| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
2. து³தியஸிக்கா²பத³ங்
2. Dutiyasikkhāpadaṃ
798. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ஸம்பா³தே⁴ லோமங் ஸங்ஹராபெத்வா அசிரவதியா நதி³யா வேஸியாஹி ஸத்³தி⁴ங் நக்³கா³ ஏகதித்தே² நஹாயந்தி. வேஸியா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ ஸம்பா³தே⁴ லோமங் ஸங்ஹராபெஸ்ஸந்தி, ஸெய்யதா²பி கி³ஹினியோ காமபோ⁴கி³னியோ’’தி! அஸ்ஸோஸுங் கோ² பி⁴க்கு²னியோ தாஸங் வேஸியானங் உஜ்ஜா²யந்தீனங் கி²ய்யந்தீனங் விபாசெந்தீனங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ ஸம்பா³தே⁴ லோமங் ஸங்ஹராபெஸ்ஸந்தீ’’தி…பே॰… ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கு²னியோ ஸம்பா³தே⁴ லோமங் ஸங்ஹராபெந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ ஸம்பா³தே⁴ லோமங் ஸங்ஹராபெஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
798. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo sambādhe lomaṃ saṃharāpetvā aciravatiyā nadiyā vesiyāhi saddhiṃ naggā ekatitthe nahāyanti. Vesiyā ujjhāyanti khiyyanti vipācenti – ‘‘kathañhi nāma bhikkhuniyo sambādhe lomaṃ saṃharāpessanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tāsaṃ vesiyānaṃ ujjhāyantīnaṃ khiyyantīnaṃ vipācentīnaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo sambādhe lomaṃ saṃharāpessantī’’ti…pe… saccaṃ kira, bhikkhave, chabbaggiyā bhikkhuniyo sambādhe lomaṃ saṃharāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo sambādhe lomaṃ saṃharāpessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
799. ‘‘யா பன பி⁴க்கு²னீ ஸம்பா³தே⁴ லோமங் ஸங்ஹராபெய்ய, பாசித்திய’’ந்தி.
799.‘‘Yā pana bhikkhunī sambādhe lomaṃ saṃharāpeyya, pācittiya’’nti.
800. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
800.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஸம்பா³தோ⁴ நாம உபோ⁴ உபகச்ச²கா, முத்தகரணங்.
Sambādho nāma ubho upakacchakā, muttakaraṇaṃ.
ஸங்ஹராபெய்யாதி ஏகம்பி லோமங் ஸங்ஹராபேதி, ஆபத்தி பாசித்தியஸ்ஸ. ப³ஹுகேபி லோமே ஸங்ஹராபேதி, ஆபத்தி பாசித்தியஸ்ஸ.
Saṃharāpeyyāti ekampi lomaṃ saṃharāpeti, āpatti pācittiyassa. Bahukepi lome saṃharāpeti, āpatti pācittiyassa.
801. அனாபத்தி ஆபா³த⁴பச்சயா, உம்மத்திகாய, ஆதி³கம்மிகாயாதி.
801. Anāpatti ābādhapaccayā, ummattikāya, ādikammikāyāti.
து³தியஸிக்கா²பத³ங் நிட்டி²தங்.
Dutiyasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 2. து³தியஸிக்கா²பத³வண்ணனா • 2. Dutiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. லஸுணவக்³க³வண்ணனா • 1. Lasuṇavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியஸிக்கா²பத³வண்ணனா • 2. Dutiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மலஸுணாதி³ஸிக்கா²பத³வண்ணனா • 1. Paṭhamalasuṇādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. து³தியஸிக்கா²பத³ங் • 2. Dutiyasikkhāpadaṃ
