| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ဒုတိယမာရပာသသုတ္တံ
2. Dutiyamārapāsasuttaṃ
၁၁၅. ‘‘သန္တိ, ဘိက္ခဝေ, စက္ခုဝိညေယ္ယာ ရူပာ, ဣဋ္ဌာ ကန္တာ မနာပာ ပိယရူပာ ကာမူပသံဟိတာ ရဇနီယာ။ တဉ္စေ ဘိက္ခု အဘိနန္ဒတိ အဘိဝဒတိ အဇ္ဈောသာယ တိဋ္ဌတိ – အယံ ဝုစ္စတိ, ဘိက္ခဝေ, ဘိက္ခု ဗဒ္ဓော စက္ခုဝိညေယ္ယေသု ရူပေသု, အာဝာသဂတော မာရသ္သ, မာရသ္သ ဝသံ ဂတော, ပဋိမုက္ကသ္သ မာရပာသော။ ဗဒ္ဓော သော မာရဗန္ဓနေန ယထာကာမကရဏီယော ပာပိမတော။ပေ.။။
115. ‘‘Santi, bhikkhave, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati – ayaṃ vuccati, bhikkhave, bhikkhu baddho cakkhuviññeyyesu rūpesu, āvāsagato mārassa, mārassa vasaṃ gato, paṭimukkassa mārapāso. Baddho so mārabandhanena yathākāmakaraṇīyo pāpimato…pe….
‘‘သန္တိ, ဘိက္ခဝေ, ဇိဝ္ဟာဝိညေယ္ယာ ရသာ။ပေ.။ သန္တိ, ဘိက္ခဝေ, မနောဝိညေယ္ယာ ဓမ္မာ, ဣဋ္ဌာ ကန္တာ မနာပာ ပိယရူပာ ကာမူပသံဟိတာ ရဇနီယာ။ တဉ္စေ ဘိက္ခု အဘိနန္ဒတိ အဘိဝဒတိ အဇ္ဈောသာယ တိဋ္ဌတိ – အယံ ဝုစ္စတိ, ဘိက္ခဝေ, ဘိက္ခု ဗဒ္ဓော မနောဝိညေယ္ယေသု ဓမ္မေသု, အာဝာသဂတော မာရသ္သ, မာရသ္သ ဝသံ ဂတော, ပဋိမုက္ကသ္သ မာရပာသော။ ဗဒ္ဓော သော မာရဗန္ဓနေန ယထာကာမကရဏီယော ပာပိမတော။ပေ.။။
‘‘Santi, bhikkhave, jivhāviññeyyā rasā…pe… santi, bhikkhave, manoviññeyyā dhammā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati – ayaṃ vuccati, bhikkhave, bhikkhu baddho manoviññeyyesu dhammesu, āvāsagato mārassa, mārassa vasaṃ gato, paṭimukkassa mārapāso. Baddho so mārabandhanena yathākāmakaraṇīyo pāpimato…pe….
‘‘သန္တိ စ ခော, ဘိက္ခဝေ, စက္ခုဝိညေယ္ယာ ရူပာ, ဣဋ္ဌာ ကန္တာ မနာပာ ပိယရူပာ ကာမူပသံဟိတာ ရဇနီယာ။ တဉ္စေ ဘိက္ခု နာဘိနန္ဒတိ နာဘိဝဒတိ နာဇ္ဈောသာယ တိဋ္ဌတိ – အယံ ဝုစ္စတိ, ဘိက္ခဝေ , ဘိက္ခု မုတ္တော စက္ခုဝိညေယ္ယေဟိ ရူပေဟိ, နာဝာသဂတော မာရသ္သ, န မာရသ္သ ဝသံ ဂတော, ဥမ္မုက္ကသ္သ မာရပာသော။ မုတ္တော သော မာရဗန္ဓနေန န ယထာကာမကရဏီယော ပာပိမတော။ပေ.။။
‘‘Santi ca kho, bhikkhave, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati – ayaṃ vuccati, bhikkhave , bhikkhu mutto cakkhuviññeyyehi rūpehi, nāvāsagato mārassa, na mārassa vasaṃ gato, ummukkassa mārapāso. Mutto so mārabandhanena na yathākāmakaraṇīyo pāpimato…pe….
‘‘သန္တိ, ဘိက္ခဝေ, ဇိဝ္ဟာဝိညေယ္ယာ ရသာ။ပေ.။ သန္တိ, ဘိက္ခဝေ, မနောဝိညေယ္ယာ ဓမ္မာ, ဣဋ္ဌာ ကန္တာ မနာပာ ပိယရူပာ ကာမူပသံဟိတာ ရဇနီယာ။ တဉ္စေ ဘိက္ခု နာဘိနန္ဒတိ နာဘိဝဒတိ နာဇ္ဈောသာယ တိဋ္ဌတိ – အယံ ဝုစ္စတိ, ဘိက္ခဝေ, ဘိက္ခု မုတ္တော မနောဝိညေယ္ယေဟိ ဓမ္မေဟိ, နာဝာသဂတော မာရသ္သ, န မာရသ္သ ဝသံ ဂတော, ဥမ္မုက္ကသ္သ မာရပာသော။ မုတ္တော သော မာရဗန္ဓနေန န ယထာကာမကရဏီယော ပာပိမတော’’တိ။ ဒုတိယံ။
‘‘Santi, bhikkhave, jivhāviññeyyā rasā…pe… santi, bhikkhave, manoviññeyyā dhammā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati – ayaṃ vuccati, bhikkhave, bhikkhu mutto manoviññeyyehi dhammehi, nāvāsagato mārassa, na mārassa vasaṃ gato, ummukkassa mārapāso. Mutto so mārabandhanena na yathākāmakaraṇīyo pāpimato’’ti. Dutiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၂. ပဌမမာရပာသသုတ္တာဒိဝဏ္ဏနာ • 1-2. Paṭhamamārapāsasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁-၂. ပဌမမာရပာသသုတ္တာဒိဝဏ္ဏနာ • 1-2. Paṭhamamārapāsasuttādivaṇṇanā
