| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૮. દુતિયપાપધમ્મસુત્તં
8. Dutiyapāpadhammasuttaṃ
૨૦૮. ‘‘પાપઞ્ચ વો, ભિક્ખવે, દેસેસ્સામિ, પાપેન પાપતરઞ્ચ; કલ્યાણઞ્ચ, કલ્યાણેન કલ્યાણતરઞ્ચ. તં સુણાથ, સાધુકં મનસિકરોથ; ભાસિસ્સામી’’તિ. એવં…પે॰… એતદવોચ –
208. ‘‘Pāpañca vo, bhikkhave, desessāmi, pāpena pāpatarañca; kalyāṇañca, kalyāṇena kalyāṇatarañca. Taṃ suṇātha, sādhukaṃ manasikarotha; bhāsissāmī’’ti. Evaṃ…pe… etadavoca –
‘‘કતમો ચ, ભિક્ખવે, પાપો? ઇધ, ભિક્ખવે, એકચ્ચો મિચ્છાદિટ્ઠિકો હોતિ…પે॰… મિચ્છાઞાણી હોતિ, મિચ્છાવિમુત્તિ હોતિ. અયં વુચ્ચતિ, ભિક્ખવે, પાપો.
‘‘Katamo ca, bhikkhave, pāpo? Idha, bhikkhave, ekacco micchādiṭṭhiko hoti…pe… micchāñāṇī hoti, micchāvimutti hoti. Ayaṃ vuccati, bhikkhave, pāpo.
‘‘કતમો ચ, ભિક્ખવે, પાપેન પાપતરો? ઇધ, ભિક્ખવે, એકચ્ચો અત્તના ચ મિચ્છાદિટ્ઠિકો હોતિ, પરઞ્ચ મિચ્છાદિટ્ઠિયા સમાદપેતિ…પે॰… અત્તના ચ મિચ્છાઞાણી હોતિ, પરઞ્ચ મિચ્છાઞાણે સમાદપેતિ; અત્તના ચ મિચ્છાવિમુત્તિ હોતિ, પરઞ્ચ મિચ્છાવિમુત્તિયા સમાદપેતિ. અયં વુચ્ચતિ, ભિક્ખવે, પાપેન પાપતરો.
‘‘Katamo ca, bhikkhave, pāpena pāpataro? Idha, bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti…pe… attanā ca micchāñāṇī hoti, parañca micchāñāṇe samādapeti; attanā ca micchāvimutti hoti, parañca micchāvimuttiyā samādapeti. Ayaṃ vuccati, bhikkhave, pāpena pāpataro.
‘‘કતમો ચ, ભિક્ખવે, કલ્યાણો? ઇધ, ભિક્ખવે, એકચ્ચો સમ્માદિટ્ઠિકો હોતિ …પે॰… સમ્માઞાણી હોતિ, સમ્માવિમુત્તિ હોતિ. અયં વુચ્ચતિ, ભિક્ખવે, કલ્યાણો.
‘‘Katamo ca, bhikkhave, kalyāṇo? Idha, bhikkhave, ekacco sammādiṭṭhiko hoti …pe… sammāñāṇī hoti, sammāvimutti hoti. Ayaṃ vuccati, bhikkhave, kalyāṇo.
‘‘કતમો ચ, ભિક્ખવે, કલ્યાણેન કલ્યાણતરો? ઇધ, ભિક્ખવે, એકચ્ચો અત્તના ચ સમ્માદિટ્ઠિકો હોતિ, પરઞ્ચ સમ્માદિટ્ઠિયા સમાદપેતિ…પે॰… અત્તના ચ સમ્માઞાણી હોતિ , પરઞ્ચ સમ્માઞાણે સમાદપેતિ; અત્તના ચ સમ્માવિમુત્તિ હોતિ, પરઞ્ચ સમ્માવિમુત્તિયા સમાદપેતિ. અયં વુચ્ચતિ, ભિક્ખવે, કલ્યાણેન કલ્યાણતરો’’તિ. અટ્ઠમં.
‘‘Katamo ca, bhikkhave, kalyāṇena kalyāṇataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti…pe… attanā ca sammāñāṇī hoti , parañca sammāñāṇe samādapeti; attanā ca sammāvimutti hoti, parañca sammāvimuttiyā samādapeti. Ayaṃ vuccati, bhikkhave, kalyāṇena kalyāṇataro’’ti. Aṭṭhamaṃ.
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૭-૧૦. પાપધમ્મસુત્તચતુક્કવણ્ણના • 7-10. Pāpadhammasuttacatukkavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧-૧૦. સિક્ખાપદસુત્તાદિવણ્ણના • 1-10. Sikkhāpadasuttādivaṇṇanā
