| Library / Tipiṭaka / д̇ибидага • Tipiṭaka / сам̣яуд̇д̇анигааяа • Saṃyuttanikāya |
3. д̣̇уд̇ияаисид̣̇ад̇д̇асуд̇д̇ам̣
3. Dutiyaisidattasuttaṃ
345. згам̣ самаяам̣ самб̣ахулаа т̇зраа бхигкуу мажчигаасан̣д̣з вихаранд̇и амб̣аадагаванз. ат̇а ко жид̇д̇о г̇ахабад̇и язна т̇зраа бхигкуу д̇знубасан̇гами; убасан̇гамид̇ваа т̇зрз бхигкуу абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисинно ко жид̇д̇о г̇ахабад̇и т̇зрз бхигкуу зд̇ад̣̇авожа – ‘‘ад̇хиваасзнд̇у мз, бханд̇з т̇зраа, сваад̇анааяа бхад̇д̇а’’нд̇и. ад̇хиваасзсум̣ ко т̇зраа бхигкуу д̇ун̣хийбхаавзна. ат̇а ко жид̇д̇о г̇ахабад̇и т̇зраанам̣ бхигкуунам̣ ад̇хиваасанам̣ вид̣̇ид̇ваа удтааяаасанаа т̇зрз бхигкуу абхиваад̣̇зд̇ваа бад̣̇агкин̣ам̣ гад̇ваа баггаами. ат̇а ко т̇зраа бхигкуу д̇ассаа рад̇д̇ияаа ажжаязна буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа язна жид̇д̇асса г̇ахабад̇исса нивзсанам̣ д̇знубасан̇гамим̣су; убасан̇гамид̇ваа бан̃н̃ад̇д̇з аасанз нисийд̣̇им̣су.
345. Ekaṃ samayaṃ sambahulā therā bhikkhū macchikāsaṇḍe viharanti ambāṭakavane. Atha kho citto gahapati yena therā bhikkhū tenupasaṅkami; upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinno kho citto gahapati there bhikkhū etadavoca – ‘‘adhivāsentu me, bhante therā, svātanāya bhatta’’nti. Adhivāsesuṃ kho therā bhikkhū tuṇhībhāvena. Atha kho citto gahapati therānaṃ bhikkhūnaṃ adhivāsanaṃ viditvā uṭṭhāyāsanā there bhikkhū abhivādetvā padakkhiṇaṃ katvā pakkāmi. Atha kho therā bhikkhū tassā rattiyā accayena pubbaṇhasamayaṃ nivāsetvā pattacīvaramādāya yena cittassa gahapatissa nivesanaṃ tenupasaṅkamiṃsu; upasaṅkamitvā paññatte āsane nisīdiṃsu.
ат̇а ко жид̇д̇о г̇ахабад̇и язна т̇зраа бхигкуу д̇знубасан̇гами; убасан̇гамид̇ваа т̇зрз бхигкуу абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисинно ко жид̇д̇о г̇ахабад̇и ааяасманд̇ам̣ т̇зрам̣ зд̇ад̣̇авожа – ‘‘яаа имаа, бханд̇з т̇зра, анзгавихид̇аа д̣̇идтияо логз уббаж̇ж̇анд̇и – ‘сассад̇о логод̇и ваа, асассад̇о логод̇и ваа, анд̇аваа логод̇и ваа, ананд̇аваа логод̇и ваа, д̇ам̣ ж̇ийвам̣ д̇ам̣ сарийранд̇и ваа, ан̃н̃ам̣ ж̇ийвам̣ ан̃н̃ам̣ сарийранд̇и ваа, ход̇и д̇ат̇ааг̇ад̇о барам̣ маран̣аад̇и ваа, на ход̇и д̇ат̇ааг̇ад̇о барам̣ маран̣аад̇и ваа, ход̇и жа на жа ход̇и д̇ат̇ааг̇ад̇о барам̣ маран̣аад̇и ваа, нзва ход̇и на на ход̇и д̇ат̇ааг̇ад̇о барам̣ маран̣аа’д̇и ваа. яаани жимаани д̣̇ваасадти д̣̇идтиг̇ад̇аани б̣рахмаж̇аалз бхан̣ид̇аани; имаа ну ко, бханд̇з, д̣̇идтияо гисмим̣ сад̇и хонд̇и, гисмим̣ асад̇и на хонд̇ий’’д̇и?
Atha kho citto gahapati yena therā bhikkhū tenupasaṅkami; upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinno kho citto gahapati āyasmantaṃ theraṃ etadavoca – ‘‘yā imā, bhante thera, anekavihitā diṭṭhiyo loke uppajjanti – ‘sassato lokoti vā, asassato lokoti vā, antavā lokoti vā, anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato paraṃ maraṇāti vā, na hoti tathāgato paraṃ maraṇāti vā, hoti ca na ca hoti tathāgato paraṃ maraṇāti vā, neva hoti na na hoti tathāgato paraṃ maraṇā’ti vā. Yāni cimāni dvāsaṭṭhi diṭṭhigatāni brahmajāle bhaṇitāni; imā nu kho, bhante, diṭṭhiyo kismiṃ sati honti, kismiṃ asati na hontī’’ti?
звам̣ вуд̇д̇з, ааяасмаа т̇зро д̇ун̣хий ахоси. д̣̇уд̇ияамби ко жид̇д̇о г̇ахабад̇и…бз… д̇ад̇ияамби ко жид̇д̇о г̇ахабад̇и ааяасманд̇ам̣ т̇зрам̣ зд̇ад̣̇авожа – ‘‘яаа имаа, бханд̇з т̇зра, анзгавихид̇аа д̣̇идтияо логз уббаж̇ж̇анд̇и – сассад̇о логод̇и ваа, асассад̇о логод̇и ваа, анд̇аваа логод̇и ваа, ананд̇аваа логод̇и ваа, д̇ам̣ ж̇ийвам̣ д̇ам̣ сарийранд̇и ваа, ан̃н̃ам̣ ж̇ийвам̣ ан̃н̃ам̣ сарийранд̇и ваа, ход̇и д̇ат̇ааг̇ад̇о барам̣ маран̣аад̇и ваа, на ход̇и д̇ат̇ааг̇ад̇о барам̣ маран̣аад̇и ваа, ход̇и жа на жа ход̇и д̇ат̇ааг̇ад̇о барам̣ маран̣аад̇и ваа, нзва ход̇и на на ход̇и д̇ат̇ааг̇ад̇о барам̣ маран̣аад̇и ваа. яаани жимаани д̣̇ваасадти д̣̇идтиг̇ад̇аани б̣рахмаж̇аалз бхан̣ид̇аани; имаа ну ко, бханд̇з, д̣̇идтияо гисмим̣ сад̇и хонд̇и, гисмим̣ асад̇и на хонд̇ий’’д̇и? д̇ад̇ияамби ко ааяасмаа т̇зро д̇ун̣хий ахоси.
Evaṃ vutte, āyasmā thero tuṇhī ahosi. Dutiyampi kho citto gahapati…pe… tatiyampi kho citto gahapati āyasmantaṃ theraṃ etadavoca – ‘‘yā imā, bhante thera, anekavihitā diṭṭhiyo loke uppajjanti – sassato lokoti vā, asassato lokoti vā, antavā lokoti vā, anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato paraṃ maraṇāti vā, na hoti tathāgato paraṃ maraṇāti vā, hoti ca na ca hoti tathāgato paraṃ maraṇāti vā, neva hoti na na hoti tathāgato paraṃ maraṇāti vā. Yāni cimāni dvāsaṭṭhi diṭṭhigatāni brahmajāle bhaṇitāni; imā nu kho, bhante, diṭṭhiyo kismiṃ sati honti, kismiṃ asati na hontī’’ti? Tatiyampi kho āyasmā thero tuṇhī ahosi.
д̇зна ко бана самаязна ааяасмаа исид̣̇ад̇д̇о д̇асмим̣ бхигкусан̇гхз саб̣б̣анаваго ход̇и. ат̇а ко ааяасмаа исид̣̇ад̇д̇о ааяасманд̇ам̣ т̇зрам̣ зд̇ад̣̇авожа – ‘‘б̣яаагаромахам̣, бханд̇з т̇зра, жид̇д̇асса г̇ахабад̇ино зд̇ам̣ бан̃ха’’нд̇и? ‘‘б̣яаагарохи д̇вам̣, аавусо исид̣̇ад̇д̇а, жид̇д̇асса г̇ахабад̇ино зд̇ам̣ бан̃ха’’нд̇и. ‘‘зван̃хи д̇вам̣, г̇ахабад̇и, бужчаси – ‘яаа имаа, бханд̇з т̇зра, анзгавихид̇аа д̣̇идтияо логз уббаж̇ж̇анд̇и – сассад̇о логод̇и ваа…бз…; имаа ну ко, бханд̇з, д̣̇идтияо гисмим̣ сад̇и хонд̇и, гисмим̣ асад̇и на хонд̇ий’’’д̇и? ‘‘звам̣, бханд̇з’’. ‘‘яаа имаа, г̇ахабад̇и, анзгавихид̇аа д̣̇идтияо логз уббаж̇ж̇анд̇и – ‘сассад̇о логод̇и ваа, асассад̇о логод̇и ваа, анд̇аваа логод̇и ваа ананд̇аваа логод̇и ваа, д̇ам̣ ж̇ийвам̣ д̇ам̣ сарийранд̇и ваа, ан̃н̃ам̣ ж̇ийвам̣ ан̃н̃ам̣ сарийранд̇и ваа, ход̇и д̇ат̇ааг̇ад̇о барам̣ маран̣аад̇и ваа, на ход̇и д̇ат̇ааг̇ад̇о барам̣ маран̣аад̇и ваа, ход̇и жа на жа ход̇и д̇ат̇ааг̇ад̇о барам̣ маран̣аад̇и ваа, нзва ход̇и на на ход̇и д̇ат̇ааг̇ад̇о барам̣ маран̣аад̇и ваа. яаани жимаани д̣̇ваасадти д̣̇идтиг̇ад̇аани б̣рахмаж̇аалз бхан̣ид̇аани; имаа ко, г̇ахабад̇и, д̣̇идтияо саггааяад̣̇идтияаа сад̇и хонд̇и, саггааяад̣̇идтияаа асад̇и на хонд̇ий’’’д̇и.
Tena kho pana samayena āyasmā isidatto tasmiṃ bhikkhusaṅghe sabbanavako hoti. Atha kho āyasmā isidatto āyasmantaṃ theraṃ etadavoca – ‘‘byākaromahaṃ, bhante thera, cittassa gahapatino etaṃ pañha’’nti? ‘‘Byākarohi tvaṃ, āvuso isidatta, cittassa gahapatino etaṃ pañha’’nti. ‘‘Evañhi tvaṃ, gahapati, pucchasi – ‘yā imā, bhante thera, anekavihitā diṭṭhiyo loke uppajjanti – sassato lokoti vā…pe…; imā nu kho, bhante, diṭṭhiyo kismiṃ sati honti, kismiṃ asati na hontī’’’ti? ‘‘Evaṃ, bhante’’. ‘‘Yā imā, gahapati, anekavihitā diṭṭhiyo loke uppajjanti – ‘sassato lokoti vā, asassato lokoti vā, antavā lokoti vā anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato paraṃ maraṇāti vā, na hoti tathāgato paraṃ maraṇāti vā, hoti ca na ca hoti tathāgato paraṃ maraṇāti vā, neva hoti na na hoti tathāgato paraṃ maraṇāti vā. Yāni cimāni dvāsaṭṭhi diṭṭhigatāni brahmajāle bhaṇitāni; imā kho, gahapati, diṭṭhiyo sakkāyadiṭṭhiyā sati honti, sakkāyadiṭṭhiyā asati na hontī’’’ti.
‘‘гат̇ам̣ бана, бханд̇з, саггааяад̣̇идти ход̇ий’’д̇и? ‘‘ид̇ха, г̇ахабад̇и, ассуд̇аваа бут̇уж̇ж̇ано арияаанам̣ ад̣̇ассаавий арияад̇хаммасса аговид̣̇о арияад̇хаммз авинийд̇о, саббурисаанам̣ ад̣̇ассаавий саббурисад̇хаммасса аговид̣̇о саббурисад̇хаммз авинийд̇о руубам̣ ад̇д̇ад̇о саманубассад̇и, руубаванд̇ам̣ ваа ад̇д̇аанам̣, ад̇д̇ани ваа руубам̣, руубасмим̣ ваа ад̇д̇аанам̣; взд̣̇анам̣ ад̇д̇ад̇о саманубассад̇и…бз… сан̃н̃ам̣… сан̇каарз… вин̃н̃аан̣ам̣ ад̇д̇ад̇о саманубассад̇и, вин̃н̃аан̣аванд̇ам̣ ваа ад̇д̇аанам̣, ад̇д̇ани ваа вин̃н̃аан̣ам̣, вин̃н̃аан̣асмим̣ ваа ад̇д̇аанам̣. звам̣ ко, г̇ахабад̇и, саггааяад̣̇идти ход̇ий’’д̇и.
‘‘Kathaṃ pana, bhante, sakkāyadiṭṭhi hotī’’ti? ‘‘Idha, gahapati, assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati, rūpavantaṃ vā attānaṃ, attani vā rūpaṃ, rūpasmiṃ vā attānaṃ; vedanaṃ attato samanupassati…pe… saññaṃ… saṅkhāre… viññāṇaṃ attato samanupassati, viññāṇavantaṃ vā attānaṃ, attani vā viññāṇaṃ, viññāṇasmiṃ vā attānaṃ. Evaṃ kho, gahapati, sakkāyadiṭṭhi hotī’’ti.
‘‘гат̇ам̣ бана, бханд̇з, саггааяад̣̇идти на ход̇ий’’д̇и? ‘‘ид̇ха, г̇ахабад̇и, суд̇аваа арияасааваго арияаанам̣ д̣̇ассаавий арияад̇хаммасса говид̣̇о арияад̇хаммз сувинийд̇о саббурисаанам̣ д̣̇ассаавий саббурисад̇хаммасса говид̣̇о саббурисад̇хаммз сувинийд̇о на руубам̣ ад̇д̇ад̇о саманубассад̇и, на руубаванд̇ам̣ ваа ад̇д̇аанам̣, на ад̇д̇ани ваа руубам̣, на руубасмим̣ ваа ад̇д̇аанам̣; на взд̣̇анам̣… на сан̃н̃ам̣… на сан̇каарз… на вин̃н̃аан̣ам̣ ад̇д̇ад̇о саманубассад̇и, на вин̃н̃аан̣аванд̇ам̣ ваа ад̇д̇аанам̣, на ад̇д̇ани ваа вин̃н̃аан̣ам̣, на вин̃н̃аан̣асмим̣ ваа ад̇д̇аанам̣. звам̣ ко, г̇ахабад̇и, саггааяад̣̇идти на ход̇ий’’д̇и.
‘‘Kathaṃ pana, bhante, sakkāyadiṭṭhi na hotī’’ti? ‘‘Idha, gahapati, sutavā ariyasāvako ariyānaṃ dassāvī ariyadhammassa kovido ariyadhamme suvinīto sappurisānaṃ dassāvī sappurisadhammassa kovido sappurisadhamme suvinīto na rūpaṃ attato samanupassati, na rūpavantaṃ vā attānaṃ, na attani vā rūpaṃ, na rūpasmiṃ vā attānaṃ; na vedanaṃ… na saññaṃ… na saṅkhāre… na viññāṇaṃ attato samanupassati, na viññāṇavantaṃ vā attānaṃ, na attani vā viññāṇaṃ, na viññāṇasmiṃ vā attānaṃ. Evaṃ kho, gahapati, sakkāyadiṭṭhi na hotī’’ti.
‘‘гуд̇о , бханд̇з, аяяо исид̣̇ад̇д̇о ааг̇ажчад̇ий’’д̇и? ‘‘аванд̇ияаа ко, г̇ахабад̇и, ааг̇ажчаамий’’д̇и. ‘‘ад̇т̇и, бханд̇з, аванд̇ияаа исид̣̇ад̇д̇о наама гулабуд̇д̇о амхаагам̣ ад̣̇идтасахааяо баб̣б̣аж̇ид̇о? д̣̇идто со ааяасмад̇аа’’д̇и? ‘‘звам̣, г̇ахабад̇ий’’д̇и. ‘‘гахам̣ ну ко со, бханд̇з, ааяасмаа зд̇арахи вихарад̇ий’’д̇и? звам̣ вуд̇д̇з, ааяасмаа исид̣̇ад̇д̇о д̇ун̣хий ахоси. ‘‘аяяо но, бханд̇з, исид̣̇ад̇д̇о’’д̇и? ‘‘звам̣, г̇ахабад̇ий’’д̇и. ‘‘абхирамад̇у, бханд̇з, аяяо исид̣̇ад̇д̇о мажчигаасан̣д̣з. раман̣ийяам̣ амб̣аадагаванам̣. ахам̣ аяяасса исид̣̇ад̇д̇асса уссуггам̣ гариссаами жийварабин̣д̣абаад̇асзнаасанаг̇илаанаббажжаяабхзсаж̇ж̇абаригкаараана’’нд̇и. ‘‘галяаан̣ам̣ вужжад̇и, г̇ахабад̇ий’’д̇и.
‘‘Kuto , bhante, ayyo isidatto āgacchatī’’ti? ‘‘Avantiyā kho, gahapati, āgacchāmī’’ti. ‘‘Atthi, bhante, avantiyā isidatto nāma kulaputto amhākaṃ adiṭṭhasahāyo pabbajito? Diṭṭho so āyasmatā’’ti? ‘‘Evaṃ, gahapatī’’ti. ‘‘Kahaṃ nu kho so, bhante, āyasmā etarahi viharatī’’ti? Evaṃ vutte, āyasmā isidatto tuṇhī ahosi. ‘‘Ayyo no, bhante, isidatto’’ti? ‘‘Evaṃ, gahapatī’’ti. ‘‘Abhiramatu, bhante, ayyo isidatto macchikāsaṇḍe. Ramaṇīyaṃ ambāṭakavanaṃ. Ahaṃ ayyassa isidattassa ussukkaṃ karissāmi cīvarapiṇḍapātasenāsanagilānappaccayabhesajjaparikkhārāna’’nti. ‘‘Kalyāṇaṃ vuccati, gahapatī’’ti.
ат̇а ко жид̇д̇о г̇ахабад̇и ааяасмад̇о исид̣̇ад̇д̇асса бхаасид̇ам̣ абхинанд̣̇ид̇ваа анумод̣̇ид̇ваа т̇зрз бхигкуу бан̣ийд̇зна каад̣̇анийязна бхож̇анийязна сахад̇т̇аа санд̇аббзси самбаваарзси. ат̇а ко т̇зраа бхигкуу бхуд̇д̇аавино онийд̇абад̇д̇абаан̣ино удтааяаасанаа баггамим̣су. ат̇а ко ааяасмаа т̇зро ааяасманд̇ам̣ исид̣̇ад̇д̇ам̣ зд̇ад̣̇авожа – ‘‘саад̇ху ко д̇ам̣, аавусо исид̣̇ад̇д̇а, зсо бан̃хо бадибхааси. нзсо бан̃хо мам̣ бадибхааси. д̇знахаавусо исид̣̇ад̇д̇а, яад̣̇аа ан̃н̃ат̇ааби зваруубо бан̃хо ааг̇ажчзяяа, д̇ан̃н̃звзд̇т̇а бадибхаасзяяаа’’д̇и. ат̇а ко ааяасмаа исид̣̇ад̇д̇о сзнаасанам̣ сам̣саамзд̇ваа бад̇д̇ажийварамаад̣̇ааяа мажчигаасан̣д̣амхаа баггаами. яам̣ мажчигаасан̣д̣амхаа баггаами, д̇ат̇аа багганд̇ова ахоси, на буна бажжааг̇ажчийд̇и. д̇ад̇ияам̣.
Atha kho citto gahapati āyasmato isidattassa bhāsitaṃ abhinanditvā anumoditvā there bhikkhū paṇītena khādanīyena bhojanīyena sahatthā santappesi sampavāresi. Atha kho therā bhikkhū bhuttāvino onītapattapāṇino uṭṭhāyāsanā pakkamiṃsu. Atha kho āyasmā thero āyasmantaṃ isidattaṃ etadavoca – ‘‘sādhu kho taṃ, āvuso isidatta, eso pañho paṭibhāsi. Neso pañho maṃ paṭibhāsi. Tenahāvuso isidatta, yadā aññathāpi evarūpo pañho āgaccheyya, taññevettha paṭibhāseyyā’’ti. Atha kho āyasmā isidatto senāsanaṃ saṃsāmetvā pattacīvaramādāya macchikāsaṇḍamhā pakkāmi. Yaṃ macchikāsaṇḍamhā pakkāmi, tathā pakkantova ahosi, na puna paccāgacchīti. Tatiyaṃ.
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 3. д̣̇уд̇ияаисид̣̇ад̇д̇асуд̇д̇аван̣н̣анаа • 3. Dutiyaisidattasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 3. д̣̇уд̇ияаисид̣̇ад̇д̇асуд̇д̇аван̣н̣анаа • 3. Dutiyaisidattasuttavaṇṇanā
