| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. து³தியஹத்த²கஸுத்தவண்ணனா
4. Dutiyahatthakasuttavaṇṇanā
24. சதுத்தே² பஞ்சமத்தேஹி உபாஸகஸதேஹீதி ஸோதாபன்னஸகதா³கா³மீனங்யேவ அரியஸாவகஉபாஸகானங் பஞ்சஹி ஸதேஹி பரிவுதோ பு⁴த்தபாதராஸோ க³ந்த⁴மாலவிலேபேனசுண்ணானி க³ஹெத்வா யேன ப⁴க³வா தேனுபஸங்கமி. ஸங்க³ஹவத்தூ²னீதி ஸங்க³ண்ஹனகாரணானி. தேஹாஹந்தி தேஹி அஹங். தங் தா³னேன ஸங்க³ண்ஹாமீதி நங்க³லப³லிப³த்³த³ப⁴த்தபீ³ஜாதீ³னி சேவ க³ந்த⁴மாலமூலாதீ³னி ச த³த்வா ஸங்க³ண்ஹாமி. பெய்யவஜ்ஜேனாதி அம்ம, தாத, பா⁴தர, ப⁴கி³னீதிஆதி³கேன கண்ணஸுகே²ன முது³கேன பியவசனேன ஸங்க³ண்ஹாமி. அத்த²சரியாயாதி ‘‘இமஸ்ஸ தா³னேன வா பியவசனேன வா கிச்சங் நத்தி², அத்த²சரியாய ஸங்க³ண்ஹிதப்³ப³யுத்தகோ அய’’ந்தி ஞத்வா உப்பன்னகிச்சனித்த²ரணஸங்கா²தாய அத்த²சரியாய ஸங்க³ண்ஹாமி. ஸமானத்ததாயாதி ‘‘இமஸ்ஸ தா³னாதீ³ஹி கிச்சங் நத்தி², ஸமானத்ததாய ஸங்க³ண்ஹிதப்³போ³ அய’’ந்தி ஏகதோ கா²த³னபிவனநிஸஜ்ஜாதீ³ஹி அத்தனா ஸமானங் கத்வா ஸங்க³ண்ஹாமி. த³லித்³த³ஸ்ஸ கோ² நோ ததா² ஸோதப்³ப³ங் மஞ்ஞந்தீதி த³லித்³த³ஸ்ஸ கிஞ்சி தா³துங் வா காதுங் வா அஸக்கொந்தஸ்ஸ, யதா² த³லித்³த³ஸ்ஸ நோ ததா² ஸோதப்³ப³ங் மஞ்ஞந்தி, மம பன ஸோதப்³ப³ங் மஞ்ஞந்தி, தி³ன்னோவாதே³ திட்ட²ந்தி, ந மே அனுஸாஸனிங் அதிக்கமிதப்³ப³ங் மஞ்ஞந்தி. யோனி கோ² த்யாயந்தி உபாயோ கோ² தே அயங். இமேஸு பன த்³வீஸுபி ஸுத்தேஸு ஸத்தா²ரா ஸீலசாக³பஞ்ஞா மிஸ்ஸகா கதி²தாதி வேதி³தப்³பா³.
24. Catutthe pañcamattehi upāsakasatehīti sotāpannasakadāgāmīnaṃyeva ariyasāvakaupāsakānaṃ pañcahi satehi parivuto bhuttapātarāso gandhamālavilepenacuṇṇāni gahetvā yena bhagavā tenupasaṅkami. Saṅgahavatthūnīti saṅgaṇhanakāraṇāni. Tehāhanti tehi ahaṃ. Taṃ dānena saṅgaṇhāmīti naṅgalabalibaddabhattabījādīni ceva gandhamālamūlādīni ca datvā saṅgaṇhāmi. Peyyavajjenāti amma, tāta, bhātara, bhaginītiādikena kaṇṇasukhena mudukena piyavacanena saṅgaṇhāmi. Atthacariyāyāti ‘‘imassa dānena vā piyavacanena vā kiccaṃ natthi, atthacariyāya saṅgaṇhitabbayuttako aya’’nti ñatvā uppannakiccanittharaṇasaṅkhātāya atthacariyāya saṅgaṇhāmi. Samānattatāyāti ‘‘imassa dānādīhi kiccaṃ natthi, samānattatāya saṅgaṇhitabbo aya’’nti ekato khādanapivananisajjādīhi attanā samānaṃ katvā saṅgaṇhāmi. Daliddassa kho no tathā sotabbaṃ maññantīti daliddassa kiñci dātuṃ vā kātuṃ vā asakkontassa, yathā daliddassa no tathā sotabbaṃ maññanti, mama pana sotabbaṃ maññanti, dinnovāde tiṭṭhanti, na me anusāsaniṃ atikkamitabbaṃ maññanti. Yoni kho tyāyanti upāyo kho te ayaṃ. Imesu pana dvīsupi suttesu satthārā sīlacāgapaññā missakā kathitāti veditabbā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. து³தியஹத்த²கஸுத்தங் • 4. Dutiyahatthakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-7. பட²மஉக்³க³ஸுத்தாதி³வண்ணனா • 1-7. Paṭhamauggasuttādivaṇṇanā
