| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೧೦. ದುತಿಯಹತ್ಥಪಾದೋಪಮಸುತ್ತಂ
10. Dutiyahatthapādopamasuttaṃ
೨೩೭. ‘‘ಹತ್ಥೇಸು, ಭಿಕ್ಖವೇ, ಸತಿ ಆದಾನನಿಕ್ಖೇಪನಂ ಹೋತಿ; ಪಾದೇಸು ಸತಿ ಅಭಿಕ್ಕಮಪಟಿಕ್ಕಮೋ ಹೋತಿ; ಪಬ್ಬೇಸು ಸತಿ ಸಮಿಞ್ಜನಪಸಾರಣಂ ಹೋತಿ; ಕುಚ್ಛಿಸ್ಮಿಂ ಸತಿ ಜಿಘಚ್ಛಾ ಪಿಪಾಸಾ ಹೋತಿ। ಏವಮೇವ ಖೋ, ಭಿಕ್ಖವೇ, ಚಕ್ಖುಸ್ಮಿಂ ಸತಿ ಚಕ್ಖುಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ಅಜ್ಝತ್ತಂ ಸುಖಂ ದುಕ್ಖಂ…ಪೇ॰… ಜಿವ್ಹಾಯ ಸತಿ…ಪೇ॰… ಮನಸ್ಮಿಂ ಸತಿ ಮನೋಸಮ್ಫಸ್ಸಪಚ್ಚಯಾ ಉಪ್ಪಜ್ಜತಿ ಅಜ್ಝತ್ತಂ ಸುಖಂ ದುಕ್ಖಂ…ಪೇ॰…।
237. ‘‘Hatthesu, bhikkhave, sati ādānanikkhepanaṃ hoti; pādesu sati abhikkamapaṭikkamo hoti; pabbesu sati samiñjanapasāraṇaṃ hoti; kucchismiṃ sati jighacchā pipāsā hoti. Evameva kho, bhikkhave, cakkhusmiṃ sati cakkhusamphassapaccayā uppajjati ajjhattaṃ sukhaṃ dukkhaṃ…pe… jivhāya sati…pe… manasmiṃ sati manosamphassapaccayā uppajjati ajjhattaṃ sukhaṃ dukkhaṃ…pe….
‘‘ಹತ್ಥೇಸು, ಭಿಕ್ಖವೇ, ಅಸತಿ ಆದಾನನಿಕ್ಖೇಪನಂ ನ ಹೋತಿ; ಪಾದೇಸು ಅಸತಿ ಅಭಿಕ್ಕಮಪಟಿಕ್ಕಮೋ ನ ಹೋತಿ; ಪಬ್ಬೇಸು ಅಸತಿ ಸಮಿಞ್ಜನಪಸಾರಣಂ ನ ಹೋತಿ; ಕುಚ್ಛಿಸ್ಮಿಂ ಅಸತಿ ಜಿಘಚ್ಛಾ ಪಿಪಾಸಾ ನ ಹೋತಿ। ಏವಮೇವ ಖೋ, ಭಿಕ್ಖವೇ, ಚಕ್ಖುಸ್ಮಿಂ ಅಸತಿ ಚಕ್ಖುಸಮ್ಫಸ್ಸಪಚ್ಚಯಾ ನುಪ್ಪಜ್ಜತಿ ಅಜ್ಝತ್ತಂ ಸುಖಂ ದುಕ್ಖಂ…ಪೇ॰… ಜಿವ್ಹಾಯ ಅಸತಿ ಜಿವ್ಹಾಸಮ್ಫಸ್ಸಪಚ್ಚಯಾ ನುಪ್ಪಜ್ಜತಿ…ಪೇ॰… ಮನಸ್ಮಿಂ ಅಸತಿ ಮನೋಸಮ್ಫಸ್ಸಪಚ್ಚಯಾ ನುಪ್ಪಜ್ಜತಿ ಅಜ್ಝತ್ತಂ ಸುಖಂ ದುಕ್ಖ’’ನ್ತಿ। ದಸಮಂ।
‘‘Hatthesu, bhikkhave, asati ādānanikkhepanaṃ na hoti; pādesu asati abhikkamapaṭikkamo na hoti; pabbesu asati samiñjanapasāraṇaṃ na hoti; kucchismiṃ asati jighacchā pipāsā na hoti. Evameva kho, bhikkhave, cakkhusmiṃ asati cakkhusamphassapaccayā nuppajjati ajjhattaṃ sukhaṃ dukkhaṃ…pe… jivhāya asati jivhāsamphassapaccayā nuppajjati…pe… manasmiṃ asati manosamphassapaccayā nuppajjati ajjhattaṃ sukhaṃ dukkha’’nti. Dasamaṃ.
ಸಮುದ್ದವಗ್ಗೋ ಅಟ್ಠರಸಮೋ।
Samuddavaggo aṭṭharasamo.
ತಸ್ಸುದ್ದಾನಂ –
Tassuddānaṃ –
ದ್ವೇ ಸಮುದ್ದಾ ಬಾಳಿಸಿಕೋ, ಖೀರರುಕ್ಖೇನ ಕೋಟ್ಠಿಕೋ।
Dve samuddā bāḷisiko, khīrarukkhena koṭṭhiko;
ಕಾಮಭೂ ಉದಾಯೀ ಚೇವ, ಆದಿತ್ತೇನ ಚ ಅಟ್ಠಮಂ।
Kāmabhū udāyī ceva, ādittena ca aṭṭhamaṃ;
ಹತ್ಥಪಾದೂಪಮಾ ದ್ವೇತಿ, ವಗ್ಗೋ ತೇನ ಪವುಚ್ಚತೀತಿ॥
Hatthapādūpamā dveti, vaggo tena pavuccatīti.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೯-೧೦. ಪಠಮಹತ್ಥಪಾದೋಪಮಸುತ್ತಾದಿವಣ್ಣನಾ • 9-10. Paṭhamahatthapādopamasuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೯-೧೦. ಪಠಮಹತ್ಥಪಾದೋಪಮಸುತ್ತಾದಿವಣ್ಣನಾ • 9-10. Paṭhamahatthapādopamasuttādivaṇṇanā
