ગલા. દ્વે પુગ્ગલા ભબ્બા સઞ્ચિચ્ચ સાતિસારં વત્થું અજ્ઝાચરિતું – ભિક્ખૂ ચ ભિક્ખુનિયો ચ પુથુજ્જના.
Dve puggalā na upasampādetabbā – addhānahīno, aṅgahīno. Aparepi dve puggalā na upasampādetabbā – vatthuvipanno, karaṇadukkaṭako. Aparepi dve puggalā na upasampādetabbā – aparipūro paripūro no ca yācati. Dvinnaṃ puggalānaṃ nissāya na vatthabbaṃ – alajjissa ca bālassa ca. Dvinnaṃ puggalānaṃ nissayo na dātabbo – alajjissa ca lajjino ca na yācati. Dvinnaṃ puggalānaṃ nissayo dātabbo – bālassa ca lajjissa ca yācati. Dve puggalā abhabbā āpattiṃ āpajjituṃ – buddhā ca paccekabuddhā ca. Dve puggalā bhabbā, āpattiṃ āpajjituṃ – bhikkhū ca bhikkhuniyo ca. Dve puggalā abhabbā sañcicca āpattiṃ āpajjituṃ – bhikkhū ca bhikkhuniyo ca ariyapuggalā. Dve puggalā bhabbā sañcicca āpattiṃ āpajjituṃ – bhikkhū ca bhikkhuniyo ca puthujjanā. Dve puggalā abhabbā sañcicca sātisāraṃ vatthuṃ ajjhācarituṃ – bhikkhū ca bhikkhuniyo ca ariyapuggalā. Dve puggalā bhabbā sañcicca sātisāraṃ vatthuṃ ajjhācarituṃ – bhikkhū ca bhikkhuniyo ca puthujjanā.
દ્વે પટિક્કોસા – કાયેન વા પટિક્કોસતિ વાચાય વા પટિક્કોસતિ. દ્વે નિસ્સારણા – અત્થિ પુગ્ગલો અપ્પત્તો નિસ્સારણં તં ચે સઙ્ઘો નિસ્સારેતિ એકચ્ચો સુનિસ્સારિતો, એકચ્ચો દુન્નિસ્સારિતો. દ્વે ઓસારણા – અત્થિ પુગ્ગલો અપ્પત્તો ઓસારણં તં ચે સઙ્ઘો ઓસારેતિ એકચ્ચો સોસારિતો, એકચ્ચો દોસારિતો. દ્વે પટિઞ્ઞા – કાયેન વા પટિજાનાતિ વાચાય વા પટિજાનાતિ. દ્વે પટિગ્ગહા – કાયેન વા પટિગ્ગણ્હાતિ કાયપટિબદ્ધેન વા પટિગ્ગણ્હાતિ. દ્વે પટિક્ખેપા – કાયેન વા પટિક્ખિપતિ વાચાય વા પટિક્ખિપતિ. દ્વે ઉપઘાતિકા – સિક્ખૂપઘાતિકા ચ ભોગૂપઘાતિકા ચ. દ્વે ચોદના – કાયેન વા ચોદેતિ વાચાય વા ચોદેતિ. દ્વે કથિનસ્સ પલિબોધા – આવાસપલિબોધો ચ ચીવરપલિબોધો ચ. દ્વે કથિનસ્સ અપલિબોધા – આવાસઅપલિબોધો ચ ચીવરઅપલિબોધો ચ. દ્વે ચીવરાનિ – ગહપતિકઞ્ચ પંસુકૂલઞ્ચ. દ્વે પત્તા – અયોપત્તો મત્તિકાપત્તો. દ્વે મણ્ડલાનિ – તિપુમયં, સીસમયં. દ્વે પત્તસ્સ અધિટ્ઠાના – કાયેન વા અધિટ્ઠેતિ વાચાય વા અધિટ્ઠેતિ. દ્વે ચીવરસ્સ અધિટ્ઠાના – કાયેન વા અધિટ્ઠેતિ વાચાય વા અધિટ્ઠેતિ. દ્વે વિકપ્પના – સમ્મુખાવિકપ્પના ચ પરમ્મુખાવિકપ્પના ચ. દ્વે વિનયા – ભિક્ખૂનઞ્ચ ભિક્ખુનીનઞ્ચ. દ્વે વેનયિકા – પઞ્ઞત્તઞ્ચ પઞ્ઞત્તાનુલોમઞ્ચ. દ્વે વિનયસ્સ સલ્લેખા – અકપ્પિયે સેતુઘાતો, કપ્પિયે મત્તકારિતા. દ્વીહાકારેહિ આપત્તિં આપજ્જતિ – કાયેન વા આપજ્જતિ વાચાય વા આપજ્જતિ. દ્વીહાકારેહિ આપત્તિયા વુટ્ઠાતિ – કાયેન વા વુટ્ઠાતિ વાચાય વા વુટ્ઠાતિ. દ્વે પરિવાસા – પટિચ્છન્નપરિવાસો, અપ્પટિચ્છન્નપરિવાસો. અપરેપિ દ્વે પરિવાસા – સુદ્ધન્તપરિવાસો સમોધાનપરિવાસો. દ્વે માનત્તા – પટિચ્છન્નમાનત્તં, અપ્પટિચ્છન્નમાનત્તં. અપરેપિ દ્વે માનત્તા – પક્ખમાનત્તં, સમોધાનમાનત્તં. દ્વિન્નં પુગ્ગલાનં રત્તિચ્છેદો – પારિવાસિકસ્સ ચ માનત્તચારિકસ્સ ચ. દ્વે અનાદરિયાનિ – પુગ્ગલાનાદરિયઞ્ચ ધમ્માનાદરિયઞ્ચ. દ્વે લોણાનિ – જાતિમઞ્ચ કારિમઞ્ચ 3. અપરાનિપિ દ્વે લોણાનિ – સામુદ્દં કાળલોણં. અપરાનિપિ દ્વે લોણાનિ – સિન્ધવં, ઉબ્ભિદં 4. અપરાનિપિ દ્વે લોણાનિ – રોમકં, પક્કાલકં. દ્વે પરિભોગા – અબ્ભન્તરપરિભોગો ચ બાહિરપરિભોગો ચ. દ્વે અક્કોસા – હીનો ચ અક્કોસો ઉક્કટ્ઠો ચ અક્કોસો. દ્વીહાકારેહિ પેસુઞ્ઞં હોતિ – પિયકમ્યસ્સ વા ભેદાધિપ્પાયસ્સ વા. દ્વીહાકારેહિ ગણભોજનં પસવતિ – નિમન્તનતો વા વિઞ્ઞત્તિતો વા. દ્વે વસ્સૂપનાયિકા – પુરિમિકા, પચ્છિમિકા. દ્વે અધમ્મિકાનિ પાતિમોક્ખટ્ઠપનાનિ. દ્વે ધમ્મિકાનિ પાતિમોક્ખટ્ઠપનાનિ.
Dve paṭikkosā – kāyena vā paṭikkosati vācāya vā paṭikkosati. Dve nissāraṇā – atthi puggalo appatto nissāraṇaṃ taṃ ce saṅgho nissāreti ekacco sunissārito, ekacco dunnissārito. Dve osāraṇā – atthi puggalo appatto osāraṇaṃ taṃ ce saṅgho osāreti ekacco sosārito, ekacco dosārito. Dve paṭiññā – kāyena vā paṭijānāti vācāya vā paṭijānāti. Dve paṭiggahā – kāyena vā paṭiggaṇhāti kāyapaṭibaddhena vā paṭiggaṇhāti. Dve paṭikkhepā – kāyena vā paṭikkhipati vācāya vā paṭikkhipati. Dve upaghātikā – sikkhūpaghātikā ca bhogūpaghātikā ca. Dve codanā – kāyena vā codeti vācāya vā codeti. Dve kathinassa palibodhā – āvāsapalibodho ca cīvarapalibodho ca. Dve kathinassa apalibodhā – āvāsaapalibodho ca cīvaraapalibodho ca. Dve cīvarāni – gahapatikañca paṃsukūlañca. Dve pattā – ayopatto mattikāpatto. Dve maṇḍalāni – tipumayaṃ, sīsamayaṃ. Dve pattassa adhiṭṭhānā – kāyena vā adhiṭṭheti vācāya vā adhiṭṭheti. Dve cīvarassa adhiṭṭhānā – kāyena vā adhiṭṭheti vācāya vā adhiṭṭheti. Dve vikappanā – sammukhāvikappanā ca parammukhāvikappanā ca. Dve vinayā – bhikkhūnañca bhikkhunīnañca. Dve venayikā – paññattañca paññattānulomañca. Dve vinayassa sallekhā – akappiye setughāto, kappiye mattakāritā. Dvīhākārehi āpattiṃ āpajjati – kāyena vā āpajjati vācāya vā āpajjati. Dvīhākārehi āpattiyā vuṭṭhāti – kāyena vā vuṭṭhāti vācāya vā vuṭṭhāti. Dve parivāsā – paṭicchannaparivāso, appaṭicchannaparivāso. Aparepi dve parivāsā – suddhantaparivāso samodhānaparivāso. Dve mānattā – paṭicchannamānattaṃ, appaṭicchannamānattaṃ. Aparepi dve mānattā – pakkhamānattaṃ, samodhānamānattaṃ. Dvinnaṃ puggalānaṃ ratticchedo – pārivāsikassa ca mānattacārikassa ca. Dve anādariyāni – puggalānādariyañca dhammānādariyañca. Dve loṇāni – jātimañca kārimañca 5. Aparānipi dve loṇāni – sāmuddaṃ kāḷaloṇaṃ. Aparānipi dve loṇāni – sindhavaṃ, ubbhidaṃ 6. Aparānipi dve loṇāni – romakaṃ, pakkālakaṃ. Dve paribhogā – abbhantaraparibhogo ca bāhiraparibhogo ca. Dve akkosā – hīno ca akkoso ukkaṭṭho ca akkoso. Dvīhākārehi pesuññaṃ hoti – piyakamyassa vā bhedādhippāyassa vā. Dvīhākārehi gaṇabhojanaṃ pasavati – nimantanato vā viññattito vā. Dve vassūpanāyikā – purimikā, pacchimikā. Dve adhammikāni pātimokkhaṭṭhapanāni. Dve dhammikāni pātimokkhaṭṭhapanāni.
7 દ્વે પુગ્ગલા બાલા – યો ચ અનાગતં ભારં વહતિ, યો ચ આગતં ભારં ન વહતિ. દ્વે પુગ્ગલા પણ્ડિતા – યો ચ અનાગતં ભારં ન વહતિ, યો ચ આગતં ભારં વહતિ. અપરેપિ દ્વે પુગ્ગલા બાલા – યો ચ અકપ્પિયે કપ્પિયસઞ્ઞી, યો ચ કપ્પિયે અકપ્પિયસઞ્ઞી. દ્વે પુગ્ગલા પણ્ડિતા – યો ચ અકપ્પિયે અકપ્પિયસઞ્ઞી, યો ચ કપ્પિયે કપ્પિયસઞ્ઞી. અપરેપિ દ્વે પુગ્ગલા બાલા – યો ચ અનાપત્તિયા આપત્તિસઞ્ઞી, યો ચ આપત્તિયા અનાપત્તિસઞ્ઞી. દ્વે પુગ્ગલા પણ્ડિતા – યો ચ આપત્તિયા આપત્તિસઞ્ઞી, યો ચ અનાપત્તિયા અનાપત્તિસઞ્ઞી. અપરેપિ દ્વે પુગ્ગલા બાલા – યો ચ અધમ્મે ધમ્મસઞ્ઞી, યો ચ ધમ્મે અધમ્મસઞ્ઞી. દ્વે પુગ્ગલા પણ્ડિતા – યો ચ અધમ્મે અધમ્મસઞ્ઞી, યો ચ ધમ્મે ધમ્મસઞ્ઞી. અપરેપિ દ્વે પુગ્ગલા બાલા – યો ચ અવિનયે વિનયસઞ્ઞી, યો ચ વિનયે અવિનયસઞ્ઞી. દ્વે પુગ્ગલા પણ્ડિતા – યો ચ અવિનયે અવિનયસઞ્ઞી, યો ચ વિનયે વિનયસઞ્ઞી.
8 Dve puggalā bālā – yo ca anāgataṃ bhāraṃ vahati, yo ca āgataṃ bhāraṃ na vahati. Dve puggalā paṇḍitā – yo ca anāgataṃ bhāraṃ na vahati, yo ca āgataṃ bhāraṃ vahati. Aparepi dve puggalā bālā – yo ca akappiye kappiyasaññī, yo ca kappiye akappiyasaññī. Dve puggalā paṇḍitā – yo ca akappiye akappiyasaññī, yo ca kappiye kappiyasaññī. Aparepi dve puggalā bālā – yo ca anāpattiyā āpattisaññī, yo ca āpattiyā anāpattisaññī. Dve puggalā paṇḍitā – yo ca āpattiyā āpattisaññī, yo ca anāpattiyā anāpattisaññī. Aparepi dve puggalā bālā – yo ca adhamme dhammasaññī, yo ca dhamme adhammasaññī. Dve puggalā paṇḍitā – yo ca adhamme adhammasaññī, yo ca dhamme dhammasaññī. Aparepi dve puggalā bālā – yo ca avinaye vinayasaññī, yo ca vinaye avinayasaññī. Dve puggalā paṇḍitā – yo ca avinaye avinayasaññī, yo ca vinaye vinayasaññī.
9 દ્વિન્નં પુગ્ગલાનં આસવા વડ્ઢન્તિ – યો ચ ન કુક્કુચ્ચાયિતબ્બં કુક્કુચ્ચાયતિ, યો ચ કુક્કુચ્ચાયિતબ્બં કુક્કુચ્ચાયતિ. દ્વિન્નં પુગ્ગલાનં આસવા ન વડ્ઢન્તિ – યો ચ કુક્કુચ્ચાયિતબ્બં ન કુક્કુચ્ચાયતિ, યો ચ કુક્કુચ્ચાયિતબ્બં કુક્કુચ્ચાયતિ. અપરેસમ્પિ દ્વિન્નં પુગ્ગલાનં આસવા વડ્ઢન્તિ – યો ચ અકપ્પિયે કપ્પિયસઞ્ઞી, યો ચ કપ્પિયે અકપ્પિયસઞ્ઞી. દ્વિન્નં પુગ્ગલાનં આસવા ન વડ્ઢન્તિ – યો ચ અકપ્પિયે અકપ્પિયસઞ્ઞી, યો ચ કપ્પિયે કપ્પિયસઞ્ઞી. અપરેસમ્પિ દ્વિન્નં પુગ્ગલાનં આસવા વડ્ઢન્તિ – યો ચ અનાપત્તિયા આપત્તિસઞ્ઞી, યો ચ આપત્તિયા અનાપત્તિસઞ્ઞી. દ્વિન્નં પુગ્ગલાનં આસવા ન વડ્ઢન્તિ – યો ચ અનાપત્તિયા અનાપત્તિસઞ્ઞી, યો ચ આપત્તિયા આપત્તિસઞ્ઞી. અપરેસમ્પિ દ્વિન્નં પુગ્ગલાનં આસવા વડ્ઢન્તિ – યો ચ અધમ્મે ધમ્મસઞ્ઞી, યો ચ ધમ્મે અધમ્મસઞ્ઞી. દ્વિન્નં પુગ્ગલાનં આસવા ન વડ્ઢન્તિ – યો ચ અધમ્મે અધમ્મસઞ્ઞી, યો ચ ધમ્મે ધમ્મસઞ્ઞી. અપરેસમ્પિ દ્વિન્નં પુગ્ગલાનં આસવા વડ્ઢન્તિ – યો ચ અવિનયે વિનયસઞ્ઞી, યો ચ વિનયે અવિનયસઞ્ઞી. દ્વિન્નં પુગ્ગલાનં આસવા ન વડ્ઢન્તિ – યો ચ અવિનયે અવિનયસઞ્ઞી, યો ચ વિનયે વિનયસઞ્ઞી.
10 Dvinnaṃ puggalānaṃ āsavā vaḍḍhanti – yo ca na kukkuccāyitabbaṃ kukkuccāyati, yo ca kukkuccāyitabbaṃ kukkuccāyati. Dvinnaṃ puggalānaṃ āsavā na vaḍḍhanti – yo ca kukkuccāyitabbaṃ na kukkuccāyati, yo ca kukkuccāyitabbaṃ kukkuccāyati. Aparesampi dvinnaṃ puggalānaṃ āsavā vaḍḍhanti – yo ca akappiye kappiyasaññī, yo ca kappiye akappiyasaññī. Dvinnaṃ puggalānaṃ āsavā na vaḍḍhanti – yo ca akappiye akappiyasaññī, yo ca kappiye kappiyasaññī. Aparesampi dvinnaṃ puggalānaṃ āsavā vaḍḍhanti – yo ca anāpattiyā āpattisaññī, yo ca āpattiyā anāpattisaññī. Dvinnaṃ puggalānaṃ āsavā na vaḍḍhanti – yo ca anāpattiyā anāpattisaññī, yo ca āpattiyā āpattisaññī. Aparesampi dvinnaṃ puggalānaṃ āsavā vaḍḍhanti – yo ca adhamme dhammasaññī, yo ca dhamme adhammasaññī. Dvinnaṃ puggalānaṃ āsavā na vaḍḍhanti – yo ca adhamme adhammasaññī, yo ca dhamme dhammasaññī. Aparesampi dvinnaṃ puggalānaṃ āsavā vaḍḍhanti – yo ca avinaye vinayasaññī, yo ca vinaye avinayasaññī. Dvinnaṃ puggalānaṃ āsavā na vaḍḍhanti – yo ca avinaye avinayasaññī, yo ca vinaye vinayasaññī.
દુકા નિટ્ઠિતા.
Dukā niṭṭhitā.
તસ્સુદ્દાનં –
Tassuddānaṃ –
સઞ્ઞા લદ્ધા ચ સદ્ધમ્મા, પરિક્ખારા ચ પુગ્ગલા;
Saññā laddhā ca saddhammā, parikkhārā ca puggalā;
સચ્ચં ભૂમિ નિક્ખમન્તો, આદિયન્તો સમાદિયં.
Saccaṃ bhūmi nikkhamanto, ādiyanto samādiyaṃ.
કરોન્તો દેન્તો ગણ્હન્તો, પરિભોગેન રત્તિ ચ;
Karonto dento gaṇhanto, paribhogena ratti ca;
અરુણાછિન્દં છાદેન્તો, ધારેન્તો ચ ઉપોસથા.
Aruṇāchindaṃ chādento, dhārento ca uposathā.
પવારણા કમ્માપરા, વત્થુ અપરા દોસા ચ;
Pavāraṇā kammāparā, vatthu aparā dosā ca;
અપરા દ્વે ચ સમ્પત્તિ, નાના સમાનમેવ ચ.
Aparā dve ca sampatti, nānā samānameva ca.
પારાજિસઙ્ઘથુલ્લચ્ચય, પાચિત્તિ પાટિદેસના;
Pārājisaṅghathullaccaya, pācitti pāṭidesanā;
દુક્કટા દુબ્ભાસિતા ચેવ, સત્ત આપત્તિક્ખન્ધા ચ.
Dukkaṭā dubbhāsitā ceva, satta āpattikkhandhā ca.
ભિજ્જતિ ઉપસમ્પદા, તથેવ અપરે દુવે;
Bhijjati upasampadā, tatheva apare duve;
ન વત્થબ્બં ન દાતબ્બં, અભબ્બાભબ્બમેવ ચ.
Na vatthabbaṃ na dātabbaṃ, abhabbābhabbameva ca.
સઞ્ચિચ્ચ સાતિસારા ચ, પટિક્કોસા નિસ્સારણા;
Sañcicca sātisārā ca, paṭikkosā nissāraṇā;
ઓસારણા પટિઞ્ઞા ચ, પટિગ્ગહા પટિક્ખિપા.
Osāraṇā paṭiññā ca, paṭiggahā paṭikkhipā.
ઉપઘાતિ ચોદના ચ, કથિના ચ દુવે તથા;
Upaghāti codanā ca, kathinā ca duve tathā;
ચીવરા પત્તમણ્ડલા, અધિટ્ઠાના તથેવ દ્વે.
Cīvarā pattamaṇḍalā, adhiṭṭhānā tatheva dve.
વિકપ્પના ચ વિનયા, વેનયિકા ચ સલ્લેખા;
Vikappanā ca vinayā, venayikā ca sallekhā;
આપજ્જતિ ચ વુટ્ઠાતિ, પરિવાસાપરે દુવે.
Āpajjati ca vuṭṭhāti, parivāsāpare duve.
દ્વે માનત્તા અપરે ચ, રત્તિચ્છેદો અનાદરિ;
Dve mānattā apare ca, ratticchedo anādari;
દ્વે લોણા તયો અપરે, પરિભોગક્કોસેન ચ.
Dve loṇā tayo apare, paribhogakkosena ca.
પેસુઞ્ઞો ચ ગણાવસ્સ, ઠપના ભારકપ્પિયં;
Pesuñño ca gaṇāvassa, ṭhapanā bhārakappiyaṃ;
અનાપત્તિ અધમ્મધમ્મા, વિનયે આસવે તથાતિ.
Anāpatti adhammadhammā, vinaye āsave tathāti.
Footnotes:
Related texts:
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / પરિવાર-અટ્ઠકથા • Parivāra-aṭṭhakathā / દુકવારવણ્ણના • Dukavāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / દુકવારવણ્ણના • Dukavāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / દુકવારવણ્ણના • Dukavāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / દુકવારવણ્ણના • Dukavāravaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / એકુત્તરિકનયો દુકવારવણ્ણના • Ekuttarikanayo dukavāravaṇṇanā
