| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[260] 10. д̣̇ууд̇аж̇аад̇агаван̣н̣анаа
[260] 10. Dūtajātakavaṇṇanā
яассад̇т̇аа д̣̇уурамааяанд̇ийд̇и ид̣̇ам̣ сад̇т̇аа ж̇зд̇аванз вихаранд̇о згам̣ лолабхигкум̣ аараб̣бха гат̇зси. вад̇т̇у наваганибаад̇з жаггаваагаж̇аад̇агз (ж̇аа. 1.9.69 аад̣̇аяо) аавибхависсад̇и. сад̇т̇аа бана д̇ам̣ бхигкум̣ ааманд̇зд̇ваа ‘‘на ко, бхигку, ид̣̇аанзва, буб̣б̣зби д̇вам̣ лоло, лоляагааран̣знзва бана асинаа сийсажчзд̣̇анам̣ лабхий’’д̇и вад̇ваа ад̇ийд̇ам̣ аахари.
Yassatthā dūramāyantīti idaṃ satthā jetavane viharanto ekaṃ lolabhikkhuṃ ārabbha kathesi. Vatthu navakanipāte cakkavākajātake (jā. 1.9.69 ādayo) āvibhavissati. Satthā pana taṃ bhikkhuṃ āmantetvā ‘‘na kho, bhikkhu, idāneva, pubbepi tvaṃ lolo, lolyakāraṇeneva pana asinā sīsacchedanaṃ labhī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о д̇асса буд̇д̇о худ̇ваа ваяаббад̇д̇о д̇аггасилааяам̣ саб̣б̣асиббаани уг̇г̇ан̣хид̇ваа бид̇у ажжаязна раж̇ж̇з бад̇идтааяа бхож̇анасуд̣̇д̇хиго ахоси, д̇знасса бхож̇анасуд̣̇д̇хигарааж̇аад̇взва наамам̣ ж̇аад̇ам̣. со гира д̇ат̇ааруубзна вид̇хаанзна бхад̇д̇ам̣ бхун̃ж̇ад̇и, яат̇аасса згиссаа бхад̇д̇абаад̇ияаа сад̇асахассам̣ ваяам̣ г̇ажчад̇и. бхун̃ж̇анд̇о бана анд̇ог̇зхз на бхун̃ж̇ад̇и, ад̇д̇ано бхож̇анавид̇хаанам̣ ологзнд̇ам̣ махааж̇анам̣ бун̃н̃ам̣ гаарзд̇угаамад̇ааяа рааж̇ад̣̇ваарз рад̇анаман̣д̣абам̣ гаарзд̇ваа бхож̇анавзлааяа д̇ам̣ алан̇гараабзд̇ваа ган̃жанамаяз самуссид̇асзд̇ажчад̇д̇з рааж̇абаллан̇гз нисийд̣̇ид̇ваа кад̇д̇ияаган̃н̃аахи баривуд̇о сад̇асахассаг̇гханигааяа суван̣н̣абаад̇ияаа саб̣б̣арасабхож̇анам̣ бхун̃ж̇ад̇и. ат̇зго лолабурисо д̇асса бхож̇анавид̇хаанам̣ ологзд̇ваа д̇ам̣ бхож̇анам̣ бхун̃ж̇ид̇угаамо худ̇ваа бибаасам̣ санд̇хаарзд̇ум̣ асаггонд̇о ‘‘ад̇т̇зго убааяо’’д̇и г̇аал̣хам̣ ниваасзд̇ваа хад̇т̇з угкибид̇ваа ‘‘бхо, ахам̣ д̣̇ууд̇о, д̣̇ууд̇о’’д̇и ужжаасад̣̇д̣̇ам̣ гаронд̇о рааж̇аанам̣ убасан̇гами. д̇зна жа самаязна д̇асмим̣ ж̇анабад̣̇з ‘‘д̣̇ууд̇омхий’’д̇и вад̣̇анд̇ам̣ на ваарзнд̇и, д̇асмаа махааж̇ано д̣̇вид̇хаа бхиж̇ж̇ид̇ваа огаасам̣ ад̣̇ааси. со взг̇зна г̇анд̇ваа ран̃н̃о баад̇ияаа згам̣ бхад̇д̇абин̣д̣ам̣ г̇ахзд̇ваа мукз багкиби, ат̇асса ‘‘сийсам̣ чинд̣̇иссаамий’’д̇и асиг̇аахо асим̣ аб̣б̣аахзси, рааж̇аа ‘‘маа бахарий’’д̇и ниваарзси, ‘‘маа бхааяи, бхун̃ж̇ассуу’’д̇и хад̇т̇ам̣ д̇ховид̇ваа нисийд̣̇и. бхож̇анабарияосаанз жасса ад̇д̇ано биванабаанийяан̃жзва д̇амб̣уулан̃жа д̣̇аабзд̇ваа ‘‘бхо буриса, д̇вам̣ ‘д̣̇ууд̇омхий’д̇и вад̣̇аси, гасса д̣̇ууд̇осий’’д̇и бужчи. ‘‘махаарааж̇а ахам̣ д̇ан̣хаад̣̇ууд̇о, уд̣̇арад̣̇ууд̇о, д̇ан̣хаа мам̣ аан̣аабзд̇ваа ‘д̇вам̣ г̇ажчаахий’д̇и д̣̇ууд̇ам̣ гад̇ваа бзсзсий’’д̇и вад̇ваа буримаа д̣̇вз г̇аат̇аа авожа –
Atīte bārāṇasiyaṃ brahmadatte rajjaṃ kārente bodhisatto tassa putto hutvā vayappatto takkasilāyaṃ sabbasippāni uggaṇhitvā pitu accayena rajje patiṭṭhāya bhojanasuddhiko ahosi, tenassa bhojanasuddhikarājātveva nāmaṃ jātaṃ. So kira tathārūpena vidhānena bhattaṃ bhuñjati, yathāssa ekissā bhattapātiyā satasahassaṃ vayaṃ gacchati. Bhuñjanto pana antogehe na bhuñjati, attano bhojanavidhānaṃ olokentaṃ mahājanaṃ puññaṃ kāretukāmatāya rājadvāre ratanamaṇḍapaṃ kāretvā bhojanavelāya taṃ alaṅkarāpetvā kañcanamaye samussitasetacchatte rājapallaṅke nisīditvā khattiyakaññāhi parivuto satasahassagghanikāya suvaṇṇapātiyā sabbarasabhojanaṃ bhuñjati. Atheko lolapuriso tassa bhojanavidhānaṃ oloketvā taṃ bhojanaṃ bhuñjitukāmo hutvā pipāsaṃ sandhāretuṃ asakkonto ‘‘attheko upāyo’’ti gāḷhaṃ nivāsetvā hatthe ukkhipitvā ‘‘bho, ahaṃ dūto, dūto’’ti uccāsaddaṃ karonto rājānaṃ upasaṅkami. Tena ca samayena tasmiṃ janapade ‘‘dūtomhī’’ti vadantaṃ na vārenti, tasmā mahājano dvidhā bhijjitvā okāsaṃ adāsi. So vegena gantvā rañño pātiyā ekaṃ bhattapiṇḍaṃ gahetvā mukhe pakkhipi, athassa ‘‘sīsaṃ chindissāmī’’ti asigāho asiṃ abbāhesi, rājā ‘‘mā paharī’’ti nivāresi, ‘‘mā bhāyi, bhuñjassū’’ti hatthaṃ dhovitvā nisīdi. Bhojanapariyosāne cassa attano pivanapānīyañceva tambūlañca dāpetvā ‘‘bho purisa, tvaṃ ‘dūtomhī’ti vadasi, kassa dūtosī’’ti pucchi. ‘‘Mahārāja ahaṃ taṇhādūto, udaradūto, taṇhā maṃ āṇāpetvā ‘tvaṃ gacchāhī’ti dūtaṃ katvā pesesī’’ti vatvā purimā dve gāthā avoca –
28.
28.
‘‘яассад̇т̇аа д̣̇уурамааяанд̇и, амид̇д̇амаби яаажид̇ум̣;
‘‘Yassatthā dūramāyanti, amittamapi yācituṃ;
д̇ассууд̣̇арассахам̣ д̣̇ууд̇о, маа мз гуж̇жха рат̇зсабха.
Tassūdarassahaṃ dūto, mā me kujjha rathesabha.
29.
29.
‘‘яасса д̣̇иваа жа рад̇д̇о жа, васамааяанд̇и маан̣аваа;
‘‘Yassa divā ca ratto ca, vasamāyanti māṇavā;
д̇ассууд̣̇арассахам̣ д̣̇ууд̇о, маа мз гуж̇жха рат̇зсабхаа’’д̇и.
Tassūdarassahaṃ dūto, mā me kujjha rathesabhā’’ti.
д̇ад̇т̇а яассад̇т̇аа д̣̇уурамааяанд̇ийд̇и яасса ад̇т̇ааяа имз сад̇д̇аа д̇ан̣хаавасигаа худ̇ваа д̣̇уурамби г̇ажчанд̇и. рат̇зсабхаад̇и рат̇аяод̇хаж̇здтага.
Tattha yassatthā dūramāyantīti yassa atthāya ime sattā taṇhāvasikā hutvā dūrampi gacchanti. Rathesabhāti rathayodhajeṭṭhaka.
рааж̇аа д̇асса важанам̣ суд̇ваа ‘‘сажжамзд̇ам̣, имз сад̇д̇аа уд̣̇арад̣̇ууд̇аа д̇ан̣хаавасзна вижаранд̇и, д̇ан̣хаава имз сад̇д̇з вижаарзд̇и, яаава манаабам̣ вад̇а иминаа гат̇ид̇а’’нд̇и д̇асса бурисасса д̇уссид̇ваа д̇ад̇ияам̣ г̇аат̇амааха –
Rājā tassa vacanaṃ sutvā ‘‘saccametaṃ, ime sattā udaradūtā taṇhāvasena vicaranti, taṇhāva ime satte vicāreti, yāva manāpaṃ vata iminā kathita’’nti tassa purisassa tussitvā tatiyaṃ gāthamāha –
30.
30.
‘‘д̣̇ад̣̇аами д̇з б̣раахман̣а рохин̣ийнам̣, г̇авам̣ сахассам̣ саха бун̇г̇авзна;
‘‘Dadāmi te brāhmaṇa rohiṇīnaṃ, gavaṃ sahassaṃ saha puṅgavena;
д̣̇ууд̇о хи д̣̇ууд̇асса гат̇ам̣ на д̣̇аж̇ж̇ам̣, маяамби д̇ассзва бхаваама д̣̇ууд̇аа’’д̇и.
Dūto hi dūtassa kathaṃ na dajjaṃ, mayampi tasseva bhavāma dūtā’’ti.
д̇ад̇т̇а б̣раахман̣аад̇и аалабанамад̇д̇амзд̇ам̣. рохин̣ийнанд̇и рад̇д̇аван̣н̣аанам̣. саха бун̇г̇авзнаад̇и яуут̇абарин̣ааяагзна убад̣̇д̣̇аварагкагзна усабхзна сад̣̇д̇хим̣. маяамбийд̇и ахан̃жа авасзсаа жа саб̣б̣з сад̇д̇аа д̇ассзва уд̣̇арасса д̣̇ууд̇аа бхаваама, д̇асмаа ахам̣ уд̣̇арад̣̇ууд̇о самаано уд̣̇арад̣̇ууд̇асса д̇уяхам̣ гасмаа на д̣̇аж̇ж̇анд̇и. зван̃жа бана вад̇ваа ‘‘иминаа вад̇а бурисзна ассуд̇абуб̣б̣ам̣ гааран̣ам̣ гат̇ид̇а’’нд̇и д̇удтажид̇д̇о д̇асса маханд̇ам̣ яасам̣ ад̣̇ааси.
Tattha brāhmaṇāti ālapanamattametaṃ. Rohiṇīnanti rattavaṇṇānaṃ. Saha puṅgavenāti yūthapariṇāyakena upaddavarakkhakena usabhena saddhiṃ. Mayampīti ahañca avasesā ca sabbe sattā tasseva udarassa dūtā bhavāma, tasmā ahaṃ udaradūto samāno udaradūtassa tuyhaṃ kasmā na dajjanti. Evañca pana vatvā ‘‘iminā vata purisena assutapubbaṃ kāraṇaṃ kathita’’nti tuṭṭhacitto tassa mahantaṃ yasaṃ adāsi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз со лолабхигку сагад̣̇ааг̇аамипалз бад̇идтахи, ан̃н̃зби б̣ахуу сод̇аабаннаад̣̇аяо ахзсум̣. ‘‘д̇ад̣̇аа лолабурисо зд̇арахи лолабхигку ахоси, бхож̇анасуд̣̇д̇хигарааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne so lolabhikkhu sakadāgāmiphale patiṭṭhahi, aññepi bahū sotāpannādayo ahesuṃ. ‘‘Tadā lolapuriso etarahi lolabhikkhu ahosi, bhojanasuddhikarājā pana ahameva ahosi’’nti.
д̣̇ууд̇аж̇аад̇агаван̣н̣анаа д̣̇асамаа.
Dūtajātakavaṇṇanā dasamā.
сан̇габбаваг̇г̇о батамо.
Saṅkappavaggo paṭhamo.
д̇ассуд̣̇д̣̇аанам̣ –
Tassuddānaṃ –
сан̇габба д̇иламудти жа, ман̣и жа синд̇хаваасугам̣;
Saṅkappa tilamuṭṭhi ca, maṇi ca sindhavāsukaṃ;
ж̇арууд̣̇абаанам̣ г̇ааман̣и, манд̇хаад̇аа д̇ирийдад̣̇ууд̇анд̇и.
Jarūdapānaṃ gāmaṇi, mandhātā tirīṭadūtanti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 260. д̣̇ууд̇аж̇аад̇агам̣ • 260. Dūtajātakaṃ
