| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೨. ದುತಿಯಸುತ್ತನ್ತನಿದ್ದೇಸೋ
2. Dutiyasuttantaniddeso
೧೮೭. ಸಾವತ್ಥಿನಿದಾನಂ। ‘‘ಪಞ್ಚಿಮಾನಿ, ಭಿಕ್ಖವೇ, ಇನ್ದ್ರಿಯಾನಿ। ಕತಮಾನಿ ಪಞ್ಚ? ಸದ್ಧಿನ್ದ್ರಿಯಂ, ವೀರಿಯಿನ್ದ್ರಿಯಂ, ಸತಿನ್ದ್ರಿಯಂ, ಸಮಾಧಿನ್ದ್ರಿಯಂ , ಪಞ್ಞಿನ್ದ್ರಿಯಂ। ಯೇ ಹಿ ಕೇಚಿ, ಭಿಕ್ಖವೇ, ಸಮಣಾ ವಾ ಬ್ರಾಹ್ಮಣಾ ವಾ ಇಮೇಸಂ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯಞ್ಚ ಅತ್ಥಙ್ಗಮಞ್ಚ ಅಸ್ಸಾದಞ್ಚ ಆದೀನವಞ್ಚ ನಿಸ್ಸರಣಞ್ಚ ಯಥಾಭೂತಂ ನಪ್ಪಜಾನನ್ತಿ, ನ ಮೇ ತೇ, ಭಿಕ್ಖವೇ, ಸಮಣಾ ವಾ ಬ್ರಾಹ್ಮಣಾ ವಾ ಸಮಣೇಸು 1 ವಾ ಸಮಣಸಮ್ಮತಾ, ಬ್ರಾಹ್ಮಣೇಸು ವಾ ಬ್ರಾಹ್ಮಣಸಮ್ಮತಾ; ನ ಚ ಪನೇತೇ ಆಯಸ್ಮನ್ತಾ 2 ಸಾಮಞ್ಞತ್ಥಂ ವಾ ಬ್ರಹ್ಮಞ್ಞತ್ಥಂ ವಾ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರನ್ತಿ। ಯೇ ಚ ಖೋ ಕೇಚಿ 3 ಭಿಕ್ಖವೇ ಸಮಣಾ ವಾ ಬ್ರಾಹ್ಮಣಾ ವಾ ಇಮೇಸಂ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯಞ್ಚ ಅತ್ಥಙ್ಗಮಞ್ಚ ಅಸ್ಸಾದಞ್ಚ ಆದೀನವಞ್ಚ ನಿಸ್ಸರಣಞ್ಚ ಯಥಾಭೂತಂ ಪಜಾನನ್ತಿ, ತೇ ಖೋ ಮೇ, ಭಿಕ್ಖವೇ, ಸಮಣಾ ವಾ ಬ್ರಾಹ್ಮಣಾ ವಾ ಸಮಣೇಸು ವಾ ಸಮಣಸಮ್ಮತಾ, ಬ್ರಾಹ್ಮಣೇಸು ವಾ ಬ್ರಾಹ್ಮಣಸಮ್ಮತಾ; ತೇ ಚ ಪನಾಯಸ್ಮನ್ತಾ ಸಾಮಞ್ಞತ್ಥಞ್ಚ ಬ್ರಹ್ಮಞ್ಞತ್ಥಞ್ಚ ದಿಟ್ಠೇವ ಧಮ್ಮೇ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಉಪಸಮ್ಪಜ್ಜ ವಿಹರನ್ತೀ’’ತಿ।
187. Sāvatthinidānaṃ. ‘‘Pañcimāni, bhikkhave, indriyāni. Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ , paññindriyaṃ. Ye hi keci, bhikkhave, samaṇā vā brāhmaṇā vā imesaṃ pañcannaṃ indriyānaṃ samudayañca atthaṅgamañca assādañca ādīnavañca nissaraṇañca yathābhūtaṃ nappajānanti, na me te, bhikkhave, samaṇā vā brāhmaṇā vā samaṇesu 4 vā samaṇasammatā, brāhmaṇesu vā brāhmaṇasammatā; na ca panete āyasmantā 5 sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti. Ye ca kho keci 6 bhikkhave samaṇā vā brāhmaṇā vā imesaṃ pañcannaṃ indriyānaṃ samudayañca atthaṅgamañca assādañca ādīnavañca nissaraṇañca yathābhūtaṃ pajānanti, te kho me, bhikkhave, samaṇā vā brāhmaṇā vā samaṇesu vā samaṇasammatā, brāhmaṇesu vā brāhmaṇasammatā; te ca panāyasmantā sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti.
೧೮೮. ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯೋ ಹೋತಿ; ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯಂ ಪಜಾನಾತಿ? ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅತ್ಥಙ್ಗಮೋ ಹೋತಿ; ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅತ್ಥಙ್ಗಮಂ ಪಜಾನಾತಿ? ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅಸ್ಸಾದೋ ಹೋತಿ, ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅಸ್ಸಾದಂ ಪಜಾನಾತಿ? ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಆದೀನವೋ ಹೋತಿ; ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಆದೀನವಂ ಪಜಾನಾತಿ? ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ನಿಸ್ಸರಣಂ ಹೋತಿ; ಕತಿಹಾಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ನಿಸ್ಸರಣಂ ಪಜಾನಾತಿ?
188. Katihākārehi pañcannaṃ indriyānaṃ samudayo hoti; katihākārehi pañcannaṃ indriyānaṃ samudayaṃ pajānāti? Katihākārehi pañcannaṃ indriyānaṃ atthaṅgamo hoti; katihākārehi pañcannaṃ indriyānaṃ atthaṅgamaṃ pajānāti? Katihākārehi pañcannaṃ indriyānaṃ assādo hoti, katihākārehi pañcannaṃ indriyānaṃ assādaṃ pajānāti? Katihākārehi pañcannaṃ indriyānaṃ ādīnavo hoti; katihākārehi pañcannaṃ indriyānaṃ ādīnavaṃ pajānāti? Katihākārehi pañcannaṃ indriyānaṃ nissaraṇaṃ hoti; katihākārehi pañcannaṃ indriyānaṃ nissaraṇaṃ pajānāti?
ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯೋ ಹೋತಿ; ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯಂ ಪಜಾನಾತಿ। ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅತ್ಥಙ್ಗಮೋ ಹೋತಿ; ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅತ್ಥಙ್ಗಮಂ ಪಜಾನಾತಿ। ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅಸ್ಸಾದೋ ಹೋತಿ; ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅಸ್ಸಾದಂ ಪಜಾನಾತಿ। ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಆದೀನವೋ ಹೋತಿ; ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಆದೀನವಂ ಪಜಾನಾತಿ। ಅಸೀತಿಸತಂ ಆಕಾರೇಹಿ 7 ಪಞ್ಚನ್ನಂ ಇನ್ದ್ರಿಯಾನಂ ನಿಸ್ಸರಣಂ ಹೋತಿ; ಅಸೀತಿಸತಂ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ನಿಸ್ಸರಣಂ ಪಜಾನಾತಿ।
Cattārīsāya ākārehi pañcannaṃ indriyānaṃ samudayo hoti; cattārīsāya ākārehi pañcannaṃ indriyānaṃ samudayaṃ pajānāti. Cattārīsāya ākārehi pañcannaṃ indriyānaṃ atthaṅgamo hoti; cattārīsāya ākārehi pañcannaṃ indriyānaṃ atthaṅgamaṃ pajānāti. Pañcavīsatiyā ākārehi pañcannaṃ indriyānaṃ assādo hoti; pañcavīsatiyā ākārehi pañcannaṃ indriyānaṃ assādaṃ pajānāti. Pañcavīsatiyā ākārehi pañcannaṃ indriyānaṃ ādīnavo hoti; pañcavīsatiyā ākārehi pañcannaṃ indriyānaṃ ādīnavaṃ pajānāti. Asītisataṃ ākārehi 8 pañcannaṃ indriyānaṃ nissaraṇaṃ hoti; asītisataṃ ākārehi pañcannaṃ indriyānaṃ nissaraṇaṃ pajānāti.
ಕತಮೇಹಿ ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯೋ ಹೋತಿ; ಕತಮೇಹಿ ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯಂ ಪಜಾನಾತಿ? ಅಧಿಮೋಕ್ಖತ್ಥಾಯ ಆವಜ್ಜನಾಯ ಸಮುದಯೋ ಸದ್ಧಿನ್ದ್ರಿಯಸ್ಸ ಸಮುದಯೋ ಹೋತಿ, ಅಧಿಮೋಕ್ಖವಸೇನ ಛನ್ದಸ್ಸ ಸಮುದಯೋ ಸದ್ಧಿನ್ದ್ರಿಯಸ್ಸ ಸಮುದಯೋ ಹೋತಿ, ಅಧಿಮೋಕ್ಖವಸೇನ ಮನಸಿಕಾರಸ್ಸ ಸಮುದಯೋ ಸದ್ಧಿನ್ದ್ರಿಯಸ್ಸ ಸಮುದಯೋ ಹೋತಿ, ಸದ್ಧಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ಸದ್ಧಿನ್ದ್ರಿಯಸ್ಸ ಸಮುದಯೋ ಹೋತಿ; ಪಗ್ಗಹತ್ಥಾಯ ಆವಜ್ಜನಾಯ ಸಮುದಯೋ ವೀರಿಯಿನ್ದ್ರಿಯಸ್ಸ ಸಮುದಯೋ ಹೋತಿ, ಪಗ್ಗಹವಸೇನ ಛನ್ದಸ್ಸ ಸಮುದಯೋ ವೀರಿಯಿನ್ದ್ರಿಯಸ್ಸ ಸಮುದಯೋ ಹೋತಿ, ಪಗ್ಗಹವಸೇನ ಮನಸಿಕಾರಸ್ಸ ಸಮುದಯೋ ವೀರಿಯಿನ್ದ್ರಿಯಸ್ಸ ಸಮುದಯೋ ಹೋತಿ, ವೀರಿಯಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ವೀರಿಯಿನ್ದ್ರಿಯಸ್ಸ ಸಮುದಯೋ ಹೋತಿ; ಉಪಟ್ಠಾನತ್ಥಾಯ ಆವಜ್ಜನಾಯ ಸಮುದಯೋ ಸತಿನ್ದ್ರಿಯಸ್ಸ ಸಮುದಯೋ ಹೋತಿ, ಉಪಟ್ಠಾನವಸೇನ ಛನ್ದಸ್ಸ ಸಮುದಯೋ ಸತಿನ್ದ್ರಿಯಸ್ಸ ಸಮುದಯೋ ಹೋತಿ, ಉಪಟ್ಠಾನವಸೇನ ಮನಸಿಕಾರಸ್ಸ ಸಮುದಯೋ ಸತಿನ್ದ್ರಿಯಸ್ಸ ಸಮುದಯೋ ಹೋತಿ, ಸತಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ಸತಿನ್ದ್ರಿಯಸ್ಸ ಸಮುದಯೋ ಹೋತಿ; ಅವಿಕ್ಖೇಪತ್ಥಾಯ ಆವಜ್ಜನಾಯ ಸಮುದಯೋ ಸಮಾಧಿನ್ದ್ರಿಯಸ್ಸ ಸಮುದಯೋ ಹೋತಿ, ಅವಿಕ್ಖೇಪವಸೇನ ಛನ್ದಸ್ಸ ಸಮುದಯೋ ಸಮಾಧಿನ್ದ್ರಿಯಸ್ಸ ಸಮುದಯೋ ಹೋತಿ, ಅವಿಕ್ಖೇಪವಸೇನ ಮನಸಿಕಾರಸ್ಸ ಸಮುದಯೋ ಸಮಾಧಿನ್ದ್ರಿಯಸ್ಸ ಸಮುದಯೋ ಹೋತಿ, ಸಮಾಧಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ಸಮಾಧಿನ್ದ್ರಿಯಸ್ಸ ಸಮುದಯೋ ಹೋತಿ; ದಸ್ಸನತ್ಥಾಯ ಆವಜ್ಜನಾಯ ಸಮುದಯೋ ಪಞ್ಞಿನ್ದ್ರಿಯಸ್ಸ ಸಮುದಯೋ ಹೋತಿ, ದಸ್ಸನವಸೇನ ಛನ್ದಸ್ಸ ಸಮುದಯೋ ಪಞ್ಞಿನ್ದ್ರಿಯಸ್ಸ ಸಮುದಯೋ ಹೋತಿ, ದಸ್ಸನವಸೇನ ಮನಸಿಕಾರಸ್ಸ ಸಮುದಯೋ ಪಞ್ಞಿನ್ದ್ರಿಯಸ್ಸ ಸಮುದಯೋ ಹೋತಿ, ಪಞ್ಞಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ಪಞ್ಞಿನ್ದ್ರಿಯಸ್ಸ ಸಮುದಯೋ ಹೋತಿ। ಅಧಿಮೋಕ್ಖತ್ಥಾಯ ಆವಜ್ಜನಾಯ ಸಮುದಯೋ ಸದ್ಧಿನ್ದ್ರಿಯಸ್ಸ ಸಮುದಯೋ ಹೋತಿ, ಪಗ್ಗಹತ್ಥಾಯ ಆವಜ್ಜನಾಯ ಸಮುದಯೋ ವೀರಿಯಿನ್ದ್ರಿಯಸ್ಸ ಸಮುದಯೋ ಹೋತಿ, ಉಪಟ್ಠಾನತ್ಥಾಯ ಆವಜ್ಜನಾಯ ಸಮುದಯೋ ಸತಿನ್ದ್ರಿಯಸ್ಸ ಸಮುದಯೋ ಹೋತಿ, ಅವಿಕ್ಖೇಪತ್ಥಾಯ ಆವಜ್ಜನಾಯ ಸಮುದಯೋ ಸಮಾಧಿನ್ದ್ರಿಯಸ್ಸ ಸಮುದಯೋ ಹೋತಿ, ದಸ್ಸನತ್ಥಾಯ ಆವಜ್ಜನಾಯ ಸಮುದಯೋ ಪಞ್ಞಿನ್ದ್ರಿಯಸ್ಸ ಸಮುದಯೋ ಹೋತಿ। ಅಧಿಮೋಕ್ಖವಸೇನ ಛನ್ದಸ್ಸ ಸಮುದಯೋ ಸದ್ಧಿನ್ದ್ರಿಯಸ್ಸ ಸಮುದಯೋ ಹೋತಿ, ಪಗ್ಗಹವಸೇನ ಛನ್ದಸ್ಸ ಸಮುದಯೋ ವೀರಿಯಿನ್ದ್ರಿಯಸ್ಸ ಸಮುದಯೋ ಹೋತಿ, ಉಪಟ್ಠಾನವಸೇನ ಛನ್ದಸ್ಸ ಸಮುದಯೋ ಸತಿನ್ದ್ರಿಯಸ್ಸ ಸಮುದಯೋ ಹೋತಿ, ಅವಿಕ್ಖೇಪವಸೇನ ಛನ್ದಸ್ಸ ಸಮುದಯೋ ಸಮಾಧಿನ್ದ್ರಿಯಸ್ಸ ಸಮುದಯೋ ಹೋತಿ, ದಸ್ಸನವಸೇನ ಛನ್ದಸ್ಸ ಸಮುದಯೋ ಪಞ್ಞಿನ್ದ್ರಿಯಸ್ಸ ಸಮುದಯೋ ಹೋತಿ। ಅಧಿಮೋಕ್ಖವಸೇನ ಮನಸಿಕಾರಸ್ಸ ಸಮುದಯೋ ಸದ್ಧಿನ್ದ್ರಿಯಸ್ಸ ಸಮುದಯೋ ಹೋತಿ, ಪಗ್ಗಹವಸೇನ ಮನಸಿಕಾರಸ್ಸ ಸಮುದಯೋ ವೀರಿಯಿನ್ದ್ರಿಯಸ್ಸ ಸಮುದಯೋ ಹೋತಿ, ಉಪಟ್ಠಾನವಸೇನ ಮನಸಿಕಾರಸ್ಸ ಸಮುದಯೋ ಸತಿನ್ದ್ರಿಯಸ್ಸ ಸಮುದಯೋ ಹೋತಿ, ಅವಿಕ್ಖೇಪವಸೇನ ಮನಸಿಕಾರಸ್ಸ ಸಮುದಯೋ ಸಮಾಧಿನ್ದ್ರಿಯಸ್ಸ ಸಮುದಯೋ ಹೋತಿ, ದಸ್ಸನವಸೇನ ಮನಸಿಕಾರಸ್ಸ ಸಮುದಯೋ ಪಞ್ಞಿನ್ದ್ರಿಯಸ್ಸ ಸಮುದಯೋ ಹೋತಿ। ಸದ್ಧಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ಸದ್ಧಿನ್ದ್ರಿಯಸ್ಸ ಸಮುದಯೋ ಹೋತಿ ವೀರಿಯಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ವೀರಿಯಿನ್ದ್ರಿಯಸ್ಸ ಸಮುದಯೋ ಹೋತಿ, ಸತಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ಸತಿನ್ದ್ರಿಯಸ್ಸ ಸಮುದಯೋ ಹೋತಿ, ಸಮಾಧಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ಸಮಾಧಿನ್ದ್ರಿಯಸ್ಸ ಸಮುದಯೋ ಹೋತಿ , ಪಞ್ಞಿನ್ದ್ರಿಯಸ್ಸ ವಸೇನ ಏಕತ್ತುಪಟ್ಠಾನಂ ಪಞ್ಞಿನ್ದ್ರಿಯಸ್ಸ ಸಮುದಯೋ ಹೋತಿ।
Katamehi cattārīsāya ākārehi pañcannaṃ indriyānaṃ samudayo hoti; katamehi cattārīsāya ākārehi pañcannaṃ indriyānaṃ samudayaṃ pajānāti? Adhimokkhatthāya āvajjanāya samudayo saddhindriyassa samudayo hoti, adhimokkhavasena chandassa samudayo saddhindriyassa samudayo hoti, adhimokkhavasena manasikārassa samudayo saddhindriyassa samudayo hoti, saddhindriyassa vasena ekattupaṭṭhānaṃ saddhindriyassa samudayo hoti; paggahatthāya āvajjanāya samudayo vīriyindriyassa samudayo hoti, paggahavasena chandassa samudayo vīriyindriyassa samudayo hoti, paggahavasena manasikārassa samudayo vīriyindriyassa samudayo hoti, vīriyindriyassa vasena ekattupaṭṭhānaṃ vīriyindriyassa samudayo hoti; upaṭṭhānatthāya āvajjanāya samudayo satindriyassa samudayo hoti, upaṭṭhānavasena chandassa samudayo satindriyassa samudayo hoti, upaṭṭhānavasena manasikārassa samudayo satindriyassa samudayo hoti, satindriyassa vasena ekattupaṭṭhānaṃ satindriyassa samudayo hoti; avikkhepatthāya āvajjanāya samudayo samādhindriyassa samudayo hoti, avikkhepavasena chandassa samudayo samādhindriyassa samudayo hoti, avikkhepavasena manasikārassa samudayo samādhindriyassa samudayo hoti, samādhindriyassa vasena ekattupaṭṭhānaṃ samādhindriyassa samudayo hoti; dassanatthāya āvajjanāya samudayo paññindriyassa samudayo hoti, dassanavasena chandassa samudayo paññindriyassa samudayo hoti, dassanavasena manasikārassa samudayo paññindriyassa samudayo hoti, paññindriyassa vasena ekattupaṭṭhānaṃ paññindriyassa samudayo hoti. Adhimokkhatthāya āvajjanāya samudayo saddhindriyassa samudayo hoti, paggahatthāya āvajjanāya samudayo vīriyindriyassa samudayo hoti, upaṭṭhānatthāya āvajjanāya samudayo satindriyassa samudayo hoti, avikkhepatthāya āvajjanāya samudayo samādhindriyassa samudayo hoti, dassanatthāya āvajjanāya samudayo paññindriyassa samudayo hoti. Adhimokkhavasena chandassa samudayo saddhindriyassa samudayo hoti, paggahavasena chandassa samudayo vīriyindriyassa samudayo hoti, upaṭṭhānavasena chandassa samudayo satindriyassa samudayo hoti, avikkhepavasena chandassa samudayo samādhindriyassa samudayo hoti, dassanavasena chandassa samudayo paññindriyassa samudayo hoti. Adhimokkhavasena manasikārassa samudayo saddhindriyassa samudayo hoti, paggahavasena manasikārassa samudayo vīriyindriyassa samudayo hoti, upaṭṭhānavasena manasikārassa samudayo satindriyassa samudayo hoti, avikkhepavasena manasikārassa samudayo samādhindriyassa samudayo hoti, dassanavasena manasikārassa samudayo paññindriyassa samudayo hoti. Saddhindriyassa vasena ekattupaṭṭhānaṃ saddhindriyassa samudayo hoti vīriyindriyassa vasena ekattupaṭṭhānaṃ vīriyindriyassa samudayo hoti, satindriyassa vasena ekattupaṭṭhānaṃ satindriyassa samudayo hoti, samādhindriyassa vasena ekattupaṭṭhānaṃ samādhindriyassa samudayo hoti , paññindriyassa vasena ekattupaṭṭhānaṃ paññindriyassa samudayo hoti.
ಇಮೇಹಿ ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯೋ ಹೋತಿ, ಇಮೇಹಿ ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಸಮುದಯಂ ಪಜಾನಾತಿ।
Imehi cattārīsāya ākārehi pañcannaṃ indriyānaṃ samudayo hoti, imehi cattārīsāya ākārehi pañcannaṃ indriyānaṃ samudayaṃ pajānāti.
ಕತಮೇಹಿ ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅತ್ಥಙ್ಗಮೋ ಹೋತಿ; ಕತಮೇಹಿ ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅತ್ಥಙ್ಗಮಂ ಪಜಾನಾತಿ? ಅಧಿಮೋಕ್ಖತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ಸದ್ಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಅಧಿಮೋಕ್ಖವಸೇನ ಛನ್ದಸ್ಸ ಅತ್ಥಙ್ಗಮೋ ಸದ್ಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಅಧಿಮೋಕ್ಖವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ಸದ್ಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಸದ್ಧಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ 9 ಸದ್ಧಿನ್ದ್ರಿಯಸ್ಸ ವಸೇನ ಅತ್ಥಙ್ಗಮೋ ಹೋತಿ; ಪಗ್ಗಹತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ವೀರಿಯಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಪಗ್ಗಹವಸೇನ ಛನ್ದಸ್ಸ ಅತ್ಥಙ್ಗಮೋ ವೀರಿಯಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಪಗ್ಗಹವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ವೀರಿಯಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ವೀರಿಯಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ ವೀರಿಯಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ; ಉಪಟ್ಠಾನತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ಸತಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಉಪಟ್ಠಾನವಸೇನ ಛನ್ದಸ್ಸ ಅತ್ಥಙ್ಗಮೋ ಸತಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಉಪಟ್ಠಾನವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ಸತಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಸತಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ ಸತಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ; ಅವಿಕ್ಖೇಪತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ಸಮಾಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಅವಿಕ್ಖೇಪವಸೇನ ಛನ್ದಸ್ಸ ಅತ್ಥಙ್ಗಮೋ ಸಮಾಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಅವಿಕ್ಖೇಪವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ಸಮಾಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಸಮಾಧಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ ಸಮಾಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ; ದಸ್ಸನತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ಪಞ್ಞಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ದಸ್ಸನವಸೇನ ಛನ್ದಸ್ಸ ಅತ್ಥಙ್ಗಮೋ ಪಞ್ಞಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ದಸ್ಸನವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ಪಞ್ಞಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಪಞ್ಞಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ ಪಞ್ಞಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ।
Katamehi cattārīsāya ākārehi pañcannaṃ indriyānaṃ atthaṅgamo hoti; katamehi cattārīsāya ākārehi pañcannaṃ indriyānaṃ atthaṅgamaṃ pajānāti? Adhimokkhatthāya āvajjanāya atthaṅgamo saddhindriyassa atthaṅgamo hoti, adhimokkhavasena chandassa atthaṅgamo saddhindriyassa atthaṅgamo hoti, adhimokkhavasena manasikārassa atthaṅgamo saddhindriyassa atthaṅgamo hoti, saddhindriyassa vasena ekattaanupaṭṭhānaṃ 10 saddhindriyassa vasena atthaṅgamo hoti; paggahatthāya āvajjanāya atthaṅgamo vīriyindriyassa atthaṅgamo hoti, paggahavasena chandassa atthaṅgamo vīriyindriyassa atthaṅgamo hoti, paggahavasena manasikārassa atthaṅgamo vīriyindriyassa atthaṅgamo hoti, vīriyindriyassa vasena ekattaanupaṭṭhānaṃ vīriyindriyassa atthaṅgamo hoti; upaṭṭhānatthāya āvajjanāya atthaṅgamo satindriyassa atthaṅgamo hoti, upaṭṭhānavasena chandassa atthaṅgamo satindriyassa atthaṅgamo hoti, upaṭṭhānavasena manasikārassa atthaṅgamo satindriyassa atthaṅgamo hoti, satindriyassa vasena ekattaanupaṭṭhānaṃ satindriyassa atthaṅgamo hoti; avikkhepatthāya āvajjanāya atthaṅgamo samādhindriyassa atthaṅgamo hoti, avikkhepavasena chandassa atthaṅgamo samādhindriyassa atthaṅgamo hoti, avikkhepavasena manasikārassa atthaṅgamo samādhindriyassa atthaṅgamo hoti, samādhindriyassa vasena ekattaanupaṭṭhānaṃ samādhindriyassa atthaṅgamo hoti; dassanatthāya āvajjanāya atthaṅgamo paññindriyassa atthaṅgamo hoti, dassanavasena chandassa atthaṅgamo paññindriyassa atthaṅgamo hoti, dassanavasena manasikārassa atthaṅgamo paññindriyassa atthaṅgamo hoti, paññindriyassa vasena ekattaanupaṭṭhānaṃ paññindriyassa atthaṅgamo hoti.
ಅಧಿಮೋಕ್ಖತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ಸದ್ಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಪಗ್ಗಹತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ವೀರಿಯಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಉಪಟ್ಠಾನತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ಸತಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಅವಿಕ್ಖೇಪತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ಸಮಾಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ದಸ್ಸನತ್ಥಾಯ ಆವಜ್ಜನಾಯ ಅತ್ಥಙ್ಗಮೋ ಪಞ್ಞಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ। ಅಧಿಮೋಕ್ಖವಸೇನ ಛನ್ದಸ್ಸ ಅತ್ಥಙ್ಗಮೋ ಸದ್ಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಪಗ್ಗಹವಸೇನ ಛನ್ದಸ್ಸ ಅತ್ಥಙ್ಗಮೋ ವೀರಿಯಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಉಪಟ್ಠಾನವಸೇನ ಛನ್ದಸ್ಸ ಅತ್ಥಙ್ಗಮೋ ಸತಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಅವಿಕ್ಖೇಪವಸೇನ ಛನ್ದಸ್ಸ ಅತ್ಥಙ್ಗಮೋ ಸಮಾಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ದಸ್ಸನವಸೇನ ಛನ್ದಸ್ಸ ಅತ್ಥಙ್ಗಮೋ ಪಞ್ಞಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ। ಅಧಿಮೋಕ್ಖವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ಸದ್ಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಪಗ್ಗಹವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ವೀರಿಯಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಉಪಟ್ಠಾನವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ಸತಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಅವಿಕ್ಖೇಪವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ಸಮಾಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ದಸ್ಸನವಸೇನ ಮನಸಿಕಾರಸ್ಸ ಅತ್ಥಙ್ಗಮೋ ಪಞ್ಞಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ। ಸದ್ಧಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ ಸದ್ಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ವೀರಿಯಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ ವೀರಿಯಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಸತಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ ಸತಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಸಮಾಧಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ ಸಮಾಧಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ, ಪಞ್ಞಿನ್ದ್ರಿಯಸ್ಸ ವಸೇನ ಏಕತ್ತಅನುಪಟ್ಠಾನಂ ಪಞ್ಞಿನ್ದ್ರಿಯಸ್ಸ ಅತ್ಥಙ್ಗಮೋ ಹೋತಿ।
Adhimokkhatthāya āvajjanāya atthaṅgamo saddhindriyassa atthaṅgamo hoti, paggahatthāya āvajjanāya atthaṅgamo vīriyindriyassa atthaṅgamo hoti, upaṭṭhānatthāya āvajjanāya atthaṅgamo satindriyassa atthaṅgamo hoti, avikkhepatthāya āvajjanāya atthaṅgamo samādhindriyassa atthaṅgamo hoti, dassanatthāya āvajjanāya atthaṅgamo paññindriyassa atthaṅgamo hoti. Adhimokkhavasena chandassa atthaṅgamo saddhindriyassa atthaṅgamo hoti, paggahavasena chandassa atthaṅgamo vīriyindriyassa atthaṅgamo hoti, upaṭṭhānavasena chandassa atthaṅgamo satindriyassa atthaṅgamo hoti, avikkhepavasena chandassa atthaṅgamo samādhindriyassa atthaṅgamo hoti, dassanavasena chandassa atthaṅgamo paññindriyassa atthaṅgamo hoti. Adhimokkhavasena manasikārassa atthaṅgamo saddhindriyassa atthaṅgamo hoti, paggahavasena manasikārassa atthaṅgamo vīriyindriyassa atthaṅgamo hoti, upaṭṭhānavasena manasikārassa atthaṅgamo satindriyassa atthaṅgamo hoti, avikkhepavasena manasikārassa atthaṅgamo samādhindriyassa atthaṅgamo hoti, dassanavasena manasikārassa atthaṅgamo paññindriyassa atthaṅgamo hoti. Saddhindriyassa vasena ekattaanupaṭṭhānaṃ saddhindriyassa atthaṅgamo hoti, vīriyindriyassa vasena ekattaanupaṭṭhānaṃ vīriyindriyassa atthaṅgamo hoti, satindriyassa vasena ekattaanupaṭṭhānaṃ satindriyassa atthaṅgamo hoti, samādhindriyassa vasena ekattaanupaṭṭhānaṃ samādhindriyassa atthaṅgamo hoti, paññindriyassa vasena ekattaanupaṭṭhānaṃ paññindriyassa atthaṅgamo hoti.
ಇಮೇಹಿ ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅತ್ಥಙ್ಗಮೋ ಹೋತಿ; ಇಮೇಹಿ ಚತ್ತಾರೀಸಾಯ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅತ್ಥಙ್ಗಮಂ ಪಜಾನಾತಿ।
Imehi cattārīsāya ākārehi pañcannaṃ indriyānaṃ atthaṅgamo hoti; imehi cattārīsāya ākārehi pañcannaṃ indriyānaṃ atthaṅgamaṃ pajānāti.
ಕ. ಅಸ್ಸಾದನಿದ್ದೇಸೋ
Ka. assādaniddeso
೧೮೯. ಕತಮೇಹಿ ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅಸ್ಸಾದೋ ಹೋತಿ; ಕತಮೇಹಿ ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅಸ್ಸಾದಂ ಪಜಾನಾತಿ? ಅಸ್ಸದ್ಧಿಯಸ್ಸ ಅನುಪಟ್ಠಾನಂ ಸದ್ಧಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಅಸ್ಸದ್ಧಿಯಪರಿಳಾಹಸ್ಸ ಅನುಪಟ್ಠಾನಂ ಸದ್ಧಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಅಧಿಮೋಕ್ಖಚರಿಯಾಯ ವೇಸಾರಜ್ಜಂ ಸದ್ಧಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಸನ್ತೋ ಚ ವಿಹಾರಾಧಿಗಮೋ ಸದ್ಧಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಯಂ ಸದ್ಧಿನ್ದ್ರಿಯಂ ಪಟಿಚ್ಚ ಉಪ್ಪಜ್ಜತಿ ಸುಖಂ ಸೋಮನಸ್ಸಂ ಅಯಂ ಸದ್ಧಿನ್ದ್ರಿಯಸ್ಸ ಅಸ್ಸಾದೋ।
189. Katamehi pañcavīsatiyā ākārehi pañcannaṃ indriyānaṃ assādo hoti; katamehi pañcavīsatiyā ākārehi pañcannaṃ indriyānaṃ assādaṃ pajānāti? Assaddhiyassa anupaṭṭhānaṃ saddhindriyassa assādo hoti, assaddhiyapariḷāhassa anupaṭṭhānaṃ saddhindriyassa assādo hoti, adhimokkhacariyāya vesārajjaṃ saddhindriyassa assādo hoti, santo ca vihārādhigamo saddhindriyassa assādo hoti, yaṃ saddhindriyaṃ paṭicca uppajjati sukhaṃ somanassaṃ ayaṃ saddhindriyassa assādo.
ಕೋಸಜ್ಜಸ್ಸ ಅನುಪಟ್ಠಾನಂ ವೀರಿಯಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಕೋಸಜ್ಜಪರಿಳಾಹಸ್ಸ ಅನುಪಟ್ಠಾನಂ ವೀರಿಯಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಪಗ್ಗಹಚರಿಯಾಯ ವೇಸಾರಜ್ಜಂ ವೀರಿಯಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಸನ್ತೋ ಚ ವಿಹಾರಾಧಿಗಮೋ ವೀರಿಯಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಯಂ ವೀರಿಯಿನ್ದ್ರಿಯಂ ಪಟಿಚ್ಚ ಉಪ್ಪಜ್ಜತಿ ಸುಖಂ ಸೋಮನಸ್ಸಂ ಅಯಂ ವೀರಿಯಿನ್ದ್ರಿಯಸ್ಸ ಅಸ್ಸಾದೋ।
Kosajjassa anupaṭṭhānaṃ vīriyindriyassa assādo hoti, kosajjapariḷāhassa anupaṭṭhānaṃ vīriyindriyassa assādo hoti, paggahacariyāya vesārajjaṃ vīriyindriyassa assādo hoti, santo ca vihārādhigamo vīriyindriyassa assādo hoti, yaṃ vīriyindriyaṃ paṭicca uppajjati sukhaṃ somanassaṃ ayaṃ vīriyindriyassa assādo.
ಪಮಾದಸ್ಸ ಅನುಪಟ್ಠಾನಂ ಸತಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಪಮಾದಪರಿಳಾಹಸ್ಸ ಅನುಪಟ್ಠಾನಂ ಸತಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಉಪಟ್ಠಾನಚರಿಯಾಯ ವೇಸಾರಜ್ಜಂ ಸತಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಸನ್ತೋ ಚ ವಿಹಾರಾಧಿಗಮೋ ಸತಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಯಂ ಸತಿನ್ದ್ರಿಯಂ ಪಟಿಚ್ಚ ಉಪ್ಪಜ್ಜತಿ ಸುಖಂ ಸೋಮನಸ್ಸಂ ಅಯಂ ಸತಿನ್ದ್ರಿಯಸ್ಸ ಅಸ್ಸಾದೋ।
Pamādassa anupaṭṭhānaṃ satindriyassa assādo hoti, pamādapariḷāhassa anupaṭṭhānaṃ satindriyassa assādo hoti, upaṭṭhānacariyāya vesārajjaṃ satindriyassa assādo hoti, santo ca vihārādhigamo satindriyassa assādo hoti, yaṃ satindriyaṃ paṭicca uppajjati sukhaṃ somanassaṃ ayaṃ satindriyassa assādo.
ಉದ್ಧಚ್ಚಸ್ಸ ಅನುಪಟ್ಠಾನಂ ಸಮಾಧಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಉದ್ಧಚ್ಚಪರಿಳಾಹಸ್ಸ ಅನುಪಟ್ಠಾನಂ ಸಮಾಧಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಅವಿಕ್ಖೇಪಚರಿಯಾಯ ವೇಸಾರಜ್ಜಂ ಸಮಾಧಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಸನ್ತೋ ಚ ವಿಹಾರಾಧಿಗಮೋ ಸಮಾಧಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಯಂ ಸಮಾಧಿನ್ದ್ರಿಯಂ ಪಟಿಚ್ಚ ಉಪ್ಪಜ್ಜತಿ ಸುಖಂ ಸೋಮನಸ್ಸಂ ಅಯಂ ಸಮಾಧಿನ್ದ್ರಿಯಸ್ಸ ಅಸ್ಸಾದೋ।
Uddhaccassa anupaṭṭhānaṃ samādhindriyassa assādo hoti, uddhaccapariḷāhassa anupaṭṭhānaṃ samādhindriyassa assādo hoti, avikkhepacariyāya vesārajjaṃ samādhindriyassa assādo hoti, santo ca vihārādhigamo samādhindriyassa assādo hoti, yaṃ samādhindriyaṃ paṭicca uppajjati sukhaṃ somanassaṃ ayaṃ samādhindriyassa assādo.
ಅವಿಜ್ಜಾಯ ಅನುಪಟ್ಠಾನಂ ಪಞ್ಞಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಅವಿಜ್ಜಾಪರಿಳಾಹಸ್ಸ ಅನುಪಟ್ಠಾನಂ ಪಞ್ಞಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ದಸ್ಸನಚರಿಯಾಯ ವೇಸಾರಜ್ಜಂ ಪಞ್ಞಿನ್ದ್ರಿಯಸ್ಸ ಅಸ್ಸಾದೋ ಹೋತಿ , ಸನ್ತೋ ಚ ವಿಹಾರಾಧಿಗಮೋ ಪಞ್ಞಿನ್ದ್ರಿಯಸ್ಸ ಅಸ್ಸಾದೋ ಹೋತಿ, ಯಂ ಪಞ್ಞಿನ್ದ್ರಿಯಂ ಪಟಿಚ್ಚ ಉಪ್ಪಜ್ಜತಿ ಸುಖಂ ಸೋಮನಸ್ಸಂ ಅಯಂ ಪಞ್ಞಿನ್ದ್ರಿಯಸ್ಸ ಅಸ್ಸಾದೋ।
Avijjāya anupaṭṭhānaṃ paññindriyassa assādo hoti, avijjāpariḷāhassa anupaṭṭhānaṃ paññindriyassa assādo hoti, dassanacariyāya vesārajjaṃ paññindriyassa assādo hoti , santo ca vihārādhigamo paññindriyassa assādo hoti, yaṃ paññindriyaṃ paṭicca uppajjati sukhaṃ somanassaṃ ayaṃ paññindriyassa assādo.
ಇಮೇಹಿ ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅಸ್ಸಾದೋ ಹೋತಿ; ಇಮೇಹಿ ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಅಸ್ಸಾದಂ ಪಜಾನಾತಿ।
Imehi pañcavīsatiyā ākārehi pañcannaṃ indriyānaṃ assādo hoti; imehi pañcavīsatiyā ākārehi pañcannaṃ indriyānaṃ assādaṃ pajānāti.
ಖ. ಆದೀನವನಿದ್ದೇಸೋ
Kha. ādīnavaniddeso
೧೯೦. ಕತಮೇಹಿ ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಆದೀನವೋ ಹೋತಿ; ಕತಮೇಹಿ ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಆದೀನವಂ ಪಜಾನಾತಿ? ಅಸ್ಸದ್ಧಿಯಸ್ಸ ಉಪಟ್ಠಾನಂ ಸದ್ಧಿನ್ದ್ರಿಯಸ್ಸ ಆದೀನವೋ ಹೋತಿ, ಅಸ್ಸದ್ಧಿಯಪರಿಳಾಹಸ್ಸ ಉಪಟ್ಠಾನಂ ಸದ್ಧಿನ್ದ್ರಿಯಸ್ಸ ಆದೀನವೋ ಹೋತಿ, ಅನಿಚ್ಚಟ್ಠೇನ ಸದ್ಧಿನ್ದ್ರಿಯಸ್ಸ ಆದೀನವೋ ಹೋತಿ, ದುಕ್ಖಟ್ಠೇನ ಸದ್ಧಿನ್ದ್ರಿಯಸ್ಸ ಆದೀನವೋ ಹೋತಿ, ಅನತ್ತಟ್ಠೇನ ಸದ್ಧಿನ್ದ್ರಿಯಸ್ಸ ಆದೀನವೋ ಹೋತಿ।
190. Katamehi pañcavīsatiyā ākārehi pañcannaṃ indriyānaṃ ādīnavo hoti; katamehi pañcavīsatiyā ākārehi pañcannaṃ indriyānaṃ ādīnavaṃ pajānāti? Assaddhiyassa upaṭṭhānaṃ saddhindriyassa ādīnavo hoti, assaddhiyapariḷāhassa upaṭṭhānaṃ saddhindriyassa ādīnavo hoti, aniccaṭṭhena saddhindriyassa ādīnavo hoti, dukkhaṭṭhena saddhindriyassa ādīnavo hoti, anattaṭṭhena saddhindriyassa ādīnavo hoti.
ಕೋಸಜ್ಜಸ್ಸ ಉಪಟ್ಠಾನಂ ವೀರಿಯಿನ್ದ್ರಿಯಸ್ಸ ಆದೀನವೋ ಹೋತಿ, ಕೋಸಜ್ಜಪರಿಳಾಹಸ್ಸ ಉಪಟ್ಠಾನಂ ವೀರಿಯಿನ್ದ್ರಿಯಸ್ಸ ಆದೀನವೋ ಹೋತಿ, ಅನಿಚ್ಚಟ್ಠೇನ ವೀರಿಯಿನ್ದ್ರಿಯಸ್ಸ ಆದೀನವೋ ಹೋತಿ, ದುಕ್ಖಟ್ಠೇನ…ಪೇ॰… ಅನತ್ತಟ್ಠೇನ ವೀರಿಯಿನ್ದ್ರಿಯಸ್ಸ ಆದೀನವೋ ಹೋತಿ।
Kosajjassa upaṭṭhānaṃ vīriyindriyassa ādīnavo hoti, kosajjapariḷāhassa upaṭṭhānaṃ vīriyindriyassa ādīnavo hoti, aniccaṭṭhena vīriyindriyassa ādīnavo hoti, dukkhaṭṭhena…pe… anattaṭṭhena vīriyindriyassa ādīnavo hoti.
ಪಮಾದಸ್ಸ ಉಪಟ್ಠಾನಂ ಸತಿನ್ದ್ರಿಯಸ್ಸ ಆದೀನವೋ ಹೋತಿ, ಪಮಾದಪರಿಳಾಹಸ್ಸ ಉಪಟ್ಠಾನಂ ಸತಿನ್ದ್ರಿಯಸ್ಸ ಆದೀನವೋ ಹೋತಿ, ಅನಿಚ್ಚಟ್ಠೇನ ಸತಿನ್ದ್ರಿಯಸ್ಸ ಆದೀನವೋ ಹೋತಿ, ದುಕ್ಖಟ್ಠೇನ…ಪೇ॰… ಅನತ್ತಟ್ಠೇನ ಸತಿನ್ದ್ರಿಯಸ್ಸ ಆದೀನವೋ ಹೋತಿ।
Pamādassa upaṭṭhānaṃ satindriyassa ādīnavo hoti, pamādapariḷāhassa upaṭṭhānaṃ satindriyassa ādīnavo hoti, aniccaṭṭhena satindriyassa ādīnavo hoti, dukkhaṭṭhena…pe… anattaṭṭhena satindriyassa ādīnavo hoti.
ಉದ್ಧಚ್ಚಸ್ಸ ಉಪಟ್ಠಾನಂ ಸಮಾಧಿನ್ದ್ರಿಯಸ್ಸ ಆದೀನವೋ ಹೋತಿ, ಉದ್ಧಚ್ಚಪರಿಳಾಹಸ್ಸ ಉಪಟ್ಠಾನಂ ಸಮಾಧಿನ್ದ್ರಿಯಸ್ಸ ಆದೀನವೋ ಹೋತಿ, ಅನಿಚ್ಚಟ್ಠೇನ ಸಮಾಧಿನ್ದ್ರಿಯಸ್ಸ ಆದೀನವೋ ಹೋತಿ, ದುಕ್ಖಟ್ಠೇನ…ಪೇ॰… ಅನತ್ತಟ್ಠೇನ ಸಮಾಧಿನ್ದ್ರಿಯಸ್ಸ ಆದೀನವೋ ಹೋತಿ।
Uddhaccassa upaṭṭhānaṃ samādhindriyassa ādīnavo hoti, uddhaccapariḷāhassa upaṭṭhānaṃ samādhindriyassa ādīnavo hoti, aniccaṭṭhena samādhindriyassa ādīnavo hoti, dukkhaṭṭhena…pe… anattaṭṭhena samādhindriyassa ādīnavo hoti.
ಅವಿಜ್ಜಾಯ ಉಪಟ್ಠಾನಂ ಪಞ್ಞಿನ್ದ್ರಿಯಸ್ಸ ಆದೀನವೋ ಹೋತಿ, ಅವಿಜ್ಜಾಪರಿಳಾಹಸ್ಸ ಉಪಟ್ಠಾನಂ ಪಞ್ಞಿನ್ದ್ರಿಯಸ್ಸ ಆದೀನವೋ ಹೋತಿ, ಅನಿಚ್ಚಟ್ಠೇನ ಪಞ್ಞಿನ್ದ್ರಿಯಸ್ಸ ಆದೀನವೋ ಹೋತಿ, ದುಕ್ಖಟ್ಠೇನ ಪಞ್ಞಿನ್ದ್ರಿಯಸ್ಸ ಆದೀನವೋ ಹೋತಿ, ಅನತ್ತಟ್ಠೇನ ಪಞ್ಞಿನ್ದ್ರಿಯಸ್ಸ ಆದೀನವೋ ಹೋತಿ।
Avijjāya upaṭṭhānaṃ paññindriyassa ādīnavo hoti, avijjāpariḷāhassa upaṭṭhānaṃ paññindriyassa ādīnavo hoti, aniccaṭṭhena paññindriyassa ādīnavo hoti, dukkhaṭṭhena paññindriyassa ādīnavo hoti, anattaṭṭhena paññindriyassa ādīnavo hoti.
ಇಮೇಹಿ ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಆದೀನವೋ ಹೋತಿ; ಇಮೇಹಿ ಪಞ್ಚವೀಸತಿಯಾ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ಆದೀನವಂ ಪಜಾನಾತಿ।
Imehi pañcavīsatiyā ākārehi pañcannaṃ indriyānaṃ ādīnavo hoti; imehi pañcavīsatiyā ākārehi pañcannaṃ indriyānaṃ ādīnavaṃ pajānāti.
ಗ. ನಿಸ್ಸರಣನಿದ್ದೇಸೋ
Ga. nissaraṇaniddeso
೧೯೧. ಕತಮೇಹಿ ಅಸೀತಿಸತಂ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ನಿಸ್ಸರಣಂ ಹೋತಿ; ಕತಮೇಹಿ ಅಸೀತಿಸತಂ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ನಿಸ್ಸರಣಂ ಪಜಾನಾತಿ? ಅಧಿಮೋಕ್ಖಟ್ಠೇನ ಸದ್ಧಿನ್ದ್ರಿಯಂ ಅಸ್ಸದ್ಧಿಯಾ ನಿಸ್ಸಟಂ ಹೋತಿ, ಅಸ್ಸದ್ಧಿಯಪರಿಳಾಹಾ ನಿಸ್ಸಟಂ ಹೋತಿ, ತದನುವತ್ತಕಕಿಲೇಸೇಹಿ ಚ ಖನ್ಧೇಹಿ ಚ ನಿಸ್ಸಟಂ ಹೋತಿ, ಬಹಿದ್ಧಾ ಚ ಸಬ್ಬನಿಮಿತ್ತೇಹಿ ನಿಸ್ಸಟಂ ಹೋತಿ, ತತೋ ಪಣೀತತರಸದ್ಧಿನ್ದ್ರಿಯಸ್ಸ ಪಟಿಲಾಭಾ ಪುರಿಮತರಸದ್ಧಿನ್ದ್ರಿಯಾ ನಿಸ್ಸಟಂ ಹೋತಿ; ಪಗ್ಗಹಟ್ಠೇನ ವೀರಿಯಿನ್ದ್ರಿಯಂ ಕೋಸಜ್ಜಾ ನಿಸ್ಸಟಂ ಹೋತಿ, ಕೋಸಜ್ಜಪರಿಳಾಹಾ ನಿಸ್ಸಟಂ ಹೋತಿ, ತದನುವತ್ತಕಕಿಲೇಸೇಹಿ ಚ ಖನ್ಧೇಹಿ ಚ ನಿಸ್ಸಟಂ ಹೋತಿ, ಬಹಿದ್ಧಾ ಚ ಸಬ್ಬನಿಮಿತ್ತೇಹಿ ನಿಸ್ಸಟಂ ಹೋತಿ, ತತೋ ಪಣೀತತರವೀರಿಯಿನ್ದ್ರಿಯಸ್ಸ ಪಟಿಲಾಭಾ ಪುರಿಮತರವೀರಿಯಿನ್ದ್ರಿಯಾ ನಿಸ್ಸಟಂ ಹೋತಿ; ಉಪಟ್ಠಾನಟ್ಠೇನ ಸತಿನ್ದ್ರಿಯಂ ಪಮಾದಾ ನಿಸ್ಸಟಂ ಹೋತಿ, ಪಮಾದಪರಿಳಾಹಾ ನಿಸ್ಸಟಂ ಹೋತಿ , ತದನುವತ್ತಕಕಿಲೇಸೇಹಿ ಚ ಖನ್ಧೇಹಿ ಚ ನಿಸ್ಸಟಂ ಹೋತಿ, ಬಹಿದ್ಧಾ ಚ ಸಬ್ಬನಿಮಿತ್ತೇಹಿ ನಿಸ್ಸಟಂ ಹೋತಿ, ತತೋ ಪಣೀತತರಸತಿನ್ದ್ರಿಯಸ್ಸ ಪಟಿಲಾಭಾ ಪುರಿಮತರಸತಿನ್ದ್ರಿಯಾ ನಿಸ್ಸಟಂ ಹೋತಿ; ಅವಿಕ್ಖೇಪಟ್ಠೇನ ಸಮಾಧಿನ್ದ್ರಿಯಂ ಉದ್ಧಚ್ಚಾ ನಿಸ್ಸಟಂ ಹೋತಿ, ಉದ್ಧಚ್ಚಪರಿಳಾಹಾ ನಿಸ್ಸಟಂ ಹೋತಿ, ತದನುವತ್ತಕಕಿಲೇಸೇಹಿ ಚ ಖನ್ಧೇಹಿ ಚ ನಿಸ್ಸಟಂ ಹೋತಿ, ಬಹಿದ್ಧಾ ಚ ಸಬ್ಬನಿಮಿತ್ತೇಹಿ ನಿಸ್ಸಟಂ ಹೋತಿ, ತತೋ ಪಣೀತತರಸಮಾಧಿನ್ದ್ರಿಯಸ್ಸ ಪಟಿಲಾಭಾ ಪುರಿಮತರಸಮಾಧಿನ್ದ್ರಿಯಾ ನಿಸ್ಸಟಂ ಹೋತಿ; ದಸ್ಸನಟ್ಠೇನ ಪಞ್ಞಿನ್ದ್ರಿಯಂ ಅವಿಜ್ಜಾಯ ನಿಸ್ಸಟಂ ಹೋತಿ, ಅವಿಜ್ಜಾಪರಿಳಾಹಾ ನಿಸ್ಸಟಂ ಹೋತಿ, ತದನುವತ್ತಕಕಿಲೇಸೇಹಿ ಚ ಖನ್ಧೇಹಿ ಚ ನಿಸ್ಸಟಂ ಹೋತಿ, ಬಹಿದ್ಧಾ ಚ ಸಬ್ಬನಿಮಿತ್ತೇಹಿ ನಿಸ್ಸಟಂ ಹೋತಿ, ತತೋ ಪಣೀತತರಪಞ್ಞಿನ್ದ್ರಿಯಸ್ಸ ಪಟಿಲಾಭಾ ಪುರಿಮತರಪಞ್ಞಿನ್ದ್ರಿಯಾ ನಿಸ್ಸಟಂ ಹೋತಿ।
191. Katamehi asītisataṃ ākārehi pañcannaṃ indriyānaṃ nissaraṇaṃ hoti; katamehi asītisataṃ ākārehi pañcannaṃ indriyānaṃ nissaraṇaṃ pajānāti? Adhimokkhaṭṭhena saddhindriyaṃ assaddhiyā nissaṭaṃ hoti, assaddhiyapariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarasaddhindriyassa paṭilābhā purimatarasaddhindriyā nissaṭaṃ hoti; paggahaṭṭhena vīriyindriyaṃ kosajjā nissaṭaṃ hoti, kosajjapariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītataravīriyindriyassa paṭilābhā purimataravīriyindriyā nissaṭaṃ hoti; upaṭṭhānaṭṭhena satindriyaṃ pamādā nissaṭaṃ hoti, pamādapariḷāhā nissaṭaṃ hoti , tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarasatindriyassa paṭilābhā purimatarasatindriyā nissaṭaṃ hoti; avikkhepaṭṭhena samādhindriyaṃ uddhaccā nissaṭaṃ hoti, uddhaccapariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarasamādhindriyassa paṭilābhā purimatarasamādhindriyā nissaṭaṃ hoti; dassanaṭṭhena paññindriyaṃ avijjāya nissaṭaṃ hoti, avijjāpariḷāhā nissaṭaṃ hoti, tadanuvattakakilesehi ca khandhehi ca nissaṭaṃ hoti, bahiddhā ca sabbanimittehi nissaṭaṃ hoti, tato paṇītatarapaññindriyassa paṭilābhā purimatarapaññindriyā nissaṭaṃ hoti.
೧೯೨. ಪುಬ್ಬಭಾಗೇ ಪಞ್ಚಹಿ ಇನ್ದ್ರಿಯೇಹಿ ಪಠಮಜ್ಝಾನವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಪಠಮೇ ಝಾನೇ ಪಞ್ಚಹಿನ್ದ್ರಿಯೇಹಿ ದುತಿಯಜ್ಝಾನವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ದುತಿಯೇ ಝಾನೇ ಪಞ್ಚಹಿನ್ದ್ರಿಯೇಹಿ ತತಿಯಜ್ಝಾನವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ತತಿಯೇ ಝಾನೇ ಪಞ್ಚಹಿನ್ದ್ರಿಯೇಹಿ ಚತುತ್ಥಜ್ಝಾನವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಚತುತ್ಥೇ ಝಾನೇ ಪಞ್ಚಹಿನ್ದ್ರಿಯೇಹಿ ಆಕಾಸಾನಞ್ಚಾಯತನಸಮಾಪತ್ತಿವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ , ಆಕಾಸಾನಞ್ಚಾಯತನಸಮಾಪತ್ತಿಯಾ ಪಞ್ಚಹಿನ್ದ್ರಿಯೇಹಿ ವಿಞ್ಞಾಣಞ್ಚಾಯತನಸಮಾಪತ್ತಿವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ವಿಞ್ಞಾಣಞ್ಚಾಯತನಸಮಾಪತ್ತಿಯಾ ಪಞ್ಚಹಿನ್ದ್ರಿಯೇಹಿ ಆಕಿಞ್ಚಞ್ಞಾಯತನಸಮಾಪತ್ತಿವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಆಕಿಞ್ಚಞ್ಞಾಯತನಸಮಾಪತ್ತಿಯಾ ಪಞ್ಚಹಿನ್ದ್ರಿಯೇಹಿ ನೇವಸಞ್ಞಾನಾಸಞ್ಞಾಯತನಸಮಾಪತ್ತಿವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ನೇವಸಞ್ಞಾನಾಸಞ್ಞಾಯತನಸಮಾಪತ್ತಿಯಾ ಪಞ್ಚಹಿನ್ದ್ರಿಯೇಹಿ ಅನಿಚ್ಚಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ।
192. Pubbabhāge pañcahi indriyehi paṭhamajjhānavasena pañcindriyāni nissaṭāni honti, paṭhame jhāne pañcahindriyehi dutiyajjhānavasena pañcindriyāni nissaṭāni honti, dutiye jhāne pañcahindriyehi tatiyajjhānavasena pañcindriyāni nissaṭāni honti, tatiye jhāne pañcahindriyehi catutthajjhānavasena pañcindriyāni nissaṭāni honti, catutthe jhāne pañcahindriyehi ākāsānañcāyatanasamāpattivasena pañcindriyāni nissaṭāni honti , ākāsānañcāyatanasamāpattiyā pañcahindriyehi viññāṇañcāyatanasamāpattivasena pañcindriyāni nissaṭāni honti, viññāṇañcāyatanasamāpattiyā pañcahindriyehi ākiñcaññāyatanasamāpattivasena pañcindriyāni nissaṭāni honti, ākiñcaññāyatanasamāpattiyā pañcahindriyehi nevasaññānāsaññāyatanasamāpattivasena pañcindriyāni nissaṭāni honti, nevasaññānāsaññāyatanasamāpattiyā pañcahindriyehi aniccānupassanāvasena pañcindriyāni nissaṭāni honti.
ಅನಿಚ್ಚಾನುಪಸ್ಸನಾ ಪಞ್ಚಹಿನ್ದ್ರಿಯೇಹಿ ದುಕ್ಖಾನುಪಸ್ಸನಾವಸೇ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ದುಕ್ಖಾನುಪಸ್ಸನಾ ಪಞ್ಚಹಿನ್ದ್ರಿಯೇಹಿ ಅನತ್ತಾನುಪಸ್ಸನಾವಸೇ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಅನತ್ತಾನುಪಸ್ಸನಾ ಪಞ್ಚಹಿನ್ದ್ರಿಯೇಹಿ ನಿಬ್ಬಿದಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ನಿಬ್ಬಿದಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ವಿರಾಗಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ವಿರಾಗಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ನಿರೋಧಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ನಿರೋಧಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ಪಟಿನಿಸ್ಸಗ್ಗಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಪಟಿನಿಸ್ಸಗ್ಗಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ಖಯಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಖಯಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ವಯಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ವಯಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ವಿಪರಿಣಾಮಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ವಿಪರಿಣಾಮಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ಅನಿಮಿತ್ತಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಅನಿಮಿತ್ತಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ಅಪ್ಪಣಿಹಿತಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಅಪ್ಪಣಿಹಿತಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ಸುಞ್ಞತಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ ಸುಞ್ಞತಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ಅಧಿಪಞ್ಞಾಧಮ್ಮವಿಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ। ಅಧಿಪಞ್ಞಾಧಮ್ಮವಿಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ಯಥಾಭೂತಞಾಣದಸ್ಸನವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಯಥಾಭೂತಞಾಣದಸ್ಸನೇ ಪಞ್ಚಹಿನ್ದ್ರಿಯೇಹಿ ಆದೀನವಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಆದೀನವಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ಪಟಿಸಙ್ಖಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಪಟಿಸಙ್ಖಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ವಿವಟ್ಟನಾನುಪಸ್ಸನಾವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ। ವಿವಟ್ಟನಾನುಪಸ್ಸನಾಯ ಪಞ್ಚಹಿನ್ದ್ರಿಯೇಹಿ ಸೋತಾಪತ್ತಿಮಗ್ಗವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ।
Aniccānupassanā pañcahindriyehi dukkhānupassanāvase pañcindriyāni nissaṭāni honti, dukkhānupassanā pañcahindriyehi anattānupassanāvase pañcindriyāni nissaṭāni honti, anattānupassanā pañcahindriyehi nibbidānupassanāvasena pañcindriyāni nissaṭāni honti, nibbidānupassanāya pañcahindriyehi virāgānupassanāvasena pañcindriyāni nissaṭāni honti, virāgānupassanāya pañcahindriyehi nirodhānupassanāvasena pañcindriyāni nissaṭāni honti, nirodhānupassanāya pañcahindriyehi paṭinissaggānupassanāvasena pañcindriyāni nissaṭāni honti, paṭinissaggānupassanāya pañcahindriyehi khayānupassanāvasena pañcindriyāni nissaṭāni honti, khayānupassanāya pañcahindriyehi vayānupassanāvasena pañcindriyāni nissaṭāni honti, vayānupassanāya pañcahindriyehi vipariṇāmānupassanāvasena pañcindriyāni nissaṭāni honti, vipariṇāmānupassanāya pañcahindriyehi animittānupassanāvasena pañcindriyāni nissaṭāni honti, animittānupassanāya pañcahindriyehi appaṇihitānupassanāvasena pañcindriyāni nissaṭāni honti, appaṇihitānupassanāya pañcahindriyehi suññatānupassanāvasena pañcindriyāni nissaṭāni honti suññatānupassanāya pañcahindriyehi adhipaññādhammavipassanāvasena pañcindriyāni nissaṭāni honti. Adhipaññādhammavipassanāya pañcahindriyehi yathābhūtañāṇadassanavasena pañcindriyāni nissaṭāni honti, yathābhūtañāṇadassane pañcahindriyehi ādīnavānupassanāvasena pañcindriyāni nissaṭāni honti, ādīnavānupassanāya pañcahindriyehi paṭisaṅkhānupassanāvasena pañcindriyāni nissaṭāni honti, paṭisaṅkhānupassanāya pañcahindriyehi vivaṭṭanānupassanāvasena pañcindriyāni nissaṭāni honti. Vivaṭṭanānupassanāya pañcahindriyehi sotāpattimaggavasena pañcindriyāni nissaṭāni honti.
ಸೋತಾಪತ್ತಿಮಗ್ಗೇ ಪಞ್ಚಹಿನ್ದ್ರಿಯೇಹಿ ಸೋತಾಪತ್ತಿಫಲಸಮಾಪತ್ತಿವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಸೋತಾಪತ್ತಿಫಲಸಮಾಪತ್ತಿಯಾ ಪಞ್ಚಹಿನ್ದ್ರಿಯೇಹಿ ಸಕದಾಗಾಮಿಮಗ್ಗವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಸಕದಾಗಾಮಿಮಗ್ಗೇ ಪಞ್ಚಹಿನ್ದ್ರಿಯೇಹಿ ಸಕದಾಗಾಮಿಫಲಸಮಾಪತ್ತಿವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಸಕದಾಗಾಮಿಫಲಸಮಾಪತ್ತಿಯಾ ಪಞ್ಚಹಿನ್ದ್ರಿಯೇಹಿ ಅನಾಗಾಮಿಮಗ್ಗವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಅನಾಗಾಮಿಮಗ್ಗೇ ಪಞ್ಚಹಿನ್ದ್ರಿಯೇಹಿ ಅನಾಗಾಮಿಫಲಸಮಾಪತ್ತಿವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಅನಾಗಾಮಿಫಲಸಮಾಪತ್ತಿಯಾ ಪಞ್ಚಹಿನ್ದ್ರಿಯೇಹಿ ಅರಹತ್ತಮಗ್ಗವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ, ಅರಹತ್ತಮಗ್ಗೇ ಪಞ್ಚಹಿನ್ದ್ರಿಯೇಹಿ ಅರಹತ್ತಫಲಸಮಾಪತ್ತಿವಸೇನ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಹೋನ್ತಿ।
Sotāpattimagge pañcahindriyehi sotāpattiphalasamāpattivasena pañcindriyāni nissaṭāni honti, sotāpattiphalasamāpattiyā pañcahindriyehi sakadāgāmimaggavasena pañcindriyāni nissaṭāni honti, sakadāgāmimagge pañcahindriyehi sakadāgāmiphalasamāpattivasena pañcindriyāni nissaṭāni honti, sakadāgāmiphalasamāpattiyā pañcahindriyehi anāgāmimaggavasena pañcindriyāni nissaṭāni honti, anāgāmimagge pañcahindriyehi anāgāmiphalasamāpattivasena pañcindriyāni nissaṭāni honti, anāgāmiphalasamāpattiyā pañcahindriyehi arahattamaggavasena pañcindriyāni nissaṭāni honti, arahattamagge pañcahindriyehi arahattaphalasamāpattivasena pañcindriyāni nissaṭāni honti.
ನೇಕ್ಖಮ್ಮೇ ಪಞ್ಚಿನ್ದ್ರಿಯಾನಿ ಕಾಮಚ್ಛನ್ದತೋ ನಿಸ್ಸಟಾನಿ ಹೋನ್ತಿ, ಅಬ್ಯಾಪಾದೇ ಪಞ್ಚಿನ್ದ್ರಿಯಾನಿ ಬ್ಯಾಪಾದತೋ ನಿಸ್ಸಟಾನಿ ಹೋನ್ತಿ, ಆಲೋಕಸಞ್ಞಾಯ ಪಞ್ಚಿನ್ದ್ರಿಯಾನಿ ಥಿನಮಿದ್ಧತೋ ನಿಸ್ಸಟಾನಿ ಹೋನ್ತಿ, ಅವಿಕ್ಖೇಪೇ ಪಞ್ಚಿನ್ದ್ರಿಯಾನಿ ಉದ್ಧಚ್ಚತೋ ನಿಸ್ಸಟಾನಿ ಹೋನ್ತಿ, ಧಮ್ಮವವತ್ಥಾನೇ ಪಞ್ಚಿನ್ದ್ರಿಯಾನಿ ವಿಚಿಕಿಚ್ಛಾಯ ನಿಸ್ಸಟಾನಿ ಹೋನ್ತಿ, ಞಾಣೇ ಪಞ್ಚಿನ್ದ್ರಿಯಾನಿ ಅವಿಜ್ಜಾಯ ನಿಸ್ಸಟಾನಿ ಹೋನ್ತಿ, ಪಾಮೋಜ್ಜೇ ಪಞ್ಚಿನ್ದ್ರಿಯಾನಿ ಅರತಿಯಾ ನಿಸ್ಸಟಾನಿ ಹೋನ್ತಿ।
Nekkhamme pañcindriyāni kāmacchandato nissaṭāni honti, abyāpāde pañcindriyāni byāpādato nissaṭāni honti, ālokasaññāya pañcindriyāni thinamiddhato nissaṭāni honti, avikkhepe pañcindriyāni uddhaccato nissaṭāni honti, dhammavavatthāne pañcindriyāni vicikicchāya nissaṭāni honti, ñāṇe pañcindriyāni avijjāya nissaṭāni honti, pāmojje pañcindriyāni aratiyā nissaṭāni honti.
೧೯೩. ಪಠಮೇ ಝಾನೇ ಪಞ್ಚಿನ್ದ್ರಿಯಾನಿ ನೀವರಣೇಹಿ ನಿಸ್ಸಟಾನಿ ಹೋನ್ತಿ, ದುತಿಯೇ ಝಾನೇ ಪಞ್ಚಿನ್ದ್ರಿಯಾನಿ ವಿತಕ್ಕವಿಚಾರೇಹಿ ನಿಸ್ಸಟಾನಿ ಹೋನ್ತಿ, ತತಿಯೇ ಝಾನೇ ಪಞ್ಚಿನ್ದ್ರಿಯಾನಿ ಪೀತಿಯಾ ನಿಸ್ಸಟಾನಿ ಹೋನ್ತಿ, ಚತುತ್ಥೇ ಝಾನೇ ಪಞ್ಚಿನ್ದ್ರಿಯಾನಿ ಸುಖದುಕ್ಖೇಹಿ ನಿಸ್ಸಟಾನಿ ಹೋನ್ತಿ, ಆಕಾಸಾನಞ್ಚಾಯತನಸಮಾಪತ್ತಿಯಾ ಪಞ್ಚಿನ್ದ್ರಿಯಾನಿ ರೂಪಸಞ್ಞಾಯ ಪಟಿಘಸಞ್ಞಾಯ ನಾನತ್ತಸಞ್ಞಾಯ ನಿಸ್ಸಟಾನಿ ಹೋನ್ತಿ, ವಿಞ್ಞಾಣಞ್ಚಾಯತನಸಮಾಪತ್ತಿಯಾ ಪಞ್ಚಿನ್ದ್ರಿಯಾನಿ ಆಕಾಸಾನಞ್ಚಾಯತನಸಞ್ಞಾಯ ನಿಸ್ಸಟಾನಿ ಹೋನ್ತಿ, ಆಕಿಞ್ಚಞ್ಞಾಯತನಸಮಾಪತ್ತಿಯಾ ಪಞ್ಚಿನ್ದ್ರಿಯಾನಿ ವಿಞ್ಞಾಣಞ್ಚಾಯತನಸಞ್ಞಾಯ ನಿಸ್ಸಟಾನಿ ಹೋನ್ತಿ, ನೇವಸಞ್ಞಾನಾಸಞ್ಞಾಯತನಸಮಾಪತ್ತಿಯಾ ಪಞ್ಚಿನ್ದ್ರಿಯಾನಿ ಆಕಿಞ್ಚಞ್ಞಾಯತನಸಞ್ಞಾಯ ನಿಸ್ಸಟಾನಿ ಹೋನ್ತಿ।
193. Paṭhame jhāne pañcindriyāni nīvaraṇehi nissaṭāni honti, dutiye jhāne pañcindriyāni vitakkavicārehi nissaṭāni honti, tatiye jhāne pañcindriyāni pītiyā nissaṭāni honti, catutthe jhāne pañcindriyāni sukhadukkhehi nissaṭāni honti, ākāsānañcāyatanasamāpattiyā pañcindriyāni rūpasaññāya paṭighasaññāya nānattasaññāya nissaṭāni honti, viññāṇañcāyatanasamāpattiyā pañcindriyāni ākāsānañcāyatanasaññāya nissaṭāni honti, ākiñcaññāyatanasamāpattiyā pañcindriyāni viññāṇañcāyatanasaññāya nissaṭāni honti, nevasaññānāsaññāyatanasamāpattiyā pañcindriyāni ākiñcaññāyatanasaññāya nissaṭāni honti.
ಅನಿಚ್ಚಾನುಪಸ್ಸನಾ ಪಞ್ಚಿನ್ದ್ರಿಯಾನಿ ನಿಚ್ಚಸಞ್ಞಾಯ ನಿಸ್ಸಟಾನಿ ಹೋನ್ತಿ, ದುಕ್ಖಾನುಪಸ್ಸನಾ ಪಞ್ಚಿನ್ದ್ರಿಯಾನಿ ಸುಖಸಞ್ಞಾಯ ನಿಸ್ಸಟಾನಿ ಹೋನ್ತಿ, ಅನತ್ತಾನುಪಸ್ಸನಾ ಪಞ್ಚಿನ್ದ್ರಿಯಾನಿ ಅತ್ತಸಞ್ಞಾಯ ನಿಸ್ಸಟಾನಿ ಹೋನ್ತಿ, ನಿಬ್ಬಿದಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ನನ್ದಿಯಾ ನಿಸ್ಸಟಾನಿ ಹೋನ್ತಿ, ವಿರಾಗಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ರಾಗತೋ ನಿಸ್ಸಟಾನಿ ಹೋನ್ತಿ, ನಿರೋಧಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಸಮುದಯತೋ ನಿಸ್ಸಟಾನಿ ಹೋನ್ತಿ, ಪಟಿನಿಸ್ಸಗ್ಗಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಆದಾನತೋ ನಿಸ್ಸಟಾನಿ ಹೋನ್ತಿ, ಖಯಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಘನಸಞ್ಞಾಯ ನಿಸ್ಸಟಾನಿ ಹೋನ್ತಿ , ವಯಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಆಯೂಹನತೋ ನಿಸ್ಸಟಾನಿ ಹೋನ್ತಿ, ವಿಪರಿಣಾಮಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಧುವಸಞ್ಞಾಯ ನಿಸ್ಸಟಾನಿ ಹೋನ್ತಿ, ಅನಿಮಿತ್ತಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ನಿಮಿತ್ತತೋ ನಿಸ್ಸಟಾನಿ ಹೋನ್ತಿ, ಅಪ್ಪಣಿಹಿತಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಪಣಿಧಿಯಾ ನಿಸ್ಸಟಾನಿ ಹೋನ್ತಿ, ಸುಞ್ಞತಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಅಭಿನಿವೇಸತೋ ನಿಸ್ಸಟಾನಿ ಹೋನ್ತಿ। ಅಧಿಪಞ್ಞಾಧಮ್ಮವಿಪಸ್ಸನಾಯ ಪಞ್ಚಿನ್ದ್ರಿಯಾನಿ ಸಾರಾದಾನಾಭಿನಿವೇಸತೋ ನಿಸ್ಸಟಾನಿ ಹೋನ್ತಿ, ಯಥಾಭೂತಞಾಣದಸ್ಸನೇ ಪಞ್ಚಿನ್ದ್ರಿಯಾನಿ ಸಮ್ಮೋಹಾಭಿನಿವೇಸತೋ ನಿಸ್ಸಟಾನಿ ಹೋನ್ತಿ, ಆದೀನವಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಆಲಯಾಭಿನಿವೇಸತೋ ನಿಸ್ಸಟಾನಿ ಹೋನ್ತಿ, ಪಟಿಸಙ್ಖಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಅಪ್ಪಟಿಸಙ್ಖಾಯ ನಿಸ್ಸಟಾನಿ ಹೋನ್ತಿ, ವಿವಟ್ಟನಾನುಪಸ್ಸನಾಯ ಪಞ್ಚಿನ್ದ್ರಿಯಾನಿ ಸಞ್ಞೋಗಾಭಿನಿವೇಸತೋ ನಿಸ್ಸಟಾನಿ ಹೋನ್ತಿ।
Aniccānupassanā pañcindriyāni niccasaññāya nissaṭāni honti, dukkhānupassanā pañcindriyāni sukhasaññāya nissaṭāni honti, anattānupassanā pañcindriyāni attasaññāya nissaṭāni honti, nibbidānupassanāya pañcindriyāni nandiyā nissaṭāni honti, virāgānupassanāya pañcindriyāni rāgato nissaṭāni honti, nirodhānupassanāya pañcindriyāni samudayato nissaṭāni honti, paṭinissaggānupassanāya pañcindriyāni ādānato nissaṭāni honti, khayānupassanāya pañcindriyāni ghanasaññāya nissaṭāni honti , vayānupassanāya pañcindriyāni āyūhanato nissaṭāni honti, vipariṇāmānupassanāya pañcindriyāni dhuvasaññāya nissaṭāni honti, animittānupassanāya pañcindriyāni nimittato nissaṭāni honti, appaṇihitānupassanāya pañcindriyāni paṇidhiyā nissaṭāni honti, suññatānupassanāya pañcindriyāni abhinivesato nissaṭāni honti. Adhipaññādhammavipassanāya pañcindriyāni sārādānābhinivesato nissaṭāni honti, yathābhūtañāṇadassane pañcindriyāni sammohābhinivesato nissaṭāni honti, ādīnavānupassanāya pañcindriyāni ālayābhinivesato nissaṭāni honti, paṭisaṅkhānupassanāya pañcindriyāni appaṭisaṅkhāya nissaṭāni honti, vivaṭṭanānupassanāya pañcindriyāni saññogābhinivesato nissaṭāni honti.
ಸೋತಾಪತ್ತಿಮಗ್ಗೇ ಪಞ್ಚಿನ್ದ್ರಿಯಾನಿ ದಿಟ್ಠೇಕಟ್ಠೇಹಿ ಕಿಲೇಸೇಹಿ ನಿಸ್ಸಟಾನಿ ಹೋನ್ತಿ, ಸಕದಾಗಾಮಿಮಗ್ಗೇ ಪಞ್ಚಿನ್ದ್ರಿಯಾನಿ ಓಳಾರಿಕೇಹಿ ಕಿಲೇಸೇಹಿ ನಿಸ್ಸಟಾನಿ ಹೋನ್ತಿ, ಅನಾಗಾಮಿಮಗ್ಗೇ ಪಞ್ಚಿನ್ದ್ರಿಯಾನಿ ಅನುಸಹಗತೇಹಿ ಕಿಲೇಸೇಹಿ ನಿಸ್ಸಟಾನಿ ಹೋನ್ತಿ, ಅರಹತ್ತಮಗ್ಗೇ ಪಞ್ಚಿನ್ದ್ರಿಯಾನಿ ಸಬ್ಬಕಿಲೇಸೇಹಿ ನಿಸ್ಸಟಾನಿ ಹೋನ್ತಿ, ಸಬ್ಬೇಸಞ್ಞೇವ ಖೀಣಾಸವಾನಂ ತತ್ಥ ತತ್ಥ ಪಞ್ಚಿನ್ದ್ರಿಯಾನಿ ನಿಸ್ಸಟಾನಿ ಚೇವ ಹೋನ್ತಿ ಸುನಿಸ್ಸಟಾನಿ ಚ ಪಟಿಪ್ಪಸ್ಸದ್ಧಾನಿ ಚ ಸುಪ್ಪಟಿಪ್ಪಸ್ಸದ್ಧಾನಿ ಚ।
Sotāpattimagge pañcindriyāni diṭṭhekaṭṭhehi kilesehi nissaṭāni honti, sakadāgāmimagge pañcindriyāni oḷārikehi kilesehi nissaṭāni honti, anāgāmimagge pañcindriyāni anusahagatehi kilesehi nissaṭāni honti, arahattamagge pañcindriyāni sabbakilesehi nissaṭāni honti, sabbesaññeva khīṇāsavānaṃ tattha tattha pañcindriyāni nissaṭāni ceva honti sunissaṭāni ca paṭippassaddhāni ca suppaṭippassaddhāni ca.
ಇಮೇಹಿ ಅಸೀತಿಸತಂ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ನಿಸ್ಸರಣಂ ಹೋತಿ; ಇಮೇಹಿ ಅಸೀತಿಸತಂ ಆಕಾರೇಹಿ ಪಞ್ಚನ್ನಂ ಇನ್ದ್ರಿಯಾನಂ ನಿಸ್ಸರಣಂ ಪಜಾನಾತಿ।
Imehi asītisataṃ ākārehi pañcannaṃ indriyānaṃ nissaraṇaṃ hoti; imehi asītisataṃ ākārehi pañcannaṃ indriyānaṃ nissaraṇaṃ pajānāti.
ಸುತ್ತನ್ತನಿದ್ದೇಸೋ ದುತಿಯೋ।
Suttantaniddeso dutiyo.
ಪಠಮಭಾಣವಾರೋ।
Paṭhamabhāṇavāro.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೨. ದುತಿಯಸುತ್ತನ್ತನಿದ್ದೇಸವಣ್ಣನಾ • 2. Dutiyasuttantaniddesavaṇṇanā
