| Library / Tipiṭaka / ਤਿਪਿਟਕ • Tipiṭaka / ਚੂਲ਼વਗ੍ਗਪਾਲ਼ਿ • Cūḷavaggapāḷi |
੨. ਦੁਤਿਯਭਾਣવਾਰੋ
2. Dutiyabhāṇavāro
੪੧੧. ਅਥ ਖੋ ਭਗવਾ વੇਸਾਲਿਯਂ ਯਥਾਭਿਰਨ੍ਤਂ વਿਹਰਿਤ੍વਾ ਯੇਨ ਸਾવਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ। ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਸਾવਤ੍ਥਿ ਤਦવਸਰਿ। ਤਤ੍ਰ ਸੁਦਂ ਭਗવਾ ਸਾવਤ੍ਥਿਯਂ વਿਹਰਤਿ ਜੇਤવਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ । ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੁਨਿਯੋ ਕਦ੍ਦਮੋਦਕੇਨ ਓਸਿਞ੍ਚਨ੍ਤਿ – ਅਪ੍ਪੇવ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਾ ਭਿਕ੍ਖੁਨਿਯੋ ਕਦ੍ਦਮੋਦਕੇਨ ਓਸਿਞ੍ਚਿਤਬ੍ਬਾ। ਯੋ ਓਸਿਞ੍ਚੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਤਸ੍ਸ ਭਿਕ੍ਖੁਨੋ ਦਣ੍ਡਕਮ੍ਮਂ ਕਾਤੁ’’ਨ੍ਤਿ। ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅવਨ੍ਦਿਯੋ ਸੋ, ਭਿਕ੍ਖવੇ, ਭਿਕ੍ਖੁ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬੋ’’ਤਿ।
411. Atha kho bhagavā vesāliyaṃ yathābhirantaṃ viharitvā yena sāvatthi tena cārikaṃ pakkāmi. Anupubbena cārikaṃ caramāno yena sāvatthi tadavasari. Tatra sudaṃ bhagavā sāvatthiyaṃ viharati jetavane anāthapiṇḍikassa ārāme . Tena kho pana samayena chabbaggiyā bhikkhū bhikkhuniyo kaddamodakena osiñcanti – appeva nāma amhesu sārajjeyyunti. Bhagavato etamatthaṃ ārocesuṃ. ‘‘Na, bhikkhave, bhikkhunā bhikkhuniyo kaddamodakena osiñcitabbā. Yo osiñceyya, āpatti dukkaṭassa. Anujānāmi, bhikkhave, tassa bhikkhuno daṇḍakammaṃ kātu’’nti. Atha kho bhikkhūnaṃ etadahosi – ‘‘kiṃ nu kho daṇḍakammaṃ kātabba’’nti? Bhagavato etamatthaṃ ārocesuṃ. ‘‘Avandiyo so, bhikkhave, bhikkhu bhikkhunisaṅghena kātabbo’’ti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਕਾਯਂ વਿવਰਿਤ੍વਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ …ਪੇ॰… ਊਰੁਂ વਿવਰਿਤ੍વਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ, ਅਙ੍ਗਜਾਤਂ વਿવਰਿਤ੍વਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ, ਭਿਕ੍ਖੁਨਿਯੋ ਓਭਾਸੇਨ੍ਤਿ, ਭਿਕ੍ਖੁਨੀਹਿ ਸਦ੍ਧਿਂ ਸਮ੍ਪਯੋਜੇਨ੍ਤਿ – ਅਪ੍ਪੇવ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਾ ਕਾਯੋ વਿવਰਿਤ੍વਾ ਭਿਕ੍ਖੁਨੀਨਂ ਦਸ੍ਸੇਤਬ੍ਬੋ, ਨ ਊਰੁ વਿવਰਿਤ੍વਾ ਭਿਕ੍ਖੁਨੀਨਂ ਦਸ੍ਸੇਤਬ੍ਬੋ, ਨ ਅਙ੍ਗਜਾਤਂ વਿવਰਿਤ੍વਾ ਭਿਕ੍ਖੁਨੀਨਂ ਦਸ੍ਸੇਤਬ੍ਬਂ, ਨ ਭਿਕ੍ਖੁਨਿਯੋ ਓਭਾਸਿਤਬ੍ਬਾ, ਨ ਭਿਕ੍ਖੁਨੀਹਿ ਸਦ੍ਧਿਂ ਸਮ੍ਪਯੋਜੇਤਬ੍ਬਂ। ਯੋ ਸਮ੍ਪਯੋਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਤਸ੍ਸ ਭਿਕ੍ਖੁਨੋ ਦਣ੍ਡਕਮ੍ਮਂ ਕਾਤੁ’’ਨ੍ਤਿ। ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅવਨ੍ਦਿਯੋ ਸੋ, ਭਿਕ੍ਖવੇ, ਭਿਕ੍ਖੁ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬੋ’’ਤਿ।
Tena kho pana samayena chabbaggiyā bhikkhū kāyaṃ vivaritvā bhikkhunīnaṃ dassenti …pe… ūruṃ vivaritvā bhikkhunīnaṃ dassenti, aṅgajātaṃ vivaritvā bhikkhunīnaṃ dassenti, bhikkhuniyo obhāsenti, bhikkhunīhi saddhiṃ sampayojenti – appeva nāma amhesu sārajjeyyunti. Bhagavato etamatthaṃ ārocesuṃ. ‘‘Na, bhikkhave, bhikkhunā kāyo vivaritvā bhikkhunīnaṃ dassetabbo, na ūru vivaritvā bhikkhunīnaṃ dassetabbo, na aṅgajātaṃ vivaritvā bhikkhunīnaṃ dassetabbaṃ, na bhikkhuniyo obhāsitabbā, na bhikkhunīhi saddhiṃ sampayojetabbaṃ. Yo sampayojeyya, āpatti dukkaṭassa. Anujānāmi, bhikkhave, tassa bhikkhuno daṇḍakammaṃ kātu’’nti. Atha kho bhikkhūnaṃ etadahosi – ‘‘kiṃ nu kho daṇḍakammaṃ kātabba’’nti? Bhagavato etamatthaṃ ārocesuṃ. ‘‘Avandiyo so, bhikkhave, bhikkhu bhikkhunisaṅghena kātabbo’’ti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਭਿਕ੍ਖੁਂ ਕਦ੍ਦਮੋਦਕੇਨ ਓਸਿਞ੍ਚਨ੍ਤਿ – ਅਪ੍ਪੇવ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਭਿਕ੍ਖੁ ਕਦ੍ਦਮੋਦਕੇਨ ਓਸਿਞ੍ਚਿਤਬ੍ਬੋ। ਯਾ ਓਸਿਞ੍ਚੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਤਸ੍ਸਾ ਭਿਕ੍ਖੁਨਿਯਾ ਦਣ੍ਡਕਮ੍ਮਂ ਕਾਤੁ’’ਨ੍ਤਿ। ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ ਭਿਕ੍ਖવੇ, ਆવਰਣਂ ਕਾਤੁ’’ਨ੍ਤਿ। ਆવਰਣੇ ਕਤੇ ਨ ਆਦਿਯਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਓવਾਦਂ ਠਪੇਤੁ’’ਨ੍ਤਿ।
Tena kho pana samayena chabbaggiyā bhikkhuniyo bhikkhuṃ kaddamodakena osiñcanti – appeva nāma amhesu sārajjeyyunti. Bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhu kaddamodakena osiñcitabbo. Yā osiñceyya, āpatti dukkaṭassa. Anujānāmi, bhikkhave, tassā bhikkhuniyā daṇḍakammaṃ kātu’’nti. Atha kho bhikkhūnaṃ etadahosi – ‘‘kiṃ nu kho daṇḍakammaṃ kātabba’’nti? Bhagavato etamatthaṃ ārocesuṃ. ‘‘Anujānāmi bhikkhave, āvaraṇaṃ kātu’’nti. Āvaraṇe kate na ādiyanti. Bhagavato etamatthaṃ ārocesuṃ. ‘‘Anujānāmi, bhikkhave, ovādaṃ ṭhapetu’’nti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਕਾਯਂ વਿવਰਿਤ੍વਾ ਭਿਕ੍ਖੂਨਂ ਦਸ੍ਸੇਨ੍ਤਿ, ਥਨਂ વਿવਰਿਤ੍વਾ ਭਿਕ੍ਖੂਨਂ ਦਸ੍ਸੇਨ੍ਤਿ, ਊਰੁਂ વਿવਰਿਤ੍વਾ ਭਿਕ੍ਖੂਨਂ ਦਸ੍ਸੇਨ੍ਤਿ, ਅਙ੍ਗਜਾਤਂ વਿવਰਿਤ੍વਾ ਭਿਕ੍ਖੂਨਂ ਦਸ੍ਸੇਨ੍ਤਿ, ਭਿਕ੍ਖੂ ਓਭਾਸੇਨ੍ਤਿ, ਭਿਕ੍ਖੂਹਿ ਸਦ੍ਧਿਂ ਸਮ੍ਪਯੋਜੇਨ੍ਤਿ – ਅਪ੍ਪੇવ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਕਾਯੋ વਿવਰਿਤ੍વਾ ਭਿਕ੍ਖੂਨਂ ਦਸ੍ਸੇਤਬ੍ਬੋ…ਪੇ॰… ਨ ਥਨੋ વਿવਰਿਤ੍વਾ ਭਿਕ੍ਖੂਨਂ ਦਸ੍ਸੇਤਬ੍ਬੋ, ਨ ਊਰੁ વਿવਰਿਤ੍વਾ ਭਿਕ੍ਖੂਨਂ ਦਸ੍ਸੇਤਬ੍ਬੋ, ਨ ਅਙ੍ਗਜਾਤਂ વਿવਰਿਤ੍વਾ ਭਿਕ੍ਖੂਨਂ ਦਸ੍ਸੇਤਬ੍ਬਂ, ਨ ਭਿਕ੍ਖੂ ਓਭਾਸਿਤਬ੍ਬਾ, ਨ ਭਿਕ੍ਖੂਹਿ ਸਦ੍ਧਿਂ ਸਮ੍ਪਯੋਜੇਤਬ੍ਬਂ। ਯਾ ਸਮ੍ਪਯੋਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਤਸ੍ਸਾ ਭਿਕ੍ਖੁਨਿਯਾ ਦਣ੍ਡਕਮ੍ਮਂ ਕਾਤੁ’’ਨ੍ਤਿ। ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਆવਰਣਂ ਕਾਤੁ’’ਨ੍ਤਿ। ਆવਰਣੇ ਕਤੇ ਨ ਆਦਿਯਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਓવਾਦਂ ਠਪੇਤੁ’’ਨ੍ਤਿ। ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਪ੍ਪਤਿ ਨੁ ਖੋ ਓવਾਦਟ੍ਠਪਿਤਾਯ 1 ਭਿਕ੍ਖੁਨਿਯਾ ਸਦ੍ਧਿਂ ਉਪੋਸਥਂ ਕਾਤੁਂ, ਨ ਨੁ ਖੋ ਕਪ੍ਪਤੀ’’ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਓવਾਦਟ੍ਠਪਿਤਾਯ ਭਿਕ੍ਖੁਨਿਯਾ ਸਦ੍ਧਿਂ ਉਪੋਸਥੋ ਕਾਤਬ੍ਬੋ, ਯਾવ ਨ ਤਂ ਅਧਿਕਰਣਂ વੂਪਸਨ੍ਤਂ ਹੋਤੀ’’ਤਿ।
Tena kho pana samayena chabbaggiyā bhikkhuniyo kāyaṃ vivaritvā bhikkhūnaṃ dassenti, thanaṃ vivaritvā bhikkhūnaṃ dassenti, ūruṃ vivaritvā bhikkhūnaṃ dassenti, aṅgajātaṃ vivaritvā bhikkhūnaṃ dassenti, bhikkhū obhāsenti, bhikkhūhi saddhiṃ sampayojenti – appeva nāma amhesu sārajjeyyunti. Bhagavato etamatthaṃ ārocesuṃ. ‘‘Na, bhikkhave, bhikkhuniyā kāyo vivaritvā bhikkhūnaṃ dassetabbo…pe… na thano vivaritvā bhikkhūnaṃ dassetabbo, na ūru vivaritvā bhikkhūnaṃ dassetabbo, na aṅgajātaṃ vivaritvā bhikkhūnaṃ dassetabbaṃ, na bhikkhū obhāsitabbā, na bhikkhūhi saddhiṃ sampayojetabbaṃ. Yā sampayojeyya, āpatti dukkaṭassa. Anujānāmi, bhikkhave, tassā bhikkhuniyā daṇḍakammaṃ kātu’’nti. Atha kho bhikkhūnaṃ etadahosi – ‘‘kiṃ nu kho daṇḍakammaṃ kātabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, āvaraṇaṃ kātu’’nti. Āvaraṇe kate na ādiyanti. Bhagavato etamatthaṃ ārocesuṃ. ‘‘Anujānāmi, bhikkhave, ovādaṃ ṭhapetu’’nti. Atha kho bhikkhūnaṃ etadahosi – ‘‘kappati nu kho ovādaṭṭhapitāya 2 bhikkhuniyā saddhiṃ uposathaṃ kātuṃ, na nu kho kappatī’’ti? Bhagavato etamatthaṃ ārocesuṃ. ‘‘Na, bhikkhave, ovādaṭṭhapitāya bhikkhuniyā saddhiṃ uposatho kātabbo, yāva na taṃ adhikaraṇaṃ vūpasantaṃ hotī’’ti.
੪੧੨. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਦਾਯੀ ਓવਾਦਂ ਠਪੇਤ੍વਾ ਚਾਰਿਕਂ ਪਕ੍ਕਾਮਿ। ਭਿਕ੍ਖੁਨਿਯੋ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯੋ ਉਦਾਯੀ ਓવਾਦਂ ਠਪੇਤ੍વਾ ਚਾਰਿਕਂ ਪਕ੍ਕਮਿਸ੍ਸਤੀ’’ਤਿ! ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਓવਾਦਂ ਠਪੇਤ੍વਾ ਚਾਰਿਕਾ ਪਕ੍ਕਮਿਤਬ੍ਬਾ। ਯੋ ਪਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
412. Tena kho pana samayena āyasmā udāyī ovādaṃ ṭhapetvā cārikaṃ pakkāmi. Bhikkhuniyo ujjhāyanti khiyyanti vipācenti – ‘‘kathañhi nāma ayyo udāyī ovādaṃ ṭhapetvā cārikaṃ pakkamissatī’’ti! Bhagavato etamatthaṃ ārocesuṃ. ‘‘Na, bhikkhave, ovādaṃ ṭhapetvā cārikā pakkamitabbā. Yo pakkameyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ 3 ਬਾਲਾ ਅਬ੍ਯਤ੍ਤਾ ਓવਾਦਂ ਠਪੇਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਬਾਲੇਨ ਅਬ੍ਯਤ੍ਤੇਨ ਓવਾਦੋ ਠਪੇਤਬ੍ਬੋ। ਯੋ ਠਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena 4 bālā abyattā ovādaṃ ṭhapenti. Bhagavato etamatthaṃ ārocesuṃ. ‘‘Na, bhikkhave, bālena abyattena ovādo ṭhapetabbo. Yo ṭhapeyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅવਤ੍ਥੁਸ੍ਮਿਂ ਅਕਾਰਣੇ ਓવਾਦਂ ਠਪੇਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਅવਤ੍ਥੁਸ੍ਮਿਂ ਅਕਾਰਣੇ ਓવਾਦੋ ਠਪੇਤਬ੍ਬੋ। ਯੋ ਠਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena bhikkhū avatthusmiṃ akāraṇe ovādaṃ ṭhapenti. Bhagavato etamatthaṃ ārocesuṃ. ‘‘Na, bhikkhave, avatthusmiṃ akāraṇe ovādo ṭhapetabbo. Yo ṭhapeyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਓવਾਦਂ ਠਪੇਤ੍વਾ વਿਨਿਚ੍ਛਯਂ ਨ ਦੇਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਓવਾਦਂ ਠਪੇਤ੍વਾ વਿਨਿਚ੍ਛਯੋ ਨ ਦਾਤਬ੍ਬੋ। ਯੋ ਨ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena bhikkhū ovādaṃ ṭhapetvā vinicchayaṃ na denti. Bhagavato etamatthaṃ ārocesuṃ. ‘‘Na, bhikkhave, ovādaṃ ṭhapetvā vinicchayo na dātabbo. Yo na dadeyya, āpatti dukkaṭassā’’ti.
੪੧੩. 5 ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਓવਾਦਂ ਨ ਗਚ੍ਛਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਓવਾਦੋ ਨ ਗਨ੍ਤਬ੍ਬੋ। ਯਾ ਨ ਗਚ੍ਛੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ’’ਤਿ।
413.6 Tena kho pana samayena bhikkhuniyo ovādaṃ na gacchanti. Bhagavato etamatthaṃ ārocesuṃ. ‘‘Na, bhikkhave, bhikkhuniyā ovādo na gantabbo. Yā na gaccheyya, yathādhammo kāretabbo’’ti.
ਤੇਨ ਖੋ ਪਨ ਸਮਯੇਨ ਸਬ੍ਬੋ ਭਿਕ੍ਖੁਨਿਸਙ੍ਘੋ ਓવਾਦਂ ਗਚ੍ਛਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਜਾਯਾਯੋ ਇਮਾ ਇਮੇਸਂ, ਜਾਰਿਯੋ ਇਮਾ ਇਮੇਸਂ, ਇਦਾਨਿ ਇਮੇ ਇਮਾਹਿ ਸਦ੍ਧਿਂ ਅਭਿਰਮਿਸ੍ਸਨ੍ਤੀ’’ਤਿ! ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਸਬ੍ਬੇਨ ਭਿਕ੍ਖੁਨਿਸਙ੍ਘੇਨ ਓવਾਦੋ ਗਨ੍ਤਬ੍ਬੋ। ਗਚ੍ਛੇਯ੍ਯ ਚੇ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਚਤੂਹਿ ਪਞ੍ਚਹਿ ਭਿਕ੍ਖੁਨੀਹਿ ਓવਾਦਂ ਗਨ੍ਤੁ’’ਨ੍ਤਿ।
Tena kho pana samayena sabbo bhikkhunisaṅgho ovādaṃ gacchati. Manussā ujjhāyanti khiyyanti vipācenti – ‘‘jāyāyo imā imesaṃ, jāriyo imā imesaṃ, idāni ime imāhi saddhiṃ abhiramissantī’’ti! Bhagavato etamatthaṃ ārocesuṃ. ‘‘Na, bhikkhave, sabbena bhikkhunisaṅghena ovādo gantabbo. Gaccheyya ce, āpatti dukkaṭassa. Anujānāmi, bhikkhave, catūhi pañcahi bhikkhunīhi ovādaṃ gantu’’nti.
ਤੇਨ ਖੋ ਪਨ ਸਮਯੇਨ ਚਤਸ੍ਸੋ ਪਞ੍ਚ ਭਿਕ੍ਖੁਨਿਯੋ ਓવਾਦਂ ਗਚ੍ਛਨ੍ਤਿ। ਮਨੁਸ੍ਸਾ ਤਥੇવ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਜਾਯਾਯੋ ਇਮਾ ਇਮੇਸਂ, ਜਾਰਿਯੋ ਇਮਾ ਇਮੇਸਂ, ਇਦਾਨਿ ਇਮੇ ਇਮਾਹਿ ਸਦ੍ਧਿਂ ਅਭਿਰਮਿਸ੍ਸਨ੍ਤੀ’’ਤਿ! ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਚਤੂਹਿ ਪਞ੍ਚਹਿ ਭਿਕ੍ਖੁਨੀਹਿ ਓવਾਦੋ ਗਨ੍ਤਬ੍ਬੋ। ਗਚ੍ਛੇਯ੍ਯੁਂ ਚੇ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਦ੍વੇ ਤਿਸ੍ਸੋ ਭਿਕ੍ਖੁਨਿਯੋ 7 ਓવਾਦਂ ਗਨ੍ਤੁਂ। ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍વਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍વਾ ਪਾਦੇ વਨ੍ਦਿਤ੍વਾ ਉਕ੍ਕੁਟਿਕਂ ਨਿਸੀਦਿਤ੍વਾ ਅਞ੍ਜਲਿਂ ਪਗ੍ਗਹੇਤ੍વਾ ਏવਮਸ੍ਸ વਚਨੀਯੋ – ‘ਭਿਕ੍ਖੁਨਿਸਙ੍ਘੋ, ਅਯ੍ਯ, ਭਿਕ੍ਖੁਸਙ੍ਘਸ੍ਸ ਪਾਦੇ વਨ੍ਦਤਿ, ਓવਾਦੂਪਸਙ੍ਕਮਨਞ੍ਚ ਯਾਚਤਿ; ਲਭਤੁ ਕਿਰ, ਅਯ੍ਯ, ਭਿਕ੍ਖੁਨਿਸਙ੍ਘੋ ਓવਾਦੂਪਸਙ੍ਕਮਨ’ਨ੍ਤਿ। ਤੇਨ ਭਿਕ੍ਖੁਨਾ ਪਾਤਿਮੋਕ੍ਖੁਦ੍ਦੇਸਕੋ ਉਪਸਙ੍ਕਮਿਤ੍વਾ ਏવਮਸ੍ਸ વਚਨੀਯੋ – ‘ਭਿਕ੍ਖੁਨੀਸਙ੍ਘੋ, ਭਨ੍ਤੇ, ਭਿਕ੍ਖੁਸਙ੍ਘਸ੍ਸ ਪਾਦੇ વਨ੍ਦਤਿ, ਓવਾਦੂਪਸਙ੍ਕਮਨਞ੍ਚ ਯਾਚਤਿ; ਲਭਤੁ ਕਿਰ, ਭਨ੍ਤੇ, ਭਿਕ੍ਖੁਨਿਸਙ੍ਘੋ ਓવਾਦੂਪਸਙ੍ਕਮਨ’ਨ੍ਤਿ। ਪਾਤਿਮੋਕ੍ਖੁਦ੍ਦੇਸਕੇਨ વਤ੍ਤਬ੍ਬੋ – ‘ਅਤ੍ਥਿ ਕੋਚਿ ਭਿਕ੍ਖੁ ਭਿਕ੍ਖੁਨੋવਾਦਕੋ ਸਮ੍ਮਤੋ’ਤਿ? ਸਚੇ ਹੋਤਿ ਕੋਚਿ ਭਿਕ੍ਖੁ ਭਿਕ੍ਖੁਨੋવਾਦਕੋ ਸਮ੍ਮਤੋ, ਪਾਤਿਮੋਕ੍ਖੁਦ੍ਦੇਸਕੇਨ વਤ੍ਤਬ੍ਬੋ – ‘ਇਤ੍ਥਨ੍ਨਾਮੋ ਭਿਕ੍ਖੁ ਭਿਕ੍ਖੁਨੋવਾਦਕੋ ਸਮ੍ਮਤੋ, ਤਂ ਭਿਕ੍ਖੁਨਿਸਙ੍ਘੋ ਉਪਸਙ੍ਕਮਤੂ’ਤਿ। ਸਚੇ ਨ ਹੋਤਿ ਕੋਚਿ ਭਿਕ੍ਖੁ ਭਿਕ੍ਖੁਨੋવਾਦਕੋ ਸਮ੍ਮਤੋ, ਪਾਤਿਮੋਕ੍ਖੁਦ੍ਦੇਸਕੇਨ વਤ੍ਤਬ੍ਬੋ – ‘ਕੋ ਆਯਸ੍ਮਾ ਉਸ੍ਸਹਤਿ ਭਿਕ੍ਖੁਨਿਯੋ ਓવਦਿਤੁ’ਨ੍ਤਿ? ਸਚੇ ਕੋਚਿ ਉਸ੍ਸਹਤਿ ਭਿਕ੍ਖੁਨਿਯੋ ਓવਦਿਤੁਂ, ਸੋ ਚ ਹੋਤਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ, ਸਮ੍ਮਨ੍ਨਿਤ੍વਾ વਤ੍ਤਬ੍ਬੋ – ‘ਇਤ੍ਥਨ੍ਨਾਮੋ ਭਿਕ੍ਖੁ ਭਿਕ੍ਖੁਨੋવਾਦਕੋ ਸਮ੍ਮਤੋ, ਤਂ ਭਿਕ੍ਖੁਨਿਸਙ੍ਘੋ ਉਪਸਙ੍ਕਮਤੂ’ਤਿ। ਸਚੇ ਨ ਕੋਚਿ ਉਸ੍ਸਹਤਿ ਭਿਕ੍ਖੁਨਿਯੋ ਓવਦਿਤੁਂ, ਪਾਤਿਮੋਕ੍ਖੁਦ੍ਦੇਸਕੇਨ વਤ੍ਤਬ੍ਬੋ – ‘ਨਤ੍ਥਿ ਕੋਚਿ ਭਿਕ੍ਖੁ ਭਿਕ੍ਖੁਨੋવਾਦਕੋ ਸਮ੍ਮਤੋ, ਪਾਸਾਦਿਕੇਨ ਭਿਕ੍ਖੁਨਿਸਙ੍ਘੋ ਸਮ੍ਪਾਦੇਤੂ’’ਤਿ।
Tena kho pana samayena catasso pañca bhikkhuniyo ovādaṃ gacchanti. Manussā tatheva ujjhāyanti khiyyanti vipācenti – ‘‘jāyāyo imā imesaṃ, jāriyo imā imesaṃ, idāni ime imāhi saddhiṃ abhiramissantī’’ti! Bhagavato etamatthaṃ ārocesuṃ. ‘‘Na, bhikkhave, catūhi pañcahi bhikkhunīhi ovādo gantabbo. Gaccheyyuṃ ce, āpatti dukkaṭassa. Anujānāmi, bhikkhave, dve tisso bhikkhuniyo 8 ovādaṃ gantuṃ. Ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘bhikkhunisaṅgho, ayya, bhikkhusaṅghassa pāde vandati, ovādūpasaṅkamanañca yācati; labhatu kira, ayya, bhikkhunisaṅgho ovādūpasaṅkamana’nti. Tena bhikkhunā pātimokkhuddesako upasaṅkamitvā evamassa vacanīyo – ‘bhikkhunīsaṅgho, bhante, bhikkhusaṅghassa pāde vandati, ovādūpasaṅkamanañca yācati; labhatu kira, bhante, bhikkhunisaṅgho ovādūpasaṅkamana’nti. Pātimokkhuddesakena vattabbo – ‘atthi koci bhikkhu bhikkhunovādako sammato’ti? Sace hoti koci bhikkhu bhikkhunovādako sammato, pātimokkhuddesakena vattabbo – ‘itthannāmo bhikkhu bhikkhunovādako sammato, taṃ bhikkhunisaṅgho upasaṅkamatū’ti. Sace na hoti koci bhikkhu bhikkhunovādako sammato, pātimokkhuddesakena vattabbo – ‘ko āyasmā ussahati bhikkhuniyo ovaditu’nti? Sace koci ussahati bhikkhuniyo ovadituṃ, so ca hoti aṭṭhahaṅgehi samannāgato, sammannitvā vattabbo – ‘itthannāmo bhikkhu bhikkhunovādako sammato, taṃ bhikkhunisaṅgho upasaṅkamatū’ti. Sace na koci ussahati bhikkhuniyo ovadituṃ, pātimokkhuddesakena vattabbo – ‘natthi koci bhikkhu bhikkhunovādako sammato, pāsādikena bhikkhunisaṅgho sampādetū’’ti.
੪੧੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਓવਾਦਂ ਨ ਗਣ੍ਹਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਓવਾਦੋ ਨ ਗਹੇਤਬ੍ਬੋ। ਯੋ ਨ ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
414. Tena kho pana samayena bhikkhū ovādaṃ na gaṇhanti. Bhagavato etamatthaṃ ārocesuṃ. ‘‘Na, bhikkhave, ovādo na gahetabbo. Yo na gaṇheyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਬਾਲੋ ਹੋਤਿ। ਤਂ ਭਿਕ੍ਖੁਨਿਯੋ ਉਪਸਙ੍ਕਮਿਤ੍વਾ ਏਤਦવੋਚੁਂ – ‘‘ਓવਾਦਂ, ਅਯ੍ਯ, ਗਣ੍ਹਾਹੀ’’ਤਿ । ‘‘ਅਹਞ੍ਹਿ, ਭਗਿਨੀ, ਬਾਲੋ; ਕਥਾਹਂ ਓવਾਦਂ ਗਣ੍ਹਾਮੀ’’ਤਿ? ‘‘ਗਣ੍ਹਾਹਯ੍ਯ , ਓવਾਦਂ; ਏવਞ੍ਹਿ ਭਗવਤਾ ਪਞ੍ਞਤ੍ਤਂ – ਭਿਕ੍ਖੂਹਿ ਭਿਕ੍ਖੁਨੀਨਂ ਓવਾਦੋ ਗਹੇਤਬ੍ਬੋ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਠਪੇਤ੍વਾ ਬਾਲਂ, ਅવਸੇਸੇਹਿ ਓવਾਦਂ ਗਹੇਤੁ’’ਨ੍ਤਿ।
Tena kho pana samayena aññataro bhikkhu bālo hoti. Taṃ bhikkhuniyo upasaṅkamitvā etadavocuṃ – ‘‘ovādaṃ, ayya, gaṇhāhī’’ti . ‘‘Ahañhi, bhaginī, bālo; kathāhaṃ ovādaṃ gaṇhāmī’’ti? ‘‘Gaṇhāhayya , ovādaṃ; evañhi bhagavatā paññattaṃ – bhikkhūhi bhikkhunīnaṃ ovādo gahetabbo’’ti. Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā bālaṃ, avasesehi ovādaṃ gahetu’’nti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ। ਤਂ ਭਿਕ੍ਖੁਨਿਯੋ ਉਪਸਙ੍ਕਮਿਤ੍વਾ ਏਤਦવੋਚੁਂ – ‘‘ਓવਾਦਂ, ਅਯ੍ਯ ਗਣ੍ਹਾਹੀ’’ਤਿ। ‘‘ਅਹਞ੍ਹਿ, ਭਗਿਨੀ, ਗਿਲਾਨੋ; ਕਥਾਹਂ ਓવਾਦਂ ਗਣ੍ਹਾਮੀ’’ਤਿ? ‘‘ਗਣ੍ਹਾਹਯ੍ਯ, ਓવਾਦਂ; ਏવਞ੍ਹਿ ਭਗવਤਾ ਪਞ੍ਞਤ੍ਤਂ – ਠਪੇਤ੍વਾ ਬਾਲਂ, ਅવਸੇਸੇਹਿ ਓવਾਦੋ ਗਹੇਤਬ੍ਬੋ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਠਪੇਤ੍વਾ ਬਾਲਂ, ਠਪੇਤ੍વਾ ਗਿਲਾਨਂ, ਅવਸੇਸੇਹਿ ਓવਾਦਂ ਗਹੇਤੁ’’ਨ੍ਤਿ।
Tena kho pana samayena aññataro bhikkhu gilāno hoti. Taṃ bhikkhuniyo upasaṅkamitvā etadavocuṃ – ‘‘ovādaṃ, ayya gaṇhāhī’’ti. ‘‘Ahañhi, bhaginī, gilāno; kathāhaṃ ovādaṃ gaṇhāmī’’ti? ‘‘Gaṇhāhayya, ovādaṃ; evañhi bhagavatā paññattaṃ – ṭhapetvā bālaṃ, avasesehi ovādo gahetabbo’’ti. Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā bālaṃ, ṭhapetvā gilānaṃ, avasesehi ovādaṃ gahetu’’nti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਮਿਕੋ ਹੋਤਿ। ਤਂ ਭਿਕ੍ਖੁਨਿਯੋ ਉਪਸਙ੍ਕਮਿਤ੍વਾ ਏਤਦવੋਚੁਂ – ‘‘ਓવਾਦਂ, ਅਯ੍ਯ, ਗਣ੍ਹਾਹੀ’’ਤਿ। ‘‘ਅਹਞ੍ਹਿ, ਭਗਿਨੀ, ਗਮਿਕੋ; ਕਥਾਹਂ ਓવਾਦਂ ਗਣ੍ਹਾਮੀ’’ਤਿ? ‘‘ਗਣ੍ਹਾਹਯ੍ਯ, ਓવਾਦਂ; ਏવਞ੍ਹਿ ਭਗવਤਾ ਪਞ੍ਞਤ੍ਤਂ – ਠਪੇਤ੍વਾ ਬਾਲਂ, ਠਪੇਤ੍વਾ ਗਿਲਾਨਂ, ਅવਸੇਸੇਹਿ ਓવਾਦੋ ਗਹੇਤਬ੍ਬੋ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਠਪੇਤ੍વਾ ਬਾਲਂ, ਠਪੇਤ੍વਾ ਗਿਲਾਨਂ, ਠਪੇਤ੍વਾ ਗਮਿਕਂ, ਅવਸੇਸੇਹਿ ਓવਾਦਂ ਗਹੇਤੁ’’ਨ੍ਤਿ।
Tena kho pana samayena aññataro bhikkhu gamiko hoti. Taṃ bhikkhuniyo upasaṅkamitvā etadavocuṃ – ‘‘ovādaṃ, ayya, gaṇhāhī’’ti. ‘‘Ahañhi, bhaginī, gamiko; kathāhaṃ ovādaṃ gaṇhāmī’’ti? ‘‘Gaṇhāhayya, ovādaṃ; evañhi bhagavatā paññattaṃ – ṭhapetvā bālaṃ, ṭhapetvā gilānaṃ, avasesehi ovādo gahetabbo’’ti. Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā bālaṃ, ṭhapetvā gilānaṃ, ṭhapetvā gamikaṃ, avasesehi ovādaṃ gahetu’’nti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਅਰਞ੍ਞੇ વਿਹਰਤਿ। ਤਂ ਭਿਕ੍ਖੁਨਿਯੋ ਉਪਸਙ੍ਕਮਿਤ੍વਾ ਏਤਦવੋਚੁਂ – ‘‘ਓવਾਦਂ, ਅਯ੍ਯ, ਗਣ੍ਹਾਹੀ’’ਤਿ। ‘‘ਅਹਞ੍ਹਿ, ਭਗਿਨੀ, ਅਰਞ੍ਞੇ વਿਹਰਾਮਿ; ਕਥਾਹਂ ਓવਾਦਂ ਗਣ੍ਹਾਮੀ’’ਤਿ? ‘‘ਗਣ੍ਹਾਹਯ੍ਯ , ਓવਾਦਂ; ਏવਞ੍ਹਿ ਭਗવਤਾ ਪਞ੍ਞਤ੍ਤਂ – ਠਪੇਤ੍વਾ ਬਾਲਂ, ਠਪੇਤ੍વਾ ਗਿਲਾਨਂ, ਠਪੇਤ੍વਾ ਗਮਿਕਂ, ਅવਸੇਸੇਹਿ ਓવਾਦੋ ਗਹੇਤਬ੍ਬੋ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਆਰਞ੍ਞਿਕੇਨ ਭਿਕ੍ਖੁਨਾ ਓવਾਦਂ ਗਹੇਤੁਂ, ਸਙ੍ਕੇਤਞ੍ਚ ਕਾਤੁਂ – ਅਤ੍ਰ ਪਤਿਹਰਿਸ੍ਸਾਮੀ’’ਤਿ।
Tena kho pana samayena aññataro bhikkhu araññe viharati. Taṃ bhikkhuniyo upasaṅkamitvā etadavocuṃ – ‘‘ovādaṃ, ayya, gaṇhāhī’’ti. ‘‘Ahañhi, bhaginī, araññe viharāmi; kathāhaṃ ovādaṃ gaṇhāmī’’ti? ‘‘Gaṇhāhayya , ovādaṃ; evañhi bhagavatā paññattaṃ – ṭhapetvā bālaṃ, ṭhapetvā gilānaṃ, ṭhapetvā gamikaṃ, avasesehi ovādo gahetabbo’’ti. Bhagavato etamatthaṃ ārocesuṃ. ‘‘Anujānāmi, bhikkhave, āraññikena bhikkhunā ovādaṃ gahetuṃ, saṅketañca kātuṃ – atra patiharissāmī’’ti.
੪੧੫. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਓવਾਦਂ ਗਹੇਤ੍વਾ ਨ ਆਰੋਚੇਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਓવਾਦੋ ਨ ਆਰੋਚੇਤਬ੍ਬੋ। ਯੋ ਨ ਆਰੋਚੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
415. Tena kho pana samayena bhikkhū ovādaṃ gahetvā na ārocenti. Bhagavato etamatthaṃ ārocesuṃ. ‘‘Na, bhikkhave, ovādo na ārocetabbo. Yo na āroceyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਓવਾਦਂ ਗਹੇਤ੍વਾ ਨ ਪਚ੍ਚਾਹਰਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਓવਾਦੋ ਨ ਪਚ੍ਚਾਹਰਿਤਬ੍ਬੋ। ਯੋ ਨ ਪਚ੍ਚਾਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena bhikkhū ovādaṃ gahetvā na paccāharanti. Bhagavato etamatthaṃ ārocesuṃ. ‘‘Na, bhikkhave, ovādo na paccāharitabbo. Yo na paccāhareyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਸਙ੍ਕੇਤਂ ਨ ਗਚ੍ਛਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਸਙ੍ਕੇਤਂ ਨ ਗਨ੍ਤਬ੍ਬਂ। ਯਾ ਨ ਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena bhikkhuniyo saṅketaṃ na gacchanti. Bhagavato etamatthaṃ ārocesuṃ. ‘‘Na, bhikkhave, bhikkhuniyā saṅketaṃ na gantabbaṃ. Yā na gaccheyya, āpatti dukkaṭassā’’ti.
੪੧੬. ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਦੀਘਾਨਿ ਕਾਯਬਨ੍ਧਨਾਨਿ ਧਾਰੇਨ੍ਤਿ, ਤੇਹੇવ ਫਾਸੁਕਾ ਨਾਮੇਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ…ਪੇ॰… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਦੀਘਂ ਕਾਯਬਨ੍ਧਨਂ ਧਾਰੇਤਬ੍ਬਂ। ਯਾ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਭਿਕ੍ਖੁਨਿਯਾ ਏਕਪਰਿਯਾਕਤਂ 9 ਕਾਯਬਨ੍ਧਨਂ, ਨ ਚ ਤੇਨ ਫਾਸੁਕਾ ਨਾਮੇਤਬ੍ਬਾ। ਯਾ ਨਾਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
416. Tena kho pana samayena bhikkhuniyo dīghāni kāyabandhanāni dhārenti, teheva phāsukā nāmenti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā dīghaṃ kāyabandhanaṃ dhāretabbaṃ. Yā dhāreyya, āpatti dukkaṭassa. Anujānāmi, bhikkhave, bhikkhuniyā ekapariyākataṃ 10 kāyabandhanaṃ, na ca tena phāsukā nāmetabbā. Yā nāmeyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ વਿਲੀવੇਨ 11 ਪਟ੍ਟੇਨ ਫਾਸੁਕਾ ਨਾਮੇਨ੍ਤਿ…ਪੇ॰… ਚਮ੍ਮਪਟ੍ਟੇਨ ਫਾਸੁਕਾ ਨਾਮੇਨ੍ਤਿ। ਦੁਸ੍ਸਪਟ੍ਟੇਨ ਫਾਸੁਕਾ ਨਾਮੇਨ੍ਤਿ। ਦੁਸ੍ਸવੇਣਿਯਾ ਫਾਸੁਕਾ ਨਾਮੇਨ੍ਤਿ। ਦੁਸ੍ਸવਟ੍ਟਿਯਾ ਫਾਸੁਕਾ ਨਾਮੇਨ੍ਤਿ। ਚੋਲ਼ਪਟ੍ਟੇਨ ਫਾਸੁਕਾ ਨਾਮੇਨ੍ਤਿ। ਚੋਲ਼વੇਣਿਯਾ ਫਾਸੁਕਾ ਨਾਮੇਨ੍ਤਿ। ਚੋਲ਼વਟ੍ਟਿਯਾ ਫਾਸੁਕਾ ਨਾਮੇਨ੍ਤਿ। ਸੁਤ੍ਤવੇਣਿਯਾ ਫਾਸੁਕਾ ਨਾਮੇਨ੍ਤਿ। ਸੁਤ੍ਤવਟ੍ਟਿਯਾ ਫਾਸੁਕਾ ਨਾਮੇਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ । ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ વਿਲੀવੇਨ ਪਟ੍ਟੇਨ ਫਾਸੁਕਾ ਨਾਮੇਤਬ੍ਬਾ…ਪੇ॰… ਨ ਸੁਤ੍ਤવਟ੍ਟਿਯਾ ਫਾਸੁਕਾ ਨਾਮੇਤਬ੍ਬਾ। ਯਾ ਨਾਮੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena bhikkhuniyo vilīvena 12 paṭṭena phāsukā nāmenti…pe… cammapaṭṭena phāsukā nāmenti. Dussapaṭṭena phāsukā nāmenti. Dussaveṇiyā phāsukā nāmenti. Dussavaṭṭiyā phāsukā nāmenti. Coḷapaṭṭena phāsukā nāmenti. Coḷaveṇiyā phāsukā nāmenti. Coḷavaṭṭiyā phāsukā nāmenti. Suttaveṇiyā phāsukā nāmenti. Suttavaṭṭiyā phāsukā nāmenti. Manussā ujjhāyanti khiyyanti vipācenti – seyyathāpi gihinī kāmabhoginiyoti. Bhagavato etamatthaṃ ārocesuṃ . ‘‘Na, bhikkhave, bhikkhuniyā vilīvena paṭṭena phāsukā nāmetabbā…pe… na suttavaṭṭiyā phāsukā nāmetabbā. Yā nāmeyya āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਭਿਕ੍ਖੁਨਿਯੋ ਅਟ੍ਠਿਲ੍ਲੇਨ ਜਘਨਂ ਘਂਸਾਪੇਨ੍ਤਿ…ਪੇ॰… ਗੋਹਨੁਕੇਨ ਜਘਨਂ ਕੋਟ੍ਟਾਪੇਨ੍ਤਿ, ਹਤ੍ਥਂ ਕੋਟ੍ਟਾਪੇਨ੍ਤਿ, ਹਤ੍ਥਕੋਚ੍ਛਂ ਕੋਟ੍ਟਾਪੇਨ੍ਤਿ, ਪਾਦਂ ਕੋਟ੍ਟਾਪੇਨ੍ਤਿ, ਪਾਦਕੋਚ੍ਛਂ ਕੋਟ੍ਟਾਪੇਨ੍ਤਿ, ਊਰੁਂ ਕੋਟ੍ਟਾਪੇਨ੍ਤਿ, ਮੁਖਂ ਕੋਟ੍ਟਾਪੇਨ੍ਤਿ, ਦਨ੍ਤਮਂਸਂ ਕੋਟ੍ਟਾਪੇਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ…ਪੇ॰… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਅਟ੍ਠਿਲ੍ਲੇਨ ਜਘਨਂ ਘਂਸਾਪੇਤਬ੍ਬਂ…ਪੇ॰… ਨ ਦਨ੍ਤਮਂਸਂ ਕੋਟ੍ਟਾਪੇਤਬ੍ਬਂ। ਯਾ ਕੋਟ੍ਟਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena bhikkhuniyo aṭṭhillena jaghanaṃ ghaṃsāpenti…pe… gohanukena jaghanaṃ koṭṭāpenti, hatthaṃ koṭṭāpenti, hatthakocchaṃ koṭṭāpenti, pādaṃ koṭṭāpenti, pādakocchaṃ koṭṭāpenti, ūruṃ koṭṭāpenti, mukhaṃ koṭṭāpenti, dantamaṃsaṃ koṭṭāpenti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā aṭṭhillena jaghanaṃ ghaṃsāpetabbaṃ…pe… na dantamaṃsaṃ koṭṭāpetabbaṃ. Yā koṭṭāpeyya, āpatti dukkaṭassā’’ti.
੪੧੭. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਮੁਖਂ ਆਲਿਮ੍ਪਨ੍ਤਿ…ਪੇ॰… ਮੁਖਂ ਉਮ੍ਮਦ੍ਦੇਨ੍ਤਿ, ਮੁਖਂ ਚੁਣ੍ਣੇਨ੍ਤਿ, ਮਨੋਸਿਲਿਕਾਯ ਮੁਖਂ ਲਞ੍ਛੇਨ੍ਤਿ, ਅਙ੍ਗਰਾਗਂ ਕਰੋਨ੍ਤਿ, ਮੁਖਰਾਗਂ ਕਰੋਨ੍ਤਿ, ਅਙ੍ਗਰਾਗਮੁਖਰਾਗਂ ਕਰੋਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ…ਪੇ॰… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ , ਭਿਕ੍ਖੁਨਿਯਾ ਮੁਖਂ ਆਲਿਮ੍ਪਿਤਬ੍ਬਂ…ਪੇ॰… ਨ ਮੁਖਂ ਉਮ੍ਮਦ੍ਦਿਤਬ੍ਬਂ, ਨ ਮੁਖਂ ਚੁਣ੍ਣੇਤਬ੍ਬਂ, ਨ ਮਨੋਸਿਲਿਕਾਯ ਮੁਖਂ ਲਞ੍ਛਿਤਬ੍ਬਂ, ਨ ਅਙ੍ਗਰਾਗੋ ਕਾਤਬ੍ਬੋ, ਨ ਮੁਖਰਾਗੋ ਕਾਤਬ੍ਬੋ, ਨ ਅਙ੍ਗਰਾਗਮੁਖਰਾਗੋ ਕਾਤਬ੍ਬੋ। ਯਾ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
417. Tena kho pana samayena chabbaggiyā bhikkhuniyo mukhaṃ ālimpanti…pe… mukhaṃ ummaddenti, mukhaṃ cuṇṇenti, manosilikāya mukhaṃ lañchenti, aṅgarāgaṃ karonti, mukharāgaṃ karonti, aṅgarāgamukharāgaṃ karonti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave , bhikkhuniyā mukhaṃ ālimpitabbaṃ…pe… na mukhaṃ ummadditabbaṃ, na mukhaṃ cuṇṇetabbaṃ, na manosilikāya mukhaṃ lañchitabbaṃ, na aṅgarāgo kātabbo, na mukharāgo kātabbo, na aṅgarāgamukharāgo kātabbo. Yā kareyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਅવਙ੍ਗਂ 13 ਕਰੋਨ੍ਤਿ…ਪੇ॰… વਿਸੇਸਕਂ ਕਰੋਨ੍ਤਿ, ਓਲੋਕਨਕੇਨ ਓਲੋਕੇਨ੍ਤਿ, ਸਾਲੋਕੇ ਤਿਟ੍ਠਨ੍ਤਿ; ਨਚ੍ਚਂ 14 ਕਾਰਾਪੇਨ੍ਤਿ, વੇਸਿਂ વੁਟ੍ਠਾਪੇਨ੍ਤਿ, ਪਾਨਾਗਾਰਂ ਠਪੇਨ੍ਤਿ, ਸੂਨਂ ਠਪੇਨ੍ਤਿ, ਆਪਣਂ ਪਸਾਰੇਨ੍ਤਿ, વਡ੍ਢਿਂ ਪਯੋਜੇਨ੍ਤਿ, વਣਿਜ੍ਜਂ ਪਯੋਜੇਨ੍ਤਿ, ਦਾਸਂ ਉਪਟ੍ਠਾਪੇਨ੍ਤਿ, ਦਾਸਿਂ ਉਪਟ੍ਠਾਪੇਨ੍ਤਿ, ਕਮ੍ਮਕਾਰਂ ਉਪਟ੍ਠਾਪੇਨ੍ਤਿ, ਕਮ੍ਮਕਾਰਿਂ ਉਪਟ੍ਠਾਪੇਨ੍ਤਿ, ਤਿਰਚ੍ਛਾਨਗਤਂ ਉਪਟ੍ਠਾਪੇਨ੍ਤਿ, ਹਰੀਤਕਪਕ੍ਕਿਕਂ 15 ਪਕਿਣਨ੍ਤਿ, ਨਮਤਕਂ ਧਾਰੇਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ…ਪੇ॰… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਅવਙ੍ਗਂ ਕਾਤਬ੍ਬਂ…ਪੇ॰… ਨ વਿਸੇਸਕਂ ਕਾਤਬ੍ਬਂ, ਨ ਓਲੋਕਨਕੇਨ ਓਲੋਕੇਤਬ੍ਬਂ, ਨ ਸਾਲੋਕੇ ਠਾਤਬ੍ਬਂ, ਨ ਨਚ੍ਚਂ ਕਾਰਾਪੇਤਬ੍ਬਂ, ਨ વੇਸੀ વੁਟ੍ਠਾਪੇਤਬ੍ਬਾ, ਨ ਪਾਨਾਗਾਰਂ ਠਪੇਤਬ੍ਬਂ, ਨ ਸੂਨਾ ਠਪੇਤਬ੍ਬਾ, ਨ ਆਪਣੋ ਪਸਾਰੇਤਬ੍ਬੋ, ਨ વਡ੍ਢਿ ਪਯੋਜੇਤਬ੍ਬਾ, ਨ વਣਿਜ੍ਜਾ ਪਯੋਜੇਤਬ੍ਬਾ, ਨ ਦਾਸੋ ਉਪਟ੍ਠਾਪੇਤਬ੍ਬੋ, ਨ ਦਾਸੀ ਉਪਟ੍ਠਾਪੇਤਬ੍ਬਾ, ਨ ਕਮ੍ਮਕਾਰੋ ਉਪਟ੍ਠਾਪੇਤਬ੍ਬੋ, ਨ ਕਮ੍ਮਕਾਰੀ ਉਪਟ੍ਠਾਪੇਤਬ੍ਬਾ, ਨ ਤਿਰਚ੍ਛਾਨਗਤੋ ਉਪਟ੍ਠਾਪੇਤਬ੍ਬੋ, ਨ ਹਰੀਤਕਪਕ੍ਕਿਕਂ ਪਕਿਣਿਤਬ੍ਬਂ, ਨ ਨਮਤਕਂ ਧਾਰੇਤਬ੍ਬਂ। ਯਾ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena chabbaggiyā bhikkhuniyo avaṅgaṃ 16 karonti…pe… visesakaṃ karonti, olokanakena olokenti, sāloke tiṭṭhanti; naccaṃ 17 kārāpenti, vesiṃ vuṭṭhāpenti, pānāgāraṃ ṭhapenti, sūnaṃ ṭhapenti, āpaṇaṃ pasārenti, vaḍḍhiṃ payojenti, vaṇijjaṃ payojenti, dāsaṃ upaṭṭhāpenti, dāsiṃ upaṭṭhāpenti, kammakāraṃ upaṭṭhāpenti, kammakāriṃ upaṭṭhāpenti, tiracchānagataṃ upaṭṭhāpenti, harītakapakkikaṃ 18 pakiṇanti, namatakaṃ dhārenti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā avaṅgaṃ kātabbaṃ…pe… na visesakaṃ kātabbaṃ, na olokanakena oloketabbaṃ, na sāloke ṭhātabbaṃ, na naccaṃ kārāpetabbaṃ, na vesī vuṭṭhāpetabbā, na pānāgāraṃ ṭhapetabbaṃ, na sūnā ṭhapetabbā, na āpaṇo pasāretabbo, na vaḍḍhi payojetabbā, na vaṇijjā payojetabbā, na dāso upaṭṭhāpetabbo, na dāsī upaṭṭhāpetabbā, na kammakāro upaṭṭhāpetabbo, na kammakārī upaṭṭhāpetabbā, na tiracchānagato upaṭṭhāpetabbo, na harītakapakkikaṃ pakiṇitabbaṃ, na namatakaṃ dhāretabbaṃ. Yā dhāreyya, āpatti dukkaṭassā’’ti.
੪੧੮. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਸਬ੍ਬਨੀਲਕਾਨਿ ਚੀવਰਾਨਿ ਧਾਰੇਨ੍ਤਿ…ਪੇ॰… ਸਬ੍ਬਪੀਤਕਾਨਿ ਚੀવਰਾਨਿ ਧਾਰੇਨ੍ਤਿ, ਸਬ੍ਬਲੋਹਿਤਕਾਨਿ ਚੀવਰਾਨਿ ਧਾਰੇਨ੍ਤਿ, ਸਬ੍ਬਮਞ੍ਜਿਟ੍ਠਿਕਾਨਿ ਚੀવਰਾਨਿ ਧਾਰੇਨ੍ਤਿ, ਸਬ੍ਬਕਣ੍ਹਾਨਿ ਚੀવਰਾਨਿ ਧਾਰੇਨ੍ਤਿ, ਸਬ੍ਬਮਹਾਰਙ੍ਗਰਤ੍ਤਾਨਿ ਚੀવਰਾਨਿ ਧਾਰੇਨ੍ਤਿ, ਸਬ੍ਬਮਹਾਨਾਮਰਤ੍ਤਾਨਿ ਚੀવਰਾਨਿ ਧਾਰੇਨ੍ਤਿ, ਅਚ੍ਛਿਨ੍ਨਦਸਾਨਿ ਚੀવਰਾਨਿ ਧਾਰੇਨ੍ਤਿ, ਦੀਘਦਸਾਨਿ ਚੀવਰਾਨਿ ਧਾਰੇਨ੍ਤਿ, ਪੁਪ੍ਫਦਸਾਨਿ ਚੀવਰਾਨਿ ਧਾਰੇਨ੍ਤਿ, ਫਲਦਸਾਨਿ ਚੀવਰਾਨਿ ਧਾਰੇਨ੍ਤਿ, ਕਞ੍ਚੁਕਂ ਧਾਰੇਨ੍ਤਿ, ਤਿਰੀਟਕਂ ਧਾਰੇਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ…ਪੇ॰… ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਸਬ੍ਬਨੀਲਕਾਨਿ ਚੀવਰਾਨਿ ਧਾਰੇਤਬ੍ਬਾਨਿ…ਪੇ॰… ਨ ਤਿਰੀਟਕਂ ਧਾਰੇਤਬ੍ਬਂ। ਯਾ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
418. Tena kho pana samayena chabbaggiyā bhikkhuniyo sabbanīlakāni cīvarāni dhārenti…pe… sabbapītakāni cīvarāni dhārenti, sabbalohitakāni cīvarāni dhārenti, sabbamañjiṭṭhikāni cīvarāni dhārenti, sabbakaṇhāni cīvarāni dhārenti, sabbamahāraṅgarattāni cīvarāni dhārenti, sabbamahānāmarattāni cīvarāni dhārenti, acchinnadasāni cīvarāni dhārenti, dīghadasāni cīvarāni dhārenti, pupphadasāni cīvarāni dhārenti, phaladasāni cīvarāni dhārenti, kañcukaṃ dhārenti, tirīṭakaṃ dhārenti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā sabbanīlakāni cīvarāni dhāretabbāni…pe… na tirīṭakaṃ dhāretabbaṃ. Yā dhāreyya, āpatti dukkaṭassā’’ti.
੪੧੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਕਾਲਂ ਕਰੋਨ੍ਤੀ ਏવਮਾਹ – ‘‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’’ਤਿ। ਤਤ੍ਥ ਭਿਕ੍ਖੂ ਚ ਭਿਕ੍ਖੁਨਿਯੋ ਚ વਿવਦਨ੍ਤਿ – ‘‘ਅਮ੍ਹਾਕਂ ਹੋਤਿ, ਅਮ੍ਹਾਕਂ ਹੋਤੀ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਭਿਕ੍ਖੁਨੀ ਚੇ, ਭਿਕ੍ਖવੇ , ਕਾਲਂ ਕਰੋਨ੍ਤੀ ਏવਂ વਦੇਯ੍ਯ – ‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’ਤਿ, ਅਨਿਸ੍ਸਰੋ ਤਤ੍ਥ ਭਿਕ੍ਖੁਸਙ੍ਘੋ, ਭਿਕ੍ਖੁਨਿਸਙ੍ਘਸ੍ਸੇવੇਤਂ। ਸਿਕ੍ਖਮਾਨਾ ਚੇ, ਭਿਕ੍ਖવੇ…ਪੇ॰… ਸਾਮਣੇਰੀ ਚੇ, ਭਿਕ੍ਖવੇ, ਕਾਲਂ ਕਰੋਨ੍ਤੀ ਏવਂ વਦੇਯ੍ਯ – ‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’ਤਿ, ਅਨਿਸ੍ਸਰੋ ਤਤ੍ਥ ਭਿਕ੍ਖੁਸਙ੍ਘੋ, ਭਿਕ੍ਖੁਨਿਸਙ੍ਘਸ੍ਸੇવੇਤਂ। ਭਿਕ੍ਖੁ ਚੇ, ਭਿਕ੍ਖવੇ, ਕਾਲਂ ਕਰੋਨ੍ਤੋ ਏવਂ વਦੇਯ੍ਯ – ‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’ਤਿ, ਅਨਿਸ੍ਸਰੋ ਤਤ੍ਥ ਭਿਕ੍ਖੁਨਿਸਙ੍ਘੋ, ਭਿਕ੍ਖੁਸਙ੍ਘਸ੍ਸੇવੇਤਂ। ਸਾਮਣੇਰੋ ਚੇ, ਭਿਕ੍ਖવੇ…ਪੇ॰… ਉਪਾਸਕੋ ਚੇ, ਭਿਕ੍ਖવੇ…ਪੇ॰… ਉਪਾਸਿਕਾ ਚੇ, ਭਿਕ੍ਖવੇ…ਪੇ॰… ਅਞ੍ਞੋ ਚੇ, ਭਿਕ੍ਖવੇ, ਕੋਚਿ ਕਾਲਂ ਕਰੋਨ੍ਤੋ ਏવਂ વਦੇਯ੍ਯ – ‘ਮਮਚ੍ਚਯੇਨ ਮਯ੍ਹਂ ਪਰਿਕ੍ਖਾਰੋ ਸਙ੍ਘਸ੍ਸ ਹੋਤੂ’ਤਿ, ਅਨਿਸ੍ਸਰੋ ਤਤ੍ਥ ਭਿਕ੍ਖੁਨਿਸਙ੍ਘੋ, ਭਿਕ੍ਖੁਸਙ੍ਘਸ੍ਸੇવੇਤ’’ਨ੍ਤਿ।
419. Tena kho pana samayena aññatarā bhikkhunī kālaṃ karontī evamāha – ‘‘mamaccayena mayhaṃ parikkhāro saṅghassa hotū’’ti. Tattha bhikkhū ca bhikkhuniyo ca vivadanti – ‘‘amhākaṃ hoti, amhākaṃ hotī’’ti. Bhagavato etamatthaṃ ārocesuṃ. ‘‘Bhikkhunī ce, bhikkhave , kālaṃ karontī evaṃ vadeyya – ‘mamaccayena mayhaṃ parikkhāro saṅghassa hotū’ti, anissaro tattha bhikkhusaṅgho, bhikkhunisaṅghassevetaṃ. Sikkhamānā ce, bhikkhave…pe… sāmaṇerī ce, bhikkhave, kālaṃ karontī evaṃ vadeyya – ‘mamaccayena mayhaṃ parikkhāro saṅghassa hotū’ti, anissaro tattha bhikkhusaṅgho, bhikkhunisaṅghassevetaṃ. Bhikkhu ce, bhikkhave, kālaṃ karonto evaṃ vadeyya – ‘mamaccayena mayhaṃ parikkhāro saṅghassa hotū’ti, anissaro tattha bhikkhunisaṅgho, bhikkhusaṅghassevetaṃ. Sāmaṇero ce, bhikkhave…pe… upāsako ce, bhikkhave…pe… upāsikā ce, bhikkhave…pe… añño ce, bhikkhave, koci kālaṃ karonto evaṃ vadeyya – ‘mamaccayena mayhaṃ parikkhāro saṅghassa hotū’ti, anissaro tattha bhikkhunisaṅgho, bhikkhusaṅghasseveta’’nti.
੪੨੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਪੁਰਾਣਮਲ੍ਲੀ ਭਿਕ੍ਖੁਨੀਸੁ ਪਬ੍ਬਜਿਤਾ ਹੋਤਿ। ਸਾ ਰਥਿਕਾਯ ਦੁਬ੍ਬਲਕਂ ਭਿਕ੍ਖੁਂ ਪਸ੍ਸਿਤ੍વਾ ਅਂਸਕੂਟੇਨ ਪਹਾਰਂ ਦਤ੍વਾ ਪਾਤੇਸਿ 19। ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ, ਭਿਕ੍ਖੁਨੀ, ਭਿਕ੍ਖੁਸ੍ਸ ਪਹਾਰਂ ਦਸ੍ਸਤੀ’’ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਭਿਕ੍ਖੁਸ੍ਸ ਪਹਾਰੋ ਦਾਤਬ੍ਬੋ। ਯਾ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਭਿਕ੍ਖੁਨਿਯਾ ਭਿਕ੍ਖੁਂ ਪਸ੍ਸਿਤ੍વਾ ਦੂਰਤੋવ ਓਕ੍ਕਮਿਤ੍વਾ ਮਗ੍ਗਂ ਦਾਤੁ’’ਨ੍ਤਿ।
420. Tena kho pana samayena aññatarā itthī purāṇamallī bhikkhunīsu pabbajitā hoti. Sā rathikāya dubbalakaṃ bhikkhuṃ passitvā aṃsakūṭena pahāraṃ datvā pātesi 20. Bhikkhū ujjhāyanti khiyyanti vipācenti – ‘‘kathañhi nāma, bhikkhunī, bhikkhussa pahāraṃ dassatī’’ti. Bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhussa pahāro dātabbo. Yā dadeyya, āpatti dukkaṭassa. Anujānāmi, bhikkhave, bhikkhuniyā bhikkhuṃ passitvā dūratova okkamitvā maggaṃ dātu’’nti.
ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਪવੁਤ੍ਥਪਤਿਕਾ ਜਾਰੇਨ ਗਬ੍ਭਿਨੀ ਹੋਤਿ। ਸਾ ਗਬ੍ਭਂ ਪਾਤੇਤ੍વਾ ਕੁਲੂਪਿਕਂ ਭਿਕ੍ਖੁਨਿਂ ਏਤਦવੋਚ – ‘‘ਹਨ੍ਦਯ੍ਯੇ, ਇਮਂ ਗਬ੍ਭਂ ਪਤ੍ਤੇਨ ਨੀਹਰਾ’’ਤਿ। ਅਥ ਖੋ ਸਾ ਭਿਕ੍ਖੁਨੀ ਤਂ ਗਬ੍ਭਂ ਪਤ੍ਤੇ ਪਕ੍ਖਿਪਿਤ੍વਾ ਸਙ੍ਘਾਟਿਯਾ ਪਟਿਚ੍ਛਾਦੇਤ੍વਾ ਅਗਮਾਸਿ। ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਪਿਣ੍ਡਚਾਰਿਕੇਨ ਭਿਕ੍ਖੁਨਾ ਸਮਾਦਾਨਂ ਕਤਂ ਹੋਤਿ – ‘ਯਾਹਂ ਪਠਮਂ ਭਿਕ੍ਖਂ ਲਭਿਸ੍ਸਾਮਿ, ਨ ਤਂ ਅਦਤ੍વਾ ਭਿਕ੍ਖੁਸ੍ਸ વਾ ਭਿਕ੍ਖੁਨਿਯਾ વਾ ਪਰਿਭੁਞ੍ਜਿਸ੍ਸਾਮੀ’ਤਿ। ਅਥ ਖੋ ਸੋ ਭਿਕ੍ਖੁ ਤਂ ਭਿਕ੍ਖੁਨਿਂ ਪਸ੍ਸਿਤ੍વਾ ਏਤਦવੋਚ – ‘‘ਹਨ੍ਦ, ਭਗਿਨਿ, ਭਿਕ੍ਖਂ ਪਟਿਗ੍ਗਣ੍ਹਾ’’ਤਿ। ‘‘ਅਲਂ ਅਯ੍ਯਾ’’ਤਿ। ਦੁਤਿਯਮ੍ਪਿ ਖੋ…ਪੇ॰… ਤਤਿਯਮ੍ਪਿ ਖੋ ਸੋ ਭਿਕ੍ਖੁ ਤਂ ਭਿਕ੍ਖੁਨਿਂ ਏਤਦવੋਚ – ‘‘ਹਨ੍ਦ, ਭਗਿਨਿ, ਭਿਕ੍ਖਂ ਪਟਿਗ੍ਗਣ੍ਹਾ’’ਤਿ। ‘‘ਅਲਂ ਅਯ੍ਯਾ’’ਤਿ। ‘‘ਮਯਾ ਖੋ, ਭਗਿਨਿ, ਸਮਾਦਾਨਂ ਕਤਂ – ‘ਯਾਹਂ ਪਠਮਂ ਭਿਕ੍ਖਂ ਲਭਿਸ੍ਸਾਮਿ, ਨ ਤਂ ਅਦਤ੍વਾ ਭਿਕ੍ਖੁਸ੍ਸ વਾ ਭਿਕ੍ਖੁਨਿਯਾ વਾ ਪਰਿਭੁਞ੍ਜਿਸ੍ਸਾਮੀ’ਤਿ। ਹਨ੍ਦ , ਭਗਿਨਿ, ਭਿਕ੍ਖਂ ਪਟਿਗ੍ਗਣ੍ਹਾ’’ਤਿ। ਅਥ ਖੋ ਸਾ ਭਿਕ੍ਖੁਨੀ ਤੇਨ ਭਿਕ੍ਖੁਨਾ ਨਿਪ੍ਪੀਲ਼ਿਯਮਾਨਾ ਨੀਹਰਿਤ੍વਾ ਪਤ੍ਤਂ ਦਸ੍ਸੇਸਿ – ‘‘ਪਸ੍ਸ, ਅਯ੍ਯ, ਪਤ੍ਤੇ ਗਬ੍ਭਂ; ਮਾ ਚ ਕਸ੍ਸਚਿ ਆਰੋਚੇਸੀ’’ਤਿ। ਅਥ ਖੋ ਸੋ ਭਿਕ੍ਖੁ ਉਜ੍ਝਾਯਤਿ ਖਿਯ੍ਯਤਿ વਿਪਾਚੇਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨੀ ਪਤ੍ਤੇਨ ਗਬ੍ਭਂ ਨੀਹਰਿਸ੍ਸਤੀ’’ਤਿ! ਅਥ ਖੋ ਸੋ ਭਿਕ੍ਖੁ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ। ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ॰… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨੀ ਪਤ੍ਤੇਨ ਗਬ੍ਭਂ ਨੀਹਰਿਸ੍ਸਤੀ’’ਤਿ! ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਪਤ੍ਤੇਨ ਗਬ੍ਭੋ ਨੀਹਰਿਤਬ੍ਬੋ। ਯਾ ਨੀਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਭਿਕ੍ਖੁਨਿਯਾ ਭਿਕ੍ਖੁਂ ਪਸ੍ਸਿਤ੍વਾ ਨੀਹਰਿਤ੍વਾ ਪਤ੍ਤਂ ਦਸ੍ਸੇਤੁ’’ਨ੍ਤਿ।
Tena kho pana samayena aññatarā itthī pavutthapatikā jārena gabbhinī hoti. Sā gabbhaṃ pātetvā kulūpikaṃ bhikkhuniṃ etadavoca – ‘‘handayye, imaṃ gabbhaṃ pattena nīharā’’ti. Atha kho sā bhikkhunī taṃ gabbhaṃ patte pakkhipitvā saṅghāṭiyā paṭicchādetvā agamāsi. Tena kho pana samayena aññatarena piṇḍacārikena bhikkhunā samādānaṃ kataṃ hoti – ‘yāhaṃ paṭhamaṃ bhikkhaṃ labhissāmi, na taṃ adatvā bhikkhussa vā bhikkhuniyā vā paribhuñjissāmī’ti. Atha kho so bhikkhu taṃ bhikkhuniṃ passitvā etadavoca – ‘‘handa, bhagini, bhikkhaṃ paṭiggaṇhā’’ti. ‘‘Alaṃ ayyā’’ti. Dutiyampi kho…pe… tatiyampi kho so bhikkhu taṃ bhikkhuniṃ etadavoca – ‘‘handa, bhagini, bhikkhaṃ paṭiggaṇhā’’ti. ‘‘Alaṃ ayyā’’ti. ‘‘Mayā kho, bhagini, samādānaṃ kataṃ – ‘yāhaṃ paṭhamaṃ bhikkhaṃ labhissāmi, na taṃ adatvā bhikkhussa vā bhikkhuniyā vā paribhuñjissāmī’ti. Handa , bhagini, bhikkhaṃ paṭiggaṇhā’’ti. Atha kho sā bhikkhunī tena bhikkhunā nippīḷiyamānā nīharitvā pattaṃ dassesi – ‘‘passa, ayya, patte gabbhaṃ; mā ca kassaci ārocesī’’ti. Atha kho so bhikkhu ujjhāyati khiyyati vipāceti – ‘‘kathañhi nāma bhikkhunī pattena gabbhaṃ nīharissatī’’ti! Atha kho so bhikkhu bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhunī pattena gabbhaṃ nīharissatī’’ti! Bhagavato etamatthaṃ ārocesuṃ. ‘‘Na, bhikkhave, bhikkhuniyā pattena gabbho nīharitabbo. Yā nīhareyya, āpatti dukkaṭassa. Anujānāmi, bhikkhave, bhikkhuniyā bhikkhuṃ passitvā nīharitvā pattaṃ dassetu’’nti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਭਿਕ੍ਖੁਂ ਪਸ੍ਸਿਤ੍વਾ ਪਰਿવਤ੍ਤੇਤ੍વਾ ਪਤ੍ਤਮੂਲਂ ਦਸ੍ਸੇਨ੍ਤਿ। ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਭਿਕ੍ਖੁਂ ਪਸ੍ਸਿਤ੍વਾ ਪਰਿવਤ੍ਤੇਤ੍વਾ ਪਤ੍ਤਮੂਲਂ ਦਸ੍ਸੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਭਿਕ੍ਖੁਂ ਪਸ੍ਸਿਤ੍વਾ ਪਰਿવਤ੍ਤੇਤ੍વਾ ਪਤ੍ਤਮੂਲਂ ਦਸ੍ਸੇਤਬ੍ਬਂ। ਯਾ ਦਸ੍ਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਭਿਕ੍ਖੁਨਿਯਾ ਭਿਕ੍ਖੁਂ ਪਸ੍ਸਿਤ੍વਾ ਉਕ੍ਕੁਜ੍ਜਿਤ੍વਾ ਪਤ੍ਤਂ ਦਸ੍ਸੇਤੁਂ। ਯਞ੍ਚ ਪਤ੍ਤੇ ਆਮਿਸਂ ਹੋਤਿ, ਤੇਨ ਚ ਭਿਕ੍ਖੁ ਨਿਮਨ੍ਤੇਤਬ੍ਬੋ’’ਤਿ।
Tena kho pana samayena chabbaggiyā bhikkhuniyo bhikkhuṃ passitvā parivattetvā pattamūlaṃ dassenti. Bhikkhū ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo bhikkhuṃ passitvā parivattetvā pattamūlaṃ dassessantī’’ti! Atha kho te bhikkhū bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhuṃ passitvā parivattetvā pattamūlaṃ dassetabbaṃ. Yā dasseyya, āpatti dukkaṭassa. Anujānāmi, bhikkhave, bhikkhuniyā bhikkhuṃ passitvā ukkujjitvā pattaṃ dassetuṃ. Yañca patte āmisaṃ hoti, tena ca bhikkhu nimantetabbo’’ti.
ਤੇਨ ਖੋ ਪਨ ਸਮਯੇਨ ਸਾવਤ੍ਥਿਯਂ ਰਥਿਕਾਯ ਪੁਰਿਸਬ੍ਯਞ੍ਜਨਂ ਛਡ੍ਡਿਤਂ ਹੋਤਿ। ਤਂ ਭਿਕ੍ਖੁਨਿਯੋ ਸਕ੍ਕਚ੍ਚਂ ਉਪਨਿਜ੍ਝਾਯਿਂਸੁ। ਮਨੁਸ੍ਸਾ ਉਕ੍ਕੁਟ੍ਠਿਂ ਅਕਂਸੁ। ਤਾ ਭਿਕ੍ਖੁਨਿਯੋ ਮਙ੍ਕੂ ਅਹੇਸੁਂ। ਅਥ ਖੋ ਤਾ ਭਿਕ੍ਖੁਨਿਯੋ ਉਪਸ੍ਸਯਂ ਗਨ੍ਤ੍વਾ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸੁਂ। ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ…ਪੇ॰… ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਪੁਰਿਸਬ੍ਯਞ੍ਜਨਂ ਉਪਨਿਜ੍ਝਾਯਿਸ੍ਸਨ੍ਤੀ’’ਤਿ! ਅਥ ਖੋ ਤਾ ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ। ਭਿਕ੍ਖੂ ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਪੁਰਿਸਬ੍ਯਞ੍ਜਨਂ ਉਪਨਿਜ੍ਝਾਯਿਤਬ੍ਬਂ। ਯਾ ਉਪਨਿਜ੍ਝਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena sāvatthiyaṃ rathikāya purisabyañjanaṃ chaḍḍitaṃ hoti. Taṃ bhikkhuniyo sakkaccaṃ upanijjhāyiṃsu. Manussā ukkuṭṭhiṃ akaṃsu. Tā bhikkhuniyo maṅkū ahesuṃ. Atha kho tā bhikkhuniyo upassayaṃ gantvā bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo purisabyañjanaṃ upanijjhāyissantī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. ‘‘Na, bhikkhave, bhikkhuniyā purisabyañjanaṃ upanijjhāyitabbaṃ. Yā upanijjhāyeyya, āpatti dukkaṭassā’’ti.
੪੨੧. ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੂਨਂ ਆਮਿਸਂ ਦੇਨ੍ਤਿ। ਭਿਕ੍ਖੂ ਭਿਕ੍ਖੁਨੀਨਂ ਦੇਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ ਅਤ੍ਤਨੋ ਪਰਿਭੋਗਤ੍ਥਾਯ ਦਿਨ੍ਨਂ ਅਞ੍ਞੇਸਂ ਦਸ੍ਸਨ੍ਤਿ! ਮਯਮ੍ਪਿ ਨ ਜਾਨਾਮ ਦਾਨਂ ਦਾਤੁ’’ਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਅਤ੍ਤਨੋ ਪਰਿਭੋਗਤ੍ਥਾਯ ਦਿਨ੍ਨਂ ਅਞ੍ਞੇਸਂ ਦਾਤਬ੍ਬਂ। ਯੋ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
421. Tena kho pana samayena manussā bhikkhūnaṃ āmisaṃ denti. Bhikkhū bhikkhunīnaṃ denti. Manussā ujjhāyanti khiyyanti vipācenti – ‘‘kathañhi nāma bhadantā attano paribhogatthāya dinnaṃ aññesaṃ dassanti! Mayampi na jānāma dānaṃ dātu’’nti. Bhagavato etamatthaṃ ārocesuṃ. ‘‘Na, bhikkhave, attano paribhogatthāya dinnaṃ aññesaṃ dātabbaṃ. Yo dadeyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਆਮਿਸਂ ਉਸ੍ਸਨ੍ਨਂ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਸਙ੍ਘਸ੍ਸ ਦਾਤੁ’’ਨ੍ਤਿ। ਬਾਲ਼੍ਹਤਰਂ ਉਸ੍ਸਨ੍ਨਂ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਪੁਗ੍ਗਲਿਕਮ੍ਪਿ ਦਾਤੁ’’ਨ੍ਤਿ।
Tena kho pana samayena bhikkhūnaṃ āmisaṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, saṅghassa dātu’’nti. Bāḷhataraṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, puggalikampi dātu’’nti.
ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੁਨੀਨਂ ਆਮਿਸਂ ਦੇਨ੍ਤਿ। ਭਿਕ੍ਖੁਨਿਯੋ ਭਿਕ੍ਖੂਨਂ ਦੇਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁਨਿਯੋ ਅਤ੍ਤਨੋ ਪਰਿਭੋਗਤ੍ਥਾਯ ਦਿਨ੍ਨਂ ਅਞ੍ਞੇਸਂ ਦਸ੍ਸਨ੍ਤਿ! ਮਯਮ੍ਪਿ ਨ ਜਾਨਾਮ ਦਾਨਂ ਦਾਤੁ’’ਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਅਤ੍ਤਨੋ ਪਰਿਭੋਗਤ੍ਥਾਯ ਦਿਨ੍ਨਂ ਅਞ੍ਞੇਸਂ ਦਾਤਬ੍ਬਂ। ਯਾ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ।
Tena kho pana samayena manussā bhikkhunīnaṃ āmisaṃ denti. Bhikkhuniyo bhikkhūnaṃ denti. Manussā ujjhāyanti khiyyanti vipācenti – ‘‘kathañhi nāma bhikkhuniyo attano paribhogatthāya dinnaṃ aññesaṃ dassanti! Mayampi na jānāma dānaṃ dātu’’nti. Bhagavato etamatthaṃ ārocesuṃ. ‘‘Na, bhikkhave, bhikkhuniyā attano paribhogatthāya dinnaṃ aññesaṃ dātabbaṃ. Yā dadeyya, āpatti dukkaṭassā’’ti.
ਤੇਨ ਖੋ ਪਨ ਸਮਯੇਨ ਭਿਕ੍ਖੁਨੀਨਂ ਆਮਿਸਂ ਉਸ੍ਸਨ੍ਨਂ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਸਙ੍ਘਸ੍ਸ ਦਾਤੁ’’ਨ੍ਤਿ। ਬਾਲ਼੍ਹਤਰਂ ਉਸ੍ਸਨ੍ਨਂ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਪੁਗ੍ਗਲਿਕਮ੍ਪਿ ਦਾਤੁ’’ਨ੍ਤਿ।
Tena kho pana samayena bhikkhunīnaṃ āmisaṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, saṅghassa dātu’’nti. Bāḷhataraṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, puggalikampi dātu’’nti.
ਤੇਨ ਖੋ ਪਨ ਸਮਯੇਨ ਭਿਕ੍ਖੁਨੀਨਂ ਸਨ੍ਨਿਧਿਕਤਂ ਆਮਿਸਂ ਉਸ੍ਸਨ੍ਨਂ ਹੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਭਿਕ੍ਖੁਨੀਨਂ ਸਨ੍ਨਿਧਿਂ ਭਿਕ੍ਖੂਹਿ ਭਿਕ੍ਖੁਨੀਹਿ 25 ਪਟਿਗ੍ਗਾਹਾਪੇਤ੍વਾ ਪਰਿਭੁਞ੍ਜਿਤੁ’’ਨ੍ਤਿ।
Tena kho pana samayena bhikkhunīnaṃ sannidhikataṃ āmisaṃ ussannaṃ hoti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhunīnaṃ sannidhiṃ bhikkhūhi bhikkhunīhi 26 paṭiggāhāpetvā paribhuñjitu’’nti.
੪੨੨. ਤੇਨ ਖੋ ਪਨ ਸਮਯੇਨ ਭਿਕ੍ਖੂਨਂ ਸੇਨਾਸਨਂ ਉਸ੍ਸਨ੍ਨਂ ਹੋਤਿ, ਭਿਕ੍ਖੁਨੀਨਂ 27 ਨ ਹੋਤਿ। ਭਿਕ੍ਖੁਨਿਯੋ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸੁਂ – ‘ਸਾਧੁ, ਭਨ੍ਤੇ, ਅਯ੍ਯਾ ਅਮ੍ਹਾਕਂ ਸੇਨਾਸਨਂ ਦੇਨ੍ਤੁ ਤਾવਕਾਲਿਕ’ਨ੍ਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਭਿਕ੍ਖੁਨੀਨਂ ਸੇਨਾਸਨਂ ਦਾਤੁਂ ਤਾવਕਾਲਿਕ’’ਨ੍ਤਿ।
422. Tena kho pana samayena bhikkhūnaṃ senāsanaṃ ussannaṃ hoti, bhikkhunīnaṃ 28 na hoti. Bhikkhuniyo bhikkhūnaṃ santike dūtaṃ pāhesuṃ – ‘sādhu, bhante, ayyā amhākaṃ senāsanaṃ dentu tāvakālika’nti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhunīnaṃ senāsanaṃ dātuṃ tāvakālika’’nti.
ਤੇਨ ਖੋ ਪਨ ਸਮਯੇਨ ਉਤੁਨਿਯੋ ਭਿਕ੍ਖੁਨਿਯੋ ਓਨਦ੍ਧਮਞ੍ਚਂ ਓਨਦ੍ਧਪੀਠਂ ਅਭਿਨਿਸੀਦਨ੍ਤਿਪਿ ਅਭਿਨਿਪਜ੍ਜਨ੍ਤਿਪਿ। ਸੇਨਾਸਨਂ ਲੋਹਿਤੇਨ ਮਕ੍ਖਿਯ੍ਯਤਿ । ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਓਨਦ੍ਧਮਞ੍ਚਂ ਓਨਦ੍ਧਪੀਠਂ ਅਭਿਨਿਸੀਦਿਤਬ੍ਬਂ ਅਭਿਨਿਪਜ੍ਜਿਤਬ੍ਬਂ। ਯਾ ਅਭਿਨਿਸੀਦੇਯ੍ਯ વਾ ਅਭਿਨਿਪਜ੍ਜੇਯ੍ਯ વਾ ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਆવਸਥਚੀવਰ’’ਨ੍ਤਿ। ਆવਸਥਚੀવਰਂ ਲੋਹਿਤੇਨ ਮਕ੍ਖਿਯ੍ਯਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ , ਭਿਕ੍ਖવੇ, ਆਣਿਚੋਲ਼ਕ’’ਨ੍ਤਿ। ਚੋਲ਼ਕਂ ਨਿਪਤਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਸੁਤ੍ਤਕੇਨ ਬਨ੍ਧਿਤ੍વਾ ਊਰੁਯਾ ਬਨ੍ਧਿਤੁ’’ਨ੍ਤਿ । ਸੁਤ੍ਤਂ ਛਿਜ੍ਜਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਅਨੁਜਾਨਾਮਿ, ਭਿਕ੍ਖવੇ, ਸਂવੇਲ੍ਲਿਯਂ, ਕਟਿਸੁਤ੍ਤਕ’’ਨ੍ਤਿ।
Tena kho pana samayena utuniyo bhikkhuniyo onaddhamañcaṃ onaddhapīṭhaṃ abhinisīdantipi abhinipajjantipi. Senāsanaṃ lohitena makkhiyyati . Bhagavato etamatthaṃ ārocesuṃ. ‘‘Na, bhikkhave, bhikkhuniyā onaddhamañcaṃ onaddhapīṭhaṃ abhinisīditabbaṃ abhinipajjitabbaṃ. Yā abhinisīdeyya vā abhinipajjeyya vā āpatti dukkaṭassa. Anujānāmi, bhikkhave, āvasathacīvara’’nti. Āvasathacīvaraṃ lohitena makkhiyyati. Bhagavato etamatthaṃ ārocesuṃ. ‘‘Anujānāmi , bhikkhave, āṇicoḷaka’’nti. Coḷakaṃ nipatati. Bhagavato etamatthaṃ ārocesuṃ. ‘‘Anujānāmi, bhikkhave, suttakena bandhitvā ūruyā bandhitu’’nti . Suttaṃ chijjati. Bhagavato etamatthaṃ ārocesuṃ. ‘‘Anujānāmi, bhikkhave, saṃvelliyaṃ, kaṭisuttaka’’nti.
ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੁਨਿਯੋ ਸਬ੍ਬਕਾਲਂ ਕਟਿਸੁਤ੍ਤਕਂ ਧਾਰੇਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ਸੇਯ੍ਯਥਾਪਿ ਗਿਹਿਨੀ ਕਾਮਭੋਗਿਨਿਯੋਤਿ। ਭਗવਤੋ ਏਤਮਤ੍ਥਂ ਆਰੋਚੇਸੁਂ। ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਸਬ੍ਬਕਾਲਂ ਕਟਿਸੁਤ੍ਤਕਂ ਧਾਰੇਤਬ੍ਬਂ। ਯਾ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ। ਅਨੁਜਾਨਾਮਿ, ਭਿਕ੍ਖવੇ, ਉਤੁਨਿਯਾ ਕਟਿਸੁਤ੍ਤਕ’’ਨ੍ਤਿ।
Tena kho pana samayena chabbaggiyā bhikkhuniyo sabbakālaṃ kaṭisuttakaṃ dhārenti. Manussā ujjhāyanti khiyyanti vipācenti – seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā sabbakālaṃ kaṭisuttakaṃ dhāretabbaṃ. Yā dhāreyya, āpatti dukkaṭassa. Anujānāmi, bhikkhave, utuniyā kaṭisuttaka’’nti.
ਦੁਤਿਯਭਾਣવਾਰੋ ਨਿਟ੍ਠਿਤੋ।
Dutiyabhāṇavāro niṭṭhito.
Footnotes:
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਚੂਲ਼વਗ੍ਗ-ਅਟ੍ਠਕਥਾ • Cūḷavagga-aṭṭhakathā / ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾ • Bhikkhunīupasampadānujānanakathā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਭਿਕ੍ਖੁਨੀਉਪਸਮ੍ਪਨ੍ਨਾਨੁਜਾਨਨਕਥਾવਣ੍ਣਨਾ • Bhikkhunīupasampannānujānanakathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾવਣ੍ਣਨਾ • Bhikkhunīupasampadānujānanakathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾવਣ੍ਣਨਾ • Bhikkhunīupasampadānujānanakathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ਭਿਕ੍ਖੁਨੀਉਪਸਮ੍ਪਦਾਨੁਜਾਨਨਕਥਾ • Bhikkhunīupasampadānujānanakathā
