| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၄. ဒုတိယအသ္သာဒပရိယေသနသုတ္တံ
4. Dutiyaassādapariyesanasuttaṃ
၁၆. ‘‘ရူပာနာဟံ, ဘိက္ခဝေ, အသ္သာဒပရိယေသနံ အစရိံ။ ယော ရူပာနံ အသ္သာဒော တဒဇ္ဈဂမံ။ ယာဝတာ ရူပာနံ အသ္သာဒော ပညာယ မေ သော သုဒိဋ္ဌော။ ရူပာနာဟံ, ဘိက္ခဝေ, အာဒီနဝပရိယေသနံ အစရိံ။ ယော ရူပာနံ အာဒီနဝော တဒဇ္ဈဂမံ။ ယာဝတာ ရူပာနံ အာဒီနဝော ပညာယ မေ သော သုဒိဋ္ဌော။ ရူပာနာဟံ, ဘိက္ခဝေ, နိသ္သရဏပရိယေသနံ အစရိံ။ ယံ ရူပာနံ နိသ္သရဏံ တဒဇ္ဈဂမံ။ ယာဝတာ ရူပာနံ နိသ္သရဏံ, ပညာယ မေ တံ သုဒိဋ္ဌံ။ သဒ္ဒာနာဟံ, ဘိက္ခဝေ။ ဂန္ဓာနာဟံ, ဘိက္ခဝေ။ ရသာနာဟံ, ဘိက္ခဝေ။ ဖောဋ္ဌဗ္ဗာနာဟံ, ဘိက္ခဝေ။ ဓမ္မာနာဟံ, ဘိက္ခဝေ, အသ္သာဒပရိယေသနံ အစရိံ။ ယော ဓမ္မာနံ အသ္သာဒော တဒဇ္ဈဂမံ။ ယာဝတာ ဓမ္မာနံ အသ္သာဒော ပညာယ မေ သော သုဒိဋ္ဌော။ ဓမ္မာနာဟံ, ဘိက္ခဝေ, အာဒီနဝပရိယေသနံ အစရိံ။ ယော ဓမ္မာနံ အာဒီနဝော တဒဇ္ဈဂမံ။ ယာဝတာ ဓမ္မာနံ အာဒီနဝော ပညာယ မေ သော သုဒိဋ္ဌော။ ဓမ္မာနာဟံ, ဘိက္ခဝေ, နိသ္သရဏပရိယေသနံ အစရိံ။ ယံ ဓမ္မာနံ နိသ္သရဏံ တဒဇ္ဈဂမံ။ ယာဝတာ ဓမ္မာနံ နိသ္သရဏံ, ပညာယ မေ တံ သုဒိဋ္ဌံ။
16. ‘‘Rūpānāhaṃ, bhikkhave, assādapariyesanaṃ acariṃ. Yo rūpānaṃ assādo tadajjhagamaṃ. Yāvatā rūpānaṃ assādo paññāya me so sudiṭṭho. Rūpānāhaṃ, bhikkhave, ādīnavapariyesanaṃ acariṃ. Yo rūpānaṃ ādīnavo tadajjhagamaṃ. Yāvatā rūpānaṃ ādīnavo paññāya me so sudiṭṭho. Rūpānāhaṃ, bhikkhave, nissaraṇapariyesanaṃ acariṃ. Yaṃ rūpānaṃ nissaraṇaṃ tadajjhagamaṃ. Yāvatā rūpānaṃ nissaraṇaṃ, paññāya me taṃ sudiṭṭhaṃ. Saddānāhaṃ, bhikkhave… gandhānāhaṃ, bhikkhave… rasānāhaṃ, bhikkhave… phoṭṭhabbānāhaṃ, bhikkhave… dhammānāhaṃ, bhikkhave, assādapariyesanaṃ acariṃ. Yo dhammānaṃ assādo tadajjhagamaṃ. Yāvatā dhammānaṃ assādo paññāya me so sudiṭṭho. Dhammānāhaṃ, bhikkhave, ādīnavapariyesanaṃ acariṃ. Yo dhammānaṃ ādīnavo tadajjhagamaṃ. Yāvatā dhammānaṃ ādīnavo paññāya me so sudiṭṭho. Dhammānāhaṃ, bhikkhave, nissaraṇapariyesanaṃ acariṃ. Yaṃ dhammānaṃ nissaraṇaṃ tadajjhagamaṃ. Yāvatā dhammānaṃ nissaraṇaṃ, paññāya me taṃ sudiṭṭhaṃ.
‘‘ယာဝကီဝဉ္စာဟံ, ဘိက္ခဝေ, ဣမေသံ ဆန္နံ ဗာဟိရာနံ အာယတနာနံ အသ္သာဒဉ္စ အသ္သာဒတော, အာဒီနဝဉ္စ အာဒီနဝတော, နိသ္သရဏဉ္စ နိသ္သရဏတော ယထာဘူတံ နာဗ္ဘညာသိံ။ပေ.။ ပစ္စညာသိံ။ ဉာဏဉ္စ ပန မေ ဒသ္သနံ ဥဒပာဒိ – ‘အကုပ္ပာ မေ ဝိမုတ္တိ, အယမန္တိမာ ဇာတိ, နတ္ထိ ဒာနိ ပုနဗ္ဘဝော’’’တိ။ စတုတ္ထံ။
‘‘Yāvakīvañcāhaṃ, bhikkhave, imesaṃ channaṃ bāhirānaṃ āyatanānaṃ assādañca assādato, ādīnavañca ādīnavato, nissaraṇañca nissaraṇato yathābhūtaṃ nābbhaññāsiṃ…pe… paccaññāsiṃ. Ñāṇañca pana me dassanaṃ udapādi – ‘akuppā me vimutti, ayamantimā jāti, natthi dāni punabbhavo’’’ti. Catutthaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၄. ပဌမပုဗ္ဗေသမ္ဗောဓသုတ္တာဒိဝဏ္ဏနာ • 1-4. Paṭhamapubbesambodhasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁-၄. ပဌမပုဗ္ဗေသမ္ဗောဓသုတ္တာဒိဝဏ္ဏနာ • 1-4. Paṭhamapubbesambodhasuttādivaṇṇanā
