| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೮. ದುತಿಯಪಾಪಧಮ್ಮಸುತ್ತಂ
8. Dutiyapāpadhammasuttaṃ
೨೦೮. ‘‘ಪಾಪಞ್ಚ ವೋ, ಭಿಕ್ಖವೇ, ದೇಸೇಸ್ಸಾಮಿ, ಪಾಪೇನ ಪಾಪತರಞ್ಚ; ಕಲ್ಯಾಣಞ್ಚ, ಕಲ್ಯಾಣೇನ ಕಲ್ಯಾಣತರಞ್ಚ। ತಂ ಸುಣಾಥ, ಸಾಧುಕಂ ಮನಸಿಕರೋಥ; ಭಾಸಿಸ್ಸಾಮೀ’’ತಿ। ಏವಂ…ಪೇ॰… ಏತದವೋಚ –
208. ‘‘Pāpañca vo, bhikkhave, desessāmi, pāpena pāpatarañca; kalyāṇañca, kalyāṇena kalyāṇatarañca. Taṃ suṇātha, sādhukaṃ manasikarotha; bhāsissāmī’’ti. Evaṃ…pe… etadavoca –
‘‘ಕತಮೋ ಚ, ಭಿಕ್ಖವೇ, ಪಾಪೋ? ಇಧ, ಭಿಕ್ಖವೇ, ಏಕಚ್ಚೋ ಮಿಚ್ಛಾದಿಟ್ಠಿಕೋ ಹೋತಿ…ಪೇ॰… ಮಿಚ್ಛಾಞಾಣೀ ಹೋತಿ, ಮಿಚ್ಛಾವಿಮುತ್ತಿ ಹೋತಿ। ಅಯಂ ವುಚ್ಚತಿ, ಭಿಕ್ಖವೇ, ಪಾಪೋ।
‘‘Katamo ca, bhikkhave, pāpo? Idha, bhikkhave, ekacco micchādiṭṭhiko hoti…pe… micchāñāṇī hoti, micchāvimutti hoti. Ayaṃ vuccati, bhikkhave, pāpo.
‘‘ಕತಮೋ ಚ, ಭಿಕ್ಖವೇ, ಪಾಪೇನ ಪಾಪತರೋ? ಇಧ, ಭಿಕ್ಖವೇ, ಏಕಚ್ಚೋ ಅತ್ತನಾ ಚ ಮಿಚ್ಛಾದಿಟ್ಠಿಕೋ ಹೋತಿ, ಪರಞ್ಚ ಮಿಚ್ಛಾದಿಟ್ಠಿಯಾ ಸಮಾದಪೇತಿ…ಪೇ॰… ಅತ್ತನಾ ಚ ಮಿಚ್ಛಾಞಾಣೀ ಹೋತಿ, ಪರಞ್ಚ ಮಿಚ್ಛಾಞಾಣೇ ಸಮಾದಪೇತಿ; ಅತ್ತನಾ ಚ ಮಿಚ್ಛಾವಿಮುತ್ತಿ ಹೋತಿ, ಪರಞ್ಚ ಮಿಚ್ಛಾವಿಮುತ್ತಿಯಾ ಸಮಾದಪೇತಿ। ಅಯಂ ವುಚ್ಚತಿ, ಭಿಕ್ಖವೇ, ಪಾಪೇನ ಪಾಪತರೋ।
‘‘Katamo ca, bhikkhave, pāpena pāpataro? Idha, bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti…pe… attanā ca micchāñāṇī hoti, parañca micchāñāṇe samādapeti; attanā ca micchāvimutti hoti, parañca micchāvimuttiyā samādapeti. Ayaṃ vuccati, bhikkhave, pāpena pāpataro.
‘‘ಕತಮೋ ಚ, ಭಿಕ್ಖವೇ, ಕಲ್ಯಾಣೋ? ಇಧ, ಭಿಕ್ಖವೇ, ಏಕಚ್ಚೋ ಸಮ್ಮಾದಿಟ್ಠಿಕೋ ಹೋತಿ …ಪೇ॰… ಸಮ್ಮಾಞಾಣೀ ಹೋತಿ, ಸಮ್ಮಾವಿಮುತ್ತಿ ಹೋತಿ। ಅಯಂ ವುಚ್ಚತಿ, ಭಿಕ್ಖವೇ, ಕಲ್ಯಾಣೋ।
‘‘Katamo ca, bhikkhave, kalyāṇo? Idha, bhikkhave, ekacco sammādiṭṭhiko hoti …pe… sammāñāṇī hoti, sammāvimutti hoti. Ayaṃ vuccati, bhikkhave, kalyāṇo.
‘‘ಕತಮೋ ಚ, ಭಿಕ್ಖವೇ, ಕಲ್ಯಾಣೇನ ಕಲ್ಯಾಣತರೋ? ಇಧ, ಭಿಕ್ಖವೇ, ಏಕಚ್ಚೋ ಅತ್ತನಾ ಚ ಸಮ್ಮಾದಿಟ್ಠಿಕೋ ಹೋತಿ, ಪರಞ್ಚ ಸಮ್ಮಾದಿಟ್ಠಿಯಾ ಸಮಾದಪೇತಿ…ಪೇ॰… ಅತ್ತನಾ ಚ ಸಮ್ಮಾಞಾಣೀ ಹೋತಿ , ಪರಞ್ಚ ಸಮ್ಮಾಞಾಣೇ ಸಮಾದಪೇತಿ; ಅತ್ತನಾ ಚ ಸಮ್ಮಾವಿಮುತ್ತಿ ಹೋತಿ, ಪರಞ್ಚ ಸಮ್ಮಾವಿಮುತ್ತಿಯಾ ಸಮಾದಪೇತಿ। ಅಯಂ ವುಚ್ಚತಿ, ಭಿಕ್ಖವೇ, ಕಲ್ಯಾಣೇನ ಕಲ್ಯಾಣತರೋ’’ತಿ। ಅಟ್ಠಮಂ।
‘‘Katamo ca, bhikkhave, kalyāṇena kalyāṇataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti…pe… attanā ca sammāñāṇī hoti , parañca sammāñāṇe samādapeti; attanā ca sammāvimutti hoti, parañca sammāvimuttiyā samādapeti. Ayaṃ vuccati, bhikkhave, kalyāṇena kalyāṇataro’’ti. Aṭṭhamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೭-೧೦. ಪಾಪಧಮ್ಮಸುತ್ತಚತುಕ್ಕವಣ್ಣನಾ • 7-10. Pāpadhammasuttacatukkavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೧೦. ಸಿಕ್ಖಾಪದಸುತ್ತಾದಿವಣ್ಣನಾ • 1-10. Sikkhāpadasuttādivaṇṇanā
