| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༡༠. དུཏིཡཔཛྫུནྣདྷཱིཏུསུཏྟཝཎྞནཱ
10. Dutiyapajjunnadhītusuttavaṇṇanā
༤༠. བུདྡྷཉྩ དྷམྨཉྩ ནམསྶམཱནཱཏི བུདྡྷསུབུདྡྷཏཾ དྷམྨསུདྷམྨཏཉྩ ཉཏྭཱ ཏདུབྷཡཾ ནམསྶམཱནཱ། ཡསྨཱ བུདྡྷེ ཙ དྷམྨེ ཙ པསནྣོ སངྒྷེ ཙ པསནྣོ ཨེཝ ཧོཏི ཏསྶ སུཔྤཊིཔཏྟིཡཱ ཝིཛཱནནཏོ, ཏསྨཱ སོ ཨཏྠོ གཱཐཱཡ ཙ-སདྡསངྒཧིཏོཏི དསྶེནྟོ ‘‘ཙ-སདྡེན སངྒྷཉྩཱ’’ཏི ཨཱཧ ཨཏྠཝཏིཡོཏི ལོཀིཡལོཀུཏྟརཨཏྠསངྒཧིཏཱ ལོཀིཡཀུསལལོཀུཏྟརམགྒསངྒཎྷནཏོ། ཡཾ དྷམྨཾ སཱ ཨབྷཱསཱིཏི ཡཾ ཏུམྷཱཀཾ དྷམྨཾ པཊིཝིཛ྄ཛྷིཏྭཱ ཋིཏཱ, སཱ མཧཱཀོཀནདཱ ཨཏྟནོ བལཱནུརཱུཔཾ ཨབྷཱསི། བཧུནཱཏི ནཱནཔྤཀཱརེན། པརིཡཱཡེནཱཏི ཀཱརཎེན། ཏཱདིསོཏི ཏཐཱརཱུཔོ ཏཐཱཔཊིཝིདྡྷསཙྩོ ཨཏྠདྷམྨཱདཱིསུ ཀུསལོ ཨེཀེཀཾ པདམྤི ཨུདཱཧརཎཧེཏུནིགམནཱནི ནཱིཧརནྟོ ཨཱཙིཀྑཏི དེསེཏི པཉྙཔེཏི པཋཔེཏི ཝིཝརཏི ཝིབྷཛཏི ཨུཏྟཱནཱིཀརོཏི། ཏེནཱཧ ‘‘ཨཡཾ བྷགཝཱ’’ཏིཨཱདི། ཨེཏེན ཨཏིཝིཡ ཝིཏྠཱརཀྑམོ སུགཏདྷམྨོཏི དསྶེཏི། པརིཡཱཔུཊནྟི པརིཝཏྟིཏཾ། ཨེཝཾ ཝིཏྠཱརཀྑམཾ དྷམྨཾ ཡསྨཱ དེཝདྷཱིཏཱ ‘‘སཾཁིཏྟམཏྠཾ ལཔཡིསྶཱམཱི’’ཏི ཨཝོཙ, ཏསྨཱ ཝུཏྟཾ ‘‘ཏསྶཏྠ’’ནྟིཨཱདི།
40.Buddhañcadhammañca namassamānāti buddhasubuddhataṃ dhammasudhammatañca ñatvā tadubhayaṃ namassamānā. Yasmā buddhe ca dhamme ca pasanno saṅghe ca pasanno eva hoti tassa suppaṭipattiyā vijānanato, tasmā so attho gāthāya ca-saddasaṅgahitoti dassento ‘‘ca-saddena saṅghañcā’’ti āha atthavatiyoti lokiyalokuttaraatthasaṅgahitā lokiyakusalalokuttaramaggasaṅgaṇhanato. Yaṃ dhammaṃ sā abhāsīti yaṃ tumhākaṃ dhammaṃ paṭivijjhitvā ṭhitā, sā mahākokanadā attano balānurūpaṃ abhāsi. Bahunāti nānappakārena. Pariyāyenāti kāraṇena. Tādisoti tathārūpo tathāpaṭividdhasacco atthadhammādīsu kusalo ekekaṃ padampi udāharaṇahetunigamanāni nīharanto ācikkhati deseti paññapeti paṭhapeti vivarati vibhajati uttānīkaroti. Tenāha ‘‘ayaṃ bhagavā’’tiādi. Etena ativiya vitthārakkhamo sugatadhammoti dasseti. Pariyāpuṭanti parivattitaṃ. Evaṃ vitthārakkhamaṃ dhammaṃ yasmā devadhītā ‘‘saṃkhittamatthaṃ lapayissāmī’’ti avoca, tasmā vuttaṃ ‘‘tassattha’’ntiādi.
དུཏིཡཔཛྫུནྣདྷཱིཏུསུཏྟཝཎྞནཱ ནིཊྛིཏཱ།
Dutiyapajjunnadhītusuttavaṇṇanā niṭṭhitā.
སཏུལླཔཀཱཡིཀཝགྒཝཎྞནཱ ནིཊྛིཏཱ།
Satullapakāyikavaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡༠. དུཏིཡཔཛྫུནྣདྷཱིཏུསུཏྟཾ • 10. Dutiyapajjunnadhītusuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. དུཏིཡཔཛྫུནྣདྷཱིཏུསུཏྟཝཎྞནཱ • 10. Dutiyapajjunnadhītusuttavaṇṇanā
