| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૪. દુતિયઅગ્ગિસુત્તં
4. Dutiyaaggisuttaṃ
૪૭. તેન ખો પન સમયેન ઉગ્ગતસરીરસ્સ બ્રાહ્મણસ્સ મહાયઞ્ઞો ઉપક્ખટો હોતિ. પઞ્ચ ઉસભસતાનિ થૂણૂપનીતાનિ હોન્તિ યઞ્ઞત્થાય , પઞ્ચ વચ્છતરસતાનિ થૂણૂપનીતાનિ હોન્તિ યઞ્ઞત્થાય, પઞ્ચ વચ્છતરિસતાનિ થૂણૂપનીતાનિ હોન્તિ યઞ્ઞત્થાય, પઞ્ચ અજસતાનિ થૂણૂપનીતાનિ હોન્તિ યઞ્ઞત્થાય, પઞ્ચ ઉરબ્ભસતાનિ થૂણૂપનીતાનિ હોન્તિ યઞ્ઞત્થાય. અથ ખો ઉગ્ગતસરીરો બ્રાહ્મણો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો ઉગ્ગતસરીરો બ્રાહ્મણો ભગવન્તં એતદવોચ –
47. Tena kho pana samayena uggatasarīrassa brāhmaṇassa mahāyañño upakkhaṭo hoti. Pañca usabhasatāni thūṇūpanītāni honti yaññatthāya , pañca vacchatarasatāni thūṇūpanītāni honti yaññatthāya, pañca vacchatarisatāni thūṇūpanītāni honti yaññatthāya, pañca ajasatāni thūṇūpanītāni honti yaññatthāya, pañca urabbhasatāni thūṇūpanītāni honti yaññatthāya. Atha kho uggatasarīro brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho uggatasarīro brāhmaṇo bhagavantaṃ etadavoca –
‘‘સુતં મેતં, ભો ગોતમ, અગ્ગિસ્સ આદાનં 1 યૂપસ્સ ઉસ્સાપનં મહપ્ફલં હોતિ મહાનિસંસ’’ન્તિ. ‘‘મયાપિ ખો એતં, બ્રાહ્મણ, સુતં અગ્ગિસ્સ આદાનં યૂપસ્સ ઉસ્સાપનં મહપ્ફલં હોતિ મહાનિસંસ’’ન્તિ. દુતિયમ્પિ ખો ઉગ્ગતસરીરો બ્રાહ્મણો…પે॰… તતિયમ્પિ ખો ઉગ્ગતસરીરો બ્રાહ્મણો ભગવન્તં એતદવોચ – ‘‘સુતં મેતં, ભો ગોતમ, અગ્ગિસ્સ આદાનં યૂપસ્સ ઉસ્સાપનં મહપ્ફલં હોતિ મહાનિસંસ’’ન્તિ. ‘‘મયાપિ ખો એતં, બ્રાહ્મણ, સુતં અગ્ગિસ્સ આદાનં યૂપસ્સ ઉસ્સાપનં મહપ્ફલં હોતિ મહાનિસંસ’’ન્તિ. ‘‘તયિદં, ભો ગોતમ , સમેતિ ભોતો ચેવ ગોતમસ્સ અમ્હાકઞ્ચ, યદિદં સબ્બેન સબ્બં’’.
‘‘Sutaṃ metaṃ, bho gotama, aggissa ādānaṃ 2 yūpassa ussāpanaṃ mahapphalaṃ hoti mahānisaṃsa’’nti. ‘‘Mayāpi kho etaṃ, brāhmaṇa, sutaṃ aggissa ādānaṃ yūpassa ussāpanaṃ mahapphalaṃ hoti mahānisaṃsa’’nti. Dutiyampi kho uggatasarīro brāhmaṇo…pe… tatiyampi kho uggatasarīro brāhmaṇo bhagavantaṃ etadavoca – ‘‘sutaṃ metaṃ, bho gotama, aggissa ādānaṃ yūpassa ussāpanaṃ mahapphalaṃ hoti mahānisaṃsa’’nti. ‘‘Mayāpi kho etaṃ, brāhmaṇa, sutaṃ aggissa ādānaṃ yūpassa ussāpanaṃ mahapphalaṃ hoti mahānisaṃsa’’nti. ‘‘Tayidaṃ, bho gotama , sameti bhoto ceva gotamassa amhākañca, yadidaṃ sabbena sabbaṃ’’.
એવં વુત્તે આયસ્મા આનન્દો ઉગ્ગતસરીરં બ્રાહ્મણં એતદવોચ – ‘‘ન ખો, બ્રાહ્મણ, તથાગતા એવં પુચ્છિતબ્બા – ‘સુતં મેતં, ભો ગોતમ, અગ્ગિસ્સ આદાનં યૂપસ્સ ઉસ્સાપનં મહપ્ફલં હોતિ મહાનિસંસ’ન્તિ. એવં ખો, બ્રાહ્મણ, તથાગતા પુચ્છિતબ્બા – ‘અહઞ્હિ, ભન્તે, અગ્ગિં 3 આદાતુકામો, 4 યૂપં ઉસ્સાપેતુકામો. ઓવદતુ મં, ભન્તે, ભગવા. અનુસાસતુ મં, ભન્તે, ભગવા યં મમ અસ્સ દીઘરત્તં હિતાય સુખાયા’’’તિ.
Evaṃ vutte āyasmā ānando uggatasarīraṃ brāhmaṇaṃ etadavoca – ‘‘na kho, brāhmaṇa, tathāgatā evaṃ pucchitabbā – ‘sutaṃ metaṃ, bho gotama, aggissa ādānaṃ yūpassa ussāpanaṃ mahapphalaṃ hoti mahānisaṃsa’nti. Evaṃ kho, brāhmaṇa, tathāgatā pucchitabbā – ‘ahañhi, bhante, aggiṃ 5 ādātukāmo, 6 yūpaṃ ussāpetukāmo. Ovadatu maṃ, bhante, bhagavā. Anusāsatu maṃ, bhante, bhagavā yaṃ mama assa dīgharattaṃ hitāya sukhāyā’’’ti.
અથ ખો ઉગ્ગતસરીરો બ્રાહ્મણો ભગવન્તં એતદવોચ – ‘‘અહઞ્હિ, ભો ગોતમ, અગ્ગિં આદાતુકામો યૂપં ઉસ્સાપેતુકામો. ઓવદતુ મં ભવં ગોતમો. અનુસાસતુ મં ભવં ગોતમો યં મમ અસ્સ દીઘરત્તં હિતાય સુખાયા’’તિ.
Atha kho uggatasarīro brāhmaṇo bhagavantaṃ etadavoca – ‘‘ahañhi, bho gotama, aggiṃ ādātukāmo yūpaṃ ussāpetukāmo. Ovadatu maṃ bhavaṃ gotamo. Anusāsatu maṃ bhavaṃ gotamo yaṃ mama assa dīgharattaṃ hitāya sukhāyā’’ti.
‘‘અગ્ગિં, બ્રાહ્મણ, આદેન્તો 7 યૂપં ઉસ્સાપેન્તો પુબ્બેવ યઞ્ઞા તીણિ સત્થાનિ ઉસ્સાપેતિ અકુસલાનિ દુક્ખુદ્રયાનિ 8 દુક્ખવિપાકાનિ. કતમાનિ તીણિ ? કાયસત્થં, વચીસત્થં, મનોસત્થં. અગ્ગિં, બ્રાહ્મણ, આદેન્તો યૂપં ઉસ્સાપેન્તો પુબ્બેવ યઞ્ઞા એવં ચિત્તં ઉપ્પાદેસિ – ‘એત્તકા ઉસભા હઞ્ઞન્તુ યઞ્ઞત્થાય, એત્તકા વચ્છતરા હઞ્ઞન્તુ યઞ્ઞત્થાય, એત્તકા વચ્છતરિયો હઞ્ઞન્તુ યઞ્ઞત્થાય, એત્તકા અજા હઞ્ઞન્તુ યઞ્ઞત્થાય, એત્તકા ઉરબ્ભા હઞ્ઞન્તુ યઞ્ઞત્થાયા’તિ. સો ‘પુઞ્ઞં કરોમી’તિ અપુઞ્ઞં કરોતિ, ‘કુસલં કરોમી’તિ અકુસલં કરોતિ, ‘સુગતિયા મગ્ગં પરિયેસામી’તિ દુગ્ગતિયા મગ્ગં પરિયેસતિ. અગ્ગિં, બ્રાહ્મણ, આદેન્તો યૂપં ઉસ્સાપેન્તો પુબ્બેવ યઞ્ઞા ઇદં પઠમં મનોસત્થં ઉસ્સાપેતિ અકુસલં દુક્ખુદ્રયં દુક્ખવિપાકં.
‘‘Aggiṃ, brāhmaṇa, ādento 9 yūpaṃ ussāpento pubbeva yaññā tīṇi satthāni ussāpeti akusalāni dukkhudrayāni 10 dukkhavipākāni. Katamāni tīṇi ? Kāyasatthaṃ, vacīsatthaṃ, manosatthaṃ. Aggiṃ, brāhmaṇa, ādento yūpaṃ ussāpento pubbeva yaññā evaṃ cittaṃ uppādesi – ‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti. So ‘puññaṃ karomī’ti apuññaṃ karoti, ‘kusalaṃ karomī’ti akusalaṃ karoti, ‘sugatiyā maggaṃ pariyesāmī’ti duggatiyā maggaṃ pariyesati. Aggiṃ, brāhmaṇa, ādento yūpaṃ ussāpento pubbeva yaññā idaṃ paṭhamaṃ manosatthaṃ ussāpeti akusalaṃ dukkhudrayaṃ dukkhavipākaṃ.
‘‘પુન ચપરં, બ્રાહ્મણ, અગ્ગિં આદેન્તો યૂપં ઉસ્સાપેન્તો પુબ્બેવ યઞ્ઞા એવં વાચં ભાસતિ – ‘એત્તકા ઉસભા હઞ્ઞન્તુ યઞ્ઞત્થાય, એત્તકા વચ્છતરા હઞ્ઞન્તુ યઞ્ઞત્થાય, એત્તકા વચ્છતરિયો હઞ્ઞન્તુ યઞ્ઞત્થાય, એત્તકા અજા હઞ્ઞન્તુ યઞ્ઞત્થાય, એત્તકા ઉરબ્ભા હઞ્ઞન્તુ યઞ્ઞત્થાયા’તિ. સો ‘પુઞ્ઞં કરોમી’તિ અપુઞ્ઞં કરોતિ, ‘કુસલં કરોમી’તિ અકુસલં કરોતિ, ‘સુગતિયા મગ્ગં પરિયેસામી’તિ દુગ્ગતિયા મગ્ગં પરિયેસતિ. અગ્ગિં, બ્રાહ્મણ, આદેન્તો યૂપં ઉસ્સાપેન્તો પુબ્બેવ યઞ્ઞા ઇદં દુતિયં વચીસત્થં ઉસ્સાપેતિ અકુસલં દુક્ખુદ્રયં દુક્ખવિપાકં.
‘‘Puna caparaṃ, brāhmaṇa, aggiṃ ādento yūpaṃ ussāpento pubbeva yaññā evaṃ vācaṃ bhāsati – ‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti. So ‘puññaṃ karomī’ti apuññaṃ karoti, ‘kusalaṃ karomī’ti akusalaṃ karoti, ‘sugatiyā maggaṃ pariyesāmī’ti duggatiyā maggaṃ pariyesati. Aggiṃ, brāhmaṇa, ādento yūpaṃ ussāpento pubbeva yaññā idaṃ dutiyaṃ vacīsatthaṃ ussāpeti akusalaṃ dukkhudrayaṃ dukkhavipākaṃ.
‘‘પુન ચપરં, બ્રાહ્મણ, અગ્ગિં આદેન્તો યૂપં ઉસ્સાપેન્તો પુબ્બેવ યઞ્ઞા સયં પઠમં સમારમ્ભતિ 11 ઉસભા હન્તું 12 યઞ્ઞત્થાય, સયં પઠમં સમારમ્ભતિ વચ્છતરા હન્તું યઞ્ઞત્થાય, સયં પઠમં સમારમ્ભતિ વચ્છતરિયો હન્તું યઞ્ઞત્થાય, સયં પઠમં સમારમ્ભતિ અજા હન્તું યઞ્ઞત્થાય, સયં પઠમં સમારમ્ભતિ ઉરબ્ભા હન્તું યઞ્ઞત્થાય 13. સો ‘પુઞ્ઞં કરોમી’તિ અપુઞ્ઞં કરોતિ, ‘કુસલં કરોમી’તિ અકુસલં કરોતિ, ‘સુગતિયા મગ્ગં પરિયેસામી’તિ દુગ્ગતિયા મગ્ગં પરિયેસતિ. અગ્ગિં, બ્રાહ્મણ, આદેન્તો યૂપં ઉસ્સાપેન્તો પુબ્બેવ યઞ્ઞા ઇદં તતિયં કાયસત્થં ઉસ્સાપેતિ અકુસલં દુક્ખુદ્રયં દુક્ખવિપાકં. અગ્ગિં, બ્રાહ્મણ, આદેન્તો યૂપં ઉસ્સાપેન્તો પુબ્બેવ યઞ્ઞા ઇમાનિ તીણિ સત્થાનિ ઉસ્સાપેતિ અકુસલાનિ દુક્ખુદ્રયાનિ દુક્ખવિપાકાનિ.
‘‘Puna caparaṃ, brāhmaṇa, aggiṃ ādento yūpaṃ ussāpento pubbeva yaññā sayaṃ paṭhamaṃ samārambhati 14 usabhā hantuṃ 15 yaññatthāya, sayaṃ paṭhamaṃ samārambhati vacchatarā hantuṃ yaññatthāya, sayaṃ paṭhamaṃ samārambhati vacchatariyo hantuṃ yaññatthāya, sayaṃ paṭhamaṃ samārambhati ajā hantuṃ yaññatthāya, sayaṃ paṭhamaṃ samārambhati urabbhā hantuṃ yaññatthāya 16. So ‘puññaṃ karomī’ti apuññaṃ karoti, ‘kusalaṃ karomī’ti akusalaṃ karoti, ‘sugatiyā maggaṃ pariyesāmī’ti duggatiyā maggaṃ pariyesati. Aggiṃ, brāhmaṇa, ādento yūpaṃ ussāpento pubbeva yaññā idaṃ tatiyaṃ kāyasatthaṃ ussāpeti akusalaṃ dukkhudrayaṃ dukkhavipākaṃ. Aggiṃ, brāhmaṇa, ādento yūpaṃ ussāpento pubbeva yaññā imāni tīṇi satthāni ussāpeti akusalāni dukkhudrayāni dukkhavipākāni.
‘‘તયોમે , બ્રાહ્મણ, અગ્ગી પહાતબ્બા પરિવજ્જેતબ્બા, ન સેવિતબ્બા. કતમે તયો? રાગગ્ગિ , દોસગ્ગિ, મોહગ્ગિ.
‘‘Tayome , brāhmaṇa, aggī pahātabbā parivajjetabbā, na sevitabbā. Katame tayo? Rāgaggi , dosaggi, mohaggi.
‘‘કસ્મા ચાયં, બ્રાહ્મણ, રાગગ્ગિ પહાતબ્બો પરિવજ્જેતબ્બો, ન સેવિતબ્બો? રત્તો ખો, બ્રાહ્મણ, રાગેન અભિભૂતો પરિયાદિન્નચિત્તો કાયેન દુચ્ચરિતં ચરતિ, વાચાય દુચ્ચરિતં ચરતિ, મનસા દુચ્ચરિતં ચરતિ. સો કાયેન દુચ્ચરિતં ચરિત્વા, વાચાય દુચ્ચરિતં ચરિત્વા, મનસા દુચ્ચરિતં ચરિત્વા કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. તસ્માયં રાગગ્ગિ પહાતબ્બો પરિવજ્જેતબ્બો, ન સેવિતબ્બો.
‘‘Kasmā cāyaṃ, brāhmaṇa, rāgaggi pahātabbo parivajjetabbo, na sevitabbo? Ratto kho, brāhmaṇa, rāgena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā, vācāya duccaritaṃ caritvā, manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Tasmāyaṃ rāgaggi pahātabbo parivajjetabbo, na sevitabbo.
‘‘કસ્મા ચાયં, બ્રાહ્મણ, દોસગ્ગિ પહાતબ્બો પરિવજ્જેતબ્બો, ન સેવિતબ્બો? દુટ્ઠો ખો, બ્રાહ્મણ, દોસેન અભિભૂતો પરિયાદિન્નચિત્તો કાયેન દુચ્ચરિતં ચરતિ, વાચાય દુચ્ચરિતં ચરતિ, મનસા દુચ્ચરિતં ચરતિ. સો કાયેન દુચ્ચરિતં ચરિત્વા, વાચાય દુચ્ચરિતં ચરિત્વા, મનસા દુચ્ચરિતં ચરિત્વા કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. તસ્માયં દોસગ્ગિ પહાતબ્બો પરિવજ્જેતબ્બો, ન સેવિતબ્બો.
‘‘Kasmā cāyaṃ, brāhmaṇa, dosaggi pahātabbo parivajjetabbo, na sevitabbo? Duṭṭho kho, brāhmaṇa, dosena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā, vācāya duccaritaṃ caritvā, manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Tasmāyaṃ dosaggi pahātabbo parivajjetabbo, na sevitabbo.
‘‘કસ્મા ચાયં, બ્રાહ્મણ, મોહગ્ગિ પહાતબ્બો પરિવજ્જેતબ્બો, ન સેવિતબ્બો? મૂળ્હો ખો, બ્રાહ્મણ, મોહેન અભિભૂતો પરિયાદિન્નચિત્તો કાયેન દુચ્ચરિતં ચરતિ, વાચાય દુચ્ચરિતં ચરતિ, મનસા દુચ્ચરિતં ચરતિ. સો કાયેન દુચ્ચરિતં ચરિત્વા, વાચાય દુચ્ચરિતં ચરિત્વા, મનસા દુચ્ચરિતં ચરિત્વા કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતિ. તસ્માયં મોહગ્ગિ પહાતબ્બો પરિવજ્જેતબ્બો, ન સેવિતબ્બો. ઇમે ખો તયો, બ્રાહ્મણ, અગ્ગી પહાતબ્બા પરિવજ્જેતબ્બા, ન સેવિતબ્બા.
‘‘Kasmā cāyaṃ, brāhmaṇa, mohaggi pahātabbo parivajjetabbo, na sevitabbo? Mūḷho kho, brāhmaṇa, mohena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā, vācāya duccaritaṃ caritvā, manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Tasmāyaṃ mohaggi pahātabbo parivajjetabbo, na sevitabbo. Ime kho tayo, brāhmaṇa, aggī pahātabbā parivajjetabbā, na sevitabbā.
‘‘તયો ખો, બ્રાહ્મણ, અગ્ગી સક્કત્વા ગરું કત્વા માનેત્વા પૂજેત્વા સમ્મા સુખં પરિહાતબ્બા. કતમે તયો? આહુનેય્યગ્ગિ , ગહપતગ્ગિ, દક્ખિણેય્યગ્ગિ.
‘‘Tayo kho, brāhmaṇa, aggī sakkatvā garuṃ katvā mānetvā pūjetvā sammā sukhaṃ parihātabbā. Katame tayo? Āhuneyyaggi , gahapataggi, dakkhiṇeyyaggi.
‘‘કતમો ચ, બ્રાહ્મણ, આહુનેય્યગ્ગિ? ઇધ, બ્રાહ્મણ, યસ્સ તે હોન્તિ માતાતિ વા પિતાતિ વા, અયં વુચ્ચતિ, બ્રાહ્મણ, આહુનેય્યગ્ગિ. તં કિસ્સ હેતુ ? અતોહયં 17, બ્રાહ્મણ, આહુતો સમ્ભૂતો, તસ્માયં આહુનેય્યગ્ગિ સક્કત્વા ગરું કત્વા માનેત્વા પૂજેત્વા સમ્મા સુખં પરિહાતબ્બો.
‘‘Katamo ca, brāhmaṇa, āhuneyyaggi? Idha, brāhmaṇa, yassa te honti mātāti vā pitāti vā, ayaṃ vuccati, brāhmaṇa, āhuneyyaggi. Taṃ kissa hetu ? Atohayaṃ 18, brāhmaṇa, āhuto sambhūto, tasmāyaṃ āhuneyyaggi sakkatvā garuṃ katvā mānetvā pūjetvā sammā sukhaṃ parihātabbo.
‘‘કતમો ચ, બ્રાહ્મણ, ગહપતગ્ગિ? ઇધ, બ્રાહ્મણ, યસ્સ તે હોન્તિ પુત્તાતિ વા દારાતિ વા દાસાતિ વા પેસ્સાતિ વા કમ્મકરાતિ વા, અયં વુચ્ચતિ, બ્રાહ્મણ , ગહપતગ્ગિ. તસ્માયં ગહપતગ્ગિ સક્કત્વા ગરું કત્વા માનેત્વા પૂજેત્વા સમ્મા સુખં પરિહાતબ્બો.
‘‘Katamo ca, brāhmaṇa, gahapataggi? Idha, brāhmaṇa, yassa te honti puttāti vā dārāti vā dāsāti vā pessāti vā kammakarāti vā, ayaṃ vuccati, brāhmaṇa , gahapataggi. Tasmāyaṃ gahapataggi sakkatvā garuṃ katvā mānetvā pūjetvā sammā sukhaṃ parihātabbo.
‘‘કતમો ચ, બ્રાહ્મણ, દક્ખિણેય્યગ્ગિ? ઇધ, બ્રાહ્મણ, યે તે સમણબ્રાહ્મણા પરપ્પવાદા પટિવિરતા ખન્તિસોરચ્ચે નિવિટ્ઠા એકમત્તાનં દમેન્તિ, એકમત્તાનં સમેન્તિ, એકમત્તાનં પરિનિબ્બાપેન્તિ, અયં વુચ્ચતિ, બ્રાહ્મણ, દક્ખિણેય્યગ્ગિ. તસ્માયં દક્ખિણેય્યગ્ગિ સક્કત્વા ગરું કત્વા માનેત્વા પૂજેત્વા સમ્મા સુખં પરિહાતબ્બો. ઇમે ખો, બ્રાહ્મણ, તયો અગ્ગી સક્કત્વા ગરું કત્વા માનેત્વા પૂજેત્વા સમ્મા સુખં પરિહાતબ્બા.
‘‘Katamo ca, brāhmaṇa, dakkhiṇeyyaggi? Idha, brāhmaṇa, ye te samaṇabrāhmaṇā parappavādā paṭiviratā khantisoracce niviṭṭhā ekamattānaṃ damenti, ekamattānaṃ samenti, ekamattānaṃ parinibbāpenti, ayaṃ vuccati, brāhmaṇa, dakkhiṇeyyaggi. Tasmāyaṃ dakkhiṇeyyaggi sakkatvā garuṃ katvā mānetvā pūjetvā sammā sukhaṃ parihātabbo. Ime kho, brāhmaṇa, tayo aggī sakkatvā garuṃ katvā mānetvā pūjetvā sammā sukhaṃ parihātabbā.
‘‘અયં ખો પન, બ્રાહ્મણ, કટ્ઠગ્ગિ કાલેન કાલં ઉજ્જલેતબ્બો, કાલેન કાલં અજ્ઝુપેક્ખિતબ્બો, કાલેન કાલં નિબ્બાપેતબ્બો, કાલેન કાલં નિક્ખિપિતબ્બો’’તિ.
‘‘Ayaṃ kho pana, brāhmaṇa, kaṭṭhaggi kālena kālaṃ ujjaletabbo, kālena kālaṃ ajjhupekkhitabbo, kālena kālaṃ nibbāpetabbo, kālena kālaṃ nikkhipitabbo’’ti.
એવં વુત્તે ઉગ્ગતસરીરો બ્રાહ્મણો ભગવન્તં એતદવોચ – ‘‘અભિક્કન્તં, ભો ગોતમ; અભિક્કન્તં, ભો ગોતમ…પે॰… ઉપાસકં મં ભવં ગોતમો ધારેતુ અજ્જતગ્ગે પાણુપેતં સરણં ગતન્તિ. એસાહં, ભો ગોતમ, પઞ્ચ ઉસભસતાનિ મુઞ્ચામિ જીવિતં દેમિ, પઞ્ચ વચ્છતરસતાનિ મુઞ્ચામિ જીવિતં દેમિ, પઞ્ચ વચ્છતરિસતાનિ મુઞ્ચામિ જીવિતં દેમિ, પઞ્ચ અજસતાનિ મુઞ્ચામિ જીવિતં દેમિ, પઞ્ચ ઉરબ્ભસતાનિ મુઞ્ચામિ જીવિતં દેમિ. હરિતાનિ ચેવ તિણાનિ ખાદન્તુ, સીતાનિ ચ પાનીયાનિ પિવન્તુ, સીતો ચ નેસં વાતો ઉપવાયત’’ન્તિ 19. ચતુત્થં.
Evaṃ vutte uggatasarīro brāhmaṇo bhagavantaṃ etadavoca – ‘‘abhikkantaṃ, bho gotama; abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gatanti. Esāhaṃ, bho gotama, pañca usabhasatāni muñcāmi jīvitaṃ demi, pañca vacchatarasatāni muñcāmi jīvitaṃ demi, pañca vacchatarisatāni muñcāmi jīvitaṃ demi, pañca ajasatāni muñcāmi jīvitaṃ demi, pañca urabbhasatāni muñcāmi jīvitaṃ demi. Haritāni ceva tiṇāni khādantu, sītāni ca pānīyāni pivantu, sīto ca nesaṃ vāto upavāyata’’nti 20. Catutthaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૪. દુતિયઅગ્ગિસુત્તવણ્ણના • 4. Dutiyaaggisuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૪-૫. દુતિયઅગ્ગિસુત્તાદિવણ્ણના • 4-5. Dutiyaaggisuttādivaṇṇanā
