| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၂. ဒုတိယသိက္ခာပဒံ
2. Dutiyasikkhāpadaṃ
၉၃၆. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ဘိက္ခုနိယော ဒ္ဝေ ဧကတ္ထရဏပာဝုရဏာ တုဝဋ္ဋေန္တိ။ မနုသ္သာ ဝိဟာရစာရိကံ အာဟိဏ္ဍန္တာ ပသ္သိတ္ဝာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနိယော ဒ္ဝေ ဧကတ္ထရဏပာဝုရဏာ တုဝဋ္ဋေသ္သန္တိ, သေယ္ယထာပိ ဂိဟိနိယော ကာမဘောဂိနိယော’’တိ! အသ္သောသုံ ခော ဘိက္ခုနိယော တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနိယော ဒ္ဝေ ဧကတ္ထရဏပာဝုရဏာ တုဝဋ္ဋေသ္သန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ဒ္ဝေ ဧကတ္ထရဏပာဝုရဏာ တုဝဋ္ဋေန္တီတိ? ‘‘သစ္စံ , ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ဘိက္ခုနိယော ဒ္ဝေ ဧကတ္ထရဏပာဝုရဏာ တုဝဋ္ဋေသ္သန္တိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
936. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo dve ekattharaṇapāvuraṇā tuvaṭṭenti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma bhikkhuniyo dve ekattharaṇapāvuraṇā tuvaṭṭessanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo dve ekattharaṇapāvuraṇā tuvaṭṭessantī’’ti…pe… saccaṃ kira, bhikkhave, bhikkhuniyo dve ekattharaṇapāvuraṇā tuvaṭṭentīti? ‘‘Saccaṃ , bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo dve ekattharaṇapāvuraṇā tuvaṭṭessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
၉၃၇. ‘‘ယာ ပန ဘိက္ခုနိယော ဒ္ဝေ ဧကတ္ထရဏပာဝုရဏာ တုဝဋ္ဋေယ္ယုံ, ပာစိတ္တိယ’’န္တိ။
937.‘‘Yā pana bhikkhuniyo dve ekattharaṇapāvuraṇā tuvaṭṭeyyuṃ, pācittiya’’nti.
၉၃၈. ယာ ပနာတိ ယာ ယာဒိသာ။ပေ.။ ဘိက္ခုနိယောတိ ဥပသမ္ပန္နာယော ဝုစ္စန္တိ။
938.Yā panāti yā yādisā…pe… bhikkhuniyoti upasampannāyo vuccanti.
ဒ္ဝေ ဧကတ္ထရဏပာဝုရဏာ တုဝဋ္ဋေယ္ယုန္တိ တညေဝ အတ္ထရိတ္ဝာ တညေဝ ပာရုပန္တိ, အာပတ္တိ ပာစိတ္တိယသ္သ။
Dve ekattharaṇapāvuraṇā tuvaṭṭeyyunti taññeva attharitvā taññeva pārupanti, āpatti pācittiyassa.
၉၃၉. ဧကတ္ထရဏပာဝုရဏေ ဧကတ္ထရဏပာဝုရဏသညာ တုဝဋ္ဋေန္တိ, အာပတ္တိ ပာစိတ္တိယသ္သ။ ဧကတ္ထရဏပာဝုရဏေ ဝေမတိကာ တုဝဋ္ဋေန္တိ, အာပတ္တိ ပာစိတ္တိယသ္သ။ ဧကတ္ထရဏပာဝုရဏေ နာနတ္ထရဏပာဝုရဏသညာ တုဝဋ္ဋေန္တိ, အာပတ္တိ ပာစိတ္တိယသ္သ။
939. Ekattharaṇapāvuraṇe ekattharaṇapāvuraṇasaññā tuvaṭṭenti, āpatti pācittiyassa. Ekattharaṇapāvuraṇe vematikā tuvaṭṭenti, āpatti pācittiyassa. Ekattharaṇapāvuraṇe nānattharaṇapāvuraṇasaññā tuvaṭṭenti, āpatti pācittiyassa.
၉၄၀. အနာပတ္တိ ဝဝတ္ထာနံ ဒသ္သေတ္ဝာ နိပဇ္ဇန္တိ, ဥမ္မတ္တိကာနံ, အာဒိကမ္မိကာနန္တိ။
940. Anāpatti vavatthānaṃ dassetvā nipajjanti, ummattikānaṃ, ādikammikānanti.
ဒုတိယသိက္ခာပဒံ နိဋ္ဌိတံ။
Dutiyasikkhāpadaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၂. ဒုတိယသိက္ခာပဒဝဏ္ဏနာ • 2. Dutiyasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၂. ဒုတိယသိက္ခာပဒဝဏ္ဏနာ • 2. Dutiyasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂. ဒုတိယသိက္ခာပဒံ • 2. Dutiyasikkhāpadaṃ
