| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၆. ဒုတိယအသ္သာဒသုတ္တံ
6. Dutiyaassādasuttaṃ
၂၇. သာဝတ္ထိနိဒာနံ ။ ‘‘ရူပသ္သာဟံ, ဘိက္ခဝေ, အသ္သာဒပရိယေသနံ အစရိံ။ ယော ရူပသ္သ အသ္သာဒော တဒဇ္ဈဂမံ။ ယာဝတာ ရူပသ္သ အသ္သာဒော ပညာယ မေ သော သုဒိဋ္ဌော။ ရူပသ္သာဟံ, ဘိက္ခဝေ, အာဒီနဝပရိယေသနံ အစရိံ။ ယော ရူပသ္သ အာဒီနဝော တဒဇ္ဈဂမံ။ ယာဝတာ ရူပသ္သ အာဒီနဝော ပညာယ မေ သော သုဒိဋ္ဌော။ ရူပသ္သာဟံ, ဘိက္ခဝေ, နိသ္သရဏပရိယေသနံ အစရိံ။ ယံ ရူပသ္သ နိသ္သရဏံ တဒဇ္ဈဂမံ။ ယာဝတာ ရူပသ္သ နိသ္သရဏံ ပညာယ မေ တံ သုဒိဋ္ဌံ။ ဝေဒနာယာဟံ, ဘိက္ခဝေ။ သညာယာဟံ, ဘိက္ခဝေ။ သင္ခာရာနာဟံ , ဘိက္ခဝေ။ ဝိညာဏသ္သာဟံ, ဘိက္ခဝေ, အသ္သာဒပရိယေသနံ အစရိံ။ ယော ဝိညာဏသ္သ အသ္သာဒော တဒဇ္ဈဂမံ။ ယာဝတာ ဝိညာဏသ္သ အသ္သာဒော ပညာယ မေ သော သုဒိဋ္ဌော။ ဝိညာဏသ္သာဟံ, ဘိက္ခဝေ, အာဒီနဝပရိယေသနံ အစရိံ။ ယော ဝိညာဏသ္သ အာဒီနဝော တဒဇ္ဈဂမံ။ ယာဝတာ ဝိညာဏသ္သ အာဒီနဝော ပညာယ မေ သော သုဒိဋ္ဌော။ ဝိညာဏသ္သာဟံ, ဘိက္ခဝေ, နိသ္သရဏပရိယေသနံ အစရိံ။ ယံ ဝိညာဏသ္သ နိသ္သရဏံ တဒဇ္ဈဂမံ။ ယာဝတာ ဝိညာဏသ္သ နိသ္သရဏံ ပညာယ မေ တံ သုဒိဋ္ဌံ။ ယာဝကီဝဉ္စာဟံ, ဘိက္ခဝေ, ဣမေသံ ပဉ္စန္နံ ဥပာဒာနက္ခန္ဓာနံ အသ္သာဒဉ္စ အသ္သာဒတော အာဒီနဝဉ္စ အာဒီနဝတော နိသ္သရဏဉ္စ နိသ္သရဏတော ယထာဘူတံ နာဗ္ဘညာသိံ။ပေ.။ အဗ္ဘညာသိံ။ ဉာဏဉ္စ ပန မေ ဒသ္သနံ ဥဒပာဒိ – ‘အကုပ္ပာ မေ ဝိမုတ္တိ 1; အယမန္တိမာ ဇာတိ; နတ္ထိ ဒာနိ ပုနဗ္ဘဝော’’’တိ။ ဆဋ္ဌံ။
27. Sāvatthinidānaṃ . ‘‘Rūpassāhaṃ, bhikkhave, assādapariyesanaṃ acariṃ. Yo rūpassa assādo tadajjhagamaṃ. Yāvatā rūpassa assādo paññāya me so sudiṭṭho. Rūpassāhaṃ, bhikkhave, ādīnavapariyesanaṃ acariṃ. Yo rūpassa ādīnavo tadajjhagamaṃ. Yāvatā rūpassa ādīnavo paññāya me so sudiṭṭho. Rūpassāhaṃ, bhikkhave, nissaraṇapariyesanaṃ acariṃ. Yaṃ rūpassa nissaraṇaṃ tadajjhagamaṃ. Yāvatā rūpassa nissaraṇaṃ paññāya me taṃ sudiṭṭhaṃ. Vedanāyāhaṃ, bhikkhave… saññāyāhaṃ, bhikkhave… saṅkhārānāhaṃ , bhikkhave… viññāṇassāhaṃ, bhikkhave, assādapariyesanaṃ acariṃ. Yo viññāṇassa assādo tadajjhagamaṃ. Yāvatā viññāṇassa assādo paññāya me so sudiṭṭho. Viññāṇassāhaṃ, bhikkhave, ādīnavapariyesanaṃ acariṃ. Yo viññāṇassa ādīnavo tadajjhagamaṃ. Yāvatā viññāṇassa ādīnavo paññāya me so sudiṭṭho. Viññāṇassāhaṃ, bhikkhave, nissaraṇapariyesanaṃ acariṃ. Yaṃ viññāṇassa nissaraṇaṃ tadajjhagamaṃ. Yāvatā viññāṇassa nissaraṇaṃ paññāya me taṃ sudiṭṭhaṃ. Yāvakīvañcāhaṃ, bhikkhave, imesaṃ pañcannaṃ upādānakkhandhānaṃ assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññāsiṃ…pe… abbhaññāsiṃ. Ñāṇañca pana me dassanaṃ udapādi – ‘akuppā me vimutti 2; ayamantimā jāti; natthi dāni punabbhavo’’’ti. Chaṭṭhaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄-၉. ဆန္ဒရာဂသုတ္တာဒိဝဏ္ဏနာ • 4-9. Chandarāgasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄-၉. ဆန္ဒရာဂသုတ္တာဒိဝဏ္ဏနာ • 4-9. Chandarāgasuttādivaṇṇanā
