| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೮. ದುತಿಯಏಜಾಸುತ್ತಂ
8. Dutiyaejāsuttaṃ
೯೧. ‘‘ಏಜಾ , ಭಿಕ್ಖವೇ, ರೋಗೋ, ಏಜಾ ಗಣ್ಡೋ, ಏಜಾ ಸಲ್ಲಂ। ತಸ್ಮಾತಿಹ, ಭಿಕ್ಖವೇ, ತಥಾಗತೋ ಅನೇಜೋ ವಿಹರತಿ ವೀತಸಲ್ಲೋ। ತಸ್ಮಾತಿಹ, ಭಿಕ್ಖವೇ, ಭಿಕ್ಖು ಚೇಪಿ ಆಕಙ್ಖೇಯ್ಯ ‘ಅನೇಜೋ ವಿಹರೇಯ್ಯಂ ವೀತಸಲ್ಲೋ’ತಿ, ಚಕ್ಖುಂ ನ ಮಞ್ಞೇಯ್ಯ, ಚಕ್ಖುಸ್ಮಿಂ ನ ಮಞ್ಞೇಯ್ಯ, ಚಕ್ಖುತೋ ನ ಮಞ್ಞೇಯ್ಯ, ಚಕ್ಖು ಮೇತಿ ನ ಮಞ್ಞೇಯ್ಯ; ರೂಪೇ ನ ಮಞ್ಞೇಯ್ಯ… ಚಕ್ಖುವಿಞ್ಞಾಣಂ… ಚಕ್ಖುಸಮ್ಫಸ್ಸಂ… ಯಮ್ಪಿದಂ ಚಕ್ಖುಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ ತಮ್ಪಿ ನ ಮಞ್ಞೇಯ್ಯ, ತಸ್ಮಿಮ್ಪಿ ನ ಮಞ್ಞೇಯ್ಯ, ತತೋಪಿ ನ ಮಞ್ಞೇಯ್ಯ, ತಂ ಮೇತಿ ನ ಮಞ್ಞೇಯ್ಯ। ಯಞ್ಹಿ, ಭಿಕ್ಖವೇ, ಮಞ್ಞತಿ, ಯಸ್ಮಿಂ ಮಞ್ಞತಿ, ಯತೋ ಮಞ್ಞತಿ, ಯಂ ಮೇತಿ ಮಞ್ಞತಿ, ತತೋ ತಂ ಹೋತಿ ಅಞ್ಞಥಾ। ಅಞ್ಞಥಾಭಾವೀ ಭವಸತ್ತೋ ಲೋಕೋ ಭವಮೇವ ಅಭಿನನ್ದತಿ…ಪೇ॰…।
91. ‘‘Ejā , bhikkhave, rogo, ejā gaṇḍo, ejā sallaṃ. Tasmātiha, bhikkhave, tathāgato anejo viharati vītasallo. Tasmātiha, bhikkhave, bhikkhu cepi ākaṅkheyya ‘anejo vihareyyaṃ vītasallo’ti, cakkhuṃ na maññeyya, cakkhusmiṃ na maññeyya, cakkhuto na maññeyya, cakkhu meti na maññeyya; rūpe na maññeyya… cakkhuviññāṇaṃ… cakkhusamphassaṃ… yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati…pe….
‘‘ಜಿವ್ಹಂ ನ ಮಞ್ಞೇಯ್ಯ, ಜಿವ್ಹಾಯ ನ ಮಞ್ಞೇಯ್ಯ, ಜಿವ್ಹಾತೋ ನ ಮಞ್ಞೇಯ್ಯ, ಜಿವ್ಹಾ ಮೇತಿ ನ ಮಞ್ಞೇಯ್ಯ; ರಸೇ ನ ಮಞ್ಞೇಯ್ಯ… ಜಿವ್ಹಾವಿಞ್ಞಾಣಂ… ಜಿವ್ಹಾಸಮ್ಫಸ್ಸಂ… ಯಮ್ಪಿದಂ ಜಿವ್ಹಾಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ ತಮ್ಪಿ ನ ಮಞ್ಞೇಯ್ಯ, ತಸ್ಮಿಮ್ಪಿ ನ ಮಞ್ಞೇಯ್ಯ, ತತೋಪಿ ನ ಮಞ್ಞೇಯ್ಯ, ತಂ ಮೇತಿ ನ ಮಞ್ಞೇಯ್ಯ। ಯಞ್ಹಿ, ಭಿಕ್ಖವೇ, ಮಞ್ಞತಿ, ಯಸ್ಮಿಂ ಮಞ್ಞತಿ, ಯತೋ ಮಞ್ಞತಿ, ಯಂ ಮೇತಿ ಮಞ್ಞತಿ, ತತೋ ತಂ ಹೋತಿ ಅಞ್ಞಥಾ। ಅಞ್ಞಥಾಭಾವೀ ಭವಸತ್ತೋ ಲೋಕೋ ಭವಮೇವ ಅಭಿನನ್ದತಿ…ಪೇ॰…।
‘‘Jivhaṃ na maññeyya, jivhāya na maññeyya, jivhāto na maññeyya, jivhā meti na maññeyya; rase na maññeyya… jivhāviññāṇaṃ… jivhāsamphassaṃ… yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati…pe….
‘‘ಮನಂ ನ ಮಞ್ಞೇಯ್ಯ, ಮನಸ್ಮಿಂ ನ ಮಞ್ಞೇಯ್ಯ, ಮನತೋ ನ ಮಞ್ಞೇಯ್ಯ, ಮನೋ ಮೇತಿ ನ ಮಞ್ಞೇಯ್ಯ… ಮನೋವಿಞ್ಞಾಣಂ… ಮನೋಸಮ್ಫಸ್ಸಂ… ಯಮ್ಪಿದಂ ಮನೋಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ವೇದಯಿತಂ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ ತಮ್ಪಿ ನ ಮಞ್ಞೇಯ್ಯ, ತಸ್ಮಿಮ್ಪಿ ನ ಮಞ್ಞೇಯ್ಯ, ತತೋಪಿ ನ ಮಞ್ಞೇಯ್ಯ, ತಂ ಮೇತಿ ನ ಮಞ್ಞೇಯ್ಯ। ಯಞ್ಹಿ, ಭಿಕ್ಖವೇ, ಮಞ್ಞತಿ, ಯಸ್ಮಿಂ ಮಞ್ಞತಿ , ಯತೋ ಮಞ್ಞತಿ, ಯಂ ಮೇತಿ ಮಞ್ಞತಿ, ತತೋ ತಂ ಹೋತಿ ಅಞ್ಞಥಾ। ಅಞ್ಞಥಾಭಾವೀ ಭವಸತ್ತೋ ಲೋಕೋ ಭವಮೇವ ಅಭಿನನ್ದತಿ।
‘‘Manaṃ na maññeyya, manasmiṃ na maññeyya, manato na maññeyya, mano meti na maññeyya… manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññeyya, tasmimpi na maññeyya, tatopi na maññeyya, taṃ meti na maññeyya. Yañhi, bhikkhave, maññati, yasmiṃ maññati , yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavameva abhinandati.
‘‘ಯಾವತಾ, ಭಿಕ್ಖವೇ, ಖನ್ಧಧಾತುಆಯತನಾ ತಮ್ಪಿ ನ ಮಞ್ಞೇಯ್ಯ, ತಸ್ಮಿಮ್ಪಿ ನ ಮಞ್ಞೇಯ್ಯ, ತತೋಪಿ ನ ಮಞ್ಞೇಯ್ಯ, ತಂ ಮೇತಿ ನ ಮಞ್ಞೇಯ್ಯ। ಸೋ ಏವಂ ಅಮಞ್ಞಮಾನೋ ನ ಕಿಞ್ಚಿ ಲೋಕೇ ಉಪಾದಿಯತಿ। ಅನುಪಾದಿಯಂ ನ ಪರಿತಸ್ಸತಿ। ಅಪರಿತಸ್ಸಂ ಪಚ್ಚತ್ತಞ್ಞೇವ ಪರಿನಿಬ್ಬಾಯತಿ। ‘ಖೀಣಾ ಜಾತಿ, ವುಸಿತಂ ಬ್ರಹ್ಮಚರಿಯಂ, ಕತಂ ಕರಣೀಯಂ, ನಾಪರಂ ಇತ್ಥತ್ತಾಯಾ’ತಿ ಪಜಾನಾತೀ’’ತಿ। ಅಟ್ಠಮಂ।
‘‘Yāvatā, bhikkhave, khandhadhātuāyatanā tampi na maññeyya, tasmimpi na maññeyya, tatopi na maññeyya, taṃ meti na maññeyya. So evaṃ amaññamāno na kiñci loke upādiyati. Anupādiyaṃ na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Aṭṭhamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೭-೮. ಪಠಮಏಜಾಸುತ್ತಾದಿವಣ್ಣನಾ • 7-8. Paṭhamaejāsuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೭-೮. ಪಠಮಏಜಾಸುತ್ತಾದಿವಣ್ಣನಾ • 7-8. Paṭhamaejāsuttādivaṇṇanā
