| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ದುತಿಯಅಗ್ಗಿಸುತ್ತಂ
4. Dutiyaaggisuttaṃ
೪೭. ತೇನ ಖೋ ಪನ ಸಮಯೇನ ಉಗ್ಗತಸರೀರಸ್ಸ ಬ್ರಾಹ್ಮಣಸ್ಸ ಮಹಾಯಞ್ಞೋ ಉಪಕ್ಖಟೋ ಹೋತಿ। ಪಞ್ಚ ಉಸಭಸತಾನಿ ಥೂಣೂಪನೀತಾನಿ ಹೋನ್ತಿ ಯಞ್ಞತ್ಥಾಯ , ಪಞ್ಚ ವಚ್ಛತರಸತಾನಿ ಥೂಣೂಪನೀತಾನಿ ಹೋನ್ತಿ ಯಞ್ಞತ್ಥಾಯ, ಪಞ್ಚ ವಚ್ಛತರಿಸತಾನಿ ಥೂಣೂಪನೀತಾನಿ ಹೋನ್ತಿ ಯಞ್ಞತ್ಥಾಯ, ಪಞ್ಚ ಅಜಸತಾನಿ ಥೂಣೂಪನೀತಾನಿ ಹೋನ್ತಿ ಯಞ್ಞತ್ಥಾಯ, ಪಞ್ಚ ಉರಬ್ಭಸತಾನಿ ಥೂಣೂಪನೀತಾನಿ ಹೋನ್ತಿ ಯಞ್ಞತ್ಥಾಯ। ಅಥ ಖೋ ಉಗ್ಗತಸರೀರೋ ಬ್ರಾಹ್ಮಣೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿ। ಸಮ್ಮೋದನೀಯಂ ಕಥಂ ಸಾರಣೀಯಂ ವೀತಿಸಾರೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಉಗ್ಗತಸರೀರೋ ಬ್ರಾಹ್ಮಣೋ ಭಗವನ್ತಂ ಏತದವೋಚ –
47. Tena kho pana samayena uggatasarīrassa brāhmaṇassa mahāyañño upakkhaṭo hoti. Pañca usabhasatāni thūṇūpanītāni honti yaññatthāya , pañca vacchatarasatāni thūṇūpanītāni honti yaññatthāya, pañca vacchatarisatāni thūṇūpanītāni honti yaññatthāya, pañca ajasatāni thūṇūpanītāni honti yaññatthāya, pañca urabbhasatāni thūṇūpanītāni honti yaññatthāya. Atha kho uggatasarīro brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho uggatasarīro brāhmaṇo bhagavantaṃ etadavoca –
‘‘ಸುತಂ ಮೇತಂ, ಭೋ ಗೋತಮ, ಅಗ್ಗಿಸ್ಸ ಆದಾನಂ 1 ಯೂಪಸ್ಸ ಉಸ್ಸಾಪನಂ ಮಹಪ್ಫಲಂ ಹೋತಿ ಮಹಾನಿಸಂಸ’’ನ್ತಿ। ‘‘ಮಯಾಪಿ ಖೋ ಏತಂ, ಬ್ರಾಹ್ಮಣ, ಸುತಂ ಅಗ್ಗಿಸ್ಸ ಆದಾನಂ ಯೂಪಸ್ಸ ಉಸ್ಸಾಪನಂ ಮಹಪ್ಫಲಂ ಹೋತಿ ಮಹಾನಿಸಂಸ’’ನ್ತಿ। ದುತಿಯಮ್ಪಿ ಖೋ ಉಗ್ಗತಸರೀರೋ ಬ್ರಾಹ್ಮಣೋ…ಪೇ॰… ತತಿಯಮ್ಪಿ ಖೋ ಉಗ್ಗತಸರೀರೋ ಬ್ರಾಹ್ಮಣೋ ಭಗವನ್ತಂ ಏತದವೋಚ – ‘‘ಸುತಂ ಮೇತಂ, ಭೋ ಗೋತಮ, ಅಗ್ಗಿಸ್ಸ ಆದಾನಂ ಯೂಪಸ್ಸ ಉಸ್ಸಾಪನಂ ಮಹಪ್ಫಲಂ ಹೋತಿ ಮಹಾನಿಸಂಸ’’ನ್ತಿ। ‘‘ಮಯಾಪಿ ಖೋ ಏತಂ, ಬ್ರಾಹ್ಮಣ, ಸುತಂ ಅಗ್ಗಿಸ್ಸ ಆದಾನಂ ಯೂಪಸ್ಸ ಉಸ್ಸಾಪನಂ ಮಹಪ್ಫಲಂ ಹೋತಿ ಮಹಾನಿಸಂಸ’’ನ್ತಿ। ‘‘ತಯಿದಂ, ಭೋ ಗೋತಮ , ಸಮೇತಿ ಭೋತೋ ಚೇವ ಗೋತಮಸ್ಸ ಅಮ್ಹಾಕಞ್ಚ, ಯದಿದಂ ಸಬ್ಬೇನ ಸಬ್ಬಂ’’।
‘‘Sutaṃ metaṃ, bho gotama, aggissa ādānaṃ 2 yūpassa ussāpanaṃ mahapphalaṃ hoti mahānisaṃsa’’nti. ‘‘Mayāpi kho etaṃ, brāhmaṇa, sutaṃ aggissa ādānaṃ yūpassa ussāpanaṃ mahapphalaṃ hoti mahānisaṃsa’’nti. Dutiyampi kho uggatasarīro brāhmaṇo…pe… tatiyampi kho uggatasarīro brāhmaṇo bhagavantaṃ etadavoca – ‘‘sutaṃ metaṃ, bho gotama, aggissa ādānaṃ yūpassa ussāpanaṃ mahapphalaṃ hoti mahānisaṃsa’’nti. ‘‘Mayāpi kho etaṃ, brāhmaṇa, sutaṃ aggissa ādānaṃ yūpassa ussāpanaṃ mahapphalaṃ hoti mahānisaṃsa’’nti. ‘‘Tayidaṃ, bho gotama , sameti bhoto ceva gotamassa amhākañca, yadidaṃ sabbena sabbaṃ’’.
ಏವಂ ವುತ್ತೇ ಆಯಸ್ಮಾ ಆನನ್ದೋ ಉಗ್ಗತಸರೀರಂ ಬ್ರಾಹ್ಮಣಂ ಏತದವೋಚ – ‘‘ನ ಖೋ, ಬ್ರಾಹ್ಮಣ, ತಥಾಗತಾ ಏವಂ ಪುಚ್ಛಿತಬ್ಬಾ – ‘ಸುತಂ ಮೇತಂ, ಭೋ ಗೋತಮ, ಅಗ್ಗಿಸ್ಸ ಆದಾನಂ ಯೂಪಸ್ಸ ಉಸ್ಸಾಪನಂ ಮಹಪ್ಫಲಂ ಹೋತಿ ಮಹಾನಿಸಂಸ’ನ್ತಿ। ಏವಂ ಖೋ, ಬ್ರಾಹ್ಮಣ, ತಥಾಗತಾ ಪುಚ್ಛಿತಬ್ಬಾ – ‘ಅಹಞ್ಹಿ, ಭನ್ತೇ, ಅಗ್ಗಿಂ 3 ಆದಾತುಕಾಮೋ, 4 ಯೂಪಂ ಉಸ್ಸಾಪೇತುಕಾಮೋ। ಓವದತು ಮಂ, ಭನ್ತೇ, ಭಗವಾ। ಅನುಸಾಸತು ಮಂ, ಭನ್ತೇ, ಭಗವಾ ಯಂ ಮಮ ಅಸ್ಸ ದೀಘರತ್ತಂ ಹಿತಾಯ ಸುಖಾಯಾ’’’ತಿ।
Evaṃ vutte āyasmā ānando uggatasarīraṃ brāhmaṇaṃ etadavoca – ‘‘na kho, brāhmaṇa, tathāgatā evaṃ pucchitabbā – ‘sutaṃ metaṃ, bho gotama, aggissa ādānaṃ yūpassa ussāpanaṃ mahapphalaṃ hoti mahānisaṃsa’nti. Evaṃ kho, brāhmaṇa, tathāgatā pucchitabbā – ‘ahañhi, bhante, aggiṃ 5 ādātukāmo, 6 yūpaṃ ussāpetukāmo. Ovadatu maṃ, bhante, bhagavā. Anusāsatu maṃ, bhante, bhagavā yaṃ mama assa dīgharattaṃ hitāya sukhāyā’’’ti.
ಅಥ ಖೋ ಉಗ್ಗತಸರೀರೋ ಬ್ರಾಹ್ಮಣೋ ಭಗವನ್ತಂ ಏತದವೋಚ – ‘‘ಅಹಞ್ಹಿ, ಭೋ ಗೋತಮ, ಅಗ್ಗಿಂ ಆದಾತುಕಾಮೋ ಯೂಪಂ ಉಸ್ಸಾಪೇತುಕಾಮೋ। ಓವದತು ಮಂ ಭವಂ ಗೋತಮೋ। ಅನುಸಾಸತು ಮಂ ಭವಂ ಗೋತಮೋ ಯಂ ಮಮ ಅಸ್ಸ ದೀಘರತ್ತಂ ಹಿತಾಯ ಸುಖಾಯಾ’’ತಿ।
Atha kho uggatasarīro brāhmaṇo bhagavantaṃ etadavoca – ‘‘ahañhi, bho gotama, aggiṃ ādātukāmo yūpaṃ ussāpetukāmo. Ovadatu maṃ bhavaṃ gotamo. Anusāsatu maṃ bhavaṃ gotamo yaṃ mama assa dīgharattaṃ hitāya sukhāyā’’ti.
‘‘ಅಗ್ಗಿಂ, ಬ್ರಾಹ್ಮಣ, ಆದೇನ್ತೋ 7 ಯೂಪಂ ಉಸ್ಸಾಪೇನ್ತೋ ಪುಬ್ಬೇವ ಯಞ್ಞಾ ತೀಣಿ ಸತ್ಥಾನಿ ಉಸ್ಸಾಪೇತಿ ಅಕುಸಲಾನಿ ದುಕ್ಖುದ್ರಯಾನಿ 8 ದುಕ್ಖವಿಪಾಕಾನಿ। ಕತಮಾನಿ ತೀಣಿ ? ಕಾಯಸತ್ಥಂ, ವಚೀಸತ್ಥಂ, ಮನೋಸತ್ಥಂ। ಅಗ್ಗಿಂ, ಬ್ರಾಹ್ಮಣ, ಆದೇನ್ತೋ ಯೂಪಂ ಉಸ್ಸಾಪೇನ್ತೋ ಪುಬ್ಬೇವ ಯಞ್ಞಾ ಏವಂ ಚಿತ್ತಂ ಉಪ್ಪಾದೇಸಿ – ‘ಏತ್ತಕಾ ಉಸಭಾ ಹಞ್ಞನ್ತು ಯಞ್ಞತ್ಥಾಯ, ಏತ್ತಕಾ ವಚ್ಛತರಾ ಹಞ್ಞನ್ತು ಯಞ್ಞತ್ಥಾಯ, ಏತ್ತಕಾ ವಚ್ಛತರಿಯೋ ಹಞ್ಞನ್ತು ಯಞ್ಞತ್ಥಾಯ, ಏತ್ತಕಾ ಅಜಾ ಹಞ್ಞನ್ತು ಯಞ್ಞತ್ಥಾಯ, ಏತ್ತಕಾ ಉರಬ್ಭಾ ಹಞ್ಞನ್ತು ಯಞ್ಞತ್ಥಾಯಾ’ತಿ। ಸೋ ‘ಪುಞ್ಞಂ ಕರೋಮೀ’ತಿ ಅಪುಞ್ಞಂ ಕರೋತಿ, ‘ಕುಸಲಂ ಕರೋಮೀ’ತಿ ಅಕುಸಲಂ ಕರೋತಿ, ‘ಸುಗತಿಯಾ ಮಗ್ಗಂ ಪರಿಯೇಸಾಮೀ’ತಿ ದುಗ್ಗತಿಯಾ ಮಗ್ಗಂ ಪರಿಯೇಸತಿ। ಅಗ್ಗಿಂ, ಬ್ರಾಹ್ಮಣ, ಆದೇನ್ತೋ ಯೂಪಂ ಉಸ್ಸಾಪೇನ್ತೋ ಪುಬ್ಬೇವ ಯಞ್ಞಾ ಇದಂ ಪಠಮಂ ಮನೋಸತ್ಥಂ ಉಸ್ಸಾಪೇತಿ ಅಕುಸಲಂ ದುಕ್ಖುದ್ರಯಂ ದುಕ್ಖವಿಪಾಕಂ।
‘‘Aggiṃ, brāhmaṇa, ādento 9 yūpaṃ ussāpento pubbeva yaññā tīṇi satthāni ussāpeti akusalāni dukkhudrayāni 10 dukkhavipākāni. Katamāni tīṇi ? Kāyasatthaṃ, vacīsatthaṃ, manosatthaṃ. Aggiṃ, brāhmaṇa, ādento yūpaṃ ussāpento pubbeva yaññā evaṃ cittaṃ uppādesi – ‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti. So ‘puññaṃ karomī’ti apuññaṃ karoti, ‘kusalaṃ karomī’ti akusalaṃ karoti, ‘sugatiyā maggaṃ pariyesāmī’ti duggatiyā maggaṃ pariyesati. Aggiṃ, brāhmaṇa, ādento yūpaṃ ussāpento pubbeva yaññā idaṃ paṭhamaṃ manosatthaṃ ussāpeti akusalaṃ dukkhudrayaṃ dukkhavipākaṃ.
‘‘ಪುನ ಚಪರಂ, ಬ್ರಾಹ್ಮಣ, ಅಗ್ಗಿಂ ಆದೇನ್ತೋ ಯೂಪಂ ಉಸ್ಸಾಪೇನ್ತೋ ಪುಬ್ಬೇವ ಯಞ್ಞಾ ಏವಂ ವಾಚಂ ಭಾಸತಿ – ‘ಏತ್ತಕಾ ಉಸಭಾ ಹಞ್ಞನ್ತು ಯಞ್ಞತ್ಥಾಯ, ಏತ್ತಕಾ ವಚ್ಛತರಾ ಹಞ್ಞನ್ತು ಯಞ್ಞತ್ಥಾಯ, ಏತ್ತಕಾ ವಚ್ಛತರಿಯೋ ಹಞ್ಞನ್ತು ಯಞ್ಞತ್ಥಾಯ, ಏತ್ತಕಾ ಅಜಾ ಹಞ್ಞನ್ತು ಯಞ್ಞತ್ಥಾಯ, ಏತ್ತಕಾ ಉರಬ್ಭಾ ಹಞ್ಞನ್ತು ಯಞ್ಞತ್ಥಾಯಾ’ತಿ। ಸೋ ‘ಪುಞ್ಞಂ ಕರೋಮೀ’ತಿ ಅಪುಞ್ಞಂ ಕರೋತಿ, ‘ಕುಸಲಂ ಕರೋಮೀ’ತಿ ಅಕುಸಲಂ ಕರೋತಿ, ‘ಸುಗತಿಯಾ ಮಗ್ಗಂ ಪರಿಯೇಸಾಮೀ’ತಿ ದುಗ್ಗತಿಯಾ ಮಗ್ಗಂ ಪರಿಯೇಸತಿ। ಅಗ್ಗಿಂ, ಬ್ರಾಹ್ಮಣ, ಆದೇನ್ತೋ ಯೂಪಂ ಉಸ್ಸಾಪೇನ್ತೋ ಪುಬ್ಬೇವ ಯಞ್ಞಾ ಇದಂ ದುತಿಯಂ ವಚೀಸತ್ಥಂ ಉಸ್ಸಾಪೇತಿ ಅಕುಸಲಂ ದುಕ್ಖುದ್ರಯಂ ದುಕ್ಖವಿಪಾಕಂ।
‘‘Puna caparaṃ, brāhmaṇa, aggiṃ ādento yūpaṃ ussāpento pubbeva yaññā evaṃ vācaṃ bhāsati – ‘ettakā usabhā haññantu yaññatthāya, ettakā vacchatarā haññantu yaññatthāya, ettakā vacchatariyo haññantu yaññatthāya, ettakā ajā haññantu yaññatthāya, ettakā urabbhā haññantu yaññatthāyā’ti. So ‘puññaṃ karomī’ti apuññaṃ karoti, ‘kusalaṃ karomī’ti akusalaṃ karoti, ‘sugatiyā maggaṃ pariyesāmī’ti duggatiyā maggaṃ pariyesati. Aggiṃ, brāhmaṇa, ādento yūpaṃ ussāpento pubbeva yaññā idaṃ dutiyaṃ vacīsatthaṃ ussāpeti akusalaṃ dukkhudrayaṃ dukkhavipākaṃ.
‘‘ಪುನ ಚಪರಂ, ಬ್ರಾಹ್ಮಣ, ಅಗ್ಗಿಂ ಆದೇನ್ತೋ ಯೂಪಂ ಉಸ್ಸಾಪೇನ್ತೋ ಪುಬ್ಬೇವ ಯಞ್ಞಾ ಸಯಂ ಪಠಮಂ ಸಮಾರಮ್ಭತಿ 11 ಉಸಭಾ ಹನ್ತುಂ 12 ಯಞ್ಞತ್ಥಾಯ, ಸಯಂ ಪಠಮಂ ಸಮಾರಮ್ಭತಿ ವಚ್ಛತರಾ ಹನ್ತುಂ ಯಞ್ಞತ್ಥಾಯ, ಸಯಂ ಪಠಮಂ ಸಮಾರಮ್ಭತಿ ವಚ್ಛತರಿಯೋ ಹನ್ತುಂ ಯಞ್ಞತ್ಥಾಯ, ಸಯಂ ಪಠಮಂ ಸಮಾರಮ್ಭತಿ ಅಜಾ ಹನ್ತುಂ ಯಞ್ಞತ್ಥಾಯ, ಸಯಂ ಪಠಮಂ ಸಮಾರಮ್ಭತಿ ಉರಬ್ಭಾ ಹನ್ತುಂ ಯಞ್ಞತ್ಥಾಯ 13। ಸೋ ‘ಪುಞ್ಞಂ ಕರೋಮೀ’ತಿ ಅಪುಞ್ಞಂ ಕರೋತಿ, ‘ಕುಸಲಂ ಕರೋಮೀ’ತಿ ಅಕುಸಲಂ ಕರೋತಿ, ‘ಸುಗತಿಯಾ ಮಗ್ಗಂ ಪರಿಯೇಸಾಮೀ’ತಿ ದುಗ್ಗತಿಯಾ ಮಗ್ಗಂ ಪರಿಯೇಸತಿ। ಅಗ್ಗಿಂ, ಬ್ರಾಹ್ಮಣ, ಆದೇನ್ತೋ ಯೂಪಂ ಉಸ್ಸಾಪೇನ್ತೋ ಪುಬ್ಬೇವ ಯಞ್ಞಾ ಇದಂ ತತಿಯಂ ಕಾಯಸತ್ಥಂ ಉಸ್ಸಾಪೇತಿ ಅಕುಸಲಂ ದುಕ್ಖುದ್ರಯಂ ದುಕ್ಖವಿಪಾಕಂ। ಅಗ್ಗಿಂ, ಬ್ರಾಹ್ಮಣ, ಆದೇನ್ತೋ ಯೂಪಂ ಉಸ್ಸಾಪೇನ್ತೋ ಪುಬ್ಬೇವ ಯಞ್ಞಾ ಇಮಾನಿ ತೀಣಿ ಸತ್ಥಾನಿ ಉಸ್ಸಾಪೇತಿ ಅಕುಸಲಾನಿ ದುಕ್ಖುದ್ರಯಾನಿ ದುಕ್ಖವಿಪಾಕಾನಿ।
‘‘Puna caparaṃ, brāhmaṇa, aggiṃ ādento yūpaṃ ussāpento pubbeva yaññā sayaṃ paṭhamaṃ samārambhati 14 usabhā hantuṃ 15 yaññatthāya, sayaṃ paṭhamaṃ samārambhati vacchatarā hantuṃ yaññatthāya, sayaṃ paṭhamaṃ samārambhati vacchatariyo hantuṃ yaññatthāya, sayaṃ paṭhamaṃ samārambhati ajā hantuṃ yaññatthāya, sayaṃ paṭhamaṃ samārambhati urabbhā hantuṃ yaññatthāya 16. So ‘puññaṃ karomī’ti apuññaṃ karoti, ‘kusalaṃ karomī’ti akusalaṃ karoti, ‘sugatiyā maggaṃ pariyesāmī’ti duggatiyā maggaṃ pariyesati. Aggiṃ, brāhmaṇa, ādento yūpaṃ ussāpento pubbeva yaññā idaṃ tatiyaṃ kāyasatthaṃ ussāpeti akusalaṃ dukkhudrayaṃ dukkhavipākaṃ. Aggiṃ, brāhmaṇa, ādento yūpaṃ ussāpento pubbeva yaññā imāni tīṇi satthāni ussāpeti akusalāni dukkhudrayāni dukkhavipākāni.
‘‘ತಯೋಮೇ , ಬ್ರಾಹ್ಮಣ, ಅಗ್ಗೀ ಪಹಾತಬ್ಬಾ ಪರಿವಜ್ಜೇತಬ್ಬಾ, ನ ಸೇವಿತಬ್ಬಾ। ಕತಮೇ ತಯೋ? ರಾಗಗ್ಗಿ , ದೋಸಗ್ಗಿ, ಮೋಹಗ್ಗಿ।
‘‘Tayome , brāhmaṇa, aggī pahātabbā parivajjetabbā, na sevitabbā. Katame tayo? Rāgaggi , dosaggi, mohaggi.
‘‘ಕಸ್ಮಾ ಚಾಯಂ, ಬ್ರಾಹ್ಮಣ, ರಾಗಗ್ಗಿ ಪಹಾತಬ್ಬೋ ಪರಿವಜ್ಜೇತಬ್ಬೋ, ನ ಸೇವಿತಬ್ಬೋ? ರತ್ತೋ ಖೋ, ಬ್ರಾಹ್ಮಣ, ರಾಗೇನ ಅಭಿಭೂತೋ ಪರಿಯಾದಿನ್ನಚಿತ್ತೋ ಕಾಯೇನ ದುಚ್ಚರಿತಂ ಚರತಿ, ವಾಚಾಯ ದುಚ್ಚರಿತಂ ಚರತಿ, ಮನಸಾ ದುಚ್ಚರಿತಂ ಚರತಿ। ಸೋ ಕಾಯೇನ ದುಚ್ಚರಿತಂ ಚರಿತ್ವಾ, ವಾಚಾಯ ದುಚ್ಚರಿತಂ ಚರಿತ್ವಾ, ಮನಸಾ ದುಚ್ಚರಿತಂ ಚರಿತ್ವಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜತಿ। ತಸ್ಮಾಯಂ ರಾಗಗ್ಗಿ ಪಹಾತಬ್ಬೋ ಪರಿವಜ್ಜೇತಬ್ಬೋ, ನ ಸೇವಿತಬ್ಬೋ।
‘‘Kasmā cāyaṃ, brāhmaṇa, rāgaggi pahātabbo parivajjetabbo, na sevitabbo? Ratto kho, brāhmaṇa, rāgena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā, vācāya duccaritaṃ caritvā, manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Tasmāyaṃ rāgaggi pahātabbo parivajjetabbo, na sevitabbo.
‘‘ಕಸ್ಮಾ ಚಾಯಂ, ಬ್ರಾಹ್ಮಣ, ದೋಸಗ್ಗಿ ಪಹಾತಬ್ಬೋ ಪರಿವಜ್ಜೇತಬ್ಬೋ, ನ ಸೇವಿತಬ್ಬೋ? ದುಟ್ಠೋ ಖೋ, ಬ್ರಾಹ್ಮಣ, ದೋಸೇನ ಅಭಿಭೂತೋ ಪರಿಯಾದಿನ್ನಚಿತ್ತೋ ಕಾಯೇನ ದುಚ್ಚರಿತಂ ಚರತಿ, ವಾಚಾಯ ದುಚ್ಚರಿತಂ ಚರತಿ, ಮನಸಾ ದುಚ್ಚರಿತಂ ಚರತಿ। ಸೋ ಕಾಯೇನ ದುಚ್ಚರಿತಂ ಚರಿತ್ವಾ, ವಾಚಾಯ ದುಚ್ಚರಿತಂ ಚರಿತ್ವಾ, ಮನಸಾ ದುಚ್ಚರಿತಂ ಚರಿತ್ವಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜತಿ। ತಸ್ಮಾಯಂ ದೋಸಗ್ಗಿ ಪಹಾತಬ್ಬೋ ಪರಿವಜ್ಜೇತಬ್ಬೋ, ನ ಸೇವಿತಬ್ಬೋ।
‘‘Kasmā cāyaṃ, brāhmaṇa, dosaggi pahātabbo parivajjetabbo, na sevitabbo? Duṭṭho kho, brāhmaṇa, dosena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā, vācāya duccaritaṃ caritvā, manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Tasmāyaṃ dosaggi pahātabbo parivajjetabbo, na sevitabbo.
‘‘ಕಸ್ಮಾ ಚಾಯಂ, ಬ್ರಾಹ್ಮಣ, ಮೋಹಗ್ಗಿ ಪಹಾತಬ್ಬೋ ಪರಿವಜ್ಜೇತಬ್ಬೋ, ನ ಸೇವಿತಬ್ಬೋ? ಮೂಳ್ಹೋ ಖೋ, ಬ್ರಾಹ್ಮಣ, ಮೋಹೇನ ಅಭಿಭೂತೋ ಪರಿಯಾದಿನ್ನಚಿತ್ತೋ ಕಾಯೇನ ದುಚ್ಚರಿತಂ ಚರತಿ, ವಾಚಾಯ ದುಚ್ಚರಿತಂ ಚರತಿ, ಮನಸಾ ದುಚ್ಚರಿತಂ ಚರತಿ। ಸೋ ಕಾಯೇನ ದುಚ್ಚರಿತಂ ಚರಿತ್ವಾ, ವಾಚಾಯ ದುಚ್ಚರಿತಂ ಚರಿತ್ವಾ, ಮನಸಾ ದುಚ್ಚರಿತಂ ಚರಿತ್ವಾ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜತಿ। ತಸ್ಮಾಯಂ ಮೋಹಗ್ಗಿ ಪಹಾತಬ್ಬೋ ಪರಿವಜ್ಜೇತಬ್ಬೋ, ನ ಸೇವಿತಬ್ಬೋ। ಇಮೇ ಖೋ ತಯೋ, ಬ್ರಾಹ್ಮಣ, ಅಗ್ಗೀ ಪಹಾತಬ್ಬಾ ಪರಿವಜ್ಜೇತಬ್ಬಾ, ನ ಸೇವಿತಬ್ಬಾ।
‘‘Kasmā cāyaṃ, brāhmaṇa, mohaggi pahātabbo parivajjetabbo, na sevitabbo? Mūḷho kho, brāhmaṇa, mohena abhibhūto pariyādinnacitto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā, vācāya duccaritaṃ caritvā, manasā duccaritaṃ caritvā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Tasmāyaṃ mohaggi pahātabbo parivajjetabbo, na sevitabbo. Ime kho tayo, brāhmaṇa, aggī pahātabbā parivajjetabbā, na sevitabbā.
‘‘ತಯೋ ಖೋ, ಬ್ರಾಹ್ಮಣ, ಅಗ್ಗೀ ಸಕ್ಕತ್ವಾ ಗರುಂ ಕತ್ವಾ ಮಾನೇತ್ವಾ ಪೂಜೇತ್ವಾ ಸಮ್ಮಾ ಸುಖಂ ಪರಿಹಾತಬ್ಬಾ। ಕತಮೇ ತಯೋ? ಆಹುನೇಯ್ಯಗ್ಗಿ , ಗಹಪತಗ್ಗಿ, ದಕ್ಖಿಣೇಯ್ಯಗ್ಗಿ।
‘‘Tayo kho, brāhmaṇa, aggī sakkatvā garuṃ katvā mānetvā pūjetvā sammā sukhaṃ parihātabbā. Katame tayo? Āhuneyyaggi , gahapataggi, dakkhiṇeyyaggi.
‘‘ಕತಮೋ ಚ, ಬ್ರಾಹ್ಮಣ, ಆಹುನೇಯ್ಯಗ್ಗಿ? ಇಧ, ಬ್ರಾಹ್ಮಣ, ಯಸ್ಸ ತೇ ಹೋನ್ತಿ ಮಾತಾತಿ ವಾ ಪಿತಾತಿ ವಾ, ಅಯಂ ವುಚ್ಚತಿ, ಬ್ರಾಹ್ಮಣ, ಆಹುನೇಯ್ಯಗ್ಗಿ। ತಂ ಕಿಸ್ಸ ಹೇತು ? ಅತೋಹಯಂ 17, ಬ್ರಾಹ್ಮಣ, ಆಹುತೋ ಸಮ್ಭೂತೋ, ತಸ್ಮಾಯಂ ಆಹುನೇಯ್ಯಗ್ಗಿ ಸಕ್ಕತ್ವಾ ಗರುಂ ಕತ್ವಾ ಮಾನೇತ್ವಾ ಪೂಜೇತ್ವಾ ಸಮ್ಮಾ ಸುಖಂ ಪರಿಹಾತಬ್ಬೋ।
‘‘Katamo ca, brāhmaṇa, āhuneyyaggi? Idha, brāhmaṇa, yassa te honti mātāti vā pitāti vā, ayaṃ vuccati, brāhmaṇa, āhuneyyaggi. Taṃ kissa hetu ? Atohayaṃ 18, brāhmaṇa, āhuto sambhūto, tasmāyaṃ āhuneyyaggi sakkatvā garuṃ katvā mānetvā pūjetvā sammā sukhaṃ parihātabbo.
‘‘ಕತಮೋ ಚ, ಬ್ರಾಹ್ಮಣ, ಗಹಪತಗ್ಗಿ? ಇಧ, ಬ್ರಾಹ್ಮಣ, ಯಸ್ಸ ತೇ ಹೋನ್ತಿ ಪುತ್ತಾತಿ ವಾ ದಾರಾತಿ ವಾ ದಾಸಾತಿ ವಾ ಪೇಸ್ಸಾತಿ ವಾ ಕಮ್ಮಕರಾತಿ ವಾ, ಅಯಂ ವುಚ್ಚತಿ, ಬ್ರಾಹ್ಮಣ , ಗಹಪತಗ್ಗಿ। ತಸ್ಮಾಯಂ ಗಹಪತಗ್ಗಿ ಸಕ್ಕತ್ವಾ ಗರುಂ ಕತ್ವಾ ಮಾನೇತ್ವಾ ಪೂಜೇತ್ವಾ ಸಮ್ಮಾ ಸುಖಂ ಪರಿಹಾತಬ್ಬೋ।
‘‘Katamo ca, brāhmaṇa, gahapataggi? Idha, brāhmaṇa, yassa te honti puttāti vā dārāti vā dāsāti vā pessāti vā kammakarāti vā, ayaṃ vuccati, brāhmaṇa , gahapataggi. Tasmāyaṃ gahapataggi sakkatvā garuṃ katvā mānetvā pūjetvā sammā sukhaṃ parihātabbo.
‘‘ಕತಮೋ ಚ, ಬ್ರಾಹ್ಮಣ, ದಕ್ಖಿಣೇಯ್ಯಗ್ಗಿ? ಇಧ, ಬ್ರಾಹ್ಮಣ, ಯೇ ತೇ ಸಮಣಬ್ರಾಹ್ಮಣಾ ಪರಪ್ಪವಾದಾ ಪಟಿವಿರತಾ ಖನ್ತಿಸೋರಚ್ಚೇ ನಿವಿಟ್ಠಾ ಏಕಮತ್ತಾನಂ ದಮೇನ್ತಿ, ಏಕಮತ್ತಾನಂ ಸಮೇನ್ತಿ, ಏಕಮತ್ತಾನಂ ಪರಿನಿಬ್ಬಾಪೇನ್ತಿ, ಅಯಂ ವುಚ್ಚತಿ, ಬ್ರಾಹ್ಮಣ, ದಕ್ಖಿಣೇಯ್ಯಗ್ಗಿ। ತಸ್ಮಾಯಂ ದಕ್ಖಿಣೇಯ್ಯಗ್ಗಿ ಸಕ್ಕತ್ವಾ ಗರುಂ ಕತ್ವಾ ಮಾನೇತ್ವಾ ಪೂಜೇತ್ವಾ ಸಮ್ಮಾ ಸುಖಂ ಪರಿಹಾತಬ್ಬೋ। ಇಮೇ ಖೋ, ಬ್ರಾಹ್ಮಣ, ತಯೋ ಅಗ್ಗೀ ಸಕ್ಕತ್ವಾ ಗರುಂ ಕತ್ವಾ ಮಾನೇತ್ವಾ ಪೂಜೇತ್ವಾ ಸಮ್ಮಾ ಸುಖಂ ಪರಿಹಾತಬ್ಬಾ।
‘‘Katamo ca, brāhmaṇa, dakkhiṇeyyaggi? Idha, brāhmaṇa, ye te samaṇabrāhmaṇā parappavādā paṭiviratā khantisoracce niviṭṭhā ekamattānaṃ damenti, ekamattānaṃ samenti, ekamattānaṃ parinibbāpenti, ayaṃ vuccati, brāhmaṇa, dakkhiṇeyyaggi. Tasmāyaṃ dakkhiṇeyyaggi sakkatvā garuṃ katvā mānetvā pūjetvā sammā sukhaṃ parihātabbo. Ime kho, brāhmaṇa, tayo aggī sakkatvā garuṃ katvā mānetvā pūjetvā sammā sukhaṃ parihātabbā.
‘‘ಅಯಂ ಖೋ ಪನ, ಬ್ರಾಹ್ಮಣ, ಕಟ್ಠಗ್ಗಿ ಕಾಲೇನ ಕಾಲಂ ಉಜ್ಜಲೇತಬ್ಬೋ, ಕಾಲೇನ ಕಾಲಂ ಅಜ್ಝುಪೇಕ್ಖಿತಬ್ಬೋ, ಕಾಲೇನ ಕಾಲಂ ನಿಬ್ಬಾಪೇತಬ್ಬೋ, ಕಾಲೇನ ಕಾಲಂ ನಿಕ್ಖಿಪಿತಬ್ಬೋ’’ತಿ।
‘‘Ayaṃ kho pana, brāhmaṇa, kaṭṭhaggi kālena kālaṃ ujjaletabbo, kālena kālaṃ ajjhupekkhitabbo, kālena kālaṃ nibbāpetabbo, kālena kālaṃ nikkhipitabbo’’ti.
ಏವಂ ವುತ್ತೇ ಉಗ್ಗತಸರೀರೋ ಬ್ರಾಹ್ಮಣೋ ಭಗವನ್ತಂ ಏತದವೋಚ – ‘‘ಅಭಿಕ್ಕನ್ತಂ, ಭೋ ಗೋತಮ; ಅಭಿಕ್ಕನ್ತಂ, ಭೋ ಗೋತಮ…ಪೇ॰… ಉಪಾಸಕಂ ಮಂ ಭವಂ ಗೋತಮೋ ಧಾರೇತು ಅಜ್ಜತಗ್ಗೇ ಪಾಣುಪೇತಂ ಸರಣಂ ಗತನ್ತಿ। ಏಸಾಹಂ, ಭೋ ಗೋತಮ, ಪಞ್ಚ ಉಸಭಸತಾನಿ ಮುಞ್ಚಾಮಿ ಜೀವಿತಂ ದೇಮಿ, ಪಞ್ಚ ವಚ್ಛತರಸತಾನಿ ಮುಞ್ಚಾಮಿ ಜೀವಿತಂ ದೇಮಿ, ಪಞ್ಚ ವಚ್ಛತರಿಸತಾನಿ ಮುಞ್ಚಾಮಿ ಜೀವಿತಂ ದೇಮಿ, ಪಞ್ಚ ಅಜಸತಾನಿ ಮುಞ್ಚಾಮಿ ಜೀವಿತಂ ದೇಮಿ, ಪಞ್ಚ ಉರಬ್ಭಸತಾನಿ ಮುಞ್ಚಾಮಿ ಜೀವಿತಂ ದೇಮಿ। ಹರಿತಾನಿ ಚೇವ ತಿಣಾನಿ ಖಾದನ್ತು, ಸೀತಾನಿ ಚ ಪಾನೀಯಾನಿ ಪಿವನ್ತು, ಸೀತೋ ಚ ನೇಸಂ ವಾತೋ ಉಪವಾಯತ’’ನ್ತಿ 19। ಚತುತ್ಥಂ।
Evaṃ vutte uggatasarīro brāhmaṇo bhagavantaṃ etadavoca – ‘‘abhikkantaṃ, bho gotama; abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gatanti. Esāhaṃ, bho gotama, pañca usabhasatāni muñcāmi jīvitaṃ demi, pañca vacchatarasatāni muñcāmi jīvitaṃ demi, pañca vacchatarisatāni muñcāmi jīvitaṃ demi, pañca ajasatāni muñcāmi jīvitaṃ demi, pañca urabbhasatāni muñcāmi jīvitaṃ demi. Haritāni ceva tiṇāni khādantu, sītāni ca pānīyāni pivantu, sīto ca nesaṃ vāto upavāyata’’nti 20. Catutthaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ದುತಿಯಅಗ್ಗಿಸುತ್ತವಣ್ಣನಾ • 4. Dutiyaaggisuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೪-೫. ದುತಿಯಅಗ್ಗಿಸುತ್ತಾದಿವಣ್ಣನಾ • 4-5. Dutiyaaggisuttādivaṇṇanā
