Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā

    2. து³தியபாராஜிகவண்ணனா

    2. Dutiyapārājikavaṇṇanā

    கா³மா வா அரஞ்ஞா வாதி லக்க²ணானுபஞ்ஞத்திகத்தா ஆதி³ம்ஹி வுத்தா. ஸப்³ப³ஸ்மிஞ்ஹி வினயபிடகே கா³மோ, கா³மூபசாரோ, கா³மக்கெ²த்தங், கா³மஸீமா, கா³மஸீமூபசாரோதி பஞ்சவிதோ⁴ கா³மபே⁴தோ³ வேதி³தப்³போ³. ததா² ஆரஞ்ஞகஸீமாய ஏகங் அகா³மகங் அரஞ்ஞங், ஸங்விதா⁴னஸிக்கா²பதா³னங் (பாசி॰ 180 ஆத³யோ) ஏகங், ஸகா³மகங் ஏகங் , அவிப்பவாஸஸீமாய ஏகங், க³ணம்ஹாஓஹீயனகஸ்ஸ (பாசி॰ 691) ஏகந்தி பஞ்சவிதோ⁴ அரஞ்ஞபே⁴தோ³ வேதி³தப்³போ³. தத்த² அத்தி² கா³மோ ந கா³மபரிஹாரங் கத்த²சி லப⁴தி, அத்தி² கா³மோ ந கா³மகிச்சங் கரோதி, ததா² அத்தி² அரஞ்ஞங் ந அரஞ்ஞபரிஹாரங் கத்த²சி லப⁴தி, அத்தி² அரஞ்ஞங் ந அரஞ்ஞகிச்சங் கரோதீதி அயம்பி பே⁴தோ³ வேதி³தப்³போ³.

    Gāmā vā araññā vāti lakkhaṇānupaññattikattā ādimhi vuttā. Sabbasmiñhi vinayapiṭake gāmo, gāmūpacāro, gāmakkhettaṃ, gāmasīmā, gāmasīmūpacāroti pañcavidho gāmabhedo veditabbo. Tathā āraññakasīmāya ekaṃ agāmakaṃ araññaṃ, saṃvidhānasikkhāpadānaṃ (pāci. 180 ādayo) ekaṃ, sagāmakaṃ ekaṃ , avippavāsasīmāya ekaṃ, gaṇamhāohīyanakassa (pāci. 691) ekanti pañcavidho araññabhedo veditabbo. Tattha atthi gāmo na gāmaparihāraṃ katthaci labhati, atthi gāmo na gāmakiccaṃ karoti, tathā atthi araññaṃ na araññaparihāraṃ katthaci labhati, atthi araññaṃ na araññakiccaṃ karotīti ayampi bhedo veditabbo.

    தத்த² அவிப்பவாஸஸீமாஸம்மன்னநகம்மவாசாய ட²பெத்வா ‘‘கா³மஞ்ச கா³மூபசாரஞ்சா’’தி (மஹாவ॰ 144) எத்த² கா³மோ நாம பரிக்கி²த்தோ சே, பரிக்கே²பஸ்ஸ அந்தோ, அபரிக்கி²த்தோ சே, பரிக்கே²போகாஸதோ அந்தோ வேதி³தப்³போ³. அயங் உதோ³ஸிதஸிக்கா²பதே³ ‘‘அந்தோகா³மோ’’தி (பாரா॰ 478) ஆக³தோ. ஸாஸங்கஸிக்கா²பதே³ ‘‘அந்தரக⁴ர’’ந்தி (பாரா॰ 654) ஆக³தோ அனாஸங்கதோ. யதா²ஹ ‘‘அந்தரக⁴ரே நிக்கி²பெய்யாதி ஸமந்தா கோ³சரகா³மே நிக்கி²பெய்யா’’தி (பாரா॰ 654). ததா² அந்தரக⁴ரப்படிஸங்யுத்தானங் ஸேகி²யானங் அயமேவ பரிச்சே²தோ³ வேதி³தப்³போ³. ‘‘யா பன பி⁴க்கு²னீ ஏகா கா³மந்தரங் க³ச்செ²ய்யா’’தி (பாசி॰ 687) எத்தா²பி அயமேவ பரிச்சே²தோ³ அதி⁴ப்பேதோ ‘‘பரிக்கி²த்தஸ்ஸ கா³மஸ்ஸ பரிக்கே²பங் அதிக்கமந்தியா, அபரிக்கி²த்தஸ்ஸ கா³மஸ்ஸ உபசாரங் அதிக்கமந்தியா’’தி வுத்தத்தா.

    Tattha avippavāsasīmāsammannanakammavācāya ṭhapetvā ‘‘gāmañca gāmūpacārañcā’’ti (mahāva. 144) ettha gāmo nāma parikkhitto ce, parikkhepassa anto, aparikkhitto ce, parikkhepokāsato anto veditabbo. Ayaṃ udositasikkhāpade ‘‘antogāmo’’ti (pārā. 478) āgato. Sāsaṅkasikkhāpade ‘‘antaraghara’’nti (pārā. 654) āgato anāsaṅkato. Yathāha ‘‘antaraghare nikkhipeyyāti samantā gocaragāme nikkhipeyyā’’ti (pārā. 654). Tathā antaragharappaṭisaṃyuttānaṃ sekhiyānaṃ ayameva paricchedo veditabbo. ‘‘Yā pana bhikkhunī ekā gāmantaraṃ gaccheyyā’’ti (pāci. 687) etthāpi ayameva paricchedo adhippeto ‘‘parikkhittassa gāmassa parikkhepaṃ atikkamantiyā, aparikkhittassa gāmassa upacāraṃ atikkamantiyā’’ti vuttattā.

    யேஸு புராணபொத்த²கேஸு ‘‘உபசாரங் ஓக்கமந்தியா’’தி லிகி²தங், தங் விகாலே கா³மப்பவேஸனஸிக்கா²பதே³ஸு ஆசிண்ணங் நயங் க³ஹெத்வா பமாதே³ன லிகீ²யதி, ந பமாணங். யேஸு ச பொத்த²கேஸு விகாலே கா³மப்பவேஸனஸிக்கா²பத³ஸ்ஸ விப⁴ங்கே³ (பாசி॰ 513) ‘‘கா³மங் பவிஸெய்யாதி பரிக்கி²த்தஸ்ஸ கா³மஸ்ஸ பரிக்கே²பங் அதிக்கமந்தஸ்ஸ, அபரிக்கி²த்தஸ்ஸ கா³மஸ்ஸ உபசாரங் அதிக்கமந்தஸ்ஸா’’தி லிகீ²யதி, ஸா பமாத³லேகா². உபசாரங் ஓக்கமந்தஸ்ஸாதி தத்த² பாடோ². வுத்தஞ்ஹி ஸமந்தபாஸாதி³காயங் ‘‘அபரிக்கி²த்தஸ்ஸ கா³மஸ்ஸ உபசாரோ அதி³ன்னாதா³னே வுத்தனயேனேவ வேதி³தப்³போ³’’தி (பாசி॰ அட்ட²॰ 512). இத⁴ கங்கா²விதரணியம்பி வுத்தங் ‘‘ஸந்தங் பி⁴க்கு²ங் அனாபுச்சி²த்வாதி…பே॰… உபசாரங் ஓக்கமந்தஸ்ஸா’’திஆதி³ (கங்கா²॰ அட்ட²॰ விகாலகா³மப்பவேஸனஸிக்கா²பத³வண்ணனா).

    Yesu purāṇapotthakesu ‘‘upacāraṃ okkamantiyā’’ti likhitaṃ, taṃ vikāle gāmappavesanasikkhāpadesu āciṇṇaṃ nayaṃ gahetvā pamādena likhīyati, na pamāṇaṃ. Yesu ca potthakesu vikāle gāmappavesanasikkhāpadassa vibhaṅge (pāci. 513) ‘‘gāmaṃ paviseyyāti parikkhittassa gāmassa parikkhepaṃ atikkamantassa, aparikkhittassa gāmassa upacāraṃ atikkamantassā’’ti likhīyati, sā pamādalekhā. Upacāraṃ okkamantassāti tattha pāṭho. Vuttañhi samantapāsādikāyaṃ ‘‘aparikkhittassa gāmassa upacāro adinnādāne vuttanayeneva veditabbo’’ti (pāci. aṭṭha. 512). Idha kaṅkhāvitaraṇiyampi vuttaṃ ‘‘santaṃ bhikkhuṃ anāpucchitvāti…pe… upacāraṃ okkamantassā’’tiādi (kaṅkhā. aṭṭha. vikālagāmappavesanasikkhāpadavaṇṇanā).

    யங் பன கத்த²சி பொத்த²கே ‘‘பி⁴க்கு²னியா கா³மந்தராதி⁴காரே ஏகேன பாதே³ன இதரஸ்ஸ கா³மஸ்ஸ பரிக்கே²பங் வா அதிக்கமந்தே, உபசாரங் வா ஓக்கந்தே து²ல்லச்சயங், து³தியேன அதிக்கந்தமத்தே, ஓக்கந்தமத்தே ச ஸங்கா⁴தி³ஸேஸோ’’தி பாடோ² தி³ஸ்ஸதி. தத்த² ‘‘ஓக்கந்தே, ஓக்கந்தமத்தே’’தி ஏதானி பதா³னி அதி⁴கானி , கேவலங் லிகி²தகேஹி அஞ்ஞேஹி லிகி²தானி. கத்த²சி பொத்த²கே ‘‘ஓக்கந்தமத்தே சா’’தி பத³ங் ந தி³ஸ்ஸதி, இதரங் தி³ஸ்ஸதி. தானி த்³வே பதா³னி பாளியா விருஜ்ஜ²ந்தி. ‘‘அபரிக்கி²த்தஸ்ஸ கா³மஸ்ஸ உபசாரங் அதிக்காமெந்தியா’’தி (பாசி॰ 692) ஹி பாளி . ததா² ஸமந்தபாஸாதி³காய (பாசி॰ அட்ட²॰ 692) விருஜ்ஜ²ந்தி. ‘‘பரிக்கே²பாரஹட்டா²னங் ஏகேன பாதே³ன அதிக்கமதி, து²ல்லச்சயங், து³தியேன அதிக்கமதி, ஸங்கா⁴தி³ஸேஸோ. அபிசெத்த² ஸககா³மதோ…பே॰… ஏகேன பாதே³ன இதரஸ்ஸ கா³மஸ்ஸ பரிக்கே²பே வா உபசாரே வா அதிக்கந்தே து²ல்லச்சயங், து³தியேன அதிக்கந்தமத்தே ஸங்கா⁴தி³ஸேஸோ’’தி (பாசி॰ அட்ட²॰ 692) ஹி வுத்தங்.

    Yaṃ pana katthaci potthake ‘‘bhikkhuniyā gāmantarādhikāre ekena pādena itarassa gāmassa parikkhepaṃ vā atikkamante, upacāraṃ vā okkante thullaccayaṃ, dutiyena atikkantamatte, okkantamatte ca saṅghādiseso’’ti pāṭho dissati. Tattha ‘‘okkante, okkantamatte’’ti etāni padāni adhikāni , kevalaṃ likhitakehi aññehi likhitāni. Katthaci potthake ‘‘okkantamatte cā’’ti padaṃ na dissati, itaraṃ dissati. Tāni dve padāni pāḷiyā virujjhanti. ‘‘Aparikkhittassa gāmassa upacāraṃ atikkāmentiyā’’ti (pāci. 692) hi pāḷi . Tathā samantapāsādikāya (pāci. aṭṭha. 692) virujjhanti. ‘‘Parikkhepārahaṭṭhānaṃ ekena pādena atikkamati, thullaccayaṃ, dutiyena atikkamati, saṅghādiseso. Apicettha sakagāmato…pe… ekena pādena itarassa gāmassa parikkhepe vā upacāre vā atikkante thullaccayaṃ, dutiyena atikkantamatte saṅghādiseso’’ti (pāci. aṭṭha. 692) hi vuttaṃ.

    க³ண்டி²பதே³ சஸ்ஸ ‘‘பரிக்கே²பங் அதிக்காமெந்தியா’’தி வத்வா ‘‘உபசாரேபி ஏஸேவ நயோ’’தி வுத்தங். அனுக³ண்டி²பதே³ ச ‘‘அபரிக்கி²த்தஸ்ஸ கா³மஸ்ஸ உபசாரங் ‘ஓக்கமந்தியா’திபி பொத்த²கேஸு ஏகச்சேஸு தி³ஸ்ஸதி, தங் ந க³ஹேதப்³ப³’’ந்தி வுத்தங். அபரம்பி வுத்தங் ‘‘அபரிக்கி²த்தஸ்ஸ கா³மஸ்ஸ உபசாரங் ‘அதிக்காமெந்தியா’தி வசனேனாபி ஏவங் வேதி³தப்³ப³ங் – விகாலே கா³மப்பவேஸனே த்³வின்னங் லெட்³டு³பாதானங் ஏவ வஸேன உபசாரோ பரிச்சி²ந்தி³தப்³போ³, இதரதா² யதா² எத்த² பரிக்கே²பாரஹட்டா²னங் பரிக்கே²பங் விய கத்வா ‘அதிக்காமெந்தியா’தி வுத்தங், ஏவங் தத்தா²பி ‘அபரிக்கி²த்தஸ்ஸ கா³மஸ்ஸ உபசாரங் அதிக்காமெந்தஸ்ஸா’தி வதெ³ய்ய. யஸ்மா பன தத்த² பரிக்கே²பாரஹட்டா²னதோ உத்தரிமேகோ லெட்³டு³பாதோ உபசாரோதி அதி⁴ப்பேதோ. தஸ்மா தத³த்த²தீ³பனத்த²ங் ‘அபரிக்கி²த்தஸ்ஸ கா³மஸ்ஸ உபசாரங் ஓக்கமந்தஸ்ஸா’தி வுத்த’’ந்தி.

    Gaṇṭhipade cassa ‘‘parikkhepaṃ atikkāmentiyā’’ti vatvā ‘‘upacārepi eseva nayo’’ti vuttaṃ. Anugaṇṭhipade ca ‘‘aparikkhittassa gāmassa upacāraṃ ‘okkamantiyā’tipi potthakesu ekaccesu dissati, taṃ na gahetabba’’nti vuttaṃ. Aparampi vuttaṃ ‘‘aparikkhittassa gāmassa upacāraṃ ‘atikkāmentiyā’ti vacanenāpi evaṃ veditabbaṃ – vikāle gāmappavesane dvinnaṃ leḍḍupātānaṃ eva vasena upacāro paricchinditabbo, itarathā yathā ettha parikkhepārahaṭṭhānaṃ parikkhepaṃ viya katvā ‘atikkāmentiyā’ti vuttaṃ, evaṃ tatthāpi ‘aparikkhittassa gāmassa upacāraṃ atikkāmentassā’ti vadeyya. Yasmā pana tattha parikkhepārahaṭṭhānato uttarimeko leḍḍupāto upacāroti adhippeto. Tasmā tadatthadīpanatthaṃ ‘aparikkhittassa gāmassa upacāraṃ okkamantassā’ti vutta’’nti.

    யங் பன அந்த⁴கட்ட²கதா²யங் பரிக்கே²பாரஹட்டா²னங்யேவ உபசாரந்தி ஸல்லக்கெ²த்வா ‘‘பரிக்கே²பபஅக்கே²பாரஹட்டா²னானங் நின்னானாகரணதீ³பனத்த²ங் உபசாரங் ஓக்கமந்தஸ்ஸா’’தி வுத்தங், பாளிவிஸேஸமஸல்லக்கெ²த்வா ‘‘அபரிக்கி²த்தஸ்ஸ கா³மஸ்ஸ உபசாரங் அதிக்கமந்தஸ்ஸ இத⁴ உபசாரோ பரிக்கே²போ யதா² ப⁴வெய்ய, தங் உபசாரங் பட²மங் பாத³ங் அதிக்காமெந்தஸ்ஸ ஆபத்தி து³க்கடஸ்ஸ, து³தியங் பாத³ங் அதிக்காமெந்தஸ்ஸ ஆபத்தி பாசித்தியஸ்ஸா’’தி வுத்தங், தங் ந க³ஹேதப்³ப³மேவ பாளியா விஸேஸஸம்ப⁴வதோதி. போராணக³ண்டி²பதே³ ‘‘உபசாரங் அதிக்காமெந்தியா பி⁴க்கு²னியா கா³மந்தராபத்தீ’’தி வுத்தங். தஸ்மா இத⁴ கங்கா²விதரணியா ‘‘ஏகேன பாதே³ன இதரஸ்ஸ…பே॰… அதிக்கந்தமத்தே ஸங்கா⁴தி³ஸேஸோ’’தி அயமேவ பாடோ² வேதி³தப்³போ³. எத்தாவதா இமேஸு யதா²வுத்தேஸு டா²னேஸு யதா²வுத்தபரிச்சே²தோ³வ கா³மோதி வேதி³தப்³போ³. இமஸ்ஸ அத்த²ஸ்ஸ தீ³பனத்த²ங் ‘‘கா³மோ நாம ஏககுடிகோபீ’’திஆதி³ (பாரா॰ 92) வுத்தங். இமஸ்ஸ வஸேன அஸதிபி பரிக்கே²பாதிக்கமே, உபசாரோக்கமனே வா அந்தராராமதோ வா பி⁴க்கு²னுபஸ்ஸயதோ வா தித்தி²யஸெய்யதோ வா படிக்கமனதோ வா தங் கா³மங் பவிஸந்தஸ்ஸ அந்தராராமபரிக்கே²பஸ்ஸ, உபசாரஸ்ஸ வா அதிக்கமனவஸேன கா³மபச்சயா ஆபத்தியோ வேதி³தப்³பா³.

    Yaṃ pana andhakaṭṭhakathāyaṃ parikkhepārahaṭṭhānaṃyeva upacāranti sallakkhetvā ‘‘parikkhepapaakkhepārahaṭṭhānānaṃ ninnānākaraṇadīpanatthaṃ upacāraṃ okkamantassā’’ti vuttaṃ, pāḷivisesamasallakkhetvā ‘‘aparikkhittassa gāmassa upacāraṃ atikkamantassa idha upacāro parikkhepo yathā bhaveyya, taṃ upacāraṃ paṭhamaṃ pādaṃ atikkāmentassa āpatti dukkaṭassa, dutiyaṃ pādaṃ atikkāmentassa āpatti pācittiyassā’’ti vuttaṃ, taṃ na gahetabbameva pāḷiyā visesasambhavatoti. Porāṇagaṇṭhipade ‘‘upacāraṃ atikkāmentiyā bhikkhuniyā gāmantarāpattī’’ti vuttaṃ. Tasmā idha kaṅkhāvitaraṇiyā ‘‘ekena pādena itarassa…pe… atikkantamatte saṅghādiseso’’ti ayameva pāṭho veditabbo. Ettāvatā imesu yathāvuttesu ṭhānesu yathāvuttaparicchedova gāmoti veditabbo. Imassa atthassa dīpanatthaṃ ‘‘gāmo nāma ekakuṭikopī’’tiādi (pārā. 92) vuttaṃ. Imassa vasena asatipi parikkhepātikkame, upacārokkamane vā antarārāmato vā bhikkhunupassayato vā titthiyaseyyato vā paṭikkamanato vā taṃ gāmaṃ pavisantassa antarārāmaparikkhepassa, upacārassa vā atikkamanavasena gāmapaccayā āpattiyo veditabbā.

    கா³மூபசாரோ பன ‘‘ட²பெத்வா கா³மஞ்ச கா³மூபசாரஞ்சா’’தி (மஹாவ॰ 144) எத்த² பரிக்கி²த்தஸ்ஸ கா³மஸ்ஸ பரிக்கே²போவ, அபரிக்கி²த்தஸ்ஸ கா³மஸ்ஸ பரிக்கே²போகாஸோவ. வுத்தஞ்ஹேதங் அட்ட²கதா²யங் ‘‘கா³மூபசாரோதி பரிக்கி²த்தஸ்ஸ கா³மஸ்ஸ பரிக்கே²போ, அபரிக்கி²த்தஸ்ஸ கா³மஸ்ஸ பரிக்கே²போகாஸோ. தேஸு அதி⁴ட்டி²ததேசீவரிகோ பி⁴க்கு² பரிஹாரங் ந லப⁴தீ’’தி (மஹாவ॰ அட்ட²॰ 144). கிங் பனெத்த² காரணங், யேன அயங் கா³மோ, கா³மூபசாரோ ச இத⁴ அஞ்ஞதா², அஞ்ஞத்த² ததா²தி? அட்டு²ப்பத்திதோ ‘‘தேன கோ² பன ஸமயேன பி⁴க்கூ² ‘ப⁴க³வதா திசீவரேன அவிப்பவாஸஸம்முதி அனுஞ்ஞாதா’தி அந்தரக⁴ரே சீவரானி நிக்கி²பந்தீ’’தி (மஹாவ॰ 143) இமிஸ்ஸா ஹி அட்டு²ப்பத்தியா ‘‘ட²பெத்வா கா³மஞ்ச கா³மூபசாரஞ்சா’’தி (மஹாவ॰ 144) வுத்தங். தஸ்மா யத்த² அந்தரக⁴ரஸஞ்ஞா, தத்த² அவிப்பவாஸஸீமா ந க³ச்ச²தீதி வேதி³தப்³பா³. தேன ச உதோ³ஸிதஸிக்கா²பதே³ ‘‘அந்தோகா³மே சீவரங் நிக்கி²பித்வா அந்தோகா³மே வத்த²ப்³ப³’’ந்தி (பாரா॰ 478) ச ‘‘ஸபா⁴யே வா த்³வாரமூலே வா, ஹத்த²பாஸா வா ந விஜஹிதப்³ப³’’ந்தி ச வுத்தங். கப்பியபூ⁴மியங் வஸந்தோயேவ ஹி கப்பியபூ⁴மியங் நிக்கி²த்தசீவரங் ரக்க²தி. ஸாஸங்கஸிக்கா²பதே³ பன ‘‘யஸ்மா யத்த² கா³மே சீவரங் நிக்கி²த்தங், தேன கா³மேன விப்பவஸந்தோ சீவரேன விப்பவஸதீதி வுச்சதி, தஸ்மா புன கா³மஸீமங் ஓக்கமித்வா வஸித்வா பக்கமதீ’’தி வுத்தங். தஸ்மிஞ்ஹி ஸிக்கா²பதே³ கா³மஸீமா கா³மோ நாமாதி அதி⁴ப்பேதோ. தத்த² விகாலே கா³மப்பவேஸனஸிக்கா²பத³விப⁴ங்கே³ ‘‘பரிக்கி²த்தஸ்ஸ கா³மஸ்ஸ பரிக்கே²பங் அதிக்கமந்தஸ்ஸ ஆபத்தி பாசித்தியஸ்ஸா’’தி (பாசி॰ 513) வசனதோ பரிக்கே²போ ந கா³மோ. கிந்து கா³மூபசாரோதி லேஸேன த³ஸ்ஸிதங் ஹோதி. இமஸ்மிங் பன ஸிக்கா²பத³விப⁴ங்கே³ ‘‘கா³மூபசாரோ நாமா’’தி ஆரபி⁴த்வா ‘‘அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லெட்³டு³பாதோ’’தி இமினா அபரிக்கி²த்தஸ்ஸ பரிக்கே²போகாஸோ கா³மூபசாரோதி ஸித்³த⁴ங். தத³த்த²ஸம்ப⁴வதோ தஸ்மிங் க⁴ரூபசாரே டி²தஸ்ஸ லெட்³டு³பாதோ கா³மூபசாரோதி குருந்த³ட்ட²கதா²யங், மஹாபச்சரியம்பி வுத்தங் . உபசாரோ ஹி ‘‘கா³மோ ஏகூபசாரோ நானூபசாரோ’’திஆதீ³ஸு த்³வாரங், ‘‘அஜ்ஜோ²காஸோ ஏகூபசாரோ’’தி எத்த² ஸமந்தா ஸத்தப்³ப⁴ந்தரஸங்கா²தங் பமாணங், தஸ்மா ‘‘கா³மூபசாரோதி பரிக்கி²த்தஸ்ஸ கா³மஸ்ஸ பரிக்கே²போ, அபரிக்கி²த்தஸ்ஸ கா³மஸ்ஸ பரிக்கே²போகாஸோ’’தி அந்த⁴கட்ட²கதா²யங் வுத்தந்தி வேதி³தப்³ப³ங். ததா² குருந்தி³யங், மஹாபச்சரியஞ்ச. ததா² பாளியம்பி ‘‘அஜ்ஜா²ராமோ நாம பரிக்கி²த்தஸ்ஸ ஆராமஸ்ஸ அந்தோ ஆராமோ, அபரிக்கி²த்தஸ்ஸ உபசாரோ. அஜ்ஜா²வஸதோ² நாம பரிக்கி²த்தஸ்ஸ ஆவஸத²ஸ்ஸ அந்தோ ஆவஸதோ², அபரிக்கி²த்தஸ்ஸ உபசாரோ’’திஆதீ³ஸு தி³ஸ்ஸதி. மஹாஅட்ட²கதா²யங் பன ‘‘கா³மூபசாரோ’’திஆதீ³ஸு தி³ஸ்ஸதி. தஸ்மா து³தியோ லெட்³டு³பாதோ உபசாரோதி அதி⁴ப்பேதோ.

    Gāmūpacāro pana ‘‘ṭhapetvā gāmañca gāmūpacārañcā’’ti (mahāva. 144) ettha parikkhittassa gāmassa parikkhepova, aparikkhittassa gāmassa parikkhepokāsova. Vuttañhetaṃ aṭṭhakathāyaṃ ‘‘gāmūpacāroti parikkhittassa gāmassa parikkhepo, aparikkhittassa gāmassa parikkhepokāso. Tesu adhiṭṭhitatecīvariko bhikkhu parihāraṃ na labhatī’’ti (mahāva. aṭṭha. 144). Kiṃ panettha kāraṇaṃ, yena ayaṃ gāmo, gāmūpacāro ca idha aññathā, aññattha tathāti? Aṭṭhuppattito ‘‘tena kho pana samayena bhikkhū ‘bhagavatā ticīvarena avippavāsasammuti anuññātā’ti antaraghare cīvarāni nikkhipantī’’ti (mahāva. 143) imissā hi aṭṭhuppattiyā ‘‘ṭhapetvā gāmañca gāmūpacārañcā’’ti (mahāva. 144) vuttaṃ. Tasmā yattha antaragharasaññā, tattha avippavāsasīmā na gacchatīti veditabbā. Tena ca udositasikkhāpade ‘‘antogāme cīvaraṃ nikkhipitvā antogāme vatthabba’’nti (pārā. 478) ca ‘‘sabhāye vā dvāramūle vā, hatthapāsā vā na vijahitabba’’nti ca vuttaṃ. Kappiyabhūmiyaṃ vasantoyeva hi kappiyabhūmiyaṃ nikkhittacīvaraṃ rakkhati. Sāsaṅkasikkhāpade pana ‘‘yasmā yattha gāme cīvaraṃ nikkhittaṃ, tena gāmena vippavasanto cīvarena vippavasatīti vuccati, tasmā puna gāmasīmaṃ okkamitvā vasitvā pakkamatī’’ti vuttaṃ. Tasmiñhi sikkhāpade gāmasīmā gāmo nāmāti adhippeto. Tattha vikāle gāmappavesanasikkhāpadavibhaṅge ‘‘parikkhittassa gāmassa parikkhepaṃ atikkamantassa āpatti pācittiyassā’’ti (pāci. 513) vacanato parikkhepo na gāmo. Kintu gāmūpacāroti lesena dassitaṃ hoti. Imasmiṃ pana sikkhāpadavibhaṅge ‘‘gāmūpacāro nāmā’’ti ārabhitvā ‘‘aparikkhittassa gāmassa gharūpacāre ṭhitassa majjhimassa purisassa leḍḍupāto’’ti iminā aparikkhittassa parikkhepokāso gāmūpacāroti siddhaṃ. Tadatthasambhavato tasmiṃ gharūpacāre ṭhitassa leḍḍupāto gāmūpacāroti kurundaṭṭhakathāyaṃ, mahāpaccariyampi vuttaṃ . Upacāro hi ‘‘gāmo ekūpacāro nānūpacāro’’tiādīsu dvāraṃ, ‘‘ajjhokāso ekūpacāro’’ti ettha samantā sattabbhantarasaṅkhātaṃ pamāṇaṃ, tasmā ‘‘gāmūpacāroti parikkhittassa gāmassa parikkhepo, aparikkhittassa gāmassa parikkhepokāso’’ti andhakaṭṭhakathāyaṃ vuttanti veditabbaṃ. Tathā kurundiyaṃ, mahāpaccariyañca. Tathā pāḷiyampi ‘‘ajjhārāmo nāma parikkhittassa ārāmassa anto ārāmo, aparikkhittassa upacāro. Ajjhāvasatho nāma parikkhittassa āvasathassa anto āvasatho, aparikkhittassa upacāro’’tiādīsu dissati. Mahāaṭṭhakathāyaṃ pana ‘‘gāmūpacāro’’tiādīsu dissati. Tasmā dutiyo leḍḍupāto upacāroti adhippeto.

    ‘‘அபரிக்கி²த்தஸ்ஸ கா³மஸ்ஸ உபசாரங் ஓக்கமந்தஸ்ஸ ஆபத்தி பாசித்தியஸ்ஸா’’தி பாளிவிஸேஸஸம்ப⁴வதோ ச பட²மோ லெட்³டு³பாதோ கா³மோ ஏவ, து³தியோ கா³மூபசாரோதி வுத்தங். பரிக்கி²த்தஸ்ஸ பன கா³மஸ்ஸ இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லெட்³டு³பாதோ கா³மூபசாரோதி வுத்தந்தி எத்த² பே⁴தோ³ நத்தி². எத்தாவதா பரிக்கி²த்தஸ்ஸ து³விதோ⁴ உபசாரோ, அபரிக்கி²த்தஸ்ஸ சதுப்³பி³தோ⁴ உபசாரோ யத்த² ஸம்ப⁴வதி, யத்த² ச ந ஸம்ப⁴வதி, தங் ஸப்³ப³ங் த³ஸ்ஸிதங் ஹோதி.

    ‘‘Aparikkhittassa gāmassa upacāraṃ okkamantassa āpatti pācittiyassā’’ti pāḷivisesasambhavato ca paṭhamo leḍḍupāto gāmo eva, dutiyo gāmūpacāroti vuttaṃ. Parikkhittassa pana gāmassa indakhīle ṭhitassa majjhimassa purisassa leḍḍupāto gāmūpacāroti vuttanti ettha bhedo natthi. Ettāvatā parikkhittassa duvidho upacāro, aparikkhittassa catubbidho upacāro yattha sambhavati, yattha ca na sambhavati, taṃ sabbaṃ dassitaṃ hoti.

    கா³மகெ²த்தஸ்ஸ ச கா³மஸீமாய ச லக்க²ணங் அட்ட²கதா²யமேவ வுத்தங். உப⁴யஞ்ஹி அத்த²தோ ஏகங். தத்த² கா³மஸீமாய கா³மபா⁴வோ ஸாஸங்கஸிக்கா²பத³வஸேன வேதி³தப்³போ³.

    Gāmakhettassa ca gāmasīmāya ca lakkhaṇaṃ aṭṭhakathāyameva vuttaṃ. Ubhayañhi atthato ekaṃ. Tattha gāmasīmāya gāmabhāvo sāsaṅkasikkhāpadavasena veditabbo.

    கா³மஸீமூபசாரோ நாம மனுஸ்ஸானங் கட்ட²திணபுப்ப²ப²லாதி³அத்தி²கானங் வனசரகானங் வலஞ்ஜனட்டா²னங். இமஸ்ஸ கா³மஸீமூபசாரபா⁴வோ உதோ³ஸிதஸிக்கா²பதே³, ‘‘அகா³மகே அரஞ்ஞே ஸமந்தா ஸத்தப்³ப⁴ந்தரா’’தி (பாரா॰ 494) ஆக³தட்டா²னே க²ந்த⁴கே (மஹாவ॰ 147) ச வேதி³தப்³போ³. எத்த² ஹி ப⁴க³வா கா³மந்தவாஸீனங் பி⁴க்கூ²னங் ஸீமங் த³ஸ்ஸெந்தோ ‘‘யங் கா³மங் வா நிக³மங் வா உபனிஸ்ஸாய விஹரதீ’’தி (மஹாவ॰ 147) வத்வா த³ஸ்ஸேதி. தத³னந்தரமேவ ‘‘அகா³மகே’’திஆதி³னா ஸத்தப்³ப⁴ந்தரஸீமங் த³ஸ்ஸேதி. தஸ்மா யோ பி⁴க்கு² கா³மங் வா நிக³மங் வா உபனிஸ்ஸாய ந விஹரதி, கேவலங் நாவாயங் வா த²லமக்³கே³ன வா அத்³தா⁴னமக்³க³ப்படிபன்னோ ஹோதி, தஸ்ஸ தத்த² தத்த² ஸத்தப்³ப⁴ந்தரஸீமா லப்³ப⁴தீதி வேதி³தப்³போ³. வுத்தஞ்ஹி ‘‘ஏககுலஸ்ஸ ஸத்தோ² ஹோதி , ஸத்தே² சீவரங் நிக்கி²பித்வா புரதோ வா பச்ச²தோ வா ஸத்தப்³ப⁴ந்தரா ந விஜஹிதப்³ப³’’ந்திஆதி³ (பாரா॰ 489). இத³மேவ அரஞ்ஞங் ஸந்தா⁴ய ‘‘ஆரஞ்ஞகஸீமாய ஏகங் அகா³மகங் அரஞ்ஞ’’ந்தி வுத்தங்.

    Gāmasīmūpacāro nāma manussānaṃ kaṭṭhatiṇapupphaphalādiatthikānaṃ vanacarakānaṃ valañjanaṭṭhānaṃ. Imassa gāmasīmūpacārabhāvo udositasikkhāpade, ‘‘agāmake araññe samantā sattabbhantarā’’ti (pārā. 494) āgataṭṭhāne khandhake (mahāva. 147) ca veditabbo. Ettha hi bhagavā gāmantavāsīnaṃ bhikkhūnaṃ sīmaṃ dassento ‘‘yaṃ gāmaṃ vā nigamaṃ vā upanissāya viharatī’’ti (mahāva. 147) vatvā dasseti. Tadanantarameva ‘‘agāmake’’tiādinā sattabbhantarasīmaṃ dasseti. Tasmā yo bhikkhu gāmaṃ vā nigamaṃ vā upanissāya na viharati, kevalaṃ nāvāyaṃ vā thalamaggena vā addhānamaggappaṭipanno hoti, tassa tattha tattha sattabbhantarasīmā labbhatīti veditabbo. Vuttañhi ‘‘ekakulassa sattho hoti , satthe cīvaraṃ nikkhipitvā purato vā pacchato vā sattabbhantarā na vijahitabba’’ntiādi (pārā. 489). Idameva araññaṃ sandhāya ‘‘āraññakasīmāya ekaṃ agāmakaṃ arañña’’nti vuttaṃ.

    யங் ஸந்தா⁴ய ‘‘அகா³மகே அரஞ்ஞே அத்³த⁴யோஜனே அத்³த⁴யோஜனே ஆபத்தி பாசித்தியஸ்ஸா’’தி (பாசி॰ 414) பாளியங் வுத்தங். இத³ங் ஸங்விதா⁴னஸிக்கா²பதா³னங் ஏகங் அகா³மகங் அரஞ்ஞங் நாம.

    Yaṃ sandhāya ‘‘agāmake araññe addhayojane addhayojane āpatti pācittiyassā’’ti (pāci. 414) pāḷiyaṃ vuttaṃ. Idaṃ saṃvidhānasikkhāpadānaṃ ekaṃ agāmakaṃ araññaṃ nāma.

    புரிமேன பன ஸக⁴ரங் ஸங்க³ஹிதங், இமினா தமஸங்க³ஹிதந்தி. யங் ஸந்தா⁴ய க³ணம்ஹா ஓஹீயனாதி⁴காரே அட்ட²கதா²யங் (பாசி॰ அட்ட²॰ 692) ‘‘அகா³மகே அரஞ்ஞேதி எத்த² ‘நிக்க²மித்வா ப³ஹி இந்த³கீ²லா ஸப்³ப³மேதங் அரஞ்ஞ’ந்தி ஏவங் வுத்தங் லக்க²ணங் அரஞ்ஞங். தங் பனேத கேவலங் கா³மாபா⁴வேன ‘அகா³மக’ந்தி வுத்தங், ந விஞ்ஜா²டவிஸதி³ஸதாயா’’தி வுத்தங். யங் ஸந்தா⁴ய ‘‘ஆரஞ்ஞகங் நாம ஸேனாஸனங் பஞ்சத⁴னுஸதிகங் பச்சி²ம’’ந்தி (பாரா॰ 654; பாசி॰ 573) வுத்தங். இத³ங் ஆரஞ்ஞகஸேனாஸனங் நாம பரிக்கி²த்தஸ்ஸ பரிக்கே²பதோ ப³ஹி, அபரிக்கி²த்தஸ்ஸ பன பரிக்கே²போகாஸதோ ப³ஹி ஸருக்க²ங் வா அருக்க²ங் வா விஹாரே குன்னதி³ஸமாகிண்ணம்பி அரஞ்ஞங் நாம. ததா² ‘‘க³ணம்ஹா ஓஹீயனகஸ்ஸ ஏக’’ந்தி வுத்தங். இத³ங் அரஞ்ஞங்வ. இத³ங் பன புப்³பே³ அகா³மகபா⁴வேன ஆக³தட்டா²னே வுத்தலக்க²ணமேவ ஹுத்வா நிக்க²மித்வா ப³ஹி இந்த³கீ²லா த³ஸ்ஸனூபசாரவிஜஹனே ஏகமேவ ஆபத்திங் கரோதி, ததோ உத்³த⁴ங் அனாபத்தி. ‘‘ஸங்விதா⁴னஸிக்கா²பதா³னங் ஏக’’ந்தி வுத்தங் பன அத்³த⁴யோஜனே அத்³த⁴யோஜனே ஏகேகங் ஆபத்திங் கரோதி, ந ததோ ஓரங். இதரானி தீணி யதா²வுத்தபரிச்சே²த³தோ ஓரமேவ தத்த² வுத்தவிதி⁴ங் ந ஸம்பாதெ³ந்தி, பரங் ஸம்பாதெ³ந்தி. ஏவமேதேஸங் அஞ்ஞமஞ்ஞனானத்தங் வேதி³தப்³ப³ங்.

    Purimena pana sagharaṃ saṅgahitaṃ, iminā tamasaṅgahitanti. Yaṃ sandhāya gaṇamhā ohīyanādhikāre aṭṭhakathāyaṃ (pāci. aṭṭha. 692) ‘‘agāmake araññeti ettha ‘nikkhamitvā bahi indakhīlā sabbametaṃ arañña’nti evaṃ vuttaṃ lakkhaṇaṃ araññaṃ. Taṃ paneta kevalaṃ gāmābhāvena ‘agāmaka’nti vuttaṃ, na viñjhāṭavisadisatāyā’’ti vuttaṃ. Yaṃ sandhāya ‘‘āraññakaṃ nāma senāsanaṃ pañcadhanusatikaṃ pacchima’’nti (pārā. 654; pāci. 573) vuttaṃ. Idaṃ āraññakasenāsanaṃ nāma parikkhittassa parikkhepato bahi, aparikkhittassa pana parikkhepokāsato bahi sarukkhaṃ vā arukkhaṃ vā vihāre kunnadisamākiṇṇampi araññaṃ nāma. Tathā ‘‘gaṇamhā ohīyanakassa eka’’nti vuttaṃ. Idaṃ araññaṃva. Idaṃ pana pubbe agāmakabhāvena āgataṭṭhāne vuttalakkhaṇameva hutvā nikkhamitvā bahi indakhīlā dassanūpacāravijahane ekameva āpattiṃ karoti, tato uddhaṃ anāpatti. ‘‘Saṃvidhānasikkhāpadānaṃ eka’’nti vuttaṃ pana addhayojane addhayojane ekekaṃ āpattiṃ karoti, na tato oraṃ. Itarāni tīṇi yathāvuttaparicchedato orameva tattha vuttavidhiṃ na sampādenti, paraṃ sampādenti. Evametesaṃ aññamaññanānattaṃ veditabbaṃ.

    தத்த² பஞ்சவிதே⁴ கா³மே யோ ‘‘பரிக்கி²த்தஸ்ஸ கா³மஸ்ஸ இந்த³கீ²லே டி²தஸ்ஸ லெட்³டு³பாதோ’’தி (பாரா॰ 92) வுத்தோ, ஸோ ந கத்த²சி வினயபிடகே உபயோக³ங் க³தோ, கேவலங் அபரிக்கி²த்தஸ்ஸ பரிக்கே²போகாஸதோ அபரோ ஏகோ லெட்³டு³பாதோ கா³மூபசாரோ நாமாதி தீ³பனத்த²ங் வுத்தோ. பரிக்கி²த்தஸ்ஸபி சே கா³மஸ்ஸ ஏகோ லெட்³டு³பாதோ கப்பியபூ⁴மிஸமானோ உபசாரோதி வுத்தோ, பகே³வ அபரிக்கி²த்தஸ்ஸ பரிக்கே²போகாஸதோ ஏகோ. ஸோ பன பாகடத்தா ச அஜ்ஜோ²காஸத்தா ச ஓக்கமந்தஸ்ஸ ஆபத்திங் கரோதி ட²பெத்வா பி⁴க்கு²னியா கா³மந்தராபத்திங். பி⁴க்கு²னியோ ஹி தஸ்மிங் து³தியலெட்³டு³பாதஸங்கா²தே கா³மூபசாரே வஸந்தீ ஆபத்திஞ்ச ஆபஜ்ஜந்தி, கா³மங் பவிஸந்தீ கா³மந்தராபத்திஞ்ச. தாஸஞ்ஹி டி²தட்டா²னங் அரஞ்ஞஸங்க்²யங் க³ச்ச²தி ‘‘தாவதே³வ சா²யா மேதப்³பா³…பே॰… தஸ்ஸா தயோ ச நிஸ்ஸயே, அட்ட² ச அகரணீயானி ஆசிக்கெ²ய்யாதா²’’தி (சூளவ॰ 430) வசனதோ. அரஞ்ஞப்படிஸங்யுத்தானங் ஸிக்கா²பதா³னங், விகாலேகா³மப்பவேஸனஸிக்கா²பத³ஸ்ஸ (பாசி॰ 508) ச பி⁴க்கு²னீனங் அஸாதா⁴ரணத்தா ச அந்தராராமபி⁴க்கு²னுபஸ்ஸயப்படிக்கமனாதீ³னங் கப்பியபூ⁴மிபா⁴வவசனதோ ச ‘‘ஏகா க³ணம்ஹா ஓஹீயெய்யாதி அகா³மகே அரஞ்ஞே து³தியிகாய பி⁴க்கு²னியா த³ஸ்ஸனூபசாரங் வா ஸவனூபசாரங் வா விஜஹந்தியா ஆபத்தி து²ல்லச்சயஸ்ஸா’’திஆதி³ஸிக்கா²பத³பஞ்ஞத்திதோ (பாசி॰ 692) ச பி⁴க்கு²னிக்க²ந்த⁴கனயஏன வா யஸ்மா பரிக்கி²த்தஸ்ஸ கா³மஸ்ஸ இந்த³கீ²லதோ பட்டா²ய அபரிக்கி²த்தஸ்ஸ உபசாரதோ பட்டா²ய நீயதி, தத்த² அந்தரக⁴ரே நிக்கி²த்தசீவரே ஸதி சதுரங்க³ஸமோதா⁴னேன பி⁴க்கூ² வஸந்தி, தஸ்மா ஸகா³மகங் நாம ஹோதி.

    Tattha pañcavidhe gāme yo ‘‘parikkhittassa gāmassa indakhīle ṭhitassa leḍḍupāto’’ti (pārā. 92) vutto, so na katthaci vinayapiṭake upayogaṃ gato, kevalaṃ aparikkhittassa parikkhepokāsato aparo eko leḍḍupāto gāmūpacāro nāmāti dīpanatthaṃ vutto. Parikkhittassapi ce gāmassa eko leḍḍupāto kappiyabhūmisamāno upacāroti vutto, pageva aparikkhittassa parikkhepokāsato eko. So pana pākaṭattā ca ajjhokāsattā ca okkamantassa āpattiṃ karoti ṭhapetvā bhikkhuniyā gāmantarāpattiṃ. Bhikkhuniyo hi tasmiṃ dutiyaleḍḍupātasaṅkhāte gāmūpacāre vasantī āpattiñca āpajjanti, gāmaṃ pavisantī gāmantarāpattiñca. Tāsañhi ṭhitaṭṭhānaṃ araññasaṅkhyaṃ gacchati ‘‘tāvadeva chāyā metabbā…pe… tassā tayo ca nissaye, aṭṭha ca akaraṇīyāni ācikkheyyāthā’’ti (cūḷava. 430) vacanato. Araññappaṭisaṃyuttānaṃ sikkhāpadānaṃ, vikālegāmappavesanasikkhāpadassa (pāci. 508) ca bhikkhunīnaṃ asādhāraṇattā ca antarārāmabhikkhunupassayappaṭikkamanādīnaṃ kappiyabhūmibhāvavacanato ca ‘‘ekā gaṇamhā ohīyeyyāti agāmake araññe dutiyikāya bhikkhuniyā dassanūpacāraṃ vā savanūpacāraṃ vā vijahantiyā āpatti thullaccayassā’’tiādisikkhāpadapaññattito (pāci. 692) ca bhikkhunikkhandhakanayaena vā yasmā parikkhittassa gāmassa indakhīlato paṭṭhāya aparikkhittassa upacārato paṭṭhāya nīyati, tattha antaraghare nikkhittacīvare sati caturaṅgasamodhānena bhikkhū vasanti, tasmā sagāmakaṃ nāma hoti.

    அவிப்பவாஸஸீமாய ஏகங் நாம ‘‘ந, பி⁴க்க²வே, பி⁴க்கு²னியா அரஞ்ஞே வத்த²ப்³ப³ங், யா வஸெய்ய, ஆபத்தி து³க்கடஸ்ஸா’’தி (சூளவ॰ 431) வசனதோ பி⁴க்கு²னீனங் அரஞ்ஞவாஸோ நாம நத்தீ²தி ஸித்³த⁴ங். தாய ஹி அரஞ்ஞே பி⁴க்கு²னுபஸ்ஸயே ஸதி அந்தோஆவாஸேபி து³தியிகாய த³ஸ்ஸனஸவனூபசாரங் விஜஹந்தியா ஆபத்தி. தஸ்மா அவிப்பவாஸஸீமாதி⁴காரே ‘‘ட²பெத்வா கா³மஞ்ச கா³மூபசாரஞ்சா’’தி (மஹாவ॰ 144) எத்த² யங் டா²னங் ட²பிதங், தத்தே²வ பி⁴க்கு²னுபஸ்ஸயோபி கப்பதி, ந ததோ பரங்.

    Avippavāsasīmāya ekaṃ nāma ‘‘na, bhikkhave, bhikkhuniyā araññe vatthabbaṃ, yā vaseyya, āpatti dukkaṭassā’’ti (cūḷava. 431) vacanato bhikkhunīnaṃ araññavāso nāma natthīti siddhaṃ. Tāya hi araññe bhikkhunupassaye sati antoāvāsepi dutiyikāya dassanasavanūpacāraṃ vijahantiyā āpatti. Tasmā avippavāsasīmādhikāre ‘‘ṭhapetvā gāmañca gāmūpacārañcā’’ti (mahāva. 144) ettha yaṃ ṭhānaṃ ṭhapitaṃ, tattheva bhikkhunupassayopi kappati, na tato paraṃ.

    தாஸஞ்ச அவிப்பவாஸஸீமாகம்மவாசாயங் ‘‘ட²பெத்வா கா³மஞ்ச கா³மூபசாரஞ்சா’’தி வசனங் நத்தீ²தி கத்வா தெஸ்வேவ கா³மகா³மூபசாரேஸு ப²ரதி. ததோ பரங் து³தியேஸு லெட்³டு³பாதாதீ³ஸு தாஸங் அகப்பியபூ⁴மிகத்தா ந ஸமானஸங்வாஸகஸீமா அரஞ்ஞே ப²ரதி பி⁴க்கூ²னங் கா³மகா³மூபசாரங் விய. தஸ்மா வுத்தங் ‘‘பி⁴க்கு²னியா ட²பெத்வா கா³மந்தராபத்தி’’ந்தி.

    Tāsañca avippavāsasīmākammavācāyaṃ ‘‘ṭhapetvā gāmañca gāmūpacārañcā’’ti vacanaṃ natthīti katvā tesveva gāmagāmūpacāresu pharati. Tato paraṃ dutiyesu leḍḍupātādīsu tāsaṃ akappiyabhūmikattā na samānasaṃvāsakasīmā araññe pharati bhikkhūnaṃ gāmagāmūpacāraṃ viya. Tasmā vuttaṃ ‘‘bhikkhuniyā ṭhapetvā gāmantarāpatti’’nti.

    ஏவங் தாவ பஞ்சவித⁴ங் கா³மபே⁴த³ங், அரஞ்ஞபே⁴த³ஞ்ச ஞத்வா இதா³னி ‘‘அத்தி² கா³மோ ந கா³மபரிஹாரங் கத்த²சி லப⁴தீ’’திஆதி³பே⁴தோ³ வேதி³தப்³போ³. தத்த² யோ அட்ட²கதா²யங் ‘‘அமனுஸ்ஸோ நாம யோ ஸப்³ப³ஸோ வா மனுஸ்ஸானங் அபா⁴வேன யக்க²பரிக்³க³ஹபூ⁴தோ’’தி வுத்தோ, ஸோ கா³மோ ந கா³மபரிஹாரங் கத்த²சி ஸிக்கா²பதே³ லப⁴தி. யஞ்ஹி ஸந்தா⁴ய அட்ட²கதா²யங் ‘‘தங் பனேதங் பு³த்³த⁴காலே, சக்கவத்திகாலே ச நக³ரங் ஹோதி, ஸேஸகாலே ஸுஞ்ஞங் ஹோதி யக்க²பரிக்³க³ஹித’’ந்தி (பாரா॰ அட்ட²॰ 1.84; தீ³॰ நி॰ அட்ட²॰ 1.150) வுத்தங். யோ பன படிராஜசோராதீ³ஹி விலுத்தத்தா, கேவலங் ப⁴யேன வா ச²ட்³டி³தோ ஸக⁴ரோவ அந்தரஹிதகா³மபூ⁴தோ, ஸோ ‘‘கா³மந்தரே கா³மந்தரே ஆபத்தி பாசித்தியஸ்ஸா’’தி (பாசி॰ 183) வுத்தபாசித்தியங் ஜனேதி, விகாலே கா³மப்பவேஸனங், ஸேகி²யே சத்தாரி ஜனேதீதி வேதி³தப்³பா³. யோ பன கா³மோ யதோ வா மனுஸ்ஸா கேனசிதே³வ கரணீயேன புனபி ஆக³ந்துகாமா ஏவ அபக்கந்தாதி வுத்தோ, அமனுஸ்ஸோ ஸோ பகதிகா³மஸதி³ஸோவ.

    Evaṃ tāva pañcavidhaṃ gāmabhedaṃ, araññabhedañca ñatvā idāni ‘‘atthi gāmo na gāmaparihāraṃ katthaci labhatī’’tiādibhedo veditabbo. Tattha yo aṭṭhakathāyaṃ ‘‘amanusso nāma yo sabbaso vā manussānaṃ abhāvena yakkhapariggahabhūto’’ti vutto, so gāmo na gāmaparihāraṃ katthaci sikkhāpade labhati. Yañhi sandhāya aṭṭhakathāyaṃ ‘‘taṃ panetaṃ buddhakāle, cakkavattikāle ca nagaraṃ hoti, sesakāle suññaṃ hoti yakkhapariggahita’’nti (pārā. aṭṭha. 1.84; dī. ni. aṭṭha. 1.150) vuttaṃ. Yo pana paṭirājacorādīhi viluttattā, kevalaṃ bhayena vā chaḍḍito sagharova antarahitagāmabhūto, so ‘‘gāmantare gāmantare āpatti pācittiyassā’’ti (pāci. 183) vuttapācittiyaṃ janeti, vikāle gāmappavesanaṃ, sekhiye cattāri janetīti veditabbā. Yo pana gāmo yato vā manussā kenacideva karaṇīyena punapi āgantukāmā eva apakkantāti vutto, amanusso so pakatigāmasadisova.

    அத்தி² அரஞ்ஞங் ந அரஞ்ஞபரிஹாரங் கத்த²சி லப⁴தீதி எத்த² ‘‘அஜ்ஜோ²காஸோ ஏகூபசாரோ நாம அகா³மகே அரஞ்ஞே ஸமந்தா ஸத்தப்³ப⁴ந்தரா ஏகூபசாரோ, ததோ பரங் நானூபசாரோ’’தி (பாரா॰ 494) எத்த² ய்வாயங் நானூபசாரோதி வுத்தோ, தங் வேதி³தப்³ப³ங். யோ பன பரிக்கி²த்தஸ்ஸ ஏகலெட்³டு³பாதஸங்கா²தோ கா³மூபசாரனாமகோ கா³மோ, யோ வா ஸத்தோ² நாதிரேகசாதுமாஸனிவிட்டோ², ஸோ அத்தி² கா³மோ ந கா³மகிச்சங் கரோதி. ந ஹி தங் டா²னங் ஓக்கமந்தோ கா³மப்பவேஸனாபத்திங் ஆபஜ்ஜதி. யங் பன கா³மஸீமாய பரியாபன்னங் மனுஸ்ஸானங் வலஞ்ஜனட்டா²னபூ⁴தங் அரஞ்ஞங், தங் அத்தி² அரஞ்ஞங் ந அரஞ்ஞகிச்சங் கரோதி நாம. ந ஹி தத்த² ஆரஞ்ஞகஸீமா லப்³ப⁴தீதி. எத்தாவதா ‘‘கா³மா வா அரஞ்ஞா வா’’தி இமிஸ்ஸா அனுபஞ்ஞத்தியா லக்க²ணானுபஞ்ஞத்திபா⁴வோ த³ஸ்ஸிதோ ஹோதி.

    Atthi araññaṃ na araññaparihāraṃ katthaci labhatīti ettha ‘‘ajjhokāso ekūpacāro nāma agāmake araññe samantā sattabbhantarā ekūpacāro, tato paraṃ nānūpacāro’’ti (pārā. 494) ettha yvāyaṃ nānūpacāroti vutto, taṃ veditabbaṃ. Yo pana parikkhittassa ekaleḍḍupātasaṅkhāto gāmūpacāranāmako gāmo, yo vā sattho nātirekacātumāsaniviṭṭho, so atthi gāmo na gāmakiccaṃ karoti. Na hi taṃ ṭhānaṃ okkamanto gāmappavesanāpattiṃ āpajjati. Yaṃ pana gāmasīmāya pariyāpannaṃ manussānaṃ valañjanaṭṭhānabhūtaṃ araññaṃ, taṃ atthi araññaṃ na araññakiccaṃ karoti nāma. Na hi tattha āraññakasīmā labbhatīti. Ettāvatā ‘‘gāmā vā araññā vā’’ti imissā anupaññattiyā lakkhaṇānupaññattibhāvo dassito hoti.

    ‘‘கோ³னிஸாதி³னிவிட்டோ²பி கா³மோ’’தி எத்த² ஸசே தஸ்ஸ கா³மஸ்ஸ கா³மகெ²த்தபரிச்சே²தோ³ அத்தி², ஸப்³போ³பி ஏகோ கா³மோ. நோ சே, உபசாரேன வா பரிக்கே²பேன வா பரிச்சி²ந்தி³தப்³போ³. ஸசே கா³மகெ²த்தே ஸதி கானிசி தானி க⁴ரானி அஞ்ஞமஞ்ஞஉபசாரப்பஹோனகங் டா²னங் அதிக்கமித்வா தூ³ரே தூ³ரே கதானி ஹொந்தி, விகாலே கா³மப்பவேஸே உபசாரோவ பமாணங். அந்தரக⁴ரப்படிஸங்யுத்தேஸு ஸேகி²யேஸு, பி⁴க்கு²னியா கா³மந்தராபத்தீஸு ச க⁴ரானங் பரிக்கே²பாரஹட்டா²னங் பமாணங், உபோஸதா²தி³கம்மானங் கா³மகெ²த்தங் பமாணங், ஆரஞ்ஞகஸேனாஸனஸ்ஸ ஆஸன்னக⁴ரஸ்ஸ து³தியலெட்³டு³பாததோ பட்டா²ய பஞ்சத⁴னுஸதந்தரதா பமாணந்தி ஏவங் நோ படிபா⁴னந்தி ஆசரியா.

    ‘‘Gonisādiniviṭṭhopi gāmo’’ti ettha sace tassa gāmassa gāmakhettaparicchedo atthi, sabbopi eko gāmo. No ce, upacārena vā parikkhepena vā paricchinditabbo. Sace gāmakhette sati kānici tāni gharāni aññamaññaupacārappahonakaṃ ṭhānaṃ atikkamitvā dūre dūre katāni honti, vikāle gāmappavese upacārova pamāṇaṃ. Antaragharappaṭisaṃyuttesu sekhiyesu, bhikkhuniyā gāmantarāpattīsu ca gharānaṃ parikkhepārahaṭṭhānaṃ pamāṇaṃ, uposathādikammānaṃ gāmakhettaṃ pamāṇaṃ, āraññakasenāsanassa āsannagharassa dutiyaleḍḍupātato paṭṭhāya pañcadhanusatantaratā pamāṇanti evaṃ no paṭibhānanti ācariyā.

    ‘‘யம்பி ஏகஸ்மிங்யேவ கா³மகெ²த்தே ஏகங் பதே³ஸங் ‘அயம்பி விஸுங்கா³மோ ஹோதூ’தி பரிச்சி²ந்தி³த்வா ராஜா கஸ்ஸசி தே³தி, ஸோபி விஸுங்கா³மஸீமா ஹோதியேவா’’தி (மஹாவ॰ அட்ட²॰ 147) அட்ட²கதா²வசனதோ தங் பவிஸந்தியா பி⁴க்கு²னியா கா³மந்தராபத்தி ஹோதி ஏவ. ஸசே தத்த² விஹாரோ வா தே³வகுலங் வா ஸபா⁴ வா கே³ஹங் வா நத்தி², கேவலங் வத்து²மத்தகமேவ ஹோதி, கா³மோதி வினயகம்மங் ஸப்³ப³ங் தத்த² கப்பதி. ‘‘அமனுஸ்ஸோ கா³மோ’’தி ஹி வுத்தங். தஞ்ச டா²னங் இதரஸ்ஸ கா³மஸ்ஸ பரிக்கே²பப்³ப⁴ந்தரே வா உபசாரப்³ப⁴ந்தரே வா ஹோதி, விகாலே கா³மப்பவேஸனங் ஆபுச்சி²த்வாவ க³ந்தப்³ப³ங். நோ சே, அரஞ்ஞங் விய யதா²ஸுக²ங் க³ந்தப்³ப³ங். தத்த² சே ஆராமோ வா தித்தி²யஸெய்யாதீ³ஸு அஞ்ஞதரோவா ஹோதி, லத்³த⁴கப்பமேவ. பி⁴க்கு²னுபஸ்ஸயோ சே ஹோதி, கா³மங் பிண்டா³ய பவிஸந்தியா பி⁴க்கு²னியா கா³மந்தராபத்தி பரிஹரிதப்³பா³. ‘‘அரஞ்ஞங் நாம ட²பெத்வா கா³மஞ்ச கா³மூபசாரஞ்ச அவஸேஸங் அரஞ்ஞங் நாமா’’தி (பாரா॰ 92) எத்த² பரிக்கே²பே ஸதி யதா²வுத்தபரிச்சே²த³ங் கா³மமேவ ட²பெத்வா அவஸேஸங் தஸ்ஸ உபசாரங், ததோ பரஞ்ச அரஞ்ஞங் நாம, பரிக்கே²பே அஸதி யதா²வுத்தபரிச்சே²த³ங் கா³மூபசாரமேவ ட²பெத்வா ததோ பரங் அவஸேஸங் அரஞ்ஞங் நாமாதி அதி⁴ப்பாயோ. ஏவங் ஸதி ‘‘நிக்க²மித்வா ப³ஹி இந்த³கீ²லா ஸப்³ப³மேதங் அரஞ்ஞ’’ந்தி (விப⁴॰ 529) வுத்தலக்க²ணே அகா³மகே அரஞ்ஞே க³ணம்ஹாஓஹீயனாபத்தி, தத்த² அவிப்பவாஸஸீமாய ப²ரணங் விகாலே கா³மப்பவேஸனாபத்தியா அனாபத்தீதி ஏவமாதி³வினயவிதி⁴ ஸமேதி, அஞ்ஞதா² ந ஸமேதி.

    ‘‘Yampi ekasmiṃyeva gāmakhette ekaṃ padesaṃ ‘ayampi visuṃgāmo hotū’ti paricchinditvā rājā kassaci deti, sopi visuṃgāmasīmā hotiyevā’’ti (mahāva. aṭṭha. 147) aṭṭhakathāvacanato taṃ pavisantiyā bhikkhuniyā gāmantarāpatti hoti eva. Sace tattha vihāro vā devakulaṃ vā sabhā vā gehaṃ vā natthi, kevalaṃ vatthumattakameva hoti, gāmoti vinayakammaṃ sabbaṃ tattha kappati. ‘‘Amanusso gāmo’’ti hi vuttaṃ. Tañca ṭhānaṃ itarassa gāmassa parikkhepabbhantare vā upacārabbhantare vā hoti, vikāle gāmappavesanaṃ āpucchitvāva gantabbaṃ. No ce, araññaṃ viya yathāsukhaṃ gantabbaṃ. Tattha ce ārāmo vā titthiyaseyyādīsu aññatarovā hoti, laddhakappameva. Bhikkhunupassayo ce hoti, gāmaṃ piṇḍāya pavisantiyā bhikkhuniyā gāmantarāpatti pariharitabbā. ‘‘Araññaṃ nāma ṭhapetvā gāmañca gāmūpacārañca avasesaṃ araññaṃ nāmā’’ti (pārā. 92) ettha parikkhepe sati yathāvuttaparicchedaṃ gāmameva ṭhapetvā avasesaṃ tassa upacāraṃ, tato parañca araññaṃ nāma, parikkhepe asati yathāvuttaparicchedaṃ gāmūpacārameva ṭhapetvā tato paraṃ avasesaṃ araññaṃ nāmāti adhippāyo. Evaṃ sati ‘‘nikkhamitvā bahi indakhīlā sabbametaṃ arañña’’nti (vibha. 529) vuttalakkhaṇe agāmake araññe gaṇamhāohīyanāpatti, tattha avippavāsasīmāya pharaṇaṃ vikāle gāmappavesanāpattiyā anāpattīti evamādivinayavidhi sameti, aññathā na sameti.

    ‘‘ட²பெத்வா கா³மூபசாரங் அவஸேஸங் அரஞ்ஞங் நாமா’’தி (மஹாவ॰ 144) வுத்தே கா³மூபசாரதோ பரோ அரஞ்ஞந்தி ஸித்³தே⁴ ‘‘ட²பெத்வா கா³ம’’ந்தி விஸேஸத்தோ² ந தி³ஸ்ஸதி, கா³மஸ்ஸ பன அரஞ்ஞபா⁴வப்பஸங்க³ப⁴யா வுத்தந்தி சே? ந, கா³மூபசாரஸ்ஸ அபா⁴வப்பஸங்க³தோ. ஸதி ஹி கா³மே கா³மூபசாரோ ஹோதி, ஸோ ச தவ மதேன அரஞ்ஞபூ⁴தோ. குதோ தா³னி கா³மூபசாரோ. கா³மூபசாரோபி சே அரஞ்ஞஸங்க்²யங் க³ச்ச²தி, பரோவ கா³மோதி கத்வா ந யுத்தங் கா³மஸ்ஸ அரஞ்ஞபா⁴வப்பஸங்க³தோ ச. தஸ்மா ‘‘கா³மா வா அரஞ்ஞா வா’’தி எத்த² கா³மூபசாரோபி ‘‘கா³மோ’’ த்வேவ ஸங்க³ஹிதோ. தஸ்மா கா³மஸ்ஸ அரஞ்ஞபா⁴வப்பஸங்கோ³ ந யுஜ்ஜதி. யதி³ ஏவங் ‘‘ட²பெத்வா கா³மங் அவஸேஸங் அரஞ்ஞங் நாமா’’தி எத்தகங் வத்தப்³ப³ந்தி சே? ந, அரஞ்ஞஸ்ஸ பரிச்சே²த³ஜானநப்பஸங்க³தோ. ததா² ஹி வுத்தோ ‘‘அரஞ்ஞபரிச்சே²தோ³ ந பஞ்ஞாயதீ’’தி நோ லத்³தி⁴. கா³மூபசாரபரியந்தோ ஹி இத⁴ கா³மோ நாம. யதி³ ஏவங் ‘‘கா³மஸ்ஸ ச அரஞ்ஞஸ்ஸ ச பரிச்சே²த³த³ஸ்ஸனத்த²ங் வுத்த’’ந்தி அட்ட²கதா²யங் வத்தப்³ப³ங், ‘‘அரஞ்ஞஸ்ஸ பரிச்சே²த³த³ஸ்ஸனத்த²ங் வுத்த’’ந்தி கிமத்த²ங் வுத்தந்தி சே? வுச்சதே – அட்ட²கதா²சரியேன பட²மகா³மூபசாரங்யேவ ஸந்தா⁴ய வுத்தங் ‘‘அரஞ்ஞபரிச்சே²த³த³ஸ்ஸனத்த²’’ந்தி ஸப்³ப³ஸிக்கா²பதே³ ஹி பா³ஹிரஇந்த³கீ²லதோ பட்டா²ய கா³மூபசாரங் அரஞ்ஞங் நாம. கா³மபரிச்சே²த³வசனே பயோஜனங் பனெத்த² நத்தி² பரிக்கே²பேனேவ பாகடபூ⁴தத்தா. து³தியகா³மூபசாரோவ கா³மஸ்ஸ பரிச்சே²த³த³ஸ்ஸனத்த²ங் வுத்தோ பரிக்கே²பபா⁴வேன அபாகடத்தா. தத்த² பட²மகா³மூபசாரோ சே அரஞ்ஞபரிச்சே²த³த³ஸ்ஸனத்த²ங் வுத்தோ, தத்த² ந வத்தப்³போ³. ‘‘நிக்க²மித்வா இந்த³கீ²லா ஸப்³ப³மேதங் அரஞ்ஞ’’ந்தி வத்தப்³ப³ங். ஏவங் ஸந்தே ஸுப்³யத்ததரங் அரஞ்ஞபரிச்சே²தோ³ த³ஸ்ஸிதோ ஹோதி, மிச்சா²கா³ஹோ ச ந ஹோதி.

    ‘‘Ṭhapetvā gāmūpacāraṃ avasesaṃ araññaṃ nāmā’’ti (mahāva. 144) vutte gāmūpacārato paro araññanti siddhe ‘‘ṭhapetvā gāma’’nti visesattho na dissati, gāmassa pana araññabhāvappasaṅgabhayā vuttanti ce? Na, gāmūpacārassa abhāvappasaṅgato. Sati hi gāme gāmūpacāro hoti, so ca tava matena araññabhūto. Kuto dāni gāmūpacāro. Gāmūpacāropi ce araññasaṅkhyaṃ gacchati, parova gāmoti katvā na yuttaṃ gāmassa araññabhāvappasaṅgato ca. Tasmā ‘‘gāmā vā araññā vā’’ti ettha gāmūpacāropi ‘‘gāmo’’ tveva saṅgahito. Tasmā gāmassa araññabhāvappasaṅgo na yujjati. Yadi evaṃ ‘‘ṭhapetvā gāmaṃ avasesaṃ araññaṃ nāmā’’ti ettakaṃ vattabbanti ce? Na, araññassa paricchedajānanappasaṅgato. Tathā hi vutto ‘‘araññaparicchedo na paññāyatī’’ti no laddhi. Gāmūpacārapariyanto hi idha gāmo nāma. Yadi evaṃ ‘‘gāmassa ca araññassa ca paricchedadassanatthaṃ vutta’’nti aṭṭhakathāyaṃ vattabbaṃ, ‘‘araññassa paricchedadassanatthaṃ vutta’’nti kimatthaṃ vuttanti ce? Vuccate – aṭṭhakathācariyena paṭhamagāmūpacāraṃyeva sandhāya vuttaṃ ‘‘araññaparicchedadassanattha’’nti sabbasikkhāpade hi bāhiraindakhīlato paṭṭhāya gāmūpacāraṃ araññaṃ nāma. Gāmaparicchedavacane payojanaṃ panettha natthi parikkhepeneva pākaṭabhūtattā. Dutiyagāmūpacārova gāmassa paricchedadassanatthaṃ vutto parikkhepabhāvena apākaṭattā. Tattha paṭhamagāmūpacāro ce araññaparicchedadassanatthaṃ vutto, tattha na vattabbo. ‘‘Nikkhamitvā indakhīlā sabbametaṃ arañña’’nti vattabbaṃ. Evaṃ sante subyattataraṃ araññaparicchedo dassito hoti, micchāgāho ca na hoti.

    ‘‘மஜ்ஜி²மஸ்ஸ புரிஸஸ்ஸ லெட்³டு³பாதோ’’தி ஹி வுத்தே அயங் கா³மூபசாரோவ அரஞ்ஞங் கா³மூபசாரஸ்ஸ விப⁴ங்க³த்தா. யதி³ அரஞ்ஞபரிச்சே²த³த³ஸ்ஸனத்த²ங் வுத்தங், அவுத்தகமேவ, அரஞ்ஞதோ பரந்தி ச மிச்சா²கா³ஹோ ஹோதீதி சே, நனு வுத்தங் ‘‘பட²மமேவ இத³ங் பரிக்கி²த்தஸ்ஸ கா³மஸ்ஸ உபசாரனியமனத்த²ங் வுத்த’’ந்தி? அரஞ்ஞபரிச்சே²த³த³ஸ்ஸனத்த²ங் கிஞ்சாபி ‘‘கா³மூபசாரோ’’திஆதி³ ஆரத்³த⁴ங், இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லெட்³டு³பாதோதி பன ஏவங் வசனப்பயோஜனங். அபரிக்கி²த்தஸ்ஸ ச கா³மஸ்ஸ ய்வாயங் லெட்³டு³பாதோ உபசாரோ’’தி மஹாஅட்ட²கதா²யங் வுத்தோ, தஸ்ஸ நியமனந்தி வுத்தங் ஹோதி. கத²ங் பஞ்ஞாயதீதி சே? ‘‘அரஞ்ஞங் நாமா’’தி பத³ங் அனுத்³த⁴ரித்வா ‘‘கா³மூபசாரோ நாமா’’தி உத்³த⁴ரணஸ்ஸ கதத்தா. தத்த² ‘‘கா³மூபசாரோ நாமா’’தி மாதிகாயங் அவிஜ்ஜமானங் பத³ங் உத்³த⁴ரந்தோ தயோ அத்த²வஸே த³ஸ்ஸேதி. ஸெய்யதி²த³ங் – அரஞ்ஞபரிச்சே²த³த³ஸ்ஸனமேகோ அத்தோ², அபரிக்கி²த்தஸ்ஸ கா³மஸ்ஸ உபசாரேன ஸத்³தி⁴ங் பரிச்சே²த³த³ஸ்ஸனமேகோ, ந கேவலங் அபரிக்கி²த்தஸ்ஸயேவ உபசாரோ வினயாதி⁴காரே ஸப்பயோஜனோ த³ஸ்ஸிதப்³போ³, நிப்பயோஜனோபி பரிக்கி²த்தஸ்ஸ உபசாரோ இமினா பரியாயேன லப்³ப⁴தீதி அனுஸங்க³ப்பயோஜனமேகோ அத்தோ²பி வேதி³தப்³போ³.

    ‘‘Majjhimassa purisassa leḍḍupāto’’ti hi vutte ayaṃ gāmūpacārova araññaṃ gāmūpacārassa vibhaṅgattā. Yadi araññaparicchedadassanatthaṃ vuttaṃ, avuttakameva, araññato paranti ca micchāgāho hotīti ce, nanu vuttaṃ ‘‘paṭhamameva idaṃ parikkhittassa gāmassa upacāraniyamanatthaṃ vutta’’nti? Araññaparicchedadassanatthaṃ kiñcāpi ‘‘gāmūpacāro’’tiādi āraddhaṃ, indakhīle ṭhitassa majjhimassa purisassa leḍḍupātoti pana evaṃ vacanappayojanaṃ. Aparikkhittassa ca gāmassa yvāyaṃ leḍḍupāto upacāro’’ti mahāaṭṭhakathāyaṃ vutto, tassa niyamananti vuttaṃ hoti. Kathaṃ paññāyatīti ce? ‘‘Araññaṃ nāmā’’ti padaṃ anuddharitvā ‘‘gāmūpacāro nāmā’’ti uddharaṇassa katattā. Tattha ‘‘gāmūpacāro nāmā’’ti mātikāyaṃ avijjamānaṃ padaṃ uddharanto tayo atthavase dasseti. Seyyathidaṃ – araññaparicchedadassanameko attho, aparikkhittassa gāmassa upacārena saddhiṃ paricchedadassanameko, na kevalaṃ aparikkhittassayeva upacāro vinayādhikāre sappayojano dassitabbo, nippayojanopi parikkhittassa upacāro iminā pariyāyena labbhatīti anusaṅgappayojanameko atthopi veditabbo.

    ‘‘அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லெட்³டு³பாதோ’’தி இத³ங் ப⁴க³வா தயோ அத்த²வஸே படிச்ச அபா⁴ஸி. ஸெய்யதி²த³ங் – அபரிக்கி²த்தஸ்ஸ கா³மஸ்ஸ பரிச்சே²த³த³ஸ்ஸனமேகோ, அவிப்பவாஸஸீமாதி⁴காரே அயமேவ கா³மூபசாரோதி த³ஸ்ஸனமேகோ, தத்த² டி²தஸ்ஸ து³தியோ லெட்³டு³பாதோ ஸப்³ப³த்த² கா³மப்படிஸங்யுத்தேஸு ஸிக்கா²பதே³ஸு ஸகிச்சகோ உபசாரோதி த³ஸ்ஸனமேகோதி ஏவங் ப⁴க³வா அத்தனோ தே³ஸனாவிலாஸப்பத்தியா ஏகேகபது³த்³தா⁴ரணேன தயோ அத்த²வஸே த³ஸ்ஸேதீதி வேதி³தப்³ப³ங்.

    ‘‘Aparikkhittassa gāmassa gharūpacāre ṭhitassa majjhimassa purisassa leḍḍupāto’’ti idaṃ bhagavā tayo atthavase paṭicca abhāsi. Seyyathidaṃ – aparikkhittassa gāmassa paricchedadassanameko, avippavāsasīmādhikāre ayameva gāmūpacāroti dassanameko, tattha ṭhitassa dutiyo leḍḍupāto sabbattha gāmappaṭisaṃyuttesu sikkhāpadesu sakiccako upacāroti dassanamekoti evaṃ bhagavā attano desanāvilāsappattiyā ekekapaduddhāraṇena tayo atthavase dassetīti veditabbaṃ.

    ததா² அவிப்பவாஸஸீமாகம்மவாசாய ‘‘ட²பெத்வா கா³மஞ்ச கா³மூபசாரஞ்சா’’தி (மஹாவ॰ 144) எத்தா²பி பரிக்கே²பே ஸதி கா³மங் ட²பெத்வா, அஸதி கா³மூபசாரங் ட²பெத்வாதி அத்தோ². பரிக்கி²த்தஸ்ஸ, அபரிக்கி²த்தஸ்ஸ ச மஜ்ஜே² ஆராமே அவிப்பவாஸஸீமாஸம்மன்னநகாலே அயங் நயோ அதிவிய யுஜ்ஜதி. உப⁴யபரிவஜ்ஜனதோ புப்³பே³ வுத்தனயேன வா உப⁴யத்த² உப⁴யங் லப்³ப⁴தேவ. ‘‘அந்தராராமேஸு பன ஆசிண்ணகப்பா பி⁴க்கூ² அவிப்பவாஸஸீமங் ஸம்மன்னந்தீ’’தி க³ண்டி²பதே³ வுத்தங். ‘‘அந்தரக⁴ரப்படிஸங்யுத்தானங் ஸேகி²யானங் அந்தராராமேஸு அஸம்ப⁴வதோ அந்தராராமோ ந கா³மஸங்க²ங் க³ச்ச²தி, தஸ்மா தத்த²பி அவிப்பவாஸஸீமா ருஹதேவா’’தி ஏகே. தே பி⁴க்கூ² து³தியஸ்ஸ கா³மூபசாரஸ்ஸ கா³மஸங்கா²ஸபா⁴வதோ தாஸங் இமாய து³தியாய அவிப்பவாஸகம்மவாசாய அபா⁴வங் த³ஸ்ஸெத்வா படிக்கி²பிதப்³பா³. அஜ்ஜா²ராமோ பன கா³மோபி ஸமானோ தித்தி²யஸெய்யாதி³ விய கப்பியபூ⁴மீதி வேதி³தப்³போ³.

    Tathā avippavāsasīmākammavācāya ‘‘ṭhapetvā gāmañca gāmūpacārañcā’’ti (mahāva. 144) etthāpi parikkhepe sati gāmaṃ ṭhapetvā, asati gāmūpacāraṃ ṭhapetvāti attho. Parikkhittassa, aparikkhittassa ca majjhe ārāme avippavāsasīmāsammannanakāle ayaṃ nayo ativiya yujjati. Ubhayaparivajjanato pubbe vuttanayena vā ubhayattha ubhayaṃ labbhateva. ‘‘Antarārāmesu pana āciṇṇakappā bhikkhū avippavāsasīmaṃ sammannantī’’ti gaṇṭhipade vuttaṃ. ‘‘Antaragharappaṭisaṃyuttānaṃ sekhiyānaṃ antarārāmesu asambhavato antarārāmo na gāmasaṅkhaṃ gacchati, tasmā tatthapi avippavāsasīmā ruhatevā’’ti eke. Te bhikkhū dutiyassa gāmūpacārassa gāmasaṅkhāsabhāvato tāsaṃ imāya dutiyāya avippavāsakammavācāya abhāvaṃ dassetvā paṭikkhipitabbā. Ajjhārāmo pana gāmopi samāno titthiyaseyyādi viya kappiyabhūmīti veditabbo.

    ஆபத்தியா பரிச்சே²த³ங், ததா²னாபத்தியாபி ச;

    Āpattiyā paricchedaṃ, tathānāpattiyāpi ca;

    த³ஸ்ஸேதுங் கா³மஸம்ப³ந்த⁴-ஸிக்கா²பத³விபா⁴வனே.

    Dassetuṃ gāmasambandha-sikkhāpadavibhāvane.

    கா³மகா³மூபசாரா த்³வே, த³ஸ்ஸிதா இத⁴ தாதி³னா;

    Gāmagāmūpacārā dve, dassitā idha tādinā;

    ஸீமா ஸீமூபசாரா து, அனேகந்தாதி நுத்³த⁴டா.

    Sīmā sīmūpacārā tu, anekantāti nuddhaṭā.

    உபசாரா ச த்³வே ஹொந்தி, பா³ஹிரப்³ப⁴ந்தரப்³ப³ஸா;

    Upacārā ca dve honti, bāhirabbhantarabbasā;

    பரிக்கி²த்தாபரிக்கி²த்த-பே⁴தா³ சே சதுரோ ஸியுங்.

    Parikkhittāparikkhitta-bhedā ce caturo siyuṃ.

    அயஞ்ஹி உபசாரஸத்³தோ³ வினயபிடகே ‘‘அனுஜானாமி, பி⁴க்க²வே, அகி³லானேனபி ஆராமே ஆராமூபசாரே ச²த்தங் தா⁴ரேது’’ந்தி (சூளவ॰ 270) ஏவமாதீ³ஸு பா³ஹிரே உபசாரே தி³ஸ்ஸதி. பா³ஹிரோ உபசாரோ நாம பரிக்கே²பதோ, பரிக்கே²பாரஹட்டா²னதோ வா ஏகோ லெட்³டு³பாதோ. ‘‘அஜ்ஜா²ராமோ நாம பரிக்கி²த்தஸ்ஸ ஆராமஸ்ஸ அந்தோஆராமோ, அபரிக்கி²த்தஸ்ஸ உபசாரோ. அஜ்ஜா²வஸதோ² நாம பரிக்கி²த்தஸ்ஸ ஆவஸத²ஸ்ஸ அந்தோஆவஸதோ², அபரிக்கி²த்தஸ்ஸ உபசாரோ’’திஆதீ³ஸு (பாசி॰ 506) பன உபசாரஸத்³தோ³ அப்³ப⁴ந்தரே உபசாரே தி³ஸ்ஸதி. அப்³ப⁴ந்தரோ உபசாரோ ச நாம பரிக்கே²போ, பரிக்கே²பாரஹட்டா²னஞ்ச ஹோதி. இத⁴ பன பரிக்கே²போ ‘‘அஜ்ஜா²ராமோ, அஜ்ஜா²வஸதோ²’’தி வா ந வுச்சதி, அந்தோ ஏவ ஆராமோ, ஆவஸதோ²தி வா. தேஸு பா³ஹிரப்³ப⁴ந்தரபே⁴த³பி⁴ன்னேஸு த்³வீஸு உபசாரேஸு அவிப்பவாஸஸீமாதி⁴காரே ‘‘ட²பெத்வா கா³மஞ்ச கா³மூபசாரஞ்சா’’தி (மஹாவ॰ 144) எத்த² கா³மூபசாரோ நாம அப்³ப⁴ந்தரூபசாரோ அதி⁴ப்பேதோ, ந பா³ஹிரோ. பி⁴க்கு²னியா அரஞ்ஞஸஞ்ஞிததாய தஸ்ஸ பா³ஹிரஸ்ஸ, தஸ்ஸா கா³மந்தராபத்தியா டா²னபூ⁴தத்தா ச அப்³ப⁴ந்தரஉபசாரஸ்ஸாதி இத³மெத்த² காரணத்³வயங் வேதி³தப்³ப³ங். தத்த² இத⁴ அதி³ன்னாதா³னபாராஜிகவிப⁴ங்கே³யேவ பட²மோ கா³மூபசாரோ த³ஸ்ஸிதோ, ஸோ பா³ஹிரோ, து³தியோ அப்³ப⁴ந்தரோதி வேதி³தப்³போ³. பட²மேன ச அபரிக்கி²த்தஸ்ஸ கா³மஸ்ஸ து³தியலெட்³டு³பாதஸங்கா²தோ பா³ஹிரோ உபசாரோ, து³தியேன ச பரிக்கி²த்தஸ்ஸ கா³மஸ்ஸ பரிக்கே²பதோ பா³ஹிரஸங்கா²தோ அப்³ப⁴ந்தரோ உபசாரோ லேஸேன த³ஸ்ஸிதோதி வேதி³தப்³போ³. ஏவங் சத்தாரோபி உபசாரா இத⁴ ப⁴க³வதா தே³ஸனாவிலாஸப்பத்தேன தே³ஸனாலீலாய த³ஸ்ஸிதா ஹொந்தீதி அயங் நயோ ஸுட்டு² லக்கெ²த்வா ஆசரியேஹி ஸம்மந்தயித்வா யதா²னுரூபங் தத்த² யோஜேதப்³போ³. இதரதா² –

    Ayañhi upacārasaddo vinayapiṭake ‘‘anujānāmi, bhikkhave, agilānenapi ārāme ārāmūpacāre chattaṃ dhāretu’’nti (cūḷava. 270) evamādīsu bāhire upacāre dissati. Bāhiro upacāro nāma parikkhepato, parikkhepārahaṭṭhānato vā eko leḍḍupāto. ‘‘Ajjhārāmo nāma parikkhittassa ārāmassa antoārāmo, aparikkhittassa upacāro. Ajjhāvasatho nāma parikkhittassa āvasathassa antoāvasatho, aparikkhittassa upacāro’’tiādīsu (pāci. 506) pana upacārasaddo abbhantare upacāre dissati. Abbhantaro upacāro ca nāma parikkhepo, parikkhepārahaṭṭhānañca hoti. Idha pana parikkhepo ‘‘ajjhārāmo, ajjhāvasatho’’ti vā na vuccati, anto eva ārāmo, āvasathoti vā. Tesu bāhirabbhantarabhedabhinnesu dvīsu upacāresu avippavāsasīmādhikāre ‘‘ṭhapetvā gāmañca gāmūpacārañcā’’ti (mahāva. 144) ettha gāmūpacāro nāma abbhantarūpacāro adhippeto, na bāhiro. Bhikkhuniyā araññasaññitatāya tassa bāhirassa, tassā gāmantarāpattiyā ṭhānabhūtattā ca abbhantaraupacārassāti idamettha kāraṇadvayaṃ veditabbaṃ. Tattha idha adinnādānapārājikavibhaṅgeyeva paṭhamo gāmūpacāro dassito, so bāhiro, dutiyo abbhantaroti veditabbo. Paṭhamena ca aparikkhittassa gāmassa dutiyaleḍḍupātasaṅkhāto bāhiro upacāro, dutiyena ca parikkhittassa gāmassa parikkhepato bāhirasaṅkhāto abbhantaro upacāro lesena dassitoti veditabbo. Evaṃ cattāropi upacārā idha bhagavatā desanāvilāsappattena desanālīlāya dassitā hontīti ayaṃ nayo suṭṭhu lakkhetvā ācariyehi sammantayitvā yathānurūpaṃ tattha yojetabbo. Itarathā –

    அஸம்பு³த⁴ங் பு³த்³த⁴மஹானுபா⁴வங்;

    Asambudhaṃ buddhamahānubhāvaṃ;

    த⁴ம்மஸ்ஸ க³ம்பீ⁴ரனயத்ததஞ்ச;

    Dhammassa gambhīranayattatañca;

    யோ வண்ணயே நங் வினயங் அவிஞ்ஞூ;

    Yo vaṇṇaye naṃ vinayaṃ aviññū;

    ஸோ து³த்³த³ஸோ ஸாஸனநாஸஹேது.

    So duddaso sāsananāsahetu.

    பாளிங் தத³த்த²ஞ்ச அஸம்பு³த⁴ஞ்ஹி;

    Pāḷiṃ tadatthañca asambudhañhi;

    நாஸேதி யோ அட்ட²கதா²னயஞ்ச;

    Nāseti yo aṭṭhakathānayañca;

    அனிச்ச²யங் நிச்ச²யதோ பரேஹி;

    Anicchayaṃ nicchayato parehi;

    கா³மோதி தேயேவ புரக்க²தோ ஸோ.

    Gāmoti teyeva purakkhato so.

    அனுக்கமேனேவ மஹாஜனேன;

    Anukkameneva mahājanena;

    புரக்க²தோ பண்டி³தமானி பி⁴க்கு²;

    Purakkhato paṇḍitamāni bhikkhu;

    அபண்டி³தானங் விமதிங் அகத்வா;

    Apaṇḍitānaṃ vimatiṃ akatvā;

    ஆசரியலீலங் புரதோ கரோதி.

    Ācariyalīlaṃ purato karoti.

    தத்த² ஹி பாளியங் ‘‘கா³மஸ்ஸ உபசாரோ கா³மூபசாரோ, கா³மஸங்கா²தோ உபசாரோ கா³மூபசாரோ நாமா’’தி உத்³த⁴ரித்வா கா³மஸ்ஸ உபசாரங் த³ஸ்ஸெந்தோ ‘‘இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லெட்³டு³பாதோ’’தி (பாரா॰ 92) வத்வா புன கா³மஸங்கா²தங் உபசாரங் த³ஸ்ஸெந்தோ ‘‘க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லெட்³டு³பாதோ’’தி வுத்தங். இமமத்த²ங் ஸந்தா⁴ய விகாலே கா³மப்பவேஸனகா³மந்தரஅஅப்பவாஸஸம்முதிஆதீ³ஸு பரிக்கே²பாரஹட்டா²னமேவ கா³மூபசாரந்தி வுத்தந்தி லிகி²தங்.

    Tattha hi pāḷiyaṃ ‘‘gāmassa upacāro gāmūpacāro, gāmasaṅkhāto upacāro gāmūpacāro nāmā’’ti uddharitvā gāmassa upacāraṃ dassento ‘‘indakhīle ṭhitassa majjhimassa purisassa leḍḍupāto’’ti (pārā. 92) vatvā puna gāmasaṅkhātaṃ upacāraṃ dassento ‘‘gharūpacāre ṭhitassa majjhimassa purisassa leḍḍupāto’’ti vuttaṃ. Imamatthaṃ sandhāya vikāle gāmappavesanagāmantaraaappavāsasammutiādīsu parikkhepārahaṭṭhānameva gāmūpacāranti vuttanti likhitaṃ.

    அத்த²தோ ஏகந்தி எத்த² ஸங்கா²ஸத்³த³ங் ஸங்கா²தஸத்³தே³ன ஸமானயதி. ‘‘ஆதி³யெய்யா’’தி இத³ங் பஞ்சவீஸதியா அவஹாரானங் ஸாதா⁴ரணபத³ங். டா²னாசாவனவஸேன ச கீ²லாதீ³னி ஸங்காமெத்வா கெ²த்தாதி³க்³க³ஹணவஸேன சாதி அத்தோ². டா²னாசாவனே யதா² ஸாமிகஸ்ஸ து⁴ரனிக்கே²பாதி³ங் அனோலோகெத்வாவ ஆபத்தி, ததா² இஹாபீதி க³ஹேதப்³பா³.

    Atthatoekanti ettha saṅkhāsaddaṃ saṅkhātasaddena samānayati. ‘‘Ādiyeyyā’’ti idaṃ pañcavīsatiyā avahārānaṃ sādhāraṇapadaṃ. Ṭhānācāvanavasena ca khīlādīni saṅkāmetvā khettādiggahaṇavasena cāti attho. Ṭhānācāvane yathā sāmikassa dhuranikkhepādiṃ anoloketvāva āpatti, tathā ihāpīti gahetabbā.

    ‘‘அஸுகங் நாம ப⁴ண்ட³ங் அவஹரிஸ்ஸாமீ’’தி ஸப்³பே³ஸங் ஏகாஸயத்தா ‘‘ஏகேனாபீ’’தி வுத்தங். யதி³ ஆணத்தி இச்சி²தப்³பா³, ஸங்விதா⁴வஹாரோ நாம ஏகோ அவஹாரோ பரிஹாயிதப்³போ³.

    ‘‘Asukaṃ nāma bhaṇḍaṃ avaharissāmī’’ti sabbesaṃ ekāsayattā ‘‘ekenāpī’’ti vuttaṃ. Yadi āṇatti icchitabbā, saṃvidhāvahāro nāma eko avahāro parihāyitabbo.

    ஓகாஸபரிகப்பே டா²னாசாவனாய க³ஹிதம்பி ஓகாஸபரிகப்பிதத்தா ரக்க²தி. ஓகாஸாதிக்கமோவ பமாணங் புப்³பே³ அஸுத்³த⁴சித்தேன க³ஹிதத்தா. இதா³னி ஸுத்³த⁴சித்தேன க³ஹிதேபி ஹோதி ஏவாதி வத³ந்தி, தங் ந ஸுந்த³ரங். எத்த² பன வினிச்ச²யோ ஸமந்தபாஸாதி³கங் ஓலோகெத்வா க³ஹேதப்³போ³.

    Okāsaparikappe ṭhānācāvanāya gahitampi okāsaparikappitattā rakkhati. Okāsātikkamova pamāṇaṃ pubbe asuddhacittena gahitattā. Idāni suddhacittena gahitepi hoti evāti vadanti, taṃ na sundaraṃ. Ettha pana vinicchayo samantapāsādikaṃ oloketvā gahetabbo.

    உத்³தா⁴ரோ நத்தீ²தி டா²னாசாவனங் நத்தீ²தி அத்தோ².

    Uddhāro natthīti ṭhānācāvanaṃ natthīti attho.

    உத்³த⁴தமத்தே அவஹாரோ ஸகலஸ்ஸ பயோக³ஸ்ஸ நிட்டா²பிதத்தா, ந அத்த²ஸாத⁴கவஸேன. உத்³தா⁴ரேயேவ ரக்க²தீதி எத்த² ஏவ-ஸத்³தே³ன பாதனே ந ரக்க²தீதி அத்தே² ஸித்³தே⁴பி அத்த²ஸாத⁴கவஸேன அத்த²ங் த³ஸ்ஸேதுங் ‘‘தங் உத்³த⁴ரித்வா’’திஆதி³ வுத்தங்.

    Uddhatamatte avahāro sakalassa payogassa niṭṭhāpitattā, na atthasādhakavasena. Uddhāreyeva rakkhatīti ettha eva-saddena pātane na rakkhatīti atthe siddhepi atthasādhakavasena atthaṃ dassetuṃ ‘‘taṃ uddharitvā’’tiādi vuttaṃ.

    ‘‘பத²ப்³யாராஜபதே³ஸராஜாத³யோ ப³ஹூ, தேஸங் ஸங்க³ண்ஹனத்த²ங் ‘ராஜானோ’தி ப³ஹுவசனங் வுத்த’’ந்தி லிகி²தங். கிஞ்சாபி ப³ஹுவசனங் கதங், இத³ங் பன ஏகங் பி³ம்பி³ஸாரமேவாதி த³ட்ட²ப்³ப³ங். ராஜானோதி கிஞ்சி அனித்³தி³ஸித்வா ஸாதா⁴ரணவஸேன கிஞ்சாபி வுத்தங், இத³ங் பன பி³ம்பி³ஸாரமேவாதி.

    ‘‘Pathabyārājapadesarājādayo bahū, tesaṃ saṅgaṇhanatthaṃ ‘rājāno’ti bahuvacanaṃ vutta’’nti likhitaṃ. Kiñcāpi bahuvacanaṃ kataṃ, idaṃ pana ekaṃ bimbisāramevāti daṭṭhabbaṃ. Rājānoti kiñci aniddisitvā sādhāraṇavasena kiñcāpi vuttaṃ, idaṃ pana bimbisāramevāti.

    புப்³ப³ப்பயோகே³தி எத்த² க³மனகாலே மக்³க³ஸோத⁴னாதி⁴கரணே அபாசித்தியகெ²த்தே து³க்கடங், லதாச்சே²த³னாதீ³ஸு பாசித்தியமேவ. க³ந்த்வா பன கும்பி⁴மத்த²கே ஜாதலதாதி³ச்சே²த³னே ஸஹபயோக³த்தா து³க்கடங். ‘‘ஏகப⁴ண்டே³ ஏவங் பா⁴ரியமித³ங், ‘த்வம்பி ஏகபஸ்ஸங் க³ண்ஹ, அஹம்பி ஏகபஸ்ஸங் க³ண்ஹாமீ’தி ஸங்வித³ஹித்வா உப⁴யேஸங் பயோகே³ன டா²னாசாவனே கதே காயவாசாசித்தேஹி ஸமுட்டா²தி. அஞ்ஞதா² ஸாஹத்தி²கங் வா ஆணத்திகஸ்ஸ அங்க³ங் ந ஹோதி , ஆணத்திகங் வா ஸாஹத்தி²கஸ்ஸாதி வுத்தலக்க²ணேன விருஜ்ஜ²தீ’’தி வினயக³ண்டி²பதே³ லிகி²தங். பி-ஸத்³தோ³ பனெத்த² தத்தே²வ லிகி²தோ.

    Pubbappayogeti ettha gamanakāle maggasodhanādhikaraṇe apācittiyakhette dukkaṭaṃ, latācchedanādīsu pācittiyameva. Gantvā pana kumbhimatthake jātalatādicchedane sahapayogattā dukkaṭaṃ. ‘‘Ekabhaṇḍe evaṃ bhāriyamidaṃ, ‘tvampi ekapassaṃ gaṇha, ahampi ekapassaṃ gaṇhāmī’ti saṃvidahitvā ubhayesaṃ payogena ṭhānācāvane kate kāyavācācittehi samuṭṭhāti. Aññathā sāhatthikaṃ vā āṇattikassa aṅgaṃ na hoti , āṇattikaṃ vā sāhatthikassāti vuttalakkhaṇena virujjhatī’’ti vinayagaṇṭhipade likhitaṃ. Pi-saddo panettha tattheva likhito.

    காயவாசாஸமுட்டா²னங், யஸ்ஸா ஆபத்தியா ஸியா;

    Kāyavācāsamuṭṭhānaṃ, yassā āpattiyā siyā;

    தத்ர வாசங்க³ங் சித்தங்வ, கம்மங் நஸ்ஸா விதீ⁴யதி.

    Tatra vācaṅgaṃ cittaṃva, kammaṃ nassā vidhīyati.

    கிரியாகிரியாதி³கங் யஞ்சே, யம்பி கம்மத்தயங் ப⁴வே;

    Kiriyākiriyādikaṃ yañce, yampi kammattayaṃ bhave;

    ந யுத்தங் தங் விருத்³த⁴த்தா, கம்மமேகங்வ யுஜ்ஜதீதி. (வஜிர॰ டீ॰ பாராஜிக 131 பகிண்ணககதா²வண்ணனா);

    Na yuttaṃ taṃ viruddhattā, kammamekaṃva yujjatīti. (vajira. ṭī. pārājika 131 pakiṇṇakakathāvaṇṇanā);

    து³தியபாராஜிகவண்ணனா நிட்டி²தா.

    Dutiyapārājikavaṇṇanā niṭṭhitā.





    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact