| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૮. દુતિયતથાગતઅચ્છરિયસુત્તં
8. Dutiyatathāgataacchariyasuttaṃ
૧૨૮. ‘‘તથાગતસ્સ, ભિક્ખવે, અરહતો સમ્માસમ્બુદ્ધસ્સ પાતુભાવા ચત્તારો અચ્છરિયા અબ્ભુતા ધમ્મા પાતુભવન્તિ. કતમે ચત્તારો? આલયારામા 1, ભિક્ખવે, પજા આલયરતા આલયસમ્મુદિતા; સા તથાગતેન અનાલયે ધમ્મે દેસિયમાને સુસ્સૂસતિ સોતં ઓદહતિ અઞ્ઞા ચિત્તં ઉપટ્ઠપેતિ . તથાગતસ્સ, ભિક્ખવે, અરહતો સમ્માસમ્બુદ્ધસ્સ પાતુભાવા અયં પઠમો અચ્છરિયો અબ્ભુતો ધમ્મો પાતુભવતિ.
128. ‘‘Tathāgatassa, bhikkhave, arahato sammāsambuddhassa pātubhāvā cattāro acchariyā abbhutā dhammā pātubhavanti. Katame cattāro? Ālayārāmā 2, bhikkhave, pajā ālayaratā ālayasammuditā; sā tathāgatena anālaye dhamme desiyamāne sussūsati sotaṃ odahati aññā cittaṃ upaṭṭhapeti . Tathāgatassa, bhikkhave, arahato sammāsambuddhassa pātubhāvā ayaṃ paṭhamo acchariyo abbhuto dhammo pātubhavati.
‘‘માનારામા , ભિક્ખવે, પજા માનરતા માનસમ્મુદિતા. સા તથાગતેન માનવિનયે ધમ્મે દેસિયમાને સુસ્સૂસતિ સોતં ઓદહતિ અઞ્ઞા ચિત્તં ઉપટ્ઠપેતિ. તથાગતસ્સ, ભિક્ખવે, અરહતો સમ્માસમ્બુદ્ધસ્સ પાતુભાવા અયં દુતિયો અચ્છરિયો અબ્ભુતો ધમ્મો પાતુભવતિ.
‘‘Mānārāmā , bhikkhave, pajā mānaratā mānasammuditā. Sā tathāgatena mānavinaye dhamme desiyamāne sussūsati sotaṃ odahati aññā cittaṃ upaṭṭhapeti. Tathāgatassa, bhikkhave, arahato sammāsambuddhassa pātubhāvā ayaṃ dutiyo acchariyo abbhuto dhammo pātubhavati.
‘‘અનુપસમારામા, ભિક્ખવે, પજા અનુપસમરતા અનુપસમસમ્મુદિતા. સા તથાગતેન ઓપસમિકે ધમ્મે દેસિયમાને સુસ્સૂસતિ સોતં ઓદહતિ અઞ્ઞા ચિત્તં ઉપટ્ઠપેતિ. તથાગતસ્સ , ભિક્ખવે, અરહતો સમ્માસમ્બુદ્ધસ્સ પાતુભાવા અયં તતિયો અચ્છરિયો અબ્ભુતો ધમ્મો પાતુભવતિ.
‘‘Anupasamārāmā, bhikkhave, pajā anupasamaratā anupasamasammuditā. Sā tathāgatena opasamike dhamme desiyamāne sussūsati sotaṃ odahati aññā cittaṃ upaṭṭhapeti. Tathāgatassa , bhikkhave, arahato sammāsambuddhassa pātubhāvā ayaṃ tatiyo acchariyo abbhuto dhammo pātubhavati.
‘‘અવિજ્જાગતા, ભિક્ખવે, પજા અણ્ડભૂતા પરિયોનદ્ધા. સા તથાગતેન અવિજ્જાવિનયે ધમ્મે દેસિયમાને સુસ્સૂસતિ સોતં ઓદહતિ અઞ્ઞા ચિત્તં ઉપટ્ઠપેતિ. તથાગતસ્સ, ભિક્ખવે, અરહતો સમ્માસમ્બુદ્ધસ્સ પાતુભાવા અયં ચતુત્થો અચ્છરિયો અબ્ભુતો ધમ્મો પાતુભવતિ. તથાગતસ્સ, ભિક્ખવે, અરહતો સમ્માસમ્બુદ્ધસ્સ પાતુભાવા ઇમે ચત્તારો અચ્છરિયા અબ્ભુતા ધમ્મા પાતુભવન્તી’’તિ. અટ્ઠમં.
‘‘Avijjāgatā, bhikkhave, pajā aṇḍabhūtā pariyonaddhā. Sā tathāgatena avijjāvinaye dhamme desiyamāne sussūsati sotaṃ odahati aññā cittaṃ upaṭṭhapeti. Tathāgatassa, bhikkhave, arahato sammāsambuddhassa pātubhāvā ayaṃ catuttho acchariyo abbhuto dhammo pātubhavati. Tathāgatassa, bhikkhave, arahato sammāsambuddhassa pātubhāvā ime cattāro acchariyā abbhutā dhammā pātubhavantī’’ti. Aṭṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૮. દુતિયતથાગતઅચ્છરિયસુત્તવણ્ણના • 8. Dutiyatathāgataacchariyasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૮. દુતિયતથાગતઅચ્છરિયસુત્તવણ્ણના • 8. Dutiyatathāgataacchariyasuttavaṇṇanā
